Ўзбек курашининг халқаро миқёсда эътироф этилаётганлигини инобатга олиб ҳамда унинг оммавийлигини ошириш ва ривожлантиришни давлат томонидан ҳар томонлама қўллаб-қувватлаш мақсадида Вазирлар Маҳкамаси қарор қилади:

1. Халқаро Кураш Ассоциацияси таъсис конгрессининг қарорига биноан Ўзбекистон Республикаси Давлат жисмоний тарбия ва спорт қўмитаси ҳамда Ўзбекистон Кураш Миллий федерациясининг 1999 йил 29 апрель — 3 май кунлари Тошкент шаҳридаги «Жар» спорт мажмуида кураш бўйича биринчи жаҳон чемпионатини ўтказиш ҳақидаги таклифлари қабул қилинсин.

2. Кураш бўйича биринчи жаҳон чемпионатини ўтказишга тайёргарлик кўриш ва уни ўтказиш ташкилий қўмитаси таркиби 1-иловага, сарф-харажатлар сметаси 2-иловага* мувофиқ тасдиқлансин.

Ташкилий қўмита жаҳон чемпионатини ўтказишга тайёргарлик кўриш тадбирларини белгиланган тартибда ишлаб чиқсин ва амалга оширишга киришсин.

Молия вазирлиги 2-иловадаги сарф-харажатларнинг 10 миллион 550 минг сўми Вазирлар Маҳкамасининг захира жамғармаси ҳамда қолган қисми ҳомийлар ва Давлат жисмоний тарбия ва спорт қўмитасининг харажатлар сметасида назарда тутилган маблағлар ҳисобидан қопланишини назарда тутган ҳолда маблағ ажратсин.

Ўзбекистон Республикаси Марказий банки ҳомийлик маблағларини белгиланган тартибда эркин муомаладаги валютага алмаштирсин.

Ўзбекистон Республикаси Ташқи иқтисодий фаолият миллий банки белгиланган тартибда валюта маблағларининг нақд берилишини таъминласин.

3. Ўзбекистон Республикаси Ички ишлар вазирлиги Тошкент шаҳар ҳокимлиги, Давлат жисмоний тарбия ва спорт қўмитаси ҳамда Ўзбекистон Кураш Миллий Федерацияси билан биргаликда «Жар» спорт мажмуини кураш бўйича биринчи жаҳон чемпионатини ўтказишга тайёрлаш, мусобақаларни ўтказиш чоғида жамоат тартибини сақлаш, чемпионат иштирокчилари ва меҳмонлари хавфсизлигини таъминлаш чораларини кўрсин.

4. «Ўзбекистон ҳаво йўллари» миллий авиакомпанияси кураш бўйича биринчи жаҳон чемпионати иштирокчилари ва меҳмонларини Давлат жисмоний тарбия ва спорт қўмитаси буюртмасига мувофиқ сўмда ҳақ олган ҳолда авиачипталар билан таъминласин ҳамда уларга Тошкент аэропортининг VIP зали орқали ҳақ олмасдан хизмат кўрсатсин.

5. Ўзбекистон Республикаси Ташқи ишлар вазирлиги Давлат жисмоний тарбия ва спорт қўмитаси тақдим этадиган рўйхат асосида чемпионатнинг хорижий иштирокчилари ва меҳмонларига виза бериш масалаларини ҳақ олмасдан ҳал қилсин.

6. «Ўзбексавдо» уюшмаси чемпионат ўтказиладиган жойда овқатланиш ва савдо хизматларини ташкил этсин.

7. Ўзбекистон Республикаси Ташқи иқтисодий алоқалар вазирлиги ва «Ўзбектуризм» миллий компанияси Давлат жисмоний тарбия ва спорт қўмитаси буюртмасига мувофиқ чемпионат иштирокчилари ва меҳмонларини меҳмонхоналарга жойлаштирсин ҳамда «Интерконтиненталь» меҳмонхонасининг конференц-залида Халқаро Кураш Ассоциациясининг навбатдаги конгрессини ўтказишга шароит яратсин.

8. «Ўзавтотранс» корпорацияси ва «Ўзбектуризм» миллий компанияси Давлат жисмоний тарбия ва спорт қўмитаси буюртмаси асосида зарур миқдорда транспорт воситалари ажратсин.

9. Тошкент шаҳар ҳокимлиги шаҳар кўчаларини ва чемпионат тадбирлари ўтказиладиган жойларни ободонлаштириш ва безатиш масалаларини ҳал қилсин.

10. Ўзбекистон Республикаси Соғлиқни сақлаш вазирлиги жаҳон чемпионати иштирокчиларига бепул тиббий хизмат кўрсатишни ташкил этсин.

11. «Совпластитал» қўшма корхонаси Давлат жисмоний тарбия ва спорт қўмитаси буюртмасига кўра 1999 йил 20 апрелгача эсдалик совғаларини тайёрлаб берсин.

12. «Ўзтелерадио», ЎзА ва бошқа оммавий ахборот воситаларига кураш бўйича биринчи жаҳон чемпионатига тайёргарликнинг боришини ва унинг ўтишини кенг ёритиш тавсия этилсин.

«Ўзтелерадио», ЎзА ва Ташқи ишлар вазирлиги ҳузуридаги «Жаҳон» ахборот агентлиги кураш бўйича биринчи жаҳон чемпионати мусобақаларининг чет эл телерадиотармоқлари ва бошқа оммавий ахборот воситалари орқали ёритилишига эришиш юзасидан улар билан амалий ҳамкорлик ўрнатиш чораларини кўрсинлар.

13. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ҳ. Кароматов зиммасига юклансин.