Ўзбекистон Республикаси Вазирлар Маҳкамасининг
қарори
Умумтаълим фанларини билиш даражасини баҳолашнинг миллий тест тизимини жорий этиш тўғрисида
Ўзбекистон Республикаси Президентининг «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид давлат дастури тўғрисида» 2020 йил 2 мартдаги ПФ-5953-сон Фармонида белгиланган вазифалар ижросини таъминлаш ҳамда абитуриентларни олий таълим муассасаларига ўқишга қабул қилиш тест синовини такомиллаштириш мақсадида Вазирлар Маҳкамаси қарор қилади:
1. Қуйидагилар:
2020 йил 1 декабрдан бошлаб босқичма-босқич бакалавриат таълим йўналишларига мос фанлар мажмуасидаги умумтаълим фанларидан (кейинги ўринларда — умумтаълим фанлари) билиш даражасини баҳолашнинг миллий тест тизими;
2021/2022 ўқув йили қабулидан бошлаб тегишли умумтаълим фанини (чет тили бундан мустасно) билиш даражаси тўғрисида давлат намунасидаги сертификатга эга бўлган абитуриентга сертификатдаги ўзлаштириш фоизига мос равишда олий таълим муассасаси бакалавриатига ўқишга қабул қилиш бўйича тест синовларида ушбу фандан белгиланган максимал баллга нисбатан табақалаштирилган (пропорционал) балл бериш тартиби жорий этилсин.
2. Белгилансинки, умумтаълим фанлари бўйича сертификатлаш қуйидаги муддатларда жорий этилади:
2020 йил 1 декабрда она тили ва адабиёт (ўзбек тили ва адабиёти, рус тили ва адабиёти, қорақалпоқ тили ва адабиёти) ҳамда математика фанлари бўйича;
2021 йил 1 февралда кимё ва биология фанлари бўйича;
2022 — 2024 йилларда физика, география ва тарих фанлари бўйича.
Олдинги таҳрирга қаранг.
2026/2027 ўқув йилидан бошлаб ҳуқуқшунослик фани бўйича;
(2-банд Ўзбекистон Республикаси Вазирлар Маҳкамасининг 2026 йил 29 июлдаги 411-сонли қарорига асосан бешинчи хатбоши билан тўлдирилган — Қонунчилик маълумотлари миллий базаси, 30.07.2026 й., 09/26/411/0797-сон)
Олдинги таҳрирга қаранг.
Умумтаълим фанларидан билиш даражасини баҳолашнинг миллий тест синовларини ташкил этиш ва умумтаълим фанлари бўйича сертификатлаш Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги (кейинги ўринларда — Агентлик) ёки қонунчиликда белгиланган тартибда ташкил этилган таълим сифатини баҳолаш бўйича ташкилот томонидан амалга оширилсин.
(2-банднинг бешинчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
(21-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарорига асосан ўз кучини йўқотган — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
3. Умумтаълим фанларини билиш даражасини аниқлаш ва давлат намунасидаги сертификатни бериш учун тузиладиган тест саволлари давлат таълим стандарларига мос равишда ҳамда таълим ўқув дастурига мувофиқ Агентлик томонидан ишлаб чиқилади.
(3-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
4. Қуйидагилар:
умумтаълим фанларидан билиш даражасини баҳолаш бўйича тест синовини ташкил этиш ҳамда унинг натижалари бўйича давлат намунасидаги сертификатни бериш тартиб-таомилларини белгиловчи Умумтаълим фанларидан билиш даражасини аниқлаш ва сертификат бериш тартиби тўғрисидаги низом 1-иловага мувофиқ;
Умумтаълим фанини билиш даражаси тўғрисидаги сертификатнинг давлат намунаси 2-иловага мувофиқ тасдиқлансин.
5. Ўзбекистон Республикаси Халқ таълими вазирлиги Олий ва ўрта махсус таълим вазирлиги, Адлия вазирлиги, Ёшлар ишлари агентлиги, Вазирлар Маҳкамаси ҳузуридаги Таълим сифатини назорат қилиш инспекцияси билан биргаликда таълим сифатини баҳолаш бўйича фаолият юритадиган халқаро таълим ташкилотларини жалб қилган ҳолда умумий ўрта таълим ташкилотларида ўқитиш сифатини баҳолашга муқобил шаклларни татбиқ этиш мақсадида «Билим ва кўникмаларни баҳолаш маркази» нодавлат таълим ташкилотини ташкил қилиш юзасидан бир ой муддатда Вазирлар Маҳкамасига таклиф киритсин.
Бунда «Билим ва кўникмаларни баҳолаш маркази» нодавлат таълим ташкилотининг асосий фаолият йўналишлари этиб қуйидагилар белгилансин:
халқаро эътироф этилган таълим сифатини баҳолаш методикасидан келиб чиққан ҳолда умумтаълим мактабларида таълим сифатини баҳолашнинг замонавий усулларини ишлаб чиқиш;
умумий ўрта таълимда берилаётган билим ва кўникмалар сифатини тизимли баҳолаш учун назорат ишлари материалларини ишлаб чиқиш;
таълим сифатини баҳолаш бўйича дастурий маҳсулот ишлаб чиқиш;
Ўзбекистон Республикаси таълим соҳасидаги ваколатли давлат бошқаруви органлари ҳамда нодавлат таълим ташкилотлари ва муассасалари буюртмасига кўра саралаш, қабул қилиш ва якуний имтиҳонларни ўтказиш;
таълим муассасаларида педагогик фаолият олиб бориш ҳуқуқини берувчи таълим лицензиялари ва сертификатларини жорий этиш.
6. Ўзбекистон Республикаси Ҳукуматининг айрим қарорларига 3-иловага мувофиқ ўзгартиришлар ва қўшимча киритилсин.
7. Ўзбекистон Республикаси Вазирлар Маҳкамаси ҳузуридаги Давлат тест маркази манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 12 октябрь,
646-сон
Вазирлар Маҳкамасининг 2020 йил 12 октябрдаги 646-сон қарорига
1-ИЛОВА
1-ИЛОВА
Умумтаълим фанларини билиш даражасини аниқлаш ва сертификат бериш тартиби тўғрисида
НИЗОМ
1-боб. Умумий қоидалар
1. Ушбу Низом умумтаълим фанларини билиш даражасини аниқлаш ва давлат намунасидаги сертификатни бериш тартибини белгилайди.
Олдинги таҳрирга қаранг.
2. Умумтаълим фанларини билиш даражасини аниқлаш ва давлат намунасидаги сертификатни (кейинги ўринларда — сертификат) бериш Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги (кейинги ўринларда — Агентлик) томонидан тўлов асосида амалга оширилади, сертификат электрон шаклда берилади.
Сертификат бериш учун талабгордан ариза берилган кундаги базавий ҳисоблаш миқдорининг 1,5 баравари миқдорида тўлов ундирилади.
Умумтаълим фанларини билиш даражасини аниқлаш бўйича А+, А, B+, B, C+, C, даражали сертификатлар берилади.
Тест натижалари халқаро методика — Раш модели асосида ҳисобланади. Унга кўра:
70 баллдан юқори балл олган талабгорга А+ даража;
65 — 69,9 балл олган талабгорга А даража;
60 — 64,9 балл олган талабгорга B+ даража;
55 — 59,9 балл олган талабгорга B даража;
50 — 54,9 балл олган талабгорга C+ даража;
46 — 49,9 балл олган талабгорга C даражали сертификат берилади.
Сертификат 3 йил муддатга берилади. Бунда:
А+, А даражали сертификат олган абитуриентларга олий таълим муассасаси бакалавриатига ўқишга қабул қилиш бўйича тест синовларида ушбу фандан белгиланган максимал балл берилади;
B+, B, C+, C, даражали сертификат олган абитуриентларга мос равишда сертификатдаги умумий баллга нисбатан фоиз асосида олий таълим муассасаси бакалавриатига ўқишга қабул қилиш бўйича тест синовларида ушбу фандан белгиланган максимал баллга нисбатан табақалаштирилган (пропорционал) балл берилади.
Миллий сертификатга эга бўлган абитуриентга тегишли мажбурий фанлар бўйича белгиланган энг юқори балл берилади.
(2-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
3. Чет тилини билиш даражасини баҳолаш ва малака сертификатини бериш Вазирлар Маҳкамасининг 2022 йил 16 февралдаги 73-сон қарори билан тасдиқланган Чет тилини билиш даражасини аниқлаш бўйича давлат хизматлари кўрсатишнинг маъмурий регламентига мувофиқ амалга оширилади.
(3-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
4. Умумтаълим фанларини билиш даражаси Ўзбекистон Республикаси узлуксиз таълим тизимининг давлат таълим стандартларига мувофиқ шакллантириладиган педагогик ўлчов воситалари асосида тест синовлари ёрдамида баҳоланади.
Олдинги таҳрирга қаранг.
Умумтаълим фанларини билиш даражасини аниқлаш ва давлат намунасидаги сертификатни бериш учун тузиладиган тест саволлари давлат таълим стандарларига мос равишда ҳамда таълим ўқув дастурига мувофиқ Агентлик томонидан ишлаб чиқилади.
(4-банднинг иккинчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Тест синовлари абитуриентларнинг тайёргарлик даражасини тизимли ва асосли баҳолаш учун яратилган, турли шакл ва қийинлик даражасидаги параллел топшириқлар тизимини назарда тутади.
2-боб. Умумтаълим фанларини билиш даражасини аниқлаш бўйича тест синовини ташкил этиш тартиби
Олдинги таҳрирга қаранг.
5. Умумтаълим фанлари бўйича тест топшириқлари формати (фан мазмуни таркиби, саволлар сони, топшириқлар тури, вақт меъёри), баҳолаш мезонлари, тест синовининг ўтказилиши муддатлари, шунингдек, талабгор томонидан тўлдириладиган ариза шакли Агентлик томонидан тасдиқланади ва унинг расмий веб-сайтига жойлаштирилади.
(5-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
6. Талабгор сертификат олиш мақсадида тест синовида қатнашиш учун Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали электрон шаклда ариза бериб рўйхатдан ўтади.
(6-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
7. Талабгор мустақил равишда ушбу Низомга 1-иловага мувофиқ шаклдаги сўровномани ЯИДХП орқали электрон равишда тўлдиради. Талабгордан сўровномани электрон рақамли имзо билан тасдиқлаш талаб этилмайди.
Талабгорга сўровнома расмийлаштирилганидан сўнг ваколатли орган томонидан ЯИДХП орқали тест синовидан ўтиш қоидалари тўғрисидаги эслатма берилади.
Талабгорнинг сўровномасида унинг электрон манзили кўрсатилиши мумкин. Сўровномада талабгор электрон манзилининг кўрсатилгани унинг сўровнома бўйича қабул қилинган қарор, тест синови натижалари юзасидан апелляция хулосаси ҳақида ахборот тизими орқали хабарнома олишга розилигини англатади.
Талабгордан сўровномадаги ҳужжатлардан бошқа қўшимча ҳужжатлар талаб этилмайди.
Талабгор ҳақидаги маълумотларнинг тўғрилигига талабгорнинг ўзи шахсан жавобгар ҳисобланади.
Олдинги таҳрирга қаранг.
Тест синовини ўтказиш санаси у ўтказиладиган кундан камида уч кун олдин ЯИДХП орқали эълон қилинади.
(7-банднинг олтинчи хатбошиси Ўзбекистон Республикаси Вазирлар Маҳкамасининг 2026 йил 29 июлдаги 411-сонли қарори таҳририда — Қонунчилик маълумотлари миллий базаси, 30.07.2026 й., 09/26/411/0797-сон)
Талабгор тест синови ўтказиладиган сана ва жой тўғрисидаги маълумотга ЯИДХП орқали эга бўлади.
Фуқаролиги бўлмаган шахслар ва чет эл фуқаролари Адлия вазирлиги томонидан вақтинча рўйхатга олинади ҳамда улар ЖШШИР рақами шакллантирилади.
Бунда 16 ёшга тўлмаган шахслар ID-карта ёки хорижга чиқиш паспорти орқали рўйхатга олинади.
(7-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
8. Агентлик томонидан талабгор тўғрисидаги шахсга доир маълумотлар махфийлиги таъминланади. Қонунчилик ҳужжатларида белгиланган тартибда ҳуқуқни муҳофаза қилувчи органлар ва суд томонидан расмий мурожаат бўлган тақдирда, ариза берувчилар тўғрисидаги маълумотлар тақдим этилади.
(8-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
9. Тест синовини ўтказиш жойи, муайян ҳудуд бўйича ўтириш ўринлари сони ва санаси Агентлик томонидан белгиланади ҳамда Агентликнинг расмий веб-сайти ва ЯИДХП орқали эълон қилинади.
Бунда талабгорлар муайян ҳудуд бўйича ўтириш ўринлари сонига мувофиқ ЯИДХП орқали рўйхатга олинади.
(9-банд Ўзбекистон Республикаси Вазирлар Маҳкамасининг 2026 йил 29 июлдаги 411-сонли қарори таҳририда — Қонунчилик маълумотлари миллий базаси, 30.07.2026 й., 09/26/411/0797-сон)
Олдинги таҳрирга қаранг.
10. Талабгорнинг тест синовида белгиланган ўтириш ўрни Агентлик томонидан қуръа ташлаш йўли билан аниқланади ва далолатнома расмийлаштирилади.
(10-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
11. Тест синови бланкаларда ёки компьютер (онлайн платформа)да ўтказилиши мумкин. Тест синови Агентлик томонидан тасдиқланган имтиҳон комиссияси аъзолари ва кузатувчилар иштирокида ўтказилади.
(11-банднинг биринчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Имтиҳон комиссияси ёзма ёки оғзаки тест синовлари белгиланганда шакллантирилади.
Олдинги таҳрирга қаранг.
Имтиҳон комиссияси таркиби Агентлик директорининг буйруғи билан тасдиқланади, унга Агентлик ходимлари ва тажрибали педагоглар, малакали мутахассислар киритилади.
(11-банднинг учинчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Тест синови тегишли дастурий таъминот асосида компьютерда ўтказилганда билимни баҳолашнинг барча бўлимлари қамраб олинган ҳолда бир босқичда амалга оширилади.
Олдинги таҳрирга қаранг.
12. Тест синови Агентлик масъул ходимининг раҳбарлигида ва кузатувида ўтказилади.
(12-банднинг биринчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
Тест синовлари махсус жиҳозланган, видеокузатув билан таъминланган ҳолда Агентлик вакилининг назорати остида онлайн ўтказилиши мумкин.
(12-банднинг иккинчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Тест синови вақтида ҳар бир иш жойида бир нафар талабгор ўтиради. Тест синовини ўтказиш жараёни доимий видеотасвирга олинади.
13. Тест синовини ўтказиш учун кузатувчилар жалб этилиши мумкин.
14. Тест синовига жалб этилган имтиҳон комиссияси аъзолари ва кузатувчилар билан шартнома тузилади.
15. Талабгор шахсини тасдиқловчи ҳужжат асосида видео қайд этиш қурилмалари орқали текширишдан ўтгач тест синовига қўйилади.
Олдинги таҳрирга қаранг.
16. Талабгор қуйидаги ҳолатларда далолатнома асосида тест синови жараёнидан четлаштирилади ва унинг натижалари ҳисобланмайди:
тест синови ўтказиладиган ҳудудга ёки бинога калькулятор, луғат, жадвал, китоб, уяли телефон, компьютер, телекоммуникация қурилмалари ва бошқа воситалар, шпаргалкалар, қоғоз, буюм, кийимларга ёзилган маълумотларни олиб киришга ҳаракат қилса, олиб кирган бўлса ёки улардан тест синовлари давомида фойдаланса;
тест материалларига шикаст етказса, тест материалларини бошқа талабгорга узатса, тарқатса, бинодан ташқарига олиб чиқса ёки олиб чиқишга уринса;
бошқа талабгор билан мулоқот қилса, ёрдам берса ёки ёрдам беришга ҳаракат қилса;
тест синовлари учун ажратилган вақт тугагандан сўнг тест материалларини топширишдан бош тортса;
тест синовлари жараёнида видеокузатувлар орқали талабгорнинг тартиб ва қоидаларга амал қилмагани аниқланса.
(16-банд Ўзбекистон Республикаси Вазирлар Маҳкамасининг 2026 йил 29 июлдаги 411-сонли қарори таҳририда — Қонунчилик маълумотлари миллий базаси, 30.07.2026 й., 09/26/411/0797-сон)
Олдинги таҳрирга қаранг.
17. Тест синовлари натижалари улар якунланган кундан бошлаб йигирма бир иш кунидан кечикмай, Агентликнинг расмий веб-сайтида ҳамда ЯИДХП орқали эълон қилинади.
(17-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
171. Тест синовлари натижалари бўйича тестология меъёрларининг бузилиш ҳолати аниқланса, Агентлик томонидан тест синови натижалари бекор қилинади.
Қуйидаги ҳолатларда тестология меъёрлари бузилган деб ҳисобланади:
тест материаллари хавфсизлиги ва махфийлигини таъминлаш қоидалари бузилса;
талабгорлар томонидан тест материалларини олдиндан қўлга киритиш ҳолати аниқланса;
тест синови натижалари таҳлилига кўра тақсимот нормал тақсимотдан кескин фарқ қилса.
Бунда мазкур банднинг бешинчи хатбошисида кўрсатилган ҳолат фақат айрим ҳудудларда аниқланган тақдирда, ушбу ҳудудлардаги тест синовлари натижалари бекор қилинади.
Тест синови натижалари мазкур бандга мувофиқ бекор қилинган ҳолатларда, талабгорларнинг хоҳишига кўра амалга оширилган тўлов миқдори қайтарилади ёки қайта тест синовлари ташкил этилади.
(171-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарорига асосан киритилган — Қонунчилик маълумотлари миллий базаси, 12.01.2024 й., 09/24/17/0019-сон)
3-боб. Тўлов шартлари
Олдинги таҳрирга қаранг.
18. Давлат хизмати кўрсатилиши учун рўйхатдан ЯИДХП орқали ўтилганлиги сабабли талабгордан белгиланган тўлов миқдорининг 90 фоизи ундирилади.
Олдинги таҳрирга қаранг.
Ижтимоий реестрнинг «камбағал оила» тоифасига киритилган оилаларнинг аъзоларига, I ва II гуруҳ ногиронлиги бўлган шахслар ҳамда ногиронлиги бўлган болаларга мазкур давлат хизматини кўрсатишда белгиланган тўловнинг 50 фоизи миқдорида, Ижтимоий реестрнинг «давлат таъминотидаги оила» тоифасига киритилган оилаларнинг аъзоларига белгиланган йиғимнинг 75 фоизи миқдорида чегирма қўлланилади. Бунда чегирма Ижтимоий реестрнинг:
«давлат таъминотидаги оила» ёки «камбағал оила» тоифасидан «камбағаллик чегарасидаги оила» тоифасига ўтказилган оилаларга, уларнинг илгари белгиланган тоифасига мувофиқ миқдорда;
оғир ҳаётий вазиятга тушган оила сифатида «камбағаллик чегарасидаги оила» тоифасига киритилган оилаларга «камбағал оила» тоифасидаги оила учун белгиланган миқдорда қўлланилади.
(18-банднинг иккинчи хатбошиси Ўзбекистон Республикаси Вазирлар Маҳкамасининг 2026 йил 29 январдаги 35-сонли қарорига асосан иккинчи — тўртинчи хатбошилар билан алмаштирилган — Қонунчилик маълумотлари миллий базаси, 02.02.2026 й., 09/26/35/0101-сон)
Давлат хизматларини кўрсатиш учун тўлов амалга оширилганлиги Ягона биллинг тизими орқали тасдиқланади.
Тўлов суммаси қуйидаги тартибда тақсимланади:
11,75 фоизи — «Рақамли ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитаси махсус ҳисобварағига (шу жумладан, 0,5 фоизи тўлов амалга оширилганлиги Ягона биллинг тизими орқали тасдиқланганлиги учун);
қолган маблағлар — Билим ва малакаларни баҳолаш агентлигини ривожлантириш жамғармаси ҳисобварағига ўтказилади.
Талабгор тўловни ЯИДХП орқали шакллантирилган инвойс рақами орқали амалга оширади.
(18-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
181. Таълим ташкилотида қонунчилик ҳужжатларига мувофиқ тузилган меҳнат шартномаси асосида таълим ва тарбия соҳасида касбий фаолиятни амалга оширувчи педагог шахслардан белгиланган тўлов суммасининг 50 фоизи ундирилади.
(181-банд Ўзбекистон Республикаси Вазирлар Маҳкамасининг 2026 йил 16 апрелдаги 175-сонли қарорига асосан киритилган — Қонунчилик маълумотлари миллий базаси, 17.04.2026 й., 09/26/175/0373-сон)
Олдинги таҳрирга қаранг.
19. Агар ариза берувчи турли сабабларга кўра тест синовларида иштирок эта олмайдиган бўлса, Агентликка тест синовлари ўтказиладиган кундан камида уч кун олдин ЯИДХП орқали электрон шаклда мурожаат этиши лозим.
Узрли сабабга кўра (касаллиги ёки оила аъзоларининг вафот этганлигини тасдиқловчи ҳужжатни тақдим этганда) тест синовларида қатнаша олмаган талабгор тест синови ўтказилган санадан беш иш кунидан кечикмай, ушбу ҳолатни тасдиқловчи ҳужжатларни ЯИДХП орқали Агентликка электрон шаклда тақдим этиши ва уни навбатдаги имтиҳонга киритиш ёки тўловни қайтариш бўйича мурожаат этиши лозим.
Узрли сабабга кўра тест синовларида иштирок эта олмагани бўйича аризалар етти иш кунида кўриб чиқилади. Тест синови учун ариза бериш жараёнида тўлов тўлиқ амалга оширилмаган тақдирда, тўловни қайтариш бўйича аризалар тўлов тўлиқ амалга оширилгандан сўнг, белгиланган тартибда кўриб чиқилади.
Тўловни қайтариш сўралган тақдирда, Билим ва малакаларни баҳолаш агентлигини ривожлантириш жамғармаси ҳисобварағига ҳамда Рақамли технологияларни ривожлантириш жамғармасининг Электрон ҳукумат ва рақамли иқтисодиётнинг идоралараро лойиҳаларини молиялаштириш бўйича махсус ҳисобварағига келиб тушган тўлов миқдори ваколатли орган хулосаси асосида Адлия вазирлиги томонидан тўлиқ қайтарилади. Бунда Агентлик ва Адлия вазирлиги ўртасида хулоса алмашинуви электрон тарзда амалга оширилади.
Навбатдаги тест синовида қатнашиш сўралган тақдирда, ваколатли орган томонидан узрли сабабга кўра тест синовида иштирок эта олмаган талабгорга тўловни амалга оширмасдан навбатдаги тест синовида қатнашиш имконияти яратилади.
Талабгор тўловни қайтариш ёки навбатдаги тест синовида қатнашиш бўйича ушбу Низомга 2-иловага мувофиқ шаклдаги сўровномани ЯИДХП орқали электрон тарзда тўлдиради.
(19-банд Ўзбекистон Республикаси Вазирлар Маҳкамасининг 2026 йил 29 июлдаги 411-сонли қарори таҳририда — Қонунчилик маълумотлари миллий базаси, 30.07.2026 й., 09/26/411/0797-сон)
Олдинги таҳрирга қаранг.
20. Талабгор тест синовига кечиккан ёки сабабсиз келмаган ҳолларда, талабгор томонидан амалга оширилган тўлов қайтарилмайди.
(20-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
21. Тест синови ўтказилиши жараёнида талабгор бир вақтда фақат битта умумтаълим фанидан тест топширишига рухсат этилади.
4-боб. Апелляцияларни кўриб чиқиш тартиби
Олдинги таҳрирга қаранг.
22. Тест синовидан ўта олмаган талабгор тест синови натижалари эълон қилинган кундан бошлаб беш иш куни мобайнида ЯИДХП орқали Агентликка апелляция шикояти бериш ҳуқуқига эга.
Талабгор апелляция шикояти бериш учун ушбу Низомга 3-иловага мувофиқ шаклдаги сўровномани ЯИДХП орқали электрон тарзда тўлдиради.
(20-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
23. Апелляцияни кўриб чиқиш учун Агентлик директорининг буйруғи билан 5 ёки 7 нафар Агентлик ходимлари ва таълим тизими педагогларидан иборат бўлган Апелляция комиссияси тузилади.
(23-банднинг биринчи хатбошиси Ўзбекистон Республикаси Вазирлар Маҳкамасининг 2026 йил 29 июлдаги 411-сонли қарори таҳририда — Қонунчилик маълумотлари миллий базаси, 30.07.2026 й., 09/26/411/0797-сон)
Апелляция комиссияси таркибига Имтихон комиссияси аъзолари киритилмайди.
Апелляция икки ҳафта мобайнида кўриб чиқилади. Талабгор Апелляция комиссияси қарори тўғрисида ёзма ёки электрон шаклда хабардор қилинади.
24. Апелляцияни кўриб чиқиш натижалари бўйича қуйидаги қарорлардан бири қабул қилинади:
тест синови натижаларини ўзгаришсиз қолдириш ва апелляциянинг қаноатлантирилишини рад этиш;
тест синовлари натижаларини ўзгартириш ва апелляцияни қаноатлантириш.
Агар талабгор томонидан кўрсатилган далиллар тасдиқланмаса, апелляциянинг қаноатлантирилишини рад этиш тўғрисида қарор қабул қилинади.
Агар талабгор томонидан кўрсатилган далиллар асосли деб топилса, апелляция комиссияси қарори билан тест натижалари ўзгартирилади.
Апелляция комиссиясининг қарорлари ушбу Низомга 2-иловага мувофиқ шаклда расмийлаштирилади.
25. Такрорий апелляцияга йўл қўйилмайди.
Олдинги таҳрирга қаранг.
Талабгор Апелляция комиссиясининг қарори юзасидан қонунчилик ҳужжатларида белгиланган тартибда судга шикоят қилиши мумкин.
(25-банднинг иккинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
5-боб. Умумтаълим фанларини билиш даражасини баҳолашнинг давлат намунасидаги сертификатини бериш тартиби
Олдинги таҳрирга қаранг.
26. Сертификат тест синовидан ижобий натижага эришган талабгорга тест синови натижалари эълон қилинган кундан бошлаб бир ҳафта мобайнида Агентлик директорининг буйруғи асосида электрон шаклда берилади. Талабгор сертификатни шахсий кабинети орқали юклаб олиши мумкин.
(26-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
27. Сертификатлар реестри Агентлик томонидан юритилади.
(27-банднинг биринчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Сертификатлар реестрида қуйидагилар кўрсатилиши лозим:
талабгорнинг фамилияси, исми, отасининг исми;
паспорт маълумотлари (серияси ва тартиб рақами, паспортнинг ким томонидан ва қачон берилганлиги) ёки туғилганлик тўғрисидаги гувоҳнома маълумотлари (тартиб рақами, гувоҳноманинг ким томонидан ва қачон берилганлиги);
Олдинги таҳрирга қаранг.
Агентликнинг сертификат бериш тўғрисидаги буйруғининг санаси ва тартиб рақами;
(27-банднинг бешинчи хатбошиси Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
сертификатнинг ҳисобга олиш серияси ва тартиб рақами;
сертификатнинг берилган санаси;
сертификатнинг амал қилиш муддати.
Олдинги таҳрирга қаранг.
Амал қилиш муддати тугашига 10 кун қолган сертификат эгаларига ЯИДХПдаги шахсий кабинети орқали хабарнома ҳамда Агентликнинг тегишли ахборот тизими орқали талабгор рўйхатдан ўтишда киритган телефон рақамига бепул «SMS-хабарнома» юборилади.
(27-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарорига асосан тўққизинчи хатбоши билан тўлдирилган — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
28. Сертификатнинг ҳақиқийлиги тўғрисидаги маълумотларни Агентликнинг расмий веб-сайти орқали текшириш имконияти яратилади.
(28-банд Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
6-боб. Якунловчи қоидалар
Олдинги таҳрирга қаранг.
29. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.
(29-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
Олдинги таҳрирга қаранг.
30. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
(30-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
Олдинги таҳрирга қаранг.
Умумтаълим фанларини билиш даражасини аниқлаш ва сертификат бериш тартиби тўғрисидаги низомга
1-ИЛОВА
1-ИЛОВА
Умумтаълим фанларини билиш даражасини аниқлаш ва сертификат бериш бўйича давлат хизматларидан фойдаланиш учун
СЎРОВНОМА
Олдинги таҳрирга қаранг.
__________________ (санаси) | ________________ (рақами) |
1. Ф.И.О.: | |
2. Паспорт (туғилганлик тўғрисида гувоҳнома, идентификацияловчи ID-картаси) маълумотлари (серияси ва рақами, жисмоний шахснинг шахсий идентификация рақами, агар мавжуд бўлса): | |
3. Доимий яшаш манзили (вилоят, шаҳар/туман, кўча, уй): | |
4. Телефон рақами: | |
5. Электрон почта манзили (e-mail): | |
6. Қонунчилик ҳужжатларида белгиланган чегирма қўлланилиш ҳуқуқига эгалиги (Ижтимоий реестрга киритилган оилалар аъзолари, I ва II гуруҳ ногиронлиги бўлган шахслар): | Ҳа/Йўқ |
7. Имтиҳонни топшириш ҳудуди: | |
8. Имтиҳонни топшириш фани: | |
9. Имтиҳонни топшириш тили: |
(1-илова Ўзбекистон Республикаси Вазирлар Маҳкамасининг 2026 йил 29 январдаги 35-сонли қарори таҳририда — Қонунчилик маълумотлари миллий базаси, 02.02.2026 й., 09/26/35/0101-сон)
Олдинги таҳрирга қаранг.
Умумтаълим фанларини билиш даражасини аниқлаш ва сертификат бериш тартиби тўғрисидаги низомга
2-ИЛОВА
Тўловни қайтариш бўйича
СЎРОВНОМА
|
__________________ (санаси) |
____________ (рақами) |
|
1. Ф.И.О.: |
|
|
2. Паспорт (туғилганлик тўғрисида гувоҳнома, идентификацияловчи ID-картаси) маълумотлари (серияси ва рақами, жисмоний шахснинг шахсий идентификация рақами, агар мавжуд бўлса): |
|
|
3. Доимий яшаш манзили (вилоят, шаҳар/туман, кўча, уй): |
|
|
4. Телефон рақами: |
|
|
5. Электрон почта манзили (e-mail): |
|
|
6. Имтиҳон санаси: |
|
|
7. Имтиҳонни топшириш фани: |
|
|
8. Узрли сабабга кўра (касаллиги ёки оила аъзоларининг вафот этганлигини тасдиқловчи ҳужжатни тақдим этганда) тест синовларида қатнаша олмаган талабгорнинг ушбу ҳолатни асословчи ҳужжатлари: |
(2-илова Ўзбекистон Республикаси Вазирлар Маҳкамасининг 2024 йил 10 январдаги 17-сонли қарори таҳририда — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
Умумтаълим фанларини билиш даражасини аниқлаш ва сертификат бериш тартиби тўғрисидаги низомга
3-ИЛОВА
Имтиҳон натижалари юзасидан апелляция шикоятини бериш учун
СЎРОВНОМА
|
__________________ (санаси) |
_____________ (рақами) |
|
1. Ф.И.О.: |
|
|
2. Паспорт (туғилганлик тўғрисида гувоҳнома, идентификацияловчи ID-картаси) маълумотлари (серияси ва рақами, жисмоний шахснинг шахсий идентификация рақами, агар мавжуд бўлса): |
|
|
3. Доимий яшаш манзили (вилоят, шаҳар/туман, кўча, уй): |
|
|
4. Телефон рақами: |
|
|
5. Электрон почта манзили (e-mail): |
|
|
6. Имтиҳон санаси: |
|
|
7. Имтиҳонни топшириш фани: |
|
|
8. Шикоятнинг қисқача мазмуни: |
|
(3-илова Ўзбекистон Республикаси Вазирлар Маҳкамасининг 2024 йил 10 январдаги 17-сонли қарорига асосан киритилган — Қонунчилик маълумотлари миллий базаси, 12.01.2024 й., 09/24/17/0019-сон)
Олдинги таҳрирга қаранг.
Вазирлар Маҳкамасининг 2020 йил 12 октябрдаги 646-сон қарорига
2-ИЛОВА
2-ИЛОВА
Олдинги таҳрирга қаранг.
(2-илова Ўзбекистон Республикаси Вазирлар Маҳкамасининг 2025 йил 30 декабрдаги 840-сонли қарори таҳририда — Қонунчилик маълумотлари миллий базаси, 06.01.2026 й., 09/26/840/0012-сон)
Вазирлар Маҳкамасининг 2020 йил 12 октябрдаги 646-сон қарорига
3-ИЛОВА
3-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартиришлар ва қўшимча
Олдинги таҳрирга қаранг.
(1-банд Ўзбекистон Республикаси Вазирлар Маҳкамасининг 2025 йил 13 сентябрдаги 578-сонли қарорига асосан ўз кучини йўқотган — Қонунчилик маълумотлари миллий базаси, 15.09.2025 й., 09/25/578/0826-сон)
Олдинги таҳрирга қаранг.
(2-банд Ўзбекистон Республикаси Вазирлар Маҳкамасининг 2025 йил 30 декабрдаги 840-сонли қарорига асосан ўз кучини йўқотган — Қонунчилик маълумотлари миллий базаси, 06.01.2026 й., 09/26/840/0012-сон)
3. Вазирлар Маҳкамасининг 2018 йил 3 апрелдаги 261-сон қарори билан тасдиқланган Ўзбекистон Республикаси олий таълим муассасаларининг бакалавриатига ўқишга қабул қилиш учун кириш тест синовларини ўтказиш тартиби тўғрисидаги низомнинг 24-банди еттинчи хатбошиси қуйидаги таҳрирда баён қилинсин:
«махсус дастур орқали базага махсус код, қайд рақами, таълим тури, таълим муассасасининг номи, абитуриентнинг фуқаролиги, фамилияси, исми, отасининг исми, миллати, жинси, паспорт серияси ва рақами, яшаш жойи, туғилган йили ва жойи, ижтимоий келиб чиқиши, таълим олган таълим муассасаси тури, рақами ва номи, манзили ҳамда уни тугатган йили, диплом (шаҳодатнома ёки унинг ўрнини босувчи ҳужжат) рақами, белгиланган тартибда берилган имтиёзлари ҳақида маълумот (агар ушбу имтиёзлар бўйича ҳужжатлар мавжуд бўлса) ҳамда тўлиқ давлат таъминотидаги етим болалар ва кўзи ожизлар тоифасига кирувчи шахс тўғрисидаги маълумот, ўқитиш тили, ихтисослиги, чет тили ва уни топшириш усулини киритиш».
(Қонун ҳужжатлари маълумотлари миллий базаси, 13.10.2020 й., 09/20/646/1382-сон; Қонунчилик маълумотлари миллий базаси, 16.10.2021 й., 09/21/646/0963-сон; 05.04.2022 й., 09/22/153/0266-сон; 03.08.2022 й., 09/22/425/0712-сон; 12.01.2024 й., 09/24/17/0019-сон; 08.10.2024 й., 09/24/640/0791-сон; 19.06.2025 й., 09/25/378/0518-сон; 15.09.2025 й., 09/25/578/0826-сон; 06.01.2026 й., 09/26/840/0012-сон; 02.02.2026 й., 09/26/35/0101-сон; 17.04.2026 й., 09/26/175/0373-сон; 30.07.2026 й., 09/26/411/0797-сон)
