Ўзбекистон Республикаси иқтисодиёт ва молия вазирининг
буйруғи
Божхона тўловларини тўлашнинг бош таъминотини қўллаш тартиби тўғрисидаги низомни тасдиқлаш ҳақида
[Ўзбекистон Республикаси Адлия вазирлиги томонидан 2024 йил 21 ноябрда рўйхатдан ўтказилди, рўйхат рақами 3579]
Ўзбекистон Республикаси Божхона кодексининг 3391-моддасига мувофиқ божхона тўловларини тўлашнинг бош таъминотини қўллаш тартибини белгилаш мақсадида буюраман:
1. Божхона тўловларини тўлашнинг бош таъминотини қўллаш тартиби тўғрисидаги низом иловага мувофиқ тасдиқлансин.
2. Мазкур буйруқ Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили, Ўзбекистон Савдо-саноат палатаси ҳамда Ўзбекистон Республикаси Истиқболли лойиҳалар миллий агентлиги билан келишилган.
3. Ушбу буйруқ расмий эълон қилинган кундан эътиборан уч ой ўтгач кучга киради.
Вазир Д. КУЧКАРОВ
Тошкент ш.,
2024 йил 7 ноябрь,
187-сон
Келишилди:
Истиқболли лойиҳалар миллий агентлиги директори Д. ЛИ
2024 йил 21 октябрь
Савдо-саноат палатаси раиси Д. ВАХАБОВ
2024 йил 17 октябрь
Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил Д. КАСИМОВ
2024 йил 17 октябрь
Ўзбекистон Республикаси иқтисодиёт ва молия вазирининг 2024 йил 7 ноябрдаги 187-сон буйруғига
ИЛОВА
Божхона тўловларини тўлашнинг бош таъминотини қўллаш тартиби тўғрисида
НИЗОМ
Мазкур Низом божхона тўловларини тўлашнинг бош таъминотини (бундан буён матнда бош таъминот деб юритилади) қўллаш тартибини белгилайди.
1-боб. Умумий қоидалар
1. Ушбу Низомда қуйидаги асосий тушунчалар қўлланилади:
бош таъминот — тўловчи томонидан муайян вақт ичида бир неча божхона операцияларини бажариш чоғида юзага келадиган божхона тўловларини тўланишини банк кафолатини тақдим этиш, божхона тўловларини тўлаш мажбуриятини суғурталаш ёки товарларни гаровга қўйиш орқали таъминлаш;
божхона операцияси — товарларнинг ва транспорт воситаларининг божхона расмийлаштирувида товарларга ва транспорт воситаларига нисбатан божхона органларининг мансабдор шахси ва (ёки) ваколатли шахс томонидан амалга ошириладиган ҳаракат;
таъминлов ҳужжати — банк кафолати ёки суғурта полиси ёхуд гаров шартномаси;
тўловчи — божхона тўловларини тўлаш мажбурияти бажарилишини таъминлаш шарти билан божхона операцияларини амалга оширувчи шахс;
божхона тўловларини тўлашни таъминловчи шахс (бундан буён матнда таъминловчи деб юритилади) — банк кафолати ёки суғурта полиси тақдим этган тижорат банки ёхуд суғурта ташкилоти, шунингдек гаров нарсасини тақдим этган тўловчи ёки бошқа шахс;
ҳудудий божхона органлари — Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг (бундан буён матнда Божхона қўмитаси деб юритилади) Қорақалпоғистон Республикаси, вилоятлар, Тошкент шаҳар бўйича бошқармалари, «Тошкент-АЭРО» ихтисослаштирилган божхона комплекси.
2. Тўловчи томонидан божхона тўловлари тўланишини таъминлаш мақсадида бош таъминотни қўллаш ихтиёрий ҳисобланади.
Бунда, божхона органи томонидан божхона расмийлаштирувини амалга оширишда тўловчидан бош таъминот қабул қилинганлиги тўғрисидаги Божхона қўмитасининг қарорини тақдим этишни талаб қилишга, шунингдек ушбу қарорнинг мавжуд эмаслигини асос қилиб, божхона расмийлаштирувини амалга оширишни рад этишга йўл қўйилмайди.
3. Тўловчи бош таъминотни Ўзбекистон Республикаси Божхона кодексининг 336, 337 ва 338-моддаларида белгиланган ҳолларда юзага келадиган божхона тўловларини тўлашни таъминлашга доир бир ёки бир неча мажбурият бўйича исталган вақтда тақдим этиши мумкин.
4. Бош таъминот қуйидаги ҳолларда қабул қилинади:
Таъминлов ҳужжатларининг амал қилиш муддатлари тўловчининг аризасида кўрсатилган муддат ичида юзага келадиган божхона тўловларини тўлашни таъминлашга доир мажбуриятларни тўловчи томонидан бажариш муддатларидан кўп бўлганда;
божхона операциялари бўйича божхона тўловлари бош таъминот ҳисобидан ҳудудий божхона органи томонидан ундирилиши мумкин бўлганда. Бунда, бош таъминот суммаси божхона операциялари бўйича божхона тўловлари суммасидан кам бўлмаслиги лозим.
2-боб. Бош таъминотни қабул қилиш учун мурожаат қилиш, мурожаатни кўриб чиқиш ва рад этиш
5. Тўловчи бош таъминотни қабул қилиш учун мазкур Низомнинг 1-иловасига мувофиқ шаклдаги ариза билан Божхона қўмитасига ёзма ёки Божхона қўмитасининг расмий веб-сайти (бундан буён матнда веб-сайт деб юритилади) орқали электрон тарзда мурожаат қилади.
Тўловчи веб-сайт орқали мурожаат қилганда, аризани ўзининг электрон рақамли имзоси билан тасдиқлайди.
6. Аризага қуйидаги ҳужжатлардан бири илова қилинади:
банк кафолати;
суғурта полиси;
баҳоловчи ташкилотнинг бозор қиймати бўйича гаров нарсасини баҳолаш тўғрисидаги ҳисоботи (бундан буён матнда баҳолаш ҳисоботи деб юритилади).
7. Аризага илова қилинган банк кафолати ва суғурта полисида тўловчининг аризасида кўрсатилган божхона операцияларини бажариш чоғида юзага келадиган божхона тўловларини тўланишини таъминлаш назарда тутилган бўлиши керак.
8. Бош таъминот сифатида тақдим этилаётган банк кафолати, суғурта полиси ва гаров нарсаси Ўзбекистон Республикаси Божхона кодексининг 342 — 345-моддаларида белгиланган талабларга мувофиқ бўлиши лозим.
9. Ариза ҳамда унга илова қилинадиган ҳужжатлардаги маълумотлар тўғри ва тўлиқ бўлиши лозим. Бунда, маълумотларнинг тўғрилиги ҳамда тўлиқлиги учун тўловчи жавобгар ҳисобланади.
10. Веб-сайт орқали мурожаат қилинганда, ариза Божхона қўмитасининг Ягона автоматлаштирилган ахборот тизимига (бунда буён матнда ЯААТ деб юритилади) автоматик равишда келиб тушади.
Ёзма шаклда топширилган аризалар келиб тушган кундан кечиктирмай Божхона қўмитасининг масъул ходими томонидан ЯААТга киритилади.
Аризалар ЯААТда келиб тушган куннинг ўзида электрон тарзда рўйхатдан ўтказилади.
11. Ариза рўйхатдан ўтказилганидан сўнг ЯААТ томонидан автоматик тарзда тўловчининг аризасида кўрсатилган телефон рақамига ариза қабул қилинганлиги ва унинг рўйхат рақами кўрсатилган СМС хабарнома юборилади.
Веб-сайтда аризанинг рўйхат рақами орқали унинг ҳолатини онлайн тарзда кўриш мумкин бўлади.
12. Ариза у келиб тушган кундан бошлаб ўн иш куни ичида Божхона қўмитаси томонидан кўриб чиқилади ҳамда бош таъминотни қабул қилиш ёки уни қабул қилишни рад этиш тўғрисида қарор қабул қилинади.
Божхона қўмитаси тўловчи томонидан тақдим этилган ҳужжатларни ушбу Низомнинг 4, 6 — 9-бандлари талабларига мувофиқлигини текширади.
13. Божхона қўмитаси томонидан қуйидаги ҳолларда бош таъминотни қабул қилишни рад этиш тўғрисида қарор қабул қилинади:
бош таъминот мазкур Низомнинг 4-бандида назарда тутилган бош таъминотни қабул қилиш шартларига мувофиқ бўлмаганда;
аризага мазкур Низомнинг 6-бандида кўрсатилган ҳужжатлар илова қилинмаганда;
банк кафолати, суғурта полиси ва гаров нарсаси мазкур Низомнинг 7 ва 8-бандларида белгиланган талабларга мувофиқ бўлмаганда;
тўловчи томонидан тақдим этилган ҳужжатларнинг ҳақиқий эмаслиги ёки уларда нотўғри маълумотлар мавжудлиги аниқланганда;
тўловчининг бош таъминотни қабул қилиш ҳақидаги аризасида божхона тўловларини кечиктириб ёки бўлиб-бўлиб тўлаш имкониятини бериш назарда тутилган бўлса, ариза тақдим этилган пайтда божхона тўловларини тўлаш бўйича қарздорлик мавжудлиги;
гаров шартномаси бўйича бош таъминотни қабул қилишда ўттиз кун ичида гаров шартномаси нотариал тартибда расмийлаштирилмаганда ёки нотариус томонидан гаров шартномасини тасдиқлаш рад этилганда.
Бош таъминотни қабул қилишни ушбу бандда назарда тутилмаган бошқа асосларга кўра рад этилишига йўл қўйилмайди.
14. Божхона қўмитаси томонидан бош таъминотни қабул қилиш рад этилган кундан бошлаб бир иш куни ичида бу ҳақда тўловчига хабарнома юборилади. Хабарномада бош таъминотни қабул қилишнинг рад этиш сабаблари кўрсатилади.
15. Тўловчи бош таъминотни қабул қилишни рад этилишига асос бўлган сабабларни бартараф этган ҳолда, бош таъминотни олиш учун такроран мурожаат қилиши мумкин. Такроран киритилган ариза ушбу Низомга мувофиқ умумий асосларда кўриб чиқилади.
16. Бош таъминотни қабул қилиш бўйича ариза кўриб чиқилганлиги ҳамда бош таъминотни қабул қилиш ҳақида қарор чиқарилганлиги учун йиғим ундирилмайди.
3-боб. Гаров шартномаси бўйича бош таъминотни қабул қилиш
17. Тўловчининг товарларни гаровга қўйиш орқали бош таъминотни қабул қилиш учун берган аризаси бўйича Божхона қўмитаси томонидан етти иш куни ичида гаров нарсасининг Божхона кодекси ва ушбу Низом талабларига мувофиқлиги текширилади.
18. Гаров нарсасини бош таъминот сифатида қабул қилишни рад этиш учун мазкур Низомнинг 13-бандида кўрсатилган асослар мавжуд эмаслиги аниқланган тақдирда, Божхона қўмитаси томонидан бир иш куни ичида тўловчига гаров шартномасини расмийлаштириш учун ҳудудий божхона органига мурожаат қилиши лозимлиги тўғрисида СМС хабарнома юборилади.
19. СМС хабарнома олинган кундан бошлаб ўттиз кун ичида гаров нарсаси жойлашган ҳудудий божхона органи билан тўловчи ўртасида нотариал тартибда гаров шартномаси расмийлаштирилиши лозим.
Гаров шартномасини расмийлаштириш муддати Божхона қўмитаси томонидан бош таъминотни қабул қилиш учун аризани кўриб чиқиш муддатини ҳисоблашда инобатга олинмайди.
20. Тўловчи томонидан гаров шартномасини тузиш бўйича ҳудудий божхона органига мурожаат этилганда, ҳудудий божхона органига бош таъминотни қабул қилиш бўйича Божхона қўмитасига киритилган аризанинг рўйхат рақами ва СМС хабарнома тақдим этилади. Ҳудудий божхона органи томонидан тўловчининг аризаси ЯААТ орқали текширилади.
21. Тўловчи томонидан мурожаат этилган кундан бошлаб беш иш куни ичида ҳудудий божхона органининг гаров шартномасини имзолаш ҳуқуқига эга бўлган ходими билан таъминловчи ўртасида гаров шартномаси нотариал тартибда тасдиқланиши лозим, бундан нотариус томонидан гаров шартномасини тасдиқлашни рад этиш ҳолатлари мустасно.
22. Гаров шартномаси нотариал тартибда тасдиқланган кундан бошлаб бир иш куни ичида ҳудудий божхона органи томонидан ЯААТга гаров шартномаси тўғрисидаги маълумотлар киритилади ва унинг нусхаси бириктирилади.
Нотариус томонидан гаров шартномасини тасдиқлаш рад этилган тақдирда, ҳудудий божхона органи бир иш куни ичида гаров шартномасини тасдиқлаш рад этилганлиги ва унинг сабаблари ҳақидаги маълумотларни ЯААТга киритади.
23. Гаров нарсасини баҳолаш ва нотариал тасдиқланган гаров шартномасини тузиш билан боғлиқ харажатлар тўловчининг ҳисобидан амалга оширилади.
24. Ҳудудий божхона органи томонидан гаров шартномаси тасдиқланганлиги тўғрисидаги маълумотлар ЯААТга киритилган кундан бошлаб икки иш куни ичида Божхона қўмитаси томонидан бош таъминотни қабул қилиш тўғрисида қарор чиқарилади.
Гаров шартномаси нотариал тартибда тасдиқланганидан сўнг бош таъминотни қабул қилишни рад этишга йўл қўйилмайди.
4-боб. Бош таъминотни қабул қилиш тўғрисида қарор чиқариш ва уни қўллаш
25. Мазкур Низомнинг 13-бандида кўрсатилган бош таъминотни қабул қилишни рад этиш учун асослар мавжуд бўлмаганда, Божхона қўмитаси томонидан ушбу Низомнинг 2-иловасига мувофиқ шаклда бош таъминотни қабул қилиш тўғрисида қарор чиқарилади.
Бош таъминотни қабул қилиш тўғрисидаги қарор Божхона қўмитаси раисининг ўринбосари томонидан электрон рақамли имзоси билан тасдиқлаш орқали ЯААТда қабул қилинади ҳамда унга автоматик равишда матрицали штрих код (ҚР-код) ва рўйхат рақам берилади.
26. Бош таъминотни қабул қилиш тўғрисида қарор чиқарилган кундан бошлаб бир иш куни ичида тўловчига бош таъминот қабул қилинганлиги тўғрисида СМС хабарнома юборилади.
27. Тўловчи веб-сайт орқали аризанинг рўйхат рақамини киритган ҳолда бош таъминотни қабул қилиш тўғрисидаги қарорнинг электрон шаклини юклаб олади.
28. Бош таъминотни қабул қилиш тўғрисида қарорда божхона тўловлари тўланиши таъминланган божхона операциялари рўйхати, таъминлов суммаси ва ушбу таъминотнинг амал қилиш муддати кўрсатилади.
29. Божхона операцияларини бажариш учун божхона тўловларини тўланилишини таъминлаш сифатида қўлланилган бош таъминот суммасидан қайта фойдаланилишига йўл қўйилмайди.
30. Божхона қўмитаси томонидан қабул қилинган бош таъминотларнинг ҳисоби мазкур Низомнинг 3-иловасига мувофиқ шаклда ЯААТда юритилади.
31. Тўловчи бош таъминот билан таъминланган божхона операцияларини амалга оширишда тегишли божхона органига бош таъминотни қабул қилиш тўғрисидаги қарорни тақдим этади.
Божхона органи бош таъминотни қабул қилиш тўғрисидаги қарорни ЯААТ орқали текширади.
32. Божхона органи томонидан бош таъминотни қабул қилиш тўғрисидаги қарорни қабул қилиш мажбурий ҳисобланади.
5-боб. Бош таъминотни қабул қилиш тўғрисидаги қарорни ўзгартириш, уни вақтинчалик тўхтатиш ва бекор қилиш
33. Бош таъминотни қабул қилиш тўғрисидаги қарорга ўзгартириш киритиш тўловчининг аризасига кўра ёки Божхона қўмитасининг ташаббуси билан амалга оширилади.
34. Тўловчи бош таъминотни қабул қилиш тўғрисидаги қарорга ўзгартириш киритиш учун мазкур Низомнинг 4-иловасига мувофиқ шаклдаги ариза билан Божхона қўмитасига ёзма ёки веб-сайт орқали электрон тарзда мурожаат қилади. Аризага ўзгартириш киритишни асословчи ҳужжатлар илова қилинади.
35. Бош таъминотни қабул қилиш тўғрисидаги қарорга ўзгартириш киритиш учун тақдим этилган ариза Божхона қўмитаси томонидан мазкур Низомнинг 2 ва 3-бобларида белгиланган тартибда ва муддатларда кўриб чиқилади.
36. Бош таъминотни қабул қилиш тўғрисидаги қарорга тўловчининг аризасига кўра қуйидаги ҳолатлар юзасидан ўзгартириш киритилиши мумкин:
бош таъминотнинг амал қилиш муддатини ўзгартириш;
бош таъминотни қабул қилиш тўғрисидаги қарордаги бош таъминотга таъсир қилмайдиган хатоликлар бўйича ўзгартиришлар.
бош таъминот суммасини ўзгартириш;
Божхона қўмитасининг ташаббуси билан мазкур банднинг учинчи хатбошисида кўрсатилган ҳолатда ўзгартириш киритилади.
37. Бош таъминотнинг амал қилиши қуйидаги ҳолларда вақтинчалик тўхтатилади:
тўловчи томонидан бош таъминотнинг амал қилишини вақтинчалик тўхтатиш тўғрисида ариза тақдим этилганда — унда кўрсатилган муддатга;
бош таъминот билан тўланиши таъминланган божхона тўловлари бўйича қарздорлик юзага келганда — қарздорлик бартараф этилгунга қадар.
Бош таъминотнинг амал қилишини вақтинчалик тўхтатиш муддати бош таъминотни қабул қилиш тўғрисидаги қарорда кўрсатилган бош таъминотнинг амал қилиш муддатидан ошмаслиги лозим.
38. Бош таъминот қуйидаги ҳолларда бекор қилинади:
тўловчи томонидан бош таъминотни бекор қилиш тўғрисида ариза тақдим этилганда;
тўловчи ёки таъминловчининг фаолияти тугатилганда ёхуд тўловга қобилиятсиз деб топилганда;
тўловчининг божхона тўловларини тўлаш бўйича мажбуриятини гаров нарсаси ҳисобидан ундириш имконияти йўқолганда;
тўловчи вафот этганда ёки муомалага лаёқатсиз деб топилганда.
тўловчи бўлган юридик шахс қайта ташкил этилганда, бундан унинг мажбуриятлари сақланиб ҳолда ўзгартирилиши мустасно;
39. Бош таъминотни қабул қилиш тўғрисидаги қарорни ўзгартириш, уни вақтинчалик тўхтатиш ёки бекор қилиш бўйича Божхона қўмитаси раисининг ўринбосари томонидан қарор чиқарилади.
40. Бош таъминотни қабул қилиш тўғрисидаги қарорга ўзгартириш киритилганлиги учун йиғим ундирилмайди.
41. Бош таъминотни қабул қилиш тўғрисидаги қарорга ўзгартириш киритилган кундан бошлаб бир иш куни ичида унинг веб-сайт ва ЯААТдаги шакли Божхона қўмитаси томонидан унинг ўзгартирилган шакли билан алмаштириб қўйилади.
42. Бош таъминотни қабул қилиш тўғрисидаги қарорга киритилган ўзгартиришлар улар киритилган кундан бошлаб амал қилади.
43. Бош таъминотни қабул қилиш тўғрисидаги қарорга ўзгартириш киритиш, уни вақтинчалик тўхтатиш ёки бекор қилиш ҳақидаги қарор қабул қилинган кундан кейинги иш кунидан кечиктирмай тўловчига ёзма ёки электрон шаклда етказилади.
6-боб. Якуний қоидалар
44. Тўловчи ўзининг аризасида ва таъминловчи таъминлов ҳужжатларида кўрсатилган муддат ичида юзага келадиган божхона тўловларини тўлашни таъминлашга доир мажбуриятларни ўз зиммасига олади.
45. Мазкур Низомда белгиланган талаблар бузилишида айбдор бўлган шахслар қонунчиликда белгиланган тартибда жавобгар бўладилар.
46. Тўловчи ёки таъминловчи божхона органларининг қарорларидан норози бўлган тақдирда, бевосита Божхона қўмитасининг апелляция кенгашига ёхуд судга мурожаат қилишлари мумкин.
Божхона тўловларини тўлашнинг бош таъминотини қўллаш тартиби тўғрисида низомга
1-ИЛОВА

Бош таъминотни қабул қилиш учун

АРИЗА

1. Ариза берувчининг номи/Ф.И.О.:

2. Ариза берувчининг яшаш ва почта манзили:

3. Ариза берувчининг СТИР/ЖШШИР рақами:

4. Ариза берувчининг телефон ва телефакс рақами:

5. Ариза берувчининг банк реквизитлари:

(асосий ҳисоб рақами, банкнинг МФО ва СТИР рақамлари)

6. Таъминловчининг банк реквизитлари:

(асосий ҳисоб рақами, банкнинг МФО ва СТИР рақамлари)

7. Божхона операциялари номи:

…

8. Бош таъминот миқдори (сўмда):

9. Бош таъминот амал қилиш муддати:

10. Таъминлов ҳужжати тури:

11. Таъминлов ҳужжати рақами ва санаси:

12. Таъминлов ҳужжати амал қилиш муддати:

13. Таъминлов ҳужжати миқдори (сўмда):

14. Қўшимча маълумотлар:

_________________

_________

_________

(ариза берувчининг номи)

(имзо)

(сана)

Божхона тўловларини тўлашнинг бош таъминотини қўллаш тартиби тўғрисида низомга
2-ИЛОВА

ЎЗБЕКИСТОН РЕСПУБЛИКАСИ ИҚТИСОДИЁТ ВА МОЛИЯ ВАЗИРЛИГИ ҲУЗУРИДАГИ БОЖХОНА ҚЎМИТАСИ

Бош таъминотни қабул қилиш тўғрисида

ҚАРОР

___/____/___

________

(кун/ой/йил)

(рақами)

QR-kod

(матрик штрихли код)

1. Бош таъминотни рўйхатга олиш рақами ва санаси:

2. Тўловчи номи ва СТИР/ЖШШИР рақами:

3. Бош таъминот миқдори (сўмда):

4. Бош таъминот амал қилиш муддати:

5. Таъминлов ҳужжати тури:

6. Таъминлов ҳужжати рақами ва санаси:

7. Таъминлов ҳужжати амал қилиш муддати:

8. Божхона операциялари турлари:

9. Қўшимча маълумотлар:

10. Божхона органининг мансабдор шахси:

________________

(Электрон рақамли имзо)

___________________

(лавозим)

(Ф.И.О.)

Божхона тўловларини тўлашнинг бош таъминотини қўллаш тартиби тўғрисида низомга
3-ИЛОВА
Қабул қилинган бош таъминотларнинг
ҲИСОБИ

Бош таъминот рўйхатга олинган рақами

Бош таъминот суммаси

Бош таъминот муддати

Таъминлов ҳужжатининг тури

Таъминлов ҳужжати рақами ва санаси

Таъминлов ҳужжатининг амал қилиш муддати

Божхона операцияси тури

Тўланиши таъминланган божхона тўловларининг назоратдаги суммаси

Тўланиши таъминланган божхона тўловларини тўлаш мажбуриятини бажариш муддати

1

2

3

4

5

6

7

8

9


 


 

Божхона операциясини амалга оширилганлигини тасдиқловчи ҳужжат

Божхона тўловларини тўлаш мажбуриятини амалда фойдаланилган суммаси

Божхона тўловларини тўлаш мажбуриятини амалда бажариш муддати

Бош таъминот бўйича бўшаган маблағлар

Бош таъминот бўйича қолдик сумма

Бош таъминот вақтинча тўхталган муддати

Бош таъминотнинг рўйхатдан чиқарилган санаси

Изоҳ

10

11

12

13

14

15

16

17


 

Божхона тўловларини тўлашнинг бош таъминотини қўллаш тартиби тўғрисида низомга
4-ИЛОВА

Бош таъминотни қабул қилиш тўғрисидаги қарорга ўзгартириш киритиш учун

АРИЗА

1. Ариза берувчининг номи/Ф.И.О.:

2. Ариза берувчининг яшаш ва почта манзили:

3. Ариза берувчининг СТИР/ЖШШИР рақами:

4. Ариза берувчининг телефон ва телефакс рақами:

5. Ариза берувчининг банк реквизитлари:

(асосий ҳисоб рақами, банкнинг МФО ва СТИР рақамлари)

6. Таъминловчининг банк реквизитлари:

(асосий ҳисоб рақами, банкнинг МФО ва СТИР рақамлари)

7. Ўзгартириш киритиладиган қарорнинг санаси ва рақами:

Ўзгартириш киритиш кўрсаткичлари:

8. Бош таъминот миқдори (сўмда):

9. Бош таъминот амал қилиш муддати:

Ўзгартириш киритиш учун ҳужжатларнинг реквизитлари:

10. Таъминлов ҳужжати тури:

11. Таъминлов ҳужжати рақами ва санаси:

12. Таъминлов ҳужжати амал қилиш муддати:

13. Таъминлов ҳужжати миқдори (сўмда):

14. Қўшимча маълумотлар:

_________________

_________

_________

(ариза берувчининг номи)

(имзо)

(сана)


(Қонунчилик маълумотлари миллий базаси, 22.11.2024 й., 10/24/3579/0953-сон)