Oʻzbekiston Respublikasi Tashqi ishlar vazirligi bilan Saudiya Arabistoni Podshohligi Tashqi ishlar vazirligi, (bundan keyin “Tomonlar” deb ataluvchilar),

ikki mamlakat va xalqlar oʻrtasidagi anʼanaviy doʻstona munosabatlarni eʼtiborga olib,

doʻstona munosabatlar, hamkorlik va oʻzaro anglashuvni qoʻllab-quvvatlash hamda mustahkamlash maqsadida,

ikki tomonlama hamkorlik va oʻzaro anglashuv jahonda tinchlik hamda xavfsizlikni qoʻllab-quvvatlashiga amin boʻlib,

ikki tomonlama munosabatlar va oʻzaro manfaatli xalqaro masalalar boʻyicha turli darajalardagi muntazam maslahatlashuvlarni olib borish muhim ekanligini eʼtirof etib,

Birlashgan Millatlar Tashkiloti Nizomining maqsad va tamoyillariga qatʼiyan rioya etib,

Tomonlar ikki tomonlama munosabatlarning turli jabhalarini muhokama qilish va oʻzaro qiziqish uygʻotuvchi mintaqaviy hamda xalqaro masalalar boʻyicha fikr almashish uchun muntazam ravishda ikki tomonlama muzokara va maslahatlashuvlar olib boradilar. Muzokara va maslahatlashuvlar ikki tomonlama munosabatlar, jahon siyosati rivojlanishi, mintaqaviy va xalqaro bahs hamda nizolar sohasida, xalqaro hamjamiyat duch kelayotgan bahs va muammolarni hal qilishda BMT hamda boshqa xalqaro tashkilotlarga katta ijobiy imkoniyat berishni qamrab oladi.

Ushbu Anglashuv Memorandumi doirasida vazirlar yoki vazir oʻrinbosarlari darajasidagi yoxud har ikkala Tashqi ishlar vazirliklarining boshqa mansabdor shaxslari oʻrtasida masalahatlashuvlar navbatma-navbat zarur hollarda Toshkent va Riyozda oʻtkaziladi.

Ikkala mamlakatning BMT va boshqa xalqaro tashkilotlardagi vakillari oʻz xatti-harakatlarini muvofiqlashtirib boradilar hamda oʻzaro qiziqish uygʻotuvchi barcha masalalar boʻyicha konstruktiv hamkorlik ruhida bir-birlari bilan maslahatlashadilar.

Tomonlar ikki tomonlama kelishuvga muvofiq muntazam va maxsus xalqaro anjumanlarning kun tartibi boʻyicha oʻz pozitsiyalarini muvofiqlashtirish uchun maxsus maslahatlashuvlar olib borishlari mumkin.

Maslahatlashuvlarning vaqti va uning ish jadvallari diplomatik kanallar orqali belgilanadi.

Ushbu Anglashuv Memorandumi besh yil amal qiladi va imzolangan kundan boshlab kuchga kiradi. Tomonlardan biri ushbu Memorandumning amal qilishini toʻxtatish toʻgʻrisida muddat tugagunga qadar olti oy ilgari oʻz niyati haqida boshqa Tomonni yozma ravishda xabardor etmagan boʻlsa, u oʻz-oʻzidan boshqa muddatga yoki besh yillik muddatlarga uzayaveradi.

Riyoz shahrida 2005-yil 6-fevralda ikki nusxada, oʻzbek, arab va ingliz tillarida tuzildi, bunda barcha matnlar bir xil kuchga ega. Matnlarni talqin qilishda kelishmovchiliklar yuzaga kelgan taqdirda ingliz tilidagi matn asosiy hisoblanadi.