1. Oliy va o‘rta maxsus, kasb-hunar taʼlimi tizimini tubdan takomillashtirishning asosiy yo‘nalishlari belgilandi;

2. O‘zbekiston Respublikasi Oliy va o‘rta maxsus taʼlim vazirligining Kasb-hunar taʼlimi markazi (Markaz) tugatildi;

3. Markazining quyidagi muassasalari O‘zbekiston Respublikasi Oliy taʼlim, fan va innovatsiyalar vazirligining (Vazirlik) idoraviy bo‘ysunuviga o‘tkazildi:

- Kasb-hunar taʼlimi tizimini innovatsion rivojlantirish, pedagog kadrlarning malakasini oshirish va ularni qayta tayyorlash instituti;

- Metrologik nazorat xizmati;

- Qoraqalpog‘iston Respublikasi, viloyatlar va Toshkent shahar kasb-hunar taʼlimi hududiy boshqarmalari va ular tizimidagi kasb-hunar taʼlim muassasalari;

4. Vazirlik oliy, o‘rta maxsus va professional taʼlim hamda fan va innovatsiyalar bo‘yicha yagona davlat siyosatini, shuningdek, oliy, o‘rta maxsus va professional taʼlim muassasalarida bo‘ysunuviga ko‘ra vazirlik va idoralar bilan birgalikda o‘quv-tarbiya jarayoniga tashkiliy va metodik rahbarlikni amalga oshirish yuzasidan vakolatli davlat organi etib belgilandi;

5. 2019 yil 1 avgustdan quyidagilarni amalga oshirish to‘g‘risidagi takliflariga rozilik berildi:

a) yagona tarif setkasi bo‘yicha mehnatga haq to‘lashning tasdiqlangan razryadlariga ko‘ra vazirlik boshqaruv xodimlari lavozim maoshlarini aniqlashda tarif koeffitsiyentlarini bir yarim baravar miqdorida qo‘llash hamda bu bilan bog‘liq qo‘shimcha xarajatlarni O‘zbekiston Respublikasi Vazirlikning Oliy taʼlim muassasalarini rivojlantirish jamg‘armasi mablag‘lari hisobidan qoplash;

b) Davlat byudjeti mablag‘lari hisobidan Vazirlik markaziy apparatining:

fan nomzodi yoki falsafa doktori (PhD) ilmiy darajasiga yoki xorijiy davlatlarning unga tenglashtirilgan boshqa ilmiy darajalariga ega xodimlari oylik ish haqiga — 30 foiz;

fan doktori yoki fan doktori (DSc) ilmiy darajasiga yoki xorijiy davlatlarning unga tenglashtirilgan boshqa ilmiy darajalariga ega xodimlari oylik ish haqiga — 35 foiz ustamalar belgilash;

v) Vazirlikning Oliy taʼlim muassasalarini rivojlantirish jamg‘armasi mablag‘lari hisobidan Vazirlikning markaziy apparati xodimlari oylik lavozim maoshiga oliy, o‘rta maxsus va professional taʼlim, fan va innovatsiyalar tizimida xizmat qilgan umumiy ish staji uchun 3 yildan 5 yilgacha — 10 foiz, 5 yildan 10 yilgacha — 20 foiz, 10 yildan 20 yilgacha — 30 foiz, 20 yildan ortiq — 40 foiz oylik ustamalar to‘lash;

6. 2019/2020 o‘quv yilidan boshlab oliy taʼlim muassasalari rektorlari (filiallar direktorlari), kasb-hunar taʼlimi muassasalari direktorlariga bo‘ysunuvi bo‘yicha vazirlik va idoralar bilan kelishilgan holda:

xorijiy fuqarolarni o‘qitish uchun oliy va kasb-hunar taʼlimi muassasalarida alohida bakalavriat taʼlim yo‘nalishlari, magistratura mutaxassisliklari, kasblar va mutaxassisliklar ochish, ularni o‘qitish tili hamda akademik guruh shakllantirish uchun zarur talabalar (o‘quvchilar) sonini belgilash;

kasb-hunar taʼlimi muassasalarida kasblar va mutaxassisliklar bo‘yicha taʼlim olish istagida bo‘lgan xorijiy fuqarolarni o‘qitish muddati, davomiyligi va ularni to‘lov-kontrakt asosida o‘qitish qiymatini belgilash huquqi beriladi.