Ichki isteʼmol bozorini himoya qilish, jumhuriyat tashqarisiga tovar-moddiy boyliklarni gʻayriqonuniy va asossiz ravishda olib ketishga yoʻl qoʻymaslik maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligi huzurida tovar-moddiy boyliklarni olib ketishni nazorat qiluvchi Davlat inspeksiyasi (bundan keyin — olib ketishni nazorat qiluvchi Davlat inspeksiyasi) tuzilsin.

2. Olib ketishni nazorat qiluvchi Davlat inspeksiyasining tuzilishi va uning toʻgʻrisidagi nizom 1, 2-ilovalarga muvofiq tasdiqlansin. Davlat inspeksiyasi xodimlarining soni 1007 kishidan iborat qilib, shu jumladan, 503 kishi Oʻzbekiston Respublikasi IIV organlari boʻlinmalari xodimlari sonini qisqartirish hisobiga belgilansin.

3. Davlat inspeksiyasi barcha xizmatlarining ishlarini muvofiqlashtirishni taʼminlash maqsadida Oʻzbekiston Respublikasi Ichki ishlar vazirligi huzurida mazkur qarorning 2-bandida belgilangan xodimlar soni doirasida 42 xodimdan iborat olib ketishni nazorat qiluvchi Davlat inspeksiyasining Bosh boshqarmasi tuzilsin.

Olib ketishni nazorat qiluvchi Davlat inspeksiyasi Bosh boshqarmasining boshligʻi Ichki ishlar vazirining taqdimnomasi boʻyicha Oʻzbekiston Respublikasi Prezidenti huzuridagi Vazirlar Mahkamasining qarori bilan tayinlanadi va hayʼat aʼzosi hamda Oʻzbekiston Respublikasi Ichki ishlar vazirining oʻrinbosari hisoblanadi.

Belgilansinki, olib ketishni nazorat qiluvchi Davlat inspeksiyasining Qoraqalpogʻiston Respublikasi, viloyatlar va Toshkent shahri boʻyicha boʻlimlari (1-ilova) Oʻzbekiston Respublikasi Ichki ishlar vazirligi huzuridagi Davlat inspeksiyasining Bosh boshqarmasiga bevosita boʻysunadilar.

Olib ketishni nazorat qiluvchi Bosh boshqarma Kengashiga va respublika hududlaridagi boʻlimlar boshliqlariga oʻz obroʻsini toʻkkan yoki ishonchni yoʻqotgan xodimlarni tegishli nomenklatura boʻyicha ishdan boʻshatish toʻgʻrisida uzil-kesil qarorlar qabul qilish huquqi berilsin.

4. Olib ketishni nazorat qiluvchi Davlat inspeksiyasi xodimlarining lavozim maoshlari SSSR Mehnat va ijtimoiy masalalar davlat qoʻmitasining “Davlat soliq inspeksiyalari xodimlarining mehnatiga haq toʻlash shartlari va lavozim maoshlari toʻgʻrisida” 1990-yil 8-fevraldagi 54-son qaroriga muvofiq belgilansin.

SSJI Vazirlar Mahkamasining “Ichki ishlar organlari shaxsiy sostavining pul taʼminotini oshirish haqida” 1991-yil 12-fevraldagi 28-son qarori yuzasidan Oʻzbekiston SSJ Prezidenti huzuridagi Vazirlar Mahkamasining 1991-yil 31-maydagi 151-son qarorining 4—11-bandlarida va 1-jadvalda nazarda tutilgan mehnatga haq toʻlash shartlari olib ketishni nazorat qiluvchi Davlat inspeksiyasining oddiy va boshliqlar sostaviga kiruvchi shaxslarga 3, 4, 5-ilovalarga muvofiq joriy qilinsin.

5. Olib ketishni nazorat qiluvchi Davlat inspeksiyasi Bosh boshqarmasida Oʻzbekiston Respublikasi qonunlari bilan belgilangan undirilgan jarimalar yigʻindisidan 15 foiz miqdorida ajratmalar hisobiga shakllantiriladigan xodimlarga moddiy yordam berish va mazkur xizmatni rivojlantirish fondi tuzilsin.

Oʻzbekiston Respublikasi Ichki ishlar vazirligi Vazirlar Mahkamasi huzuridagi Bosh soliq boshqarmasi bilan birgalikda bir oy muddat ichida koʻrsatilgan fondni tuzish va undan foydalanish tartibi toʻgʻrisidagi nizomni ishlab chiqsin va tasdiqlasin.

6. Oʻzbekiston Respublikasi Moliya vazirligi mazkur qarorning 2—4-bandlariga muvofiq 1991-yil va keyingi yillarda olib ketishni nazorat qiluvchi Davlat inspeksiyasini taʼminlash uchun zarur pul mablagʻlarini respublika budjetidan ajratsin.

7. Olib ketishni nazorat qiluvchi Davlat inspeksiyasi tizimini, shu jumladan, Bosh boshqarma apparatini va uning respublikadagi boʻlimlarini moddiy-texnik jihatdan taʼminlash maqsadida quyidagilarni ajratish taʼminlansin:

Qoraqalpogʻiston Respublikasi Vazirlar Kengashi, viloyat ijroiya qoʻmitalari, Toshkent shahar ijroiya qoʻmitasi tomonidan apparatlarning boʻlimlarini joylashtirish uchun joylar;

Oʻzbekiston Respublikasi Iqtisodiyot qoʻmitasi tomonidan — avtobuslar, yuk tashuvchi va yengil avtomobillar, shuningdek, 50 ta vagonchalar;

Oʻzbekiston Respublikasi Neft mahsulotlari bilan taʼminlash davlat qoʻmitasi tomonidan — yonilgʻi-moylash materiallari;

Oʻzbekiston Respublikasi Moddiy-texnika taʼminoti davlat-kooperativ qoʻmitasi va Aloqa vazirligi tomonidan—birkitilgan nomenklatura boʻyicha radioelektronika va aloqa simlari vositalari;

Oʻzbekiston Respublikasi Avtomobil transporti vazirligi va Avtomobil yoʻllari vazirligi, Oʻzbekiston fuqaro aviatsiyasi boshqarmasi va Oʻrta Osiyo temir yoʻli boshqarmasi tomonidan — binolar, postlarni obodonlashtirish uchun toʻsiq bordyurlar va shlagbaumlar;

Oʻzbekiston fuqaro aviatsiyasi boshqarmasi tomonidan — ijara shartlarida vertolyotlar;

Oʻzbekiston Respublikasi Aloqa vazirligi tomonidan — olib ketishni nazorat qiluvchi Davlat inspeksiyasi Bosh boshqarmasi, uning mintaqalardagi boʻlimlari va doimiy postlari oʻrtasida ijara shartlari boʻyicha maxsus bevosita aloqa kanalini oʻrnatish.

8. Oʻzbekiston Respublikasi Ichki ishlar vazirligi bir oy muddat ichida:

Oʻzbekiston Respublikasining chegara rayonlaridagi barcha ishlab turgan doimiy Davlat avtomobil inspeksiyasi postlarini olib ketishni nazorat qiluvchi Davlat inspeksiyasi balansiga topshirishni amalga oshirsin;

xalq deputatlari Kengashlari ijroiya qoʻmitalari, respublikaning qurilish vazirliklari va idoralari bilan birgalikda 1991-yilda olib ketishni nazorat qiluvchi Davlat inspeksiyasining zarur miqdordagi doimiy postlari binolarini qurish toʻgʻrisida Vazirlar Mahkamasiga taklif kiritsin;

Toshkent maxsus oʻrta militsiya maktabi negizida olib ketishni nazorat qiluvchi Davlat inspeksiyasi uchun kadrlar tayyorlashni va qayta tayyorlashni tashkil etsin.

9. Xalq isteʼmoli mollari, savdo va pulli xizmatlar kompleksi boshqa komplekslar, tegishli vazirliklar va idoralar bilan birgalikda 10 kun muddat ichida respublika tashqarisiga barcha turdagi transport vositalarida tovar-moddiy boyliklarni olib ketish va ruxsatnoma berish tartibi toʻgʻrisida Vazirlar Mahkamasi qarorining loyihasini tayyorlasin va taqdim etsin.

10. Oʻzbekiston Respublikasi Ichki ishlar vazirligining mazkur qarorning qanday bajarilayotganligi toʻgʻrisidagi hisoboti 1991-yilning oktyabr oyida tinglansin.

1. Tovar-moddiy boyliklarni olib ketishni nazorat qiluvchi Davlat inspeksiyasi (bundan keyin olib ketishni nazorat qiluvchi Davlat inspeksiyasi deb ataladi) Oʻzbekiston Respublikasi Ichki ishlar vazirligi huzurida tuziladi.

Olib ketishni nazorat qiluvchi Davlat inspeksiyasi yuridik shaxs hisoblanadi hamda, oʻz nomi oʻzbek va rus tillarida yozilgan va Oʻzbekiston Respublikasining Davlat gerbi aks etgan muhrga ega boʻladi.

Davlat inspeksiyasiga yuklatilgan vazifalarni kelishib hal qilish va funksiyalarni zudlik bilan amalga oshirish uchun kollektiv organ — Kengash tuziladi. Kengash toʻgʻrisidagi nizom va uning tarkibi Oʻzbekiston Respublikasi Ichki ishlar vazirligi hayʼati tomonidan tasdiqlanadi.

Olib ketishni nazorat qiluvchi Davlat inspeksiyasini moliyaviy va moddiy-texnikaviy taʼminlash belgilangan tartibda respublika budjeti hisobidan amalga oshiriladi.

2. Olib ketishni nazorat qiluvchi Davlat inspeksiyasining faoliyati qonuniylikka qatʼiy amal qilishga asoslanadi. Uning faoliyatining huquqiy asosini Oʻzbekiston Respublikasining qonunlari, Oʻzbekiston Respublikasi Oliy Kengashining boshqa qarorlari, Oʻzbekiston Respublikasi Prezidentining farmonlari, Oʻzbekiston Respublikasi Prezidenti huzuridagi Vazirlar Mahkamasining qarorlari va farmoyishlari, shuningdek, mazkur Nizom tashkil etadi.

3. Olib ketishni nazorat qiluvchi Davlat inspeksiyasi tarkibiga quyidagilar kiradi:

Oʻzbekiston Respublikasi Ichki ishlar vazirligi huzuridagi olib ketishni nazorat qiluvchi Davlat inspeksiyasining Bosh boshqarmasi;

Oʻzbekiston Respublikasi Ichki ishlar vazirligi huzuridagi olib ketishni nazorat qiluvchi Davlat inspeksiyasining Bosh boshqarmasiga bevosita boʻysunuvchi, olib ketishni nazorat qiluvchi Davlat inspeksiyasining Qoraqalpogʻiston Respublikasi, viloyatlar va Toshkent shahar boʻlimlari;

respublika yoʻllaridagi, avtomagistrallaridagi, avto, aero, temir yoʻl vokzallaridagi hamda daryo portlaridagi doimiy va koʻchma postlarning boʻlinmalari.

4. Oʻzbekiston Respublikasi Ichki ishlar vazirligi huzuridagi olib ketishni nazorat qiluvchi Davlat inspeksiyasining Bosh boshqarmasiga Ichki ishlar vazirining taqdimnomasi boʻyicha Vazirlar Mahkamasi qarori bilan tayinlanadigan va uning oʻrinbosari hamda Oʻzbekiston Respublikasi Ichki ishlar vazirligining hayʼat aʼzosi hisoblanuvchi boshliq boshchilik qiladi.

Oʻzbekiston Respublikasi Ichki ishlar vazirligi huzuridagi olib ketishni nazorat qiluvchi Davlat inspeksiyasi Bosh boshqarmasi boshligʻining birinchi oʻrinbosari va oʻrinbosarlari hamda olib ketishni nazorat qiluvchi Davlat inspeksiyasining Qoraqalpogʻiston Respublikasi, viloyatlar va Toshkent shahar boʻlimlarining boshliqlari olib ketishni nazorat qiluvchi Davlat inspeksiyasi Bosh boshqarmasi boshligʻining taqdimnomasi boʻyicha Oʻzbekiston Respublikasi Ichki ishlar vaziri tomonidan tayinlanadi.

Olib ketishni nazorat qiluvchi Davlat inspeksiyasi bosh boshqarmasi markaziy apparatining xodimlarini tayinlash va boʻshatish uning boshligʻi tomonidan, Qoraqalpogʻiston Respublikasi, viloyatlar va Toshkent shahar boʻlimlarining xodimlarini tayinlash va boʻshatish esa tegishli boʻlimlar rahbarlari tomonidan amalga oshiriladi.

5. Olib ketishni nazorat qiluvchi Davlat inspeksiyasi xodimlari tomonidan xizmatni oʻtash tartibi va shartlari SSSR ichki ishlar organlari shaxsiy sostavining xizmatni oʻtashi toʻgʻrisidagi nizom bilan belgilanadi.

Olib ketishni nazorat qiluvchi Davlat inspeksiyasi mansabdor shaxslarining oʻz vazifalarini bajarmaganliklari yoki kerakli darajada bajarmaganliklari uchun ular SSSR ichki ishlar organlari intizomiy ustaviga va amaldagi qonunlarga muvofiq javobgarlikka tortiladilar.

Bosh boshqarma Kengashi va respublika hududlaridagi boʻlimlar boshliqlari oʻz obroʻsini toʻkkan yoki ishonchni yoʻqotgan xodimlarni tegishli xodimlar nomenklaturasi boʻyicha ishdan boʻshatish toʻgʻrisida uzil-kesil qaror qabul qilish huquqiga egadirlar.

6. Olib ketishni nazorat qiluvchi Davlat inspeksiyasining bosh vazifasi ichki isteʼmol bozorini himoya qilish hamda respublika tashqarisiga Oʻzbekiston Respublikasi Prezidenti huzuridagi Vazirlar Mahkamasining qarorlari bilan tasdiqlanadigan roʻyxatga muvofiq xomashyo, materiallar, qishloq xoʻjaligi mahsulotlari, moddiy-texnika boyliklari va boshqa tovarlarni gʻayriqonuniy yoki asossiz ravishda olib ketishga yoʻl qoʻymaslikdan iboratdir.

Olib ketishni nazorat qiluvchi Davlat inspeksiyasi mansabdor shaxslarining oʻz xizmat vazifalarini bajarib turgan paytdagi talablari barcha mansabdor shaxslar va fuqarolar uchun majburiy hisoblanadi.

Olib ketishni nazorat qiluvchi Davlat inspeksiyasi oʻz vakolatlarini amalga oshirishda jamoat tartibini muhofaza qilish va jinoyatchilikka qarshi kurashish boʻyicha hududiy ichki ishlar organlari bilan hamjihatlikda ishlaydi.

7. Olib ketishni nazorat qiluvchi Davlat inspeksiyasining boʻlimlari oʻzlariga yuklatilgan vazifalarga muvofiq quyidagilarni amalga oshiradilar:

respublikadan olib ketiladigan yuklarning yorligʻini koʻrish, ularni olib ketishning qonuniyligini tasdiqlovchi hujjatlarni tekshirish;

respublika tashqarisiga yuklarni olib ketuvchi avtotransport vositalarini, harakatdagi temir yoʻl sostavini, aviatsiya va daryo kemalarini koʻrikdan oʻtkazish;

respublikadan yuklarni tashish qoidalarini buzishlar toʻgʻrisidagi ishlar boʻyicha surishtiruv olib borish;

ushlab qolingan yuklarning but-butunligini taʼminlash va belgilangan tartibda ularni tegishli organlarga berish yuzasidan kechiktirib boʻlmaydigan harakatlarni amalga oshirish.

8. Olib ketishni nazorat qiluvchi Davlat inspeksiyasi boʻlimlarining xodimlari oʻzlariga yuklatilgan vazifalarni amalga oshirish maqsadida quyidagi huquqlarga egadirlar:

yuklarni koʻzdan kechirish uchun barcha turdagi transport vositalarini toʻxtatish;

fuqarolardan va mansabdor shaxslardan respublikadan tashqariga olib ketiladigan yuklarni koʻrsatishni, shuningdek, ularni olib ketishning qonuniyligini tasdiqlovchi hujjatlarni talab qilish;

respublikadan chiqib ketayotgan barcha turdagi transport vositalarining yukdonlarini, yuk boʻlimlari, kunkalar, kuzovlar, konteynerlar, vagonlar va boshqa tashish idishlaridagi plombalarni, qulflash moslamalarini ochish (Oʻzbekiston Respublikasi hududidan tranzit deklaratsiya boʻyicha olib oʻtiladigan yuklar bundan mustasno);

gʻayriqonuniy olib ketilayotgan yuklarni, shuningdek, transport vositalarini ushlab qolish va ularni tegishli tashkilotlarga uch kungacha muddat ichida topshirish;

zarurat tugʻilganda avtotransportni majburiy toʻxtatish uchun maxsus texnika vositalarini qoʻllanish;

mast holda boʻlgan yoki mazkur turdagi transport vositasini boshqarish huquqiga ega boʻlmagan shaxslarni transport vositalarini boshqarishdan chetlatish;

tovarlarni, moddiy boyliklarni va boshqa narsalarni olib ketishning belgilangan tartib va qoidalarini buzishda aybdor boʻlgan fuqarolar va mansabdor shaxslarga Oʻzbekiston Respublikasi qonunlarida belgilangan miqdorlarda va tartibda jarimalar solish.

9. Olib ketishni nazorat qiluvchi Davlat inspeksiyasi mansabdor shaxslarining harakatlari ustidan yuqori turuvchi organlarga yoki sud tartibida shikoyat qilinishi mumkin. Shikoyatning berilishi shikoyat qilinayotgan harakatlarni toʻxtatib turmaydi.

Olib ketishni nazorat qiluvchi Davlat inspeksiyasi mansabdor shaxslarining maʼmuriy jazo belgilash bilan bogʻliq harakatlari ustidan shikoyat qilish Oʻzbekiston Respublikasining qonunlariga muvofiq amalga oshiriladi.