Ўзбекистон Республикаси Вазирлар Маҳкамасининг

қарори

Ўзбекистон Республикаси Ички ишлар вазирлигининг матбуот хизмати фаолиятини ташкил этиш чора-тадбирлари тўғрисида

[Кўчирма]

Жамоат тартибини сақлаш, ҳуқуқбузарликлар профилактикаси ва жиноятчиликка қарши курашиш соҳасида ички ишлар органлари томонидан қўрилаётган комплекс чора-тадбирлар ҳамда юзага келган вазият ҳақида аҳолини ўз вақтида хабардор қилишнинг амалий тизимини яратиш мақсадида Вазирлар Маҳкамаси қарор қилади:

1. Ўзбекистон Республикаси Ички ишлар вазирлигининг унинг тузилмасида ходимларнинг белгиланган сони доирасида матбуот хизматини ташкил этиш, унинг фаолиятини қуйидагилар:

Ўзбекистон Республикаси Ички ишлар вазирлиги Ташкилий-инспекторлик ва ахборот-таҳлил бош бошқармаси оммавий ахборот воситалари билан ҳамкорлик қилиш хизмати;

Қорақалпоғистон Республикаси Ички ишлар вазирлиги, Тошкент шаҳар Ички ишлар бош бошқармаси ҳамда вилоятлар ички ишлар бошқармалари Ташкилий-инспекторлик ва ахборот-таҳлил бош бошқармалари матбуот гуруҳлари негизида ташкил этиш ҳақидаги таклифига розилик берилсин.

2. Матбуот хизмати тизимида Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармаси тузилсин, қуйидагилар унинг асосий вазифалари этиб белгилансин:

ички ишлар органлари фаолиятини ахборот кузатуви ишларини мувофиқлаштириш, улар мансабдор шахсларининг фуқаролик жамияти институтлари ва жамоатчилик вакиллари билан учрашув ва брифингларини, жамоат хавфсизлигини таъминлаш ва мамлакатда ҳуқуқ-тартиботни мустаҳкамлаш масалалари бўйича фуқаролар билан очиқ, тўғридан-тўғри мулоқотларини ташкил этиш;

ҳуқуқбузарликлар профилактикаси, жамоат тартибини сақлаш ва жиноятчиликка қарши курашиш соҳасидаги ички ишлар органлари фаолияти тўғрисида аҳолига ўз вақтида ва ишончли ахборот етказиш бўйича комплекс чора-тадбирлар кўриш ва зарур шарт-шароитлар яратиш;

ҳудудий ички ишлар органларининг матбуот хизматлари фаолиятига ташкилий-услубий ёрдам кўрсатиш, уларни республиканинг жамоатчилик ва оммавий ахборот воситалари вакиллари билан мустаҳкам ҳамкорлик ўрнатишларини таъминлаш;

оммавий ахборот воситалари ва бутунжаҳон Интернет ахборот тармоғи материалларини туну-кун мониторинг ва таҳлил қилишни таъминлаш, нотўғри хабар ёки ички ишлар органлари обрўсига путур етказувчи материалларга зудлик билан муносабат билдириш;

Ўзбекистон Республикаси Ички ишлар вазирлиги расмий веб-сайтининг самарали фаолиятини ташкил этиш, унга доимий равишда ахборот материалларини жойлаш ҳамда ички ишлар органлари таркибий бўлинмаларининг веб-ресурсларини назорат қилиш ва мувофиқлаштириш.

3. Белгилаб қўйилсинки, Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармаси бошлиғи лавозимига кўра, бир вақтнинг ўзида Ўзбекистон Республикаси Ички ишлар вазирининг матбуот котиби ҳисобланади.

4. Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармаси ҳузурида медиамарказ ташкил этилсин, қуйидагилар унинг фаолиятининг асосий йўналишлари этиб белгилансин:

жамоат тартибини сақлаш, ҳуқуқбузарликлар профилактикаси ва жиноятчиликка қарши курашишнинг долзарб масалалари ҳақида аҳолини мунтазам равишда хабардор қилиш бўйича медиалойиҳаларни тайёрлаш ва амалга ошириш, уларни бажаришда ҳамкорлик ўрнатиш;

мамлакатдаги криминал вазият, ички ишлар органлари фаолияти тўғрисида нотўғри ва бошқа ахборотлар тарқалишига йўл қўймаслик мақсадида телеканалларда ўз вақтида, кенг ва ишончли объектив баҳо бериш;

ички ишлар органлари мансабдор ходимларининг аҳоли билан очиқ, тўғридан-тўғри мулоқотини амалга оширишда кўмаклашиш, жамоат тартибини сақлаш, ҳуқуқбузарликлар профилактикаси ва жиноятчиликка қарши курашишнинг муҳим масалаларини ва фуқароларнинг долзарб муаммоларини муҳокама қилиш ва ҳал этиш учун жамоатчиликни кенг жалб этиш.

5. Қуйидагилар:

а) Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармаси тўғрисидаги низом 1-иловага мувофиқ;

б) Қуйидаги бирламчи йўналишларни кўзда тутувчи ички ишлар органларининг ахборот кузатуви соҳасидаги фаолиятини ислоҳ қилиш бўйича Комплекс чора-тадбирлар дастури 2-иловага мувофиқ тасдиқлансин, Дастурда қуйидаги устувор вазифалар назарда тутилсин:

ички ишлар органлари фаолияти тўғрисида жисмоний ва юридик шахсларнинг маълумот олиши учун таъсирчан механизми ва мультимедий имкониятларини жорий этиш;

ички ишлар органларининг оммавий ахборот воситалари ва веб-ресурсларини, ноширлик, телевизион ва студия фаолиятини ривожлантириш;

ички ишлар органларининг матбуот хизмати фаолиятини такомиллаштириш, унинг кадрлар ва касбий салоҳиятини мустаҳкамлаш;

ички ишлар органларининг фуқаролик жамияти институтлари ва оммавий ахборот воситалари вакиллари билан самарали ҳамкорлигини ташкил этиш;

ички ишлар органлари матбуот хизмати фаолиятига замонавий ахборот-коммуникация технологияларини жорий этиш, унинг моддий-техника базасини янада яхшилаш;

в) «Ўзбекистон Республикаси Ички ишлар вазирлигининг «Postda» — «На посту» газеталари ва «Qalqon» — «Щит» журналлари бирлашган таҳририяти» давлат унитар корхонасининг ташкилий тузилмаси 3-иловага мувофиқ тасдиқлансин.

7. Ўзбекистон Республикаси Ички ишлар вазирлиги Ўзбекистон матбуот ва ахборот агентлиги, Ўзбекистон миллий телерадиокомпанияси ҳамда Ўзбекистон электрон оммавий ахборот воситалари миллий ассоциацияси билан ҳамкорликда икки ой муддатда ички ишлар органлари матбуот хизматларининг республика ва ҳудудий оммавий ахборот воситалари билан ҳамкорлик қилиш тартиби тўғрисидаги низомни тасдиқлашни назарда тутувчи қўшма қарор қабул қилсин.

8. Ўзбекистон Республикаси Ички ишлар вазирлиги:

Ўзбекистон Республикаси Ички ишлар вазирлиги матбуот хизматини журналистика соҳасидаги юқори малакали мутахассислар билан таъминлаш механизмини назарда тутувчи штат жадвалини бир ой муддатда ишлаб чиқсин ва тасдиқласин;

ички ишлар органлари мансабдор ходимларининг учрашув ва брифингларини эфирга узатиш шартларида доимий равишда жамоатчилик ва фуқаролик жамияти институтлари вакиллари билан жамоат хавфсизлигини таъминлаш ҳамда ҳуқуқ-тартиботни мустаҳкамлаш масалалари бўйича фуқаролар билан очиқ, тўғридан-тўғри мулоқотлар ташкил этиш бўйича таъсирчан чора-тадбирларни амалга оширсин;

2017 йил 1 декабргача бўлган муддатда — жамоатчилик муҳокамасига сабаб бўлган жиноят ва воқеаларни ўз вақтида ва ишончли ёритиш тартибини тасдиқласин, шу жумладан, ички ишлар органларининг мазкур масалалар бўйича ваколатли масъул ходимларининг эфирга чиқишларини ташкил этсин;

қонун ҳужжатларига ушбу қарордан келиб чиқувчи ўзгартириш ва қўшимчалар тўғрисида икки ой муддатда Ўзбекистон Республикаси Вазирлар Маҳкамасига таклифлар киритсин;

ўзи қабул қилган норматив-ҳуқуқий ҳужжатларни уч ой муддатда ушбу қарорга мувофиқлаштирсин.

9. Белгилаб қўйилсинки, ушбу қарорда назарда тутилган тадбирларни амалга ошириш билан боғлиқ харажатлар Ўзбекистон Республикаси Ички ишлар вазирлигининг асосланган ҳисоб-китоблари бўйича ҳар йили ажратиладиган бюджет маблағлари, Ўзбекистон Республикаси Ички ишлар вазирлигининг бюджетдан ташқари маблағлари, шунингдек қонунчиликда тақиқланмаган бошқа манбалар доирасида амалга оширилади.

10. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2017 йил 30 октябрь,

882-сон

Вазирлар Маҳкамасининг 2017 йил 30 октябрдаги 882-сон қарорига
1-ИЛОВА

Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармаси тўғрисида

НИЗОМ

1-боб. Умумий қоидалар

1. Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармаси (кейинги ўринларда Бошқарма деб аталади) Ўзбекистон Республикаси Ички ишлар вазирлиги (кейинги ўринларда ИИВ деб аталади) марказий аппаратининг таркибий тузилмаси ҳисобланиб, ички ишлар органлари матбуот хизмати ишини ташкил этиш ва мувофиқлаштиришни таъминлайди.

2. Бошқарма ўз фаолиятида Ўзбекистон Республикасининг Конституциясига, «Ахборотлаштириш тўғрисида», «Ахборот эркинлиги принциплари ва кафолатлари тўғрисида», «Оммавий ахборот воситалари тўғрисида», «Ички ишлар органлари тўғрисида»ги ва бошқа Ўзбекистон Республикаси қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, Ички ишлар вазирининг буйруқлари ва фармойишларига, шунингдек ушбу Низомга амал қилади.

3. Бошқарма ўз фаолияти масалалари бўйича белгиланган тартибда ички ишлар бошқа органлари, ҳуқуқни муҳофаза қилиш органлари ҳамда давлат бошқа органлари, ташкилотлар, шунингдек фуқаролик жамияти институтлари ва оммавий ахборот воситалари билан ҳамкорлик қилади.

4. Ички ишлар органлари матбуот хизмати тизимига қуйидагилар киради:

Ўзбекистон Республикаси ИИВ Жамоатчилик ва оммавий ахборот воситалари билан алоқалар бошқармаси;

«Ўзбекистон Республикаси Ички ишлар вазирлигининг «Postda» — «На посту» газеталари ва «Qalqon» — «Щит» журналлари бирлашган таҳририяти» давлат унитар корхонаси;

Қорақалпоғистон Республикаси Ички ишлар вазирлиги, Тошкент шаҳар Ички ишлар бош бошқармаси, вилоятлар ички ишлар бошқармаларининг матбуот гуруҳлари;

ички ишлар органлари тармоқ хизматлари ва таълим муассасаларининг матбуот гуруҳлари.

5. Бошқарма Ўзбекистон Республикаси Давлат герби тасвири туширилган ва ўз номи ёзилган муҳрга, штампга эга ҳамда Ўзбекистон Республикаси Ички ишлар вазири тасдиқлаган бошқарма фаолияти спецификаси тасвирланган рамзга эга бўлиши мумкин.

2-боб. Бошқарманинг асосий вазифалари ва функциялари

6. Қуйидагилар Бошқарманинг асосий вазифалари ҳисобланади:

7. Бошқарма ўзига юкланган вазифаларга мувофиқ қуйидаги асосий функцияларни амалга оширади:

а) ички ишлар органлари мансабдор ходимларининг учрашув ва брифингларини эфирга узатиш шартлари билан доимий равишда жамоатчилик ва фуқаролик жамияти институтлари вакиллари билан жамоат хавфсизлигини таъминлаш ва ҳуқуқ-тартиботни мустаҳкамлаш масалалари бўйича фуқаролар билан очиқ, тўғридан-тўғри мулоқотни ташкил этиш ишларини мувофиқлаштириш соҳасида:

ички ишлар органлари ахборот кузатуви ишлари тизимида таҳлил ва режалаштириш, ушбу йўналишда ташкилий тадбирларни ишлаб чиқиш ва ўтказиш;

ички ишлар органлари ўтказадиган тадбирлар, чиқишлар ва учрашувларни белгиланган тартибда кенг ёритиш;

Ўзбекистон Республикаси Ички ишлар вазирининг ваколати доирасидаги қонунчилик ва ҳуқуқ-тартибот, ички ишлар органларига жамоат тартиби ва жамоат хавфсизлигини таъминлашда кўмаклашиш масалалари бўйича фуқаролик жамияти институтлари вакиллари билан учрашувларини ташкил этиш;

ички ишлар органлари мансабдор ходимларининг жамоатчилик ва фуқаролик жамияти институтлари вакиллари билан учрашув ва брифингларини ташкил этиш чораларини кўриш;

ички ишлар органлари мансабдор ходимларининг аҳоли билан очиқ, тўғридан-тўғри мулоқотини амалга оширишда кўмаклашиш, жамоат тартибини сақлаш, ҳуқуқбузарликлар профилактикаси ва жиноятчиликка қарши курашишнинг долзарб масалаларини ва фуқароларнинг кундалик муаммоларини муҳокама этиш ва ҳал қилиш учун кенг жамоатчиликни жалб этиш;

Бошқарма ваколатига кирувчи масалалар бўйича норматив-ҳуқуқий ҳужжатлар ва бошқа ҳужжатлар лойиҳаларини ишлаб чиқиш ва унда иштирок этиш;

б) аҳолини ички ишлар органларининг ҳуқуқбузарликлар профилактикаси, жиноятчиликка қарши курашиш борасидаги фаолияти ҳақида ўз вақтида ва ишончли хабардор қилиш бўйича комплекс чора-тадбирлар кўриш ва зарур шарт-шароитлар яратиш соҳасида:

оммавий ахборот воситалари ва бутунжаҳон Интернет ахборот тармоғи орқали ички ишлар органларининг жамоат тартибини сақлаш, ҳуқуқбузарликлар профилактикаси ва жиноятчиликка қарши курашиш фаолияти бўйича долзарб масалаларни аҳолига доимий равишда етказиб туриш;

ички ишлар органлари фаолияти тўғрисида нотўғри ва бошқа ахборотлар тарқалишининг олдини олиш мақсадида,мамлакатдаги ҳуқуқбузарликлар тўғрисидаги вазиятнинг ўз вақтида ва ҳаққоний ёритилишини таъминлаш;

«Ўзбекистон Республикаси Ички ишлар вазирлигининг «Postda» — «На посту» газеталари ва «Qalqon» — «Щит» журналлари бирлашган таҳририяти» давлат унитар корхонаси фаолиятини мувофиқлаштириш, тизимли таклифлар асосида унинг ишлаш шакл ва услубларини такомиллаштириш, тармоқ босма нашрларини чоп этишга кўмаклашиш;

аҳолини жамоат тартибини сақлаш, ҳуқуқбузарликлар профилактикаси ва жиноятчиликка қарши курашиш ҳамда ички ишлар органлари ходимларининг обрўсини кўтариш, уларнинг намунали образини шакллантириш ва мустаҳкамлашга қаратилган ташвиқот ва ахборот-тушунтириш тусидаги тадбирларни ўтказишни ташкил этиш;

в) ҳудудий ички ишлар органлари матбуот хизматлари фаолиятига ташкилий-услубий кўмаклашиш, республика жамоатчилиги ва оммавий ахборот воситалари вакиллари билан ўзаро ҳамкорликни таъминлаш соҳасида:

ички ишлар органлари тармоқ хизматлари, ўқув муассасалари ва ҳудудий бўлинмалари матбуот гуруҳлари фаолиятини таҳлил ва мониторинг қилиш ишларини ташкил этиш бўйича тавсия ва услубий қўлланмалар ишлаб чиқиш;

ички ишлар органлари фаолиятини ахборот кузатуви соҳасида «Ўзбекистон Республикаси Ички ишлар вазирлигининг «Postda» — «На посту» газеталари ва «Qalqon» — «Щит» журналлари бирлашган таҳририяти» давлат унитар корхонаси фаолиятига баҳо бериш;

ички ишлар органларининг оммавий ахборот воситалари таҳририятлари, жамоат бирлашмалари билан ўзаро ҳамкорлигини таъминлаш комплекс чора-тадбирларини ташкил этиш ва амалга ошириш;

ички ишлар органлари фаолияти ахборот таъминотида фуқаролик жамияти институтларининг самарали иштироки учун зарур шарт-шароитлар яратиш;

ички ишлар органлари матбуот хизмати ходимларининг мутахассислик йўналишлари бўйича малакаларини ошириш ва уларни қайта тайёрлашни ташкил этиш чораларини кўриш;

г) оммавий ахборот воситалари ва бутунжаҳон Интернет ахборот тармоғи материалларини туну-кун мониторинг ва таҳлил қилиб боришни таъминлаш, ички ишлар органлари ходимлари обрўсига путур етказувчи, нотўғри ахборотга эга материалларга дарҳол муносабат билдириш соҳасида:

оммавий ахборот воситалари ва бутунжаҳон Интернет ахборот тизими материалларини туну-кун мониторинг ва таҳлил қилишни таъминлаш, нотўғри хабар ёки ички ишлар органлари обрўсига путур етказувчи материалларга зудлик билан муносабат билдириш;

ички ишлар органлари фаолиятининг ахборот таъминотига хавф туғдиришини аниқлаш, баҳолаш ва кўра билиш, мазкур хавфларга қарши курашиш бўйича таклифлар тайёрлаш;

Ўзбекистон Республикаси ИИВ раҳбариятига оммавий ахборот воситалари ва бутунжаҳон Интернет ахборот тармоғида ички ишлар органлари фаолиятига берилган баҳо ҳақида ахборот бериш;

д) Ўзбекистон Республикаси ИИВ расмий веб-сайтининг самарали ишлашини ташкил этиш, тизимли равишда унда ахборот материаллар, шунингдек ички ишлар органлари таркибий бўлинмалари веб-ресурсларини назорат қилиш ва мувофиқлаштириш соҳасида;

ички ишлар органларида ўтказиладиган учрашув ва чиқишлар ҳақидаги материалларни доимий равишда тўплаб бориш ва умумлаштириш;

Ўзбекистон Республикаси ИИВ расмий веб-сайтида ички ишлар органларининг жамоат тартибини сақлаш, ҳуқуқбузарликлар профилактикаси ва жиноятчиликка қарши курашиш соҳасидаги натижалар ҳақидаги маълумотларни мунтазам жойлаштириш;

ички ишлар органлари таркибий бўлинмалари расмий веб-сайтлари фаолиятини назорат қилиш ва услубий кузатиб бориш.

Бошқарма қонун ҳужжатларига мувофиқ бошқа функцияларни ҳам амалга ошириши мумкин.

3-боб. Бошқарманинг ҳуқуқлари, вазифалари ва мажбуриятлари

8. Бошқарма ўзига юкланган вазифа ва функцияларни бажариш учун қуйидаги ҳуқуқларга эга:

тегишли давлат идоралари бўлинмалари, фуқароларнинг ўзини ўзи бошқариш органлари, жамоат бирлашмалари, бошқа ташкилотлардан ҳамда фуқаролардан — ахборот, маълумот ва бошқа бошқармалар фаолиятига доир масалалар бўйича материалларни белгиланган тартибда сўраш ва олиш;

Бошқармага юкланган вазифаларни бажаришда ички ишлар органлари бўлинмалари маълумотлар базасидан белгиланган тартибда фойдаланиш;

ички ишлар органлари расмий вакили сифатида оммавий ахборот воситалари ва бутунжаҳон Интернет ахборот тармоғида чиқишлар қилиш, шунингдек, улар орқали ички ишлар органлари фаолияти ҳақида ахборот ва видеоматериаллар тарқатиш;

ички ишлар органлари томонидан берилган ахборот ва материаллардан келиб чиқиб оммавий ахборот воситаларига ва бутунжаҳон Интернет ахборот тармоғига жойлаштиришга мўлжалланган маълумотларнинг зарурлиги ва ҳажмини белгилаш;

ички ишлар органлари томонидан тақдим этилган ахборот ва материалларни таҳрир қилиш ва оммавий ахборот воситаларида ҳамда Ўзбекистон Республикаси ИИВ расмий веб-сайтида охирги таҳрирда жойлаштириш;

ўз ваколати доирасида ички ишлар органлари матбуот хизмати бўлинмалари томонидан бажариш учун мажбурий бўлган ёзма ва оғзаки кўрсатмалар бериш;

ички ишлар органлари матбуот хизмати раҳбарлари ва ходимларининг хизмат тайёргарлигини ошириш доирасида ўқув-услубий йиғинларни белгиланган тартибда ташкил этиш;

ички ишлар органлари матбуот хизмати моддий-техника таъминотини яхшилаш, ходимларининг малакасини ошириш ва уларни қайта тайёрлаш бўйича таклифлар киритиш.

Бошқарма қонун ҳужжатларига мувофиқ бошқа ҳуқуқларни ҳам амалга ошириши мумкин.

9. Бошқарма қуйидагиларга мажбур:

ўз ваколатлари доирасида ички ишлар органи фаолиятининг очиқлигини таъминлаш, ўтказилаётган тадбирларининг ҳар тарафлама ахборот кузатувини, шу жумладан, Ҳуқуқбузарликлар профилактикаси куни, Ёнғинлар профилактикаси куни доирасида зарур чора-тадбирлар кўриш;

Ўзбекистон Республикаси ИИВ раҳбариятига ички ишлар органлари матбуот хизмати ишлари тўғрисида зарур маълумотларни тайёрлаш ва тақдим этиш.

Бошқарма қонун ҳужжатларига мувофиқ бошқа вазифаларни ҳам бажариши мумкин.

10. Бошқарма зиммасига юкланган вазифалар ва функцияларнинг самарали бажарилиши учун жавоб беради.

4-боб. Бошқарма фаолиятини ташкил этиш

11. Бошқармага Ўзбекистон Республикаси Ички ишлар вазири томонидан тайинланадиган ва лавозимидан озод этиладиган бошлиқ раҳбарлик қилади.

Бошқарма бошлиғи лавозимига кўра бир вақтнинг ўзида Ўзбекистон Республикаси Ички ишлар вазирининг матбуот котиби ҳисобланади ва белгиланган тартибда тайинланадиган ва лавозимидан озод этиладиган бир нафар ўринбосари бўлади.

12. Бошқарма бошлиғи:

ишларни ташкиллаштиради ва бошқарма фаолиятига умумий раҳбарлик қилади, зиммасига юкланган вазифаларни бажаришга шахсан жавоб беради, ўз ўринбосари ва ички ишлар органлари тармоқ хизматлари, таълим муассасалари ва ҳудудий бўлинмалар матбуот гуруҳларининг функционал вазифаларини белгилайди;

Бошқарманинг иш режасини тасдиқлайди;

ўз ваколати доирасида кўрсатмалар беради ва Ўзбекистон Республикаси ИИВ раҳбариятига ички ишлар органлари барча шахсий таркиби бажариши мажбурий бўлган буйруқлар, фармойишлар лойиҳаларини киритади;

ички ишлар органлари матбуот хизматига кадрларни танлаш ва жой-жойига қўйиш ишлари бажарилишини назорат қилади, уларнинг касбий даражасини ошириш, қайта тайёрлаш, хизмат ва меҳнат интизомига риоя қилишига қаратилган тадбирларни ташкил этади;

Бошқарма шахсий таркиби ўртасида профилактик ва тарбиявий ишларни амалга оширади;

Ўзбекистон Республикаси ИИВ раҳбариятига ўзининг ўринбосари, матбуот хизмати бошлиқлари ва шахсий таркибини тайинлаш, иш жойини ўзгартириш, эгаллаб турган лавозимидан озод қилиш ва бўшатиш тўғрисида таклифлар киритади.

Ўзбекистон Республикаси ИИВ раҳбариятига бошқарма ходимларига махсус унвонлар бериш, уларни рағбатлантириш ёки уларга нисбатан интизомий жазо қўллаш ҳақида тақдимнома киритади;

Бошқарма ходимларини (ишчиларини) белгиланган тартибда хизмат сафарларига юборади;

Бошқарма ходимларига (ишчиларига) ўз ваколати доирасида меҳнат таътили беради;

ички ишлар органлари соҳавий хизматлари, таълим муассасалари ва ҳудудий бўлинмалари матбуот гуруҳлари раҳбарлари ҳисоботини эшитади;

Бошқарманинг сафарбарлик тайёргарлигини белгиланган тартибда ташкил этади ва таъминлайди;

Бошқармада махфийлик тартиботига риоя этилиши учун жавоб беради.

қонун ҳужжатларига мувофиқ бошқа ваколатларни амалга оширади.

13. Бошқарма бошлиғи йўқлигида унинг вазифаларини ўринбосар бажаради.

14. Бошқарма ходимлари (ишчилари) белгиланган тартибда Бошқарма бошлиғи тавсиясига кўра лавозимга тайинланади ва лавозимдан озод этилади;

15. Ички ишлар органлари соҳавий хизмат, ўқув муассасалари ва ҳудудий бўлинмалари матбуот гуруҳлари раҳбарлари ва ходимлари (ишчилари) ушбу бўлинмалар бошлиқлари томонидан Бошқарма бошлиғи билан келишган ҳолда лавозимга тайинланади ва лавозимдан озод этилади.

5-боб. Якунловчи қоидалар

16. Иш юритиш ва махфийлик тартибининг ташкил этилиши ва таъминланиши Бошқарма томонидан белгиланган тартибда амалга оширилади.

17. Ички ишлар органлари матбуот хизматини техника, жиҳозлар ва бошқа моддий-техника воситалари билан таъминлаш белгиланган тартибда амалга оширилади.

Вазирлар Маҳкамасининг 2017 йил 30 октябрдаги 882-сон қарорига
2-ИЛОВА

Ички ишлар органларининг ахборот кузатуви соҳасидаги фаолиятини ислоҳ қилиш бўйича комплекс чора-тадбирлар

ДАСТУРИ

Т/р	Тадбирлар номи	Амалга ошириш шакли	Бажариш муддатлари	Масъул бажарувчилар
I. Жисмоний ва юридик шахслар томонидан ички ишлар органлари фаолияти тўғрисидаги маълумотларни олишнинг таъсирчан механизми ва мультимедиа имкониятларини жорий этиш
1.	Ҳуқуқбузарликлар профилактикаси ва жиноятчиликка қарши курашиш, жамоатчилик назарига тушган жиноятлар тафсилоти борасидаги ички ишлар органлари фаолиятини тизимли равишда ёритиб берувчи ахборот-таҳлилий телерадиокўрсатувларни тайёрлаш, тасдиқлаш ва татбиқ этиш, улар учун эфир вақтини ҳар ҳафтада ажратишни кўзда тутиш.	Қўшма қарор	2017 йил 10 декабрь	ИИВ (Бобожонов П.), МТРК (Хаджаев А.)
2.	Ички ишлар органлари фаолиятини ёритувчи медиаконтент, улар томонидан ташкил этиладиган тадбир, учрашув ва чиқишларнинг босма, телевизион ва электрон оммавий ахборот воситаларида доимий эълон қилиб борилишини таъминлаш тартибини белгилаш.	Ички ишлар вазирининг буйруғи	2017 йил 10 декабрь	ИИВ (Бобожонов П.)
3.	Ўзбекистон Республикаси Ички ишлар вазирлигининг расмий веб-сайтида эълон қилинган маълумотларни ижтимоий тармоқлар (facebook, twitter ва бошқалар) ва мобиль иловалар (telegram, whatsAPP ва бошқалар) дан фойдаланган ҳолда мақсадли аудиторияни кенгайтириш орқали жойлаштирилган контентни каналлар сифатида ўтказиш.	Расмий саҳифаларни ташкил этиш, контентни такрорлаш	2017 йил 15 декабрь	ИИВ (Эргашев Р.)
4.	Содир этилган жиноятлар ва жамоатчилик муҳокамасига сабаб бўлган воқеаларни, шунингдек, мазкур масалалар бўйича ички ишлар органлари масъул ходимларининг эфирда чиқишларини ташкил этиш, ўз вақтида ва ишончли ёритиш тартибини ишлаб чиқиш ва тасдиқлаш.	Ички ишлар вазирининг буйруғи	2017 йил 20 декабрь	ИИВ (Бобожонов П.)
5.	Ички ишлар органлари масъул ходимларини жамоатчилик ва фуқаролик жамияти институтлари вакиллари билан телевизион учрашув ва брифинглар, жамоат хавфсизлигини таъминлаш ва ҳуқуқ-тартиботни мустаҳкамлаш масалалари бўйича фуқаролар билан очиқ «жонли» мулоқотларини тизимли ташкил этиш.	Қўшма қарор	2018 йил 5 январь	ИИВ (Бобожонов П.), МТРК (Хаджаев А.)
II. Ички ишлар органларининг тармоқ ОАВ веб-ресурслари, нашриёт, телевизион ва студия фаолиятини ривожлантириш
6.	Қуйидагиларни назарда тутиб, Ўзбекистон Республикаси Ички ишлар вазирлигининг расмий-веб сайтини такомиллаштириш: ички ишлар органлари фаолияти соҳасини йўналтирувчи меъёрий-ҳуқуқий ҳужжатлар базасини тизимли янгилаш; ички ишлар органлари масъул ходимларининг жамоат тартибини сақлаш, ҳуқуқбузарликлар профилактикаси ва жиноятчиликка қарши курашиш соҳасида юзага келган вазият ва ички ишлар органлари томонидан амалга оширилаётган комплекс чора-тадбирлар бўйича чиқишларини жойлаштириш; фуқароларни ҳуқуқбузарликлар профилактикаси, қидирувда бўлган жиноятчилар ва бедарак йўқолган шахсларни топишда фаол ёрдам беришга даъват этиш.	Чора-тадбирлар режаси	Тасдиқлаш — 2017 йил 10 декабрь, амалга ошириш — чора-тадбирлар режасига кўра	ИИВ (Эргашев Р.), Ахборот технологиялари ва коммуникацияларини ривожлантириш вазирлиги (Шерматов Ш.)
7.	Ички ишлар органлари соҳасида реклама тусидаги материалларни «Postda» ва «На посту» газеталарида белгиланган тартибда жойлаштириш имкониятларини белгилаш (тендерларни ўтказиш, қўриқлаш ва ёнғинга қарши воситаларни ўрнатиш ва бошқалар).	Ички ишлар вазирининг фармойиши	2017 йил 17 декабрь	ИИВ (Эргашев Р.)
8.	Ички ишлар органлари ҳақидаги оммавий ахборот воситаларида чиққан материалларни мониторинг ва таҳлил қилиб бориш тартибини ишлаб чиқиш ва тасдиқлаш, нотўғри маълумот ва ички ишлар органлари нуфузига путур етказувчи материалларни аниқлаш ва зудлик билан муносабат билдириш (рад этиш).	Ички ишлар вазирининг буйруғи	2017 йил 20 декабрь	ИИВ (Бобожонов П.)
9.	Ўзбекистон Республикаси расмий веб-сайтида хабарларнинг тезкор ёритилишини ривожлантириш учун «Postda», «На посту» газеталари ва «Qalqon», «Щит» журналлари веб-бўлимларини; хабарларнинг тезкор ёритилишини ривожлантириш учун мобиль иловани ва фойдаланувчилар етакчи контентини ишлаб чиқиш ва йўлга қўйиш.	Техник топшириқ	Тасдиқлаш — 2017 йил 25 декабрь, амалга ошириш — техник топшириққа кўра	ИИВ (Эргашев Р.), Ахборот технологиялари ва коммуникацияларини ривожлантириш вазирлиги (Шерматов Ш.)
III. Ички ишлар органларининг матбуот хизмати фаолиятини такомиллаштириш, унинг кадрлар ва профессионал салоҳиятини мустаҳкамлаш
10.	Ўзбекистон Республикаси Ички ишлар вазирлиги матбуот хизмати ходимлари (ишчилари)нинг функционал вазифаларини ишлаб чиқиш ва тасдиқлаш, шунингдек, ички ишлар органларининг ахборот кузатуви самарасини ошириш муҳимлигини инобатга олган ҳолда уларнинг фаолиятини мониторинг қилиш ва баҳолаш.	Ички ишлар вазирининг буйруғи	2017 йил 15 ноябрь	ИИВ (Мирзаев А.)
11.	Ички ишлар органлари матбуот гуруҳлари раҳбарлари бир вақтнинг ўзида соҳавий хизмат ва ҳудудий ички ишлар органлари бошлиқларининг матбуот котиби ҳисобланишини назарда тутиб, Ўзбекистон Республикаси Ички ишлар вазирлиги матбуот хизмати штат жадвалини тасдиқлаш.	Ички ишлар вазирининг буйруғи	2017 йил 30 ноябрь	ИИВ (Мирзаев А.)
12.	Ички ишлар органлари матбуот хизматларини журналистика, филология ва юриспруденция соҳалари малакали мутахассислари билан таъминлаш.	Чора-тадбирлар режаси	Тасдиқлаш — 2017 йил 30 ноябрь, амалга ошириш — чора-тадбирлар режасига кўра	ИИВ (Мирзаев А.), МТРК (Хаджаев А.), ЭОАВМА (Абдухаликов Ф.)
13.	Ички ишлар органлари матбуот хизмати ходимларининг (ишчиларининг) Ўзбекистон Республикаси Ички ишлар вазирлигидан чет эл сафарига чиққан делегация таркибида Республика оммавий ахборот воситаларида ташриф натижаларини кенг қамровли ва объектив ёритишни тартибга келтириш.	Ички ишлар вазирининг буйруғи	2017 йил 10 декабрь	ИИВ (Бобожонов П.)
14.	Ҳар йили ўтказиладиган «Ички ишлар органлари матбуот хизматининг энг фаол ходими» танловини таъсис этиш, ўз ишида юқори натижаларга эришган матбуот хизмати ходимлари (ишчилари)ни рағбатлантириш, шунингдек, тарғибот-ташвиқот фаолиятида фаол иштирок этаётган ички ишлар органлари ходимларини рағбатлантириш.	Ички ишлар вазирининг буйруғи	2017 йил 20 декабрь	ИИВ (Мирзаев А.)
15.	Республика ихтисослашган ўқув муассасалари базасида ички ишлар органлари матбуот хизматлари журналист ва техник ходимларининг малакасини доимий равишда ошириш тизимини жорий этиш.	Қўшма қарор	2017 йил 15 декабрь	ИИВ (Мирзаев А.), Олий таълим вазирлиги (Набиев Д.), манфаатдор вазирлик ва идоралар
IV. Ички ишлар органларининг фуқаролик жамияти институтлари ва оммавий ахборот воситалари билан самарали ҳамкорлигини ташкил этиш
16.	Ички ишлар органлари матбуот хизматларининг республика ва ҳудудий оммавий ахборот воситалари билан ҳамкорлик қилиш тартибини ишлаб чиқиш ва тасдиқлаш.	Қўшма қарор	2018 йил 5 январь	ИИВ (Бобожонов П.), ЎзМАА (Тангриев Л.), МТРК (Хаджаев А.), ЭОАВМА (Абдухаликов Ф.)
17.	Ички ишлар органлари матбуот хизматларининг журналист кадрларини шакллантириш, бунда ички ишлар органлари ахборот кузатуви доирасида фаолият юритаётганлигини инобатга олган ҳолда муайян оммавий ахборот воситалари билан алоқа ўрнатиш.	Қўшма қарор	2018 йил 10 январь	ИИВ (Бобожонов П.), ЎзМАА (Тангриев Л.), МТРК (Хаджаев А.), ЭОАВМА (Абдухаликов Ф.)
18.	Ички ишлар органлари матбуот хизмати билан Ўзбекистон миллий телерадиокомпанияси таркибидаги телерадиоканаллари ва Электрон оммавий ахборот воситалари миллий ассоциациясига аъзо нодавлат телерадиоканаллари ўртасида яқин ҳамкорлик ўрнатиш.	Қўшма режа	Тасдиқлаш — 2018 йил 10 январь, амалга ошириш — тадбирлар режасига мувофиқ	ИИВ (Бобожонов П.), МТРК (Хаджаев А.), ЭОАВМА (Абдухаликов Ф.)
19.	Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармаси медиа-маркази базасида Матбуот клуби фаолиятини ташкил этиш.	Тадбирлар режаси	Тасдиқлаш — 2018 йил 10 январь, амалга ошириш — тадбирлар режасига мувофиқ	ИИВ (Бобожонов П.)
V. Ички ишлар органлари матбуот хизмати фаолиятига замонавий ахборот-коммуникация технологияларини татбиқ этиш, унинг моддий-техника базасини янада такомиллаштириш
20.	Фаолият йўналишини инобатга олган ҳолда Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармасининг тўлақонли фаолиятини таъминлаш мақсадида уни жойлаштириш, шароит яратиш ва бошқа ташкилий масалаларини ҳал этиш.	Чора-тадбирлар режаси	Тасдиқлаш — 2017 йил 20 ноябрь, амалга ошириш — чора-тадбирлар режасига мувофиқ	ИИВ (Эргашев Р.)
21.	Ўзбекистон Республикаси Ички ишлар вазирлиги Жамоатчилик ва оммавий ахборот воситалари билан алоқалар бошқармасини автотранспорт воситалари, жумладан, автобус, медиамарказнинг тасвирга олиш ишларини самарали ташкил этиш, ички ишлар органларида ўтказиладиган тадбирлар, учрашувлар ва чиқишларда жойларга жадал етиб бориш учун барча зарур воситалар билан таъминлаш.	Ички ишлар вазирининг фармойиши	2017 йил 1 декабрь	ИИВ (Эргашев Р.)
22.	Ўзбекистон Республикаси Ички ишлар вазирлиги матбуот хизматини замонавий телевизион, босма ва бошқа зарур техник воситалар билан таъминлаш дастури лойиҳасини молиялаштириш аниқ манбаларини кўрсатган ҳолда ишлаб чиқиш ва Ўзбекистон Республикаси Вазирлар Маҳкамасига киритиш.	Ҳукумат қарори лойиҳаси	2017 йил 15 декабрь	ИИВ (Эргашев Р.), Молия вазирлиги (Турсунов Ё.)

Изоҳ. Тадбирларни амалга ошириш шакли ўзгариши, ишлаб чиқиладиган норматив-ҳуқуқий ҳужжатлар эса — ҳуқуқий муносабатлар предмети ва йўналишидан келиб чиққан ҳолда бирлаштирилиши мумкин.

Вазирлар Маҳкамасининг 2017 йил 30 октябрдаги 882-сон қарорига
3-ИЛОВА

«Ўзбекистон Республикаси Ички ишлар вазирлигининг «Postda» — «На посту» газеталари ва «Qalqon» — «Щит» журналлари бирлашган таҳририяти» давлат унитар корхонасининг

ТАШКИЛИЙ ТУЗИЛМАСИ

(Қонун ҳужжатлари маълумотлари миллий базаси, 01.11.2017 й., 09/17/882/0196)