|
Ҳужжат кучини йўқотган " " 01.07.2023
|
Ўзбекистон Республикаси Вазирлар Маҳкамасининг
қарори
Адвокатлик гувоҳномасини бериш тартиби тўғрисидаги низомни тасдиқлаш ҳақида
LexUZ шарҳиМазкур қарор Ўзбекистан Республикаси Вазирлар Маҳкамасининг 2023 йил 1 июндаги 226-сонли «Адвокатлик гувоҳномасини бериш тартиби тўғрисидаги низомни тасдиқлаш ҳақида»ги қарорига асосан 2023 йил 1 июлдан ўз кучини йўқотади.
Ўзбекистон Республикаси Президентининг «Давлат хизматлари кўрсатиш миллий тизимини янада комплекс ривожлантириш чоралари ҳақида» 2019 йил 15 февралдаги ПҚ-4193-сон қарори ижроси юзасидан Вазирлар Маҳкамаси қарор қилади:
1. Адвокатлик гувоҳномасини бериш тартиби тўғрисида низом иловага мувофиқ тасдиқлансин.
2. Ўзбекистон Республикаси Адлия вазирлиги манфаатдор вазирлик ва идоралар билан биргаликда бир ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
3. Мазкур қарорнинг ижросини назорат қилиш Ўзбекистон Республикаси адлия вазири Р.К. Давлетов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 24 сентябрь,
807-сон
Вазирлар Маҳкамасининг 2019 йил 24 сентябрдаги 807-сон қарорига
ИЛОВА
ИЛОВА
Адвокатлик гувоҳномасини бериш тартиби тўғрисида
НИЗОМ
1-боб. Умумий қоидалар
1. Мазкур Низом адвокатлик гувоҳномасини бериш тартибини белгилайди.
2. Адвокатлик гувоҳномаси адвокат мақомини тасдиқловчи ҳужжат ҳисобланади.
3. Адвокат адвокатлик фаолиятини амалга оширадиган адвокатлик тузилмаси давлат рўйхатидан ўтказилган (ҳисобга олинган) жойда Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари (кейинги ўринларда ҳудудий адлия органлари деб аталади) томонидан адвокатлик гувоҳномаси берилади.
Адвокатлик гувоҳномаси Ўзбекистон Республикасининг бутун ҳудудида амал қилади ва унинг амал қилиш муддати чекланмайди.
2-боб. Адвокатлик гувоҳномасининг шакли ва уни бериш тартиби
4. Адвокатлик гувоҳномаси мазкур Низомнинг 1-иловасига мувофиқ шаклда берилади.
5. Адвокатлик гувоҳномасини бериш ушбу Низомга 2-иловага мувофиқ схема бўйича амалга оширилади.
6. Адвокатлик гувоҳномаси (кейинги ўринларда гувоҳнома деб аталади) «Адвокатура тўғрисида»ги Ўзбекистон Республикаси Қонунининг 31-моддасига мувофиқ адвокат мақомига эга бўлишга талабгор бўлган шахсга (кейинги ўринларда талабгор деб аталади) адвокатлик тузилмаси рўйхатдан ўтказилган ёки талабгорнинг фаолият кўрсатаётган адвокатлик тузилмасига кирганлигини тасдиқловчи ҳужжатлар ҳудудий адлия органи томонидан олинган пайтдан эътиборан уч иш куни ичида берилади.
7. Талабгор унга адвокатлик гувоҳномаси берилган кундан эътиборан адвокат мақомини олади, бу ҳол ҳудудий адлия органи раҳбарининг адвокат мақомини ва адвокатлик гувоҳномасини бериш тўғрисидаги буйруғи билан расмийлаштирилади.
Бу ҳақда ҳудудий адлия органи уч кунлик муддатда берилган гувоҳноманинг реквизитларини кўрсатган ҳолда Ўзбекистон Республикаси Адвокатлар палатасининг тегишли ҳудудий бошқармасини (кейинги ўринларда ҳудудий бошқарма деб аталади) ёзма равишда хабардор қилади. Шундай хабарнома олинган пайтдан эътиборан адвокат Ўзбекистон Республикаси Адвокатлар палатасининг аъзоси бўлади.
Адвокат адвокатлик тузилмасини ташкил қилган ёки бошқа адвокатлик тузилмасига кирган ҳолда, ушбу адвокатлик тузилмаси рўйхатдан ўтказилган (ҳисобга олинган) жойдаги ҳудудий адлия органи томонидан унга янги гувоҳнома берилади.
8. Адвокатлик бюроси, адвокатлик фирмаси ёхуд адвокатлар ҳайъатини ташкил қилган талабгор ва (ёки) адвокат ҳудудий адлия органи томонидан адвокатлик тузилмаларининг рўйхатдан ўтказилганлиги тўғрисида гувоҳнома берилган куннинг эртасидан кечиктирмай ана шу ҳудудий адлия органига сўнгги 12 ой мобайнида қилинган 3 х 4 см ўлчамида рангли фотосуратидан 2 донадан тақдим этади.
Адвокатлик фирмаси, адвокатлар ҳайъати, ҳудудий бошқарма талабгор ва (ёки) адвокат тегишли адвокатлик тузилмасига (адвокатлик фирмаси, адвокатлар ҳайъати, юридик маслаҳатхона) кирган куннинг эртасидан кечиктирмай ташкилотнинг муҳри билан тасдиқланган ишга қабул қилиш тўғрисидаги буйруқнинг, адвокатлик фаолияти билан шуғулланиш ҳуқуқини берувчи лицензиянинг нусхасини, сўнгги 12 ой мобайнида қилинган 3 х 4 см ўлчамдаги рангли фотосуратдан 2 донадан, шунингдек малака комиссиясининг талабгор томонидан адвокат қасамёдини қабул қилганлигини тасдиқлаш тўғрисидаги қарорининг нусхасини ҳудудий адлия органига тақдим этади.
Гувоҳномани расмийлаштириш ва бериш ҳудудий адлия органи томонидан икки кунлик муддатда амалга оширилади. Гувоҳнома ҳудудий адлия органининг раҳбари томонидан имзоланади.
9. Гувоҳноманинг рақами мазкур Низомнинг 12-бандида назарда тутилган тартибда расмийлаштирилган гувоҳномалар беришни ҳисобга олиш дафтаридаги тартиб рақамига мос бўлади.
10. Гувоҳноманинг ички томони компьютер техникаси ёрдамида тўлдирилади.
11. Лозим тарзда расмийлаштирилмаган, доғ туширилган ва ёзувлари ўчирилган гувоҳномалар ҳақиқий эмас деб ҳисобланади.
12. Гувоҳномалар бланкаларининг кирими ва чиқими мазкур Низомнинг 3-иловасига мувофиқ шаклларда ҳисобга олиш дафтарларида қайд этилади.
Ҳисобга олиш дафтарлари тикилган, уларнинг варақлари рақамланган, ҳудудий адлия органининг раҳбари имзоси ва муҳри билан тасдиқланган бўлиши ҳамда ёнмайдиган ёки махсус жиҳозланган шкафларда сақланиши керак.
Расмийлаштирилган адвокатлик гувоҳномаларини беришни ҳисобга олиш дафтари мазкур Низомнинг 4-иловасига мувофиқ электрон шаклда юритилади. Бунда расмийлаштирилган адвокатлик гувоҳномаларини беришни ҳисобга олиш дафтаридаги тегишли буйруқларнинг реквизитларида буйруқнинг санаси ва рақами кўрсатилиши керак.
13. Гувоҳнома талабгор ёки адвокат томонидан шахсини тасдиқловчи ҳужжат (Ўзбекистон Республикасининг фуқаролик паспорти) кўрсатилганидан кейин шахсан ўзига берилади.
Агар адвокатга бошқа адвокатлик тузилмаси тузганлиги ёки адвокатлик тузилмасига кирганлиги муносабати билан янги гувоҳнома берилаётган бўлса, у ўзига янги гувоҳнома берилган пайтдан эътиборан амал қилиши тугатилган деб ҳисобланадиган аввал унга берилган гувоҳномани ҳудудий адлия органига қайтариши керак. Агар адвокат қайтарган гувоҳнома аввал бошқа ҳудудий адлия органи томонидан берилган бўлса, ҳудудий адлия органи бу гувоҳномани янги гувоҳноманинг реквизитларини кўрсатган ҳолда тегишли ҳудудий адлия органига юборади.
Гувоҳнома берилаётганда гувоҳноманинг қай даражада тўғри тўлдирилганлиги талабгор ёки адвокатнинг шахсини тасдиқловчи ҳужжат (Ўзбекистон Республикасининг фуқаролик паспорти) даги маълумотлар билан солиштирилади. Гувоҳнома талабгор ёки адвокатга гувоҳнома олганлиги тўғрисида тилхат орқали берилади.
14. Адвокатнинг ихтисослиги ўзгарганда, адвокатлик фаолияти билан шуғулланиш ҳуқуқини берувчи лицензия (кейинги ўринларда лицензия деб аталади) қайта расмийлаштирилганда ёки дубликати берилганда адвокат лицензияни (лицензия дубликатини) олган кундан эътиборан уч кунлик муддат ичида гувоҳнома берган ҳудудий адлия органига лицензиянинг (лицензия дубликатининг) нусхасини ва сўнгги 12 ой мобайнида тушган 3 х 4 см ўлчамдаги рангли фотосуратидан 2 донасини илова қилган ҳолда янги гувоҳнома бериш тўғрисида ариза тақдим этиши шарт.
Янги гувоҳномани бериш ҳудудий адлия органи томонидан икки кунлик муддат ичида амалга оширилади. Бунда адвокат янги гувоҳномани олган пайтидан эътиборан амал қилиши тугатилган деб ҳисобланган аввалги гувоҳномани қайтариши керак.
Янги гувоҳнома берилгунга қадар, адвокат адвокатлик фаолиятини аввал берилган гувоҳнома асосида амалга оширади.
Адвокатлик фаолиятини мазкур банднинг биринчи хатбошиси талабларини бузган ҳолда амалга ошириш қонунчилик ҳужжатларига мувофиқ адвокатнинг жавобгарлигига сабаб бўлади.
(14-банднинг тўртинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
15. Адвокатнинг аризасига биноан йўқотилган ёки яроқсиз ҳолга келган гувоҳнома ўрнига янги гувоҳнома берилиши мумкин.
Йўқотилган ёки яроқсиз ҳолга келган гувоҳнома ўрнига янги гувоҳнома олиш учун адвокат гувоҳнома берган ҳудудий адлия органига гувоҳноманинг йўқотилганлиги ёки яроқсиз ҳолга келганлиги ҳолатларини кўрсатган ҳолда янги гувоҳнома бериш тўғрисида ариза тақдим этади.
Гувоҳнома йўқотилганлиги муносабати билан янги гувоҳнома бериш тўғрисидаги аризага оммавий ахборот воситаларида гувоҳнома йўқотилганлиги ва у ҳақиқий эмас деб топилиши ҳақида хабар эълон қилинганлигини тасдиқловчи ҳужжат илова қилинади. Гувоҳнома яроқсиз ҳолга келганлиги туфайли янги гувоҳнома бериш тўғрисидаги аризага яроқсиз ҳолга келган гувоҳнома илова қилинади.
Йўқотилган гувоҳнома адвокат томонидан оммавий ахборот воситаларида хабар эълон қилинган кундан эътиборан ҳақиқий эмас деб топилади. Бу ҳақда ҳудудий адлия органи суд-тергов органларига маълум қилади.
Ҳудудий адлия органи гувоҳнома йўқотилганлиги ёки яроқсиз ҳолга келганлиги факти бўйича зарур бўлганда, тегишли ҳудудий бошқармани жалб қилиб, текширув ўтказади, унинг натижалари бўйича адвокат интизомий жавобгарликка тортилиши мумкин. Кўрсатилган текширув натижаларига қараб, адвокат мақомини тўхтатиб туриш ва тугатиш учун асослар мавжуд бўлмаган тақдирда, янги гувоҳнома берилади.
Янги гувоҳнома берилган кундан эътиборан яроқсиз ҳолга келган гувоҳноманинг амал қилиши тугатилган деб ҳисобланади.
16. Мазкур Низомда назарда тутилган ҳолларда янги гувоҳнома бериш ҳудудий адлия органи раҳбарининг буйруғи билан расмийлаштирилади. Ҳудудий адлия органи янги гувоҳнома берилганлиги тўғрисида уч кунлик муддат ичида берилган гувоҳноманинг реквизитларини кўрсатган ҳолда тегишли ҳудудий бошқармани ёзма шаклда хабардор қилади.
17. Адвокат адвокатлик тузилмасидан чиққанида (адвокат билан меҳнат шартномаси (контракт) бекор қилинганда) тегишли адвокатлик бюроси, адвокатлик фирмаси, адвокатлар ҳайъати ва ҳудудий бошқарма бу ҳақда шу куннинг эртасидан кечиктирмай гувоҳнома берган ҳудудий адлия органига маълум қилиши керак.
Агар адвокатлик тузилмасидан чиқиш адвокатлик фаолиятини давом эттириш учун адвокатлик тузилмаси ташкил этиш ёки бошқа адвокатлик тузилмасига кириш билан боғлиқ бўлмаса, адвокат чиқаётган тегишли адвокатлик тузилмаси ёки ҳудудий бошқарманинг раҳбари ҳудудий адлия органининг кўрсатмасига биноан адвокатдан гувоҳномани олиб қўйиши ва гувоҳнома олиб қўйилган куннинг эртасидан кечиктирмай уни ҳудудий адлия органига қайтариши, айни бир вақтда меҳнат шартномаси (контракт) бекор қилинганлиги тўғрисидаги буйруқдан нусха тақдим этиши керак.
18. Адвокат мақомини тўхтатиб туриш «Адвокатура тўғрисида»ги Ўзбекистон Республикаси Қонунида назарда тутилган ҳолларда малака комиссияси қарори билан амалга оширилади.
Ушбу қарор асосида тегишли ҳудудий адлия органи раҳбарининг адвокат мақомини тўхтатиб туриш тўғрисидаги буйруғи расмийлаштирилади, бу эса, гувоҳноманинг амал қилишини тўхтатиб туришга олиб келади.
Агар адвокат мақомини тўхтатиб туриш лицензия амал қилишини тўхтатиб туриш оқибати бўлса, буйруқда бир вақтнинг ўзида лицензиянинг амал қилишини ва адвокат мақомини тўхтатиб туриш кўрсатилади. Малака комиссиясининг адвокатлик мақомини тўхтатиб туриш ҳақидаги қарори қабул қилинган кундан эътиборан адвокат мақоми тўхтатилган ҳисобланади.
Ҳудудий адлия органи уч кунлик муддат ичида адвокатнинг гувоҳномасини олиб қўяди, бундан адвокат бедарак йўқолган деб топилган ҳол мустасно, ва тегишли ҳудудий бошқармага адвокат мақоми тўхтатилганлиги ёки тугатилганлиги ҳақида хабар беради.
19. «Адвокатура тўғрисида»ги Ўзбекистон Республикаси Қонунининг 131-моддасига мувофиқ адвокат мақоми тўхтатиб турилган шахс адвокат мақомини тўхтатиб туриш учун асос бўлган ҳоллар тугатилганидан кейин уч ой ичида адвокатлик фаолиятига киришиши керак.
Адвокат мақоми тўхтатиб турилган шахс мазкур банднинг биринчи хатбошисида кўрсатилган муддат ўтишига камида ўн кун олдин тегишли малака комиссиясига адвокат мақомини тиклаш тўғрисидаги ариза билан мурожаат қилади.
Аризага адвокат мақомини тўхтатиб туриш учун асос бўлган ҳолатлар бартараф этилганлигини тасдиқловчи ҳужжатлар илова қилинади. Малака комиссияси кўрсатилган муддатда аризани кўриб чиқади ва тегишли қарор қабул қилади.
Малака комиссиясининг адвокат мақомини тиклаш ҳақидаги қарори асосида ҳудудий адлия органи раҳбарининг адвокат мақомини тиклаш ва гувоҳномани қайтариш тўғрисидаги буйруғи расмийлаштирилади.
20. Адвокат мақоми «Адвокатура тўғрисида»ги Ўзбекистон Республикасининг Қонунида назарда тутилган ҳолларда лицензиянинг амал қилишини тугатилиши муносабати билан тугатилади. Адвокат мақомини тугатиш тўғрисида ҳудудий адлия органи раҳбарининг буйруғи расмийлаштирилади.
21. Ҳудудий адлия органи тегишли буйруқни чиқарган сана гувоҳнома берилган, унинг амал қилиши тўхтатиб турилган ва тугатилган сана ҳисобланади.
22. Амал қилиши тугатилган гувоҳномалар, шунингдек мазкур Низомда назарда тутилган ҳолларда ўрнига янги гувоҳномалар берилган гувоҳномалар ҳудудий адлия органлари томонидан йўқ қилиниши ва бу ҳақда далолатнома тузилиши керак. Мазкур Низомнинг 10-бандида назарда тутилган гувоҳномалар ҳам шундай тартибда йўқ қилинади.
23. Ҳудудий адлия органлари адвокат мақоми тўхтатиб турилганлиги, тикланганлиги ва тугатилганлиги тўғрисидаги хабарни оммавий ахборот воситаларида эълон қиладилар.
Ўзбекистон Республикаси Солиқ кодексининг 84-моддасига мувофиқ адвокатга гувоҳнома берган ҳудудий адлия органлари гувоҳнома берилган фактлар ҳақида тегишли давлат солиқ хизмати органларига, шунингдек, мазкур гувоҳноманинг амал қилиши тўхтатиб турилганлиги ёки тугатилганлиги тўғрисида маълумот бериши шарт.
24. Адвокат мақоми билан боғлиқ маълумотлар ҳудудий адлия органлари томонидан адвокатларнинг давлат реестрларига киритилади.
Адвокатларнинг давлат реестрларини юритиш тартиби Ўзбекистон Республикаси Адлия вазирлиги томонидан белгиланади.
3-боб. Якуний қоидалар
25. Адвокат гувоҳнома сақланиши учун шахсан жавобгардир. Гувоҳномани бошқа шахсларга бериш тақиқланади.
26. Мазкур Низом талабларини бузганликда айбдор бўлган шахслар қонунчилик ҳужжатларига мувофиқ жавобгарликка тортиладилар.
(26-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
Адвокатлик гувоҳномаси шакли ва уни бериш тартиби тўғрисида низомга
1-ИЛОВА
1-ИЛОВА
Адвокатлик гувоҳномаси шакли ва уни бериш тартиби тўғрисида низомга
2-ИЛОВА
2-ИЛОВА
Адвокатлик гувоҳномасини бериш
СХЕМАСИ
|
Босқичлар |
Субъектлар |
Тадбирлар |
Бажариш муддатлари | |||
|
|
||||||
|
1-босқич |
Талабгор Адвокат |
Адвокатлик гувоҳномасини олиш учун ҳудудий адлия органига шахсан мурожаат қилади. |
Адвокатлик тузилмасининг рўйхатдан ўтказилганлиги тўғрисида гувоҳнома берилган ёки тегишли адвокатлик тузилмасига кирган куннинг эртасидан кечиктирмай | |||
|
|
||||||
|
2-босқич |
Ҳудудий адлия органи |
1. Ариза ва унга иловаларнинг қонунчилик ҳужжатлари талабларига мувофиқлигини ўрганади. 2. Талабгор ёки адвокатнинг адвокатлик гувоҳномасини расмийлаштиради. |
2 иш кунида | |||
|
|
||||||
|
3-босқич |
Ҳудудий адлия органи |
1. Адвокатлик гувоҳномасини талабгор ёки адвокатга гувоҳнома олганлиги тўғрисида тилхат орқали беради. 2. Берилган адвокатлик гувоҳномасининг реквизитларини кўрсатган ҳолда Ўзбекистон Республикаси Адвокатлар палатасининг тегишли ҳудудий бошқармасини ёзма равишда хабардор қилади. |
1 иш кунида
| |||
(2-илова Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
Адвокатлик гувоҳномаси шакли ва уни бериш тартиби тўғрисида низомга
3-ИЛОВА
3-ИЛОВА
|
ГУВОҲНОМАЛАР БЛАНКАЛАРИНИНГ КИРИМИНИ ҲИСОБГА ОЛИШ ДАФТАРИ | |||
|
____________________________________________________________________ | |||
|
Бланка номи (гувоҳноманинг муқоваси ва ички томони) |
Бланкаларнинг киримини рўйхатга олиш санаси |
Олинган бланкалар сони |
Юк хатининг рақами ва санаси |
|
1 |
2 |
3 |
4 |
|
|
|||
|
|
|||
|
| |||
|
Бланка номи (гувоҳноманинг муқоваси ва ички томони) |
Берилган бланкалар сони |
Бланкаларни олган масъул шахснинг Ф.И.О. ва имзоси |
Олинган сана |
|
1 |
2 |
3 |
4 |
|
|
|||
Адвокатлик гувоҳномаси шакли ва уни бериш тартиби тўғрисида низомга
4-ИЛОВА
4-ИЛОВА
РАСМИЙЛАШТИРИЛГАН АДВОКАТЛИК ГУВОҲНОМАЛАРИ БЕРИШНИ ҲИСОБГА ОЛИШ
ДАФТАРИ
|
_________________________________________________________________________________________________ | ||||||||||||||
|
Тартиб рақами —гувоҳноманинг рақами |
Адвокатнинг Ф.И.О. |
Лицензиянинг рақами ва берилган санаси |
Рухсат берилган ихтисослик |
Адвокатлик тузилмасининг номи ва жойлашган ери (почта манзили) |
Адвокатлик гувоҳномасининг берилган санаси |
Қуйидаги муносабат билан гувоҳномани бериш тўғрисидаги буйруқнинг реквизитлари: | ||||||||
|
Адвокат мақомини бериш |
Адвокатлик тузилмасини тузиш ёки бошқа адвокатлик тузилмасига кириш |
Ихтисосликни ўзгариши |
Лицензияни қайта расмийлаштириш ёки дубликатини бериш |
Гувоҳномани йўқотиш ёки яроқсиз ҳолга келиши | ||||||||||
|
1 |
2 |
3 |
4 |
5 |
6 |
7 |
8 |
9 |
10 |
11 | ||||
|
|
||||||||||||||
|
давоми | ||||||||||||||
|
Адвокат мақоми тўхтатиб турилганлиги тўғрисидаги буйруқнинг реквизитлари |
Адвокат мақоми тўхтатиб турилганлиги муносабати билан гувоҳнома олиб қўйилган сана |
Адвокат мақомини тикланганлиги тўғрисидаги буйруқнинг реквизитлари |
Адвокат мақоми тўхтатиб турилганда олиб қўйилган гувоҳноманинг қайтарилган санаси |
Адвокат мақоми тугатилганлиги тўғрисидаги буйруқнинг реквизитлари |
Адвокат мақоми тугатилганлиги муносабати билан гувоҳноманинг олиб қўйилган санаси |
Гувоҳнома йўқ қилинганлиги тўғрисидаги маълумотлар (сана, асос ва б.) | ||||||||
|
12 |
13 |
14 |
15 |
16 |
17 |
18 | ||||||||
|
|
||||||||||||||
(Қонун ҳужжатлари маълумотлари миллий базаси, 25.09.2019 й., 09/19/807/3802-сон; Қонунчилик маълумотлари миллий базаси, 05.04.2022 й., 09/22/153/0266-сон)
