Интеллектуал мулк объектларини халқаро норма ва стандартларга мувофиқ ҳуқуқий ҳимоя қилиш тизимини янада такомиллаштириш, унга хос бўлмаган ва умрини ўтаб бўлган вазифаларни бекор қилиш, шунингдек Ўзбекистон Республикасининг Интеллектуал мулк агентлиги фаолиятига замонавий интерфаол давлат хизматларини жорий этиш мақсадида:

1. Қуйидагилар Ўзбекистон Республикасининг Интеллектуал мулк агентлигининг асосий вазифалари ва фаолияти йўналишлари этиб белгилансин:

интеллектуал мулк соҳасида ягона давлат сиёсатини амалга оширишни таъминлаш, ихтиролар, фойдали моделлар, саноат намуналари, товар белгилари ҳамда бошқа интеллектуал мулк объектларини ҳуқуқий ҳимоя қилиш;

ихтиролар, саноат намуналари, фойдали моделлар, товар белгилари ва бошқа интеллектуал мулк объектларини экспертизадан ўтказиш, рўйхатга олиш ва ҳисобга қўйишни ташкиллаштириш;

Давлат патент фонди ва интеллектуал мулкнинг расмий рўйхатга олинганлиги тўғрисида маълумотлар базасини шакллантириш ва олиб бориш, иқтисодиётнинг реал секторининг хўжалик юритувчи субъектлари, илмий ташкилотлар, олим ва мутахассисларнинг маълумотлардан самарали фойдаланиши учун уларнинг сақланиши ва фойдаланиш қулайлигини таъминлаш;

интеллектуал мулк соҳасига замонавий ахборот технологияларини жорий этиш, тадбиркорлик субъектлари ва аҳолига «бир дарча» тамойили асосида интерфаол давлат хизматларини кўрсатиш;

миллий интеллектуал мулк объектларини чет элда ҳуқуқий ҳимоя қилишни таъминлаш бўйича корхоналар ва ташкилотларга консультатив ва амалий кўмак бериш, шунингдек интеллектуал мулк соҳасида халқаро ҳамкорликни кенгайтириш;

интеллектуал мулк соҳасида мутахассисларни қайта тайёрлаш ва малакасини ошириш.

2. Ўзбекистон Республикаси Интеллектуал мулк агентлигининг ижро этувчи аппарати бошқарув ходимларининг чекланган сони 61 кишидан иборат янгиланган тузилмаси 1-иловага* мувофиқ тасдиқлансин.

3. Ўзбекистон Республикаси Вазирлар Маҳкамаси икки ҳафта муддатда Ўзбекистон Республикасининг Интеллектуал мулк агентлигининг янги Низомини тасдиқласин, унда, мазкур қарорда белгиланган унинг асосий вазифалари ва фаолияти йўналишларига мувофиқ Агентликнинг функциялари тубдан ўзгартирилиши назарда тутилсин, шунингдек халқаро ҳуқуқий меъёрларга тўғри келмайдиган, ўз умрини ўтаб бўлган ва унга хос бўлмаган функциялар тугатилсин, шу жумладан:

илм-фан, адабиёт ва санъат асарларига бўлган авторлик ҳуқуқининг давлат рўйхатидан ўтказилишини, бунда Бутунжаҳон интеллектуал мулк ташкилотининг Берн конвенциясига мувофиқ тегишли асарнинг яратилгани факти бўйича авторлик ҳуқуқининг юзага келишини белгилаш;

Ўзбекистон Республикаси Адлия вазирлигининг ваколатларини такрорламаслик учун мулкий ҳуқуқларни кўпчилик асосида бошқараётган ташкилотларни давлат рўйхатидан ўтказиш;

интеллектуал мулк объектларидан фойдаланишга лицензия шартномаларини рўйхатга олишнинг амалдаги механизмини такрорламаслик учун Ўзбекистон Республикаси ҳудудида интеллектуал мулк объектларидан фойдаланаётган юридик ва жисмоний шахсларнинг ҳисобини юритиш.

4. Ўзбекистон Республикасининг Интеллектуал мулк агентлиги Иқтисодиёт вазирлиги, Ахборот ва коммуникация технологияларини ривожлантириш вазирлиги, Адлия вазирлиги, бошқа манфаатдор вазирлик ва ташкилотлар билан биргаликда бир ой муддатда мамлакатимизда интеллектуал мулкни ҳимоя қилиш тизимини янада такомиллаштириш, уни халқаро стандартлар ва талабларга мослаштириш бўйича таклифларни ишлаб чиқсин ва Вазирлар Маҳкамасига киритсин.

5. Ўзбекистон Республикасининг Интеллектуал мулк агентлиги Ахборот ва коммуникация технологияларини ривожлантириш вазирлиги билан биргаликда 2016-2017 йилларда «Интеллектуал мулк» ахборот тизими яратилишини таъминласин, бунда қуйидагилар назарда тутилсин:

патентларга электрон буюртмалар бериш ҳамда патент фондининг маълумотлар базасини барча учун фойдаланиши мумкин бўлган кўринишда шакллантириш;

«бир дарча» тамойили асосида интеллектуал мулк соҳасидаги давлат интерактив хизматларини жорий этиш.

6.Ўзбекистон Республикасининг Интеллектуал мулк агентлиги ходимларини аттестациядан ўтказиш бўйича Комиссия 2-иловага* мувофиқ таркибда ташкил этилсин.

Комиссия (А.Н. Арипов) бир ой муддатда Ўзбекистон Республикасининг Интеллектуал мулк агентлиги ходимларини белгиланган тартибда аттестациядан ўтказишни ҳамда уни юқори малакали ташаббускор, интеллектуал мулк соҳаси масалалари бўйича зарур билим ва амалий тажрибага эга кадрлар билан бутланишини таъминласин.

7.Ўзбекистон Республикаси Президентининг «Ўзбекистон Республикасининг Интеллектуал мулк агентлигини ташкил этиш тўғрисида» 2011 йил 24 майдаги ПҚ-1536-сонли қарорининг 2-банди ва 3-банди биринчи хатбошиси, шунингдек 1 ва 2-иловаси ўз кучини йўқотган деб ҳисоблансин.

Интеллектуал мулк агентлиги Адлия вазирлиги бошқа манфаатдор вазирликлар ва идоралар билан биргаликда бир ой муддатда қонун ҳужжатларига ушбу қарордан келиб чиқадиган ўзгартиш ва қўшимчалар тўғрисида Вазирлар Маҳкамасига таклифлар киритсин.

8. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари А. Арипов зиммасига юклансин.