Oʻzbekiston Respublikasi Hukumati bilan Pokiston Islom Respublikasi Hukumati oʻrtasida madaniyat, sogʻliqni saqlash, fan, texnika, kadrlar tayyorlash, turizm, sport va ommaviy axborot vositalari sohasida hamkorlik toʻgʻrisida 1992-yil 27-iyunda imzolangan Bitimga asoslanib, Oʻzbekiston Respublikasi Hukumati bilan Pokiston Islom Respublikasi Hukumati bundan keyin “Ikki tomon” deb ataladi 2005 — 2009-yillar davomida quyidagi madaniy almashuv dasturini amalga oshirishga kelishib oldi.

Ikki tomon 15 — 20 kun davomida 15 — 20 kishidan iborat boʻlgan folklor/musiqa va raqs truppalari almashuvini amalga oshiradilar.

Ikki tomon ikki hafta davomida rasmlar, kitoblar va hunarmandchilik buyumlari, islom sanʼati va meʼmorchiligi boʻyicha koʻrgazma almashuvini amalga oshiradilar. Koʻrgazma bir mutaxassis ishtirokida oʻtkazilishi lozim.

Ikki tomon 7 — 14 kun davomida 8 — 10 kishidan iborat boʻlgan milliy qoʻshiqchilarning tashrifi bilan oʻzaro almashadilar.

Ikki tomon madaniyati va madaniy anʼanalariga tegishli boʻlgan nashrlar almashuvi amalga oshiriladi.

Ikki tomon taklifnomaga asosan festivalda uning shart-sharoitlariga rioya qilgan holda ishtirok etadilar.

10 — 20 oʻzbek sanʼatkorlari har yil oktyabr oyi davomida Islomobodda Lok Birsa tomonidan tashkil etiladigan Yillik milliy folklor festivalida ishtirok etishlari mumkin. Lokk Birsa, shuningdek, ushbu festivallarda Pokiston nomidan chiqishi mumkin.

Pokiston qoʻshiqchi va musiqachilari har ikki yilda Samarqand shahrida oʻtkaziladigan “Sharq taronalari” xalqaro musiqa festivalida ishtirok etishlari mumkin.

Lok Birsa ikki hafta davomida Oʻzbekistonda oʻzining bir mutaxassisi ishtirokida Pokiston milliy sanʼati va buyumlari koʻrgazmasini oʻtkazadi. Oʻzbekiston tomonidan amalga oshiriladigan xuddi shunday koʻrgazma yaxshi kutib olinadi.

Muzeyshunoslar, musiqashunoslar, falklorshunoslar, kutubxona tadqiqotchilari va milliy sanʼat boʻyicha mutaxassislar oʻn besh kun davomida bir-birlarining davlatlariga tashrif buyurishlari mumkin.

Tomonlar ikki hafta davomida arxiv xodimlari guruhi almashuvini amalga oshiradilar.

Tomonlar arxivga oid nashrlar va arxiv materiallari almashuvini amalga oshiradilar.

Tomonlar 3 oy davomida antikvariat, manuskriptlar va fotosurat koʻrgazmasi almashinuvini, shuningdek ikki davlat qadimiy madaniy boyliklarini birinchi oʻringa olib chiqadilar. Koʻrgazmalar mutaxassislar maʼruzalari yordamida tanishtiriladi.

Har ikki tomon oʻz arxeologiya va yodgorliklarini saqlash sohasida texnologiyalar bilan tanishish maqsadida mutaxassislar almashuvini amalga oshiradilar.

Arxeologiya va uning tarmoqlari sohasidagi nashrlar almashuvi amalga oshiriladi.

Oʻzbekiston tomoni Almashuv dasturida nazarda tutilgan 7 kunlik muddatga 7 kishidan iborat boʻlgan yoshlar delegatsiyasini yuboradi. Pokiston tomoni ham xuddi shunday muddatga 7 kishidan iborat boʻlgan yoshlar delegatsiyasini yuboradi. Ushbu tashriflarning maqsadi, vaqti va muddati oʻzaro diplomatik kanallar orqali aniqlanadi.

Yuboruvchi tomon yoshlar delegatsiyasi xalqaro yoʻl xarajatlarini oʻz zimmasiga oladi va qabul qiluvchi tomon yoshlar delegatsiyasini ovqatlantirish, joylashtirish, tibbiy sugʻurta va ichki tashuv xarajatlarini oʻz zimmasiga oladi.

Tomonlar futbol va voleybol jamoalari almashuvini oʻtkazadilar.

Ushbu dastur yuqorida koʻrsatib oʻtilgan almashuvlardan tashqari diplomatik kanallar orqali kelishib olingan boshqa almashinuvlarni istisno qilmaydi.

Kelishilgan moddalarga oid xarajatlarni amalga oshirishni eʼtiborga olgan holda, yuboruvchi tomon delegatsiyalar, truppa va jamoalarning xalqaro yoʻl xarajatlariga javobgardir va qabul qilib oluvchi tomon ovqatlantirish, joylashtirish, ichki tashuv va boshqa davlat delegatsiya, truppa va jamoalarining tashrifi davomida tibbiy taʼminot xarajatlari uchun javobgardir.

Ushbu dastur imzolangan kundan boshlab kuchga kiradi.

Toshkent shahrida 2005-yil 6-martda ikki nusxada, har biri oʻzbek va ingliz tillarida tuzildi, bunda barcha matnlar bir xil kuchga ega.