Пахта ҳосилини ўз вақтида ва сифатли йиғиштириб олишни ҳамда контрактация шартномаларининг бажарилишини таъминлаш мақсадида Вазирлар Маҳкамаси қарор қилади:

1. Қуйидагилар Ўзбекистон Республикаси Қишлоқ ва сув хўжалиги вазирлиги, «Ўзпахтасаноат», «Ўзагромашсервис» уюшмалари, «Ўзқишлоқхўжаликмаш-холдинг» компанияси ва уларнинг ҳудудий бўлинмалари, манфаатдор вазирликлар ва идоралар, Қорақалпоғистон Республикаси Вазирлар Кенгаши, вилоятлар ва туманлар ҳокимликлари, қишлоқ хўжалиги корхоналари раҳбарлари ва мутахассисларининг муҳим вазифалари ҳисоблансин:

пахта териш машиналари, транспорт тракторлари, тиркамалар, махсус жиҳозланган юк автомобиллари, пахта тозалаш заводлари, пахта тайёрлаш пунктлари ҳамда қуритиш-тозалаш цехлари жорий йилнинг 1 сентябригача ҳозирлаб қўйилишини тугаллаш;

Қорақалпоғистон Республикаси ва вилоятлар бўйича 1-иловага мувофиқ пахта териш машиналари, шу жумладан горизонтал шпинделли «Кейс-2022» пахта териш машиналарининг пахта йиғим-теримида қатнашишини таъминлаш;

пахта териш машиналари ва пахтани йиғиштириб олиш ва тайёрлашда банд бўлган бошқа техникаларни иш ҳолатида сақлаш учун эҳтиёт қисмлар ва тузатиш материалларининг зарур захирасини яратиш, уларнинг керакли жойларга тезкорлик билан етказилишини таъминлаш, техникани тузатиш ва уларга сервис хизмати кўрсатиш бўлинмаларининг узлуксиз ишлашини ташкил этиш;

«Кейс-2022» горизонтал шпинделли машиналардан самарали фойдаланиш учун ҳар бир машинага контур бўйича камида 140 гектардан дала ажратиш, далаларнинг агротехника талабларига мувофиқ сифатли тайёрланишини таъминлаш.

2. «Ўзагромашсервис» уюшмаси, Бухоро, Жиззах, Навоий, Сирдарё ва Тошкент вилоятлари ҳокимликларининг 2-иловага мувофиқ «Кейс-2022» горизонтал шпинделли пахта териш машиналарини Бухоро ва Навоий вилоятлари машина-трактор парклари балансидан Жиззах, Сирдарё ва Тошкент вилоятлари машина-трактор парклари балансига бериш тўғрисидаги таклифлари қабул қилинсин.

«Ўзагромашсервис» уюшмаси, Жиззах, Сирдарё ва Тошкент вилоятлари ҳокимликлари 2002 йил 1 сентябргача пахта териш машиналарининг белгиланган жойларга темир йўл транспортида етказилишини таъминласинлар.

«Пахта-банк» илгари Бухоро ва Навоий вилоятлари машина-трактор паркларига пахта териш машиналарини харид қилишни маблағ билан таъминлаш учун берилган кредитларни белгиланган тартибда қайта расмийлаштирсин.

3. Ўзбекистон Республикаси Қишлоқ ва сув хўжалиги вазирлиги, «Ўзкимёсаноат», «Ўзқишлоқхўжаликкимё» компаниялари, Қорақалпоғистон Республикаси Вазирлар Кенгаши, вилоятлар ҳокимликлари:

ғўза баргини тўкишни ерда олиб бориш усули билан ўтказиш учун техника воситалари ва аппаратларни тайёрлашни жорий йилнинг 1 сентябригача тугалласинлар;

хўжаликларга зарур миқдорда дефолиантлар етказиб берилишини ҳамда ғўза баргини тўкиш 3-иловага мувофиқ қулай муддатларда сифатли ўтказилишини таъминласинлар.

«Ўзбекистон ҳаво йўллари» миллий авиакомпанияси Ўзбекистон Республикаси Қишлоқ ва сув хўжалиги вазирлигининг буюртманомалари бўйича ғўза баргини тўкиш учун етарли миқдорда самолётлар ажратсин.

4. Пахта ҳосилини ўз вақтида ва сифатли йиғиштириб олишни ташкил этиш, шунингдек «Кейс-2022» пахта териш машиналаридан самарали фойдаланилиши учун масъулият шахсан Қорақалпоғистон Республикаси Вазирлар Кенгаши Раиси, вилоятлар ва туманлар ҳокимлари, Ўзбекистон Республикаси Қишлоқ ва сув хўжалиги вазирлиги, «Ўзагромашсервис» уюшмаси ҳамда унинг ҳудудий машина-трактор парклари бирлашмалари раҳбарлари зиммасига юклансин.

5. Ўзбекистон Республикаси Молия вазирлиги Қишлоқ ва сув хўжалиги вазирлиги, «Ўзпахтасаноат» уюшмаси иштирокида Ўзбекистон Республикаси Президентининг 2002 йил 20 августдаги ПФ-3114-сон Фармони билан белгиланган пахтанинг харид нархларини шакллантириш тартибидан келиб чиққан ҳолда 2002 йил ҳосили пахта хомашёси харид нархларини тасдиқласин ҳамда бир ҳафта муддатда ўзига қарашли бўлинмаларга ва пахта экувчи хўжаликларга харид нархлари прейскурантини ва ҳисоб-китоб қилиш тартибини етказсин.

6. 2002 йилда давлат эҳтиёжлари учун пахта толасини харид қилиш ҳажми амалда уни ишлаб чиқариш ҳажмининг 50 фоизи даражасида белгилансин (Ўзбекистон Республикаси Вазирлар Маҳкамасининг 1995 йил 31 октябрдаги 421-сон, 2001 йил 2 майдаги 201-сон ҳамда 2001 йил 26 ноябрдаги 461-сон қарорларига мувофиқ Халқаро тикланиш ва тараққиёт банки ҳамда Осиё тараққиёт банки иштирокида лойиҳалар амалга оширилаётган туманлар ва қишлоқ хўжалиги корхоналари бундан мустасно).

Белгилаб қўйилсинки, давлат эҳтиёжлари учун харид қилиш ҳажмидан ортиқча етиштирилган пахта толаси шартномавий нархлар бўйича сотилади.

7. Пахта йиғим-терими қатнашчиларини моддий рағбатлантиришни кучайтириш мақсадида хўжаликларга пахта терими учун далалардаги мавжуд ҳосилга қараб табақалаштирилган ҳақ тўлаш тавсия қилинсин.

Қўл теримида:

терилган 1 килограмм ўрта толали нав пахта учун — камида 28 сўм, ингичка толали пахта учун — 31 сўм;

терилган 1 килограмм ўрта толали уруғлик пахта учун — камида 31 сўм, ингичка толали пахта учун — 34 сўм ҳақ тўлансин.

Машина-трактор парклари ва хўжаликлар икки қаторли вертикал шпинделли пахта териш машинасида терилган бир тонна пахта учун механик-ҳайдовчиларга — камида 546 сўм, тўрт қаторли машинада терилган пахта учун 364 сўм, икки қаторли горизонтал шпинделли машинада терилган пахта учун — камида 273 сўм миқдорида ҳақ тўлайдилар.

Теримчилар ва пахта териш машиналарининг механик-ҳайдовчилари билан ҳар 5 кунда ҳисоб-китоб қилинсин.

Пахта экувчи қишлоқ хўжалиги корхоналари ва фермер хўжаликлари раҳбарларига мазкур қарорда белгиланган энг кам ставкалардан келиб чиқиб ҳамда маҳсулот етиштириш харажатларини ва терим шарт-шароитларини ҳисобга олган ҳолда теримчиларга ва пахта териш машиналари механик-ҳайдовчиларига табақалаштирилган ҳақ тўлаш ҳуқуқи берилсин.

8. Ўзбекистон Республикаси Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси, Марказий банк, «Пахта-банк» ва бошқа тижорат банклари, «Пахтасаноат» ҳудудий бирлашмалари:

хўжаликлар, фермерлар, тайёрлов пунктлари, транспорт ташкилотлари, пахта тозалаш заводларига теримчилар ва пахта териш машиналарининг механик-ҳайдовчилари билан ўз вақтида ҳисоб-китоб қилиш учун;

пахтани юклаш, тушириш, тайёрлаш, транспортда ташиш, жойлаштириш ҳамда унга ишлов бериш, пахта териш техникасига техника хизмати кўрсатиш ва тузатишда банд бўлган ходимларни меҳнатга ҳақ тўлашнинг ички идоравий нормативлари бўйича, машина-трактор паркларини эса пахтани механизация воситасида йиғиштириб олиш бўйича кўрсатилган хизматлар учун ўз вақтида маблағ билан таъминласинлар.

9. Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши, вилоятлар ва туманлар ҳокимликлари қишлоқ хўжалиги кооперативлари (ширкат хўжаликлари) ва бошқа қишлоқ хўжалиги корхоналари томонидан ҳар бир оилавий пудратчи ва хўжалик ички бўлинмалари билан топширилган пахта хомашёсининг амалдаги ҳажми ва сифати асосида ўз вақтида ҳисоб-китоб қилинишини таъминланишини алоҳида назоратга олсинлар. Бунда оилавий пудратчилар ва бошқа бўлинмалар билан тузилган хўжалик ички шартномаларига қатъий риоя қилиниши таъминлансин.

Хўжалик ички пудрати айрим бўлинмаларининг зарарлари бошқа бўлинмалар ҳисобига қопланиши қатъий тақиқлансин.

10. Қорақалпоғистон Республикаси Вазирлар Кенгаши ва вилоятлар ҳокимликлари «Пахтасаноат» ҳудудий бирлашмалари билан автотранспорт корхоналари ўртасида тузилган шартномалар асосида пахта хомашёсини ташишда етарли миқдордаги юк автомашиналари (шу жумладан жисмоний шахсларнинг автотранспорт воситалари) сафарбар этилишини таъминласинлар.

11. «Ўзбекнефтгаз», «Ўзнефтмаҳсулот» компаниялари ёнилғи-мойлаш материалларининг зарур захирасини барпо этсинлар, уларнинг қишлоқ хўжалиги корхоналари, машина-трактор паркларига, пахта тозалаш саноати корхоналарига, бошқа ташкилотлар ва корхоналарга йиғим-терим, ташиш ва пахтага ишлов бериш ишларини бажариш учун талаб этиладиган миқдорда узлуксиз етказиб берилишини таъминласинлар.

«Кейс-2022» пахта териш машиналари учун мой етказиб беришга алоҳида эътибор қаратилсин.

12. 2002 йил пахта ҳосилини ўз вақтида ва сифатли йиғиштириб олишни ташкил этиш бўйича 4-иловага мувофиқ таркибда ишчи комиссия ташкил этилсин.

Шундай комиссиялар республиканинг барча минтақаларида Қорақалпоғистон Республикаси Вазирлар Кенгаши Раиси, вилоятлар ҳокимлари раҳбарлигида ташкил этилсин.

Ишчи комиссия (И.Ҳ. Жўрабеков):

пахта ҳосилини уюшқоқлик билан йиғиштириб олиш ишларининг боришини мунтазам равишда таҳлил қилиб борсин;

йиғим-теримни ўз вақтида ўтказиш ва пахта хомашёсини тайёрлашни таъминлаш билан боғлиқ масалаларни тезкорлик билан ҳал қилишда кўмаклашсин;

ишчи комиссия мажлисларида ҳудудий комиссиялар, республика вазирликлари ва идоралари раҳбарларининг ҳосилни уюшқоқлик билан йиғиштириб олиш бўйича улар томонидан амалга оширилаётган ишлар тўғрисидаги ҳисоботларини эшитиш амалда қўллансин.

13. «Ўзбекбирлашув», «Ўзбексавдо» компаниялари, «Ўздонмаҳсулот» корпорацияси, «Ёғмойтамакисаноат» уюшмаси қишлоқ аҳолисини, айниқса пахта йиғим-терими қатнашчиларини озиқ-овқат ва бошқа зарур халқ истеъмол товарлари билан таъминлаш масалаларини тезкорлик билан ҳал қилсинлар.

14. Ўзбекистон Республикаси Соғлиқни сақлаш вазирлиги ва Маданият ишлари вазирлиги ҳосил йиғим-терими даврида:

пахта йиғим-теримида банд бўлган ходимларга тиббий ёрдам;

теримчиларга маданий хизмат кўрсатишни ташкил этсин, бунинг учун санъат ва адабиёт арбобларининг хўжаликларга боришларини назарда тутсин.

15. «Ўзтелерадио» компанияси, Ўзбекистон миллий ахборот агентлиги пахта йиғим-теримининг боришини радио, телевидение ва матбуотда мунтазам равишда ёритиб боришни ташкил этсинлар, пахта етиштириш ва уни териб олишда юқори натижаларга эришган ишлаб чиқариш илғорлари — теримчилар, механик-ҳайдовчилар, фермерлар, хўжаликлар раҳбарларига алоҳида эътиборни қаратсин.

16. Ўзбекистон Республикаси Вазирлар Маҳкамасининг «2002 йилда пахта хомашёси етиштириш, ғўзани навлар бўйича жойлаштириш ҳамда навларни янгилашни такомиллаштириш чора-тадбирлари тўғрисида» 2001 йил 19 декабрдаги 477-сон қарори 1-бандининг иккинчи хат-боши ва ушбу қарорга 7-илова ўз кучини йўқотган деб ҳисоблансин.

17. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ва Ўзбекистон Республикаси Бош вазирининг ўринбосари Н.С. Юсупов зиммасига юклансин.