Oʻzbekiston Respublikasi Prezidentining “Yer qaʼri uchastkalaridan foydalanish huquqi uchun litsenziyalar berish tartibini takomillashtirish chora-tadbirlari toʻgʻrisida” 2007-yil 7-iyundagi PQ-649-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.S. Sanaqulov zimmasiga yuklansin.

1. Vazirlar Mahkamasining 1997-yil 13-yanvardagi 19-son qarori (Oʻzbekiston Respublikasi QT, 1997-y., 1-son, 1-modda) bilan tasdiqlangan Yer qaʼridan foydalanish va uni muhofaza qilish, yer qaʼrini geologik jihatdan oʻrganish va mineral resurslardan oqilona foydalanish ustidan davlat nazorati toʻgʻrisidagi Nizomning 8-bandida:

ikkinchi xatboshi chiqarib tashlansin;

uchinchi xatboshi quyidagi tahrirda bayon qilinsin:

“yer qaʼri uchastkalaridan foydalanishning litsenziyalarda, yer qaʼri uchastkalari mahsulot taqsimotiga oid bitim shartlarida berilganda esa — mahsulot taqsimotiga oid bitimlarda belgilangan shartlariga rioya qilgan holda”.

2. Vazirlar Mahkamasining “Yer osti boyliklari toʻgʻrisida”gi Oʻzbekiston Respublikasi Qonuniga muvofiq normativ hujjatlarni tasdiqlash haqida” 1997-yil 13-yanvardagi 20-son qarorida:

a) Foydali qazilmalarni kavlab olish uchun kon ajratmalari berish tartibi toʻgʻrisidagi Nizomda:

I boʻlimning 6-bandida:

birinchi xatboshidagi birinchi jumla quyidagi tahrirda bayon qilinsin:

“Foydali qazilmalarni tajriba-sanoat koʻlamida kavlab olish kon ajratmasi bermasdan (neft va gaz konlaridan tashqari) geologik jihatdan oʻrganishni oʻtkazish muddatiga, biroq 5 yildan koʻp boʻlmagan muddatga beriladigan litsenziya hamda belgilangan tartibda tasdiqlangan va kon munosabatlarini tartibga solish sohasidagi maxsus vakolatli organlar bilan kelishilgan loyiha asosida amalga oshiriladi”;

ikkinchi xatboshidagi birinchi jumla quyidagi tahrirda bayon qilinsin:

“Neft va gazni tajriba-sanoat koʻlamida kavlab olish Oʻzbekiston Respublikasi Davlat geologiya va mineral resurslar qoʻmitasi tomonidan uch yildan koʻp boʻlmagan muddatga beriladigan litsenziya hamda “Sanoatkontexnazorat” davlat inspeksiyasi tomonidan beriladigan kon ajratmasi asosida amalga oshiriladi”;

b) Foydali qazilmalarni kavlab olishda yer qaʼrini muhofaza qilishning yagona qoidalari I boʻlimida:

7-band quyidagi tahrirda bayon qilinsin:

“7. Foydali qazilmalarni tajriba-sanoat koʻlamida kavlab olish litsenziya asosida, kon ajratmasi bermasdan (neft va gaz konlaridan tashqari), foydali qazilmalarni boyitish va qayta ishlash texnologiyasini ishlab chiqish yoki takomillashtirish, foydali qazilmalar konlarini sanoat yoʻli bilan ishga tushirishning oqilona usullari va metodlarini tanlash, shuningdek texnogen mineral hosilalardan foydalanish maqsadida yer qaʼrini geologik jihatdan oʻrganish jarayonida amalga oshiriladi.

Tajriba-sanoat koʻlamida kavlab olish Oʻzbekiston Respublikasi Davlat tabiatni muhofaza qilish qoʻmitasi va “Sanoatkontexnazorat” davlat inspeksiyasi bilan kelishilgan mustaqil loyiha boʻyicha amalga oshiriladi”.

3. Vazirlar Mahkamasining 2007-yil 5-fevraldagi 26-son qarori (Oʻzbekiston Respublikasi QT, 2007-y., 2-3-son, 8-modda) bilan tasdiqlangan Oʻzbekiston Respublikasi Davlat geologiya va mineral resurslar qoʻmitasi toʻgʻrisidagi Nizomning 6-bandi oʻn toʻqqizinchi xatboshi quyidagi tahrirda bayon qilinsin:

“tadbirkorlik tavakkalchiligi sharoitlarida geologik oʻrganish, foydali qazilmalarni kavlab olish, texnogen mineral hosilalardan foydalanish, foydali qazilmalarni kavlab olish bilan bogʻliq boʻlmagan yer osti inshoatlari qurish va ulardan foydalanish uchun yer qaʼri uchastkalaridan foydalanish (chiqindilarni saqlash va koʻmish maqsadida yer osti inshoatlari qurish va ulardan foydalanish uchun litsenziyalardan tashqari), alohida qoʻriqlanadigan geologik obyektlar hosilalaridan foydalanish hamda tovlanadigan tosh xomashyo, paleontologik qoldiqlar namunalarini toʻplash huquqini beruvchi litsenziyalarni qonun hujjatlarida belgilangan tartibda beradi”.