Ўзбекистон Республикаси Президентининг «Фарғона ва Қўқон шаҳарларини 2008 — 2012 йилларда реконструкция қилиш, ободонлаштириш ва ижтимоий инфратузилмасини ривожлантириш бўйича чора-тадбирлар Дастурини тасдиқлаш тўғрисида» 2008 йил 5 майдаги ПҚ-860-сон ҳамда «Наманган шаҳрини 2009 — 2012 йилларда ободонлаштириш ва ижтимоий инфратузилмасини ривожлантириш бўйича чора-тадбирлар Дастури тўғрисида» 2009 йил 6 августдаги ПҚ-1170-сон қарорларига асосан Қўқон ва Наманган шаҳарларида қурилган деҳқон бозорлари, савдо ва хизмат кўрсатиш объектларидан мақсадли ва самарали фойдаланиш мақсадида Вазирлар Маҳкамаси қарор қилади:

1. ОАТ «Алоқабанк»нинг 8 533,5 млн сўм миқдордаги ўз маблағлари ҳисобига Қўқон шаҳрида «Деҳқон бозори» масъулияти чекланган жамиятининг бино ва иншоотлари ҳамда Ўзбекистон алоқа ва ахборотлаштириш агентлигининг Радиоалоқа, радиоэшиттириш ва телевидение маркази қошидаги қурилаётган объектлар дирекцияси (кейинги ўринларда — Дирекция) томонидан 9 168,3 млн сўм миқдордаги банк кредити ҳисобига Наманган шаҳрида «Яшил деҳқон бозори» масъулияти чекланган жамиятининг бино ва иншоотлари тасдиқланган Бош режага биноан қуриб битказилганлиги маълумот учун қабул қилинсин.

2. Ўзбекистон алоқа ва ахборотлаштириш агентлиги, ОАТ «Алоқабанк» ва Дирекциянинг Қўқон шаҳридаги «Деҳқон бозори» масъулияти чекланган жамияти ҳудудида қурилган 1 380,0 млн сўм қийматдаги ҳамда Наманган шаҳридаги «Яшил деҳқон бозори» масъулияти чекланган жамияти ҳудудида қурилган 1 199,6 млн сўм қийматдаги мулклар — павильонлар ва муҳандислик коммуникация объектларни кейинчалик мазкур бозорлар устав фондига давлат улуши сифатида киритиш учун тегишли равишда Қўқон ва Наманган шаҳар ҳокимликлари балансига бепул ўтказиш тўғрисидаги таклифларига розилик берилсин.

3. Ўзбекистон алоқа ва ахборотлаштириш агентлиги, ОАТ «Алоқабанк» ҳамда Дирекция мазкур қарорнинг 2-бандида кўрсатилган мулкларни белгиланган тартибда топширилишини, Қўқон ва Наманган шаҳар ҳокимликлари ушбу мулкларни ўз балансига қабул қилиб олинишини таъминласин.

4. Қўқон шаҳридаги «Деҳқон бозори» масъулияти чекланган жамиятининг ва Наманган шаҳридаги «Яшил деҳқон бозори» масъулияти чекланган жамиятининг ҳудудларидаги ОАТ «Алоқабанк» ва Дирекция балансидаги мазкур қарорнинг 2-бандида кўрсатилган мулклардан ташқари савдо ва хизмат кўрсатиш объектларини тадбиркор сифатида давлат рўйхатидан ўтган жисмоний ва юридик шахсларга сотишга ёки лизингга беришга рухсат берилсин.

5. Мазкур қарорнинг 2-бандида кўрсатилган мулкларни қуриш билан боғлиқ харажатлар Қўқон шаҳар «Деҳқон бозори» масъулияти чекланган жамияти ва Наманган шаҳар «Яшил деҳқон бозори» масъулияти чекланган жамияти ҳудудларидаги ОАТ «Алоқабанк» ва Дирекция балансидаги савдо ва хизмат кўрсатиш объектлари қийматига қўшиб ҳисоблашга рухсат берилсин.

6. Ўзбекистон Республикаси Давлат солиқ қўмитаси, Фарғона вилояти ва Наманган вилояти ҳокимликлари Қўқон шаҳридаги «Деҳқон бозори» масъулияти чекланган жамияти ва Наманган шаҳридаги «Яшил деҳқон бозори» масъулияти чекланган жамияти ҳамда бозорлар атрофидаги савдо ва хизмат кўрсатиш объектларидан мақсадли ва самарали фойдаланиш, аҳолига хизмат кўрсатиш сифатини ошириш, бозор, савдо ва хизмат кўрсатиш объектларида пул оқимларини тўлиқ ҳисобга олинишини таъминлаш бўйича қатъий назорат ўрнатсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Н. Арипов зиммасига юклансин.