|
Ҳужжат кучини йўқотган " " 04.12.2018
|
Ўзбекистон Республикаси Вазирлар Маҳкамасининг
қарори
«Балиқ ишлаб чиқарувчи» эркин иқтисодий зонаси фаолиятини ташкил этиш чора-тадбирлари тўғрисида
LexUZ шарҳиМазкур қарор Ўзбекистон Республикаси Вазирлар Маҳкамасининг 2018 йил 1 декабрдаги 974-сонли «Тошкент вилоятининг Қуйи Чирчиқ туманида замонавий агросаноат кластерини ташкил этиш чора-тадбирлари тўғрисида»ги қарорига асосан ўз кучини йўқотган.
Ўзбекистон Республикаси Президентининг «Балиқчилик тармоғини жадал ривожлантиришга доир қўшимча чора-тадбирлар тўғрисида»ги 2018 йил 6 апрелдаги ПҚ-3657-сон қарори ижроси юзасидан Вазирлар Маҳкамаси қарор қилади:
1. Ўзбекистон Республикаси Президентининг «Балиқчилик тармоғини жадал ривожлантиришга доир қўшимча чора-тадбирлар тўғрисида»ги 2018 йил 6 апрелдаги ПҚ-3657-сон қарорига мувофиқ Тошкент вилояти Қуйи Чирчиқ тумани ҳокимлигига суд қарори билан берилган мол-мулк ва ер участкалари, шу жумладан, сув ҳавзалари негизида «Балиқ ишлаб чиқарувчи» эркин иқтисодий зонаси ташкил этилганлиги маълумот учун қабул қилинсин.
2. Бошқарув ходимларининг умумий сони 5 нафардан иборат бўлган «Балиқ ишлаб чиқарувчи» эркин иқтисодий зонаси дирекцияси давлат унитар корхонаси ташкил этилсин (кейинги ўринларда Дирекция деб юритилади).
Эркин иқтисодий зоналар ва кичик саноат зоналари фаолиятини мувофиқлаштирувчи республика кенгашига, зарурат бўлганда, Дирекциянинг тузилмаси ва ходимлари сонига инвестициялар ҳажми ва лойиҳалар сонидан келиб чиққан ҳолда ўзгартиришлар киритиш ҳуқуқи берилсин.
3. Қуйидагилар:
«Балиқ ишлаб чиқарувчи» эркин иқтисодий зонаси дирекцияси давлат унитар корхонасининг ташкилий тузилмаси 1-иловага мувофиқ;
«Балиқ ишлаб чиқарувчи» эркин иқтисодий зонаси дирекцияси давлат унитар корхонасининг устави 2-иловага мувофиқ;
«Балиқ ишлаб чиқарувчи» эркин иқтисодий зонаси ҳудудига жойлаштириш учун инвестиция лойиҳаларини танлаб олиш ҳамда қатнашчиларни рўйхатдан ўтказиш тартиби тўғрисида низом 3-иловага мувофиқ;
«Балиқ ишлаб чиқарувчи» эркин иқтисодий зонаси таркибидаги 3054,6 гектар ер майдонининг чегара ҳудудлари тавсифи 4-иловага мувофиқ тасдиқлансин.
4. Белгилаб қўйилсинки, «Балиқ ишлаб чиқарувчи» эркин иқтисодий зонаси қатнашчиларига ер участкалари бериш тартиби Вазирлар Маҳкамасининг 2018 йил 16 январдаги 29-сон қарори билан тасдиқланган Эркин иқтисодий зоналар қатнашчиларига ер участкалари бериш тартиби тўғрисида низомга мувофиқ амалга оширилади.
5. Ўзбекистон Республикаси Инвестициялар бўйича давлат қўмитаси Иқтисодиёт вазирлиги ва Молия вазирлиги билан биргаликда ҳар йили келгуси йиллар учун ривожланиш давлат дастурини шакллантиришда белгиланган тартибда уларга «Балиқ ишлаб чиқарувчи» эркин иқтисодий зонасининг муҳандислик-коммуникация, йўл-транспорт ва ишлаб чиқариш инфратузилмасини ривожлантириш бўйича лойиҳалар киритилишини назарда тутсин.
6. Тошкент вилояти ҳокимлиги:
Ўзбекистон Республикаси Инвестициялар бўйича давлат қўмитаси, Қишлоқ хўжалиги вазирлиги, «Ўзбекбалиқсаноат» уюшмаси ҳамда бошқа манфаатдор вазирликлар ва идоралар билан биргаликда икки ой муддатда «Балиқ ишлаб чиқарувчи» эркин иқтисодий зонасида балиқ етиштиришни янада ривожлантириш, инвесторларни жалб этиш ва уларни жойлаштириш «йўл харитаси»ни ишлаб чиқсин ва тасдиқлаш учун Вазирлар Маҳкамасининг Қишлоқ ва сув хўжалиги, қишлоқ хўжалиги ва озиқ-овқат маҳсулотларини қайта ишлаш масалалари комплексига киритсин;
келгуси йилларда ўзини ўзи молиялаштиришга ўтказиш шарти билан 2018 — 2020 йиллар давомида Дирекцияга маҳаллий бюджетнинг қўшимча манбалари ҳисобидан асосланган ҳисоб-китоблар бўйича зарур маблағлар ажратсин;
иккита автотранспорт воситаси, жумладан битта енгил ва битта йўл танламайдиган автомобиль харид қилиш учун зарур маблағлар, шунингдек, уларни сақлаш учун лимит ажратсин;
бир ой муддатда Дирекцияни Тошкент вилояти, Қуйи Чирчиқ тумани, Қўрғонча қишлоғи «Балиқчи» маҳалла фуқаролар йиғини ҳудудидаги бинога текин фойдаланиш ҳуқуқи асосида жойлаштирилишини таъминласин.
7. Вазирлар Маҳкамасининг 2018 йил 16 январдаги 29-сон қарори билан тасдиқланган Эркин иқтисодий зоналар ҳудудида жойлаштириш учун инвестиция лойиҳаларини танлаб олиш ҳамда эркин иқтисодий зоналар қатнашчиларини рўйхатдан ўтказиш тартиби тўғрисидаги низомнинг 1-банди қуйидаги мазмундаги иккинчи хатбоши билан тўлдирилсин:
«Ушбу Низомнинг амал қилиши балиқчилик йўналишидаги эркин иқтисодий зонаси ҳудудига жойлаштириш учун инвестиция лойиҳаларини танлаб олиш ҳамда қатнашчиларни рўйхатдан ўтказишга нисбатан татбиқ этилмайди».
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари З.Т. Мирзаев, Ўзбекистон Республикаси Бош вазирининг ўринбосари — Ўзбекистон Республикаси Инвестициялар бўйича давлат қўмитаси раиси С.Р. Холмурадов ва Тошкент вилояти ҳокими Ғ.И. Ибрагимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 20 август,
677-сон
Вазирлар Маҳкамасининг 2018 йил 20 августдаги 677-сон қарорига
1-ИЛОВА
1-ИЛОВА
«Балиқ ишлаб чиқарувчи» эркин иқтисодий зонаси дирекцияси давлат унитар корхонасининг
ташкилий тузилмаси
Бошқарув ходимларининг умумий сони — 5 нафар.
Вазирлар Маҳкамасининг 2018 йил 20 августдаги 677-сон қарорига
2-ИЛОВА
2-ИЛОВА
«Балиқ ишлаб чиқарувчи» эркин иқтисодий зонаси дирекцияси давлат унитар корхонасининг
устави
1-боб. Умумий қоидалар
1. «Балиқ ишлаб чиқарувчи» эркин иқтисодий зонаси дирекцияси давлат унитар корхонаси (кейинги ўринларда Дирекция деб юритилади) оператив бошқарув ҳуқуқи асосида ўзига берилган давлат мулкида, жумладан сув ҳавзалари негизида давлат унитар корхонаси шаклида ташкил этилган тижорат ташкилоти ҳисобланади.
Дирекция ўзига бириктирилган мулкка нисбатан, қонунда белгиланган доирада, ўз фаолияти мақсадларига, мулкдор (ёки унинг топшириғи билан у томонидан масъул этиб тайинланган давлат органи — муассис) топшириқларига мувофиқ эгалик қилиш, фойдаланиш ва тасарруф этиш ҳуқуқини амалга оширади.
2. Дирекция ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонларига, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Уставга ҳамда бошқа норматив-ҳуқуқий ҳужжатларга амал қилади.
3. Дирекция юридик шахс ҳисобланади, алоҳида мулкка, мустақил балансга, банкларда ҳисоб рақамларига, шу жумладан, валюта ҳисоб рақамларига, эмблемага, штамплар ва бланкаларга, Ўзбекистон Республикаси Давлат герби тасвири туширилган, ўз номи давлат тилида ёзилган муҳрга ва бошқа реквизитларга эга бўлади.
Дирекциянинг расмий номи:
а) давлат тилида:
тўлиқ номи — «Baliq ishlab chiqaruvchi erkin iqtisodiy zonasi direktsiyasi» Davlat unitar korxonasi;
қисқартирилган номи — «Baliq ishlab chiqaruvchi» EIZ direktsiyasi» DUK;
б) рус тилида:
тўлиқ номи — Государственное унитарное предприятие «Дирекция свободной экономической зоны «Балиқ ишлаб чиқарувчи»;
қисқартирилган номи — ГУП «Дирекция СЭЗ «Балиқ ишлаб чиқарувчи»;
в) инглиз тилида:
тўлиқ номи – «Directorate of free economic zone «Baliq ishlab chiqaruvchi» State Unitary Company;
қисқартирилган номи — «Directorate of FEZ «Baliq ishlab chiqaruvchi» SUC.
4. Дирекциянинг жойлашган жойи (почта манзили): Тошкент вилояти, Қуйи Чирчиқ тумани, Қўрғонча қишлоғи, «Балиқчи» маҳалла фуқаролар йиғини.
5. Ўзбекистон Республикаси Вазирлар Маҳкамаси Дирекциянинг муассиси (кейинги ўринларда — Муассис) ҳисобланади.
6. Дирекция ўз номидан қонун ҳужжатларида белгиланган тартибда мулкий ва шахсий номулкий ҳуқуқларни олиши ва амалга ошириши, мажбуриятлар олиши, судда даъвогар ва жавобгар бўлиши, низоларни ҳал этишда бошқа органларда вакиллик қилиши мумкин.
7. Дирекция Муассиснинг розилигига кўра тижорат ташкилотларининг, шунингдек, Ўзбекистон Республикаси қонун ҳужжатларига мувофиқ юридик шахсларнинг қатнашишига йўл қўйиладиган нотижорат ташкилотларида қатнашчи (акциядор, аъзо) бўлиши мумкин.
8. Дирекция бошқа давлат корхонасининг муассиси бўлиши мумкин эмас.
2-боб. Дирекциянинг асосий мақсади, вазифалари ва фаолият йўналишлари
9. «Балиқ ишлаб чиқарувчи» эркин иқтисодий зонасини (кейинги ўринларда — «Балиқ ишлаб чиқарувчи» ЭИЗ) ривожлантириш дастурларининг тўлиқ ва ўз вақтида бажарилишини таъминлаш, шунингдек, «Балиқ ишлаб чиқарувчи» ЭИЗ ҳудудида алоҳида ҳуқуқий режимга риоя этилишини таъминлаш йўли билан оператив бошқариш, «Балиқ ишлаб чиқарувчи» ЭИЗ қатнашчиларига хизматлар кўрсатишдан ҳамда ушбу Уставда назарда тутилган бошқа ишлар (хизматлар)ни бажаришдан (кўрсатишдан) фойда олиш Дирекция фаолиятининг асосий мақсади ҳисобланади.
10. Қуйидагилар Дирекциянинг асосий вазифалари ва фаолият йўналишлари ҳисобланади:
юқори маҳсулдорликка эга балиқ турларининг ота-она тўдаларини шакллантириш, парваришлаш учун инновацион технологияларини жорий этиш ва наслчилик хўжалигини ташкил этиш;
«Балиқ ишлаб чиқарувчи» ЭИЗ қатнашчиларига балиқ чавоқлари етказиб бериш мақсадида замонавий инкубация цехи фаолиятини йўлга қўйиш;
мавжуд сув ҳавзаларини модернизация қилиш ва қайта таъмирлашни ташкил этиш;
балиқчилик хўжаликлари учун оқсилга бой озуқа-ем ишлаб чиқариш бўйича замонавий қувватларни ишга тушириш ҳисобига озуқа базасини мустаҳкамлаш;
балиқ етиштириш бўйича инновацион ва интенсив технологияларни йўлга қўйиш, шу жумладан, ёпиқ сув айланма тизимида, кичик сув ҳовузларида балиқ етиштириш ҳамда сунъий сув ҳавзалари ҳосилдорлигини ошириш ҳисобига балиқ овлаш ҳажмларини кўпайтиришни ташкил этиш;
аҳоли истеъмоли учун қайта ишланган балиқ маҳсулотларини ишлаб чиқариш ва экспортга йўналтириш бўйича халқаро талабларга мос замонавий ишлаб чиқариш қувватларини йўлга қўйиш;
сувнинг гидрокимёвий таркибини таҳлил этиш, балиқларни касалликлардан ҳимоя қилиш ва даволаш учун замонавий лаборатория фаолиятини ташкил этиш;
балиқ етиштиришда инновацион ғоялар ва интенсив технологияларни жорий этишда илмий-тадқиқот ишларини, шунингдек, таълим муассасалари талабалари учун балиқчилик тармоғида амалиёт ўташни ташкиллаштириш;
«Балиқ ишлаб чиқарувчи» ЭИЗ қатнашчиларини рўйхатдан ўтказиш ва уларнинг реестрини юритиш, уларга тегишли гувоҳномалар бериш;
белгиланган тартибда танланган инвесторлар билан «Балиқ ишлаб чиқарувчи» ЭИЗнинг Тошкент вилояти Эркин иқтисодий зоналар ва кичик саноат зонаси Маъмурий кенгаши (кейинги ўринларда — Маъмурий кенгаш) қарорларига мувофиқ «Балиқ ишлаб чиқарувчи» ЭИЗ ҳудудида инвестициялар киритиш тўғрисида шартномалар тузиш;
белгиланган тартибда танланган инвесторлар томонидан ўз зиммасига қабул қилган мажбуриятларнинг зарур даражада бажарилишини назорат қилиш, кейинчалик унинг натижаларини Маъмурий кенгашга тақдим этиш;
«Балиқ ишлаб чиқарувчи» ЭИЗ ҳудудида инвестиция лойиҳаларини амалга ошириш учун хорижий ва маҳаллий инвесторларни қидириш ва жалб этиш;
ишлаб чиқилган «Балиқ ишлаб чиқарувчи» ЭИЗ бош режаси ва Маъмурий кенгаш қарори билан маъқулланган инвестиция лойиҳаларини жойлаштириш;
«Балиқ ишлаб чиқарувчи» ЭИЗ ҳудудида жойлашган давлат мулки бўлган кўчмас мулк объектларини Дирекцияга берилган ваколатлар доирасида бошқариш;
«Балиқ ишлаб чиқарувчи» ЭИЗ қатнашчиларига инвестиция лойиҳаларини ўз вақтида амалга ошириш, ташкилотларни ишга тушириш ва уларнинг фаолияти учун зарур бўлган инфратузилма (электр энергияси, газ ва сув таъминоти, канализация, кириш йўллари ва бошқалар) билан таъминлаш масалаларни ҳал этишда кўмаклашиш;
«Балиқ ишлаб чиқарувчи» ЭИЗ қатнашчиларига, шу жумладан давлат органларида уларнинг манфаатларини ифодалаш йўли билан хизматлар кўрсатиш;
Маъмурий кенгаш ваколатларига кирувчи масалалар бўйича унинг мажлисларида кўриб чиқиш учун маълумотлар тайёрлаш.
«Балиқ ишлаб чиқарувчи» ЭИЗ қонун ҳужжатларига мувофиқ бошқа вазифаларни ҳам амалга ошириши мумкин.
Ўзбекистон Республикаси қонун ҳужжатларида ушбу Уставда назарда тутилган тегишли фаолият турининг лицензияланиши зарурлиги белгиланган тақдирда, Дирекция фаолиятнинг ушбу турини лицензия олмасдан, тегишли лицензияловчи орган билан тузилган лицензия битими асосида амалга оширишга ҳақлидир.
11. Дирекция Ўзбекистон Республикаси қонун ҳужжатларида тақиқланмаган фаолиятнинг бошқа турларини ҳам амалга ошириши мумкин.
3-боб. Дирекция фаолиятини бошқариш
12. Дирекция Муассисга, Эркин иқтисодий зоналар ва кичик саноат зоналари фаолиятини мувофиқлаштирувчи республика кенгашига (кейинги ўринларда — Республика кенгаши) ва Маъмурий кенгашга ҳисобот беради.
13. Муассис қуйидаги ҳуқуқларга эга:
Дирекция фаолиятининг мақсади ва йўналишларини белгилаш;
Дирекция Уставига ўзгартириш ва қўшимчалар киритиш тўғрисида қарорлар қабул қилиш;
Дирекциянинг ортиқча, фойдаланилмаётган ёхуд белгиланган мақсадда фойдаланилмаётган мулкини олиб қўйиш ва тасарруф этиш;
Дирекцияга берилган мулкдан фойдаланишдан олинган соф фойданинг бир қисмини ёки ҳаммасини олиш;
Дирекция мулки билан амалга оширилган битимларни ҳаққоний эмас деб эътироф этиш тўғрисида судга даъво аризаси билан мурожаат қилиш;
Дирекцияга етказилган зарарларни қоплаш тўғрисида даъво тақдим этиш;
Дирекцияни қайта ташкил этиш ёки тугатиш тўғрисида қарор қабул қилиш, тугатиш комиссиясини тайинлаш ва тугатиш балансини тасдиқлаш;
меҳнатга оид қонун ҳужжатларида белгиланган тартибда Дирекция раҳбари билан меҳнат шартномасини муддатидан олдин тугатиш.
Муассис қонун ҳужжатларига мувофиқ бошқа ҳуқуқларга ҳам эга бўлиши мумкин.
14. Республика кенгаши қуйидаги ҳуқуқларга эга:
Дирекциянинг «Балиқ ишлаб чиқарувчи» ЭИЗни ривожлантириш бўйича фаолияти стратегик вазифалари ва йўналишларини белгилаш;
Дирекциянинг молия-хўжалик фаолиятини ҳар чоракда ўрганишни ташкил қилиш;
ҳар чоракда Дирекция фаолияти ҳақидаги ҳисоботни эшитиш;
Дирекциянинг штатлар жадвали ва харажатлар сметасини тасдиқлаш.
Республика кенгаши қонун ҳужжатларига мувофиқ бошқа ҳуқуқларга ҳам эга бўлиши мумкин.
15. Маъмурий кенгаш қуйидаги ҳуқуқларга эга:
Дирекция фаолиятига раҳбарликни амалга ошириш;
Дирекция фаолиятини назорат қилиш;
Дирекция директори лавозимига номзодларни тасдиқлаш учун Республика кенгашига киритиш;
Дирекция мутахассисларини танлаб олиш;
Дирекциянинг штат жадваллари ва харажатлар сметасини келишиш;
Дирекция фаолиятини режали ташкиллаштириш, Дирекциянинг чораклик иш режаларини тасдиқлаш ва унинг бажарилиши юзасидан назоратни таъминлаш;
«Балиқ ишлаб чиқарувчи» ЭИЗнинг мустақил бюджетидан мақсадли фойдаланилиши юзасидан назоратни амалга ошириш.
Маъмурий кенгаш қонун ҳужжатларига мувофиқ бошқа ҳуқуқларга эга бўлиши мумкин.
Маъмурий кенгаш ўзига юкланган вазифаларни бажариш учун Дирекция фаолиятига тааллуқли бўлган ҳужжатларни талаб қилиб олиш ҳуқуқига эга. Олинган ҳужжатлардан Маъмурий кенгаш томонидан фақат хизмат мақсадларида фойдаланилади.
16. Дирекцияни «Ўзбекбалиқсаноат» уюшмаси раиси томонидан, Муассис билан келишилган ҳолда лавозимга тайинланадиган ва лавозимдан озод этиладиган директор бошқаради.
17. Директор:
қонун ҳужжатлари талабларини бажаришга, Дирекция ходимларининг меҳнат шароитларини муҳофаза қилиш ва яхшилашга, атроф муҳитни муҳофаза қилиш ва табиий ресурслардан оқилона фойдаланиш соҳасидаги норма ва қоидаларга риоя этилишини таъминлашга йўналтирилган тадбирларни ишлаб чиқади ва жорий этади;
«Балиқ ишлаб чиқарувчи» ЭИЗни ривожлантириш дастурлари амалга оширилишини ташкил этади;
Дирекциянинг асосий фаолиятини такомиллаштиришга, бошқаришнинг энг замонавий усулларини жорий этишга йўналтирилган чора-тадбирларни амалга оширади;
Дирекция номидан ишончномасиз ҳаракат қилади, барча ташкилотларда, шу жумладан хорижий ташкилотларда унинг манфаатларини ифодалайди;
ходимларни ишга қабул қилади, улар билан меҳнат шартномалари (контрактлар) тузади ҳамда уларни ўзгартиради ва бекор қилади;
қонун ҳужжатларида белгиланган тартибда ишончномалар беради;
кадрларни тайёрлаш ва уларнинг малакасини ошириш бўйича чора-тадбирларни амалга оширади;
Дирекциянинг барча ходимлари учун мажбурий бўлган буйруқлар, фармойишлар ва кўрсатмалар қабул қилади;
Дирекциянинг ички иш тартибини ва хўжалик фаолиятини тартибга солувчи ҳужжатларни тасдиқлайди;
Дирекция томонидан қонун ҳужжатларига риоя қилинишини таъминлайди;
Дирекцияга юкланган вазифаларни амалга ошириш учун зарур бўлган бошқа функцияларни амалга оширади.
18. Директор:
Муассис, Республика кенгаши ва Маъмурий кенгаш олдида Дирекция фаолияти тўғрисида белгиланган тартибда ҳисобот беради;
Дирекциянинг Ўзбекистон Республикаси Молия вазирлиги билан келишган ҳолда Маъмурий кенгаш томонидан тасдиқланадиган мустақил бюджет маблағларининг тасарруф этувчиси ҳисобланади;
Дирекциянинг мустақил бюджети ижроси тўғрисидаги ҳисоботни белгиланган тартибда Ўзбекистон Республикаси Молия вазирлигига тақдим этади.
19. Директор ўз зиммасига юкланган вазифаларнинг бажарилиши, шунингдек, Дирекцияга берилган давлат мулкининг сақланиши ва ундан мақсадли фойдаланилиши юзасидан қонун ҳужжатларида белгиланган тартибда жавоб беради.
4-боб. Дирекциянинг устав фонди
20. Дирекциянинг устав фонди «Балиқ ишлаб чиқарувчи» ЭИЗ фаолиятини оператив бошқариш учун Муассис томонидан ўзига берилган маблағлар, мол-мулк ва бошқа активлар йиғиндисидан иборат.
21. Дирекция устав фондининг миқдори 1 млрд. сўмни ташкил этади.
5-боб. Дирекция мулкини тасарруф этиш
22. Муассис томонидан Дирекцияга оператив бошқариш ҳуқуқи асосида берилган асосий фондлар ва айланма маблағлар Дирекция мол-мулкини ташкил этади.
23. Дирекциянинг асосий фондлари ва айланма маблағлари бўлинмайди ва улушлар (ҳиссалар, пайлар) бўйича тақсимланиши мумкин эмас.
24. Республика кенгаши Дирекцияга берилган давлат мулкидан белгиланган мақсадда фойдаланилишини ва унинг сақланишини, шунингдек, ўзгага берилишини Муассис номидан назорат қилади.
25. Директор Муассис билан келишган ҳолда Дирекция мулкини қуйидаги ҳолатларда тасарруф этиши мумкин:
асосий воситаларни сотиш, уларни ижарага ёки гаровга бериш;
мол-мулкни бошқа хўжалик жамиятининг устав фондига улуш сифатида киритиш;
бошқа хўжалик жамиятларининг акциялари (улушлари)ни сотиб олиш ва сотиш;
Дирекция фаолияти мақсадларига мувофиқ бўлмаган мол-мулкни бошқача тарзда тасарруф этиш.
6-боб. Дирекция фаолиятини молиялаштириш манбалари
26. Қуйидагилар Дирекция фаолиятини молиялаштириш манбалари ҳисобланади:
давлат мулки бўлган ва «Балиқ ишлаб чиқарувчи» ЭИЗ ҳудудида жойлашган бинолар ва иншоотларни ижарага беришдан олинган даромадларининг бир қисми;
хизматлар кўрсатишдан олинган даромадлар;
Республика кенгаши томонидан белгиланган миқдорда «Балиқ ишлаб чиқарувчи» ЭИЗ қатнашчиларининг ажратмалари ва ЭИЗ қатнашчилари сифатида рўйхатдан ўтиш учун тўловлари;
Ўзбекистон Республикасининг ривожланиш давлат дастурларидаги маблағлари;
қонун ҳужжатларида тақиқланмаган бошқа манбалар.
7-боб. Захира ва бошқа фондларни шакллантириш тартиби
27. Дирекция ўз тасарруфида қоладиган соф фойда ҳисобига захира фондини, шунингдек, бошқа фондларни ташкил этиши мумкин, уларнинг миқдори, шакллантириш ва фойдаланиш тартиби Муассис томонидан тасдиқланади.
8-боб. Ҳисоботларни тақдим этиш тартиби
28. Дирекция ҳисобот даври тугагач ваколатли органларга молия ҳисоботини ва рўйхати қонун ҳужжатларида белгиланган бошқа ҳужжатларни тақдим этади ҳамда ҳужжатларнинг сақланиши ва уларнинг давлат томонидан сақлашга берилиши юзасидан белгиланган тартибда жавоб беради.
29. Дирекция фаолиятини назорат қилиш, қонун ҳужжатларида белгиланган тартибда Республика кенгаши томонидан амалга оширилади.
30. Директор Дирекция фаолияти натижалари, маъқулланган инвестиция лойиҳалари ва тасдиқланган ривожланиш дастурларини амалга оширилиши тўғрисида ҳар чоракда Республика кенгашига ҳисобот тақдим этади.
9-боб. Дирекциянинг жавобгарлиги
31. Дирекция ўз мажбуриятлари бўйича ўзига тегишли мулк билан жавоб беради. Муассис Дирекциянинг мулки етарли бўлмаган тақдирда унинг мажбуриятлари бўйича субсидиар жавобгарликни амалга оширади.
32. Дирекция Муассис мажбуриятлари бўйича жавоб бермайди.
10-боб. Дирекцияни тугатиш ва қайта ташкил этиш
33. Дирекция Муассиснинг қарорига кўра, қонун ҳужжатларида белгиланган тартибда ёки суд қарорига биноан тугатилиши ёки қайта ташкил этилиши мумкин.
34. Дирекция тугатилганда унинг ҳуқуқ ва мажбуриятлари ҳуқуқий ворислик тартибида бошқа шахсларга ўтмайди. Дирекция қайта ташкил этилган тақдирда унинг ҳуқуқи ва мажбуриятлари ҳуқуқий ворисга ўтади.
Вазирлар Маҳкамасининг 2018 йил 20 августдаги 677-сон қарорига
3-ИЛОВА
3-ИЛОВА
«Балиқ ишлаб чиқарувчи» эркин иқтисодий зонаси ҳудудига жойлаштириш учун инвестиция лойиҳаларини танлаб олиш ҳамда қатнашчиларни рўйхатдан ўтказиш тартиби тўғрисида
НИЗОМ
1-боб. Умумий қоидалар
1. Ушбу Низом «Балиқ ишлаб чиқарувчи» эркин иқтисодий зонаси (кейинги ўринларда «Балиқ ишлаб чиқарувчи» ЭИЗ деб юритилади) ҳудудига жойлаштириш учун инвестиция лойиҳаларини танлаб олиш ҳамда «Балиқ ишлаб чиқарувчи» ЭИЗ қатнашчиларини рўйхатдан ўтказиш тартибини белгилайди.
2. «Балиқ ишлаб чиқарувчи» ЭИЗ ҳудудига жойлаштириш учун инвестиция лойиҳаларини танлаб олиш бўйича ташкилий масалаларни ҳал этиш Тошкент вилояти эркин иқтисодий зоналар ва кичик саноат зоналари маъмурий кенгаши (кейинги ўринларда — Маъмурий кенгаш) ва «Балиқ ишлаб чиқарувчи» ЭИЗ дирекциясига (кейинги ўринларда — Дирекция) юкланади.
3. Маъмурий кенгашнинг «Балиқ ишлаб чиқарувчи» ЭИЗ ҳудудига эквиваленти 5,0 млн. АҚШ долларидан юқори қийматли инвестиция лойиҳасини жойлаштириш бўйича қарори эркин иқтисодий зоналар ва кичик саноат зоналари маъмурий кенгашларининг фаолиятини мувофиқлаштириш бўйича республика кенгаши (кейинги ўринларда — Республика кенгаши) қарорига мувофиқ амалга оширилади.
4. Қуйидагилар «Балиқ ишлаб чиқарувчи» ЭИЗ инвестиция лойиҳаларини жойлаштиришнинг асосий устувор мезонлари ҳисобланади:
ижарага бериладиган умумий сув ҳавза майдонининг камида 10 фоиз қисмида интенсив усулда балиқ етиштириш ва ҳар бир гектар ҳавзадан 8 тоннадан кам бўлмаган ҳосилдорликка эришиш;
ёпиқ сув айланма тизими иншооти (УЗВ) қуриш ва ҳар бир гектаридан камида 300 тонна балиқ етиштириш;
сув тармоғи дренаж тизимларининг яхлитлигини сақлаб қолиш ва умумий фойдаланишда бўлишини таъминлаш;
юқори маҳсулдор наслли она балиқ тўдаларини шакллантириш;
ташкилотнинг эҳтиёжи учун талаб этиладиган юқори оқсилга бой озуқа базасини шакллантириш.
2-боб. Инвестиция лойиҳаларини танлаб олиш учун «Балиқ ишлаб чиқарувчи» эркин иқтисодий зонаси дирекциясига ҳужжатларни топшириш тартиби
5. «Балиқ ишлаб чиқарувчи» эркин иқтисодий зонаси ҳудудига жойлаштириш учун инвестиция лойиҳаларини танлаб олиш ҳамда қатнашчиларни рўйхатдан ўтказиш ушбу Низомнинг 1-иловасидаги схемага мувофиқ амалга оширилади.
6. Инвестор Дирекцияга ушбу Низомнинг 2-иловасидаги шаклга мувофиқ «Балиқишлаб чиқарувчи» эркин иқтисодий зонаси ҳудудида инвестиция лойиҳасини жойлаштириш учун тўлдирилган инвестиция буюртманомасини (кейинги ўринларда — Инвестиция буюртманомаси) тақдим этади.
Инвестиция буюртманомасига қуйидагилар илова қилинади:
а) юридик шахснинг (инвесторнинг) давлат рўйхатидан ўтказилганлиги тўғрисида гувоҳнома нусхаси;
б) тавсия қилинаётган инвестиция лойиҳасининг бизнес-режаси;
в) инвесторнинг тегишли соҳадаги ва (ёки) шунга ўхшаш лойиҳаларни амалга оширишдаги иш тажрибаси мавжудлигини тасдиқловчи маълумот. Агар инвесторнинг тегишли соҳада ва (ёки) ўхшаш инвестиция лойиҳасини амалга ошириш бўйича иш тажрибаси мавжуд бўлмаса, инвестор Дирекцияга инвестиция лойиҳасини амалга оширишга жалб этаётган технологик ҳамкорлари тўғрисидаги маълумотни тақдим этади;
д) инвесторнинг охирги уч йилдаги молия-хўжалик фаолияти тўғрисида маълумот.
Агарда инвестиция буюртманомасини топшириш вақтида инвестор:
молия-хўжалик фаолиятини юритмаган ёки бир йилдан кам юритган бўлса, инвестор Дирекцияга инвесторнинг биттадан кам бўлмаган муассисининг молия-хўжалик фаолияти тўғрисидаги маълумотларни тақдим этади;
1 йилдан 3 йилгача хўжалик фаолиятини юритаётган бўлса, инвестор Дирекцияга ўзининг ҳақиқатда фаолият юритган даври учун молия-хўжалик фаолияти тўғрисидаги маълумотни тақдим этади.
Ҳужжатлар инвестор томонидан Дирекцияга давлат ёки рус тилида тақдим этилиши мумкин. Инвестор тақдим этилаётган маълумотлар ва ҳужжатларнинг тўғрилиги юзасидан жавоб беради.
7. Дирекцияга тақдим этилаётган бизнес-режада қуйидагилар акс эттирилган бўлиши керак:
ишга қабул қилинадиган ходимлар тоифаси (коллеж битирувчилари, меҳнат биржаси томонидан йўналтирилган шахслар, бошқа ташкилотлар ишчилари ва чет элдан мутахассис жалб этиш) ҳамда ташкил этилаётган иш ўринлари сони;
етиштириладиган ва қайта ишланадиган балиқ ва балиқ маҳсулоти, ҳажми ва табиий хусусияти;
маҳсулотнинг мўлжалланаётган сотиш баҳоси ҳамда маҳсулотни ички ва ташқи бозорга етказиб бериш ҳажмларини кўрсатган ҳолда;
маҳсулот сотиш бўйича ички ва ташқи бозорлар маркетинг тадқиқотлари;
таклиф этилаётган лойиҳани амалга ошириш ҳамда ишлаб чиқаришнинг барқарор фаолият юритиши учун зарур бўлган инфратузилма ва муҳандислик иншоотлари (электр энергияси, табиий газ, ичимлик ва техник сув, канализация, автойўл) ҳажми;
ишлаб чиқариш ва сув ҳавзаларини оқилона жойлаштириш учун ижарага олиш режалаштирилган ер участкаси ва сув ҳавзаси ўлчамлари;
асосий ишлаб чиқариш цехи, ускуна ва технологик линиялар, маъмурий-маиший, омбор ва бошқа ёрдамчи биноларнинг жойлашуви кўрсатилган дастлабки чизмаси;
ишлаб чиқариш технологиясининг (экологик талаблар ҳисобга олинган ҳолда) технологик ускуналар, ишлаб чиқарувчилар, етказиб берувчилар ва давлатлари рўйхати кўрсатилган тавсифи;
ишлаб чиқаришда фойдаланилиши мўлжалланаётган технологик асбоб-ускуналарнинг хусусияти, уларнинг замонавий технологик талабларга мувофиқлиги, инвестиция лойиҳасида халқаро стандартларга мувофиқ бўлган менежмент тизимининг жорий этилиши;
мўлжалланаётган инвестицияларнинг ҳажми, тури ва муддатлари, молиялаштириш манбалари ва кредит жалб этилган тақдирда мўлжалланаётган таъминот тури;
инвестиция лойиҳаси амалга оширилишининг иқтисодий самарадорлиги кўрсаткичлари ва молиявий-иқтисодий ҳисоб-китоблар.
3-боб. Инвестиция буюртманомасини кўриб чиқиш тартиби
8. Дирекция тақдим этилган ҳужжатларни ушбу Низомнинг 6 ва 7-бандларида назарда тутилган талабларга мувофиқлиги юзасидан икки иш кунида ўрганиб чиқади.
9. Ушбу Низомнинг 6 ва 7-бандлари талаблари бузилган ҳолда тақдим этилган инвестиция буюртманомаси, камчиликлари кўрсатилган ҳолда, инвесторга қайтарилади.
10. Инвестор томонидан ушбу Низомнинг 6 ва 7-бандлари талабларига мувофиқ тақдим этилган инвестиция буюртманомаси ва унга илова қилинган ҳужжатлар Дирекция томонидан Маъмурий кенгашга юборилади. Бунда, инвестиция буюртманомасига ушбу Низомнинг 6 ва 7-бандлари талабларига мувофиқлиги юзасидан Дирекция директори томонидан имзоланган тегишли хулоса илова қилинади.
11. «Балиқ ишлаб чиқарувчи» ЭИЗ ҳудудига жойлаштириш учун инвестиция лойиҳасини танлаб олиш тўғрисида қарор қабул қилишда Маъмурий кенгаш қуйидагиларни кўриб чиқади:
инвестиция лойиҳасининг ушбу Низомнинг 4-бандида келтирилган устувор мезонларга мувофиқлиги;
балиқ ва балиқ маҳсулотлари ишлаб чиқариш бўйича технологик занжирнинг босқичма-босқич ташкил этилиши;
муассисларининг ўз маблағлари ва улар томонидан жалб этилган кредитлар ҳисобига инвестицияларни амалга ошириши;
инвесторнинг молиявий барқарорлиги, техник ва технологик базага эгалиги;
лойиҳанинг умумий иқтисодий самарадорлиги ва уни амалга оширишнинг мақсадга мувофиқлиги (ишлаб чиқариш қувватларининг мақбул жойлаштирилиши, ташкил этиладиган иш ўринлари, тармоқдаги таркибий қайта ўзгартиришларга таъсири, ишлаётган қувватлардан фойдаланилиши, зарур хом ашё, материаллар ва инфратузилманинг мавжудлиги);
технологик ускуналарнинг замонавийлиги, инвестиция лойиҳасида халқаро стандартларга мувофиқ бўлган бошқариш тизимининг мавжудлиги;
инвестиция лойиҳасини амалга ошириш учун зарур маблағ билан таъминланганлиги.
Инвестиция буюртманомасини кўриб чиқишда «Балиқ ишлаб чиқарувчи» ЭИЗ ҳудудида:
инновацион ва замонавий интенсив технологияларни кенг жорий қилиш, шу жумладан, ёпиқ сув айланма тизими қурилмаларида ҳамда кичик сув ҳавзаларида балиқ етиштириш ва сунъий сув ҳавзалари ҳосилдорлигини ошириш ҳисобига балиқ овлаш ҳажмларини кўпайтириш;
юқори маҳсулдорликка эга балиқ турларининг ота-она тўдаларини шакллантириш, уларни парваришлашнинг инновацион технологияларини жорий этиш;
товар балиқ ва репродуктор сув ҳавзаларини модернизация қилиш ва қайта таъмирлаш;
тўла қийматли ва юқори оқсилли (экструдирланган) озуқаларни ишлаб чиқариш бўйича замонавий қувватларни яратиш;
балиқларни қайта ишлаш ва балиқ маҳсулотларини (консерва, икра, балиқ уни ва бошқаларни) ишлаб чиқаришнинг халқаро талабларга мос замонавий комплексини, экспортга мўлжалланган, ишлаб чиқаришнинг тўлиқ цикли таъминланишини назарда тутадиган, шунингдек, ходим сифатида Ўзбекистон Республикаси фуқароларини ишга жалб этувчи лойиҳаларга устунлик берилади.
12. Маъмурий кенгаш инвестиция буюртманомасини Дирекция томонидан киритган кундан бошлаб беш иш кунида кўриб чиқади ва қуйидаги мазмундаги қарорлардан бирини қабул қилади:
инвесторга «Балиқ ишлаб чиқарувчи» ЭИЗ қатнашчиси мақомини бериш, сунъий сув ҳавзаси, ер участкаси, бино, иншоотлар, ишлаб чиқариш қувватларини ажратиб бериш, уларнинг умумий майдони ва жойлашган жойини кўрсатган ҳолда «Балиқ ишлаб чиқарувчи» ЭИЗ ҳудудида инвестиция лойиҳасини жойлаштириш тўғрисида;
камчиликларни кўрсатган ҳолда тақдим этилган ҳужжатларни такомиллаштириш зарурлиги тўғрисида;
«Балиқ ишлаб чиқарувчи» ЭИЗ ҳудудида инвестиция лойиҳасини амалга оширишнинг мақсадга мувофиқ эмаслиги тўғрисида.
Инвестиция буюртманомасини кўриб чиқишда Маъмурий кенгаш томонидан инвесторнинг ўзи тўғрисида нотўғри маълумотлар тақдим этганлиги аниқланса, мазкур буюртманомани кўриб чиқиш тўхтатилади ва хулоса билан Дирекцияга юборилади.
13. Инвестиция буюртманомалари Дирекцияга электрон тарзда тақдим этилиши мумкин.
14. Инвестор томонидан тақдим этилган маълумотларнинг ошкор қилинишига йўл қўйилмайди.
15. Маъмурий кенгаш кўриб чиқиши натижасида аниқланган камчиликлар асосида такомиллаштирилган инвестиция буюртманомаси такроран Дирекцияга кўриб чиқиш учун киритилиши мумкин.
Инвестиция буюртманомасини Дирекция томонидан такроран кўриб чиқиш муддати уч иш кунини ташкил этади.
16. Маъмурий кенгашнинг инвестиция буюртманомасини кўриб чиқиш натижаси бўйича қарори унинг аъзолари томонидан оддий кўпчилик овози билан қабул қилинади ва Маъмурий кенгаш йиғилиши баёни билан расмийлаштирилади ҳамда Дирекция ва инвестор (инвесторлар) ўртасида «Балиқ ишлаб чиқарувчи» ЭИЗ ҳудудига инвестициялар киритиш тўғрисида шартнома (кейинги ўринларда инвестиция киритиш тўғрисида — шартнома) тузиш учун асос бўлади.
17. Маъмурий кенгаш йиғилишининг баёни Дирекция директори, Маъмурий кенгаш аъзолари томонидан имзоланади ва Маъмурий кенгаш раиси томонидан тасдиқланади.
18. Маъмурий кенгаш мажлиси баёнидан кўчирма у тасдиқланган кундан эътиборан бир иш куни мобайнида Дирекция томонидан инвесторга ёки унинг ваколатли шахсига юборилади.
4-боб. Инвестиция лойиҳаларини жойлаштириш бўйича Маъмурий кенгашнинг қарорларини Республика кенгаши билан келишиш тартиби
19. Маъмурий кенгашнинг қиймати эквивалентда 5,0 млн. АҚШ долларидан юқори бўлган инвестиция лойиҳаларини кўриб чиқиш натижаси бўйича ижобий қарори, у тасдиқланган санадан бошлаб икки иш куни ичида келишиш учун Республика кенгашига, инвестиция буюртманомаси ва лойиҳа бизнес-режаси билан бирга юборилади.
20. Республика кенгаши Маъмурий кенгашнинг қарорини олган кундан бошлаб етти иш куни ичида Республика кенгаши йиғилишида кўриб чиқади. Инвестиция лойиҳасини келишиш Республика кенгаши аъзоларининг ҳамда манфаатдор вазирлик ва идораларнинг қуйидаги хулосаларини инобатга олган ҳолда амалга оширилади:
Ўзбекистон Республикаси Иқтисодиёт вазирлиги — ҳудудни, саноат ва балиқчилик тармоғини ривожлантириш дастурларидан келиб чиқиб, лойиҳа амалга оширилишининг мақсадга мувофиқлиги қисми бўйича, қайта ишлаш ва ишлаб чиқаришни зарур хом ашё ресурслари билан таъминланганлиги, валюта қопланувчанлиги ва ташкил этилаётган иш ўринлари белгиланган кўрсаткичларига мувофиқлиги қисми бўйича;
Ўзбекистон Республикаси Инвестициялар бўйича давлат қўмитаси — янгидан барпо этилаётган ишлаб чиқаришларни замонавий ускуналар ва технологиялар билан жиҳозлаш, инвесторларнинг салоҳияти ҳамда лойиҳани амалга ошириш учун молиявий ва технологик имкониятларнинг етарлилиги қисми бўйича;
Ўзбекистон Республикаси Қишлоқ хўжалиги вазирлиги — балиқчилик тармоқларини ривожлантириш дастурларидан келиб чиқиб лойиҳаларни амалга оширилишининг мақсадга мувофиқлиги қисми бўйича;
«Ўзбекбалиқсаноат» уюшмаси — балиқчилик тармоқларини ривожлантириш дастурларидан келиб чиқиб лойиҳаларни амалга оширилишининг мақсадга мувофиқлиги, ҳавза ҳосилдорлиги, интенсив усулда балиқ етиштириш, ёпиқ сув айланма тизимини (УЗВ) жорий этишда замонавий инновацион технологияларни қўллаш, инкубация цехларида личинка ишлаб чиқариш, балиқлар учун юқори оқсилга бой омухта емнинг хорижий етакчи ишлаб чиқарувчиларга мослиги қисми бўйича;
тегишли тижорат банклари — лойиҳани биргаликда молиялаштириш учун кредит ажратиш қисми бўйича.
21. Инвестиция лойиҳалари бўйича ушбу Низомнинг 20-бандида кўрсатилган хулосалар ваколатли ташкилотлар томонидан уларга лойиҳанинг инвестиция буюртманомаси ва бизнес-режаси келиб тушган кундан бошлаб беш иш куни ичида Ўзбекистон Республикаси Иқтисодиёт вазирлигига умумлаштириш ва Республика кенгаши йиғилишининг баёни лойиҳасини тайёрлаш учун юборилади.
22. Республика кенгаши «Балиқ ишлаб чиқарувчи» ЭИЗ ҳудудида инвестиция лойиҳасини жойлаштириш бўйича Маъмурий кенгаш қарорини келишиш бўйича йиғилиш баёни лойиҳасини аввал ижобий хулоса тақдим этган Республика кенгаши аъзолари билан келишиш талаб этилмайди.
5-боб. Инвестиция киритиш тўғрисида шартнома тузиш ва «Балиқ ишлаб чиқарувчи» ЭИЗ қатнашчиларини рўйхатдан ўтказиш тартиби
23. Инвестиция киритиш тўғрисида шартнома лойиҳаси давлат, инглиз ва рус тилларида Дирекциянинг расмий веб саҳифасида жойлаштирилади ёки Маъмурий кенгашнинг инвестор томонидан кўриб чиқиш учун киритган инвестиция буюртманомасини маъқуллаш бўйича йиғилишининг баёни тасдиқлангандан кейин бир иш куни ичида Дирекция томонидан инвесторга тақдим этилади.
24. Инвестиция киритиш тўғрисида шартнома қоидаларини келишиш мақсадида Дирекция ва инвесторлар ўртасида музокаралар ўтказилиши мумкин.
25. Инвестиция киритиш тўғрисидаги шартнома «Балиқ ишлаб чиқарувчи» ЭИЗнинг фаолият кўрсатиш муддатидан ошмайдиган муддатга тузилади.
26. Инвестор ва Дирекция ўртасидаги инвестиция киритиш тўғрисида тарафлар томонидан имзоланган шартнома инвестор томонидан ташкил этиладиган тадбиркорлик субъекти «Балиқ ишлаб чиқарувчи» ЭИЗ қатнашчиси сифатида рўйхатдан ўтказилган санадан бошлаб кучга киради.
27. Инвестиция киритиш тўғрисидаги шартноманинг амал қилиши:
инвестиция киритиш тўғрисидаги шартнома тузилган муддат тамом бўлгач;
тадбиркорлик субъекти «Балиқ ишлаб чиқарувчи» ЭИЗ қатнашчиси мақомидан маҳрум этилганда;
«Балиқ ишлаб чиқарувчи» ЭИЗ муддатидан олдин тугатилганда;
Ўзбекистон Республикаси қонун ҳужжатларида назарда тутилган бошқа ҳолатларда тугатилади.
28. «Балиқ ишлаб чиқарувчи» ЭИЗ ҳудудида жойлаштириш учун инвестор томонидан ташкил этилган ташкилотни (кейинги ўринларда — Ташкилот) давлат рўйхатидан ўтказиш қонун ҳужжатларида юридик шахсларни давлат рўйхатидан ўтказиш учун белгиланган тартибда амалга оширилади.
29. Ташкилот давлат рўйхатидан ўтказилгандан кейин инвестор томонидан Дирекцияга қуйидаги ҳужжатлар тақдим этилади:
Ташкилотнинг давлат рўйхатидан ўтказилганлиги тўғрисида гувоҳнома нусхаси;
«Балиқ ишлаб чиқарувчи» ЭИЗ қатнашчиси сифатида рўйхатдан ўтказиш учун тўлов тўланганлигини тасдиқловчи ҳужжат.
30. Дирекция ушбу Низомнинг 29-бандида кўрсатилган ҳужжатлар олинган кундан бошлаб икки иш куни мобайнида Ташкилотни «Балиқ ишлаб чиқарувчи» ЭИЗ қатнашчиси сифатида рўйхатдан ўтказади ва белгиланган шакл бўйича «Балиқ ишлаб чиқарувчи» ЭИЗ қатнашчиси гувоҳномасини беради.
31. Дирекция Ташкилот «Балиқ ишлаб чиқарувчи» ЭИЗ қатнашчиси сифатида рўйхатдан ўтказилган кундан бошлаб бир иш куни ичида хўжалик юритувчи субъект жойлашган жойдаги давлат солиқ ва божхона хизмати органларини хабардор қилади.
32. Дирекция Ташкилот «Балиқ ишлаб чиқарувчи» ЭИЗ қатнашчиси сифатида рўйхатдан ўтказилган кундан бошлаб бир иш куни ичида барча зарур ҳужжатларни Ташкилотга ер участкаси ажратиш учун тегишли вилоят ер тузиш ва кўчмас мулк кадастри бўйича давлат корхонасига беради.
6-боб. Якунловчи қоидалар
33. Ташкилотни «Балиқ ишлаб чиқарувчи» ЭИЗ қатнашчиси мақомидан маҳрум қилиш ёки тўхтатиб туриш Республика кенгаши томонидан Маъмурий кенгаш ёки ваколатли ташкилотларнинг асосланган таклифлари асосида, белгиланган тартибда амалга оширилади.
34. Ташкилотни «Балиқ ишлаб чиқарувчи» ЭИЗ қатнашчиси мақомидан ихтиёрий тартибда маҳрум қилиш тўғрисидаги қарор Ташкилотнинг уни бундай мақомдан маҳрум қилиш тўғрисидаги аризасига кўра ёхуд у Ўзбекистон Республикаси қонун ҳужжатларига мувофиқ тугатилган тақдирда Маъмурий кенгаш томонидан қабул қилиниши мумкин.
«Балиқ ишлаб чиқарувчи» ЭИЗ қатнашчиси томонидан Ўзбекистон Республикаси қонун ҳужжатлари ва (ёки) инвестиция киритиш тўғрисида шартнома шартлари бузилиши юзасидан низо мавжуд бўлганда Ташкилотни «Балиқ ишлаб чиқарувчи» ЭИЗ қатнашчиси мақомидан маҳрум этиш суд тартибида амалга оширилади.
Дирекция «Балиқ ишлаб чиқарувчи» ЭИЗ қатнашчилари реестрига Ташкилотнинг қатнашчи мақомидан маҳрум этилганлиги тўғрисидаги суднинг қарори кучга кирган санадан бошлаб уч иш кунида Ташкилотнинг «Балиқ ишлаб чиқарувчи» ЭИЗ қатнашчиси мақомидан маҳрум этилганлиги тўғрисидаги ёзувни киритади.
35. Дирекция «Балиқ ишлаб чиқарувчи» ЭИЗ қатнашчилари реестрига тегишли ёзув киритилган кундан бошлаб бир иш кунида давлат солиқ ва божхона органларини Ташкилотнинг «Балиқ ишлаб чиқарувчи» ЭИЗ қатнашчиси мақомидан маҳрум этилганлиги тўғрисида хабардор қилади.
«Балиқ ишлаб чиқарувчи» эркин иқтисодий зонаси ҳудудига жойлаштириш учун инвестиция лойиҳаларини танлаб олиш ҳамда қатнашчиларни рўйхатдан ўтказиш тартиби тўғрисидаги низомга
1-ИЛОВА
1-ИЛОВА
«Балиқ ишлаб чиқарувчи» эркин иқтисодий зонаси ҳудудига жойлаштириш учун инвестиция лойиҳаларини танлаб олиш ҳамда қатнашчиларни рўйхатдан ўтказиш
схемаси
«Балиқ ишлаб чиқарувчи» эркин иқтисодий зонаси ҳудудига жойлаштириш учун инвестиция лойиҳаларини танлаб олиш ҳамда қатнашчиларни рўйхатдан ўтказиш тартиби тўғрисида низомга
2-ИЛОВА
2-ИЛОВА
|
|
«Балиқ ишлаб чиқарувчи» | |
|
| ||
|
«Балиқ ишлаб чиқарувчи» эркин иқтисодий зонаси ҳудудига БУЮРТМАНОМАСИ | ||
|
| ||
|
1. Инвестор (инвесторлар) тўғрисида маълумотлар | ||
|
Мурожаатчи (инвестор ёки инвесторлар) ташкилотнинг номи, келиб чиққан давлати |
||
|
Инвестор (ёки инвесторлар) тўғрисида маълумот, жумладан давлат рўйхатидан ўтган санаси ва жойи, муассис(лар) ва бошқалар |
||
|
Юридик шахснинг ташкилий-ҳуқуқий шакли, муассисларнинг устав фондидаги улушининг тақсимланиши ва капитал қўйилмаларнинг шакли |
||
|
Мурожаатчи ташкилотнинг юридик манзили |
||
|
2. Инвестиция лойиҳаси тўғрисида маълумотлар | ||
|
Инвестиция лойиҳасининг номи |
||
|
Инвестиция лойиҳасининг мақсади ва қисқача тавсифи, жумладан ишлаб чиқаришнинг йиллик қуввати |
||
|
Ижарага бериладиган умумий сув ҳавзаси майдонининг камида 10 фоиз қисмида интенсив усулда балиқ етиштиришга мослаштириш ва ушбу майдоннинг ҳар бир гектаридан 8 тоннадан кам бўлмаган ҳосилдорликка эришиш |
||
|
Ёпиқ сув айланма тизими иншооти (УЗВ) қуриш ва ҳар бир гектардан камида 300 тонна балиқ етиштиришни ташкил этиш |
||
|
Сув тармоғи дренаж тизимларининг яхлитлигини сақлаб қолиш ва умумий фойдаланишда бўлишини таъминлаш |
||
|
Юқори маҳсулдор наслли она балиқлар тўдаларини шакллантириш |
||
|
Ташкилотнинг эҳтиёжи учун талаб этиладиган юқори оқсилга бой озуқа базасини шакллантириш |
||
|
Ишлаб чиқариладиган маҳсулотнинг номи, қўлланилиши ва асосий белгилари |
||
|
Маҳсулотнинг ўртача йиллик ишлаб чиқариш ҳажми, экспортга ва ички бозорга йўналтириладиган ҳажмини (натура кўринишида ва экв. АҚШ долларида) ҳисобга олган ҳолда |
||
|
Асосий хом ашё ва материал (маҳаллий ва импорт), уларнинг тайёр маҳсулотдаги улуши, фоиз ҳисобида |
||
|
Хом ашё ва материалларга бўлган йиллик талаб (экв. АҚШ долларида), шу жумладан маҳаллий ва импорт |
||
|
Маҳсулот стандартлари — ГОСТ, ОСТ, ТУ, OʼzDst, ISO 9001 ва ISO 14001 ва бошқалар |
||
|
Ишлаб чиқаришнинг бошланиш санаси |
||
|
Ташкил этилаётган иш ўринлари, жумладан, маҳаллий ишчи ходимлар |
||
|
3. Зарур майдон ва инфратузилмалар тўғрисида маълумотлар | ||
|
Балиқ етиштириш учун талаб этиладиган сув ҳавзаси майдони (га): |
||
|
шу жумладан интенсив усулда (га) |
||
|
Ёпиқ сув айланма тизимида (УЗВ) балиқ етиштириш учун талаб этиладиган майдон (га) |
||
|
Наслли она балиқлар тўдасини шакллантириш учун талаб этиладиган сув ҳавзаси майдони (га) |
||
|
Наслли балиқ чавоқларини етиштириш мақсадида репродуктор ҳавза ташкил этиш учун талаб этиладиган майдон (га) |
||
|
Инкубация цехини ташкил этиш учун талаб этиладиган майдон (га) |
||
|
Балиқни қайта ишлаш ва тайёр маҳсулот ишлаб чиқариш учун талаб этиладиган майдон (кв.м.) |
||
|
Балиқлар учун оқсилга бой омухта ем ишлаб чиқариш учун талаб этиладиган майдон (кв.м.) |
||
|
Электр энергияга бўлган талаб (йилига кВт/соат), ўрнатиладиган қувват (кВт ёки МВт) |
||
|
Табиий газга бўлган талаб (йилига куб.м.), босим (атм.) |
||
|
Қайта ишлаш ва ишлаб чиқариш учун ичимлик ва техник сувга бўлган талаб (йилига куб.м.) |
||
|
Балиқ етиштириладиган сув ҳавзаси учун сувга бўлган талаб (йилига куб.м.) |
||
|
4. Лойиҳанинг молиявий-иқтисодий кўрсаткичлари | ||
|
Лойиҳанинг қиймати (экв.АҚШ долларида) |
||
|
Молиялаштириш манбалари (тўғридан-тўғри инвестициялар, маҳаллий муассисларнинг маблағлари, тижорат банклари кредитлари) |
||
|
Машина, тирик балиқ ташиш транспорти, мелиорация ишларини бажарувчи техника ва асбоб-ускуналар қиймати (экв. АҚШ долларида), жумладан маҳаллий ва импорт |
||
|
ҚМИ қиймати (экв.АҚШ долларида) |
||
|
Айланма маблағлар суммаси |
||
|
Инвестицияларни киритиш шакли ва жадвали |
||
|
Лойиҳанинг қопланиш муддати |
||
Изоҳ. Импорт қилинаётган хом ашё, материаллар ва бутловчи қисмларнинг валютадаги қиймати божхона тўловлари билан бирга ҳисобланади. Маҳаллий етказиб берувчилардан олинган импорт хом ашё маҳаллий ҳисобланмайди.
|
М.Ў.Раҳбар |
_____________ |
_________________________ |
|
_____________ |
Вазирлар Маҳкамасининг 2018 йил 20 августдаги 677-сон қарорига
4-ИЛОВА
4-ИЛОВА
«Балиқ ишлаб чиқарувчи» эркин иқтисодий зонаси таркибидаги ер майдонининг чегара ҳудудлари тавсифи
Тошкент вилояти, Қуйи Чирчиқ тумани, «Балиқчи» маҳалла фуқаролар йиғини ҳудудидаги ер майдонлари:
шимол томондан — «Оgonyok» масъулияти чекланган жамияти ерлари;
шарқий томондан — Эски Тошкент канали;
ғарбий томондан — Сирдарё дарёси муҳофаза минтақаси ерлари;
жанубий томондан — Сирдарё дарёси муҳофаза минтақаси ерлари.
Ер харитасига кўра чегарадош ҳудудлар қуйидагича изоҳланади:
А дан Б гача — «Оgonyok» масъулияти чекланган жамияти ерлари;
Б дан В гача — «Абдуғани ота сулоласи» хусусий корхонаси;
В дан Г гача — Абай номли массив;
Г дан Д гача — Юлдуз номли массив;
Д дан Е гача — Ужакент номли массив;
Е дан Ж гача — Дўстлик номли массив;
Ж дан З гача — Сирдарё муҳофаза минтақаси ерлари 3 участкаси;
З дан И гача — Сирдарё вилояти;
И дан К гача — Сирдарё муҳофаза минтақаси ерлари 2 участкаси;
К дан Л гача — Сирдарё вилояти;
Л дан А гача — Сирдарё муҳофаза минтақаси ерлари 1 участкаси.
«Балиқ ишлаб чиқарувчи» эркин иқтисодий зонаси таркибидаги чегара ҳудудлари тавсифига киритилган жами ер майдони 3054,6 гектарни ташкил этади.
(Қонун ҳужжатлари маълумотлари миллий базаси, 20.08.2018 й., 09/18/677/1781-сон)
