«Ўзбекистон Республикаси қишлоқ хўжалиги корхоналарини таркибий қайта тузиш» лойиҳасини амалга ошириш мақсадида Вазирлар Маҳкамаси қарор қилади:

1. Қуйидагилар:

Вазирлар Маҳкамасининг «Халқаро тикланиш ва тараққиёт банки билан ҳамкорлик қилиш дастурини амалга оширишга оид чора-тадбирлар тўғрисида» 1997 йил 2 октябрдаги 462-сон қарорига мувофиқ республика қишлоқ хўжалиги корхоналарини таркибий қайта тузиш лойиҳасини ишлаб чиқишни тугаллашга Халқаро тикланиш ва тараққиёт банки томонидан Ўзбекистон Ҳукуматига 1 млн АҚШ доллари миқдорида аванс қарз берилганлиги;

қишлоқ хўжалиги ишлаб чиқарувчиларини таркибий қайта тузишнинг қонунчилик базасини ва ерни рўйхатдан ўтказиш тизимини такомиллаштириш қишлоқ хўжалиги ишлаб чиқарувчиларининг ахборот таъминотини ташкил этиш ва ривожлантириш ҳамда молиявий қўллаб-қувватлаш лойиҳанинг асосий мақсадлари ҳисобланиши;

2. Ўзбекистон Республикаси Қишлоқ ва сув хўжалиги вазирлиги «Ўзбекистон Республикаси қишлоқ хўжалиги корхоналарини таркибий қайта тузиш» лойиҳаси амалга оширилиши учун жавобгар ташкилот этиб белгилансин.

3. Қишлоқ ва сув хўжалиги вазирлиги ҳузурида қишлоқ хўжалиги корхоналарини таркибий қайта тузиш лойиҳасини амалга ошириш бўйича иловага мувофиқ ходимлар сони ва тузилмасига эга бўлган агентлик (кейинги ўринларда Агентлик деб аталади) ташкил этилсин. Белгилансинки, Агентликнинг штат жадвали кейинчалик Вазирлар Маҳкамаси билан келишган ҳолда ХТТБ билан биргаликда амалга ошириладиган янги лойиҳаларни амалга ошириш учун қайта кўриб чиқилиши мумкин.

4. Қуйидагилар Агентликнинг асосий вазифалари этиб белгилансин:

ХТТБнинг аванс ва қарз бериш шартларига мувофиқ «Ўзбекистон Республикаси қишлоқ хўжалиги корхоналарини таркибий қайта тузиш» лойиҳасини амалга ошириш бўйича тадбирларни ишлаб чиқиш ва амалга ошириш;

кўрсатиб ўтилган лойиҳа доирасида Ўзбекистон Республикасининг манфаатдор вазирликлари ва идораларининг, шунингдек лойиҳани маблағ билан таъминлашда иштирок этувчи халқаро ташкилотларнинг фаолиятини мувофиқлаштириш;

қишлоқ хўжалиги секторида лойиҳаларни амалга оширишда иштирок этувчи халқаро ва хорижий молиявий ташкилотларнинг ўзаро ҳамкорлигини таъминлаш.

5. Белгилансинки, Агентликнинг барча харажатлари, шу жумладан ходимлар меҳнатига ҳақ тўлаш, транспорт, асбоб-ускуналар билан жиҳозлаш ва операция харажатлари лойиҳани амалга ошириш учун назарда тутилган маблағлар ҳисобига миллий валютада таъминланади.

6. Ўзбекистон Республикаси Қишлоқ ва сув хўжалиги вазирлиги икки ҳафта муддатда:

Вазирлар Маҳкамаси билан келишган ҳолда лойиҳани амалга ошириш бўйича Агентлик раҳбарини тайинласин;

Ўзбекистон Республикаси Адлия вазирлиги билан келишган ҳолда Агентлик тўғрисидаги низомни ишлаб чиқсин ва тасдиқласин;

Агентликни жойлаштириш учун жой ажратсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И. X. Жўрабеков зиммасига юклансин.