Oʻzbekiston Respublikasi Prezidentining “Toshavtobustrans” aksiyadorlik kompaniyasi korxonalarining davlatga qarashli aksiyalari paketlarini xususiy mulk etib sotish toʻgʻrisida” 2006-yil 3-iyuldagi PQ-396-son qarorini bajarish yuzasidan, shuningdek, kompaniya tarkibiga kiruvchi avtobus parklarining joriy moliyaviy ahvolini hisobga olib Vazirlar Mahkamasi qaror qiladi:

1. Oʻzbekiston Respublikasi Prezidentining “Toshavtobustrans” aksiyadorlik kompaniyasi korxonalarining davlatga qarashli aksiyalari paketlarini xususiy mulk etib sotish toʻgʻrisida” 2006-yil 3-iyuldagi PQ-396-son qarorida “Toshavtobustrans” aksiyadorlik kompaniyasi avtobus parklarining davlatga qarashli aksiyalari paketlarini ikki bosqichda sotish nazarda tutilganligi maʼlumot uchun qabul qilinsin.

Bunda davlatga qarashli aksiyalar paketlarini sotishdan tushadigan mablagʻlarning:

davlatga qarashli aksiyalar paketlarini sotishdan tushadigan mablagʻlarning 30 foizi birinchi navbatda “Mersedes-Bens” avtobuslarini xarid qilish uchun Oʻzbekiston Respublikasi kafolati ostida jalb qilingan xorijiy kreditlarni toʻlashga yoʻnaltiriladi;

davlatga qarashli aksiyalar paketlarini sotishdan tushadigan mablagʻlarning 40 foizi 2010-yil oxirigacha qaytarish asosida besh yil muddatga avtobus parklarining harakatlanuvchi tarkibini yangilashga, shu jumladan lizing asosida yangilashga maqsadli foydalanish uchun “Toshshahartransxizmat” uyushmasiga yoʻnaltiriladi.

2. Belgilab qoʻyilsinki, tushgan mablagʻlarning qolgan qismi (30 foizi), “Toshavtobustrans” aksiyadorlik kompaniyasi aksiyalarini nominal qiymati boʻyicha uning ustav fondini saqlab turish uchun yoʻnaltiriladigan hamda 2519-son avtojamlanmaning harakatlanuvchi tarkibini yangilash va “Toshavtobustrans” aksiyadorlik kompaniyasining “Mersedes-Bens” servis markazi” shuʼba korxonasi asbob-uskunalarini renovatsiya qilish uchun foydalaniladigan 3051,5 mln soʻmni chegirgan holda, Oʻzbekiston Respublikasi Vazirlar Mahkamasining “Davlat mulkini davlat tasarrufidan chiqarish, xususiylashtirishdan tushgan mablagʻlarni hisobga olish, taqsimlash va ulardan foydalanishni nazorat qilish tartibini tasdiqlash toʻgʻrisida” 1998-yil 22-avgustdagi 362-son qarorida belgilangan tartibda taqsimlanadi.

3. Belgilansinki, 362 ta “Mersedes-Bens” avtobuslari qiymatini qoʻshish hisobiga “Toshavtobustrans” aksiyadorlik kompaniyasi tarkibiga kiruvchi 9 ta avtobus parkining ustav fondi koʻpaytirilgandan keyin birinchi bosqichda (2007-yil mobaynida) ular ustav fondlarining 40 foizi miqdoridagi aksiyalar paketlari sotiladi.

4. Avtobus parklari, ular ustav fondlari 362 ta “Mersedes-Bens” avtobuslari qiymatini qoʻshish hisobiga koʻpaytirilganda emissiya prospektlarini qayta roʻyxatdan oʻtkazish yigʻimlari toʻlashdan istisno tariqasida ozod qilinsin.

Qimmatli qogʻozlar markaziy depozitariysi “Toshavtobustrans” aksiyadorlik kompaniyasi avtobus parklarining qoʻshimcha chiqarilgan aksiyalarini xizmatlar haqi undirmasdan hisobga qoʻysin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.M. Xanov zimmasiga yuklansin.