Тожикистон Республикасидаги воқеалар туфайли юз берган вақтинчалик оғир вазият муносабати билан Тожикистон Республикаси Олий Кенгаши Раёсати ва Вазирлар Маҳкамасининг МДҲ мамлакатлари давлат ва ҳукумат бошлиқларига мурожаатига жавобан ушбу республика аҳолисига инсонпарварлик ёрдами кўрсатиш мақсадида Ўзбекистон Республикаси Олий Кенгаши Раёсати ва Вазирлар Маҳкамаси қарор қиладилар:

1. Ўзбекистон Республикаси Президенти ҳузуридаги Давлат Котиби ўртоқ Р. Р. Ражабовнинг ва Вазирлар Маҳкамаси Раисининг биринчи ўринбосари ўртоқ И. Ҳ. Жўрабековнинг Ўзбекистоннинг Тожикистондаги инсонпарварлик ёрдами кўрсатиш бўйича вакиллари иши, унинг ҳажмлари ва муддатлари тўғрисидаги ахбороти, шунингдек, МДҲ мамлакатлари давлат ва ҳукумат бошлиқларининг Бишкек шаҳридаги кенгашида қабул қилинган қарорлар тўғрисидаги ахборот маълумот учун қабул қилинсин.

2. Тожикистон Республикасига озиқ-овқат маҳсулотлари, энг зарур халқ истеъмоли моллари, дори-дармонлар иловага* мувофиқ юборилсин.

3. Ўрта Осиё темир йўллар бошқармаси (ўртоқ Желтоухов), Ўзбекистон Республикаси Автомобиль транспорти вазирлиги (ўртоқ Ахметов), Мудофаа вазирлиги (ўртоқ Аҳмедов), Ички ишлар вазирлиги (ўртоқ Алматов), Давлат божхона қўмитаси (ўртоқ Абдуғаниев) инсонпарварлик ёрдами юкларининг Тожикистон Республикасига тўсиқсиз ташилишини, сақланишини ва ўз вақтида етказиб берилишини таъминласинлар.

4. Инсонпарварлик ёрдами юклари юборилиши билан боғлиқ харажатлар Ўзбекистон Республикаси Президенти ҳузуридаги Вазирлар Маҳкамасининг захира фонди ҳисобидан ажратилсин.

5. Мазкур қарорнинг бажарилишини назорат қилиш Ўзбекистон Республикаси Олий Кенгаши Раисининг ўринбосари ўртоқ Б. И. Бугров ва Ўзбекистон Республикаси Бош вазирининг ўринбосари ўртоқ А. Н. Возненко зиммасига юклатилсин.