Ҳужжат кучини йўқотган " " 23.10.2017

Ўзбекистон Республикаси Маданият ва спорт ишлари вазирининг

буйруғи

Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низомни тасдиқлаш ҳақида

[Ўзбекистон Республикаси Адлия вазирлиги томонидан 2016 йил 8 апрелда 2776-сон билан давлат рўйхатидан ўтказилган]

LexUZ шарҳи

Мазкур буйруқ Ўзбекистон Республикаси Жисмоний тарбия ва спорт давлат қўмитасининг 2017 йил 9 октябрдаги 11-мҳ-сонли «Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низомни тасдиқлаш ҳақида»ги қарорига (рўйхат рақами 2939, 23.10.2017 й.) асосан ўз кучини йўқотган.

Ўзбекистон Республикасининг «Жисмоний тарбия ва спорт тўғрисида»ги Қонунига асосан буюраман:

1. Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Вазир Б. АХМЕДОВ

Тошкент ш.,

2016 йил 25 март,

31-сон

Ўзбекистон Республикаси маданият ва спорт ишлари вазирининг 2016 йил 25 мартдаги 31-сонли буйруғига
ИЛОВА

Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисида

НИЗОМ

Мазкур Низом Ўзбекистон Республикасининг «Жисмоний тарбия ва спорт тўғрисида»ги Қонунига мувофиқ, спорт федерациялари (уюшмалари) реестрини (бундан буён матнда Реестр деб юритилади) юритиш ва ундан маълумотлар тақдим этиш тартибини белгилайди.

1-боб. Умумий қоидалар

1. Мазкур Низомда қуйидаги асосий тушунчалардан фойдаланилади:

махсус ваколатли давлат органи — Ўзбекистон Республикаси Маданият ва спорт ишлари вазирлиги;

спорт федерацияси (уюшмаси) — бир ёки бир нечта спорт турини ривожлантириш, оммалаштириш, шунингдек спорт тадбирларини ўтказишни ташкил этиш ҳамда спортчиларни — Ўзбекистон Республикасининг спорт терма жамоалари аъзоларини спортнинг тегишли тури бўйича тайёрлаш учун аъзолик асосида ташкил этилган ва давлат рўйхатидан ўтказилган нодавлат нотижорат ташкилоти.

2. Спорт федерациялари (уюшмалари) тўғрисидаги маълумотлар улар давлат рўйхатидан ўтказилганидан кейин Реестрга киритилиши керак.

3. Махсус ваколатли давлат органи Реестрни юритишни амалга оширади.

2-боб. Реестрни шакллантириш

4. Реестрни шакллантириш ва тизимли юритиш махсус ваколатли давлат органи раҳбарининг буйруғи билан белгиланган масъул ходим (бундан буён матнда масъул ходим деб юритилади) томонидан спорт федерациялари (уюшмалари) тақдим этадиган ҳужжатлар асосида амалга оширилади.

5. Спорт федерациялари (уюшмалари) давлат рўйхатидан ўтказилганидан кейин ўн беш кун ичида спорт федерациясини (уюшмасини) Реестрга киритиш ҳақида махсус ваколатли давлат органига ариза билан мурожаат қилади.

6. Реестрга киритиш ҳақидаги аризага (спорт федерациясининг (уюшмасининг) номи кўрсатилган ҳолда) қуйидаги ҳужжатлар илова қилинади:

спорт федерациясининг (уюшмасининг) давлат рўйхатидан ўтказилганлиги тўғрисидаги гувоҳноманинг нусхаси;

спорт федерациялари (уюшмалари) қайси спорт турини ёки спорт турларини ривожлантириш мақсадида ташкил этилган ва ўз фаолиятини амалга ошираётган бўлса, ўша спорт тури ёки спорт турлари;

спорт федерациялари (уюшмалари) раҳбар органларининг шахсий таркиби тўғрисидаги маълумотлар;

спорт федерацияларининг (уюшмаларининг) халқаро спорт ташкилотларига аъзолиги тўғрисидаги маълумотлар, агар халқаро спорт ташкилотларига аъзо бўлса.

7. Спорт федерацияси (уюшмаси) тақдим этган ҳужжатлар махсус ваколатли давлат органи томонидан ўн беш кун ичида кўриб чиқилади.

Ҳужжатларда камчиликлар мавжуд бўлмаган тақдирда, масъул ходим ва унинг раҳбари томонидан имзоланган ҳамда махсус ваколатли давлат органи раҳбарининг спорт бўйича биринчи ўринбосари томонидан тасдиқланган хулосага асосан спорт федерацияси (уюшмаси) Реестрга киритилади.

8. Тақдим этилган ҳужжатларда камчиликлар мавжудлиги аниқланган тақдирда, махсус ваколатли давлат органи томонидан тегишли спорт федерациясини (уюшмасини) Реестрга киритиш рад этилмасдан камчиликларни дарҳол бартараф қилиш чоралари кўрилади.

9. Спорт федерациясини (уюшмасини) Реестрга киритиш бўйича хулоса тасдиқлангандан сўнг уч иш куни ичида бу ҳақда тегишли спорт федерациясига (уюшмасига) унинг Реестрга киритилганлиги ҳақида хабарнома юборилади. Мазкур хабарномада тегишли спорт федерациясининг (уюшмасининг) Реестрдаги тартиб рақами кўрсатилиши лозим.

3-боб. Реестрни юритиш

10. Реестр мазкур Низомнинг иловасига мувофиқ электрон шаклда юритилади.

11. Спорт федерациялари (уюшмалари) реестрида қуйидаги маълумотлар кўрсатилади:

тегишли спорт федерацияларининг (уюшмаларининг) номлари;

тегишли спорт федерациялари (уюшмалари) қайси спорт турини ёки спорт турларини ривожлантириш мақсадида ташкил этилган ва ўз фаолиятини амалга ошираётган бўлса, ўша спорт тури ёки спорт турлари;

тегишли спорт федерациялари (уюшмалари) раҳбар органларининг шахсий таркиби тўғрисидаги маълумотлар;

12. Реестрга киритилган маълумотлар ўзгарган тақдирда, спорт федерациялари (уюшмалари) томонидан ушбу ўзгаришлар ҳақида ўн кун ичида махсус ваколатли давлат органига ўзгаришларни тасдиқловчи маълумотлар тақдим этилиши лозим. Бундай маълумотлар махсус ваколатли давлат органига тақдим этилганда, беш кун ичида масъул ходим ва унинг раҳбари имзолаган ҳамда махсус ваколатли давлат органи раҳбарининг спорт бўйича биринчи ўринбосари томонидан тасдиқланган хулоса асосида Реестрга ўзгартиришлар киритилади.

13. Спорт федерациясининг (уюшмасининг) ваколатли (юқори) органи томонидан спорт федерацияси (уюшмаси) фаолиятини тугатиш ҳақида қарор (ихтиёрий тугатиш) қабул қилинганда, мазкур қарор қабул қилингандан сўнг беш кун ичида махсус ваколатли давлат органига спорт федерациясининг (уюшмасининг) фаолиятини тугатиш ҳақидаги қарор нусхаси аризага илова қилинган ҳолда юборилади.

Спорт федерацияси (уюшмаси) суд томонидан тугатилганда (мажбурий тугатиш), спорт федерацияси (уюшмаси) суднинг қарори қонуний кучга кирган кундан бошлаб уч кун ичида тугатиш ҳақидаги қарор нусхасини махсус ваколатли давлат органига юборади.

Бундай маълумотлар махсус ваколатли давлат органига тақдим этилганда, спорт федерацияси (уюшмаси) беш кун ичида масъул ходим ва унинг раҳбари имзолаган ҳамда махсус ваколатли давлат органи раҳбарининг спорт бўйича биринчи ўринбосари томонидан тасдиқланган хулоса асосида Реестрдан чиқарилади.

14. Реестрни юритиш давомида тўпланган барча ҳужжатлар қонун ҳужжатларида белгиланган тартибда сақланади.

4-боб. Реестрдан маълумотлар тақдим этиш

15. Барча маълумотлар, улар Реестрга киритилгандан сўнг, уч кун ичида махсус ваколатли давлат органининг расмий веб-сайтига жойлаштирилади.

16. Реестрда кўрсатилган маълумотлар очиқ бўлади ва улардан ҳамма фойдаланиши мумкин, бундан тегишли спорт федерациялари (уюшмалари) раҳбар органларининг шахсий таркиби тўғрисидаги маълумотлар, агар бу маълумотлар қонун ҳужжатларига мувофиқ очиқ бўлмаса ва ундан ҳамма фойдаланиши мумкин бўлмаса, мустасно.

17. Реестрдан маълумотлар манфаатдор шахсларнинг мурожаатларига асосан ҳам берилиши мумкин.

5-боб. Якуний қоидалар

18. Махсус ваколатли давлат органи мазкур Низом кучга киргунга қадар қонун ҳужжатларида белгиланган тартибда давлат рўйхатидан ўтказилган спорт федерацияларининг (уюшмаларининг) ушбу Низомда белгиланган тартибда Реестрга киритилишини таъминлайди.

19. Спорт федерациялари (уюшмалари) раҳбарлари Реестрга киритилиши лозим бўлган маълумотларни махсус ваколатли давлат органига ўз вақтида, тўғри ва тўлиқ тақдим этилиши учун масъул ҳисобланади.

20. Махсус ваколатли давлат органи маълумотларнинг Реестрга тўғри ва ўз вақтида киритилиши ҳамда ундан доимий равишда маълумотлар олиш имкониятининг яратилиши учун масъул ҳисобланади.

21. Мазкур Низом талабларининг бузилишида айбдор бўлган шахслар қонун ҳужжатларига мувофиқ жавобгарликка тортилади.

Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низомга
ИЛОВА

‎	‎	‎	‎	‎	Намуна‎
‎‎Спорт федерациялари (уюшмалари) ‎ РЕЕСТРИ ‎
Спорт федерациясига (уюшмасига) берилган тартиб рақами	Спорт федерациясининг (уюшмасининг) номи	Спорт федерацияси (уюшмаси) қайси спорт турини ёки спорт турларини ривожлантириш мақсадида ташкил этилган ва ўз фаолиятини амалга ошираётган спорт тури ёки спорт турлари‎	*Спорт федерацияси (уюшмаси) раҳбар органларининг шахсий таркиби‎**	Спорт федерациясининг (уюшмасининг) халқаро спорт ташкилотларига аъзолиги ‎**	Махсус ваколатли давлат органининг Реестрга маълумот киритган масъул ходими (Ф.И.О., лавозими)‎
00000‎	‎	‎	‎	‎	‎
00000‎	‎	‎	‎	‎	‎
00000‎	‎	‎	‎	‎	‎

Изоҳ:

* Тегишли спорт федерациялари (уюшмалари) раҳбар органларининг шахсий таркиби тўғрисидаги маълумотлар, агар бу маълумотлар қонун ҳужжатларига мувофиқ очиқ бўлмаса ва ундан ҳамма фойдаланиши мумкин бўлмаса ушбу графа тўлдирилмайди;

** Спорт федерацияси (уюшмаси) халқаро спорт ташкилотларига аъзо бўлса, тўлдирилади.

(Ўзбекистон Республикаси қонун ҳужжатлари тўплами, 2016 й., 14-сон, 140-модда)