Ўзбекистон Республикаси Президентининг 2019 йил 21 майдаги ПФ-5723-сон «Меҳнатга ҳақ тўлаш, пенсиялар ва бошқа тўловлар миқдорларини аниқлаш тартибини такомиллаштириш тўғрисида»ги, 2017 йил 1 декабрдаги ПФ-5270-сон «Ногиронлиги бўлган шахсларни давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида»ги фармонлари, 2019 йил 5 мартдаги ПҚ-4227-сон «2019 йилда аҳоли бандлигини таъминлаш ва янги иш ўринларини ташкил этиш бўйича давлат буюртмаси тўғрисида»ги ва 2019 йил 11 декабрдаги ПҚ-4549-сон «Мева-сабзавотчилик ва узумчилик тармоғини янада ривожлантириш, соҳада қўшилган қиймат занжирини яратишга доир қўшимча чора-тадбирлар тўғрисида»ги қарорларига мувофиқ буюраман:

1. Ўзбекистон Республикаси бандлик ва меҳнат муносабатлари вазирининг 2019 йил 10 майдаги 19-2019-Б-сон буйруғи (рўйхат рақами 3163, 2019 йил 31 май) (Қонун ҳужжатлари маълумотлари миллий базаси, 31.05.2019 й., 10/19/3163/3221-сон) билан тасдиқланган Ўзбекистон Республикаси Бандликка кўмаклашиш давлат жамғармаси маблағлари ҳисобидан субсидия ва грантлар ажратиш тартиби тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур буйруқ расмий эълон қилинган кундан эътиборан кучга киради.

1. 2-бандда:

иккинчи — бешинчи хатбошилардаги «энг кам ойлик иш ҳақининг» деган сўзлар «базавий ҳисоблаш миқдорининг» деган сўзлар билан алмаштирилсин;

қуйидаги мазмундаги бешинчи хатбоши билан тўлдирилсин:

«кам таъминланган оилалар бандлигини таъминлаш мақсадида ташкил этиладиган қишлоқ хўжалиги бирлашмалари устав фондига (жамғармасига) улуш сифатида киритиш учун — ҳар бир аъзога (оилага) базавий ҳисоблаш миқдорининг 10 баравари миқдорида тўлаш;»;

бешинчи хатбоши олтинчи хатбоши деб ҳисоблансин.

2. 11-банддаги «энг кам ойлик ҳақининг» деган сўзлар «базавий ҳисоблаш миқдорининг» деган сўзлар билан алмаштирилсин.

3. 15-банднинг биринчи хатбошиси, 16, 17, 25, 26, 31, 32 ва 40-бандлардаги ҳамда илованинг 2-бандидаги «энг кам ойлик иш ҳақининг» деган сўзлар «базавий ҳисоблаш миқдорининг» деган сўзлар билан алмаштирилсин.

4. 27-бандда:

иккинчи хатбошидаги «ногирон болалари бўлган» деган сўзлар «ногиронлиги бўлган болалари бор» деган сўзлар билан алмаштирилсин;

бешинчи хатбошидаги «ногиронлар» деган сўз «ногиронлиги бўлган» деган сўзлар билан алмаштирилсин.

5. Қуйидаги мазмундаги 5¹-боб билан тўлдирилсин:

40¹. Кам таъминланган оилалар бандлигини таъминлаш мақсадида бирлашма ташкил этмоқчи бўлган муассис (бундан буён матнда муассис деб юритилади) бирлашма устав фондига (жамғармасига) улуш сифатида киритиш учун — ҳар бир аъзога (оилага) субсидия олиш учун ҳудуддаги АБКМга ёзма равишда мурожаат қилади.

Муассис томонидан мурожаатга бирлашмага ихтиёрий аъзо бўлувчиларнинг (оила бошлиғи) Ф.И.О. кўрсатилган рўйхати ҳамда қишлоқ хўжалиги маҳсулотларини етиштириш учун муассис ва оила ўртасида тузилган пудрат шартномалари нусхалари илова қилиниши керак.

40². Мазкур Низомнинг 40¹-банди иккинчи хатбошисида назарда тутилган маълумотлар тўлиқ топширилгандан сўнг АБКМнинг масъул ходими муассиснинг мурожаатини 5 иш куни ичида ўрганиб чиқади ва ўрганиш натижалари бўйича бирлашмага ихтиёрий аъзо бўлувчиларга субсидия ажратиш учун АБКМ раҳбарига таклиф киритади. Бунда, масъул ходим оилани кам таъминланганлигига эътибор қаратиши лозим.

40³. АБКМ раҳбари бирлашмага ихтиёрий аъзо бўлувчиларнинг бирлашма устав фондидаги улушини шакллантириш учун 2 иш кунида субсидия ажратиш тўғрисидаги буйруқни расмийлаштиради ва почта орқали муассисга юборади. Буйруқда субсидия олувчилар Ф.И.О., субсидия миқдори кўрсатилиши зарур.

40⁴. АБКМнинг масъул ходими муассис тақдим этган ҳужжатлар мазкур Низомнинг 40¹-бандининг иккинчи хатбошисига мувофиқ бўлмаганда ёхуд ўрганиш натижаси бўйича муассиснинг мурожаатида кўрсатилган оила кам таъминланган оила бўлмаган ҳолларда 1 иш кунида субсидия ажратишни рад этиш тўғрисида муассисга рад этишнинг сабаблари асослантирилган ҳолда ёзма равишда хат юборади.

40⁵. АБКМнинг субсидия ажратиш тўғрисидаги буйруғининг нусхасини олган муассис белгиланган тартибда бирлашма ташкил этади.

40⁶. Муассис белгиланган тартибда бирлашма ташкил этганидан сўнг, АБКМга ёзма равишда давлат хизматлари марказида рўйхатга олинган бирлашманинг аъзолари улуши кўрсатилган устав, бирлашманинг асосий реквизитлари, аъзоларнинг мулкий пайи тўғрисидаги гувоҳнома нусхаларини тақдим этади.

40⁷. АБКМ 2 иш куни муддатида бирлашма устав фондига ҳар бир оила бошлиғининг улуши сифатида киритиш учун бирлашманинг банкдаги ҳисоб рақамига базавий ҳисоблаш миқдорининг 10 баравари миқдорида субсидия ажратади ҳамда бирлашма раиси (муассис) ва оила бошлиғи ёзма равишда хабардор қилинади.

40⁸. Қишлоқ хўжалиги бирлашмалари устав фондига (жамғармасига) улуш сифатида киритиш учун субсидия битта оилага фақат бир маротаба ажратилади.».

6. Мазкур ўзгартириш ва қўшимчалар Ўзбекистон Республикаси Иқтисодиёт ва саноат вазирлиги ҳамда Молия вазирлиги билан келишилган.