Oʻzbekiston Respublikasi Oliy Majlisining qonunchilik palatasi qaror qiladi:

1. Oʻzbekiston Respublikasi Oliy Majlisi Qonunchilik palatasining 2005-yil 28-iyuldagi 102-1-sonli Qarori bilan qabul qilingan Oʻzbekiston Respublikasi Oliy Majlisi Qonunchilik palatasining Reglamenti (Oʻzbekiston Respublikasi Oliy Majlisi palatalarining Axborotnomasi, 2005-yil, № 7, 242-modda) 136-moddasining ikkinchi qismi quyidagi tahrirda bayon etilsin:

“Qonunchilik palatasi tomonidan qabul qilingan qonunlar Qonunchilik palatasining tegishli qarorlari va boshqa zarur materiallar, shu jumladan qonunga doir qiyosiy jadval bilan birgalikda masʼul qoʻmita tomonidan rasmiylashtiriladi hamda Qonunchilik palatasi Spikeri tomonidan Senatga koʻrib chiqish uchun oʻn kun ichida yuboriladi. Qiyosiy jadvalda qonunchilik tashabbusi huquqi subyekti tomonidan kiritilgan qonun loyihasining matni, Qonunchilik palatasi tomonidan qabul qilingan qonunning matni, qonun loyihasiga kiritilgan oʻzgartishlarga doir asoslar, shuningdek ushbu oʻzgartishlar qonun loyihasini kiritgan qonunchilik tashabbusi huquqi subyekti yoki uning vakili bilan kelishib olinganligi toʻgʻrisidagi maʼlumotlar keltiriladi”.

2. Ushbu Qaror qabul qilingan kundan eʼtiboran kuchga kiradi.