Farmonga asosan:

1) Quyidagilar oliy taʼlim muassasalarining rahbar va pedagog kadrlarini qayta tayyorlash va malakasini oshirish tizimini yana-da takomillashtirishning muhim yo‘nalishlari deb hisoblanishi belgilandi:

oliy o‘quv yurtlari professor-o‘qituvchilarining pedagogik va kasb darajasini muntazam oshirish asosida ularning qonunchilik normalari, nazariya, ilmiy va amaliy tadqiqotlar, texnologik taraqqiyot va o‘qitilayotgan fanlar bo‘yicha innovatsiyalar, shuningdek o‘quv jarayonini tashkil etishning zamonaviy uslublari sohasidagi so‘nggi yutuqlarni chuqur o‘rganish;

yuqori samarali zamonaviy taʼlim va innovatsiya texnologiyalari, ilg‘or xorijiy tajribani keng joriy etgan holda, oliy o‘quv yurtlarining pedagog kadrlarini qayta tayyorlash va malakasini oshirish bo‘yicha malaka talablari, o‘quv rejalari, dastur va uslublarini tubdan yangilash;

oliy o‘quv yurtlari o‘qituvchilarining global Internet tarmog‘i, multimedia tizimlari va masofadan o‘qitish usullaridan foydalangan holda, zamonaviy innovatsion pedagogika, axborot-kommunikatsiya texnologiyalarini egallashi va ularni o‘quv jarayoniga faol tatbiq etishi;

oliy o‘quv yurtlari pedagog kadrlarining chet tilini amaliy o‘zlashtirish darajasini oshirish va undan o‘z kasb mahorati, pedagogik va ilmiy faoliyatini muttasil oshirib borishi uchun keng foydalanishi;

2) o‘z tasarrufida oliy taʼlim muassasalari bo‘lgan boshqa vazirlik va idoralarning qayta tayyorlash yo‘nalishlari bo‘yicha oliy taʼlim muassasalari rahbar va pedagog kadrlarini qayta tayyorlash va malakasini oshirishni tashkil etish borasida mamlakatimizning ushbu yo‘nalishlarda Doktorlik dissertatsiyalarini himoya qilish ilmiy kengashlari, zarur uslubiy, o‘quv-laboratoriya va axborot-kommunikatsiya vositalari bilan jihozlangan zamonaviy moddiy-texnik bazaga ega 18 ta yetakchi oliy o‘quv yurti hamda davlat muassasasini oliy taʼlim muassasalari rahbar va pedagogik kadrlarini qayta tayyorlashni tashkil etish bo‘yicha Tayanch oliy o‘quv yurtlari sifatida belgilashga doir taklif 1-ilovaga muvofiq qabul qilindi;

3) Quyidagilar Tayanch oliy o‘quv yurtlarining asosiy vazifa va faoliyat yo‘nalishlari etib belgilandi:

qayta tayyorlashning tegishli yo‘nalishlari bo‘yicha doimiy faoliyat ko‘rsatadigan oliy o‘quv yurtlarining rahbar va pedagog kadrlarini qayta tayyorlash va malakasini oshirish kurslarini tashkil etish;

ushbu kurslarda mashg‘ulotlarni sifat jihatidan yuqori tashkiliy va professional darajada o‘tkazish uchun zarur o‘quv-uslubiy va moddiy-texnik bazani shakllantirish;

oliy o‘quv yurtining yetakchi o‘qituvchilarini va Doktorlik dissertatsiyalarini himoya qilish bo‘yicha ilmiy kengash aʼzolarini, shuningdek, mamlakatimizdagi boshqa oliy o‘quv yurtlarining yuqori malakali o‘qituvchilari, xorijiy mutaxassislar, o‘quv-uslubiy xodimlar va amaliyotchi mutaxassislarni shartnoma asosida qayta tayyorlash va malaka oshirish kurslarida o‘quv mashg‘ulotlarini olib borish uchun keng jalb etish;

qayta tayyorlash yo‘nalishlari bo‘yicha zarur axborot-maʼlumot bazasini shakllantirish, zamonaviy innovatsion pedagogika, multimedia va axborot- kommunikatsiya texnologiyalarini ishlab chiqish va qayta tayyorlash jarayoniga tatbiq etish va boshqalar;

4) Quyidagi tartib o‘rnatildi:

idoraviy mansubligidan qatʼi nazar, mamlakatimiz taʼlim muassasalarining rahbar va pedagog kadrlari uch yilda kamida bir marta doimiy asosda 1-ilovaga muvofiq Tayanch o‘quv yurtlarining doimiy faoliyat ko‘rsatadigan kurslarida qayta tayyorlashning tegishli yo‘nalishlari bo‘yicha qayta tayyorlanishi va malakasini oshirishi shartligi;

qayta tayyorlash va malaka oshirish kurslarida o‘qish 2-ilovaga muvofiq Oliy taʼlim muassasalari rahbar va pedagog kadrlarini qayta tayyorlash va ularning malakasini oshirish kursi o‘quv rejasining namunaviy tuzilmasi asosida ishlab chiqilgan 288 soatlik maxsus dasturlarning 144 soat hajmi ishdan ajralmagan holda mustaqil malaka oshirish usullari asosida, 144 soati to‘g‘ridan-to‘g‘ri (bevosita) malaka oshirish shaklida ishdan ajragan holda amalga oshirishi;

kurslar yakunida tinglovchilar har bir Tayanch oliy o‘quv yurtida tashkil etiladigan oliy o‘quv yurti rektori yoki Fan doktori ilmiy darajasini berish bo‘yicha ilmiy kengash raisi rahbarligidagi ilmiy kengash aʼzolari, o‘quv-uslubiy ishlar sohasidagi yirik mutaxassislardan tashkil topgan kamida 7 kishidan iborat Attestatsiya komissiyalari tomonidan o‘tkaziladigan attestatsiyadan o‘tishi;

Attestatsiyadan muvaffaqiyatli o‘tgan kurs tinglovchilariga davlat namunasidagi qatʼiy hisobdorlik hujjati hisoblangan malakaviy attestat berilishi va boshqalar;

Tayanch oliy o‘quv yurtlarida qayta tayyorlash va malaka oshirish kurslarida o‘qiyotgan tinglovchilarning asosiy ish joyida egallab turgan lavozimi va o‘rtacha ish haqi o‘qish davrida saqlab qolinishi;

Oliy o‘quv yurtlarining rahbar va pedagog kadrlarini qayta tayyorlash va malakasini oshirish bo‘yicha doimiy faoliyat ko‘rsatadigan kurslar faoliyati 2015 yilning 1 sentyabridan tashkil etilishi belgilandi;

5) Mamlakatimiz oliy o‘quv yurtlarining rahbar va o‘qituvchilarini qayta tayyorlash va attestatsiyadan o‘tkazish jarayonlarini tashkil etish borasidagi ishlarni aniq va samarali muvofiqlashtirish uchun O‘zbekiston Respublikasi Vazirlar Mahkamasi huzurida doimiy faoliyat yuritadigan Idoralararo komissiya tashkil etildi va uning zimmasiga quyidagi vazifalar yuklatilishi:

oliy o‘quv yurtlari o‘qituvchilarining zamonaviy talablarga muvofiq o‘z kasb darajasini muntazam oshirib borishdan manfaatdorligiga alohida eʼtibor qaratgan holda, oliy o‘quv yurtlarining rahbar va pedagog kadrlarini qayta tayyorlash va malakasini oshirish tizimini yana-da takomillashtirish bo‘yicha mazkur Farmonda ko‘zda tutilgan vazifalar bajarilishining tegishli nazoratini taʼminlashni tashkil etish;

oliy o‘quv yurtlarining rahbar va pedagog kadrlarini qayta tayyorlash va malakasini oshirishni tashkil etish bo‘yicha Tayanch oliy o‘quv yurtlari faoliyatini muvofiqlashtirish, ularning o‘quv-uslubiy va moddiy-texnik bazasini yana-da rivojlantirish hamda mustahkamlashga ko‘maklashish va boshqalar belgilandi.