Ўзбекистон Республикаси Вазирлар Маҳкамасининг

қарори

Оммавий ахборот воситаларини қўллаб-қувватлаш ва журналистика соҳасини ривожлантиришга оид айрим норматив-ҳуқуқий ҳужжатларни тасдиқлаш тўғрисида

Ўзбекистон Республикаси Президентининг «Оммавий ахборот воситаларини қўллаб-қувватлаш ва журналистика соҳасини ривожлантириш чора-тадбирлари тўғрисида» 2022 йил 27 июндаги ПҚ-294-сон қарори ижросини таъминлаш мақсадида Вазирлар Маҳкамаси қарор қилади:

1. Қуйидагилар:

Болалар учун мўлжалланган энг яхши теле- ва радиолойиҳа танловини ташкил этиш ва ўтказиш тартиби тўғрисидаги низом 1-иловага мувофиқ;

«Оммавий ахборот воситаларида эълон қилинган энг яхши материал» танловини ташкил этиш ва ўтказиш тартиби тўғрисидаги низом 2-иловага мувофиқ;

Оммавий ахборот воситалари ходимларининг хорижий тилларни ўрганиш ҳамда хорижий тиллар бўйича тегишли миллий ёки халқаро сертификатга эга бўлиш учун имтиҳон топшириш харажатларини қоплаш тартиби тўғрисидаги низом 3-иловага мувофиқ;

Жисмоний шахслар томонидан даврий босма нашрлар, китоб ва бошқа матбаа маҳсулотларига электрон тарзда обуна бўлиш ҳамда даврий босма нашрлар учун обуна харажатларининг бир қисмини қайтариб бериш тартиби тўғрисидаги низом 4-иловага мувофиқ;

Давлат органлари ва ташкилотлари муассислигида бўлмаган даврий босма нашрларнинг замонавий электрон шаклларини яратиш, уларни модернизация қилиш ва бир йил давомида юритиш харажатларини қоплаш тартиби тўғрисидаги вақтинчалик низом 5-иловага мувофиқ тасдиқлансин.

2. Белгилансинки:

а) Ўзбекистон Республикаси Иқтисодиёт ва молия вазирлиги томонидан 2026 йил 1 январга қадар ҳар йили Давлат бюджети параметрларида «Обуна» ягона электрон платформаси (кейинги ўринларда — Платформа) орқали амалга оширилган даврий босма нашрларга обуна харажатларининг бир қисмини қайтаришни молиялаштириш учун Рақамли технологиялар вазирлигига маблағ ажратилиши назарда тутилади;

б) Платформа орқали амалга оширилган даврий босма нашрларга обуна харажатларининг бир қисми обуначилар мазкур қарорда белгиланган тартибда расмийлаштирилгандан сўнг Давлат бюджети маблағлари ҳисобидан уларнинг банк карталарига бир ой муддат ичида қайтарилади;

в) «Давлат ахборот тизимларини яратиш ва қўллаб-қувватлаш бўйича ягона интегратор «UZINFOCOM» МЧЖ томонидан:

Платформанинг узлуксиз фаолият олиб бориши, модернизация қилиниши, қонунчилик ҳужжатларида белгиланган тартибда ахборот хавфсизлиги, шунингдек, Платформа орқали даврий босма нашрларга масофадан туриб электрон тарзда обуна бўлиш ва обуна харажатларининг бир қисмини қайтариш мақсадида Ўзбекистон Республикаси Иқтисодиёт ва молия вазирлиги ҳузуридаги Солиқ қўмитаси ҳамда бошқа тегишли вазирликлар ва идораларнинг ахборот тизимлари, шунингдек, тўлов тизими операторларининг ахборот тизимлари билан интеграция қилиниши;

Давлат бюджетидан ажратилган маблағлар ҳисобига Платформа орқали даврий босма нашрларга обуна харажатларининг бир қисми қайтарилиши таъминланади;

г) Ўзбекистон Республикаси Рақамли технологиялар вазирлиги ҳузуридаги Ахборотлаштириш ва телекоммуникациялар соҳасида назорат инспекцияси томонидан Платформа орқали обуна бўлишда даврий босма нашрлар, китоб ва бошқа матбаа маҳсулотларини тарқатиш соҳасида қонунчилик ҳужжатларига, техник жиҳатдан тартибга солиш соҳасидаги норматив ҳужжатлар талабларига риоя қилиниши устидан назорат ўрнатилади;

д) «Оммавий ахборот воситаларида эълон қилинган энг яхши материал» танлови (кейинги ўринларда — танлов) бўйича:

танлов ҳар чорак якуни бўйича оммавий ахборот воситаларида эълон қилинаётган журналистика соҳасининг энг илғор ютуқларидан фойдаланган ҳолда, юқори профессионал даражада тайёрланган ва энг яхши деб топилган материалларни аниқлаш ҳамда уларнинг муаллифларини тақдирлаш мақсадида ташкил этилади;

танлов газеталар ва журнал (ахборотнома-бюллетень)ларда чоп этилган материаллар, телеканалларда эфирга узатилган материаллар, радиоканалларда эфирга узатилган материаллар, веб-сайтларда эълон қилинган материаллар йўналишларида ўтказилади;

танловни ташкил этиш, ўтказиш, ғолиб ва совриндорларни мукофотлаш билан боғлиқ харажатлар Ўзбекистон Республикасининг ахборот соҳаси ва оммавий коммуникацияларни ривожлантиришни қўллаб-қувватлаш жамғармаси маблағлари ҳамда қонунчилик ҳужжатлари билан тақиқланмаган бошқа манбалар ҳисобидан Ўзбекистон Журналистлар уюшмаси орқали қопланади.

3. Ахборот ва оммавий коммуникациялар агентлигига:

Ўзбекистон Журналистлар уюшмаси билан биргаликда 2023 йил июль ойидан бошлаб энг яхши материалларни кенг жамоатчилик ва малакали мустақил экспертлар муҳокамасига ҳавола қилишни махсус электрон платформа орқали амалга оширилишини таъминлаш;

мамлакатнинг ички ва ташқи сиёсатини, амалга оширилаётган кенг кўламли ислоҳотларни, жамиятда кечаётган ижтимоий-сиёсий ва социал-иқтисодий ўзгаришлар, жамоатчиликнинг катта қизиқишини уйғотаётган воқеаларнинг моҳиятини кенг тушунтириш мақсадида ҳар чоракда 100 тагача материалларни тайёрлаш ва эълон қилиш бўйича оммавий ахборот воситаларига ижтимоий буюртмалар бериб бориш;

Олий таълим, фан ва инновациялар вазирлиги билан биргаликда халқаро имтиҳон тизимларини ташкил этиш ваколатига эга бўлган хорижий ташкилотлар ва уларнинг Ўзбекистон Республикасида давлат рўйхатидан ўтган ваколатли вакиллари реестрини шакллантириш;

халқаро имтиҳон тизимларини ташкил этиш ваколатига эга бўлган хорижий ташкилотларнинг Ўзбекистон Республикасида тегишли имтиҳон топшириш харажатлари тўғрисидаги маълумотларни ўзининг расмий веб-сайтида эълон қилиш ва доимий равишда янгилаб борилишини таъминлаш тавсия этилсин.

4. Мазкур қарорнинг бажарилишини назорат қилиш Ўзбекистон Республикаси рақамли технологиялар вазири Ш.Х. Шерматов ҳамда Ахборот ва оммавий коммуникациялар агентлиги директори А.А. Ходжаев зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2023 йил 26 июнь,

262-сон

Вазирлар Маҳкамасининг 2023 йил 26 июндаги 262-сон қарорига
1-ИЛОВА

Болалар учун мўлжалланган энг яхши теле- ва радиолойиҳа танловини ташкил этиш ва ўтказиш тартиби тўғрисида

НИЗОМ

1-боб. Умумий қоидалар

1. Ушбу Низом болалар учун мўлжалланган теле- ва радиомаҳсулотларни тайёрлаш ҳамда эфирга узатиш бўйича ҳар йили энг яхши 30 та лойиҳа учун ҳар бири базавий ҳисоблаш миқдорининг 300 бараваригача бўлган миқдорда молиялаштириладиган энг яхши теле- ва радиолойиҳа танловини (кейинги ўринларда — танлов) ташкил этиш ва ўтказиш тартибини белгилайди.

2. Танловда болалар учун мўлжалланган теле- ва радиомаҳсулотларни тайёрлаш ҳамда эфирга узатиш имкониятига эга бўлган барча оммавий ахборот воситалари иштирок этишлари мумкин.

3. Танлов ҳар йили июль-август ойларида, унинг ғолибларини тақдирлаш сентябрь ойида ўтказилади.

4. Мазкур Низомда қуйидаги асосий тушунчалар қўлланилади:

баҳолаш мезонлари — танлов натижаларини аниқлаш учун қўлланадиган кўрсаткичлар;

лойиҳа — танловда иштирок этиш учун тайёрланган ва тақдим этилган болаларга мўлжалланган теле- ва радиомаҳсулотлар;

талабгор — Ўзбекистон Республикасида белгиланган тартибда давлат рўйхатидан ўтган ҳамда теле- ва радиомаҳсулотлар тайёрлаш ва эфирга узатиш имкониятига эга бўлган оммавий ахборот воситалари (теле- ва радиоканаллар);

танлов ғолиби — тақдим этган лойиҳаси молиялаштириш учун тавсия этилган танлов иштирокчиси;

ташкилотчи — Ахборот ва оммавий коммуникациялар агентлиги;

ташкилий қўмита — танловни ўтказиш билан боғлиқ бошқа ташкилий масалаларни ҳал қилиш, шунингдек танлов учун тақдим этилган лойиҳаларни баҳолаш мезонларини ва ҳакамлар ҳайъати таркибини тасдиқлаш вазифаларини амалга оширувчи коллегиал тузилма;

ҳакамлар ҳайъати — танлов иштирокчиларининг лойиҳаларини баҳоловчи етти нафар аъзодан иборат экспертлар гуруҳи.

5. Танлов икки йўналишда — «болаларга мўлжалланган энг яхши телелойиҳа» ва «болаларга мўлжалланган энг яхши радиолойиҳа» номинациялари бўйича ўтказилади ҳамда жами 30 та энг яхши лойиҳа молиялаштирилади.

2-боб. Танловни ташкил этиш ва ўтказиш тартиби

6. Танлов ушбу Низомга 1-иловага мувофиқ схема асосида қуйидаги босқичларда ташкил этилади:

1-босқич — ташкилотчи ҳар йили июль ойининг 10-санасига қадар танлов ҳақидаги эълонни ўз расмий веб-сайти ва Интернет жаҳон ахборот тармоғидаги саҳифаларида жойлаштиради.

Танлов ҳақидаги эълонда аризаларни шакллантириш, рўйхатдан ўтказиш ҳамда теле- ва радиомаҳсулотларни ташкилий қўмитага тақдим этиш тартиби, муддати ва талаблари кўрсатилади;

2-босқич — талабгор ўзи тайёрлайдиган ва эфирга узатадиган болаларга мўлжалланган теле- ва радиомаҳсулотлар бўйича лойиҳаларини ҳар йили июль ойининг 25-санасига қадар ташкилотчига (шу жумладан, электрон тарзда) тақдим этади;

3-босқич — ташкилий қўмита танловга тақдим этилган лойиҳаларни ҳар йили август ойининг 10-санасига қадар ушбу Низом талаблари асосида дастлабки тарзда саралайди ва сараланган лойиҳаларни молиялаштириш масаласини кўриб чиқиш учун ҳакамлар ҳайъатига тақдим этади;

4-босқич — ҳакамлар ҳайъати ҳар йили август ойининг 25-санасига қадар лойиҳаларни кўриб чиқади ва улар ҳайъат аъзоларининг очиқ овоз бериши орқали молиялаштириш учун тавсия этилади ёки молиялаштиришга тавсия қилиш рад этилади;

5-босқич — ташкилий қўмита ва ташкилотчи ҳар йили сентябрь ойида ҳакамлар ҳайъати томонидан тавсия этилган лойиҳаларни молиялаштириш чораларини кўради.

Лойиҳалари ғолиб деб топилган талабгорларнинг номлари ташкилотчининг расмий веб-сайти ва Интернет жаҳон ахборот тармоғидаги саҳифаларида эълон қилинади.

7. Танловни ўтказиш билан боғлиқ ҳужжатлар ташкилий қўмита томонидан рўйхатга олинади ва ушбу рўйхат ташкилотчи архивида беш йилгача сақланади.

8. Танловни ўтказиш бўйича умумий раҳбарлик ташкилотчи томонидан амалга оширилади.

3-боб. Ташкилотчи, ташкилий қўмита ва ҳакамлар ҳайъатининг асосий вазифалари

9. Ташкилотчи:

танловни ташкил этади ва ўтказади;

танлов шартлари асосида тавсия этилган лойиҳаларни молиялаштиради;

танловнинг харажатлар сметасини ишлаб чиқади;

ташкилий қўмита фаолиятига кўмаклашади;

танлов эълони, жараёнлари ва якунлари ҳақидаги ахборотни ўз расмий веб-сайти ва Интернет жаҳон ахборот тармоғидаги саҳифаларида эълон қилиб боради;

лойиҳаси молиялаштиришга тавсия этилган талабгорлар билан маблағ ажратиш юзасидан тўғридан-тўғри шартнома тузади;

ҳакамлар ҳайъати аъзоларининг меҳнатига ҳақ тўлайди.

10. Ташкилий қўмита:

ҳакамлар ҳайъати таркибини шакллантиради ва тасдиқлайди;

тавсия этилган ҳар бир лойиҳани молиялаштириш юзасидан белгиланган харажатлар миқдорининг асослилигини ўрганади, шунингдек, харажатларни асоссиз деб топган тақдирда, умумий суммани тегишлича камайтириш бўйича ташкилотчига таклиф киритади;

танлов бўйича келиб тушган аризаларни кўриб чиқади;

нохолис ёндашув, манфаатлар тўқнашуви ва коррупция ҳолатларига йўл қўймаслик чораларини кўради;

молиялаштириладиган лойиҳаларни аниқлашда ҳакамлар ҳайъати томонидан шаффофлик мезонларига риоя қилинишини назорат қилади;

танловга келиб тушган лойиҳаларни баҳолаш мезонларини қайта кўриб чиқади ва тасдиқлайди;

танлов иштирокчиларининг ҳакамлар ҳайъати қарорлари устидан қилган шикоятларини кўриб чиқади.

11. Ҳакамлар ҳайъати:

танловга келиб тушган лойиҳаларни адолатлилик, шаффофлик ва мазкур Низомда белгиланган баҳолаш мезонларига риоя қилган ҳолда кўриб чиқади ва баҳолайди;

танлов доирасида молиялаштириладиган лойиҳаларни саралаб олади ва уларни молиялаштиришга тавсия этади;

танловга тақдим этилган ҳужжатлардаги маълумотларнинг тўлиқлиги ва тўғрилигини ўрганади;

танлов иштирокчиларидан ушбу Низом талаблари асосида тегишли ҳужжатларни талаб қилиб олади;

нохолис ёндашув, манфаатлар тўқнашуви ва коррупция ҳолатларига йўл қўйилмаслик, натижалар эълон қилингунга қадар сир сақланишини таъминлайди.

Ҳакамлар ҳайъати аъзоларининг танловга тақдим этилган лойиҳаларни ўрганиш ва баҳолаш жараёнига аралашишга йўл қўйилмайди.

12. Ташкилий қўмита ушбу Низомга 2-иловага мувофиқ таркибда тузилади.

13. Ташкилий қўмита мажлислари заруратга қараб, лекин йилига камида бир марта ўтказилади.

14. Ҳакамлар ҳайъати таркибига ташкилотчи, Ўзбекистон Журналистлар уюшмаси, Ўзбекистон Миллий телерадиокомпанияси, Ўзбекистон Миллий ахборот агентлиги, Ўзбекистон Миллий медиа ассоциацияси ҳамда нодавлат нотижорат ташкилотлари ва оммавий ахборот воситалари вакиллари киритилади.

4-боб. Танловга лойиҳаларни тақдим этиш тартиби

15. Талабгорлар танлов эълон қилинган кундан эътиборан ташкилий қўмита номига (шу жумладан, электрон тарзда) ушбу Низомга 3-иловага мувофиқ шакл бўйича ариза берадилар.

16. Аризаларга лойиҳа бўйича маълумотлар (тақдим этилаётган лойиҳанинг ижтимоий аҳамияти, эфир вақтлари, томошабинлар қамрови, шунингдек, ушбу Низомда белгиланган мезонларга мувофиқлиги ҳақида тақриз) .

17. Танлов учун тақдим этилаётган лойиҳа доирасида тайёрланадиган теле- ва радиомаҳсулотлар — телекўрсатув, видеолавҳа, мультипликацион фильм, аудиоматериал ва бошқа кўринишда бўлиши мумкин.

18. Бир календарь йили давомида битта талабгорнинг кўпи билан бешта лойиҳаси молиялаштирилиши мумкин.

19. Танлов доирасида молиялаштирилган лойиҳа кўпи билан уч ой ичида амалга оширила бошланиши шарт.

20. Танлов учун тақдим этилаётган лойиҳаларда бошқа шахсларнинг турдош ҳуқуқлари объектларидан фойдаланиш тақиқланади.

5-боб. Лойиҳаларни баҳолаш мезонлари

21. Танлов иштирокчилари тақдим этган лойиҳалар қуйидаги мезонлар асосида саралаб олинади:

оммавийлик (теле- ва радиомаҳсулот содда услубда, болалар учун тушунарли ва қизиқарли бўлиши);

болалар ҳуқуқларини ҳимоя қилиш соҳасида давлат ва жамоатчилик томонидан амалга оширилаётган чора-тадбирларнинг акс эттирилганлиги;

ёритилаётган мавзу болаларнинг таълим-тарбиясига, улар орасида соғлом турмуш тарзини тарғиб қилишга ва маънавиятини ўстиришга қаратилганлиги;

лойиҳанинг ижтимоий аҳамияти, танланган мавзуларнинг долзарблиги ва оммабоплиги;

болалар билан ишлашда янги ёндашувлар қўлланилганлиги;

ижодий ўзига хослик (мавзуни ёритишда, уни тақдим этишда ижодкорлик ва ғоя бетакрорлигининг мавжудлиги);

болаларда экологик маданиятни шакллантириш бўйича фойдалилиги (мавзуни танлаш, мазмунида аниқ муаммоли вазият акс эттирилганлиги ва муаммонинг туб моҳияти очиб берилганлиги);

болаларга ҳуқуқий тарбия ва одоб-ахлоқнинг бошланғич қоидаларини ўргатиш бўйича фойдалилиги;

кутилаётган натижа (теле- ва радиомаҳсулот оммалашиши, жамоатчиликни қизиқтириши ва болаларга оид давлат сиёсатини самарали амалга оширишга қаратилганлиги).

6-боб. Ташкилотчи ва талабгор ўртасида шартнома тузиш тартиби

22. Ҳакамлар ҳайъати лойиҳани молиялаштиришга тавсия этганидан сўнг ташкилотчи йигирма кун ичида буйруқ асосида ғолиб билан маблағ ажратиш бўйича тўғридан-тўғри шартнома тузади.

Ушбу шартномада ажратилаётган маблағларнинг мақсадли сарфланиши бўйича томонларнинг ҳуқуқ ва мажбуриятлари белгиланади.

23. Шартномада қуйидаги қоидалар назарда тутилган бўлиши керак:

танловнинг мақсади;

молиялаштириладиган лойиҳанинг умумий шартлари ва ушбу шартларни амалга ошириш муддатлари;

лойиҳани молиялаштиришга ажратиладиган маблағ миқдори;

молиялаштириш муддати;

ажратилган маблағдан мақсадли фойдаланиш бўйича назорат шакллари;

ҳисобот бериш муддати ва шакллари;

лойиҳа келишилган тартибда амалга оширилмаган тақдирда, ажратилган маблағни қайтариш шартлари.

24. Агар лойиҳаси молиялаштиришга тавсия этилган талабгор шартномани имзолашдан бош тортса ёки танлов давомида ўз фаолиятини тугатган ёхуд тўловга қобилиятсиз деб эълон қилинган бўлса, ташкилотчи танловда иштирок этган ва лойиҳаси танлов мезонларига мувофиқ юқори баҳоланган кейинги талабгор билан шартнома имзолашга ҳақли.

7-боб. Лойиҳалар ижросини назорат қилиш

25. Танлов доирасида молиялаштирилган лойиҳалар, танловга тақдим этилган ҳужжатларда белгиланган муддат ва шартларда амалга оширилмаган тақдирда, ташкилотчи талабгорга ажратилган маблағни қайтариш чораларини кўради. Агар талабгор маблағларни ўз ихтиёрига кўра қайтармаса, ташкилотчи томонидан суд тартибида ундирилади.

26. Ажратилган маблағлардан тўғри ва мақсадли фойдаланиш, шунингдек, шартномада келишилган шартларни бажариш учун теле- ва радиоканалнинг муассиси ва (ёки) бош муҳаррири жавоб беради.

8-боб. Якунловчи қоидалар

27. Танлов ташкилотчига қўшимча ажратиладиган Давлат бюджети маблағлари ҳисобидан молиялаштирилади.

28. Танлов натижаларидан норози бўлган иштирокчилар танлов натижалари эълон қилинган кундан бошлаб уч кун ичида ташкилий қўмитага шикоят қилишлари мумкин.

Болалар учун мўлжалланган энг яхши теле- ва радиолойиҳа танловини ташкил этиш ва ўтказиш тартиби тўғрисидаги низомга
1-ИЛОВА

Болалар учун мўлжалланган энг яхши теле- ва радиолойиҳа танловини ташкил этиш ва ўтказиш

СХЕМАСИ

Босқич	Субъект	Тадбирлар	Бажариш муддати

1-босқич	Ташкилотчи (Ахборот ва оммавий коммуникациялар агентлиги)	Танлов ҳақидаги эълонни ўз расмий веб-сайти ва Интернет жаҳон ахборот тармоғидаги саҳифаларига жойлаштиради.	Ҳар йили июль ойининг 10-санасига қадар

2-босқич	Талабгор	Ўзи тайёрлайдиган ва эфирга узатадиган болаларга мўлжалланган теле- ва радио-маҳсулотлар бўйича лойиҳаларини ташкилотчига тақдим этади.	Ҳар йили июль ойининг 25-санасига қадар

3-босқич	Ташкилий қўмита	1. Теле- ва радиомаҳсулотлар тайёрлаш бўйича лойиҳаларни белгиланган мезонлар асосида саралайди. 2. Сараланган лойиҳаларни ҳакамлар ҳайъатига молиялаштириш масаласини кўриб чиқиш учун тақдим этади.	Ҳар йили август ойининг 10-санасига қадар

4-босқич	Ҳакамлар ҳайъати	Лойиҳаларни кўриб чиқади ва улар ҳайъат аъзоларининг очиқ овоз бериши орқали молиялаштириш учун тавсия этилади ёки молиялаштиришга тавсия қилиш рад этилади.	Ҳар йили август ойининг 25-санасига қадар

5-босқич	Ташкилий қўмита, Ташкилотчи	1. Ҳакамлар ҳайъати томонидан тавсия этилган лойиҳаларни молиялаштириш чораларини кўради. Бунда, ташкилотчи ҳакамлар ҳайъати лойиҳани молиялаштиришга тавсия этганидан сўнг йигирма кун ичида буйруқ асосида ғолиб билан маблағ ажратиш бўйича тўғридан-тўғри шартнома тузади. 2. Лойиҳалари ғолиб деб топилган талабгорларнинг номлари ташкилотчининг расмий веб-сайти ва Интернет жаҳон ахборот тармоғидаги саҳифаларида эълон қилинади.	Ҳар йили сентябрь ойида

Болалар учун мўлжалланган энг яхши теле- ва радиолойиҳа танловини ташкил этиш ва ўтказиш тартиби тўғрисидаги низомга
2-ИЛОВА

Болалар учун мўлжалланган энг яхши теле- ва радиолойиҳа танловини ўтказиш бўйича ташкилий қўмита

ТАРКИБИ

1.	А.А. Ходжаев	—	Ахборот ва оммавий коммуникациялар агентлиги директори, ташкилий қўмита раиси
2.	Лавозими бўйича	—	Ўзбекистон Журналистлар уюшмаси раиси, ташкилий қўмита раиси ўринбосари
3.	А.В. Шин	—	мактабгача ва мактаб таълими вазирининг биринчи ўринбосари
4.	У.У. Шарифходжаев	—	мактабгача ва мактаб таълими вазирининг биринчи ўринбосари
5.	Ш.Т. Ризаев	—	Кинематография агентлиги бош директорининг биринчи ўринбосари
6.	Ш.Т. Қудратхўжа	—	Ўзбекистон Миллий медиа ассоциацияси раиси (келишув асосида)
7.	З.А. Тўрақулов	—	Республика Маънавият ва маърифат маркази раҳбарининг ўринбосари
8.	М.А. Сафаров	—	Ўзбекистон Миллий телерадиокомпанияси раисининг ўринбосари
9.	Г.К. Хатамова	—	Ахборот ва оммавий коммуникациялар агентлиги бошқарма бошлиғи, ташкилий қўмита котиби

Изоҳ. Ташкилий қўмита аъзолари бошқа ишга ўтган тақдирда, ушбу лавозимларга янгидан тайинланган ёки тегишли функцияларни бажариш зиммасига юкланган ходимлар Ташкилий қўмита таркибига киритилади.

Болалар учун мўлжалланган энг яхши теле- ва радио лойиҳа танловини ташкил этиш ва ўтказиш тартиби тўғрисидаги низомга
3-ИЛОВА

НАМУНА
Болалар учун мўлжалланган энг яхши теле- ва радио лойиҳа танловида иштирок этиш учун _______________________________________________________________нинг ^{(оммавий ахборот воситасининг ёки муассисининг номи)} ТАЛАБНОМАСИ

Кириш қисми
Оммавий ахборот воситаси давлат рўйхатидан ўтказилганлиги тўғрисида гувоҳноманинг рақами ва берилган санаси
Талабгорнинг номи (давлат рўйхатидан ўтказилган уставга мувофиқ), банк ҳисобварағи
Лойиҳа мазмуни
Ариза берувчи тўғрисидаги тўлиқ маълумотлар (жойлашган ери (яшаш манзили), телефон рақами)
Ташкилот ҳисобчисининг Ф.И.О., бошқа зарур маълумотлар (яшаш манзили, электрон почтаси, телефон коди билан тўлиқ кўрсатилиши лозим)
Лойиҳани амалга ошириш муддати (бошланиш санаси — тугатиш санаси)
Сўралаётган маблағ миқдори (сўм)
Муаммонинг қўйилиши (мавжуд муаммо, унинг аҳамияти ва лойиҳани амалга ошириш зарурлигини баён этиш, бир варақдан ортиқ бўлмаслиги лозим)
Лойиҳани амалга ошириш шакли ва механизмлари (лойиҳани амалга ошириш усуллари, миқдор ва сифат кўрсаткичлари)
Лойиҳани амалга оширишдан кутилаётган натижалар (сифат кўрсаткичлари ҳамда болалар тарбиясига ижобий таъсири)
Талабнома берувчининг ушбу соҳадаги тажрибаси (талабгорнинг фаолияти, эришган ютуқлари)
Лойиҳани амалга ошириш бўйича харажатлар сметаси
Харажат номи	Талаб этиладиган маблағ



Раҳбар Ф.И.О. _________________________________________________________
____________Муҳр ўрни ______________^имзо _______________________^сана
Бош муҳаррир Ф.И.О. ____________________________________________________
____________________________________^имзо ________________________^сана

Вазирлар Маҳкамасининг 2023 йил 26 июндаги 262-сон қарорига
2-ИЛОВА

«Оммавий ахборот воситаларида эълон қилинган энг яхши материал» танловини ташкил этиш ва ўтказиш тартиби тўғрисида

НИЗОМ

1-боб. Умумий қоидалар

1. Мазкур Низом «Оммавий ахборот воситаларида эълон қилинган энг яхши материал» танловини (кейинги ўринларда — Танлов) ташкил этиш ва ўтказиш тартибини белгилайди.

2. Танлов оммавий ахборот воситаларида эълон қилинаётган ва юқори профессионал даражада тайёрланган энг яхши материалларни аниқлаш ҳамда уларнинг муаллифларини тақдирлаш мақсадида ташкил этилади.

3. Танлов ҳар йили чорак якуни бўйича ўтказилади.

4. Мазкур Низомда қуйидаги асосий тушунчалар қўлланилади:

иштирокчи — Ўзбекистон Республикасида белгиланган тартибда давлат рўйхатидан ўтган оммавий ахборот воситалари, шунингдек, танловда қатнашиш учун ариза берган муаллифлар (ижодий гуруҳ аъзолари);

материал — оммавий ахборот воситаларида эълон қилинган мақола, шарҳ, журналистик суриштирув, интервью, видео-, аудио-, фото- ва бошқа маҳсулотлар;

махсус электрон платформа — танлов ташкилотчиси томонидан ишлаб чиқилган ва энг яхши материалларни кенг жамоатчилик ва малакали мустақил экспертлар муҳокамасига тақдим этишга мўлжалланган электрон тизим;

оммавий ахборот воситаси — оммавий ахборотни даврий тарқатишнинг доимий номга эга бўлган ҳамда босма тарзда (газеталар, журналлар, ахборотномалар, бюллетенлар ва бошқалар) ва (ёки) электрон тарзда (теле-, радио-, видео-, кинохроникал дастурлар, Интернет жаҳон ахборот тармоғидаги веб-сайтлар) олти ойда камида бир марта нашр этиладиган ёки эфирга бериладиган, қонунчиликда белгиланган тартибда рўйхатга олинган шакли ҳамда оммавий ахборотни даврий тарқатишнинг бошқа шакллари;

ташкилотчи — Ахборот ва оммавий коммуникациялар агентлиги ҳамда Ўзбекистон Журналистлар уюшмаси;

ташкилий қўмита — танловни ташкил этиш ва ўтказишда танлов учун тақдим этилган материалларни баҳолаш мезонларини ва ҳакамлар ҳайъати таркибини тасдиқлаш, ғолиб ва совриндорлар ҳамда рағбатлантирувчи ўринлар миқдорларини белгилаш, шунингдек танловни ўтказиш билан боғлиқ бошқа ташкилий масалаларни ҳал қилиш вазифаларини амалга оширувчи коллегиал орган;

фойдаланувчи — махсус электрон платформадан рўйхатдан ўтган ҳамда танловда иштирок этаётган материалларни муҳокама қилиб, баҳо берувчи жисмоний шахс;

ҳакамлар ҳайъати — танлов иштирокчиларининг аризалари билан тақдим этилган материалларни баҳоловчи экспертлар гуруҳи.

5. Танлов қуйидаги йўналишларда ўтказилади:

газеталар ва журнал (ахборотнома-бюллетень)ларда чоп этилган материаллар;

телеканалларда эфирга узатилган материаллар;

радиоканалларда эфирга узатилган материаллар;

веб-сайтларда эълон қилинган материаллар.

6. Ташкилий қўмитанинг таркиби ушбу Низомга 1-иловага мувофиқ тузилади.

7. Ташкилий қўмитанинг мажлислари заруратга қараб, лекин уч ойда камида бир марта ўтказилади.

8. Ҳакамлар ҳайъати ташкилотчи, шунингдек, Ўзбекистон Миллий телерадиокомпанияси, Ўзбекистон Миллий ахборот агентлиги, Ўзбекистон Миллий медиа ассоциацияси, Ўзбекистон Журналистлар уюшмаси, нодавлат нотижорат ташкилотлар, олий таълим ташкилотлари ҳамда оммавий ахборот воситаларининг тажрибали вакилларидан иборат таркибда Ташкилий қўмита томонидан тузилади.

9. Ҳакамлар ҳайъати аъзоларининг танлов материалларини ўрганиш ва баҳолаш жараёнига аралашишга йўл қўйилмайди.

2-боб. Танловни ташкил этиш ва ўтказиш тартиби

10. «Оммавий ахборот воситаларида эълон қилинган энг яхши материал» танлови ушбу Низомга 2-иловада келтирилган схемага мувофиқ ташкил этилади.

11. Фойдаланувчи жойлаштирилган материалларни «5» баллик тизим асосида баҳолайди ва ушбу баҳолар ҳакамлар ҳайъати томонидан танлов материалларини кўриб чиқиш ва баҳолашда инобатга олинади.

12. Ташкилотчи ҳар йили март, июнь, сентябрь, декабрь ойининг 20-санасидан кейинги ойнинг 1-санасига қадар танловни ўтказиш ҳақидаги эълонларни ўз расмий веб-сайти ва Интернет жаҳон ахборот тармоғидаги саҳифаларида жойлаштиради.

13. Иштирокчи ҳар йили апрель, июль, октябрь, январь ойининг 1 — 10-саналарида (10 кун муддатда) оммавий ахборот воситаларида эълон қилинган 5 тагача материални Ташкилий қўмитага (шу жумладан, электрон тарзда) танловда иштирок этиш учун ариза билан бирга тақдим этади.

Аризага қуйидагилар илова қилинади:

танловга тақдим этилаётган материаллар рўйхати ва уларнинг қачон ва қайси оммавий ахборот воситасида эълон қилинганлиги ҳақидаги маълумот;

веб-сайтларда эълон қилинган материалларнинг фаол гиперҳаволаси;

газета, журнал (ахборотнома-бюллетень)ларда чоп этилган материалларнинг электрон (pdf) шакли;

радиоканалларда эълон қилинган материалларнинг электрон (mp3) шакли;

телеканалларда эълон қилинган материалларни видеохостингга жойлаштирган ҳолда, уларнинг фаол гиперҳаволаси.

14. Ташкилий қўмита танловга келиб тушган материалларни умумлаштиради ва энг яхши материалларни кенг жамоатчилик ва малакали мустақил экспертлар томонидан очиқ ва шаффоф усулда муҳокамаси учун платформага жойлаштиради.

15. Муаллифлик ҳуқуқи ва турдош ҳуқуқлар ҳамда бошқа интеллектуал мулк ҳуқуқларининг бузилиши, ушбу Низомда белгиланган тартибларга риоя қилмаслик билан боғлиқ қоидабузарликлар аниқланган тақдирда, Ташкилий қўмита иштирокчиларни танловда қатнашиш имкониятидан маҳрум қилиш ҳуқуқига эга, бу ҳолат тегишли баённома билан расмийлаштирилади.

16. Ҳакамлар ҳайъати:

тақдим этилган материалларни ҳар йили апрель, июль, октябрь, январь ойининг 11 — 30-санасига қадар (20 кун муддатда) Ташкилий қўмита томонидан белгиланадиган талаблар (мезонлар) асосида баҳолайди;

ҳар йили май, август, ноябрь, февраль ойининг 5-санасига қадар баҳолаш якунлари бўйича ғолиб ва совриндор деб топилган фаол журналистлар ва муаллифларни аниқлайди.

17. Ташкилотчи ҳар йили май, август, ноябрь, февраль ойининг 10-санасига қадар танлов ғолиб ва совриндорларини тақдирлайди ҳамда уларнинг номларини ўз расмий веб-сайти ва Интернет жаҳон ахборот тармоғидаги саҳифаларида эълон қилади.

18. Танловда илмий-услубий мақолалар, норматив-ҳуқуқий ҳужжатларга изоҳли шарҳлар, илмий муаллифлик тадқиқотлари, услубий ишланмалар, шунингдек реклама сифатида чоп этилган материаллар иштирок этиши мумкин эмас.

19. Топширилган материаллар танлов ўтказилаётган чоракда биринчи маротаба эълон қилинган бўлиши зарур.

3-боб. Ташкилотчи, ташкилий қўмита ва ҳакамлар ҳайъатининг асосий вазифалари

20. Ташкилотчи:

танловни ташкил этади ва ўтказади;

Ташкилий қўмита фаолиятига кўмаклашади;

танлов эълони, жараёнлари ва якунлари ҳақидаги ахборотларни махсус электрон платформа ҳамда ўз расмий веб-сайти ва Интернет жаҳон ахборот тармоғидаги саҳифаларида эълон қилиб боради;

танлов ғолиб ва совриндорларини рағбатлантиради;

ҳакамлар ҳайъати аъзолари меҳнатига ҳақ тўлайди.

21. Ташкилий қўмита:

ҳакамлар ҳайъати таркибини шакллантиради ва тасдиқлайди, заруратга кўра, ҳакамлар ҳайъати таркибига ўзгартиришлар киритади;

нохолис ёндашув, манфаатлар тўқнашуви, коррупцияга оид ҳуқуқбузарлик, шахсий манфаатдорлик ҳолатларига йўл қўймаслик чораларини кўради;

танлов бўйича келиб тушган мурожаатларни белгиланган тартибда кўриб чиқади;

ғолиб ва совриндорларни саралашда ҳакамлар ҳайъати томонидан адолатлилик, шаффофлик мезонларига риоя қилинишини таъминлайди;

танловга келиб тушган материалларни баҳолаш мезонларини ишлаб чиқади ва тасдиқлайди;

танлов иштирокчиларининг ҳакамлар ҳайъати қарорлари устидан шикоятларини кўриб чиқади.

22. Ҳакамлар ҳайъати:

материалларни адолатлилик, шаффофлик мезонларига риоя қилган ҳолда профессионал талаблар асосида кўриб чиқади ва баҳолайди;

ғолиб ва совриндорларни аниқлайди ҳамда тегишли қарор қабул қилади;

нохолис ёндашув, манфаатлар тўқнашуви, коррупцияга оид ҳуқуқбузарлик, шахсий манфаатдорлик ҳолатларига йўл қўймаслик, натижалар эълон қилингунга қадар унинг сир сақланишини таъминлаш чораларини кўради.

4-боб. Танлов ғолиблари ва совриндорларини мукофотлаш тартиби

23. Танлов ғолиб ва совриндорлари ҳар бир йўналиш бўйича биттадан 1, 2 ва 3-ўринлар ҳамда ҳар бир йўналиш бўйича 5 тадан 22 тагача рағбатлантирувчи ўринларни баҳолаш мезонлари асосида аниқлаш орқали белгиланади.

Бунда, рағбатлантирувчи ўринларнинг энг кўп сони (бироқ 22 тадан ошмаган миқдорда) ҳакамлар ҳайъати томонидан танловга тақдим этилган материалларни кўриб чиқиш натижалари асосида аниқланади.

24. Ғолиблар ва совриндорлар қуйидагича рағбатлантирилади:

ҳар бир йўналиш бўйича 1-ўринга — базавий ҳисоблаш миқдорининг 50 баравари миқдорида;

ҳар бир йўналиш бўйича 2-ўринга — базавий ҳисоблаш миқдорининг 40 баравари миқдорида;

ҳар бир йўналиш бўйича 3-ўринга — базавий ҳисоблаш миқдорининг 30 баравари миқдорида;

ҳар бир йўналиш бўйича рағбатлантирувчи ўринга — базавий ҳисоблаш миқдорининг 10 баравари миқдорида.

25. Танловни ташкил этиш, ўтказиш, ғолиб ва совриндорларни мукофотлаш билан боғлиқ харажатлар Ўзбекистон Республикасининг ахборот соҳаси ва оммавий коммуникацияларни ривожлантиришни қўллаб-қувватлаш жамғармаси маблағлари ҳамда қонунчилик ҳужжатлари билан тақиқланмаган бошқа манбалар ҳисобидан Ўзбекистон Журналистлар уюшмаси орқали қопланади.

5-боб. Якунловчи қоидалар

26. Танловга тақдим этилган материаллар тўғрисидаги маълумотларнинг ҳаққонийлигига иштирокчи жавобгар ҳисобланади.

27. Танлов натижаларидан норози бўлган иштирокчилар Ташкилий қўмитага шикоят қилишлари мумкин.

28. Мазкур Низом талабларининг бузилишида айбдор бўлган шахслар қонунчиликка мувофиқ белгиланган тартибда жавобгар бўлади.

«Оммавий ахборот воситаларида эълон қилинган энг яхши материал» танловини ташкил этиш ва ўтказиш тартиби тўғрисида низомга
1-ИЛОВА

«Оммавий ахборот воситаларида эълон қилинган энг яхши материал» танловини ташкил этиш ва ўтказиш бўйича ташкилий қўмита

ТАРКИБИ

1.	А.А. Ходжаев	—	Ахборот ва оммавий коммуникациялар агентлиги директори, Ташкилий қўмита раиси
2.	А. Кўчимов	—	Ўзбекистон Миллий ахборот агентлиги бош директори
3.	А.Д. Хаджаев	—	Ўзбекистон Миллий телерадиокомпанияси раиси
4.	Лавозими бўйича	—	Ўзбекистон Журналистлар уюшмаси раиси
5.	Ш.Т. Қудратхўжа	—	Ўзбекистон Миллий медиа ассоциацияси бошқаруви раиси (келишув асосида)
6.	О.Н. Ҳусанов	—	Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди ижрочи директори (келишув асосида)
7.	Г.К. Хатамова	—	Ахборот ва оммавий коммуникациялар агентлиги бошқарма бошлиғи, Ташкилий қўмита котиби

Изоҳ. Ташкилий қўмита аъзолари бошқа ишга ўтган тақдирда, ушбу лавозимга янгидан тайинланган ёки тегишли функцияларни бажариш зиммасига юкланган ходимлар Ташкилий қўмита таркибига киритилади.

«Оммавий ахборот воситаларида эълон қилинган энг яхши материал» танловини ташкил этиш ва ўтказиш тартиби тўғрисида низомга
2-ИЛОВА

«Оммавий ахборот воситаларида эълон қилинган энг яхши материал» танловини ташкил этиш

СХЕМАСИ

Босқич	Субъект	Тадбирлар	Бажариш муддати

1-босқич	Ахборот ва оммавий коммуникациялар агентлиги, Ўзбекистон Журналистлар уюшмаси	Танловни ўтказиш ҳақидаги эълонларни ўз расмий веб-сайти ва Интернет жаҳон ахборот тармоғидаги саҳифаларида жойлаштиради.	Ҳар йили март, июнь, сентябрь, декабрь ойининг 20-санасидан кейинги ойнинг 1-санасига қадар

2-босқич	Иштирокчи	Оммавий ахборот воситаларида эълон қилинган 5 тагача материални Ташкилий қўмитага тақдим этади.	Ҳар йили апрель, июль, октябрь, январь ойининг 1 — 10-саналарида (10 кун муддатда)
2-босқич	Ташкилий қўмита	Танловга келиб тушган материалларни умумлаштиради ва кенг жамоатчилик муҳокамаси учун платформага ҳамда баҳолаш учун Ҳакамлар ҳайъатига тақдим этади.

3-босқич	Ҳакамлар ҳайъати	Ташкилий қўмита томонидан тақдим этилган материалларни белгиланган талаблар асосида баҳолайди.	Ҳар йили апрель, июль, октябрь, январь ойининг 11 — 30-санасига қадар (20 кун муддатда)

4-босқич	Ҳакамлар ҳайъати	Баҳолаш якунлари бўйича ғолиб ва совриндор деб топилган фаол журналистлар ва муаллифларни аниқлайди.	Ҳар йили май, август, ноябрь, февраль ойининг 5-санасига қадар

5-босқич	Ахборот ва оммавий коммуникациялар агентлиги, Ўзбекистон Журналистлар уюшмаси	Танлов ғолиб ва совриндорларини тақдирлайди ҳамда уларнинг номларини ўз расмий веб-сайти ва Интернет жаҳон ахборот тармоғидаги саҳифаларида эълон қилади.	Ҳар йили май, август, ноябрь, февраль ойининг 10-санасига қадар

Вазирлар Маҳкамасининг 2023 йил 26 июндаги 262-сон қарорига
3-ИЛОВА

НИЗОМ

1-боб. Умумий қоидалар

1. Ушбу Низом оммавий ахборот воситаларида камида бир йил давомида асосий иш жойи сифатида ишлаб келаётган ҳамда халқаро имтиҳон тизимлари бўйича юқори балл (даража) олган журналистлар ва таҳририят ходимларига (аввал хорижий тиллар бўйича В2 ва ундан юқори даражадаги миллий ёки унга тенглаштирилган мос даражадаги халқаро сертификатга эга бўлган, шунингдек хорижий тиллар бўйича олий маълумотли ходимлари бундан мустасно) хорижий тилларни ўрганиш харажатларини қисман, имтиҳон топшириш харажатларини тўлиқ қоплаб бериш тартибини белгилайди.

2. Оммавий ахборот воситаларида камида бир йил давомида асосий иш жойи сифатида ишлаб келаётган ходимларнинг имтиҳон топшириш харажати қоплаб бериладиган халқаро имтиҳон тизимлари рўйхати ушбу Низомга 1-иловага мувофиқ тасдиқланади.

3. Оммавий ахборот воситаларида камида бир йил давомида асосий иш жойи сифатида ишлаб келаётган ходимларнинг (кейинги ўринларда — ОАВ ходимлари) хорижий тилларни ўрганиш харажатларининг 50 фоизи, бироқ базавий ҳисоблаш миқдорининг 15 бараваридан ошмаган қисми компенсация қилинади.

Бунда, улар хорижий тиллар бўйича В2 ва ундан юқори даражадаги миллий ёки унга тенглаштирилган мос даражадаги халқаро сертификат (кейинги ўринларда — сертификат)га эга бўлиши ҳамда нодавлат таълим ташкилотида ўқиш билан боғлиқ ҳақиқий харажатларни исботловчи ҳужжатларни тақдим этиши лозим.

4. Оммавий ахборот воситаларида камида бир йил давомида асосий иш жойи сифатида ишлаб келаётган ОАВ ходимларига сертификатга эга бўлиш учун имтиҳон топшириш харажатлари тўлиқ компенсация қилинади.

5. Ушбу Низомда қуйидаги асосий тушунчалар қўлланилади:

ариза берувчи — Ўзбекистон Республикасида давлат рўйхатидан ўтган, ўқув курсларида хорижий тилларни ўрганиш мақсадида ўз ходимларини ўқитган ҳамда ўқитиш якунларига кўра ходимлари сертификатни олган оммавий ахборот воситалари;

верификация — ариза берувчи томонидан тақдим этилган сертификатнинг ҳақиқийлигини масъул ваколатли ташкилотнинг электрон тизими орқали текшириш;

имтиҳон топшириш харажати — имтиҳонни ташкил этиш ваколатига эга хорижий ташкилотлар томонидан белгиланган Ўзбекистон Республикасида амал қилувчи расмий тўлов миқдори;

компенсация — ариза берувчига ўқитиш ва имтиҳон топшириш харажатини қоплаб берувчи томонидан қоплаб бериладиган, имтиҳон топшириш, ўқитиш харажати суммаси (мазкур компенсация масъул ваколатли хорижий ташкилотларнинг Ўзбекистон Республикаси ҳудудидаги ваколатли вакили томонидан белгиланадиган имтиҳон топшириш билан боғлиқ қўшимча тўловларни ўз ичига олмайди);

масъул ваколатли ташкилот — имтиҳонни ташкил этишга ваколатли хорижий ташкилот ёки унинг Ўзбекистон Республикаси ҳудудидаги ваколатли вакили бўлган юридик шахс;

махсус тақдимнома — хорижий тилларни ўргатишга ихтисослашган нодавлат таълим ташкилотлари билан имзоланган шартномалар, тўлов ҳужжатлари асосида шакллантирилган оммавий ахборот воситалари томонидан тасдиқланадиган ҳамда масъул ваколатли ташкилотлар томонидан бериладиган, махсус серия рақамига эга имтиҳон натижасини тасдиқловчи расмий ҳужжат;

6. Ариза берувчи ўз ходими ушбу Низомга асосан компенсациядан фойдаланишни режалаштирган бўлса, бу ҳақда ариза берувчи ўз ходими хорижий тилларни ўрганишни бошлаган кунидан бошлаб ўн кун муддат мобайнида Ахборот ва оммавий коммуникациялар агентлигини (кейинги ўринларда — Агентлик) ёзма равишда хабардор қилади. Бунда, қуйидаги маълумотлар бўлиши лозим:

ОАВ ходими хорижий тилларни ўрганишни бошлаган хорижий тилларни ўрганиш бўйича нодавлат таълим ташкилот номи, юридик манзили, телефон рақамлари;

хорижий тилларни ўрганишни бошлаган ходимнинг исми, фамилияси, отасининг исми, туғилган йили, оммавий ахборот воситаси таҳририятида асосий иш жойи бўйича ҳақиқатда иш бошлаган санаси ва лавозими, телефон рақами;

ўқув курснинг бошланиш ва якунланиш муддати ҳамда нархи.

7. Хорижий тилларни ўргатишга ихтисослашган ўқув курслари хорижий тилларни ўрганиш бўйича ўқиш харажатлари ҳамда имтиҳон бўйича юқори балл (даража) олган ОАВ ходимларига имтиҳон топшириш харажатларини тўлиқ қоплаб бериш бўйича:

а) ариза берувчи ўз ходимларини хорижий тилларни ўрганиш бўйича нодавлат таълим ташкилотида ўқиш харажатларини ҳамда сертификат олиш учун имтиҳон харажатларини қоплаш юзасидан сўровномани тўлдириб Агентликка юборади;

б) Агентлик:

ариза берувчидан ОАВ ходимларини асосий иш жойи бўйича ҳақиқатда ишлаётганлиги, ўқитиш юзасидан тузилган, икки томонлама тасдиқланган шартномалар, тўлов ҳужжати, хизмат бажарилганлигини тасдиқловчи бошқа зарур ҳужжатларни талаб қилиш ҳуқуқига эга;

заруратга кўра, ОАВ ходимларини хорижий тилларни ўрганиш бўйича нодавлат таълим ташкилотининг ўқув курсларида ҳақиқатдан ўқиганлигини шунингдек аввал сертификатга эга бўлмаганлигини ўрганади;

сертификатни верификациядан ўтказади ёки сертификатнинг ҳақиқийлигини масъул ваколатли хорижий ташкилот орқали тасдиқлатиб олади;

ҳақиқийлиги тасдиқланган ўқиш харажатлари ва сертификат эгаси бўлган ариза берувчиларнинг электрон реестрини шакллантиради, ушбу электрон реестрни ва унга мувофиқ компенсация маблағларини ариза берувчининг ҳисобварағига ўтказади.

2-боб. Хорижий тилларга ўқитиш ва сертификат олиш учун имтиҳон харажатларини компенсация қилиш тартиби

8. Хорижий тилларга ўқитиш ва сертификат олиш учун имтиҳон харажатларини компенсация қилиш ушбу Низомга 2-иловага мувофиқ схема асосида амалга оширилади.

9. Хорижий тилларга ўқитиш ва сертификат олиш учун имтиҳон харажатлари Ўзбекистон Республикасининг ахборот соҳаси ва оммавий коммуникацияларни ривожлантиришни қўллаб-қувватлаш жамғармаси маблағлари ҳисобидан қопланади, заруратга кўра, ушбу мақсадлар учун Ўзбекистон Республикасининг ахборот соҳаси ва оммавий коммуникацияларни ривожлантиришни қўллаб-қувватлаш жамғармасига Давлат бюджетидан қўшимча маблағ ажратилади.

10. Ариза берувчи сўровномани ушбу Низомга 3-иловага мувофиқ тўлдиради ва унга қуйидаги ҳужжатларни илова қилади:

а) ОАВ ходимининг хорижий тилни ўқиганлигини тасдиқловчи шартнома ва тўлов ҳужжати нусхаси ёки имтиҳон топшириш харажати тўланганлигини тасдиқловчи тўлов ҳужжати нусхаси, ўқиш натижасида олган сертификати нусхаси;

б) сертификат нусхаси.

11. Тақдим этилган ҳужжатлардаги маълумотларнинг ҳаққонийлигига ариза берувчи масъул ҳисобланади.

12. Ариза берувчи томонидан сўровномага нотўғри маълумот киритилиши сўровномани рад этиш учун асос ҳисобланади.

13. Ариза берувчи харажатларни компенсация қилишнинг ҳар қандай босқичида уни олишдан бош тортиш ҳуқуқига эга.

14. Қуйидаги шартлар тўлиқ бажарилганда, ариза берувчига мазкур Низомда назарда тутилган компенсация тўлаб берилади:

ОАВ ходимлари ҳақиқатда хорижий тилларга ўқитиш ташкилотларининг ўқув курсларида хорижий тилни ўрганиш бўйича ўқиб, ўқув курсини тўлиқ якунлаганидан кейин уч ойдан кўп бўлмаган муддатда имтиҳон топшириш натижаларига кўра сертификатга эга бўлганда;

имтиҳонларнинг бири ёки бир нечтаси бўйича имтиҳон топшириш харажати компенсация қилиниши учун тўпланиши лозим бўлган юқори балл — В2 ва ундан юқори (даража)нинг минимал кўрсаткичи қайд этилганда;

ўқиш ёки сертификат берилган санадан бошлаб 1 календарь йил ўтмасдан компенсация тўлашни сўраб ушбу Низомда белгиланган тартибда мурожаат қилганда;

ўқиш ёки сертификатда кўрсатилган имтиҳон натижасининг ҳақиқийлиги ва тўғрилиги Агентлик томонидан тасдиқланганда.

15. Агентлик ариза берувчининг сўровномаси келиб тушганидан бошлаб:

йигирма кун ичида ОАВ ходимларини хорижий тилларни ўрганиш бўйича ўқув курсларида ҳақиқатда ўқиганлигини ўрганади;

ўн беш кун ичида ариза берувчининг сўровномаси келиб тушган пайтдан бошлаб сертификатни верификациядан ўтказади.

Агар сертификатнинг ҳақиқийлигини верификация орқали аниқлашнинг имкони бўлмаса, Агентлик имтиҳон ташкил этишга масъул ваколатли ташкилотга сертификатнинг ҳақиқийлиги бўйича сўров юборади. Бундай ҳолатда сертификатнинг ҳақиқийлигини тасдиқлатиш муддати ўттиз кунга узайтирилади.

16. Қуйидаги ҳолатларда:

ўқитиш харажатларини тасдиқловчи ҳужжатлар ҳақиқий эмаслиги ёки ОАВ ходими аввал сертификатга эга бўлганлиги аниқланганда;

верификация ёки ваколатли хорижий ташкилотга юборилган сўров натижасига кўра сертификатнинг ҳақиқий эмаслиги аниқланганда;

ваколатли хорижий ташкилотга юборилган сўровга жавоб олинмаганда Агентлик томонидан ўқитиш ёки сертификатнинг ҳақиқийлигини тасдиқлаш рад этилади ва компенсация тўланмайди.

17. Агентлик томонидан масъул ваколатли ташкилотга юборилган сўровга 30 кун муддатда жавоб олинмаганда, шунингдек, сертификатнинг ҳақиқий ёки ҳақиқий эмаслиги ҳақида кечикиб жавоб олинганда Агентлик бу ҳақда ариза берувчини хабардор қилади.

Бунда, сертификатнинг ҳақиқийлиги масъул ваколатли ташкилот томонидан 30 кун муддат ўтиб тасдиқланганда, ариза берувчи ушбу Низом талабларига мувофиқ такроран мурожаат этмасдан унга компенсация тўлаб берилади.

18. Муқаддам айнан бир ходим учун ўқиш ёки имтиҳонларнинг бир тури бўйича имтиҳон топшириш харажати компенсациясини олган ариза берувчига имтиҳонларнинг ушбу тури бўйича такроран топширилган имтиҳон харажати қопланмайди.

Муқаддам айнан бир ходим учун имтиҳонларнинг бир тури бўйича имтиҳон топшириш харажати компенсациясини олган ариза берувчи имтиҳонларнинг бошқа тури бўйича минимал кўрсаткич ёки ундан юқори натижа қайд этса, унга ушбу Низом талабларига мувофиқ компенсация тўлаб берилади.

3-боб. Якунловчи қоидалар

19. Агентлик томонидан молиялаштириладиган муддатда ариза берувчи ўз фаолиятини тўхтатган ёки ОАВ ходимлари билан асосий иш жойи тўғрисидаги меҳнат шартномаси бекор қилинган ҳолларда харажатлар компенсация қилинмайди.

20. Ариза берувчи ушбу Низом талаблари ижроси бўйича Агентлик ходимларининг хатти-ҳаракатлари юзасидан қонунчиликда белгиланган тартибда шикоят қилиши мумкин.

21. Ушбу Низом талабларининг бузилишида айбдор бўлган шахслар қонунчиликка мувофиқ белгиланган тартибда жавоб берадилар.

Оммавий ахборот воситаларида камида бир йил давомида асосий иш жойи сифатида ишлаб келаётган ходимларнинг имтиҳон топшириш харажати қоплаб бериладиган халқаро имтиҳон тизимлари

РЎЙХАТИ

Т/р	Халқаро имтиҳон тизимларининг номи	Билиш даражаси аниқланадиган хорижий тил	Тўпланиши лозим бўлган минимал балл/даража
1.	Миллий сертификат	хорижий тиллар (инглиз, немис, француз, испан, араб ва хитой тиллари)	B2
2.	International English Language Testing System (IELTS)	инглиз тили	6,5
3.	Test of English as a Foreign Language (TOEFL iBT)	инглиз тили	94
4.	Test of English as a Foreign Language (TOEFL ITP)	инглиз тили	543
5.	Cambridge Assessment English	инглиз тили	FCE 160
6.	Test of English for International Communication (TOEIC)	инглиз тили	1300
7.	Goethe-Zertifikat, Deutsches Sprachdiplom (DSD), Test Deutsch als Fremdsprache (Test DAF)	немис тили	B2
8.	Diplôme d'Etudes en Langue Française (DELF)	француз тили	DELF B2
9.	Diplôme Approfondi de Langue Française (DALF)	француз тили	DALF С1
10.	Тest de Connaissance du Français (TCF)	француз тили	B2
11.	Diplomas de Español como Lengua Extranjera (DELE)	испан тили	B2
12.	Servicio Internacional de Evaluación de la Lengua Española (SIELE)	испан тили	B2
13.	The Arabic Language Proficiency Test, Arabic Proficiency Test (ALPT, APT, E-TOAFL, American Council on the Teaching of Foreign Languages (ACTFL)	араб тили	B2
14.	AT Tanal Al Arabi	араб тили	B2
15.	Нanyu Shuiping Kaoshi (НSK)	хитой тили	НSK4

Хорижий тилларга ўқитиш ва сертификат олиш учун имтиҳон харажатларини компенсация қилиш

СХЕМАСИ

Босқич	Субъект	Тадбирлар	Бажариш муддати

1-босқич	Ариза берувчи	Ариза берувчи ўзида фаолият кўрсатаётган журналист ёки таҳририят ходими хорижий тиллар ўқув курсларида ўқиганлиги ёхуд сертификат олиш учун имтиҳон топширганлиги ҳақида асословчи ҳужжатларни илова қилган ҳолда Ахборот ва оммавий коммуникациялар агентлигига (Агентлик) сўровнома юборади.	Ўқиш якунланган ёки сертификат берилган санадан бошлаб 1 календарь йилида

2-босқич	Агентлик	Ариза берувчининг ходимларини хорижий тилларни ўрганиш бўйича ўқув курсларида ҳақиқатда ўқиганлигини ўрганади.	Сўровнома келиб тушганидан бошлаб 20 кун ичида

3-босқич	Агентлик	Сертификатни верификациядан ўтказади.	Сўровнома келиб тушганидан бошлаб 15 кун ичида

4-босқич	Агентлик	Сертификатнинг ҳақиқийлигини верификация орқали аниқлаш имкони бўлмаса, сертификатнинг ҳақиқийлигини тасдиқлашни сўраб ваколатли хорижий ташкилотга сўров юборади.	Сўровнома келиб тушганидан бошлаб 30 кун ичида

5-босқич	Агентлик	Сертификатнинг ҳақиқийлиги тасдиқланганда (қанча муддатда тасдиқланганидан қатъи назар), сертификат эгаси бўлган ариза берувчиларнинг электрон реестрини шакллантиради, ушбу электрон реестрга мувофиқ компенсация маблағларини ариза берувчининг ҳисобварағига ўтказади.	Сертификатнинг ҳақиқийлиги тасдиқлангандан сўнг 15 кун ичида (Сертификатнинг ҳақиқийлиги тасдиқланмаганда, бу ҳақида 1 иш куни ичида ариза берувчига маълум қилинади).

СЎРОВНОМА

Ариза тартиб рақами	Қабул қилиш санаси		Қабул қилган шахс

I. Ариза берувчи тўғрисида маълумот
1.1. Оммавий ахборот воситасининг номи
1.2. Жойлашган ери:
1.3. Телефон рақами:
1.4. Электрон почта манзили:
1.5. Банк реквизитлари
II. Ўқиш ёки имтиҳон тўғрисидаги маълумотлар
2.1. Ўқиш ёки имтиҳон тури		2.2. Ўқиш ёки имтиҳон топшириш харажати	2.3. Сертификат рақами	2.4. Қайд этилган балл/даража

2.5. Ўқиш бўйича ҳужжатлар ёки сертификат нусхаси (илова қилинади)		2.6. Чек/шартнома нусхаси (илова қилинади)	2.7. Ўқиган муддат ёки тест топширилган сана	2.8. Масъул ваколатли ташкилот (имтиҳон олувчи марказ) коди/номи

Вазирлар Маҳкамасининг 2023 йил 26 июндаги 262-сон қарорига
4-ИЛОВА

НИЗОМ

1-боб. Умумий қоидалар

1. Ушбу Низом «Обуна» ягона электрон платформаси ва унинг мобил иловаси (кейинги ўринларда — Платформа) орқали даврий босма нашрлар, китоб ва бошқа матбаа маҳсулотларига обуна бўлиш ҳамда ижтимоий-сиёсий, маънавий-маърифий, адабий-бадиий, ҳуқуқий, илмий-оммабоп, болалар учун мўлжалланган даврий босма нашрларга (кейинги ўринларда — даврий босма нашрлар) обуна харажатларининг бир қисмини қайтариб бериш тартибини белгилайди, реклама хусусиятига эга бўлган даврий босма нашрлар бундан мустасно.

2. Ушбу Низомда қуйидаги асосий тушунчалар қўлланилади:

буюртма — даврий босма нашрлар, китоб ва бошқа матбаа маҳсулотларига масофадан туриб электрон тарзда обуна бўлиш ва обунани етказиб бериш жараёни;

етказиб берувчи ва тарқатувчи субъектлар — даврий босма нашрлар, китоб ва бошқа матбаа маҳсулотларини обуначига етказиб берувчи юридик шахс;

обуначи — Платформада обуна хизматларидан фойдаланиш учун рўйхатдан ўтган жисмоний шахс;

обуна каталоги — Ўзбекистон Республикаси ҳудудида тарқатиладиган даврий босма нашрлар, китоб ва бошқа матбаа маҳсулотлари номларининг белгиланган тартибда тузилган рўйхати;

Платформа — даврий босма нашрлар, китоб ва бошқа матбаа маҳсулотларига масофадан туриб электрон тарзда обунани ташкил этиш учун ишлаб чиқилган ҳамда Ўзбекистон Республикаси Иқтисодиёт ва молия вазирлиги ҳузуридаги Солиқ қўмитаси, бошқа тегишли вазирликлар ва идораларнинг ахборот тизимлари, шунингдек, тўлов тизими операторларининг ахборот тизимлари, даврий босма нашрлар таҳририятлари, ноширлик ва матбаа ташкилотлари ахборот тизимлари билан интеграциялашган дастурий таъминот ҳамда унинг мобил иловаси;

Платформа оператори — Платформани яратиш, унинг функционал имкониятларини такомиллаштириб бориш ва техник қўллаб-қувватлаш, қонунчилик ҳужжатларида белгиланган тартибда унинг ахборот хавфсизлигини таъминлаш мажбуриятига, шунингдек, даврий босма нашрлар, китоб ва бошқа матбаа маҳсулотларини тарқатувчи субъектлар, тўлов тизимлари ва солиқ органларининг электрон тизимларига интеграция қилиш ҳуқуқига эга бўлган юридик шахс — «Давлат ахборот тизимларини яратиш ва қўллаб-қувватлаш бўйича ягона интегратор «UZINFOCOM» масъулияти чекланган жамияти;

Платформа иштирокчилари — обуначилар ҳамда ноширлик ва матбаа ташкилотлари, уларни етказиб берувчи ва уларни тарқатувчи субъектлар;

шахсий кабинет — Платформада обуна хизматларидан фойдаланиш учун рўйхатдан ўтган жисмоний шахсга очиладиган, фақат ўзи кириши мумкин бўлган шахсий саҳифа;

QR-кодли чек — сотилган товарлар (бажарилган ишлар, кўрсатилган хизматлар) учун ҳисоб-китобларни амалга оширишдаги фискал белгили чек.

3. Жисмоний шахслар томонидан Платформа орқали амалга оширилган даврий босма нашрларга обуна харажатларининг бир қисмини қоплаш учун маблағлар Ўзбекистон Республикаси Рақамли технологиялар вазирлигига Давлат бюджетидан ажратилади.

Ушбу маблағлар Ўзбекистон Республикаси Рақамли технологиялар вазирлиги томонидан Платформа операторининг махсус очилган ҳисобварағига ўтказиб берилади.

4. Платформа оператори обуначиларга Платформа орқали амалга оширилган даврий босма нашрларга обуна харажатларининг бир қисмини қайтаришни ушбу Низомнинг 3 ва 4-боблари талаблари асосида амалга оширади.

5. Мазкур Низомнинг даврий босма нашрларга обуна харажатларининг бир қисмини қайтариш билан боғлиқ қоидалари 2026 йил 1 январга қадар амал қилади.

2-боб. Платформа орқали рўйхатдан ўтиш ҳамда даврий босма нашрлар, китоб ва бошқа матбаа маҳсулотларига обуна бўлиш тартиби

6. Платформа орқали даврий босма нашрлар, китоб ва бошқа матбаа маҳсулотларига обуна бўлиш ҳамда даврий босма нашрларга обуна харажатларининг бир қисмини қайтариш мазкур Низомга иловада келтирилган схемага мувофиқ амалга оширилади.

7. Обуначи Платформада рўйхатдан ўтади.

Платформада рўйхатдан ўтиш учун обуначининг шахсини тасдиқловчи маълумотлар (Ф.И.О, обунани етказиб беришнинг аниқ манзили, мурожаат учун телефон рақами ва ушбу жараён билан боғлиқ бўлган бошқа маълумотлар) Платформага киритилади.

8. Обуначи даврий босма нашрлар, китоб ва бошқа матбаа маҳсулотларига Платформа орқали обуна бўлади.

9. Обуначи ҳамда даврий босма нашр таҳририятлари, ноширлик ва матбаа ташкилотлари ўртасида даврий босма нашрлар, китоб ва бошқа матбаа маҳсулотларига электрон обуна бўйича муносабатлар оммавий оферта шартномаси орқали расмийлаштирилади.

10. Обуначи оммавий оферта шартномаси шартларини қабул қилиши билан бирга электрон обуна бўйича барча зарур ва ишончли маълумотлар билан таъминланганлигини тасдиқлайди ҳамда Платформа орқали даврий босма нашрлар, китоб ва бошқа матбаа маҳсулотлари учун обунага буюртма беради.

11. Обуначиларга Платформада маълум бир даврий босма нашрлар, китоб ва бошқа матбаа маҳсулотларига обуна бўлиш учун доимий равишда янгиланиб бориладиган обуна каталоги таклиф этилади. Бунда ижтимоий-сиёсий, маънавий-маърифий, адабий-бадиий, ҳуқуқий, илмий-оммабоп ҳамда болалар учун мўлжалланган нашрлар рўйхати алоҳида шакллантирилади.

12. Буюртма расмийлаштирилиши қуйидаги тартибда амалга оширилади:

обуна каталоги бўлинмасида «Даврий босма нашрлар, китоб ва бошқа матбаа маҳсулотлари» тугмаси танланади, бунда, маълум бир мавзуда ҳамда тури бўйича — босма ёки электрон кўринишда даврий босма нашрлар, китоб ва бошқа матбаа маҳсулотлари танлаб олинади;

танланган нашрнинг обуна даври белгиланади ва унинг тавсифи билан таништирилади, ундан кейин нашрни саватга қўшиш учун «Буюртма савати» тугмасига босилади;

агар обуначи томонидан бошқа даврий босма нашрлар, китоб ва бошқа матбаа маҳсулотларига обуна бўлиш истаги бўлмаса, унда буюртма саватида «Буюртмани расмийлаштириш» тугмаси босилиши лозим. Бунда, даврий босма нашрлар, китоб ва бошқа матбаа маҳсулотларига обуна тўловлари фақат Платформада рўйхатдан ўтган обуначилар томонидан амалга оширилади;

обуначи буюртманинг жами тўлов миқдорини Платформада таклиф қилинган тўлов усулларидан (тўлов тизимлари, тижорат банкларнинг мобил иловалари ва бошқа электрон тўлов усуллари) бирини танлаган ҳолда амалга оширади;

обуначи томонидан обуна буюртмасини етказиб бериш усули обунани расмийлаштириш карточкасида белгилаб ўтилади;

обуначи ўзининг шахсий кабинетида обуна тўловлари муваффақиятли ўтганлиги тўғрисидаги QR-кодли тўловни тасдиқловчи ҳужжатни юклаб олади;

даврий босма нашр таҳририятлари, ноширлик ва матбаа ташкилотлари, шунингдек, етказиб берувчи ва уларни тарқатувчи субъектлар даврий босма нашрлар, китоб ва бошқа матбаа маҳсулотларига обуна расмийлаштирилганлигини обуначининг шахсий кабинетига буюртма расмийлаштирилганлиги тўғрисида хабарни юбориш орқали тасдиқлайди.

13. Даврий босма нашрлар, китоб ва бошқа матбаа маҳсулотларини мижозларга етказиб бериш юзасидан жавобгарлик даврий босма нашр таҳририятлари, ноширлик ва матбаа ташкилотларига юкланади.

Даврий босма нашр таҳририятлари, ноширлик ва матбаа ташкилотлари мавжуд имкониятлардан келиб чиққан ҳолда даврий босма нашрлар, китоб ва бошқа матбаа маҳсулотларини ўзи ёки уларнинг етказувчи ва тарқатувчи субъектлари билан имзоланган шартнома асосида етказиб бериши мумкин.

Етказувчи ва уларни тарқатувчи субъектлар қуйидаги ҳолларда обуначига обуна етказилмаганлиги ва/ёки ўз вақтида етказилмаганлиги учун жавобгар эмас:

обуначи томонидан обунани етказиб бериш манзили нотўғри кўрсатилган бўлса;

обунани етказиб бериш манзилига обунанинг етказилиши, хавфсизлиги ва ишончлилигини таъминлаш имкони бўлмаганда;

обунани етказиб бериш имконияти бўлмаганда, яъни енгиб ўтиш мумкин бўлмаган кучга эга ҳолатлар ёки ҳодисалар (форс-мажор) юзага келганда.

14. Даврий босма нашр таҳририятлари, ноширлик ва матбаа ташкилотлари даврий босма нашрлар, китоб ва бошқа матбаа маҳсулотларининг белгиланган назорат муддатларида етказиб берилишини таъминлайди ҳамда шу куннинг ўзида бу тўғрисида Платформага маълумот киритади. Даврий босма нашрлар, китоб ва бошқа матбаа маҳсулотлари обуначига белгиланган муддатдан кеч етказилиши ёки етказиб берилмаслиги сабаблари ҳам Платформада қайд этиб борилади.

3-боб. Платформа орқали даврий босма нашрларга обуна харажатларининг бир қисмини қайтариш шартлари ва миқдори

15. Платформа орқали даврий босма нашрларга обуна харажатларининг бир қисмини қайтариш қуйидаги миқдорларда амалга оширилади, реклама хусусиятига эга бўлган даврий босма нашрлар бундан мустасно:

ижтимоий-сиёсий, маънавий-маърифий, адабий-бадиий, ҳуқуқий, илмий-оммабоп даврий босма нашрлар — обуна нархининг 10 фоиз миқдори;

болалар учун мўлжалланган даврий босма нашрлар — обуна нархининг 20 фоиз миқдори.

16. Даврий босма нашрларга обуна харажатларининг бир қисмини қайтариш обуна каталогида мавжуд маҳсулотлар учун қўлланилади.

17. Даврий босма нашрларга обуна харажатларининг бир қисми, улар расмийлаштирилгандан сўнг обуначиларнинг банк карталарига бир ой муддатда ўтказиб берилади (қайтарилади).

18. Платформа орқали даврий босма нашрларга обуна харажатларининг бир қисмини қайтариш бўйича ҳисоб-китоб даври бир ой этиб белгиланади. Бунда, обуначи даврий босма нашрларга бир ойдан кўп муддатга обуна бўлган тақдирда, обуна муддати тугагунга қадар, ҳисоб-китоб ҳар ойда амалга оширилади.

19. Обуначи ташаббуси билан обуна буюртмаси бекор қилинганда обуна харажатларининг бир қисми қайтарилмайди.

20. Бекор қилинган обуна буюртмаси учун маблағлар обунани бекор қилиш бўйича сўров юборилган кундан бошлаб 10 иш куни ичида даврий босма нашр таҳририятлари, ноширлик ва матбаа ташкилотлари томонидан обуначининг банк картасига ёки электрон ҳамёнга (кошелек) қайтарилади ёхуд тўловчининг тижорат банкидаги жорий ҳисобварағига ўтказилади. Маблағларни жорий ҳисобвараққа ўтказишда аризада банк реквизитлари кўрсатилади ва маблағ қайтарилганлиги обуначининг тизимдаги шахсий кабинетида ҳисобвараққа юборилган чек орқали тасдиқланади.

4-боб. Платформа орқали даврий босма нашрларга обуна харажатларининг бир қисмини қайтариш тартиби

21. Платформа орқали даврий босма нашрларга обуна харажатларининг қайтариладиган миқдори обуначининг шахсий кабинетида даврий босма нашрларга обуна расмийлаштирилган санадан бошлаб бир ой ўтганидан кейин шакллантирилади.

22. Платформа орқали даврий босма нашрларга обуна харажатларининг бир қисми қайтариладиган обуначилар рўйхати ва қайтариладиган маблағ миқдори автоматик равишда Ўзбекистон Республикаси Иқтисодиёт ва молия вазирлиги ҳузуридаги Солиқ қўмитасининг ахборот тизимларида акс эттирилади.

23. Обуначи шахсий кабинетда даврий босма нашрларга обуна харажатларининг қайтариладиган қисмини олиш учун «Обуна харажатларининг бир қисмини қайтариш» тугмасини босган ҳолда буюртма беради. Бунда, обуначи томонидан қайтариладиган маблағларни ўтказиб бериш учун банк картаси кўрсатилади.

24. Платформа оператори обуначининг обуна харажатларининг бир қисмини қайтариш бўйича буюртмалари асосида маблағларни кўрсатилган банк картасига ўтказиб беради.

5-боб. Якунловчи қоидалар

25. Ўзбекистон Республикаси Рақамли технологиялар вазирлиги ҳузуридаги Ахборотлаштириш ва телекоммуникациялар соҳасида назорат инспекцияси Платформа орқали обуна бўлишда даврий босма нашрлар, китоб ва бошқа матбаа маҳсулотларини тарқатиш соҳасида қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар талабларига риоя қилинишини назорат қилади.

26. Ушбу Низом талабларини бузган обуначи, даврий босма нашр таҳририятлари ёки ноширлик ва матбаа ташкилотлари, шунингдек, етказиб берувчи ва уларни тарқатувчи субъектларнинг Платформадан фойдаланишига чеклов (вақтинча чеклов) ўрнатилади.

27. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

28. Мазкур Низом талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар.

«Обуна» ягона электрон платформаси орқали даврий босма нашрлар, китоб ва бошқа матбаа маҳсулотларига обуна бўлиш ҳамда даврий босма нашрларга обуна харажатларининг бир қисмини қайтариш

СХЕМАСИ

Босқич	Субъект	Тадбирлар	Бажариш муддати

1-босқич	Обуначи	«Обуна» ягона электрон платформаси ёки унинг мобил иловасида рўйхатдан ўтади.	Ўз хоҳишига кўра

2-босқич	Обуначи	Платформада оммавий офертани тасдиқлаган ҳолда обуна каталогида мавжуд даврий босма нашрлар, китоб ва бошқа матбаа маҳсулотларига буюртма беради ва обуна учун тўловни амалга оширади.	Ўз хоҳишига кўра

3-босқич	Платформа оператори	Платформа орқали даврий босма нашрларга обуна учун амалга оширилган тўловдан қайтариладиган маблағ миқдорини обуначининг шахсий кабинетида акс эттиради.	Обуна расмийлаштирилгандан сўнг 1 ойдан кейин, обуна даври мобайнида ҳар ойда

4-босқич	Обуначи	«Обуна харажатларининг бир қисмини қайтариш» тугмасини босиш орқали обуна харажатларини қайтаришга буюртма беради.	Обуна амалга оширилгандан сўнг 1 ой давомида

5-босқич	Платформа оператори	Обуначи буюртмасига асосан обуна харажатларининг бир қисмини унинг банк картасига ўтказиб беради.	Обуна расмийлаштирилгандан сўнг 1 ой муддатда, обуна даври мобайнида ҳар ойда

Вазирлар Маҳкамасининг 2023 йил 26 июндаги 262-сон қарорига
5-ИЛОВА

Давлат органлари ва ташкилотлари муассислигида бўлмаган даврий босма нашрларнинг замонавий электрон шаклини яратиш, уларни модернизация қилиш ва бир йил давомида юритиш харажатларини қоплаш тартиби тўғрисида

ВАҚТИНЧАЛИК НИЗОМ

1-боб. Умумий қоидалар

1. Ушбу Низом давлат органлари ва ташкилотлари муассислигида бўлмаган ҳамда давлат рўйхатидан ўтказилганига камида икки йил бўлган даврий босма нашрлар ўртасида танлов ўтказиш орқали босма нашрларнинг замонавий электрон шаклини, шу жумладан, мобил иловаларини яратиш, уларни модернизация қилиш ва бир йил давомида юритиш харажатларини қоплаш тартибини белгилайди.

Бунда, ушбу банднинг биринчи хатбошисида кўрсатилган мақсадлар учун ҳар йили энг яхши 20 та лойиҳани аниқлаш бўйича танлов эълон қилинади ҳамда ғолиб деб топилган лойиҳаларга Ўзбекистон Республикасининг ахборот соҳаси ва оммавий коммуникацияларни ривожлантиришни қўллаб-қувватлаш жамғармаси ҳисобидан маблағ ажратилади.

2. Мазкур Низом 2026 йил 1 январга қадар амал қилади.

3. Ушбу Низомда қуйидаги асосий тушунчалар қўлланилади:

буюртмачи — Ахборот ва оммавий коммуникациялар агентлиги;

даврий босма нашр — оммавий ахборотни даврий тарқатишнинг доимий номга эга бўлган ҳамда босма тарзда олти ойда камида бир марта нашр этиладиган, қонунчилик ҳужжатларида белгиланган тартибда рўйхатга олинган газета, журнал, ахборотнома, бюллетень;

даврий босма нашр муассис(лар)и ва (ёки) таҳририятининг лойиҳаси (кейинги ўринларда — лойиҳа) — даврий босма нашрларнинг замонавий электрон шаклини яратиш, уларни модернизация қилиш ва бир йил давомида юритиш харажатлари мақсадли сарфланишини ўзида акс эттирувчи маълумотлар ва чора-тадбирлар мажмуини ўз ичига олган ҳужжат;

талабгор — танловда иштирок этаётган Ўзбекистон Республикасида давлат рўйхатидан ўтказилган даврий босма нашр;

талабнома — танловда иштирок этиш учун талабгор томонидан тақдим этиладиган ҳужжат;

танлов — давлат органлари ва ташкилотлари муассислигида бўлмаган ҳамда давлат рўйхатидан ўтказилганига камида икки йил бўлган даврий босма нашрлар орасидан уларнинг замонавий электрон шаклини, шу жумладан, мобил иловаларини яратиш, модернизация қилиш ва бир йил давомида юритиш харажатларини қоплаш мақсадида ҳар йили энг яхши 20 та лойиҳани саралаб олиш жараёни;

танлов шартномаси (кейинги ўринларда — шартнома) — буюртмачи ва танловда ғолиб деб топилган даврий босма нашр муассис(лар)и ва (ёки) таҳририяти ўртасида тузиладиган битим;

ташкилий қўмита — талабгор томонидан танловда иштирок этиш учун тақдим этилган лойиҳаларни баҳолаш ва танлов ғолибларини аниқлаш, шунингдек танловни ўтказиш билан боғлиқ бошқа ташкилий масалаларни ҳал қилиш вазифаларини амалга оширувчи коллегиал тузилма.

2-боб. Танловни ташкил этиш ва ўтказиш тартиби

4. Танлов мазкур Низомга 1-иловадаги схемага мувофиқ ўтказилади.

5. Танловда иштирок этиш учун талабгор мазкур Низомга 2-иловада белгиланган шаклга мувофиқ талабнома тақдим этади.

6. Танловда қуйидагиларнинг иштирок этишига йўл қўйилмайди:

давлат органлари ва ташкилотлари муассис бўлган даврий босма нашрлар;

талабнома топширилган кунга қадар сўнгги уч ой давомида ҳар бир сонининг адади 300 нусхадан кам бўлган даврий босма нашрлар;

талабнома топширилган кунга қадар сўнгги олти ой давомида чоп этилмаган даврий босма нашрлар;

чет эл даврий босма нашрлари.

7. Ушбу Низомга мувофиқ танлов ғолиби деб топилган даврий босма нашрнинг мазкур танловда қайта иштирок этиши тақиқланади.

8. Ташкилий қўмита талабномаларни даврий босма нашрларнинг муассислари ва (ёки) бош муҳаррирлари томонидан имзоланган ҳамда муҳрланган ҳолда қабул қилиб, танловда иштирок этиш учун рўйхатдан ўтказади ва унга идентификация рақами беради.

9. Буюртмачи ҳар йили 30 июнга қадар танлов ўтказиш тўғрисидаги маълумотни ўз расмий веб-сайтига, Интернет жаҳон ахборот тармоғидаги саҳифаларига жойлаштиради ҳамда оммавий ахборот воситаларида эълон беради.

Танлов ўтказиш тўғрисидаги эълон буюртмачининг расмий веб-сайти ва Интернет жаҳон ахборот тармоғидаги саҳифаларида талабномаларни шакллантириш, рўйхатдан ўтказиш ва топшириш тартиби ҳамда муддатлари кўрсатилган ҳолда жойлаштирилади.

10. Талабгор ҳар йили 30 июлга қадар танловда иштирок этиш тўғрисида талабнома топширади.

11. Ташкилий қўмита ҳар йили 1 — 20 август кунлари:

талабгор томонидан тақдим этилган талабнома ва унга илова қилинган лойиҳаларни рўйхатга олади ҳамда ушбу Низомнинг 17-бандида белгиланган мезонлар асосида саралайди;

талабгор томонидан тақдим этилган лойиҳаларни экспертизадан ўтказади ва ғолибларни аниқлайди;

ғолибларни аниқлаш бўйича йиғилиш баённомаси имзолайди.

12. Танлов эълон қилинган муддат ичида келиб тушган талабномалар ташкилий қўмита томонидан рўйхатга олинади ва у буюртмачи архивида беш йилгача сақланади.

3-боб. Ташкилий қўмита фаолиятини ташкил этиш

13. Ташкилий қўмита мазкур Низомга 3-иловага мувофиқ таркибда тузилади.

Бунда, йиғилиш Ташкилий қўмита аъзоларининг ярмидан кўпи иштирок этганда, ваколатли ҳисобланади.

Ташкилий қўмита қарори баённома шаклида расмийлаштирилади.

14. Ташкилий қўмита:

танловга ажратилган маблағ миқдорини белгилаш юзасидан харажатлар сметасини (базавий ҳисоблаш миқдорининг 100 бараваригача бўлган миқдорда) ишлаб чиқади ва тасдиқлайди;

танлов ғолибини аниқлаш бўйича баённома расмийлаштиради;

танловга ажратилган маблағлардан мақсадли ва самарали фойдаланиш юзасидан таклифлар тайёрлайди;

танлов ғолибларининг ҳисоботларини қабул қилади;

танловга келиб тушган барча талабномаларни экспертизадан ўтказади;

тақдим этилган маълумотларнинг тўлиқлиги ва тўғрилигини, зарур имзо (муҳр ва штамплар)нинг мавжудлигини, ноаниқликлар йўқлигини ўрганади;

тақдим этилган молиявий-иқтисодий ҳисоб-китобларни ўрганади.

4-боб. Танлов ғолибини аниқлаш мезонлари

15. Танлов ғолиби ташкилий қўмита йиғилиши аъзоларининг очиқ овоз бериши йўли билан аниқланади.

Битта талабгорга ташкилий қўмита йиғилиши аъзоларининг ярмидан кўпи овоз берган тақдирда, ушбу талабгор танлов ғолиби деб эълон қилинади.

16. Ғолибни аниқлаш жараёнида тақдим этилган ҳужжатлар юзасидан ахборот соҳасидаги тажрибали экспертлардан фикр олиниши мумкин.

17. Танловга 20 тадан ортиқ талабгор талабнома топширганда, ғолиблар ташкилий қўмита томонидан қуйидаги мезонлар асосида саралаб олинади:

даврий босма нашр чиқарилаётган муддат, унинг адади ва саҳифалари сони;

даврий босма нашр бош муҳаррирининг меҳнат стажи ва тажрибаси;

таҳририят штатида турган, материалларни тўплаш, таҳлил ва таҳрир қилиш ҳамда тайёрлаш билан шуғулланувчи ходимлар сони ва уларнинг ахборот-коммуникация технологиялари соҳасидаги саводхонлиги;

даврий босма нашр таҳририяти штатида компьютер дастурчиси ёки ижтимоий тармоқ маркетинги бўйича мутахассис мавжудлиги;

талабгор аввал давлат ижтимоий буюртмасини олганлиги ва уни сифатли бажарганлиги.

5-боб. Буюртмачи ва танлов ғолиби ўртасида шартнома

18. Танлов ғолибига маблағ ажратиш ташкилий қўмитанинг танлов ғолиби кўрсатилган йиғилиш баённомаси имзоланган санадан эътиборан ўн кун муддат ичида буюртмачи раҳбари буйруғи асосида ғолиб билан тузилган шартнома орқали унинг ҳисобварағига белгиланган миқдорда маблағ ўтказиш орқали амалга оширилади.

19. Шартнома қуйидаги қоидаларни ўз ичига олган бўлиши керак:

танловнинг мақсади;

танлов шартлари ва ушбу шартларни амалга ошириш муддатлари;

танловга ажратилган маблағ миқдори;

маблағ билан таъминлаш муддатлари;

танловга ажратилган маблағдан мақсадли фойдаланиш юзасидан назорат шакллари;

ҳисобот бериш муддатлари ва шакллари.

20. Агар танловда ғолиб деб топилган даврий босма нашр шартномани имзолашдан бош тортса ёки танловни ўтказиш давомида ўз фаолиятини тугатган ёхуд қонунчилик ҳужжатларида белгиланган тартибда тўловга қобилиятсиз деб эътироф этилган бўлса, буюртмаси танловда иштирок этган ва юқори баҳо олган кейинги иштирокчига шартнома имзолашни таклиф этишга ҳақли.

21. Танлов ғолиби лойиҳадаги талабларни танловга тақдим этилган ҳужжатларда белгиланган муддат ва шартларда амалга оширмаган тақдирда, буюртмачи томонидан талабгорга ажратилган маблағни суд орқали ундириш чоралари кўрилади.

6-боб. Якунловчи қоидалар

22. Лойиҳа молиялаштирилгандан сўнг кўпи билан олти ой ичида амалга оширилиши шарт.

23. Танлов ғолиби шартнома асосида Ўзбекистон Республикасининг ахборот соҳаси ва оммавий коммуникацияларни ривожлантиришни қўллаб-қувватлаш жамғармаси ҳисобидан молиялаштирилади.

24. Танлов учун ажратилган маблағдан тўғри ва мақсадли фойдаланиш, шунингдек, шартномада келишилган шартларни бажариш учун даврий босма нашрнинг муассиси ва (ёки) бош муҳаррири жавобгар бўладилар.

25. Танлов натижаларидан норози бўлган иштирокчилар қонунчиликка мувофиқ юқори турувчи органга ёки судга мурожаат қилишлари мумкин.

26. Мазкур Низом талабларининг бузилишида айбдор бўлган шахслар қонунчиликка мувофиқ белгиланган тартибда жавоб берадилар.

Даврий босма нашрларнинг замонавий электрон шаклини, шу жумладан, мобил иловаларини яратиш, уларни модернизация қилиш ва бир йил давомида юритиш харажатларини қоплаш бўйича танлов ташкил этиш ва ўтказиш

СХЕМАСИ

Босқич	Субъект	Тадбирлар	Бажариш муддати

1-босқич	Буюртмачи (Ахборот ва оммавий коммуникациялар агентлиги)	Танлов ўтказиш тўғрисидаги маълумотни ўз расмий веб-сайтига, Интернет жаҳон ахборот тармоғидаги саҳифаларига жойлаштиради ҳамда оммавий ахборот воситаларида эълон беради.	Ҳар йили 30 июнга қадар

2-босқич	Талабгор	Танловда иштирок этиш тўғрисида талабнома топширади.	Ҳар йили 30 июлга қадар

3-босқич	Ташкилий қўмита	Талабгор томонидан тақдим этилган лойиҳаларни рўйхатга олади ва белгиланган талаблар асосида саралайди.	Ҳар йили 1-20 август кунлари

4-босқич	Ташкилий қўмита	Талабгор томонидан тақдим этилган лойиҳаларни экспертизадан ўтказади ва ғолибларни аниқлайди. Ғолибларни аниқлаш бўйича йиғилиш баённомаси имзоланади.	Ҳар йили 1-20 август кунлари

5-босқич	Буюртмачи	Ғолиб билан тўғридан-тўғри тузилган шартнома орқали унинг ҳисобварағига белгиланган миқдорда маблағ ўтказади.	Ғолибларни аниқлаш бўйича йиғилиш баённомаси имзоланган санадан бошлаб 10 кун муддат ичида

НАМУНА

Даврий босма нашрларнинг замонавий электрон шаклини, шу жумладан, мобил иловаларини яратиш, уларни модернизация қилиш ва бир йил давомида юритиш харажатларини қоплаш бўйича танловда иштирок этиш учун
_________________________________________________________нинг
^{(даврий босма нашрнинг ёки муассисининг номи)}
ТАЛАБНОМАСИ

Кириш қисми
Даврий босма нашр давлат рўйхатидан ўтказилганлиги тўғрисида гувоҳнома рақами ва берилган санаси
Талабгорнинг номи (давлат рўйхатидан ўтказилган уставга мувофиқ), банк ҳисобварағи
Лойиҳа мазмуни
Ариза берувчи тўғрисидаги тўлиқ маълумотлар (юридик манзили, телефон рақами)
Ташкилот раҳбарининг Ф.И.О., бошқа маълумотлар (яшаш манзили, электрон почтаси, телефон коди билан тўлиқ кўрсатилиши лозим)
Ташкилот ҳисобчисининг Ф.И.О., бошқа маълумотлар (доимий рўйхатда турган ва яшаш манзили, телефон рақами)
Лойиҳани амалга ошириш муддати (бошланиш санаси — тугатиш санаси)	-
Сўралаётган маблағ миқдори (сўм)
Қўшимча жалб қилинадиган маблағ миқдори (сўм)
Лойиҳани амалга оширишдан кутилаётган натижалар
Талабнома берувчининг ушбу соҳадаги тажрибаси (талабгорнинг фаолияти, унинг ютуқлари)
Харажатлар сметаси
Харажат номи	Талаб этиладиган маблағ



Раҳбар Ф.И.О.___ __________________	__________________
Муҳр ўрни_____________^имзо	^сана

Бош муҳаррир Ф.И.О. _________________	__________________
______________^имзо	^сана

ТАШКИЛИЙ ҚЎМИТА ТАРКИБИ

1.	А.А. Ходжаев	—	Ахборот ва оммавий коммуникациялар агентлиги директори, ташкилий қўмита раиси
2.	Лавозими бўйича	—	Ўзбекистон Журналистлар уюшмаси раиси, ташкилий қўмита раиси ўринбосари
3.	О.А. Пекось	—	рақамли технологиялар вазирининг биринчи ўринбосари
4.	С.М. Дониёров	—	«Янги Ўзбекистон» ва «Правда Востока» газеталари бош муҳаррири
5.	Х.Ғ. Худойбердиев	—	Ўзбекистон Миллий ахборот агентлиги бош директорининг ўринбосари
6.	Ф.Б. Эгамбердиева	—	«Darakchi.uz» электрон сайти бош муҳаррири*
7.	Г.К. Хатамова	—	Ахборот ва оммавий коммуникациялар агентлиги бошқарма бошлиғи, ташкилий қўмита котиби

* ташкилий қўмитанинг ушбу аъзоси ташкилий қўмитанинг қарори билан ҳар йили ўзгартирилади.

(Қонунчилик маълумотлари миллий базаси, 27.06.2023 й., 09/23/262/0429-сон)