ЎЗБЕКИСТОН РЕСПУБЛИКАСИ ПРЕЗИДЕНТИНИНГ
Қарори
«Ягона миллий меҳнат тизими» идоралараро дастурий-аппарат комплексини жорий қилиш чора-тадбирлари тўғрисида
Таъкидлаш жоизки, мамлакатимизда электрон ҳукуматни ривожлантириш ва модернизация қилиш, шу жумладан маъмурий тартиб-таомилларни такомиллаштириш, аҳоли мурожаатларини кўриб чиқиш жараёнларининг шаффофлиги ва оптималлашувини таъминлаш, фаол тадбиркорликни рағбатлантириш, шунингдек, инвестицион иқлим ва ишбилармонлик муҳитини яхшилашга қаратилган давлат хизматлари кўрсатишни кенгайтириш бўйича изчил чора-тадбирлар кўрилмоқда.
Шу билан бирга, рақамли иқтисодиёт ютуқларининг имкониятлари тўла рўёбга чиқарилмаётган қатор соҳалар сақланиб қолмоқда. Хусусан, ижтимоий-меҳнат соҳасида замонавий ахборот технологиялари етарли даражада фаол қўлланилмаяпти. Ҳозирга қадар ташкилотларда кадрлар бўйича иш юритиш асосан қоғоз шаклида амалга оширилмоқда, бу эса ходимнинг, айниқса, пенсия таъминоти ҳуқуқларини расмийлаштиришда меҳнат стажи аниқ ҳисобланишини мураккаблаштиради, шунингдек, аҳоли бандлиги ҳақидаги маълумотларнинг нотўғри кўрсатилишига шароит яратади ва маъмурий бошқарув харажатларини кўпайтиради.
Ўзбекистон Республикаси Президентининг 2019 йил 17 январдаги ПФ-5635-сон Фармони билан тасдиқланган 2017 ― 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Фаол инвестициялар ва ижтимоий ривожланиш йили»да амалга оширишга оид Давлат дастурига мувофиқ, шунингдек, ходимларнинг меҳнат ҳуқуқларини ҳимоя қилишни янада кучайтириш ва уларнинг меҳнат стажини ҳисоблаш механизмини такомиллаштириш, ижтимоий-меҳнат соҳасига замонавий ахборот-коммуникация технологияларини жорий этиш мақсадида:
1. Ўзбекистон Республикаси Бандлик ва меҳнат муносабатлари вазирлиги ҳамда Ахборот технологиялари ва коммуникацияларини ривожлантириш вазирлигининг 2020 йил 1 январдан қуйидагиларни таъминловчи «Ягона миллий меҳнат тизими» идоралараро дастурий-аппарат комплексини (кейинги ўринларда — «ЯММТ» ИДАК) жорий қилиш тўғрисидаги таклифи маъқуллансин:
иш берувчилар ва ходимлар ўртасидаги меҳнат муносабатларини, шу жумладан меҳнат шартномаларини тузиш, меҳнат шартномаларига ўзгартириш ва қўшимчалар киритиш, шунингдек, уларни тугатиш тартиб-таомилларини электрон рўйхатдан ўтказишни амалга ошириш;
иш берувчиларнинг тузилмаси (штатлар жадвали), шу жумладан мавжуд ва яратиладиган иш ўринлари, меҳнат шароитлари, меҳнатга ҳақ тўлаш шартлари тўғрисидаги электрон маълумотлар базасини шакллантириш;
ходимнинг меҳнат стажини ҳисоблаш тўғрисидаги маълумотлар, ҳисобланган иш ҳақи ва жисмоний шахсларнинг меҳнатга ҳақ тўлаш кўринишидаги даромадларига ҳисобланган солиқлар, фуқароларнинг шахсий жамғариб бориладиган пенсия жамғармаси ҳисобига тўловлар ҳақидаги ахборотга асосланган электрон меҳнат дафтарчасида жисмоний шахсларнинг меҳнат фаолияти тўғрисидаги маълумотларни шакллантириш ва юритиш;
аҳоли бандлигини таъминлаш соҳасида давлат сиёсатини амалга оширишни мувофиқлаштириш даражасини ва унинг самарадорлигини ошириш учун меҳнат бозори кўрсаткичлари ҳолати ва динамикаси тўғрисидаги ахборотлардан иборат маълумотларни идоралараро тизимлаштирилган тарзда ва мунтазам равишда электрон алмашишни жорий этиш;
ходимлар ҳамда ишчиларнинг сон ва сифат таркиби, вакансиялар, шунингдек, ишга жойлашиш учун номзодларга иш берувчилар томонидан қўйиладиган малакавий ва бошқа талаблар тўғрисида автоматик тарзда тўпланадиган холис, шаффоф ва долзарб маълумотларни шакллантириш;
манфаатдор ташкилотларга улар ўз зиммасига юклатилган вазифа ва функцияларни бажариши учун «ЯММТ» ИДАКдан зарурий маълумотларни қонун ҳужжатларида белгиланган тартибда тақдим этиш;
 LexUZ шарҳи
Қаранг: Вазирлар Маҳкамасининг 2022 йил 20 сентябрдаги 516-сон «Идоралараро электрон ҳамкорлик тизими ва маълумотларнинг ахборот алмашинувини янада такомиллаштириш чора-тадбирлари тўғрисида»ги қарори.
Олдинги таҳрирга қаранг.
меҳнат ресурсларининг, хусусан, меҳнат ресурслари тоифалари, ишга лаёқатли, иқтисодий фаол ва нофаол аҳоли қатламлари, шу жумладан Ўзбекистон Республикаси Миллий статистика қўмитаси, Иқтисодиёт ва молия вазирлиги ҳузуридаги Бюджетдан ташқари пенсия жамғармаси ва Соғлиқни сақлаш вазирлиги маълумотлари асосида пенсия ёшидаги ишлаётган шахслар ва ногиронлиги бўлган шахслар тўғрисида ҳар куни янгиланадиган балансини шакллантириш;
(1-банднинг саккизинчи хатбошиси Ўзбекистон Республикаси Президентининг 2025 йил 24 февралдаги ПФ-27-сонли Фармони таҳририда — Қонунчилик маълумотлари миллий базаси, 01.03.2025 й., 06/25/27/0196-сон)
меҳнат муносабатлари ва меҳнат муҳофазаси, ишга жойлаштириш дастурлари бўйича ўтказиладиган текширувлар, шунингдек, иш ўринларининг аттестацияси, Меҳнат муҳофазаси соҳасидаги хизматлар бозорининг профессионал иштирокчилари ягона реестрига тегишли маълумотларнинг (ахборотларнинг) тўлиқ киритилишини экспертизадан ўтказиш натижаларини мониторинг қилиш;
Олдинги таҳрирга қаранг.
хорижга вақтинчалик меҳнат фаолиятини амалга ошириш учун кетадиган фуқароларни онлайн рўйхатдан ўтказиш, ташкилий тартибдаги меҳнат миграцияси тўғрисидаги келишувга асосан Ўзбекистон Республикаси Вазирлар Маҳкамаси ҳузуридаги Миграция агентлиги ваколатхоналари ҳамда Ўзбекистон Республикасининг чет элдаги дипломатик ваколатхоналари ва консуллик муассасаларида меҳнат миграцияси масалалари бўйича атташе томонидан хорижда ишга жойлаштирилган фуқаролар ҳақида маълумотлар базасини яратиш, шунингдек, ишга жойлаштирилаётган мамлакатда бўлиш қоидалари, меҳнат шароитлари, ижтимоий ва яшаш-турмуш таъминоти, чет эллик иш берувчилар билан тузиладиган меҳнат шартномаларининг ҳуқуқий жиҳатлари, қонунчиликда назарда тутилган молиявий қўллаб-қувватлаш чоралари тўғрисида онлайн тартибда маълумотлар тақдим этиш имконияти;
(1-банднинг ўнинчи хатбошиси Ўзбекистон Республикаси Президентининг 2025 йил 4 августдаги ПФ-126-сонли Фармони таҳририда — Қонунчилик маълумотлари миллий базаси, 08.08.2025 й., 06/25/126/0704-сон)
меҳнат бозорининг, ҳудудлар, жинс ва ёш омиллари, соҳалар ва мутахассисликлар кесимида ишчи кучига бўлган талаб ва таклифнинг ривожланиш тенденциялари прогнозини шакллантириш;
Олдинги таҳрирга қаранг.
иш берувчиларга пуллик хизматлар кўрсатиш;
Камбағалликни қисқартириш ва бандлик вазирлигининг ахборот ресурслари билан интеграциялаш;
Камбағалликни қисқартириш ва бандлик вазирлигига меҳнат ва аҳоли бандлиги соҳаларида давлат бошқаруви бўйича юклатилган функцияларни тўла ҳажмда ва тезкорлик билан амалга ошириш.
(1-банднинг ўн иккинчи ва ўн учинчи хатбошилар Ўзбекистон Республикаси Президентининг 2025 йил 4 августдаги ПФ-126-сонли Фармонига асосан ўн иккинчи — ўн тўртинчи хатбошилар билан алмаштирилган — Қонунчилик маълумотлари миллий базаси, 08.08.2025 й., 06/25/126/0704-сон)
2. «ЯММТ» ИДАК учун реал вақт режимида маълумотлар базасига кириш имконияти тақдим этиладиган давлат органлари ва ташкилотларининг ҳамда «Электрон ҳукумат» тизимининг идоралараро интеграциялашув платформаси орқали идоралараро электрон алоқа воситасида амалга ошириладиган алмашув маълумотлари рўйхати 1-иловага мувофиқ тасдиқлансин.
3. Белгилаб қўйилсинки:
а) 2020 йил 1 январдан бошлаб янги меҳнат шартномаларини тузиш, амалдаги меҳнат шартномаларига ўзгартириш киритиш, шунингдек, уларни тугатиш ҳолатларини «ЯММТ» ИДАКда мажбурий рўйхатдан ўтказиш тартиби жорий этилади. Бунда 2020 йил 1 январга қадар тузилган амалдаги меҳнат шартномалари 2020 йил 1 сентябрдан кечиктирмасдан «ЯММТ» ИДАКда рўйхатдан ўтказилиши шарт. Меҳнат шартномаларини «ЯММТ» ИДАКда рўйхатдан ўтказиш белгиланган тартибда иш берувчи томонидан амалга оширилади;
б) 2020 йил 1 январдан бошлаб, рўйхатдан ўтказиладиган меҳнат шартномаларидаги маълумотлар асосида «ЯММТ» ИДАКда автоматик тарзда шакллантириладиган ходимнинг меҳнат фаолияти тўғрисидаги маълумотларни ўз ичига олувчи электрон меҳнат дафтари жорий этилади;
Олдинги таҳрирга қаранг.
в) Ўзбекистон Республикаси Камбағалликни қисқартириш ва бандлик вазирлиги «ЯММТ» ИДАКнинг балансда сақловчиси ҳисобланади;
(3-банднинг «в» кичик банди Ўзбекистон Республикаси Президентининг 2025 йил 4 августдаги ПФ-126-сонли Фармони таҳририда — Қонунчилик маълумотлари миллий базаси, 08.08.2025 й., 06/25/126/0704-сон)
Олдинги таҳрирга қаранг.
г) «ЯММТ» ИДАКдан фойдаланиш барча юридик ва жисмоний шахслар учун бепул ҳисобланади. «ЯММТ» ИДАКни ишлаб чиқиш, кузатиб бориш, таъминлаш ва такомиллаштириш Ўзбекистон Республикаси Камбағалликни қисқартириш ва бандлик вазирлиги ҳузуридаги Бандликка кўмаклашиш давлат жамғармаси (кейинги ўринларда — Бандликка кўмаклашиш жамғармаси) ҳисобидан амалга оширилади.
(3-банднинг «г» кичик банди Ўзбекистон Республикаси Президентининг 2025 йил 4 августдаги ПФ-126-сонли Фармони таҳририда — Қонунчилик маълумотлари миллий базаси, 08.08.2025 й., 06/25/126/0704-сон)
Олдинги таҳрирга қаранг.
д) иш берувчилар «ЯММТ» ИДАК орқали қўшимча равишда кўрсатиладиган пуллик хизматлардан ихтиёрий равишда қонунчиликда белгиланган тартибда фойдаланишлари мумкин.
(3-банд Ўзбекистон Республикаси Президентининг 2025 йил 4 августдаги ПФ-126-сонли Фармонига асосан «д» кичик банд билан тўлдирилган — Қонунчилик маълумотлари миллий базаси, 08.08.2025 й., 06/25/126/0704-сон)
4. Ходимнинг меҳнат стажи, шу жумладан Ўзбекистон Республикасининг «Фуқароларнинг давлат пенсия таъминоти тўғрисида»ги Қонунига мувофиқ пенсия тайинлашда ходим томонидан амалга ошириладиган меҳнат фаолияти даврига асосан:
2020 йил 1 январдан сўнг — «ЯММТ» ИДАКда мавжуд маълумотлар асосида (қонун ҳужжатларида белгиланган алоҳида ҳоллардан ташқари);
2020 йил 1 январга қадар — «ЯММТ» ИДАК жорий қилингунгача ўрнатилган тартибда белгилансин.
5. «Ягона миллий меҳнат тизими» идоралараро дастурий-аппарат комплексини («ЯММТ» ИДАК) жорий қилиш ва ундан фойдаланиш жараёнларини мувофиқлаштириш бўйича идоралараро ишчи гуруҳи (кейинги ўринларда — Идоралараро ишчи гуруҳи) 2-иловага мувофиқ тасдиқлансин.
6. Қуйидагилар Идоралараро ишчи гуруҳининг асосий вазифалари этиб белгилансин:
«ЯММТ» ИДАКни ишлаб чиқиш, жорий қилиш, фойдаланиш ва ривожлантириш бўйича вазирлик ва идоралар фаолиятини ҳамда унинг «Электрон ҳукумат» тизимига интеграциялашувини мувофиқлаштириш;
«ЯММТ» ИДАКни ривожлантириш ва такомиллаштириш, меҳнат муносабатлари субъектларининг ахборот эҳтиёжларини қондириш мақсадида «ЯММТ» ИДАК орқали кўрсатиладиган электрон давлат хизматлари рўйхатини кенгайтириш ва сифатини ошириш бўйича таклифлар ишлаб чиқиш ва Ўзбекистон Республикаси Вазирлар Маҳкамасига киритиш;
меҳнат муносабатларини расмийлаштиришни электрон шаклга янада кенгроқ ўтказиш бўйича ташкилий тадбирларни, шу жумладан «йўл хариталари»ни ишлаб чиқиш ва тасдиқлаш.
7. Ўзбекистон Республикаси Бандлик ва меҳнат муносабатлари вазирлиги ҳузурида «ЯММТ» ИДАКни бошқариш дирекцияси (кейинги ўринларда — Дирекция) ташкил этилсин.
Олдинги таҳрирга қаранг.
Дирекциянинг ташкилий тузилмаси ҳамда ходимларининг меҳнатига ҳақ тўлаш ва уларни рағбатлантириш шартлари вазирлик томонидан ажратилган маблағлар ва бошқа манбалар доирасида Дирекция томонидан белгиланади.
(7-банд Ўзбекистон Республикаси Президентининг 2025 йил 17 январдаги ПҚ-12-сонли қарорига асосан иккинчи хатбоши билан тўлдирилган — Қонунчилик маълумотлари миллий базаси, 21.01.2025 й., 07/25/12/0056-сон)
8. Дирекция зиммасига қуйидаги асосий вазифалар юклатилсин:
иш берувчилар томонидан меҳнат шартномаларининг ўрнатилган тартибда рўйхатдан ўтказилишини мониторинг қилиш, меҳнат шартномаларини рўйхатдан ўтказишда иш берувчилар ва ходимларга техник ёрдам кўрсатиш, шу жумладан тегишли маълумотларни киритиш ва олиш учун зарур аппарат воситаларини тақдим этиш;
«ЯММТ» ИДАКни қўллаш, электрон меҳнат дафтарчасини шакллантириш ва жорий қилиш, ходимнинг меҳнат стажи тўғри ҳисобланишини таъминлаш жараёнида юзага келадиган барча масалалар бўйича иш берувчиларга техник ва ахборот кўмагини тақдим қилиш, шунингдек, «ЯММТ» ИДАК фойдаланувчиси ҳисобланган фуқароларга ахборот кўмагини кўрсатиш;
«Электрон ҳукумат» тизимига кирувчи ахборот тизимлари билан «ЯММТ» ИДАК маълумотларини алмашиш масалалари бўйича идоралараро ҳамкорликни ташкиллаштириш;
Олдинги таҳрирга қаранг.
«ЯММТ» ИДАКдан самарали ва ишончли фойдаланиш, тегишли ахборот дастурларини ишлаб чиқиш, техник қўллаб-қувватлаш ва такомиллаштириш, шунингдек, сервер, компьютер қурилмалари ва телекоммуникация тармоқларига техник хизмат кўрсатиш, иш берувчилар ва ходимлар шахсий маълумотларининг ахборот хавфсизлиги ва махфийлигини таъминлаш;
(8-банднинг бешинчи хатбошиси Ўзбекистон Республикаси Президентининг 2025 йил 17 январдаги ПҚ-12-сонли қарори таҳририда — Қонунчилик маълумотлари миллий базаси, 21.01.2025 й., 07/25/12/0056-сон)
жорий этилаётган меҳнат шартномаларини рўйхатдан ўтказиш ва электрон меҳнат дафтарчаларини юритиш тартибини тушунтириб берувчи, «ЯММТ» ИДАКни ривожлантириш ва такомиллаштириш истиқболлари ҳақида материаллар тайёрлаш ва оммавий ахборот воситаларида чоп этиш, телерадиоканалларда махсус телекўрсатувлар ва радиоэшиттиришлар ташкил қилиш.
9. Ўзбекистон Республикаси Бандлик ва меҳнат муносабатлари вазирлиги:
ҳар йили Бандликка кўмаклашиш жамғармасининг харажатлар сметасида «ЯММТ» ИДАКни таъминлаш, ривожлантириш, такомиллаштириш, самарали ишлаб туриши ва ахборот хавфсизлигини таъминлаш учун маблағларни назарда тутсин;
Ўзбекистон Республикаси Президенти ҳузуридаги Давлат хизматини ривожлантириш агентлиги билан биргаликда «ЯММТ» ИДАКнинг ишлаб чиқилаётган Давлат фуқаролик хизматининг ягона электрон ахборот-таҳлил тизими билан интеграциялаштиришни назарда тутсин;
Ўзбекистон Республикаси Давлат солиқ қўмитаси билан биргаликда «ЯММТ» ИДАКни солиқ хизмати органларининг ахборот тизимлари билан интеграциялаштириш орқали ходимларнинг меҳнат фаолияти тўғрисида «ЯММТ» ИДАКда акс этувчи маълумотларнинг ҳисобланган иш ҳақини шахсий ҳисобга олиш марказлаштирилган электрон реестри маълумотлари билан тўғри келишини талабнома асосида текширишни (верификациялашни) доимий асосда таъминласин.
10. Ўзбекистон Республикаси Олий ва ўрта махсус таълим вазирлиги Вазирлар Маҳкамаси ҳузуридаги Таълим сифатини назорат қилиш давлат инспекцияси, Олий аттестация комиссияси ва республикадаги олий таълим муассасалари билан биргаликда икки ой муддатда олий маълумот тўғрисидаги дипломлар, илмий даража тўғрисидаги ҳужжатлар, шунингдек, хорижий олий таълим муассасасидан олинган олий маълумот ёки илмий даража тўғрисидаги ҳужжатни тан олиш ҳақида гувоҳномалар берилган жисмоний шахсларнинг электрон маълумотлар базасини шакллантирсин ва уни «ЯММТ» ИДАК билан интеграциялаштиришни таъминласин.
Олдинги таҳрирга қаранг.
11. Белгилансинки, Ўзбекистон Республикаси Олий таълим, фан ва инновациялар вазирлиги, Олий аттестация комиссияси тайёрланган, тақсимланган, бузилган ва берилган олий маълумот тўғрисидаги дипломлар, илмий даража тўғрисидаги ҳужжатлар, шунингдек, хорижий олий таълим муассасасидан олинган олий маълумот ёки илмий даража тўғрисидаги ҳужжатни тан олиш ҳақида гувоҳномалар бланклари тўғрисидаги батафсил маълумотни Ўзбекистон Республикаси Президенти ҳузуридаги Бошқарув самарадорлиги агентлигига мунтазам равишда киритиб боради, диплом олган жисмоний шахсга берилган бланк унинг шахсий идентификация рақамига бириктириб қўйилади.
(11-банд Ўзбекистон Республикаси Президентининг 2025 йил 29 октябрдаги ПФ-197-сонли Фармони таҳририда)
12. Белгилаб қўйилсинки, меҳнат шартномаларини, амалдаги меҳнат шартномаларига ўзгартиришларни, уларнинг тугатилишини «ЯММТ» ИДАКда ўз вақтида рўйхатдан ўтказиш, шунингдек, электрон меҳнат дафтарчасини шакллантириш учун масъулият иш берувчи зиммасига юклатилади.
13. Ўзбекистон Республикаси Бандлик ва меҳнат муносабатлари вазирлигининг жисмоний шахсларга ихтиёрий равишда ўтган даврдаги ишга жойлашганлик тўғрисидаги маълумотларни мустақил тарзда «ЯММТ» ИДАКга киритиш ҳуқуқини бериш, бунда жисмоний шахслар ихтиёрий равишда киритган маълумотлар Ўзбекистон Республикаси Молия вазирлиги ҳузуридаги Бюджетдан ташқари пенсия жамғармаси органлари томонидан мажбурий верификацияланишини (тасдиқланишини) назарда тутиш тўғрисидаги таклифи қўллаб-қувватлансин.
14. Иш берувчилар ва жисмоний шахсларни тўлиқ қамраб олган ҳолда «ЯММТ» ИДАКни жорий этишни самарали мувофиқлаштириш мақсадида:
Бандлик ва меҳнат муносабатлари вазирлиги марказий аппарати Меҳнат стандартлари ва меҳнатга ҳақ тўлаш бошқармаси бошқарув ходимларининг штатлари сони 16 нафарга оширилсин;
Қорақалпоғистон Республикаси Бандлик ва меҳнат муносабатлари вазирлиги, вилоятлар ва Тошкент шаҳар бандлик бош бошқармаларида бошқарув ходимларининг умумий сони 84 нафардан иборат бўлган меҳнат стандартлари ва меҳнатга ҳақ тўлаш бўлимлари ташкил этилсин.
Белгилансинки, юқорида кўрсатилган умумий сони 100 нафардан иборат бошқарув ходимлари штатлари туман (шаҳар) аҳоли бандлигига кўмаклашиш марказларидаги касбий қайта ўқитишни ташкил этиш шуъбаси мутахассислари лавозимини 0,5 ставкага қисқартириш ҳисобига киритилади.
15. Ўзбекистон Республикаси Бандлик ва меҳнат муносабатлари вазирлиги:
Ўзбекистон Республикаси Меҳнат кодексининг ишлаб чиқилаётган янги таҳрири лойиҳасида мазкур қарорда келтирилган меъёрларни назарда тутсин;
бир ой муддатда Дирекциянинг таъсис ҳужжатлари ва тузилмасини ишлаб чиқсин ҳамда тасдиқласин;
уч ой муддатда Дирекцияни, шу жумладан, юқори малакали хорижий мутахассислар ва чет элдаги етакчи таълим муассасаларини тамомлаган республикамиз фуқаролари орасидан билим ва кўникмага эга профессионал мутахассислар билан тўлдиришни таъминласин.
16. Ўзбекистон Республикаси бандлик ва меҳнат муносабатлари вазирига қуйидаги ҳуқуқлар берилсин:
Олдинги таҳрирга қаранг.
Ўзбекистон Республикаси Президенти ҳузуридаги Бошқарув самарадорлиги агентлиги билан келишилган ҳолда, Дирекция тузилмасига ўзгартиришлар киритиш ва ходимларнинг чекланган умумий сонини белгилаш, шу жумладан зарур ҳолларда Бандликка кўмаклашиш жамғармаси маблағлари ҳисобидан қўшимча штат бирликларини киритиш;
(16-банднинг иккинчи хатбошиси Ўзбекистон Республикаси Президентининг 2025 йил 29 октябрдаги ПФ-197-сонли Фармони таҳририда)
Олдинги таҳрирга қаранг.
Дирекция ва Камбағаллик ва меҳнат соҳасидаги лойиҳаларни бошқариш маркази томонидан замонавий ахборот-коммуникация технологияларини жорий этишни ҳамда «Call-марказ» фаолиятини ташкил этишни тўғридан-тўғри шартномалар асосида молиялаштириш;
(16-банд Ўзбекистон Республикаси Президентининг 2025 йил 17 январдаги ПҚ-12-сонли қарорига асосан учинчи хатбоши билан тўлдирилган — Қонунчилик маълумотлари миллий базаси, 21.01.2025 й., 07/25/12/0056-сон)
меҳнат бозоридаги ҳақиқий ҳолатни ҳисобга олган ҳолда Меҳнат органлари ходимлари меҳнатини рағбатлантириш ва моддий-техник базасини мустаҳкамлаш жамғармасининг бюджетдан ташқари маблағлари ҳисобига шартнома асосида тор доирадаги мутахассисларни Дирекцияда ишлаш учун жалб этиш.
17. Ўзбекистон Республикаси Бандлик ва меҳнат муносабатлари вазирлиги манфаатдор вазирлик ва идоралар билан биргаликда:
икки ҳафта муддатда мазкур қарор талабларини ҳисобга олган ҳолда «ЯММТ» ИДАКни жорий қилиш ва унинг кейинчалик самарали ишлашини таъминлаш бўйича ташкилий чора-тадбирларни назарда тутувчи Вазирлар Маҳкамасининг қарори лойиҳасини;
бир ой муддатда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисидаги таклифларни;
икки ой муддатда «ЯММТ» ИДАК тизимида меҳнат шартномаларини рўйхатдан ўтказмаганлик ва электрон меҳнат дафтарчасига маълумотлар киритмаганлик учун маъмурий жавобгарликни назарда тутувчи таклифларни Ўзбекистон Республикаси Вазирлар Маҳкамасига киритсин.
18. Ўзбекистон Миллий телерадиокомпанияси Ўзбекистон Республикаси Бандлик ва меҳнат муносабатлари вазирлиги билан биргаликда «ЯММТ» ИДАКдан фойдаланган ҳолда меҳнат шартномаларини рўйхатдан ўтказиш ва меҳнат стажининг ҳисобини электрон шаклда юритиш тартиби ва жорий қилинаётган механизмларнинг афзалликларини аҳоли ва иш берувчилар ўртасида мунтазам равишда ва ҳар томонлама ёритишни таъминласин.
19. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Президентининг маслаҳатчиси Ш.Д. Кудбиев зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2019 йил 31 октябрь,
ПҚ-4502-сон
Ўзбекистон Республикаси Президентининг 2019 йил 31 октябрдаги ПҚ-4502-сон қарорига
1-ИЛОВА
«ЯММТ» ИДАК учун реал вақт режимида маълумотлар базасига кириш имконияти тақдим этиладиган давлат органлари ва ташкилотларининг ҳамда «Электрон ҳукумат» тизимининг идоралараро интеграциялашув платформаси орқали идоралараро электрон алоқа воситасида амалга ошириладиган алмашув маълумотлари*
РЎЙХАТИ
Олдинги таҳрирга қаранг.

Т/р

Маълумотлар номи

Маълумот олувчи идора

Маълумот/база тақдим этувчи идора

Маълумот тақдим этиш шартлари

1.

Солиқ тўловчи жисмоний шахс ҳақидаги маълумотлар:

Ўзбекистон Республикаси Бандлик ва меҳнат муносабатлари вазирлиги

Ўзбекистон Республикаси Давлат солиқ қўмитаси

ЖШШИР** бўйича автоматлаштирилган сўров орқали

Солиқ тўловчи жисмоний шахснинг шахсий рақами.

Жисмоний шахсга иш берувчи — ташкилот СТИР.

Суғурта бадали, даромад солиғи тўланган ва иш ҳақи ёзилган ташкилот СТИР.

Суғурта бадали, даромад солиғи тўланган ва иш ҳақи ёзилган сана.

2.

Патент рақами.

Ўзбекистон Республикаси Бандлик ва меҳнат муносабатлари вазирлиги

Ўзбекистон Республикаси Давлат солиқ қўмитаси

ЖШШИР бўйича автоматлаштирилган сўров орқали

Патент бўйича фаолият тури.

3.

Юридик шахс тўғрисида маълумот:

Ўзбекистон Республикаси Бандлик ва меҳнат муносабатлари вазирлиги

Юридик шахсларнинг марказий маълумотлар базаси

ЮШ СТИР*** бўйича автоматлаштирилган сўров орқали

Юридик шахснинг СТИР.

Юридик шахснинг номланиши.

Юридик шахс номланишининг қисқартмаси.

Юридик шахс мақоми.

Давлат рўйхатидан ўтган манзили.

Юридик шахснинг давлат рўйхатидан ўтган санаси.

Юридик шахс тугатилган сана.

Юридик шахснинг мулкчилик шакли.

Юридик шахснинг мулкчилик тури.

Юридик шахснинг ташкилий-ҳуқуқий шакли.

Юридик шахснинг МҲОБТ коди.

Юридик шахснинг КТАК коди.

Юридик шахснинг ИФУТ рақами.

Юридик шахс бошлиғининг фамилияси, исми, отасининг исми.

Юридик шахс бошлиғининг СТИР.

Юридик шахс бошлиғининг ЖШШИР.

Юридик шахснинг ҳақиқатда жойлашган жой манзили.

4.

Жисмоний шахс ҳақида маълумот:

Ўзбекистон Республикаси Бандлик ва меҳнат муносабатлари вазирлиги

Жисмоний шахсларнинг марказий маълумотлар базаси

ЖШШИР бўйича автоматлаштирилган сўров орқали, паспорт серияси ва рақами

Фамилияси, исми, отасининг исми.

Жинси.

Туғилган йили.

Туғилган жойи.

Фуқаро паспорти ёки идентификацияловчи ID-картаси берилган сана.

Фуқаро паспортини ёки идентификацияловчи ID-картасини берган орган номи.

5.

Фуқароларнинг шахсий жамғариб бориладиган пенсия ҳисобварағига бадаллар тўланган ташкилот СТИР.

Ўзбекистон Республикаси Бандлик ва меҳнат муносабатлари вазирлиги

«Халқ банки» АТБ

ЖШШИР ва СТИР****
бўйича автоматлаштирилган сўров орқали

Шахсий жамғариб бориладиган пенсия ҳисобварағига бадаллар тўланган саналар.

Шахсий жамғариб бориладиган пенсия ҳисобварағи рақами.

6.

Шахснинг ногиронлиги ва ногиронлик гуруҳи мавжудлиги ҳақидаги маълумотлар.

Ўзбекистон Республикаси Бандлик ва меҳнат муносабатлари вазирлиги

Ўзбекистон Республикаси Соғлиқни сақлаш вазирлигининг Республика тиббий-ижтимоий экспертиза инспекцияси

ЖШШИР бўйича автоматлаштирилган сўров орқали

7.

Ходимнинг электрон меҳнат дафтарчасида кўрсатилган маълумотлар.

Ўзбекистон Республикаси Президенти ҳузуридаги Бошқарув самарадорлиги агентлиги, Рақамли технологиялар вазирлиги ҳузуридаги «Электрон ҳукумат лойиҳаларини бошқариш маркази» ДМ

Ўзбекистон Республикаси Бандлик ва меҳнат муносабатлари вазирлиги

ЖШШИР бўйича автоматлаштирилган сўров орқали

* Реал вақт режимида маълумотлар базасига кириш имконияти дастурий комплекс ишига ва маълумотлар базаси тузилмасига аралашиш ҳуқуқисиз тақдим этилади.
** ЖШШИР — жисмоний шахснинг паспорти бўйича аниқланадиган жисмоний шахснинг шахсий идентификация рақами.
*** ЮШ СТИР — рўйхатдан ўтиш жойи бўйича солиқ хизмати органлари томонидан юридик шахсга бериладиган солиқ тўловчининг идентификация рақами.
**** СТИР — жисмоний шахсга яшаш жойи бўйича солиқ хизмати органлари томонидан бериладиган солиқ тўловчининг идентификация рақами.
(1-илова Ўзбекистон Республикаси Президентининг 2025 йил 29 октябрдаги ПФ-197-сонли Фармони таҳририда)
Ўзбекистон Республикаси Президентининг 2019 йил 31 октябрдаги ПҚ-4502-сон қарорига
2-ИЛОВА
«Ягона миллий меҳнат тизими» идоралараро дастурий-аппарат комплексини («ЯММТ» ИДАК) жорий қилиш ва ундан фойдаланиш жараёнларини мувофиқлаштириш бўйича идоралараро ишчи гуруҳи
ТАРКИБИ
Олдинги таҳрирга қаранг.

1.

Ш.Д. Кудбиев

―

Ўзбекистон Республикаси Президенти маслаҳатчиси, Идоралараро ишчи гуруҳи раҳбари

2.

М.П. Оллоёров

―

Ўзбекистон Республикаси Президенти Администрацияси Ҳуқуқий экспертиза ва комплекс таҳлил департаменти раҳбарининг ўринбосари, Идоралараро ишчи гуруҳи раҳбари ўринбосари

3.

Н.Б. Хусанов

―

Ўзбекистон Республикаси бандлик ва меҳнат муносабатлари вазири, Идоралараро ишчи гуруҳи раҳбари ўринбосари

4.

Р.К. Давлетов

―

Ўзбекистон Республикаси адлия вазири

5.

Б.А. Бегалов

―

Ўзбекистон Республикаси Давлат статистика қўмитаси раиси

6.

Э.М. Муҳитдинов

―

Ўзбекистон Республикаси бандлик ва меҳнат муносабатлари вазирининг биринчи ўринбосари

7.

О.М. Умаров

―

Ўзбекистон Республикаси ахборот технологиялари ва коммуникацияларини ривожлантириш вазирининг биринчи ўринбосари

8.

Б.Ш. Усмонов

―

Ўзбекистон Республикаси иқтисодиёт ва саноат вазири ўринбосари

9.

У.Ш. Бегимқулов

―

Ўзбекистон Республикаси олий ва ўрта махсус таълим вазири ўринбосари

10.

А.Э. Файзибоев

―

Ўзбекистон Республикаси Давлат солиқ қўмитаси раиси ўринбосари

11.

А.Я. Ҳайдаров

―

Ўзбекистон Республикаси молия вазирининг ўринбосари

12.

Б.Б. Ашрафханов

―

Ўзбекистон Республикаси Молия вазирлиги ҳузуридаги Бюджетдан ташқари пенсия жамғармаси ижрочи директори

13.

Д.С. Мақсудов

―

Ўзбекистон Республикаси Президенти ҳузуридаги Лойиҳа бошқаруви миллий агентлиги директори ўринбосари

14.

Н.С. Тўрахўжаев

―

Ўзбекистон Республикаси Адлия вазирлиги ҳузуридаги Персоналлаштириш агентлиги директори

15.

А.К. Инаков

―

Ўзбекистон Республикаси Соғлиқни сақлаш вазирлиги ҳузуридаги Тиббий-ижтимоий хизматлар агентлиги директори

16.

А.Т. Юсупов

―

Ўзбекистон Республикаси Вазирлар Маҳкамаси ҳузуридаги Олий аттестация комиссияси раиси

17.

Х.А. Кетмонов

―

Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси бошлиғининг биринчи ўринбосари

18.

Ф.И. Саломов

―

Ўзбекистон Республикаси Акциядорлик тижорат Халқ банки бошқаруви раиси

19.

А.А. Элмурадов

―

«Mehnat.uz» ахборот-компьютер маркази» МЧЖ директори

Изоҳлар:
1. Идоралараро ишчи гуруҳи аъзолари бошқа ишга ўтган тақдирда унинг таркибига ушбу лавозимга янгидан тайинланган ёки зиммасига тегишли функцияларни бажариш юкланган шахслар киритилади.
2. Зарур ҳолларда Идоралараро ишчи гуруҳи ишига тегишли давлат бошқаруви органлари, хўжалик бирлашмалари ва бошқа ташкилотларнинг мутахассислари жалб этилади.
(2-илова Ўзбекистон Республикаси Президентининг 2024 йил 24 майдаги ПФ-80-сонли Фармони таҳририда — Қонунчилик маълумотлари миллий базаси, 25.05.2024 й., 06/24/80/0364-сон)

(Қонун ҳужжатлари маълумотлари миллий базаси, 01.11.2019 й., 07/19/4502/3977-сон; Қонунчилик маълумотлари миллий базаси, 24.07.2021 й., 06/21/6268/0700-сон, 20.04.2022 й., 06/22/112/0326-сон; 25.05.2024 й., 06/24/80/0364-сон; 21.01.2025 й., 07/25/12/0056-сон; 01.03.2025 й., 06/25/27/0196-сон; 08.08.2025 й., 06/25/126/0704-сон)