Oʻzbekiston Respublikasining “Davlat statistikasi toʻgʻrisida” va “Davlat bojxona xizmati toʻgʻrisida”gi qonunlariga va Oʻzbekiston Respublikasi Vazirlar Mahkamasining 1998-yil 31-martdagi 137-sonli “Oʻzbekiston Respublikasida tashqi savdo faoliyatini erkinlashtirish boʻyicha qoʻshimcha chora-tadbirlar toʻgʻrisida”gi qaroriga asosan Davlat statistika qoʻmitasi, Davlat bojxona qoʻmitasi, Iqtisodiyot vazirligi va Tashqi iqtisodiy aloqalar, investitsiyalar va savdo vazirligi qaror qiladi:

1. Davlat va bojxona tashqi savdo statistikasi maʼlumotlarini yigʻish va qayta ishlash uslubiyati toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

1. Ushbu Nizom toʻlov balansining uslubiyatiga muvofiq, tashqi savdoda mahsulotlar va xizmatlar hisobining toʻliq aks ettirilishini taʼminlash maqsadida, davlat va bojxona tashqi savdo statistikasi maʼlumotlarini yigʻish va qayta ishlashning uslubiyatini hamda Oʻzbekiston Respublikasi Davlat statistika qoʻmitasi va Davlat bojxona qoʻmitasi oʻrtasidagi maʼlumotlar almashinuvi tartibini aniqlab beradi.

2. Mahsulotlar tashqi savdosi boʻyicha statistik maʼlumotlarni yigʻish va qayta ishlash hamda ular boʻyicha maʼlumotlar bazasini shakllantirish Davlat bojxona qoʻmitasi tomonidan bojxona deklaratsiyalari maʼlumotlari asosida amalga oshiriladi.

3. Bojxona deklaratsiyasida va bojxona statistikasi tomonidan hisobga olinmaydigan, egalik huquqi rezidentdan norezidentga oʻtgan yoki aksincha boʻlgan mahsulotlar eksport-importi hajmi toʻgʻrisidagi maʼlumotlarni yigʻish va qayta ishlash Davlat statistika qoʻmitasi tomonidan maxsus statistik kuzatuvlar tarmogʻi orqali amalga oshiriladi.

4. Xizmatlar eksport-importini hisobga olish Davlat statistika qoʻmitasi tomonidan davlat statistika hisoboti va maxsus kuzatuvlar asosida amalga oshiriladi.

Oʻzbekiston Respublikasi hududida xorijiy fuqarolar tomonidan yodgorliklar, sovgʻalar va shaxsiy ehtiyojlar uchun sotib olingan boshqa ashyolarga qilingan xarajatlar “Oʻzbekturizm” MK tomonidan oʻtkaziladigan maxsus kuzatuvlar maʼlumotlari asosida xizmatlar eksportida aks etadi.

Oʻzbekiston Respublikasi hududida norezidentlarning oʻzlarining doimiy muassasalari orqali amalga oshiradigan, tugallanishi uchun bir yildan oshiq vaqt talab qiladigan qurilish, foydali qazilmalarni izlash va qidiruv sohalaridagi xizmatlar hajmi xizmatlar importida aks etmaydi va ular ichki ishlab chiqarish sifatida qaraladi.

5. Davlat bojxona qoʻmitasi hisobot davridan keyingi har oyning 7-sanasigacha tezkor, 15-sanasida esa Oʻzbekiston Respublikasi tashqi savdo bojxona statistikasining meʼyoriy hujjatlarini hisobga olgan holda, tovarlar tashqi savdosi maʼlumotlari bazasi boʻyicha aniqlashtirilgan maʼlumotlarni (Tashqi iqtisodiy faoliyat mahsulotlar nomenklaturasining 9 ta belgisi boʻyicha) jismoniy shaxslar toʻgʻrisidagi maʼlumotlarni ajratgan holda Davlat statistika qoʻmitasiga taqdim etadi. Taqdim etilayotgan maʼlumotlar oʻsib borish tartibida shakllantiriladi.

6. Davlat bojxona qoʻmitasi zarur hollarda Davlat statistika qoʻmitasiga respublika toʻlov balansining shakllanishi uchun kerak boʻlgan bojxona deklaratsiyalarining alohida holatlari boʻyicha maʼlumotlarni taqdim etadi.

7. Davlat statistika qoʻmitasi har oyda Davlat bojxona qoʻmitasiga har oyning 1-sanasi holatiga yuridik manzillarini koʻrsatgan holda Korxona va tashkilotlarning yagona davlat registridan maʼlumotlarni taqdim etadi.

8. Davlat bojxona qoʻmitasi har chorakda tovarlar tashqi savdosi boʻyicha bojxona axborotnomasini nashr etadi.

9. Tashqi savdo boʻyicha yakuniy jamlanma maʼlumotlarni shakllantirish, ularni nashr qilish va foydalanuvchilarga zarur kesimlarda taqdim etish Davlat statistika qoʻmitasi tomonidan oʻrnatilgan tartibda amalga oshiriladi.

10. Mazkur Nizom “Oʻzbekturizm” Milliy kompaniyasi bilan kelishilgan.