|
Ҳужжат кучини йўқотган " " 23.02.2019
|
Ўзбекистон Республикаси Вазирлар Маҳкамасининг
қарори
Ўзбекистон Республикаси Жисмоний тарбия ва спорт вазирлиги ҳузурида Жисмоний тарбия ва оммавий спортни ривожлантириш кенгашини ташкил этиш тўғрисида
(қарор номи Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
LexUZ шарҳиМазкур қарор Ўзбекистон Республикаси Вазирлар Маҳкамасининг 2019 йил 23 февралдаги 161-сонли «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Идоралараро коллегиал органларни тубдан қисқартириш ва янада оптималлаштириш чора-тадбирлари тўғрисида» 2018 йил 28 августдаги ПФ-5527-сон Фармони)»ги қарорига асосан ўз кучини йўқотган.
Ўзбекистон Республикаси Президентининг «Жисмоний тарбия ва оммавий спортни янада ривожлантириш чора-тадбирлари тўғрисида» 2017 йил 3 июндаги ПҚ-3031-сон қарорида белгиланган вазифалар ижросини таъминлаш, шунингдек, мамлакатимизда жисмоний тарбия ва оммавий спортни янада ривожлантириш ишларининг самарадорлигини оширишга кўмаклашиш мақсадида Вазирлар Маҳкамаси қарор қилади:
1. Ўзбекистон Республикаси Жисмоний тарбия ва спорт давлат қўмитаси, Миллий олимпия қўмитаси, Халқ таълими вазирлиги, Олий ва ўрта махсус таълим вазирлигининг Ўзбекистон Республикаси Жисмоний тарбия ва спорт давлат қўмитаси ҳузурида Жисмоний тарбия ва оммавий спортни ривожлантириш кенгашини ташкил этиш тўғрисидаги таклифига розилик берилсин.
2. Қуйидагилар:
Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва оммавий спортни ривожлантириш кенгашининг таркиби 1-иловага мувофиқ;
(2-банднинг иккинчи хатбошиси Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва оммавий спортни ривожлантириш кенгаши тўғрисидаги низом 2-иловага мувофиқ тасдиқлансин.
(2-банднинг учинчи хатбошиси Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
3. Қуйидагилар Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва оммавий спортни ривожлантириш кенгашининг асосий вазифалари этиб белгилансин:
(3-банднинг биринчи хатбошиси Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
Ўзбекистон Республикаси Жисмоний тарбия ва спорт давлат қўмитасига юклатилган вазифаларни амалга оширишда кўмаклашиш;
Ўзбекистон Республикасида жисмоний тарбия ва оммавий спортни янада ривожлантириш дастурида назарда тутилган чора-тадбирларнинг тўлиқ ва сифатли бажарилиши бўйича мониторинг олиб бориш;
Ўзбекистон Республикасининг «Жисмоний тарбия ва спорт тўғрисида»ги Қонуни талаблари ҳаётга тўлақонли жорий этилишини таъминлаш.
4. Белгилансинки, Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва оммавий спортни ривожлантириш кенгаши жамоатчилик асосида фаолият юритади.
(4-банд Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
5. Мазкур қарорнинг бажарилишини назорат қилиш Ўзбекистон Республикаси Жисмоний тарбия ва спорт давлат қўмитаси раиси Р.Д. Курбанов зиммасига ва Ўзбекистон Республикаси Вазирлар Маҳкамасининг Соғлиқни сақлаш, экология, атроф-муҳитни муҳофаза қилиш, жисмоний тарбия ва спорт масалалари ахборот-таҳлил департаментига юклансин.
Ўзбекистон Республикасининг Бош вазири А. АРИПОВ
Тошкент ш.,
2017 йил 23 октябрь,
865-сон
Вазирлар Маҳкамасининг 2017 йил 23 октябрдаги 865-сон қарорига
1-ИЛОВА
1-ИЛОВА
Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва оммавий спортни ривожлантириш кенгашининг
ТАРКИБИ
|
Т.К. Нарбаева |
— |
Ўзбекистон Республикаси Бош вазирининг ўринбосари — Ўзбекистон Хотин-қизлар қўмитаси раиси, Кенгаш раиси |
|
Ш.Х. Исроилов |
— |
Ўзбекистон Республикаси Жисмоний тарбия ва спорт вазири, Кенгаш раисининг ўринбосари |
|
У.М. Ахматджанов |
— |
Ўзбекистон Миллий олимпия қўмитаси раиси, Кенгаш раисининг ўринбосари |
|
Ш.Ф. Моминжанов |
— |
Ўзбекистон Республикаси Жисмоний тарбия ва спорт вазирининг ўринбосари |
|
Д.Х. Набиев |
— |
Ўзбекистон Республикаси Олий ва ўрта махсус таълим вазирининг биринчи ўринбосари |
|
Лавозими бўйича |
— |
Ўзбекистон Республикаси Халқ таълими вазирининг ўринбосари |
|
М.М. Холмухамедов |
— |
Ўзбекистон Республикаси Олий ва ўрта махсус таълим вазирининг биринчи ўринбосари |
|
О.А. Назарбеков |
— |
Ўзбекистон Республикаси Маданият вазирининг биринчи ўринбосари |
|
Э.И. Баситханова |
— |
Ўзбекистон Республикаси Соғлиқни сақлаш вазирининг ўринбосари |
|
Д.Н. Саттаров |
— |
Ўзбекистон Республикаси Молия вазирининг ўринбосари |
|
Қ.М. Рафиков |
— |
Ўзбекистон Касаба уюшмалари Федерацияси Кенгаши раиси |
|
Ш.И. Джалилов |
— |
Ўзбекистон «Нуроний» жамғармаси раиси |
|
А.Х. Мирзажанов |
— |
Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши раисининг ўринбосари |
|
К.С. Худойберганов |
— |
Ўзбекистон спорт ташкилотлари фахрийлари кенгаши раиси |
|
Ш.О. Нурматова |
— |
Ўзбекистон Хотин-қизлар қўмитаси раисининг ўринбосари |
|
М.М. Зуфаров |
— |
Ўзбекистон ёшлар иттифоқи Марказий Кенгаши раисининг ўринбосари |
|
Т.А. Тойиров |
— |
Ўзбекистон «Ёшлик» жисмоний тарбия ва спорт жамияти Марказий Кенгаши раисининг биринчи ўринбосари |
|
Э.И. Қодиров |
— |
Ўзбекистон «Баркамол авлод» жисмоний тарбия ва спорт жамияти Марказий Кенгаши раисининг биринчи ўринбосари |
|
Т.Ш. Хаитов |
— |
Ўзбекистон Олий ва ўрта махсус таълим ўқув юртлари ўқувчилари ҳамда талабаларининг Республика «Талаба» спорт уюшмаси ижрочи раиси |
|
А.С. Исмоилов |
— |
Ўзбекистон Республикаси Ички ишлар вазирлигининг Ҳуқуқбузарликлар профилактикаси бош бошқармаси бошлиғи |
|
Лавозими бўйича |
— |
Ўзбекистон давлат жисмоний тарбия ва спорт университети ректори |
|
Лавозими бўйича |
— |
Республика ихтисослаштирилган олимпия захиралари мактаб-интернати директори |
|
Лавозими бўйича |
— |
Ўзбекистон Республикаси Жисмоний тарбия ва спорт вазирлигининг Жисмоний тарбия оммавий спортни ривожлантириш бошқармаси бошлиғи |
|
Лавозими бўйича |
— |
Спорт турлари бўйича республика федерациялари (уюшмалари) раислари ўринбосарлари, бош котиблари, ижрочи директорлари |
|
Лавозими бўйича |
— |
Қорақалпоғистон Республикаси Жисмоний тарбия ва спорт вазири, вилоятлар ва Тошкент шаҳар жисмоний тарбия ва спорт бошқармалари бошлиқлари |
Изоҳ: Кенгаш аъзолари бошқа ишга ўтган тақдирда ушбу лавозимларга янгидан тайинланган шахслар ёки тегишли мажбуриятларни бажариш зиммасига юкланган шахслар Кенгаш таркибига киритилади.
(1-илова Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
Вазирлар Маҳкамасининг 2017 йил 23 октябрдаги 865-сон қарорига
2-ИЛОВА
2-ИЛОВА
Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва оммавий спортни ривожлантириш кенгаши тўғрисида
НИЗОМ
(2-илова номи Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
1-боб. Умумий қоидалар
1. Ушбу Низом Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва оммавий спортни ривожлантириш кенгашининг (кейинги ўринларда Кенгаш деб аталади) асосий вазифалари, фукциялари, ҳуқуқ ва мажбуриятларини, шунингдек, фаолиятини ташкил этиш тартибини белгилайди.
(1-банд Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
2. Кенгаш жисмоний тарбия ва спортга оид давлат сиёсатини амалга оширишда иштирок этувчи давлат органлари ва муассасалари фаолиятини мувофиқлаштирувчи коллегиал идоралараро орган ҳисобланади.
Кенгаш жамоатчилик асосида фаолият юритади.
3. Кенгаш ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталари қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга ва бошқа қонун ҳужжатларига амал қилади.
4. Кенгаш ўз фаолиятини давлат органлари ва муассасалари, нодавлат нотижорат ташкилотлари ҳамда фуқаролик жамиятининг бошқа институлари билан ўзаро ҳамкорликда амалга оширади.
2-боб. Кенгашнинг асосий вазифалари ва фукциялари
5. Қуйидагилар Кенгашнинг асосий вазифалари ҳисобланади:
Ўзбекистон Республикаси Жисмоний тарбия ва спорт вазирлигига юклатилган вазифаларни амалга оширишда кўмаклашиш;
(5-банднинг иккинчи хатбошиси Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
Ўзбекистон Республикасида жисмоний тарбия ва оммавий спортни янада ривожлантириш дастурида назарда тутилган чора-тадбирларнинг тўлиқ ва сифатли бажарилиши бўйича мониторинг олиб бориш;
Ўзбекистон Республикасининг «Жисмоний тарбия ва спорт тўғрисида»ги Қонуни талаблари ҳаётга тўлақонли жорий этилишини таъминлаш.
6. Кенгаш ўзига юкланган вазифаларни бажариш учун қуйидаги функцияларни амалга оширади:
а) Ўзбекистон Республикаси Жисмоний тарбия ва спорт вазирлигига юклатилган вазифаларни амалга оширишда кўмаклашиш соҳасида:
(6-банднинг иккинчи хатбошиси Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
Жисмоний тарбия ва спортга оид давлат сиёсатини амалга ошириш жараёнида юзага келаётган муаммо ва йўл қўйилаётган камчиликларни бартараф этишда кўмаклашиш;
жисмоний тарбия ва спортни ривожлантириш борасида кенг жамоатчилик фикрини ўрганиш, таҳлил қилиш, ушбу соҳадаги ишларни янада такомиллаштиришга доир таклифлар ишлаб чиқиш;
шаҳарлар ва туманларда спорт-оммавий ва жисмоний тарбия-соғломлаштириш тадбирлари, шу жумладан, спортнинг миллий турлари бўйича халқ ўйинлари ва мусобақалар аҳоли, айниқса, ёшлар, хотин-қизлар, кекса кишилар ва қишлоқ аҳолиси орасида ўтказилишини мунтазамлилик асосида ташкил этилишига кўмаклаш;
жисмоний ва маънавий соғлом ўсиб келаётган авлодни камол топтиришнинг муҳим шарти сифатида оммавий болалар спортини ривожлантиришга, болаларда соғлом турмуш тарзига интилишни ва спортга муҳаббатни сингдиришни таъминлашда кўмаклашиш;
мамлакатда спорт турларини, спорт индустрияси ва инфратузилмасини ривожлантиришга доир таклифлар ишлаб чиқиш;
жисмоний тарбия ва спорт билан шуғулланишни оммалаштириш ишларини ташкил этишда кўмаклашиш;
жисмоний тарбия-соғломлаштириш иншоотлари сиғимидан самарали фойдаланиш, спорт секциялари ташкил этиш юзасидан таклифлар ишлаб чиқиш;
жисмоний тарбия ва спорт соҳасида халқаро ҳамкорликни мустаҳкамлашда қатнашиш;
б) Ўзбекистон Республикасида жисмоний тарбия ва оммавий спортни янада ривожлантириш дастурида назарда тутилган чора-тадбирларнинг тўлиқ ва сифатли бажарилиши бўйича мониторинг олиб бориш соҳасида;
давлат органлари ва муассасалари, нодавлат нотижорат ташкилотлари, фуқароларнинг ўзини ўзи бошқариш органлари билан Ўзбекистон Республикасида жисмоний тарбия ва оммавий спортни янада ривожлантириш дастурида белгиланган талабларни амалга оширишда ўзаро ҳамкорликни таъминлаш;
Ўзбекистон Республикасида жисмоний тарбия ва оммавий спортни янада ривожлантириш дастурида назарда тутилган чора-тадбирларнинг амалга оширилиши юзасидан мониторинг олиб бориш ва мунтазам равишда муҳокама қилиш;
в) Ўзбекистон Республикасининг «Жисмоний тарбия ва спорт тўғрисида»ги Қонуни талаблари ҳаётга тўлақонли жорий этилишини таъминлаш соҳасида:
давлат органлари ва муассасалари, нодавлат нотижорат ташкилотлари, оммавий ахборот воситалари ва фуқаролик жамияти бошқа институтлари билан биргаликда жисмоний тарбия ва спорт билан шуғулланишни оммалаштириш ишларини ташкил этиш;
жисмоний тарбия ва спорт соҳасидаги давлат дастурларининг ишлаб чиқилишида иштирок этиш;
жисмоний тарбия ва спорт соҳасидаги қонун ҳужжатларининг ижро этилиши юзасидан жамоатчилик назорати амалга оширилишини ташкил этиш;
жисмоний тарбия ва спортга оид давлат сиёсатини амалга оширишнинг ҳолати таҳлил қилинишини ташкил этиш.
Кенгаш ўзига юкланган вазифаларнинг самарали бажарилиши юзасидан ҳар йили Ўзбекистон Республикаси Вазирлар Маҳкамасига ҳисобот киритади.
3-боб. Кенгашнинг ҳуқуқ ва мажбуриятлари
7. Кенгаш қуйидаги ҳуқуқларга эга:
ўз ваколатига кирадиган масалалар бўйича давлат органлари ва муассасалари, нодавлат нотижорат ташкилотлари ва фуқаролик жамиятининг бошқа институтларидан белгиланган тартибда маълумотларни сўраш ва олиш;
жисмоний тарбия ва спортга оид давлат сиёсатини амалга оширишда иштирок этувчи давлат органлари ва муассасалари вакилларининг ахборотларини мунтазам эшитиш;
давлат органлари ва муассасаларининг жисмоний тарбия в спорт масалалари билан боғлиқ фаолияти самарадорлигини оширишга доир тавсиялар ишлаб чиқиш;
жисмоний тарбия ва спорт билан боғлиқ ишларнинг ҳолатини ўрганиш учун ишчи комиссиялар ва (ёки) эксперт гуруҳлар ташкил этиш, шунингдек, ушбу комиссия ва гуруҳлар фаолиятига тегишли мутахассисларни жалб қилиш;
жисмоний тарбия ва спортни ривожлантиришда фаол иштирок этган шахсларни рағбатлантириш ташаббуси билан чиқиш;
жисмоний тарбия ва спортга доир норматив-ҳуқуқий ҳужжатлар лойиҳаларини ишлаб чиқиш юзасидан таклифлар бериш.
Кенгаш қонун ҳужжатларига мувофиқ бошқа ҳуқуқларга ҳам эга бўлиши мумкин.
8. Кенгаш ўзига юкланган вазифалар ва функцияларнинг самарали бажарилиши учун жавоб беради.
4-боб. Кенгаш фаолиятини ташкил этиш
9. Кенгашнинг раис, раис ўринбосарлари ва аъзоларидан иборат таркиби Ўзбекистон Республикаси Вазирлар Маҳкамаси томонидан тасдиқланади.
10. Кенгаш ўз фаолиятини доимий асосда амалга оширади ва мажлисларини заруратга кўра, аммо ҳар йилда камида икки марта ўтказади.
11. Кенгаш раиси:
Кенгаш фаолиятига умумий раҳбарлик қилади;
раис ўринбосарлари ва аъзолари ўртасида вазифаларни тақсимлайди;
Кенгаш йиғилишларини чақиради ва уларга раислик қилади;
Кенгаш йиғилишлари кун тартибини тасдиқлайди;
Кенгаш иш режаларини тасдиқлайди.
Кенгашнинг самарали ишлашини таъминлаш бўйича бошқа вазифаларни амалга оширади.
12. Кенгаш раиси ўринбосарлари раис томонидан ўзларига юкланган вазифаларни амалга оширади ҳамда ушбу вазифаларнинг ўз вақтида ва сифатли бажарилиши учун шахсан жавоб беради.
13. Кенгаш ишчи органи функциясини Ўзбекистон Республикаси Жисмоний тарбия ва спорт вазирлиги (кейинги ўринларда Ишчи орган деб аталади) бажаради.
(13-банд Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
14. Ишчи орган:
Кенгашнинг иш режаларини ишлаб чиқади, уларнинг ижроси юзасидан назоратни амалга оширади;
тасдиқланган иш режасига мувофиқ Кенгашнинг жорий фаолиятини ташкил этади;
Кенгаш йиғилишлари кун тартибига киритиладиган масалалар бўйича материалларнинг тайёрланишини ташкил қилади;
Кенгашнинг ваколати доирасига кирувчи масалалар юзасидан қарорлар ва бошқа ҳужжатлар лойиҳаларини тайёрлайди;
Кенгаш қарорларининг ижроси юзасидан назорат ва мониторингни ташкил қилади;
оммавий ахборот воситалари билан ўзаро ҳамкорлик қилади;
Кенгаш фаолиятини ташкилий-техник таъминлашни амалга оширади.
Ишчи орган қонун ҳужжатларига мувофиқ бошқа функцияларни ҳам амалга ошириши мумкин.
15. Кенгаш таркибига кирувчи давлат органлари ва муассасалари ўз ваколатлари доирасида жисмоний тарбия ва спортга оид давлат сиёсати доирасида амалга оширилган ишлар тўғрисида ишчи органга ҳар ойнинг йигирма бешинчи кунига қадар ҳисоботлар тақдим этиб боради.
16. Кенгаш мажлисини унинг раиси бошқаради. Кенгаш раиси бўлмаган тақдирда, мажлисни унинг ўринбосарларидан бири бошқаради.
Кенгаш мажлиси аъзоларнинг камида учдан икки қисми ҳозир бўлганда ваколатли ҳисобланади.
17. Кенгаш қарорлари Кенгаш аъзоларининг оддий кўпчилик овози билан қабул қилинади. Овозлар тенг бўлган тақдирда, Кенгаш раисининг овози ҳал қилувчи овоз ҳисобланади.
Кенгаш қарорлари йиғилишда иштирок этган Кенгаш аъзолари томонидан имзоланадиган ва Кенгаш раиси томонидан тасдиқланадиган баённома билан расмийлаштирилади. Баённомани имзолашда Кенгаш аъзолари ўзларининг алоҳида фикрларини ёзма равишда билдириш ҳуқуқига эгадир.
18. Кенгашнинг иш режалари унинг аъзоларидан келиб тушган таклифлар асосида ҳар ярим йилга тузилади, Кенгаш йиғилишида кўриб чиқилади ва Кенгаш раиси томонидан тасдиқланади.
5-боб. Якунловчи қоидалар
19. Кенгаш фаолиятини ташкилий-техник жиҳатдан таъминлаш Ўзбекистон Республикаси Жисмоний тарбия ва спорт вазирлиги маблағлари ҳисобидан амалга оширилади.
(19-банд Ўзбекистон Республикаси Вазирлар Маҳкамасининг 2018 йил 5 июлдаги 508-сонли қарори таҳририда — Қонун ҳужжатлари маълумотлари миллий базаси, 09.07.2018 й., 09/18/508/1477-сон)
20. Кенгашни қайта ташкил этиш ва тугатиш қонун ҳужжатларида белгиланган тартибда амалга оширилади.
(Қонун ҳужжатлари маълумотлари миллий базаси, 23.10.2017 й., 09/17/865/0161-сон, 09.07.2018 й., 09/18/508/1477-сон)
