Oʻzbekiston Respublikasi fuqaro aviatsiyasida Xalqaro fuqaro aviatsiyasining 60 va 65 yoshga toʻlgan uchuvchilar tarkibiga yoshga oid chegaralarni oʻzgartirish bilan bogʻliq boʻlgan standartlari va tavsiya etilgan amallar (Chikago Konvensiyasining 1-ilovasiga kiritilgan 167-tuzatish) talablarini Oʻzbekiston Respublikasi fuqaro aviatsiyasida joriy qilish maqsadida qaror qilamiz:

1. Oʻzbekiston Respublikasi fuqaro va eksperimental aviatsiyasining 60 va 65 yoshga toʻlgan uchuvchilar tarkibi uchun kasbiy faoliyatni amalga oshirishda beriladigan ruxsatga quyidagi chegaralar kiritilsin:

Oʻzbekiston Respublikasi fuqaro va eksperimental aviatsiyasida parvozlarni bajarishda 65 yoshga toʻlgan uchuvchilar tarkibi oʻz vazifalarini bajarishga;

Oʻzbekiston Respublikasi fuqaro aviatsiyasida xalqaro tijorat tashishlarni bajarishda 60 yoshga toʻlgan uchuvchilar havo kemasi komandiri vazifasini bajarishga qoʻyilmaydilar.

2. Oʻzbekiston Respublikasi Parvozlar xavfsizligini nazorat qilish davlat inspeksiyasi, Mehnat va aholini ijtimoiy muhofaza qilish vazirligi va Sogʻliqni saqlash vazirligining 2001-yil 17-maydagi “Oltmish yoshga toʻlgan aviatsiya xodimlariga Oʻzbekiston Respublikasi fuqaro va eksperimental aviatsiyasi havo kemalarining ekipaj aʼzolari vazifalarini bajarishda kasbiy faoliyatini amalga oshirishga ruxsat etishni chegaralash toʻgʻrisida”gi qarori (2001-yil 19-iyun, roʻyxat raqami 1042) oʻz kuchini yoʻqotgan deb hisoblansin.

3. Mazkur qaror Oʻzbekiston Respublikasi Adliya vazirligida davlat roʻyxatiga olingan kundan boshlab oʻn kundan keyin kuchga kiradi.

4. Mazkur qaror Oʻzbekiston kasaba uyushmalari Federatsiyasi kengashi va “Oʻzbekiston havo yoʻllari” MAK bilan kelishilgan.