Давлат тасарруфидан чиқариш ва хусусийлаштириш жараёнларини янада ривожлантириш ва чуқурлаштириш, корхоналарнинг инвестицияга оид жалб этувчанлигини ошириш, тўғридан-тўғри хорижий инвестицияларни жалб этишнинг қулай шаклларидан фойдаланиш мақсадида Вазирлар Маҳкамаси қарор қилади:

2. Корхоналарни хусусийлаштириш жараёнига, шу жумладан якка тартибдаги лойиҳалар бўйича хусусийлаштириладиган ва инвесторларга яхлит сотиладиган корхоналарга хорижий инвестициялар жалб этилишини фаоллаштириш мақсадида Ўзбекистон Республикаси Давлат мулки қўмитаси:

хорижий инвесторларга сотиладиган корхоналарнинг техник диагностикасини ўтказиш ҳамда уларни баҳолаш бўйича молиявий маслаҳатчиларни танлаб олиш тартиботини сезиларли даражада соддалаштириш ва муддатларини қисқартириш масалаларини Жаҳон банки билан икки ой муддатда ишлаб чиқсин;

бир йил мобайнида сотилмаган корхоналар ва объектларнинг (якка тартибда акциялаштириладиган корхоналардан ташқари) акцияларини (улушлари, пайларини), корхоналарни молиявий соғломлаштириш бўйича инвесторлар томонидан бизнес-режалар тақдим этилган тақдирда, инвесторларнинг инвестиция мажбуриятлари қийматини объектнинг нархига киритган ҳолда танлов асосида сотиш тўғрисида белгиланган тартибда Вазирлар Маҳкамасининг Комплекслари билан келишган ҳолда қарорлар қабул қилсин;

корхонани молиявий соғломлаштириш бизнес-режаси ва аниқ инвестиция мажбуриятлари бўлган тақдирда, сотиб олиш тўлови тўлашни 5 йилгача бўлган муддатга узайтириб, давлат мулки кейинчалик инвестор томонидан сотиб олиниши ҳуқуқини берган ҳолда давлат мулкини танлов асосида ишончли бошқарувга бериш амалиётини жорий этсин;

Вазирлар Маҳкамасининг тегишли Комплекслари билан биргаликда мақсадга мувофиқ бўлганда йирик истиқболсиз, зарар кўриб ишлаётган корхоналарни уларнинг мол-мулкини қисмларга бўлиб сотувга қўйиш ҳуқуқи билан, белгиланган тартибда таркибий ўзгартирсин (уларни қайта ташкил этсин).

3. Ўзбекистон Республикаси Давлат мулки қўмитаси, Адлия вазирлиги манфаатдор вазирликлар ва идоралар билан биргаликда бир ой муддатда:

хорижий инвесторлар ўз инвестиция мажбуриятларини тўлиқ бажаргунига қадар, уларнинг акциялар пакетларига эгалик қилиш ва улардан фойдаланиш шартлари ва тартибини белгилаган ҳолда, биржа ва биржадан ташқари бозорларда давлат активларини сотиш масалаларини тартибга солувчи идоравий норматив ҳужжатларга белгиланган тартибда ўзгартириш ва қўшимчалар киритсинлар;

хусусийлаштириш ва хорижий инвестицияларни жалб этиш жараёнларини тартибга солувчи қонун ҳужжатларини ва Ҳукуматнинг қарорларини хатловдан ўтказсинлар ҳамда, инвесторлар томонидан қабул қилинган инвестиция мажбуриятлари амалга оширилишининг ҳуқуқий таъминланиши масалаларига алоҳида эътиборни қаратган ҳолда, уларни тўлдириш юзасидан Вазирлар Маҳкамасига таклифлар киритсинлар.

4. Хорижий инвестициялар иштирокидаги корхоналар муассисларига эркин муомаладаги валютада олинган ва чет элга репатриация қилишга мўлжалланган дивидендлардан Ўзбекистоннинг фонд бозорида корхоналарнинг акцияларини (улушлари, пайларини) ва объектларни яхлит сотиб олиш учун фойдаланишга рухсат этилсин.

5. Белгилаб қўйилсинки, вазирликлар, идоралар ва хўжалик бирлашмалари томонидан давлат мулки бўлган корхоналарни қайта ташкил этиш, қўшиб юбориш ва тугатиш Ўзбекистон Республикаси Давлат мулки қўмитаси органлари билан албатта келишилган ҳолда амалга оширилади.

6. Ўзбекистон Республикаси Ҳукуматининг 3-иловага* мувофиқ қарорларига ўзгартириш ва қўшимчалар киритилсин.

7. Ўзбекистон Республикаси Адлия вазирлиги, Давлат мулки қўмитаси манфаатдор вазирликлар ва идоралар билан биргаликда бир ой муддатда тегишли идоравий норматив ҳужжатларга мазкур қарордан келиб чиқувчи ўзгартиришлар киритилишини таъминласинлар.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ў.Қ. Исмоилов зиммасига юклансин.