Respublikada qazib chiqarish va qayta ishlash korxonalari, qurilish industriyasi korxonalarining mineral xomashyo bazasini yaratish va kengaytirish chora-tadbirlari izchillik bilan amalga oshirilmoqda. Nodir va kamyob yer metallari, agrokimyo va kon-ruda xomashyosi, qurilish materiallari, yer osti chuchuk va mineral suvlari zaxiralarini koʻpayishi taʼminlanmoqda.

Shu bilan birga, sanoat ahamiyatiga ega boʻlgan mineral-xomashyo bazasi yetarli surʼatlarda rivojlanmayapti. Ayrim potensial rudali hududlar sust oʻrganilmoqda. Geologiya-qidiruv ishlari davomida ilm-fanga asoslangan texnologiyalar yetarlicha qoʻllanilmayapti, ilmiy-tadqiqot salohiyati ancha zaiflashgan va asossiz ravishda tarqoqlashgan. Geologiya-qidiruv ishlarini tashkil qilish tuzilmasi va boshqaruv usullari zamon talablariga javob bermayapti. Ishlarning pirovard natijalariga qarab emas, balki fizik hajmlariga qarab baho berishdan iborat umrini yashab boʻlgan amaliyot hamon saqlanib qolmoqda. Konchilik, burgʻulash va laboratoriya asbob-uskunalarining nihoyatda eskirganligi, shuningdek, maxsus priborlar bilan yaxshi jihozlanmaganligi qidiruv ishlarini zamonaviy usul va texnologiyalar asosida oʻtkazish imkoniyatlarini cheklab qoʻymoqda.

Geologiya-qidiruv ishlarini rivojlantirish davlat dasturlarini shakllantirish, amalga oshirish va ularning bajarilishini monitoring qilish mexanizmini tubdan takomillashtirish, ularni foydali qazilmalar zaxiralarini oʻstirishga, ilm-fanga asoslangan texnologiyalarni jadal tatbiq etishga yoʻnaltirish, tarmoq uchun kadrlar tayyorlash darajasini oshirish maqsadida:

1. Quyidagilar geologiya tarmogʻini isloh qilishning asosiy ustuvor yoʻnalishlari etib belgilansin:

eng avvalo uglevodorod xomashyosi, qimmatbaho, rangli, kamyob yer metallar va uranni, shuningdek yer osti chuchuk va mineral suvlarni qidirish hamda razvedka qilish samaradorligini oshirishni taʼminlaydigan geologiya-qidiruv ishlarining tashkiliy tuzilmasini, boshqaruv va prognoz qilish tizimini tubdan takomillashtirish;

yer qaʼridan samarali foydalanish va mineral xomashyo qazib chiqarish talablarini hisobga olgan holda foydali qazilmalar geologik zaxiralarini chuqur tahlil etish, ularni prognoz qilishning zamonaviy texnologiyalari va ilgʻor usullarini keng qoʻllash asosida geologiyaga oid axborotlarning xolisligi va haqqoniyligini oshirish;

geologiya-qidiruv ishlari samaradorligiga baho berish asosida bu ishlarni moliyalashtirish hamda tarmoqning pirovard natijalariga foydali qazilmalarning sanoat zaxiralari oʻsishiga qarab ragʻbatlantirishning zamonaviy usullarini joriy etish;

tarmoq korxonalarini tubdan modernizatsiyalash va texnik jihatdan qayta jihozlash;

geologiya sohasida malakali kadrlar tayyorlashni takomillashtirish.

2. Oʻzbekiston Respublikasi Iqtisodiyot vazirligi, Moliya vazirligi, Davlat geologiya va mineral resurslar qoʻmitasi hamda Davlat mulki qoʻmitasining:

Davlat geologiya va mineral resurslar qoʻmitasi tarkibida “Nodir va rangli metallar geologiyasi”, “Uran va kamyob yer metallari geologiyasi” hamda “Gidromineral resurslar geologiyasi” ilmiy-ishlab chiqarish markazlarini tashkil qilish;

1-ilovaga* muvofiq Davlat geologiya va mineral resurslar qoʻmitasi tizimidagi korxonalarni qayta tashkil etish va tugatish toʻgʻrisidagi takliflari maʼqullansin.

3. Belgilansinki, Davlat geologiya va mineral resurslar qoʻmitasi tarkibida tashkil etiladigan ilmiy-ishlab chiqarish markazlari geologiya-qidiruv ishlarining muayyan yoʻnalishlari boʻyicha ixtisoslashtiriladi va mineral xomashyoning strategik turlarini kompleks ravishda, tizimli tadqiq etish, qidirish, baho berish va razvedka qilish uchun ilmiy va ishlab chiqarish boʻlinmalarini oʻz tarkibida birlashtiradi.

Quyidagilar yangi tashkil etiladigan ilmiy-ishlab chiqarish markazlarining asosiy vazifalari etib belgilansin:

istiqbolli hududlarni aniqlash va ularning geologik potensialini baholash;

geologiya-qidiruv ishlarining zamonaviy usullari va texnologiyalarini ishlab chiqish hamda joriy etish;

Davlat geologiya va mineral resurslar qoʻmitasi tomonidan tasdiqlangan dasturlarga muvofiq istiqbolli maydonlardagi geologiya ishlarini muvofiqlashtirish;

geologiya-qidiruv ishlarini rivojlantirish dasturlarining pudrat korxonalari tomonidan bajarilishini nazorat qilish, ish uslubiyati va yoʻnalishlaridagi oʻzgarishlar toʻgʻrisida, shuningdek obyektlarning istiqbolli ekanligi tasdiqlanmaganida ishlarni toʻxtatib turish haqida takliflar kiritish.

4. Oʻzbekiston Respublikasi Davlat geologiya va mineral resurslar qoʻmitasining tashkiliy tuzilmasi hamda uning boshqaruv xodimlari cheklangan soni 65 kishidan iborat markaziy apparati tuzilmasi 2 va 3-ilovalarga* muvofiq tasdiqlansin.

Oʻzbekiston Respublikasi Davlat geologiya va mineral resurslar qoʻmitasi bir oy muddatda Qoʻmitaga boʻysunuvchi korxonalarni tegishli ravishda qayta tashkil etsin, shu jumladan davlat korxonalarining nizomlarini tasdiqlasin.

Oʻzbekiston Respublikasi Davlat geologiya va mineral resurslar qoʻmitasi raisiga, zarur hollarda, xodimlarning belgilangan umumiy soni doirasida Qoʻmitaning markaziy apparati tuzilmasiga oʻzgartishlar kiritish huquqi berilsin.

5. Vazirlar Mahkamasi bir hafta muddatda mazkur qarorda belgilangan geologiya sohasini isloh qilishning asosiy ustuvor yoʻnalishlari va vazifalaridan kelib chiqqan holda Oʻzbekiston Respublikasi Davlat geologiya va mineral resurslar qoʻmitasi toʻgʻrisidagi yangilangan nizomni tasdiqlasin.

6. 2007—2010-yillarda geologiya-qidiruv ishlariga ilm-fanga asoslangan zamonaviy texnologiyalar va asbob-uskunalarni tatbiq etish Dasturi, shuningdek Davlat geologiya qoʻmitasi tizimidagi korxona va tashkilotlarni modernizatsiya qilish va texnik jihatdan qayta jihozlash chora-tadbirlari 4, 4a-ilovalarga* muvofiq tasdiqlansin.

Oʻzbekiston Respublikasi Davlat geologiya va mineral resurslar qoʻmitasi Oʻzbekiston Respublikasi Iqtisodiyot vazirligi va Moliya vazirligi bilan birgalikda Dasturda tasdiqlangan vazifalarning belgilangan muddatlarda amalga oshirilishi va ularning zarur moliyaviy manbalar bilan mustahkamlanishini taʼminlasin.

7. Belgilansinki:

geologiya-qidiruv ishlarining oʻrta muddatli (3 yilgacha davrga) va uzoq muddatli (3 yildan ortiq davrga) dasturlari Davlat geologiya qoʻmitasi tomonidan Oʻzbekiston Respublikasi Iqtisodiyot vazirligi va Moliya vazirligi bilan kelishilgan holda ishlab chiqiladi hamda Vazirlar Mahkamasi tomonidan tasdiqlanadi;

geologiya-qidiruv ishlarining har yillik dasturlari Davlat geologiya qoʻmitasi tomonidan Oʻzbekiston Respublikasi Iqtisodiyot vazirligi va Moliya vazirligi bilan kelishilgan holda geologiya-qidiruv ishlarining tasdiqlangan oʻrta va uzoq muddatli dasturlarini amalga oshirish doirasida tasdiqlanadi.

Oʻzbekiston Respublikasi Davlat geologiya va mineral resurslar qoʻmitasi, Oʻzbekiston Respublikasi Iqtisodiyot vazirligi va Moliya vazirligi ikki oy muddatda Davlat geologiya qoʻmitasi tizimi boʻyicha geologiya qidiruv-ishlarining har yillik dasturlarini shakllantirish tartibi toʻgʻrisidagi nizomni ishlab chiqsin va tasdiqlash uchun Oʻzbekiston Respublikasi Vazirlar Mahkamasiga taqdim etsin.

8. Quyidagilar 2011-yilning 1-yanvarigacha, bojxona rasmiylashtiruvi yigʻimlaridan tashqari bojxona toʻlovlaridan ozod etilsin:

Oʻzbekiston Respublikasi Vazirlar Mahkamasi har yili tasdiqlaydigan roʻyxatlar boʻyicha Davlat geologiya qoʻmitasi tomonidan olib kelinadigan uskunalar va avtotransport vositalari, materiallar, shuningdek uskunalar uchun ehtiyot qismlar;

“Yergeodezkadastr” davlat qoʻmitasi, Davlat geologiya qoʻmitasi va “Oʻzbekneftgaz” MXK tomonidan, Oʻzbekiston Respublikasi Iqtisodiyot vazirligi va Moliya vazirligi bilan kelishilgan roʻyxatlar boʻyicha olib kelinadigan kosmik suratga olish materiallari, uskunalar va ularga ishlov berish uchun dastur taʼminoti.

9. Oʻzbekiston Respublikasi Oliy va oʻrta maxsus taʼlim vazirligi Toshkent davlat texnika universiteti, Oʻzbekiston Milliy universiteti va Oʻzbekiston Respublikasi Davlat geologiya va mineral resurslar qoʻmitasi bilan birgalikda bir oy muddatda:

geologiya mutaxassisliklariga nisbatan qoʻyiladigan zamonaviy talablardan kelib chiqib, mazkur mutaxassisliklar boʻyicha oʻquv rejalari va taʼlim jarayoni dasturlarini tubdan takomillashtirish;

fakultetlarning professor-oʻqituvchilar tarkibidan geologiya va burgʻulash yoʻnalishi boʻyicha malaka oshirish va malakani oʻzgartirish, shuningdek kamyob yer metallari geologiyasi sohasi boʻyicha mutaxassislarni tayyorlash uchun kadrlarni yetakchi xorijiy oliy oʻquv muassasalariga yuborish;

Toshkent viloyatidagi Oqsoqota va Burchmulla ixtisoslashtirilgan oʻquv geologiya poligonlarini rekonstruksiya qilish va jihozlash;

geologiya sohasi korxonalarining fakultetlarini zarur oʻquv-laboratoriya uskunalari, kompyuter texnikasi va kutubxona fondi bilan jihozlashda homiylik yordamini kengaytirish boʻyicha chora-tadbirlarni ishlab chiqsin, tasdiqlasin va 2007-2008 oʻquv yili mobaynida amalga oshirishni taʼminlasin.

10. Navoiy viloyati hokimligi bir oy muddatda Davlat geologiya qoʻmitasining bazaviy posyolkalarini joriy holati boʻyicha kommunal infratuzilmasi bilan birga 5-ilovaga muvofiq balansga qabul qilsin.

“Oʻzbekenergo” DAK Davlat geologiya qoʻmitasining bazaviy posyolkalarini elektrenergiya bilan taʼminlaydigan past voltli elektr uzatish liniyalarini joriy holati boʻyicha oʻz balansiga olsin.

11. Oʻzbekiston Respublikasi Vazirlar Mahkamasining “Oʻzbekiston Respublikasi Davlat geologiya va mineral resurslar qoʻmitasi faoliyatini takomillashtirish chora-tadbirlari toʻgʻrisida” 2004-yil 25-martdagi 139-sonli qarori 2-bandining ikkinchi xatboshi, shuningdek mazkur qarorning 1 va 2-ilovalari oʻz kuchini yoʻqotgan deb hisoblansin.

12. Ushbu qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.