Қарорга кўра, мақсадли дастурлар доирасида молиялаштириладиган объектларни қуриш-таъмирлаш ишлари бўйича буюртмачи хизматларини кўрсатишда:

бюджет тизими бюджетлари ҳисобидан молиялаштириладиган объектлар бўйича муаллифлик назоратини амалга ошириш билан боғлиқ харажатлар шартномада алоҳида кўрсатилади ва лойиҳа-смета ҳужжатларини ишлаб чиқиш қийматининг 10 фоизи миқдорида белгиланади;

лойиҳа-смета ҳужжатларини ишлаб чиқиш учун тузиладиган шартномаларга мувофиқ лойиҳа ташкилотларига бир марта 30 фоиз миқдорида олдиндан бўнак тўлови тўланади;

лойиҳалаштириш топшириқлари рақамли форматда ва электрон рақамли имзо билан тасдиқланган бўлиши талаб этилади;

ишлаб чиқилган лойиҳа-смета ҳужжатлари “Шаффоф қурилиш” миллий ахборот тизими (МАТ) орқали қабул қилинади ва автоматик равишда бир иш кунида экспертизага юборилади.

“Шаффоф қурилиш” МАТда объектларни лойиҳалаштириш топшириқларининг рақамлаштирилиши босқичма-босқич таъминланади:

2026 йил 1 декабрга қадар — мактаб, мактабгача таълим ташкилотлари объектлари;

2027 йил 1 сентябрга қадар — соғлиқни сақлаш йўналишидаги объектлар;

2028 йил 1 июнга қадар — қолган бошқа йўналишдаги объектлар.

2027 йил 1 мартдан бошлаб мақсадли дастурлар доирасида бюджет тизими бюджетлари ҳисобидан молиялаштириладиган объектларнинг лойиҳа ҳужжатларида ягона ёндашув жорий қилинади. Бунда:

намунавий ва такрорий қўлланадиган лойиҳалар “Шаффоф қурилиш” МАТга жойлаштирилади;

қурилиши тасдиқланган намунавий лойиҳаларга асосан уларни жойига боғлаш орқали амалга оширилади (муҳандислик-коммуникация тармоқлари бундан мустасно);

объектларнинг лойиҳа ҳужжатларига ижобий экспертиза хулосаси олиниб, буюртмачи хизматининг ички буйруғи билан тасдиқланганидан сўнг асослантирилмаган қўшимча ва ўзгартириш киритилиши тақиқланади.

Тасдиқланган лойиҳа-смета ҳужжатларига асосан объектнинг қиймати лойиҳа ташкилотини аниқлаш учун фойдаланилган дастлабки қийматга нисбатан 1,5 баравардан юқори ёки камни ташкил этганда, лойиҳа-қидирув ишларининг қиймати қайта ҳисоблаб чиқилади.