Республика ҳукуматининг қарорларига мувофиқ хўжаликларнинг ихтиёрида қолдириладиган қишлоқ хўжалик маҳсулотининг бир қисмини сотишда уларга амалий ёрдам бериш, колхоз ва совхозларни истеъмолчилар ва маҳсулот сотиладиган бозорни излашдек ўзларига хос бўлмаган вазифадан халос этиш, шунингдек бунда кўпдан-кўп суиистеъмолларга йўл қўймаслик мақсадида:

1. Ўзбекистон Президентининг тегишли фармонларида ва республика ҳукуматининг қарорларида белгиланган ҳажмда хўжаликлар ихтиёрида қолдириладиган пахта толаси, пилла, қоракўл тери ва жун сотилишини таъминлаш билан шуғулланадиган Қорақалпоғистон Республикаси ва вилоят ассоциацияларини ташкил этиш тўғрисидаги республиканинг бир қанча хўжаликлари таклифи қабул қилинсин.

2. Белгилаб қўйилсинки:

ассоциация юридик шахс бўлиб, ўз фаолиятини Ўзбекистон Республикасининг амалдаги қонунларига мувофиқ ташкил этади;

1-бандда кўрсатилган маҳсулот турларини етиштирувчи колхозлар, совхозлар, деҳқон хўжаликлари ҳамда бошқа корхоналар ва ташкилотлар ихтиёрий ва тенг ҳуқуқли асосда ассоциациянинг аъзолари бўлишлари мумкин.

Ассоциация:

хўжаликлар ихтиёрида қолдириладиган пахта толаси, пилла, қоракўл тери ва жун Ўзбекистон Республикаси Президенти ҳузуридаги Вазирлар Маҳкамаси ажратадиган меъёрлар асосида эркин нархларда сотилишини;

мазкур қишлоқ хўжалик маҳсулотларини экспортга етказиб бериш чоғида Ўзбекистон Республикаси Ташқи иқтисодий алоқалар вазирлигидан лицензиялар олиниши ва ҳужжатлар расмийлаштирилишини таъминлайди.

3. Қуйидагилар ассоциация фаолиятининг асосий вазифалари ва йўналишлари ҳисобланади:

наф келтирадиган шерикларни излаш, тузилган шартномаларнинг юксак самарадорлигини ҳамда мазкур маҳсулотларни хўжаликларнинг меҳнат жамоалари манфаатларини кўзлаб сотиш мақсадида ички ва ташқи бозорлардаги конъюнктурани ва белгилайдиган нархларни ўрганиш;

хўжаликларнинг молиявий ва иқтисодий аҳволини яхшилаш мақсадида қишлоқ хўжалик маҳсулотларининг истеъмолчилари билан ўзаро манфаатли бевосита алоқалар ўрнатишда колхозлар, совхозларга ва деҳқон хўжаликларига тижорат-воситачилик хизмати кўрсатиш.

4. Ўзбекистон Республикасининг Марказий банки, Ўзбекистон саноат-қурилиш банки, Ўзбекистон деҳқончилик-саноат банки ҳамда бошқа тижорат банклари ташкил этилаётган ассоциацияларнинг ҳисоблари ўз вақтида очилишини ва сўмда ҳам, валютада ҳам пул маблағлари ҳисобга ўтказилишини таъминласинлар, белгиланган тартибда зарур кредитлар ажратиб берсинлар.

5. Ўзбекистон Республикасининг Президенти ҳузуридаги Вазирлар Маҳкамаси бир ҳафта муддат ичида Қорақалпоғистон Республикаси ва вилоят ассоциацияларининг фаолиятини ташкил этишга доир қарор қабул қилсин ҳамда уларнинг намунали тузилмаси ва бир хилдаги Уставини тасдиқласин.