Ўзбекистон Республикаси Президентининг «Ўзбекистон Бадиий Академиясини ташкил этиш ҳақида» 1997 йил 23 январдаги Фармонига мувофиқ тасвирий ва амалий санъат, халқ ҳунармандчилиги соҳасида Камолиддин Беҳзод номидаги Давлат мукофоти таъсис этилганлиги муносабати билан Вазирлар Маҳкамаси қарор қилади:

1. Вазирлар Маҳкамасининг 1996 йил 13 февралдаги 58-сон қарорининг 2-банди қуйидаги икки хатбоши билан тўлдирилсин:

«Тасвирий ва амалий санъат, халқ ҳунармандчилиги соҳасидаги Камолиддин Беҳзод номидаги Давлат мукофотларини 1997 йилдан бошлаб Ўзбекистон Республикаси Президентининг Фармони билан ҳар уч йилда бир марта Мустақиллик байрами арафасида бериш тартиби жорий қилинсин.

Камолиддин Беҳзод номидаги учта Давлат мукофотининг бири 80 та энг кам ойлик иш ҳақи миқдорида белгилансин.

2. Мазкур қарорга қуйидаги ўзгартиришлар киритилсин:

2-бандига «Наврўз байрами арафасида» сўзлари «Мустақиллик байрами арафасида» сўзлари билан алмаштирилсин;

4-банднинг тўртинчи хатбоши ўз кучини йўқотган деб ҳисоблансин;

2-банддаги ва 4-банднинг иккинчи хатбошидаги, шунингдек, илованинг сарлавҳаси ва 1-бандидаги «адабиёт, санъат ва меъморчилик» сўзлари «адабиёт ва санъат» сўзлари билан алмаштирилсин;

2-илованинг 2-бандидаги «монументал тасвирий санъат, …меъморчилик, меъморчилик-бадиий таъмирлаш» сўзлари, 6-бандидаги «тасвирий санъат асарлари кўргазмаларини» сўзлари, 3-илованинг 3-бандидаги «Ўзбекистон Республикаси Бош вазирининг ўринбосари» сўзлари чиқариб ташлансин;

3-илованинг 2-банди қуйидаги таҳрирда берилсин:

«2. Қўмита ишига Вазирлар Маҳкамаси томонидан тасдиқланадиган раис жамоатчилик асосида бошчилик қилади.»;

3-илованинг 6-банди «Алишер Навоий номидаги» сўзларидан кейин «Камолиддин Беҳзод номидаги» сўзлари билан тўлдирилсин;

3-илованинг 10-бандидаги «Ўзбекистон Давлат банкида» сўзлари «банк муассасаларида» сўзлари билан алмаштирилсин.

3. Ўзбекистон Республикасининг тасвирий ва амалий санъат, халқ ҳунармандчилиги соҳасида Камолиддин Беҳзод номидаги Давлат мукофоти тўғрисидаги низом 1-иловага ва Вазирлар Маҳкамаси ҳузуридаги Давлат мукофотлари қўмитасининг таркиби 2-иловага* мувофиқ тасдиқлансин.

1. Ўзбекистон Республикасининг Камолиддин Беҳзод номидаги Давлат мукофоти тасвирий ва амалий санъат, халқ ҳунармандчилиги соҳасида яратилган миллий истиқлол ғояларини ёрқин бадиий шаклларда акс эттирилган Ўзбекистоннинг буюк тарихини ва ҳозирги юксалиш жараёнини ҳаққоний образлар орқали гавдалантирган ва кенг жамоатчилик томонидан тан олинган етук санъат асарлари учун берилади.

2. Мукофотга сўнгги тўрт йил мобайнида яратилган, кўргазмага қўйилган ёки бошқа тарзда эълон қилинган монумент тасвирий санъат, меъморчилик-бадиий таъмирлаш ва ҳайкалтарошлик асарлари кўриб чиқиш учун қабул қилинади.

Ҳужжатларни тақдим этиш ва расмийлаштириш тартиби Вазирлар Маҳкамаси ҳузуридаги Давлат мукофотлари қўмитаси томонидан белгиланади

3. Камолиддин Беҳзод номидаги Давлат мукофотига тақдим этиш тўғрисидаги қарорлар вазирликлар, давлат қўмиталари, ижодий уюшмалар, республика ва халқаро жамоат ташкилотлари раҳбар органлари томонидан қабул қилинади.

Меҳнат жамоалари, ижодий ва илмий жамоалар юқорида қайд этилган ташкилотларда кўриб чиқиш учун Камолиддин Беҳзод номидаги мукофотни олишга номзод кўрсатиш бўйича таклиф киритиш, шунингдек, тавсия этилган асарлар ва ишларга доир ўз фикр-мулоҳазаларини қўмитага маълум қилиш ҳуқуқига эгадир.

4. Ўзбекистон Республикасининг бошқа Давлат мукофотига илгари сазовор бўлган асарлар Камолиддин Беҳзод номидаги Давлат мукофотига тавсия этилмайди.

5. Ишларни Камолиддин Беҳзод номидаги Давлат мукофотига тавсия этадиган жамоа фақат ижодий ҳиссаси ҳал қилувчи бўлган асосий муаллифларни рўйхатга киритиши керак. Бир мукофотга талабгорлар сони 3 кишидан ошмаслиги лозим.

6. Камолиддин Беҳзод номидаги Давлат мукофотига тавсия этилган санъат асарлари кўргазмаларни кўришни ташкил қилиш, шунингдек, уларга зарур материалларни ўз вақтида тақдим этиш тегишли вазирликлар, компаниялар, ижодий уюшмалар ва бошқа манфаатдор ташкилотлар зиммасига юкланади.

Кўрсатиб ўтилган талаблар бажарилмаган тақдирда Қўмита ишларни кўриб чиқишни рад этиши мумкин.

7. Камолиддин Беҳзод номидаги Давлат мукофотини беришга доир таклифлар тўғрисидаги қарорни Қўмита ўз таркибининг камида икки қисми иштирокида, яширин овоз бериш орқали кўпчилик овоз билан қабул қилади ҳамда Вазирлар Маҳкамасига тақдим этади.

8. Ўзбекистон Республикасининг Камолиддин Беҳзод номидаги Давлат мукофотига сазовор бўлган ижодкорларга тантанали вазиятда совриндорлик ёрлиқлари ва фахрий нишонлар топширилади.

Мукофотнинг пули муаллифлар жамоаси ўртасида (агар улар бир ижодкордан кўп бўлса) тенг улушларда тақсимланади. Камолиддин Беҳзод номидаги Давлат мукофоти совриндори фахрий нишони кўкракнинг ўнг томонига тақилади.

9. Вафот этган Камолиддин Беҳзод номидаги Давлат мукофоти совриндорининг (ёки вафотидан сўнг мукофотланганнинг) ёрлиғи фахрий нишони ёдгорлик тариқасида унинг оиласига топширилади. Мазкур мукофотнинг пули Ўзбекистон Республикасининг фуқаролик қонунида назарда тутилган тартибда мерос қилиб берилади.

10. Ўзбекистон Республикасининг Камолиддин Беҳзод номидаги Давлат мукофоти такроран берилмайди.