Республикамизда ерлардан оқилона ва самарали фойдаланишни ташкил этиш, соҳада таъсирчан назоратни таъминлаш ҳамда ер ресурслари, геодезия, картография ва давлат кадастри соҳасидаги муносабатларни тартибга солиш борасида бир қатор ишлар амалга оширилган.

Шу билан бирга, бугунги кунда соҳада ўз ечимини кутаётган масалалар ҳам мавжуд.

Хусусан, Ўзбекистонда 44,8 млн гектар ер майдони, 8,3 млн. бино ва иншоотларнинг мулк сифатидаги бозор баҳоси ҳисобланмаган.

Мавжуд бино ва иншоотларнинг шартли кадастр қиймати 70 млрд долларини ташкил этса-да, аслида уларнинг ҳақиқий бозор баҳоси бундан анча кўпдир.

Қайд этиш жоизки, мамлакатимизда ерга бўлган ҳуқуқни тасдиқловчи ҳужжатлари тўлиқ бўлмаган, ҳужжатдаги ва амалдаги майдони бир-биридан фарқ қиладиган, илгари доимий фойдаланиш учун ажратилган қишлоқ хўжалигига мўлжалланган ерлардан қонунчиликда белгиланган тартибда фойдаланилмаётган 286,2 минг гектар ер майдони мавжуд бўлиб, мазкур ҳолатлар жойларда масалани ўрганишни ҳамда ер муносабатларини тартибга солишни талаб этмоқда.

Юқоридагилардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши қарор қиладилар:

1. Ҳудудларда ерга бўлган ҳуқуқни тасдиқловчи ҳужжатлари тўлиқ бўлмаган, ҳужжатдаги ва амалдаги майдони бир-биридан фарқ қиладиган, доимий фойдаланиш учун ажратилган қишлоқ хўжалигига мўлжалланган ерлардан фойдаланиш ҳолатини ўрганиш мақсадида халқ депутатлари туман (шаҳар) Кенгашларига:

жорий йилнинг 22 декабрига қадар ҳар бир туман (шаҳар) кесимида 1-иловадаги* намунага мувофиқ маҳаллий Кенгашлар депутатларидан иборат таркибда ҳудудий ишчи гуруҳларни тузиш;

қишлоқ хўжалигига мўлжалланган ердан фойдаланиш самарадорлигини ишчи гуруҳлар томонидан икки ойлик режа асосида ўрганиш;

ўрганишлар якунларидан келиб чиқиб, ҳар бир ер участкаси бўйича туман (шаҳар) ҳокими ва ердан фойдаланувчи ўртасида ижара шартномасини тузиш (ижара шартномасига ўзгартириш ва қўшимчалар киритиш) ёки ер участкасини захирага қайтариш чораларини кўриш масаласини халқ депутатлари туман (шаҳар) Кенгашлари сессияларида кўриб чиқиш тавсия этилсин.

2. Ишчи гуруҳ ерга бўлган ҳуқуқни тасдиқловчи ҳужжатлари тўлиқ бўлмаган, ҳужжатдаги ва амалдаги майдони бир-биридан фарқ қиладиган, доимий фойдаланиш учун ажратилган қишлоқ хўжалигига мўлжалланган ерлардан фойдаланиш ҳолатини ўрганиш ишларини 2-иловага* мувофиқ схема асосида ташкил этсин.

3. Ҳудудларда тузилган ишчи гуруҳларга амалий ёрдам кўрсатиш мақсадида Ўзбекистон Республикаси Олий Мажлиси Қонунчилик палатаси депутатлари ҳамда Ўзбекистон Республикаси Олий Мажлиси Сенати аъзолари 3-иловага* мувофиқ ҳудудларга масъул этиб бириктирилсин.

Ҳудудларга бириктирилган Қонунчилик палатаси депутатлари ва Сенат аъзоларининг аҳоли ва тадбиркорлик субъектлари ўртасида тушунтириш ишларини ташкил этиши ҳамда халқ депутатлари туман (шаҳар) Кенгашлари сессияларида иштирок этиши белгилансин.

4. Ўзбекистон Республикаси Олий Мажлиси Сенатининг Ҳудудий вакиллик органлари фаолиятини ўрганиш маркази:

ерга бўлган ҳуқуқни тасдиқловчи ҳужжатлари тўлиқ бўлмаган, ҳужжатдаги ва амалдаги майдони бир-биридан фарқ қиладиган ва илгари доимий фойдаланиш учун ажратилган қишлоқ хўжалигига мўлжалланган ерлардан қонунчиликда белгиланган тартибда фойдаланиш ҳолатларини ўрганишда маҳаллий Кенгашларга кўмаклашсин;

амалга оширилган ишлар юзасидан доимий мониторинг олиб борсин;

2024 йил 5 мартга қадар ўрганиш натижалари юзасидан маълумотларни умумлаштирсин ҳамда Сенатнинг Маҳаллий ҳокимият вакиллик органлари фаолиятини кучайтиришга кўмаклашувчи комиссияси билан биргаликда Ўзбекистон Республикаси Олий Мажлиси Сенатига киритсин.

5. Ўзбекистон Республикаси Қишлоқ хўжалиги вазирлиги ҳамда Иқтисодиёт ва молия вазирлиги ҳузуридаги Кадастр агентлиги ҳудудларда ишчи гуруҳлар ишини сифатли ташкил этиш ҳамда уларни тегишли маълумотлар билан таъминлашда амалий ёрдам берсин.

6. Ўзбекистон Республикаси Олий Мажлиси палаталарининг Аграр ва сув хўжалиги масалалари қўмиталари ҳудудларда ерга бўлган ҳуқуқни тасдиқловчи ҳужжатлари тўлиқ бўлмаган, ҳужжатда ва амалдаги майдони бир-биридан фарқ қиладиган, доимий фойдаланиш учун ажратилган қишлоқ хўжалигига мўлжалланган ерлардан фойдаланиш ҳолатини ўрганиш натижалари бўйича 2024 йилнинг 10 мартига қадар ахборот тайёрласин ҳамда Олий Мажлис палаталари Кенгашларига киритсин.

7. Мазкур Қўшма қарорнинг ижросини назорат қилиш Ўзбекистон Республикаси Олий Мажлиси Сенати Раисининг биринчи ўринбосари С. Сафоев ҳамда Ўзбекистон Республикаси Олий Мажлиси Қонунчилик палатаси Спикерининг ўринбосари А. Хаитов зиммасига юклатилсин.

8. Ушбу Қўшма қарор қабул қилинган кундан эътиборан кучга киради.