|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
ЁШЛАРНИНГ ҲУҚУҚИЙ ТАЪЛИМИНИ ТАКОМИЛЛАШТИРИШ КОМПЛЕКС ДАСТУРИ ТЎҒРИСИДА
LexUZ шарҳиМазкур қарор Ўзбекистан Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ҳуқуқий таълимни такомиллаштириш, ёшларнинг ҳуқуқий маданияти даражасини ошириш ҳамда Ўзбекистон Республикасида ҳуқуқий демократик давлат қуриш учун шарт-шароитлар яратиш мақсадида Вазирлар Маҳкамаси қарор қилади:
1. Ёшлар ўртасида ҳуқуқий таълимни такомиллаштириш Комплекс дастури иловага* мувофиқ тасдиқлансин.
* Илова рус тилидаги матнда берилган.
2. Ўзбекистон Республикаси Халқ таълими вазирлиги, Олий ва ўрта махсус таълим вазирлиги, Адлия вазирлиги, Фанлар академияси илова қилинаётган Комплекс дастурга мувофиқ зарур ўқув-услубий адабиётни тайёрласинлар ва Давлат матбуот қўмитаси билан биргаликда нашр этсинлар.
3. Ўзбекистон Республикаси Адлия вазирлиги Тошкент давлат юридик институтида 1994/95 ўқув йилидан бошлаб:
ҳуқуқшунос педагоглар тайёрлаш учун ҳуқуқий педагогика факультетини;
«Давлат ва ҳуқуқ» мутахассислиги ўқитувчиларини қайта тайёрлаш учун малака ошириш факультетини;
ҳуқуқшунослик асосларини чуқур ўргатишга ихтисослаштирилган ҳуқуқшунослик лицейни ташкил этсин.
4. Комплекс дастурнинг ижрочилари сифатида тасдиқланган Ўзбекистон Республикаси вазирликлари ва идоралари бир ой муддатда дастурни ўз вақтида бажариш чора-тадбирлари мажмуини ишлаб чиқсинлар ва тасдиқласинлар.
5. Ўзбекистон Республикаси Молия вазирлиги Комплекс дастурда назарда тутилган тадбирларни бажариш учун зарур маблағлар ажратсин.
6. Мазкур қарорнинг бажарилишини назорат қилиш Бош вазир ўринбосари М. Қорабоев зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
1994 йил 13 июнь,
296-сон
