“Ixtirolar, foydali modellar va sanoat namunalari toʻgʻrisida” va “Seleksiya yutuqlari toʻgʻrisida”gi Oʻzbekiston Respublikasi qonunlariga muvofiq buyuraman:

1. “Patent egasining ochiq litsenziyaga doir huquqni taqdim etish toʻgʻrisidagi arizasini topshirish va koʻrib chiqish hamda bunday ariza toʻgʻrisidagi maʼlumotlarni eʼlon qilish qoidalari” ilovaga* muvofiq tasdiqlansin.

2. Ushbu buyruq Oʻzbekiston Respublikasi Adliya vazirligida davlat roʻyxatidan oʻtkazilgandan soʻng 10 kun oʻtgandan keyin kuchga kiradi.

Patent egasining ochiq litsenziyaga huquq berish haqidagi arizasini topshirish va koʻrib chiqish va shunday ariza toʻgʻrisidagi maʼlumotlarni chop etish qoidalari (bundan keyingi oʻrinlarda Qoidalar deb yuritiladi) Oʻzbekiston Respublikasining “Ixtirolar, foydali modellar va sanoat namunalari toʻgʻrisida”gi va “Seleksiya yutuqlari toʻgʻrisida”gi qonunlariga muvofiq Oʻzbekiston Respublikasi Intellektual mulk agentligida (bundan keyingi oʻrinlarda Agentlik deb yuritiladi) patent egasining ochiq litsenziyaga huquq berish haqidagi arizasini topshirish va koʻrib chiqish va shunday ariza toʻgʻrisidagi maʼlumotlarni chop etish qoidalarini belgilaydi.

1. “Ixtirolar, foydali modellar va sanoat namunalari toʻgʻrisida”gi Oʻzbekiston Respublikasi Qonunining 32-moddasi va “Seleksiya yutuqlari toʻgʻrisida”gi Oʻzbekiston Respublikasi Qonunining 39-moddasiga muvofiq patent egasining ochiq litsenziyaga huquq berish toʻgʻrisidagi arizasi (bundan keyingi oʻrinlarda ariza deb yuritiladi) Agentlikka topshiriladi.

2. Ariza Agentlikda roʻyxatga olingan sanoat mulkining tegishli namunasi, seleksiya yutugʻidan foydalanishga huquq berish toʻgʻrisidagi litsenziya shartnomasi mavjud boʻlgan holda, ushbu litsenziya shartlariga binoan patent egasi shartnomaning amal qilish muddati oʻtmasdan litsenziya berish huquqiga ega boʻlmay turib, topshirilishi mumkin emas.

3. Topshirilgan ariza chaqirib olinmaydi.

4. Arizani topshirishga oid ishlar patent egasi tomonidan mustaqil ravishda, vakil orqali yoki vakolatlari qonun hujjatlariga muvofiq rasmiylashtirilgan ishonchnoma bilan tasdiqlangan patent vakili tomonidan amalga oshiriladi.

5. Ariza toʻgʻrisidagi maʼlumotlarni eʼlon qilish uchun belgilangan miqdorda patent boji toʻlanadi.

6. Patent egasi tomonidan har bir shaxsga sanoat namunasi obyekti, seleksiya yutugʻidan foydalanish uchun huquq berishda Agentlikka quyidagi hujjatlar topshiriladi:

a) patent egasining mazkur Qoidalarga ilovada keltirilgan shaklda tuzilgan ochiq litsenziyaga huquq berish toʻgʻrisidagi arizasi. Ariza oʻzbek tili yoki rus tilida bir nusxada topshiriladi. Xorijiy ismlar va nomlar oʻzbekcha yoki ruscha transliteratsiyada keltiriladi.

Ariza bitta patentga tegishli boʻlishi kerak.

Patent egalarining ariza topshirish haqidagi roziligi taqdim etilayotgan bironta boshqa hujjatda qayd etilmagan boʻlsa, arizani ularning hammalari imzolaydi.

Ariza yuridik shaxs nomidan korxona, tashkilot rahbari yoki buning uchun vakolatli shaxs tomonidan uning lavozimi koʻrsatilgan holda imzolanadi.

Imzolar imzolayotgan shaxs (shaxslar)ning familiyasi, ismi va otasi ismining bosh harflari koʻrsatilgan holda ochib beriladi;

b) patentning asl nusxasi (dublikati);

v) vorislik huquqi yoki merosxoʻrlik huquqini tasdiqlovchi hujjat (zarur boʻlgan hollarda);

g) vakil vakolatlarini tasdiqlaydigan ishonchnoma (zarur boʻlgan hollarda);

d) ariza toʻgʻrisidagi maʼlumotlarni eʼlon qilish uchun belgilangan miqdorda patent boji toʻlanganini tasdiqlaydigan hujjat.

Belgilangan miqdorda patent boji toʻlanganini tasdiqlaydigan hujjat taqdim etilmagan boʻlsa, bu holda arizani koʻrib chiqish boʻyicha yuridik ahamiyatga molik harakatlar amalga oshirilmaydi.

7. Arizaga ilova qilinayotgan hujjatlar oʻzbek, rus yoki boshqa tilda taqdim etilishi mumkin. Agar hujjatlar boshqa tilda taqdim etilgan boʻlsa, ularning oʻzbek yoki rus tiliga tarjimalari ilova qilinadi.

8. Ariza va unga ilova qilingan hujjatlar bevosita Agentlikka topshiriladi yoki pochta orqali joʻnatiladi.

9. Ariza va unga ilova qilingan hujjatlar kelib tushgan kundan eʼtiboran oʻn besh kunlik muddat ichida Agentlik hamma zarur hujjatlarning mavjudligi va ularning mazkur Qoidalar talablariga muvofiqligini tekshiradi.

10. Kerakli hujjatlar mavjud boʻlmagan yoki hujjatlarga mazkur Qoidalarda belgilangan talablar buzilgan xollarda, ariza topshirgan shaxsga bildirishnoma yuboriladi va unda bildirishnoma yuborilgan sanadan boshlab uch oy mobaynida mavjud boʻlmagan va/yoki toʻgʻrilangan hujjatlarni taqdim etish taklif qilinadi.

Bunda arizani koʻrib chiqish boʻyicha belgilangan muddatning kechishi yetishmagan yoki toʻgʻrilangan hujjatlarning oxirgisi kelib tushkunga qadar toʻxtatib turiladi.

11. Taqdim etilgan hujjatlar mazkur Qoidalar talablariga mos kelgan hollarda, Agentlik ariza topshirgan shaxsni uning arizasi qabul qilinganligi toʻgʻrisida xabardor etadi. Ariza toʻgʻrisidagi maʼlumotlar qanday obyektga nisbatan topshirilganiga qarab, Ixtirolar, foydali modellar, sanoat namunalari, oʻsimlik navlari va hayvon zotlarining Davlat reyestrlariga kiritiladi.

12. Taqdim etilgan hujjatlar mazkur Qoidalar talablariga mos kelmagan, shuningdek toʻgʻrilangan va yetishmagan hujjatlar belgilangan muddatda taqdim etilmagan hollarda, Agentlik ariza topshirgan shaxsga arizani qabul qilish rad etilgani toʻgʻrisida asosli dalillar keltirilgan bildirishnoma yuboradi va, arizadan tashqari, hamma taqdim etilgan hujjatlarni qaytarib beradi.

13. Agentlikning rasmiy Axborotnomasida ariza toʻgʻrisidagi quyidagi maʼlumotlar eʼlon qilinadi:

patent raqami;

talabnoma raqami;

sanoat namunasi obyekti, seleksiya yutugʻining roʻyxatga olingani toʻgʻrisidagi maʼlumotlar eʼlon qilingan Agentlik rasmiy Axborotnomasining soni va yili;

Xalqaro patent klassifikatsiyasi (XPK) / Sanoat namunalarining xalqaro klassifikatsiyasi (SNXK)ning indeksi (sanoat mulki obyektiga nisbatan koʻrsatiladi);

sanoat mulki obyekti, seleksiya yutugʻining nomi;

patent egasi;

yozishma uchun manzil.

14. Agentlik ariza toʻgʻrisidagi maʼlumotlar Agentlikning rasmiy Axborotnomasida eʼlon qilingan sanadan eʼtiboran 10 kun muddatda patentda tegishli belgi qoʻyadi va uni ariza topshirgan shaxsga yuboradi.