Қонунга кўра, экологик экспертиза давлат ва жамоат экологик экспертизаси тарзида амалга оширилади.

Экологик экспертиза объектлари қуйидагилардан иборат ва улар давлат экологик экспертизасидан ўтказилиши шарт:

барча турдаги қурилишлар учун ер участкаларини танлаш ва ажратиш материаллари;

лойиҳаолди ва лойиҳа ҳужжатлари;

табиий ресурслардан фойдаланиш билан боғлиқ бўлган хўжалик фаолиятини ҳамда бошқа фаолиятни тартибга солувчи норматив-техник ва йўриқнома-услубий ҳужжатлар, шу жумладан техник регламентлар ва шартларнинг, стандартларнинг, қоидалар ҳамда йўриқномаларнинг лойиҳалари;

чиқиндиларни зарарсизлантириш, қайта ишлаш ва утилизация қилиш учун янги турдаги технологияларни ҳамда техника воситаларини, материаллар, буюмларни, биологик, кимёвий моддаларни ва воситаларни яратиш бўйича ҳужжатлар;

атроф-муҳитнинг ҳолатига ва инсон соғлиғига салбий таъсир кўрсатувчи ишлаб турган корхоналар ҳамда бошқа объектлар;

махсус ҳуқуқий режимга эга бўлган объектлар.

Экология, атроф-муҳитни муҳофаза қилиш ва иқлим ўзгариши вазирлиги экологик экспертиза, атроф-муҳитга таъсирни баҳолаш ва стратегик экологик баҳолаш соҳасидаги махсус ваколатли давлат органидир.

Давлат экологик экспертизасининг хулосаси қуйидаги муддатларда юридик кучга эга бўлади:

атроф-муҳитга таъсирни баҳолаш материаллари бўйича – хулоса берилган кундан эътиборан 3 йил мобайнида;

экологик нормативлар лойиҳалари бўйича – хулоса берилган кундан кундан эътиборан 5 йил мобайнида.