“Mualliflik huquqi va turdosh huquqlar toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Quyidagilar:

Asarlar ommaviy ijro etilganligi uchun mualliflik haqining eng kam stavkalari toʻgʻrisidagi nizom 1-ilovaga muvofiq;

Asarlar ovozli yozuvda takrorlanganligi, ovozli yozuvlar va audiovizual asarlar nusxalari prokatga berilganligi uchun mualliflik haqining eng kam stavkalari toʻgʻrisidagi nizom 2-ilovaga muvofiq;

Tasviriy sanʼat asarlari takrorlanganligi va dekorativ-amaliy sanʼat asarlari nusxalari sanoatda koʻpaytirilganligi uchun mualliflik haqining eng kam stavkalari toʻgʻrisidagi nizom 3-ilovaga muvofiq tasdiqlansin.

2. Belgilansinki, mazkur qarorga 1—3-ilovalarda nazarda tutilgan mualliflik haqi stavkalari ularda belgilangan asarlardan foydalanish turlari uchun eng kam hisoblanadi. Mualliflik haqining aniq miqdorini, uni toʻlash tartibi va muddatlarini tomonlar asardan foydalanuvchi va uning muallifi, yoxud ushbu asarga huquq egasi, yoxud mulkiy huquqlarni jamoaviy asosda boshqaruvchi tashkilot oʻrtasida shartnoma tuzishda ulardan olingan vakolatlar doirasida belgilaydilar.

4. Oʻzbekiston SSR Ministrlar Sovetining “Adabiyot va sanʼat asarlari nashr etilganligi, ommaviy ijro etilganligi va ulardan foydalanishning boshqa turlari uchun mualliflik haqi stavkalari toʻgʻrisida” 1988-yil 16-noyabrdagi 428-son qarori oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

1. Ushbu Nizomda nazarda tutilgan stavkalar boʻyicha mualliflik haqi tomoshabinlar uchun oʻrinlar sonidan va sotilgan kirish chiptalari sonidan qatʼi nazar, Oʻzbekiston Respublikasi hududida barcha teatr-tomosha korxonalari va tashkilotlari tomonidan, shuningdek adabiyot va sanʼat asarlarini efirga uzatish yoki kabel orqali uzatish yoʻli bilan ulardan foydalanadigan barcha tashkilotlar tomonidan asarlar va dasturlar ommaviy ijro etilganligi uchun hisoblab yoziladi.

2. Ushbu Nizomda nazarda tutilgan stavkalar boʻyicha mualliflik haqi asarlar yaratilganligi uchun mualliflik haqidan qatʼi nazar, toʻlanadi.

3. Mualliflik huquqi bilan himoya qilinadigan va himoya qilinmaydigan asarlardan (shu jumladan dramatik asarlarga joʻr boʻladigan musiqa) iborat boʻlgan dasturlar ommaviy ijro etilganligi uchun mualliflik haqi ushbu Nizomda nazarda tutilgan toʻliq stavka boʻyicha hisoblab yoziladi.

4. Mustaqil ahamiyatga ega boʻlgan qismlardan iborat boʻlgan asarlar ommaviy ijro etilganligi uchun mualliflik haqi (ushbu Nizomning I boʻlimi 4—13-bandlari) asarning faqat mualliflik huquqi bilan himoya qilinadigan qismi uchun hisoblab yoziladi.

Ushbu Nizomning I boʻlimi 1—16-bandlarida koʻrsatilgan, hammualliflar tomonidan bitta boʻlinmas bir butun asar sifatida yaratilgan asarlar ommaviy ijro etilganligi uchun mualliflik haqi faqat mualliflik huquqi himoya qilinadigan hammualliflarga (ularning huquqiy vorislariga) hisoblab yoziladi. Bunda hisoblab yoziladigan haq miqdori mualliflik haqini hammualliflar oʻrtasida belgilangan stavkaga proporsional tarzda taqsimlashga muvofiq belgilanadi.

5. Mualliflik haqini hisoblab yozishda quyidagilar mualliflik huquqi bilan himoya qilinmaydigan asarlar jumlasiga tegishli boʻladi:

a) xalq ijodiyoti asarlari;

b) agar merosxoʻrlar boʻlmasa yoki qonunda belgilangan muddat tamom boʻlgandan keyin ular mualliflik huquqini yoʻqotgan boʻlsalar, vafot etgan mualliflarning asarlari;

v) xorijiy davlatlar fuqarolarining Oʻzbekiston Respublikasining qonun hujjatlari va xalqaro shartnomalari bilan himoya qilinmaydigan asarlari;

g) qonun hujjatlariga muvofiq boshqa asarlar.

6. Mualliflik haqi asarlar va dasturlar ijrochilar ijrosida yangrashidan yoki ovozli yozuvda takrorlanishidan qatʼi nazar, hisoblab yoziladi.

7. Asar kamida ikki aktga ega boʻlsa, koʻp aktli deb eʼtirof etiladi.

Aktlar soni belgilanmagan asar Oʻzbekiston Respublikasi Madaniyat va sport ishlari vazirligining xulosasi boʻyicha koʻp aktli asar deb eʼtirof etilishi mumkin.

8. Agar sahnada aytiladigan matnning kamida yarmi sheʼr shaklida bayon qilingan boʻlsa (qofiyalangan, oq yoki erkin sheʼr), asar sheʼrda yozilgan deb eʼtirof etiladi.

9. Asardagi aktlar soni va sheʼriy matn hajmi muallifdan yoki asar roʻyxatdan oʻtkazilgan mulkiy huquqlarni jamoaviy asosda boshqaradigan tashkilotdan olingan maʼlumotlar boʻyicha, shuningdek ushbu Nizomning II boʻlimi 7-bandi ikkinchi xatboshiga muvofiq belgilanadi.

Spektaklda tanaffuslar (antraktlar) mavjudligi asardagi aktlar sonini aniqlashga taʼsir qilmaydi.

10. Agar spektakl bir necha bir aktli yoki bir aktli va koʻp aktli asarlarni oʻz ichiga olsa, haq har bir asar uchun uning uchun belgilangan stavka boʻyicha alohida hisoblab yoziladi.

Agar bir aktli asar butun bir boʻlimni egallagan konsert dasturida ijro etilsa, ushbu asar uchun haq uning uchun belgilangan stavka boʻyicha hisoblab yoziladi va, bundan tashqari, tegishli konsert dasturi uchun nazarda tutilgan stavkaning yarmi hisoblab yoziladi.

Agar konsertda dasturda butun bir boʻlimni egallagan koʻp aktli asardan (opera, balet, operetta, pyesadan) bir akt ijro etilsa, ushbu boʻlim uchun mualliflik haqi aktlar soniga boʻlingan tegishli koʻp aktli asar uchun haq stavkasiga teng miqdorda hisoblab yoziladi va, bundan tashqari, tegishli konsert dasturi uchun nazarda tutilgan stavkaning yarmi hisoblab yoziladi.

Agar spektakl koʻp aktli asarni va konsert dasturini oʻz ichiga olsa, koʻp aktli asar uchun haq uning uchun belgilangan stavka boʻyicha hisoblab yoziladi va, bundan tashqari, konsert dasturi uchun nazarda tutilgan stavkaning uchdan bir qismi hisoblab yoziladi.

11. Bolalarga moʻljallangan pyesa uchun mualliflik haqi stavkalari (ushbu Nizomning I boʻlimi 2-bandi) nafaqat bolalar teatrlari, balki boshqa teatrlar tomonidan ijro etiladigan pyesalarga nisbatan ham qoʻllaniladi.

12. Boshqa asarlarning, shu jumladan xalq ijodiyoti asarlarining motivlari boʻyicha yozilgan pyesalar ham inssenirovka qilingan pyesalarga tegishli boʻladi.

13. Agar asar mualliflar tomonidan qaysi matn asl nusxa ekanligi, qaysi matn tarjima matni ekanligi qayd etilmasdan ikki yoki bir necha tilda yaratilgan boʻlsa, asar ushbu tillarning har birida asl nusxa deb eʼtirof etiladi.

14. Ushbu Nizomning I boʻlimi 1—16-bandlarida nazarda tutilgan mualliflik haqi stavkalari asar konsertda ijro etilgan hollarda ham qoʻllaniladi.

15. Agar opera, balet yoki operetta librettosi mualliflik huquqi himoya qilinadigan boshqa adabiy asar asosida yozilgan boʻlsa, ushbu asar muallifiga opera yoki balet ijro etilganligi uchun libretto muallifi uchun belgilangan haq stavkasining toʻrtdan bir qismi va operetta ijro etilganligi uchun uchdan bir qismi miqdorida haq toʻlanadi.

Agar uning asosida libretto yozilgan asar mualliflik huquqi bilan himoya qilinmasa, bunday asar muallifiga berilishi kerak boʻlgan haq ulushi tarjima muallifiga beriladi.

16. Rassom-ssenograflar va kostumlar boʻyicha rassomlar uchun mualliflik haqi stavkasi ular oʻrtasidagi kelishuv boʻyicha taqsimlanadi, biroq bunda kostumlar boʻyicha rassomga stavkaning kamida uchdan bir qismi berilishi kerak.

17. Dramatik spektaklga yozilgan musiqa uchun mualliflik haqi musiqa nomerlari sonidan, shuningdek musiqa ijrochilari tomonidan ijro etilishidan yoki ovozli yozuvda berilishidan (mexanik yozuv) qatʼi nazar, musiqa joʻrligidagi spektaklning har bir akti uchun hisoblab yoziladi. Agar spektaklning alohida aktlari musiqa joʻrligisiz yoki butunlay mualliflik huquqi bilan himoya qilinmaydigan musiqa joʻrligida berilsa, ushbu aktlar uchun mualliflik haqi hisoblab yozilmaydi. Agar pyesada va spektaklda aktlar soni oʻrtasida tavofut boʻlsa musiqa joʻrligi uchun mualliflik haqi spektakldagi aktlar soni boʻyicha toʻlanadi.

18. Agar konsert dasturida estrada asarlari bilan birgalikda hech boʻlmaganda bitta yirik simfonik yoki vokal-simfonik asar (simfoniya, oratoriya, kantata, simfonik poema yoki uvertyura, orkestr bilan instrumental konsert va hokazolar), yoxud yirik shakldagi kamer asar (trio, kvartet, kvintet, sonata), yoxud xalq cholgʻu asboblari uchun koʻp qismli asar ijro etilsa, bunday konsert dasturi uchun mualliflik haqi ushbu Nizomning I boʻlimi 17-bandida nazarda tutilgan stavka boʻyicha hisoblab yoziladi.

Ham simfonik, vokal-simfonik va kichik shakllardagi kamer asarlar, xalq cholgʻu asboblari uchun asarlar, ham boshqa asarlar (adabiy, estrada asarlari va hokazolar) kiradigan yigʻma konsert dasturi ijro etilishining qolgan barcha hollarida — mualliflik haqi ushbu Nizomning I boʻlimi 18-bandida nazarda tutilgan stavka boʻyicha hisoblab yoziladi.

19. Agar yangi yil archa tomoshasi dasturiga dramaturgik yoki musiqali-dramaturgik asar kiritilsa, bunday asar uchun mualliflik haqi ushbu Nizomning I boʻlimida dramatik va musiqali-dramatik asarlar uchun belgilangan stavkalar boʻyicha va ushbu Nizomning II boʻlimi 10-bandida bayon qilingan qoidalarga rioya qilingan holda hisoblab yoziladi.

Sirkdagi yangi yil archa tomoshalari, agar ular sirk uchun maxsus yozilgan boʻlsa, toʻlov boʻyicha pantomimaga tenglashtiriladi.

Agar yangi yil archa tomoshalari chiptalari qiymatiga sovgʻalar qiymati kiritilsa, u holda sotilgan chiptalar uchun yalpi tushum summasidan toʻlovni hisoblab chiqishda sovgʻalar qiymati yalpi tushum summasidan chiqarib tashlanadi.

20. Ushbu Nizomning I boʻlimi 19-bandida nazarda tutilgan stavka boʻyicha sirk dasturi uchun mualliflik haqi, agar dastur sirk arenasida ijro etilsa yoki konsert faqat sirk nomerlaridan iborat boʻlsa hisoblab yoziladi; qolgan barcha hollarda yigʻma dastur tarkibida sirk chiqishlari uchun ushbu Nizomning I boʻlimi 18-bandida nazarda tutilgan stavka boʻyicha haq hisoblab yoziladi.

21. Qoʻgʻirchoqli spektaklga joʻr boʻladigan musiqa (adabiy matnsiz) va original janrlar ijrochilari (illyuzionistlar, psixoeksperimentatorlar va hokazolar)ning chiqishlari uchun mualliflik haqi butun spektakl uchun yoki mualliflik huquqi bilan himoya qilinadigan musiqa yangraydigan konsertning har bir boʻlimi uchun yalpi tushum summasining 0,6 foizi miqdorida hisoblab yoziladi.

Adabiy matn joʻrligidagi original janrlar ijrochilari (illyuzionistlar, psixoeksperimentatorlar va hokazolar)ning chiqishlari uchun adabiy matn muallifiga mualliflik haqi ushbu Nizomning I boʻlimi 18-bandida nazarda tutilgan stavka boʻyicha hisoblab yoziladi.

1. Asarlar ommaviy ijro etilishini amalga oshiradigan yoki tashkil etadigan barcha jismoniy va yuridik shaxslar (mulkchilik shakllaridan qatʼi nazar): teatrlar (shu jumladan teatr-studiyalar, havaskorlik jamoalari va teatrlar), konsert va sirk birlashmalari, ijrochi jamoalar, sirklar, klublar, madaniyat uylari va saroylari, ofitserlar uylari, harbiy ansambllar va orkestrlar, modalar uylari, diskotekalar va raqs maydonchalari, istirohat bogʻlari, bogʻlar, stadionlar, sport va kinokonsert zallari, kinoteatrlar, videosalonlar, barlar, kafelar, restoranlar va umumiy ovqatlanishning boshqa korxonalari, sanatoriylar, pansionatlar, dam olish uylari, turistik bazalar, maishiy xizmat koʻrsatish korxonalari, yoʻlovchi tashish transporti tashkilotlari va boshqa korxonalar, shuningdek eʼlon qilingan adabiyot va sanʼat asarlaridan efir yoki kabel eshittirishlari va koʻrsatuvlarida foydalanadigan boshqa tashkilotlar asarlar ommaviy ijro etilganligi uchun mualliflik haqi toʻlovchilar hisoblanadi.

2. Asarlar ommaviy ijro etilganligi uchun mualliflik haqi asar va dastur ijrochilar ijrosida yangrashidan yoki mexanik yozuvda yangrashidan qatʼi nazar, kiruvchilar (tomoshabinlar, tinglovchilar) uchun pulli, pulsiz boʻlgan barcha hollarda toʻlovchi tomonidan hisoblab yoziladi.

3. Tomoshabinlar (eshituvchilar)ning kirishi pulli boʻlganda ijrochilar tomosha koʻrsatish toʻgʻrisidagi shartnoma boʻyicha yoki bino (maydoncha) ijarasi toʻgʻrisidagi shartnoma boʻyicha ijro etishidan qatʼi nazar, asarlarning ommaviy ijrosi oʻz ijrochilarining, shuningdek tashqi ijrochilarning kuchi bilan amalga oshiriladigan binolar (maydonchalar)ning egalari mualliflik haqi toʻlovchilar hisoblanadi.

Bunday hollarda mualliflik haqi ushbu Nizomning I boʻlimidagi stavkalar boʻyicha ushbu summa toʻlovchining kassasiga tushishi yoki tushmasligidan qatʼi nazar, chiptalar sotuvidan yalpi tushum summasidan foizlarda hisoblab yoziladi.

Agar chiptalar sotuvidan yalpi tushum summasi toʻlovchining (ommaviy ijro etilayotgan binolar (maydonchalar egasining) kassasiga tushmasa, bino (maydoncha) egasi va yalpi tushum summasi tushadigan shaxs ijara shartnomasida oʻz munosabatlarini ushbu Nizomning I boʻlimi stavkalari boʻyicha hisoblab yozilgan mualliflik haqi summasi keyinchalik mulkiy huquqlarni jamoaviy asosda boshqaruvchi tashkilotga oʻtkazish uchun toʻlovchi (bino, (maydoncha) egasi)ning tasarrufida qoladigan tarzda tuzishlari shart. Bunda yalpi tushum summasi oʻziga tushadigan shaxs toʻlovchiga yalpi tushum summasi toʻgʻrisidagi maʼlumotlarni taqdim etishi shart va ularning ishonchliligi uchun javob beradi.

Musiqa ansambllari birlashmalari, konsert-estrada birlashmalari oʻz faoliyati zonasida joylashgan har xil maydonchalarda shartnomalar boʻyicha ommaviy ijro etilganligi uchun mualliflik haqini oʻzi joylashgan joy boʻyicha markazlashtirilgan tartibda toʻlaydilar.

4. Kirish tomoshabinlar (tinglovchilar) uchun bepul boʻlganda quyidagilar mualliflik haqini toʻlovchilar hisoblanadi:

a) ijrochilarning ijro etishi toʻgʻrisida buyurtmachi bilan shartnoma tuzgan shaxs, — shartnomada nazarda tutilgan summadan, agar ushbu summa shartnoma tuzgan shaxsga tushsa, va toʻlov ijrochilarga ushbu shaxs tomonidan toʻlanadi. Bunda shartnoma boʻyicha summa yalpi tushumga tenglashtiriladi;

b) ijrolarning buyurtmachisi — ijrochilarning chiqishi toʻgʻrisidagi shartnomada nazarda tutilgan summadan, agar ushbu summa ijrochilarga bevosita ijrolarning buyurtmachisi tomonidan toʻlansa;

v) ommaviy tadbirlar oʻtkazish tashkilotchisi — ijrochilarga haq toʻlash uchun nazarda tutilgan summadan.

5. Ommaviy ijro tomoshabinlardan (tinglovchilardan) alohida toʻlov undirilmasdan amalga oshiriladigan binoga (maydonchalarga) pulli kirishda (kinoteatrlar foyesi, kafe va restoranlar, istirohat bogʻlari, bogʻlar va stadionlardagi ochiq maydonchalar va hokazolar) quyidagilar mualliflik haqini toʻlovchilar hisoblanadi:

a) bino (maydonchalar) egasi, agar ijrochilarga haq bevosita bino (maydonchalar) egasi tomonidan toʻlansa, — ijrochilarga haq toʻlash summasidan;

b) ijrochilarning rahbari, agar ijrochilarga haq ushbu shaxs tomonidan toʻlansa, — ijrochilarning chiqishi toʻgʻrisidagi shartnomada nazarda tutilgan summadan.

6. Mualliflardan olingan vakolatlar doirasida ish koʻruvchi nomidan oʻzi vakillik qilayotgan shaxslarning huquqlarini va qonun bilan himoya qilinadigan manfaatlarini himoya qilish uchun daʼvo qoʻzgʻatish huquqiga ega boʻlgan mulkiy huquqlarni jamoaviy asosda boshqaruvchi tashkilot amaldagi qonun hujjatlariga muvofiq asarlar ommaviy ijro etilishiga ruxsatnoma berish, mualliflik haqi hisoblab yozilishi va toʻlanishi masalalari boʻyicha mualliflar (ularning huquqiy vorislari)ning vakili hisoblanadi.

7. Asarlardan barcha foydalanuvchilar muallif (mualliflar) yoxud mulkiy huquqlarni jamoaviy asosda boshqaruvchi tashkilot bilan asarlardan foydalanish uchun litsenziya shartnomalari tuzishlari kerak.

8. Toʻlovchi (foydalanuvchi):

a) oʻzi foydalanadigan asarlarning aniq hisobini yuritishga va mulkiy huquqlarni jamoaviy asosda boshqaruvchi tashkilotga uning talabi boʻyicha amalda ijro etilgan asarlar, mualliflar (shu jumladan musiqa, matn va tarjima mualliflari), yigʻim summasi (kirish pulli boʻlganida), daromadlar summasi, shartnoma summalari yoki ijrochilarning chiqishlari uchun toʻlov summasi toʻgʻrisidagi maʼlumotlarni taqdim etishga;

b) mulkiy huquqlarni jamoaviy asosida boshqaruvchi tashkilotning zarur tarzda vakolat berilgan vakiliga (keyingi oʻrinlarda “inspektor” deb yuritiladi) toʻlanishi kerak boʻlgan mualliflik haqi summasi hisob-kitobini tekshirish, shuningdek koʻrib chiqish uchun asarlar ommaviy ijro etilganligi uchun mualliflik haqi boʻyicha hisob-kitoblar bilan bogʻliq boʻlgan barcha hujjatlarni taqdim etishga; mulkiy huquqlarni jamoaviy asosda boshqaruvchi tashkilotning inspektorini nazorat tartibida eshitish (koʻrish) uchun oʻzi oʻtkazayotgan tadbirlarga bepul qoʻyishga;

v) mulkiy huquqlarni jamoaviy asosda boshqaruvchi tashkilot tomonidan belgilangan toʻlov muddatlariga (har oyda, har chorakda) muvofiq asarlardan foydalanilganligi uchun mulkiy huquqlarni jamoaviy asosda boshqaruvchi tashkilotga toʻlov ajratmalarini oʻtkazishga majburdir.

9. Mualliflarga yoxud ularning merosxoʻrlariga nazarda tutilgan toʻlovni toʻplash, taqsimlash va toʻlash mulkiy huquqlarni jamoaviy asosda boshqaruvchi tashkilot tomonidan amalga oshiriladi. Toʻlov bevosita mualliflarga yoxud ularning merosxoʻrlariga toʻlanadi, bunda toʻlovning boshqa yuridik yoki jismoniy shaxslarning bank hisob raqamlariga oʻtkazilishiga yoʻl qoʻyilmaydi.

10. Asarlarni noqonuniy ommaviy ijro etish, shuningdek haq toʻlash muddatlarining buzilishi qonun hujjatlarida nazarda tutilgan javobgarlikka olib keladi.

1. Ushbu Nizomda nazarda tutilgan mualliflik haqi stavkalari eng kam stavkalar hisoblanadi va ular agar foydalanuvchi bilan muallif, uning huquqiy vorisi yoxud muallif va mulkiy huquqlarni jamoaviy asosda boshqaruvchi tashkilot oʻrtasidagi shartnomada boshqacha hol belgilanmagan boʻlsa, ulardan olingan vakolatlar doirasida qoʻllaniladi va mualliflik haqi miqdori manfaatdor tomonlar oʻrtasidagi nizo mavzusi hisoblanmaydi.

2. Quyidagilarni amalga oshiruvchi yuridik va jismoniy shaxslar mualliflik haqini toʻlovchilar hisoblanadi:

himoya qilinadigan va/yoki himoya qilinmaydigan ovozli (mexanik) yozuvlarni (fonogrammalarni tayyorlovchilar) ularni tarqatish maqsadida qayta ishlab chiqarish;

yakka tartibdagi buyurtmalar boʻyicha audiovizual asarlar yoki ovozli yozuvlarning yagona nusxalarini tayyorlovchilar;

ovozli yozuvlar va/yoki audiovizual asarlar (kino-, videofilmlar, videodasturlar) nusxalarini prokatga topshiruvchilar.

3. Nomidan oʻzi vakillik qilayotgan shaxslarning huquqlarini va qonun bilan himoya qilinadigan manfaatlarini himoya qilish uchun daʼvo qoʻzgʻatish huquqiga ega boʻlgan mulkiy huquqlarni jamoaviy asosda boshqaruvchi tashkilot mualliflarning yoxud ular merosxoʻrlarining ovozli yozuv asarlarini qayta koʻpaytirishga ruxsatnomalar berish, ovozli yozuvlar va audiovizual asarlar nusxalarini prokatga topshirish, mualliflik haqini qonun hujjatlariga muvofiq hisoblab yozish va yigʻish masalalari boʻyicha vakili hisoblanadi.

4. Mualliflik haqini toʻlovchilar mulkiy huquqlarni jamoaviy asosda boshqaruvchi tashkilotdan asarlardan tegishli ravishda foydalanishga ruxsatnoma (litsenziya) olishi, foydalanilgan asarlarning aniq hisobini yuritishi hamda mualliflik haqi boʻyicha hisob-kitoblar bilan bogʻliq boʻlgan barcha hujjatlar va hisob raqamlarini tekshirish uchun vakolatli inspektorga zarur tartibda taqdim etishi shart.

Toʻlovchilar koʻrsatib oʻtilgan maʼlumotlarning toʻgʻriligi va toʻliqligi uchun javob beradilar.

5. Asarlardan noqonuniy foydalanish (ovozli (mexanik) yozuv asarlarini qayta koʻpaytirish, ovozli yozuvlarni va audiovizual asarlar nusxalarini prokatga topshirish), shuningdek haqni toʻlash muddatlarining buzilishi amaldagi qonun hujjatlarida nazarda tutilgan javobgarlikka olib keladi.

1. Tasviriy sanʼat asarlarini qayta koʻpaytirganlik va dekorativ-amaliy sanʼat asarlaridan sanoatda nusxa koʻpaytirganlik uchun mualliflik haqi asarlarni yaratganlik uchun mualliflik haqidan tashqari toʻlanadi.

Qayta koʻpaytirish va sanoatda ulardan nusxa koʻpaytirish maqsadida tasviriy va dekorativ-amaliy sanʼat asarlari yaratganlik uchun mualliflik haqi miqdori tomonlarning kelishuvi boʻyicha belgilanadi.

2. Ushbu Nizomda nazarda tutilgan mualliflik haqi stavkalari eng kam stavkalar hisoblanadi va ular agar toʻlovchi bilan muallif, uning huquqiy vorisi yoki mulkiy huquqlarni jamoaviy asosda boshqaruvchi tashkilot oʻrtasida tuzilgan shartnomada oʻzgacha hol belgilanmagan boʻlsa, ulardan olingan vakolatlar doirasida qoʻllaniladi va mualliflik haqi manfaatdor tomonlar oʻrtasidagi nizo mavzusi hisoblanmaydi.

3. Qayta koʻpaytirish yoki sanoatda nusxa koʻpaytirish uchun tasviriy yoki dekorativ-amaliy sanʼat asari namunasini xizmat topshirigʻini bajarish tartibida yaratgan muallifga bunday asarni qayta koʻpaytirganlik yoki undan nusxa koʻpaytirganlik uchun mualliflik haqi, agar muallif bilan ish beruvchi oʻrtasidagi shartnomada boshqacha qoida nazarda tutilmagan boʻlsa, ushbu Nizomda nazarda tutilgan normalar boʻyicha toʻlanadi. Tasviriy (dekorativ-amaliy) sanʼat asarini qayta koʻpaytirishni (undan nusxa koʻpaytirishni) amalga oshirgan yuridik yoki jismoniy shaxs mualliflik haqini toʻlovchi hisoblanadi.

Barcha toʻlovchilar asarlarni qayta koʻpaytirish (ulardan nusxa koʻpaytirish)ga mualliflardan, ularning huquqiy vorislaridan yoxud mulkiy huquqlarni jamoaviy asosda boshqaruvchi tashkilotdan ruxsatnoma (litsenziya) olishi, ularning aniq hisobini yuritishi va zarur tarzda vakolat berilgan inspektorga uning talabiga koʻra bunday asarlarni qayta koʻpaytirish (ulardan nusxa koʻpaytirish) toʻgʻrisidagi barcha zarur maʼlumotlarni taqdim etishi shart.

Ushbu Nizomning I boʻlimida nazarda tutilgan stavkalar boʻyicha mualliflik haqi miqdori toʻlovchi tomonidan sotish uchun topshiriladigan buyumning har bir nusxasining sotish narxidan foizlarda belgilanadi.

4. Asarning muallifi buyumning tannarxi boʻyicha haq toʻlagan holda uning nusxa koʻpaytiriladigan bitta namunasini olish huquqiga ega, qimmatbaho metallardan va qimmatbaho toshlardan tayyorlangan buyumlar bundan mustasno.

Muallif metrlab oʻlchanadigan materiallar (gazlamalar, kleyonkalar va shu kabilar) namunalarini ularni koʻrgazmada namoyish qilish uchun zarur miqdorda, koʻrgazma shartlariga muvofiq sotib olishi mumkin.