Ўзбекистон Республикаси Олий Мажлисининг «Архивлар тўғрисида»ги Ўзбекистон Республикаси Қонунини амалга киритиш ҳақида» 1999 йил 15 апрелдаги 769-I-сон қарорини бажариш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Миллий архив фонди тўғрисида Низом 1-иловага мувофиқ;

Ўзбекистон Республикаси Миллий архив фонди ҳужжатларини давлат рўйхатидан ўтказиш Тартиби 2-иловага мувофиқ;

Ўзбекистон Республикаси давлат ҳокимияти ва бошқаруви органлари, корхоналар, муассасалар ва ташкилотлардаги идоравий архив тўғрисида Намунавий низом 4-иловага мувофиқ тасдиқлансин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар ва идоралар, давлат қўмиталари, корпорациялар, концернлар, уюшмалар, компаниялар ўз меъёрий ҳужжатларини «Архив тўғрисида»ги Ўзбекистон Республикаси Қонунига ва мазкур қарор билан тасдиқланган архив иши бўйича меъёрий ҳужжатларга мувофиқлаштирсинлар.

3. Қуйидагилар:

Ўзбекистон ССР Министрлар Советининг «Республикада архив ишини бошқариш схемаси тўғрисида» 1988 йил 31 октябрдаги 389-сон қарорининг 1-банди;

Ўзбекистон Республикаси Вазирлар Маҳкамасининг «Ўзбекистон Республикаси Вазирлар Маҳкамаси ҳузуридаги Бош архив бошқармаси («Ўзбошархив») тўғрисидаги Низом ва республика марказий давлат архивлари тармоғини тасдиқлаш ҳақида» 1992 йил 19 июндаги 296-сон қарори ўз кучини йўқотган деб ҳисоблансин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ҳ.С. Кароматов зиммасига юклансин.

1. Мазкур Низом «Архив иши тўғрисида»ги Ўзбекистон Республикаси Қонунига мувофиқ Ўзбекистон ҳудудида мавжуд бўлган барча архив ҳужжатларининг тўлиқ қамраб олинишини таъминлашга, Ўзбекистон Республикаси Миллий архив фондининг яхлитлигини сақлаб қолишга ва фуқаролар, жамият ва давлатнинг ижтимоий, маданий, илмий ва бошқа эҳтиёжларини қондириш мақсадида архив ҳужжатларини рўйхатдан ўтказиш, жамлаш, экспертизадан ўтказиш, ҳисобга олиш, сақлаш ҳамда улардан фойдаланишнинг ягона тартибини белгилашга қаратилгандир.

Ўзбекистон Республикаси Миллий архив фонди — Ўзбекистон халқининг моддий ва маънавий ҳаётини акс эттирган, тарихий, илмий, ижтимоий, иқтисодий, сиёсий ва маданий аҳамиятга эга бўлган архив ҳужжатларининг тарихан таркиб топган ва доимо бойитиб бориладиган мажмуи.

Миллий архив фонди Миллий архив фондининг давлатга тегишли қисми ва давлатга тегишли бўлмаган қисмидан иборат.

2. Миллий архив фондининг давлатга тегишли қисмини қуйидагилар ташкил этади:

2.1 Ўзбекистон Республикаси таркибига кирувчи ҳудуддаги мавжуд ва ўзининг барча тарихи давомида мавжуд бўлган давлат юридик шахслари:

— давлат ҳокимияти ва бошқарувининг олий, республика ва маҳаллий, фуқароларнинг ўзини ўзи бошқариш органлари, прокуратуралар, судлар, банкларнинг;

— саноат, транспорт, алоқа, капитал қурилиш, қишлоқ хўжалиги ва халқ хўжалигининг бошқа тармоқлари, фан, халқ таълими, маданият соҳасидаги давлат корхоналари, муассасалари, ташкилотлар ва бирлашмаларнинг;

— устав капиталида давлат мулки бўлган аралаш мулкчилик шаклларидаги корхоналар, ташкилотлар ва бирлашмаларнинг;

— ватанимизнинг чет элда бўлган ва (ёки) чет элдаги давлат корхоналари, муассасалари, ташкилотлари ва бирлашмаларининг фаолиятида пайдо бўлган архив ҳужжатлари;

2.2. Касаба уюшмалари, сиёсий ташкилотлар, ижодий ва бошқа жамоат ташкилотлари, бирлашмаларнинг Ўзбекистон Республикаси қонунчилигига мувофиқ рўйхатдан ўтгунга қадар ўз фаолиятларида пайдо бўлган ҳужжатлари, дин давлатдан ажратилгунгача бўлган даврга тегишли диний муассасаларнинг архив ҳужжатлари;

2.3 Ўзбекистон Республикаси ҳудудида ҳаракатда бўлган барча даражадаги ҳарбий қисмлар бошқармалари ва штаблари, қўшилмалар ва бирлашмалар, ўқув муассасалари ва бошқа миллий муҳофаза қилиш ва хавфсизлик муассасалари, ташкилотлари, армия, чегара ва ички қўшинларнинг архив ҳужжатлари;

2.4. Қонуний асосда давлат мулкига, шу жумладан, чет эллардан келиб тушган ёки уларга берилган юридик ва жисмоний шахсларнинг архив ҳужжатлари;

2.5. Архив ҳужжатларининг асл нусхаси, шунингдек, давлат мулкига чет эллардан қонуний асосда келиб тушган архив ҳужжатлари нусхалари.

3. Миллий архив фондининг давлатга тегишли қисми таркибига қонун ҳужжатлари, бошқарув, лойиҳа, конструкторлик, махсус ҳужжатлар, шунингдек уларнинг бошқа моддий жисмлардаги ёзувлари, дастурлар, алгоритмлар ва машина йўналтирилган (механографик) ҳужжатлар, кинофотофоно ҳужжатлар, видеофонограммалар, илмий, адабий, бадиий, мусиқий қўлёзмалар ва бошқа қўлёзмалар, расмлар, кундаликлар, хотираномалар, ёзишмалар ҳамда фуқаролар, жамият ва давлат учун аҳамиятли бўлганлиги учун сақланиши керак бўлган, кимнинг тасарруфида эканлигидан қатъи назар, давлат мулки бўлган ҳужжатларнинг бошқа тоифалари киради.

4. Давлат корхоналари, муассасалари ва ташкилотларининг ҳужжатлари Вазирлар Маҳкамаси томонидан белгиланадиган тартибда Ўзбекистон Республикаси Адлия вазирлиги ҳузуридаги «Ўзархив» агентлиги ва унинг Қорақалпоғистон Республикаси, вилоятлар ва Тошкент шаҳридаги архив иши бўйича ҳудудий бошқармалари, шунингдек уларга идоравий мансуб давлат архивлари томонидан Миллий архив фондининг давлатга тегишли қисми таркибига киритилади. Ўзбекистон Республикаси Адлия вазирлиги ҳузуридаги «Ўзархив» агентлиги давлат томонидан сақланиши керак бўлган ҳужжатларнинг намунавий рўйхатларини, шу жумладан сақлаш муддатларини кўрсатган ҳолда тасдиқлайди.

5. Қуйидагилар Миллий архив фондининг давлатга тегишли қисми ҳужжатларини доимий сақлайдилар:

5.1 Ўзбекистон Республикасининг давлат архивлари — тегишли йўналишдаги ҳужжатлар билан ишлаш бўйича республика илмий-услубий марказлар, жумладан: Ўзбекистон Миллий архиви, Ўзбекистон Илмий-техника ва тиббиёт ҳужжатлари миллий архиви ва Ўзбекистон Кинофотофоно ҳужжатлари миллий архиви — давлат ҳокимияти ва бошқаруви республика органлари, Ўзбекистон Республикаси Прокуратураси, судлари, Марказий банки ва республиканинг бошқа банклари, корхоналари, муассасалари, ташкилотлари ва бирлашмаларининг ҳужжатлари, шунингдек, сақлаш учун илгари қабул қилинган архив фондлари ва архив ҳужжатлари;

5.2 Қорақалпоғистон Республикаси ва Тошкент шаҳар марказий давлат архивлари, вилоятлар, шаҳарлар, туманлар давлат архивлари ва уларнинг филиаллари — маҳаллий давлат ҳокимияти ва бошқаруви органлари, Қорақалпоғистон Республикаси, вилоятлар, шаҳарлар, туманлар прокуратуралари ва судлари, уларнинг ҳудудларидаги корхоналар, муассасалар, ташкилотлар ва бирлашмаларнинг архив ҳужжатлари, шунингдек, сақлаш учун илгари қабул қилинган архив фондлари ва архив ҳужжатлари;

5.3. Миллий архив фондининг давлатга тегишли қисми таркибига киритилган архив ҳужжатларини доимий (муддатсиз) сақлашни амалга оширадиган вазирликлар ва идораларнинг (иловага мувофиқ) — тегишли ихтисосдаги архив фондлари ва архив ҳужжатлари;

5.4. Давлат музейлари ва кутубхоналари — қонуний асосда давлат мулкига кирувчи юридик ва жисмоний шахсларнинг архив ҳужжатлари, шунингдек давлат томонидан сақлаш учун илгари қабул қилинган архив фондлари ва архив ҳужжатлари.

6. Ўзбекистон миллий архивлари Ўзбекистон Республикаси Президенти томонидан, марказий давлат архивлари тегишли равишда Ўзбекистон Республикаси Вазирлар Маҳкамаси ва Қорақалпоғистон Республикаси Вазирлар Кенгаши томонидан тузилади.

Вилоятлар, шаҳарлар, туманлар давлат архивлари ва уларнинг филиаллари тегишли равишда Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимларининг қарори билан тузилади.

7. Қорақалпоғистон Республикаси, вилоятлар ва Тошкент шаҳар архив иши ҳудудий бошқармалари тўғрисидаги низомлар Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари билан келишган ҳолда, Ўзбекистон Республикаси Адлия вазирлиги ҳузуридаги «Ўзархив» агентлиги директори томонидан тасдиқланади. Ўзбекистон миллий архивлари тўғрисидаги низомлар Адлия вазирлиги ҳузуридаги «Ўзархив» агентлиги директори томонидан тасдиқланади.

Қорақалпоғистон Республикаси Марказий давлат архиви, Тошкент шаҳар марказий давлат архиви ҳамда вилоятлар, шаҳарлар, туманлар давлат архивлари ва уларнинг филиаллари, шунингдек, шахсий таркиб ҳужжатлари давлат архивлари тўғрисидаги низомлар Адлия вазирлиги ҳузуридаги «Ўзархив» агентлиги томонидан тасдиқланадиган намунавий низом асосида ишлаб чиқилади ҳамда тегишли маҳаллий ижро этувчи ҳокимият органлари билан келишган ҳолда, Қорақалпоғистон Республикаси, вилоятлар ва Тошкент шаҳар архив иши ҳудудий бошқармалари томонидан тасдиқланади.

Миллий архив фондининг давлатга тегишли қисми таркибига киритилган архив ҳужжатларини доимий (муддатсиз) сақлашни амалга оширадиган вазирликлар ва идораларнинг архивлари тўғрисидаги низомлар Ўзбекистон Республикаси Вазирлар Маҳкамаси томонидан тасдиқланган Идоравий архив тўғрисидаги Намунавий низомга асосан ишлаб чиқилади ва Ўзбекистон Республикаси Адлия вазирлиги ҳузуридаги «Ўзархив» агентлиги билан келишилган ҳолда уларнинг раҳбарлари томонидан тасдиқланади.

8. Миллий архив фондининг давлатга тегишли қисми ҳужжатларини вақтинча сақлашни давлат ҳокимияти ва бошқаруви органлари, фуқароларнинг ўзини ўзи бошқариш органлари, қўшма (давлат иштирокидаги) корхоналар, давлат корхоналари, муассасалари, ташкилотлари ва бирлашмалари, улар томонидан ташкил этиладиган идоравий, бирлашган идоравий, идоралараро архивлар қуйидаги муддатларда амалга оширадилар:

— давлат ҳокимияти ва бошқарув органлари, Ўзбекистон Республикаси Ҳукумати томонидан ташкил этиладиган хўжалик бошқаруви органлари, Ўзбекистон Республикаси прокуратураси, судлари, банклари, республикага бўйсунувчи давлат корхоналари, муассасалари, ташкилотлари ва бирлашмаларининг архив ҳужжатлари — 15 йил мобайнида;

— маҳаллий давлат ҳокимияти органлари ва Қорақалпоғистон Республикаси, вилоятлар, шаҳарлар ва туманлар давлат бошқаруви органлари, прокуратураси, судлари, банкларининг тегишли ҳудудий бўлинмалари ва вилоятга бўйсунувчи корхоналар, муассасалар, ташкилотлар ва бирлашмаларнинг архив ҳужжатлари — 10 йил мобайнида;

— туман ва шаҳарга бўйсунувчи давлат корхоналари, муассасалари ва ташкилотларининг архив ҳужжатлари — 5 йил мобайнида;

— фуқаролик ҳолати далолатномалари ёзувлари, шахсий таркиб бўйича ҳужжатлар, нотариал ҳаракатлар ёзувлари, суд ишлари, хўжалик китоблари — 75 йил мобайнида, агар қонунчиликда ўзгача ҳол назарда тутилмаган бўлса;

— қўшма (давлат иштирокидаги) корхоналар, ташкилотлар ва мулкчиликнинг аралаш шаклларидаги бирлашмалар фаолиятини амалга оширишда пайдо бўлган архив ҳужжатлари — 10 йил мобайнида;

— илмий, технологик, конструкторлик ва патент ҳужжатлари — 20 йил мобайнида;

— капитал қурилиш бўйича лойиҳа ҳужжатлари — 25 йил мобайнида;

— телеметрик ҳужжатлар — 5 йил мобайнида;

— овозли ёзувлар, видеоёзувлар, киноленталар, фотосуратлар, фотография плёнкалари тайёрланган вақтдан бошлаб — кўпи билан 3 йил;

— машинада ўқиладиган ҳужжатлар — 5 йил мобайнида;

— махфий ҳужжатлар — 30 йил мобайнида.

Идоравий сақлов муддати тугаган махфий ҳужжатлар махфийликдан чиқариш нуқтаи назаридан кўриб чиқилгандан сўнг давлат архиви сақловига белгиланган тартибда топширилади.

Бошқарув ҳужжати таркибига кирувчи фотосуратлар, овоз ёзилган ленталар ушбу ҳужжатларни сақлаш учун назарда тутилган муддатлар мобайнида сақланади.

Илмий-техника ҳужжатлари таркибига кирадиган кино ва суратовозли ҳужжатлар, овозли ва видео ёзувлар, машина омилидаги ҳужжатлар илмий-техника ҳужжатларини сақлаш учун назарда тутилган муддатлар мобайнида сақланади.

Фуқаролар ва жамият (давлат) ўртасида хизмат, меҳнат ва ижтимоий-ҳуқуқий муносабатлар тўғрисидаги шахсий таркиб бўйича ҳужжатлар сақланишини таъминлаш мақсадида тегишли ҳокимликлар томонидан шахсий таркиб ҳужжатлари давлат архивлари тузилади.

Идоравий архивларда вақтинча сақланаётган Ўзбекистон Республикаси Миллий архив фонди ҳужжатларини рўйхатдан ўтказишни Ўзбекистон Республикаси Вазирлар Маҳкамаси томонидан тасдиқланган тартибга мувофиқ давлат архивлари амалга оширадилар.

9. Миллий архив фондининг давлатга тегишли қисми таркибига киритилган архив ҳужжатларини доимий (муддатсиз) сақлашни амалга оширадиган вазирликлар ва идоралар (иловага мувофиқ) Ўзбекистон Республикаси Миллий архив фонди ҳужжатларини Ўзбекистон Республикаси Адлия вазирлиги ҳузуридаги «Ўзархив» агентлигида рўйхатдан ўтказадилар, Ўзбекистон Республикаси Адлия вазирлиги ҳузуридаги «Ўзархив» агентлиги билан келишиб олинган идоравий меъёрий ҳужжатлар асосида архив ҳужжатларини жамлаш, ҳисобга олиш, сақлаш ва улардан фойдаланишни амалга оширадилар.

10. Ўзбекистон Республикаси, Қорақалпоғистон Республикаси, вилоятлар, шаҳарлар, туманлар давлат ҳокимияти ва бошқаруви, прокуратуралар, судлар, банклар, фуқароларнинг ўзини ўзи бошқариш органлари, давлат, қўшма (давлат иштирокидаги) корхоналар, муассасалар, ташкилотлар ва бирлашмалар Ўзбекистон Республикаси Адлия вазирлиги ҳузуридаги «Ўзархив» агентлиги архив иши ҳудудий бошқармалари, Ўзбекистон миллий архивлари ва давлат архивлари қоидалари ва йўриқномаларига мувофиқ доимий сақлашга бериш учун Миллий архив фондининг давлатга тегишли қисми ҳужжатлари жамланишини, ҳисобга олинишини, сақланишини, танланишини ва тайёрланишини таъминлайдилар, Ўзбекистон Республикаси Адлия вазирлиги ҳузуридаги «Ўзархив» агентлиги архив иши ҳудудий бошқармалари, Ўзбекистон миллий архивлари ва давлат архивлари билан келишган ҳолда иш юритиш хизматлари ва идоравий архивлар ишини белгиловчи меъёрий-услубий ҳужжатларни ишлаб чиқадилар ва тасдиқлайдилар; архив ҳужжатлари сақланиши учун жавоб берадилар.

11. Вақтинча сақлашнинг охирги муддатлари тугаши билан Миллий архив фондининг давлатга тегишли қисми ҳужжатлари тартибга солинган ва ишлов берилган ҳолда тегишли илмий-маълумот аппарати ва электрон нусхалари, алоҳида қимматли ва ноёб ҳужжатларга суғурта нусхалари билан доимий сақлаш учун тегишли давлат архивларига берилади.

Ҳужжатларни тайёрлаш ва доимий сақлашга бериш, шунингдек, суғурта нусхаларини тартибга келтириш ва доимий сақлашга топшириш, шунингдек, электрон ҳамда суғурта нусхаларини тайёрлаш, ҳужжатларни ташиш билан боғлиқ барча ишлар топширувчи ва Ўзбекистон Республикаси, Қорақалпоғистон Республикаси, вилоятлар, шаҳарлар ва туманлар давлат ҳокимияти ва бошқаруви, прокуратуралар, судлар, банклар, фуқароларнинг ўзини ўзи бошқариш органлари, давлат, қўшма (давлат иштирокидаги) корхоналар, муассасалар, ташкилотлар ва бирлашмалар маблағлари ҳисобига бажарилади.

Тегишли ҳудудий бошқарма ёки давлат архиви томонидан доимий сақланадиган йиғмажилдлар учун рўйхатлар тасдиқлангандан ва шахсий таркиб бўйича йиғмажилдлар учун рўйхатлар келишиб олингандан сўнг сақлаш муддати тугаган ҳужжатлар уларнинг электрон шакллари давлат архивига қабул қилингач, Адлия вазирлиги ҳузуридаги «Ўзархив» агентлиги томонидан белгиланган тартибда йўқ қилинади.

12. Ўзбекистон Республикаси, Қорақалпоғистон Республикаси, вилоятлар, шаҳарлар ва туманлар давлат ҳокимияти ва бошқаруви органлари, прокуратуралар, судлар, банклар, фуқароларнинг ўзини ўзи бошқариш органлари, давлат, қўшма (давлат иштирокидаги) корхоналар, муассасалар ва ташкилотлар қайта ташкил этилганда, шунингдек уларнинг мулкчилик шакллари ўзгарган ҳолларда улар ўз фаолиятларини амалга оширишда пайдо бўлган архив ҳужжатлари тартибга келтирилган ҳолатда тегишли давлат архивлари билан келишган ҳолда кўрсатиб ўтилган ҳужжатларга давлат мулк эгалиги сақланган ҳолда ҳуқуқий ворисларга берилади.

Корхоналар, муассасалар ва ташкилотлар тугатилган тақдирда уларнинг архив ҳужжатлари қонунчиликда белгиланган тартибда тегишли давлат архивларига берилади.

Ҳужжатларнинг сақланишини таъминлаш мақсадида ва уларнинг бундан буён сақлаш жойи тўғрисидаги масалани ҳал этиш учун йиғмажилдлар ва мулкларни бериш учун тузилган комиссиялар таркибига Ўзбекистон Республикаси Адлия вазирлиги ҳузуридаги «Ўзархив» агентлиги ҳудудий бошқармалари ва давлат архивларининг вакиллари киритилади.

13. Миллий архив фондининг давлатга тегишли қисми ҳужжатлари давлат тасарруфидан чиқариш, хусусийлаштириш, олди-сотди ёки бошқа хил битишувлар объекти бўлолмайди.

Давлат корхоналари, муассасалари ва ташкилотлари давлат тасарруфидан чиқарилган ва хусусийлаштирилган тақдирда уларнинг архив ҳужжатлари, шу жумладан шахсий таркиб бўйича ҳужжатлар давлат мулк эгалигида қолади ва белгиланган тартибда давлат архивларига берилади.

14. Миллий архив фондининг давлатга тегишли қисми ҳужжатлари, сақланиш жойи, манба тури, ахборотни мустаҳкамлаш техникаси ва усулидан қатъи назар, давлат ҳисобида туриши шарт. Ушбу ҳужжатларни давлат ҳисобига олиш тартиби Ўзбекистон Республикаси Вазирлар Маҳкамаси томонидан белгиланади.

Ўзбекистон Республикаси, Қорақалпоғистон Республикаси, вилоятлар, шаҳарлар ва туманлар давлат ҳокимияти ва бошқаруви, прокуратуралар, судлар, банклар, фуқароларнинг ўзини ўзи бошқариш органлари, давлат, қўшма (давлат иштирокидаги) корхоналар, муассасалар, ташкилотлар ва бирлашмалар Ўзбекистон Республикаси Миллий архив фонди ҳужжатларининг тўлиқлиги, ишончлилиги ва ҳисоб бўйича маълумотларни тақдим этиш муддатларига риоя қилиниши учун белгиланган тартибда жавоб берадилар.

15. Миллий архив фондининг давлатга тегишли қисми ҳужжатлари Ўзбекистон Республикаси Адлия вазирлиги ҳузуридаги «Ўзархив» агентлиги давлат архивларида, давлат музейларида, кутубхоналарида, идоравий архивларда фондлар, коллекциялар, сақлаш бирликлари (йиғмажилдлар) бўйича сақланади ва ҳисобга олинади.

16. Миллий архив фондининг давлатга тегишли қисми ҳужжатлари фойдаланиш учун барча юридик ва жисмоний шахсларга берилади.

Давлат ва идоравий архивлар юридик ва жисмоний шахсларга қуйидаги хизмат турларини кўрсатадилар: сақланаётган архив фондлари ва архив ҳужжатлари тўғрисида ахборот бериш, архивлар ўқув залларида ишлаётган тадқиқотчиларга хизмат кўрсатиш, ҳужжатлардан белгиланган тартибда тасдиқланган нусхалар ва кўчирмалар тайёрлаш, ижтимоий-ҳуқуқий тусдаги маълумотномаларни белгиланган тартибда бериш, кўргазмалар, экскурсиялар ташкил этиш, ҳужжатларнинг рўйхатини тузиш, архив йиғмажилдларни вақтинчалик фойдаланиш учун юридик шахсларга бериш.

Хизматлар кўрсатиш юридик ёки жисмоний шахсларнинг ёзма сўровлари асосида амалга оширилади ва иш юритиш йўриқномасига мувофиқ журналларда рўйхатдан ўтказилади.

Архив йиғмажилдлари ва ҳужжатлар фақат архив раҳбарининг ёзма рухсатномасига асосан кўрсатилади. Суд томонидан муомала лаёқати чекланган ёки муомалага лаёқатсиз деб топилган шахсларга архив ҳужжатларидан фойдаланишга рухсат берилмайди. Шахснинг суд томонидан муомала лаёқати чекланган ёки муомалага лаёқатсиз деб топилганлиги давлат архивлари томонидан идоралараро электрон тизимлар орқали аниқланади. Вояга етмаганлар давлат архивлари ўқув залларига ота-оналари ёки тартибга риоя этишга масъул бошқа қонуний вакиллари билан киритилади.

Архивлар томонидан пулли хизматлар ҳам кўрсатилади. Пулли хизматлар кўрсатиш тартиби Ўзбекистон Республикаси Вазирлар Маҳкамаси томонидан тасдиқланади.

Пулли хизматлар шартномаларга мувофиқ кўрсатилади, уларда хизматларнинг ҳажми ва тури, бажариш муддати ва тўлов тартиби келишиб олинади.

Хизматлар прейскурантлари белгиланган тартибда тегишли вазирликлар ва идоралар билан келишилган ҳолда Адлия вазирлиги ҳузуридаги «Ўзархив» агентлиги томонидан ишлаб чиқилади ва тасдиқланади.

17. Давлат сири ва қонун билан муҳофаза қилинадиган бошқа сирларни, шунингдек, фуқароларнинг ҳуқуқлари ва қонуний манфаатларини ҳимоя қилиш билан боғлиқ Миллий архив фондининг давлатга тегишли қисми ҳужжатларидан фойдаланишни чеклаш Ўзбекистон Республикасининг амалдаги қонунчилиги билан белгиланади.

Алоҳида қимматли ва ноёб ҳужжатлардан, шунингдек, жисмоний ҳолати қониқарсиз бўлган ҳужжатлардан фойдаланишни чеклашга йўл қўйилади. Бундай ҳолларда Ўзбекистон Республикаси Адлия вазирлиги ҳузуридаги «Ўзархив» агентлиги муассасалари, давлат музейлари ва кутубхоналари, идоравий архивлар кўрсатиб ўтилган ҳужжатлардан фойдаланиш фондини тузадилар.

18. Сир сақлаш муддати тугаши муносабати билан ёки Ўзбекистон Республикасининг қонун ҳужжатларига мувофиқ сирли хусусиятини йўқотган Миллий архив фондининг давлатга тегишли қисми ҳужжатларини ошкор қилиш Ўзбекистон Республикаси Адлия вазирлиги ҳузуридаги «Ўзархив» агентлиги муассасалари, давлат музейлари ва кутубхоналари, идоравий архивлар томонидан фонд ташкил этувчи муассасалар мутахассислари ёки уларнинг меросхўрлари билан биргаликда амалга оширилади.

19. Миллий архив фондининг давлатга тегишли бўлмаган қисмини нодавлат корхоналар, муассасалар ва ташкилотлар фаолияти натижасида ташкил этилган архив ҳужжатлари, шунингдек жисмоний шахсларнинг шахсий архив ҳужжатлари ташкил этади.

Ўзбекистон Республикасининг жамоат ташкилотлари тўғрисидаги қонунчилигига мувофиқ рўйхатдан ўтказилган пайтдан бошлаб жамоат бирлашмалари ва ташкилотларидаги юридик ва жисмоний шахсларнинг, шу жумладан, касаба уюшмалари, хайрия жамғармалари ва бошқа жамғармалар, сиёсий партиялар ва ҳаракатлар, диний бирлашмалар ва ташкилотларнинг;

нодавлат бирлашмалари (компаниялар, корпорациялар, концернлар, уюшмалар, акциядорлик жамиятлари)даги саноат корхоналари, муассасалари ва ташкилотлари, қишлоқ хўжалиги ва иқтисодиётнинг бошқа тармоқлари, фан, маданият, таълим, ижтимоий соҳа, оммавий ахборот воситаларининг;

жисмоний шахслардаги (шахсий ҳужжатлар, оилавий архивлар, ҳужжатлар коллекцияси ва бошқалар) нодавлат юридик ва жисмоний шахсларнинг архив фондлари ва архив ҳужжатларидан ташкил топади.

20. Ҳужжатларни Ўзбекистон Республикаси Миллий архив фондининг давлатга тегишли бўлмаган қисми таркибига ўтказиш ёки ҳужжатларни ундан чиқариш Ўзбекистон Республикаси Адлия вазирлиги ҳузуридаги «Ўзархив» агентлиги органлари ва муассасалари томонидан нодавлат юридик ва жисмоний шахслар билан биргаликда уларнинг ҳужжатлари қиммати экспертиза қилингандан сўнг амалга оширилади.

Эксперт-текшириш комиссиясининг ҳужжатларни Ўзбекистон Республикаси Миллий архив фондининг давлатга тегишли бўлмаган қисмига ўтказиш тўғрисидаги қарори тасдиқлангандан сўнг кўрсатилган қарорни тасдиқлаган Ўзбекистон Республикаси Адлия вазирлиги ҳузуридаги «Ўзархив» агентлиги органи ёки муассасаси Ўзбекистон Республикаси Миллий архив фонди ҳужжатларини давлат рўйхатидан ўтказиш тўғрисидаги тартибга мувофиқ рўйхатдан ўтказиш гувоҳномасини расмийлаштиради.

21. Ўзбекистон Республикаси Миллий архив фондининг давлатга тегишли бўлмаган қисми ҳужжатларини сақловчи нодавлат юридик ва жисмоний шахслар Ўзбекистон Республикаси Адлия вазирлиги ҳузуридаги «Ўзархив» агентлиги органлари ва муассасалари сўровларига кўра уларни давлат ҳисобига қўйиш мақсадида ўзларининг архив фондлари ва архив ҳужжатлари тўғрисидаги маълумотларни тақдим этадилар.

Миллий архив фондининг давлатга тегишли бўлмаган қисми ҳужжатлари эгалари ва (ёки) сақлаш жойи алмашганда нодавлат юридик ва жисмоний шахслар Ўзбекистон Республикаси Адлия вазирлиги ҳузуридаги «Ўзархив» агентлиги органи ва муассасасини ушбу ҳужжатларнинг янги эгаси ва уларнинг бундан кейинги сақланиш жойи тўғрисида хабардор қиладилар.

22. Миллий архив фондининг давлатга тегишли бўлмаган қисмига тегишли деб топилган ҳужжатларнинг эгалари бўлган нодавлат юридик ва жисмоний шахслар ушбу ҳужжатлар шу мақсадларда ташкил этиладиган архивлар ёки идоравий архивларда, шунингдек жисмоний шахсларнинг шахсий архив ҳужжатлари таркибида доимий сақланишини таъминлайдилар.

Доимий муддатда сақланадиган ҳужжатлар йўқ қилинмайди. Шахсий таркиб бўйича ҳужжатлар (иш стажи, иш ҳақи, ўқиш, мукофотлаш тўғрисидаги ҳужжатлар ва бошқа ҳужжатлар) Ўзбекистон Республикаси Адлия вазирлиги ҳузуридаги «Ўзархив» агентлиги органлари ва муассасалари билан келишилмасдан нодавлат юридик ва жисмоний шахслар томонидан йўқ қилиниши мумкин эмас.

23. Нодавлат юридик ва жисмоний шахслар ўз ҳужжатларини давлат мулки қилиб-давлат архивлари, музейлар ва кутубхоналарда сақлашга беришлари мумкин. Бундай ишлар битим (шартнома) билан, зарур ҳолларда ҳужжатларни сақлаш ва улардан фойдаланиш шартлари аниқланган ҳолда, расмийлаштирилади.

Нодавлат корхоналар, муассасалар, ташкилотлар ва бирлашмалар тугатилганда ёки шахсий архив ҳужжатлари эгаси вафот этганда, ворислар ва қонуний меросхўрлар бўлмаганда уларнинг ҳужжатлари давлат мулкига ўтказилиб, доимий сақлаш учун давлат архивларига топширилади.

Нодавлат юридик шахсларни давлат рўйхатидан ўтказувчи органлар қонунчиликка мувофиқ талаб қилинадиган бошқа ҳужжатларга қўшимча равишда уларнинг архив фонди Ўзбекистон Республикаси Адлия вазирлиги ҳузуридаги «Ўзархив» агентлиги муассасаларига ўтказилганлигини тасдиқловчи ҳужжат мавжуд бўлган тақдирда уларни давлат рўйхатидан чиқариш тўғрисида қарор қабул қиладилар.

24. Нодавлат юридик ва жисмоний шахслар Миллий архив фондининг давлатга тегишли бўлмаган қисми ҳужжатларини вақтинчалик, шу жумладан, депозитар сақлашга давлат архивларига, музейларга ва кутубхоналарга беришлари мумкин.

Миллий архив фондининг давлатга тегишли бўлмаган қисми ҳужжатларини вақтинча, шу жумладан, депозитар сақлашга бериш шартлари ва тартиби ҳужжат эгалари билан давлат архивлари, музейлар ва кутубхоналар ўртасида тузилган битимлар (шартномалар)да белгиланади.

25. Миллий архив фондининг давлатга тегишли бўлмаган қисми сотиладиган ҳолларда давлат архивлари уларни сотиб олиш учун имтиёзли ҳуқуққа эга бўлади. Ҳужжат эгалари, кимошди савдоси ташкилотчилари, савдо-воситачилик ташкилотлари бўлажак сотишгача кечи билан бир ой олдин у тўғрисида аниқ сотиш вақти ва жойи кўрсатилган ҳолда Ўзбекистон Республикаси Адлия вазирлиги ҳузуридаги «Ўзархив» агентлиги органлари ва муассасаларига хабар беришлари зарур.

26. Ўзбекистон Республикаси Адлия вазирлиги ҳузуридаги «Ўзархив» агентлиги органлари ва муассасалари нодавлат юридик ва жисмоний шахсларнинг илтимосига кўра уларнинг архив ҳужжатларини жамлашда, ҳисобга олишда, сақлашда ва улардан фойдаланишда услубий ёрдам кўрсатадилар. Нодавлат юридик ва жисмоний шахслар билан келишилганига кўра Ўзбекистон Республикаси Адлия вазирлиги ҳузуридаги «Ўзархив» агентлиги муассасалари уларнинг архивларига ҳужжатларни илмий-техник ишлов бериш, иш юритиш бўйича меъёрий ҳужжатларни ишлаб чиқиш, йиғмажилдларни таъмирлаш ва муқовалаш, архив ҳужжатларидан фойдаланиш юзасидан пулли хизматлар кўрсатишлари, шунингдек, нодавлат архивларига бошқача кўмаклашишлари мумкин.

27. Ўзбекистон Республикаси Миллий архив фонди тўғрисида Низом талабларини бузган нодавлат юридик ва жисмоний шахслар қонун ҳужжатларида белгиланган тартибда жавоб берадилар.

Ўзбекистон Республикаси Президенти Администрацияси;

Ўзбекистон Республикаси Миллий гвардияси;

Ўзбекистон Республикаси Мудофаа вазирлиги;

Ўзбекистон Республикаси Фавқулодда вазиятлар вазирлиги;

Ўзбекистон Республикаси Ички ишлар вазирлиги;

Ўзбекистон Республикаси Ташқи ишлар вазирлиги;

Ўзбекистон Республикаси Инвестициялар ва ташқи савдо вазирлиги;

Ўзбекистон Республикаси Президентининг Давлат хавфсизлиги хизмати;

Ўзбекистон Республикаси Давлат хавфсизлик хизмати;

Ўзбекистон Республикаси Мудофаа вазирлиги ҳузуридаги Мудофаа саноати агентлиги;

Ўзбекистон Республикаси Давлат божхона қўмитаси;

Ўзбекистон Республикаси Давлат геология ва минерал ресурслар қўмитасининг Давлат геология фонди;

Ўзбекистон Республикаси Гидрометеорология хизмати маркази;

Ўзбекистон стандартлаштириш, метрология ва сертификатлаштириш агентлигининг давлат стандартлари тармоқ фонди;

Ўзбекистон Республикаси Давлат солиқ қўмитаси ҳузуридаги Кадастр агентлигининг картография-геодезия фонди;

Ўзбекистон Республикаси Фанлар академияси;

Ўзбекистон Республикаси Маданият вазирлиги музейлари ва кутубхоналари;

1. Ўзбекистон Республикаси Миллий архив фонди ҳужжатларини давлат рўйхатидан ўтказиш уларни давлат томонидан ҳисобга олиш ва сақлашни назорат қилишни таъминлаш мақсадида амалга оширилади.

2. Ўзбекистон Республикаси Миллий архив фондига белгиланган тартибда ўтказилган барча ҳужжатлар, улар сақланиш жойи ва мулкчилик шаклларидан қатъи назар, давлат рўйхатидан ўтказилиши керак.

3. Ўзбекистон Республикаси Миллий архив фонди ҳужжатларини давлат рўйхатидан ўтказишни Ўзбекистон Республикаси Адлия вазирлиги ҳузуридаги «Ўзархив» агентлиги (кейинги ўринларда — «Ўзархив» агентлиги деб аталади) ва у ваколат берган архив муассасалари амалга оширади.

4. Ўзбекистон Республикаси Миллий архив фонди ҳужжатлари эгасига (кейинги ўринларда — эгасига дейилади) ҳужжатлар давлат рўйхатидан ўтказилгандан сўнг ягона намунадаги Ўзбекистон Республикаси Миллий архив фонди ҳужжатларини давлат рўйхатидан ўтказиш гувоҳномаси берилади (1-илова). Рўйхатдан ўтказиш гувоҳномалари бланкларини ҳисобга олиш, сақлаш ва улардан фойдаланганлик тўғрисида ҳисобот бериш тартиби «Ўзархив» агентлиги томонидан белгиланади.

Рўйхатдан ўтказиш гувоҳномаси ҳам алоҳида ҳужжатга, ҳам ҳужжатлар мажмуига (сақлаш бирлигига (йиғмажилд), коллекция, фонд, фондлар гуруҳи, архив ва бошқалар)га расмийлаштирилиши мумкин.

Рўйхатдан ўтказиш гувоҳномаси берилганлиги тўғрисида Ўзбекистон Республикаси Миллий архив фонди ҳужжатларини давлат рўйхатидан ўтказиш дафтарига ёзиб қўйилади (2-илова). Ушбу дафтарни юритиш тартиби «Ўзархив» агентлиги томонидан белгиланади.

5. Қуйидагилар рўйхатдан ўтказиш гувоҳномаси бериш учун асос ҳисобланади:

Ўзбекистон Республикасининг 1999 йил 15 апрелда қабул қилинган «Архивлар тўғрисида»ги 768-I-сонли Қонуни амалга киритилиши вақтида ҳужжатларнинг Ўзбекистон Республикаси Адлия вазирлиги ҳузуридаги «Ўзархив» агентлигининг Миллий архив фонди Давлат каталогида давлат ҳисобида туриши;

— қонунчиликка мувофиқ ташкил этилган эксперт-текшириш комиссияси қарори;

— ҳужжатларни идоравий сақлашни ташкил этиш тўғрисидаги рўйхатдан ўтказиш йилининг 1 январигача бўлган статистика ҳисоботининг мавжудлиги;

— ҳужжатларга мулкка эгалик ҳуқуқининг бошқа шахсларга ўтказилишида уларнинг собиқ эгасида рўйхатдан ўтказиш гувоҳномаси мавжудлиги.

6. Қуйидаги ҳолларда рўйхатдан ўтказиш гувоҳномаси бекор қилинади ёки қайта расмийлаштирилади:

— рўйхатдан ўтказилган ҳужжатларнинг эгаси уларга берилган мулкка эгалик ҳуқуқини бошқа шахсга берса ёки суд қарорига кўра ушбу ҳужжатларга мулкка эгалик ҳуқуқидан маҳрум этилса;

— «Ўзархив» агентлиги органлари ва муассасалари эксперт-текшириш комиссиялари қарорига кўра фуқаронинг мулки ҳисобланадиган ҳужжатлар ёки рўйхатдан ўтказилган ҳужжатларнинг бир қисми Ўзбекистон Республикаси Миллий архив фондидан чиқарилса ва давлат ҳисобидан олиб ташланса.

7. Ўзбекистон Республикасининг 1999 йил 15 апрелда қабул қилинган «Архивлар тўғрисида»ги 768-I-сонли Қонуни амалга киритилиши вақтида Ўзбекистон Республикаси Миллий архив фондининг ҳужжатлари давлат ҳисобида ва архив ҳужжатларини доимий сақлаш ҳуқуқи берилган республика давлат архивларида, вазирликлар, идоралар, тармоқ давлат фондлари ва ташкилотлар бошқа давлат сақлаш жойларида бўлган бўлса, уларни давлат рўйхатидан ўтказиш ҳар бир архив бўйича Миллий архив фондининг Давлат каталоги давлат ҳисоби маълумотлари асосида «Ўзархив» агентлиги томонидан амалга оширилади. Бунда рўйхатдан ўтказиш гувоҳномасида давлатга тегишли ҳужжатларнинг умумий сони кўрсатиб қўйилади.

8. Ўзбекистон Республикаси, Қорақалпоғистон Республикаси, вилоятлар, шаҳарлар, туманларнинг ишлаб турган давлат ҳокимияти ва бошқаруви, фуқароларнинг ўзини ўзи бошқариш органлари, корхоналар, муассасалар, ташкилотларнинг архив ҳужжатлари Ўзбекистон Республикасининг 1999 йил 15 апрелда қабул қилинган «Архивлар тўғрисида»ги 768-I-сонли Қонуни амалга киритилиши вақтида давлат ҳисобида турган бўлса, уларни давлат рўйхатидан ўтказиш, ушбу ҳужжатлар сақланаётган ҳар бир архив (архив филиаллари) бўйича умумий белгиланган ҳисобга олиш маълумотлари (идоравий сақлашни ташкил этиш тўғрисидаги статистика ҳисоботлари) асосида «Ўзархив» агентлиги органлари ва муассасалари томонидан амалга оширилади.

9. Агар Ўзбекистон Республикасининг 1999 йил 15 апрелда қабул қилинган «Архивлар тўғрисида»ги 768-I-сонли Қонуни амалга киритилиши вақтида давлатга тегишли бўлмаган ҳужжатлар давлат ҳисобида турган бўлса, уларга рўйхатдан ўтказиш гувоҳномаси, ҳужжатларнинг турган жойидан қатъи назар, ушбу ҳужжатлар эгасига ёки унинг қонуний вакилига берилади.

10. Архив муассасаларида сақланаётган ҳужжатларга расмийлаштирилган рўйхатдан ўтказиш гувоҳномаси (ҳужжатларни сақлашга режали равишда ҳар йили келиб тушиши, ҳужжатлар қимматини экспертиза қилиш хулосаси асосида Ўзбекистон Республикаси Миллий архив фондидан ҳужжатларнинг бир қисми чиқариб ташланиши, улар йиғмажилдларининг бир қисми бошқа архив муассасаларига берилиши натижасида) кўрсатиб ўтилган ҳужжатлар сони ўзгарганда қайта расмийлаштирилмайди. Рўйхатдан ўтказиш гувоҳномасининг амалда бўлиши архив муассасасида сақланаётган ва давлат ҳисобида турган барча ҳужжатларга жорий этилади.

11. Эксперт-текшириш комиссиясининг ҳужжатларни Ўзбекистон Республикаси Миллий архив фондига ўтказиш тўғрисидаги қарори тасдиқлангандан сўнг «Ўзархив» агентлигининг кўрсатиб ўтилган қарорни тасдиқлаган органи ёки муассасаси ушбу ҳужжатларга рўйхатдан ўтказиш гувоҳномасини расмийлаштиради. Гувоҳнома ҳужжат эгасига ёки унинг қонуний вакилига доимий сақланадиган тасдиқланган ҳужжатлар рўйхатининг нусхаси билан бирга берилади.

Ўзархив ҳужжатларини доимий (муддатсиз) сақлайдиган вазирликлар ва идоралар рўйхатига киритилган давлат бошқарув органлари Ўзбекистон Республикаси Миллий архив фонди ҳужжатларини бир вақтнинг ўзида фонд карточкаларини «Ўзархив» агентлигининг Миллий архив фонди Давлат каталоги ва ҳужжатлар рўйхатдан ўтказиш йилининг 1 январига идоравий сақланишини ташкил этиш тўғрисидаги статистика ҳисоботи учун тақдим этган ҳолда рўйхатдан ўтказадилар.

12. Рўйхатдан ўтказиб бўлинган ҳужжатларни сақлаётган давлат архивига, музейга, кутубхонага сақлаш учун тушаётган Ўзбекистон Республикаси Миллий архив фонди ҳужжатларига такрорий гувоҳнома берилмайди. Бундай ҳолларда уларга ҳужжатлар давлат ҳисобига қабул қилинган пайтдан бошлаб илгари берилган рўйхатдан ўтказиш гувоҳномасининг амал қилиши татбиқ этилади.

13. Ўзбекистон Республикаси Миллий архив фондига кирувчи ҳужжатларнинг эгаси рўйхатдан ўтказиш гувоҳномасини ушбу гувоҳномани расмийлаштирган архив муассасасига:

— ҳужжатларга эгалик ҳуқуқининг бошқа шахсларга ўтказилишида ёки эгалик ҳуқуқидан маҳрум қилинганда;

— ҳужжатларни сақлаш жойи ва шароитлари ўзгарганда;

— ҳужжатлар ноёб ҳужжат ёдгорликларига ўтказилганда;

— фойдаланиш фонди нусхалари тайёрланганда, ҳужжатлардан фойдаланишга чеклашлар белгиланганда ва ҳужжатлардан фойдаланиш шартларига бошқача ўзгартиришлар бўлганда;

— такомиллаштирилган ва уларга илмий-маълумотнома аппарати яратилганда;

— рўйхатдан ўтказилган ҳужжатларнинг нусхалари хорижга олиб чиқилганда;

— ўз мулкидаги ҳужжатлар Ўзбекистон Республикаси Миллий архив фондидан чиқариб ташланганда;

— гувоҳномаларни расмийлаштиришда хатолар аниқланганда ёки улар фойдаланиш учун яроқсиз бўлиб қолган ҳолларда тақдим этиши керак.

14. Рўйхатдан ўтказилган гувоҳномалар:

— йўқотиб қўйилганда;

— унга қўшимча ёзувлар, тузатишлар киритилганда ёки яроқсиз бўлиб қолганда ҳақиқий эмас деб ҳисобланади.

15. Архив муассасаси эгаси мурожаат қилганда мурожаат қилинган кунда, маълумотларни текшириш ёки аниқлаш зарур бўлганда эса — уч кун муддатда рўйхатдан ўтказиш гувоҳномасига ўзгартириш киритилиши, қайта расмийлаштирилиши ёки у бекор қилиниши керак.

Зарурат бўлганда архив муассасаси ҳужжат эгасидан унинг шахсини ёки вакилнинг ваколатини тасдиқловчи ҳужжатларни, шунингдек, рўйхатдан ўтказиш гувоҳномасига ўзгартиришлар киритиш учун асос бўлиб ҳисобланадиган бошқа ҳужжатларни талаб қилишга ҳақлидир.

16. Рўйхатдан ўтказиш гувоҳномаси йўқотиб қўйилган ёки у тузатиб бўлмайдиган даражада яроқсиз бўлиб қолган ҳолларда тегишли архив муассасаси унинг эгаси аризасига кўра ёки ўз ташаббуси билан мазкур қоидага мувофиқ такрорий гувоҳнома (дубликат) беради.

17. Ўзбекистон Республикаси Миллий архив фонди ҳужжатларини давлат рўйхатидан ўтказиш масалаларига доир архив муассасалари ва ҳужжатлар эгалари орасидаги низолар «Ўзархив» агентлиги томонидан кўриб чиқилади. «Ўзархив» агентлигининг ушбу масалалар бўйича қарори устидан судга арз қилиниши мумкин.

1. «Архив иши тўғрисида»ги Ўзбекистон Республикаси Қонунига мувофиқ ҳужжатлар сақланишини таъминлаш, ҳисобини олиш, улардан илмий ва амалий мақсадларда фойдаланиш учун республика давлат ҳокимияти ва бошқаруви органлари, корхоналар, муассасалар ва ташкилотларда* идоравий архивлар тузилади.

2. Идоравий архив етакчи (бош) бўлган ташкилот қошида таркибий бўлинма сифатида ташкил этилади, у ташкилот раҳбари ёки ташкилот тўғрисидаги низомга мувофиқ ҳужжатлар билан ишлашни йўлга қўйиш учун жавобгар бўлган таркибий бўлинма раҳбарига бўйсунади.

3. Идоравий архив ўз фаолиятида Ўзбекистон Республикаси Конституциясига, қонунларига, Ўзбекистон Республикаси Олий Мажлисининг қарорларига, Ўзбекистон Республикаси Президентининг фармонлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, етакчи (бош) ва ўз ташкилотининг буйруқлари ва кўрсатмаларига, Ўзбекистон Республикаси Адлия вазирлиги ҳузуридаги «Ўзархив» агентлигининг қоидалари ва йўриқномаларига ва мазкур Намунавий низомга амал қилади.

4. Идоравий архив мудири (ёки архив учун жавобгар шахс) ва архивнинг штатдаги бошқа ходимлари ташкилот раҳбари томонидан ишга тайинланади ва ишдан бўшатилади.

5. Идоравий архив ташкилот раҳбарияти томонидан тасдиқланадиган режага мувофиқ ишлайди ва ўз фаолияти ҳақида унга ҳисобот бериб туради.

6. Архив ходимларининг хизмат доирасидаги вазифалари ташкилот раҳбарлари томонидан тасдиқланадиган лавозим йўриқномаси билан белгиланади.

7. Ушбу Намунавий низомга мувофиқ ташкилот ўзининг идоравий архиви тўғрисидаги низомини ишлаб чиқади ва у Ўзбекистон Республикаси Адлия вазирлиги ҳузуридаги «Ўзархив» агентлигининг тегишли органи ёки муассасаси билан келишган ҳолда ташкилот раҳбари томонидан тасдиқланади.

8. Идоравий архив ҳужжатлари таркибига қуйидагилар киради:

8.1. Ташкилот таркибий бўлинмалари ҳамда унга бевосита бўйсунадиган бўлинмаларнинг (агар уларда амалий жиҳатдан архив ташкил этишга эҳтиёж бўлмаса) иш фаолияти жараёнида вужудга келган ва иш юритиш давомида тугалланган ҳужжатлари;

8.3. Мазкур ташкилотда ёки унга қарашли бўлган ташкилотда ишлаган фан, техника, маданият арбоблари ва ишлаб чиқариш новаторларининг шахсий фондлари;

8.4. Матбаа ҳужжатлари, шу жумладан, архив ҳужжатларини тўлдирувчи идоравий нашрлар ҳамда архивнинг илмий-тадқиқот, ахборот-маълумотнома ва бошқа ишлари учун зарур бўлган материаллар;

8.5. Архив ҳужжатлари таркиби ва мазмунини очиб берувчи илмий-маълумот аппарати (ҳужжатлар рўйхати, тарихий маълумотномалар, каталоглар, кўрсаткичлар, шархлар ва ҳоказо).

10. Идоравий архивнинг асосий вазифалари: ташкилот ҳужжатларини жамлаш, ҳисобга олиш, сақлаш, улардан фойдаланиш ва давлат томонидан сақлашга топшириш учун тегишли архивларга топширишдан иборат бўлади.

11. Идоравий архив ўзига юкланган вазифаларга мувофиқ:

11.1. Ўзбекистон Республикаси Адлия вазирлиги ҳузуридаги «Ўзархив» агентлиги органлари ва муассасалари билан келишилган меъёрий-услубий ҳужжатларга мувофиқ ташкилотнинг таркибий бўлинмалари ҳамда архивни бутлаш манбалари ҳисобланган бошқа ташкилотларнинг иш юритиш жараёнида тугалланган ҳамда шахсий таркиб ҳужжатларини жамлайди, ҳисобга олади ва сақлайди;

11.2. Архивга қабул қилинган йиғмажилдлар ва ҳужжатларга фонд тартиб рақамларини беради;

11.3. Архивда сақланаётган ҳужжатларга илгари сақлашга топширилган ҳужжатларнинг илмий-маълумот аппарати билан изчиллигини ҳисобга олган ҳолда илмий-маълумот аппаратини ташкил қилади ва тўлдириб боради;

11.4. Архивда сақланаётган ҳужжатларнинг илмий ва амалий қимматини аниқлаш учун экспертиза қилишни ташкил этади, иш юритиш жараёнида ҳужжатлар қимматини экспертиза қилишда услубий ёрдам кўрсатади;

11.5. Ҳужжатларни топшириш учун тайёрлайди ва «Архив иши тўғрисида»ги Ўзбекистон Республикаси Қонунида белгиланган муддатларда топширади (Ўзбекистон Республикаси Вазирлар Маҳкамаси томонидан Миллий архив фондининг давлатга тегишли қисми таркибига киритилган архив ҳужжатларини доимий (муддатсиз) сақлаш ҳуқуқи берилган идоравий архивлар бундан мустасно);

11.6.Ўзбекистон Республикаси Миллий архив фонди ҳужжатларини рўйхатдан ўтказиш ва уларнинг давлат ҳисобини юритишни ташкил этиш учун зарур бўлган ҳужжатларни тегишлилиги бўйича Ўзбекистон Республикаси Адлия вазирлиги ҳузуридаги «Ўзархив» агентлиги органлари ва муассасаларига тақдим этади ҳамда архивда сақланаётган ҳужжатларнинг идоравий сақланиши тўғрисида тасдиқланган статистик шакллар бўйича маълумотлар беради;

Идоравий архивлар сақловидаги Миллий архив фонди ҳужжатлари тўғрисидаги маълумотларни Давлат каталогига белгиланган шаклга мувофиқ тақдим этади

11.7. Ташкилотнинг иш юритиш хизмати билан биргаликда таркибий бўлинмалар йиғмажилдларининг тўғри шакллантирилишини ва расмийлаштирилишини назорат қилади, йиғмажилдлар рўйхатини тузишда иштирок этади;

11.8. Қуйи таркибий бўлинмаларда идоравий архивларнинг аҳволини ва иш юритиш қандай йўлга қўйилганлигини текширишда иштирок этади;

11.9. Қуйи ташкилотларда сақланаётган ҳужжатлар ҳисобини олиб боради;

11.10. Ҳужжатлардан фойдаланишни ташкил қилади ва белгиланган тартибда ҳам манфаатдор ташкилотларга, ҳам фуқароларга маълумотномалар, ҳужжатлардан кўчирмалар ва нусхалар беради;

11.11. Тизим ташкилотлари идоравий архивларининг иш тажрибасини ўрганади ва умумлаштиради;

11.12. Ташкилотнинг ўзига хослигини ҳисобга олган ҳолда архив иши ва иш юритишда ҳужжатлар билан ишлаш бўйича меъёрий-услубий ҳужжатлар (йўриқнома, тавсия, низом, сақлаш муддатлари кўрсатилган ҳужжатлар рўйхати ва бошқалар)ни ишлаб чиқишда иштирок этади, уларни Адлия вазирлиги ҳузуридаги «Ўзархив» агентлиги органлари ва муассасалари билан келишиб олади;

11.13. Қуйи ташкилотлар ходимларига ҳужжатлар билан ишлашни ташкил қилиш ва архив иши масалаларига доир маслаҳатлар беради;

11.14. Қуйи ташкилотларнинг иш юритиш хизмати ва архив ходимлари малакасини ошириш бўйича тадбирлар ўтказишда иштирок этади.

12. Идоравий архивга ўзига юкланган вазифаларни ва функцияларни бажариш учун қуйидаги ҳуқуқлар берилади:

12.1. Ташкилотнинг таркибий бўлинмалари ва қуйи ташкилот архивларига ўз ваколатларига кирувчи масалалар бўйича белгиланган тартибда кўрсатмалар бериш;

12.2. Ташкилотнинг таркибий бўлинмалари ва қуйи ташкилот архивларидан архив иши учун зарур бўлган маълумотларни сўраб олиш;

12.3. Зарур ҳолларда экспертлар ва маслаҳатчилар сифатида ташкилотнинг малакали мутахассисларини жалб этиш;

12.4. Идоравий архив ҳузурида архив ишига кўмаклашувчи кенгашлар ва комиссиялар ташкил этиш.