Ҳужжат кучини йўқотган " " 22.02.2021
Ўзбекистон Республикаси Вазирлар Маҳкамасининг
қарори
1999 ЙИЛДА ШОЛИ ЭКИН МАЙДОНЛАРИ ВА ЯЛПИ ҲОСИЛИ ТЎҒРИСИДА
 LexUZ шарҳи
Мазкур қарор Ўзбекистан Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Шоли етиштириш ҳажмларини кўпайтириш, республика аҳолисининг шоли маҳсулотларига бўлган эҳтиёжини қондириш мақсадида Вазирлар Маҳкамаси қарор қилади:
1. Ўзбекистон Республикаси Макроиқтисодиёт ва статистика вазирлиги, Қишлоқ ва сув хўжалиги вазирлигининг Қорақалпоғистон Республикаси Вазирлар Кенгаши ва вилоятлар ҳокимликлари билан келишилган 1999 йилда шоли экин майдонлари, унинг ялпи ҳосили ва давлат ресурсларига шоли сотиш ҳажмлари тўғрисидаги таклифига иловага мувофиқ розилик берилсин.
2. Ўзбекистон Республикаси Қишлоқ ва сув хўжалиги вазирлиги, «Ўздонмаҳсулот» давлат корпорацияси, Қишлоқ хўжалиги илмий-ишлаб чиқариш маркази, «Ўздавуруғназорат» маркази Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда 1999 йил ҳосили учун шолининг юқори ҳосилли навлари, шу жумладан, тезпишар, ўта тезпишар ва ўрта тезпишар навлари шоли экиладиган зоналарнинг тупроқ-иқлим шароитларини ҳисобга олган ҳолда жойлаштирилишини таъминласинлар. Элита-уруғчилик хўжаликлари билан биргаликда хўжаликларни сертификацияланган генетик жиҳатдан соф навли уруғлар билан таъминлаш масалаларини ҳал этсинлар.
3. Қорақалпоғистон Республикаси Вазирлар Кенгаши ва вилоятлар ҳокимликлари шолизорларни сув ресурслари билан кафолатли таъминланган майдонларда жойлаштириш ишларини ташкил этсинлар, районлаштирилган ва юқори ҳосилли навлар экилсин.
Ердан фойдаланиш самарадорлигини ошириш мақсадида асосий ва айниқса такрор экишда шолини кўчат усулида экишни кенгайтириш, бунинг учун келтирилган махсус техника ва асбоб-ускуналарни кенг қўллаш чора-тадбирлари кўрилсин.
4. «Ўздонмаҳсулот» давлат корпорацияси (Отаев), Ўзбекистон Республикаси Қишлоқ ва сув хўжалиги вазирлиги (Бобожонов) Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда давлат ресурсларига шолини шартнома нархлари бўйича харид қилиш юзасидан контрактация шартномалари тузишни 1999 йил 1 мартгача якунласинлар.
5. 1999 йил ҳосили учун шоли етиштирувчи хўжаликларга шоли давлат хариди умумий суммасининг 50 фоизигача миқдордаги аванс Ўзбекистон Республикаси Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси томонидан ажратиладиган маблағлар ҳисобига «Ғалла-банк» орқали «Ўздонмаҳсулот» давлат корпорацияси томонидан белгиланган тартибда берилиши маълумот учун қабул қилинсин.
6. «Ўзкимёсаноат» уюшмаси (Юсупбеков) шоли етиштирувчи хўжаликларга зарур миқдорда минерал ўғитлар ва гербицидлар етказиб берилишини таъминласин.
7. «Ўзқишлоқхўжаликмаш-холдинг» компанияси (Матчонов), «Ўзқишлоқхўжаликтаъминоттузатиш» давлат-кооператив қўмитаси (Юсупов) шоли етиштирувчи хўжаликларнинг буюртманомалари бўйича шоли етиштириш учун етишмаётган техникани ишлаб чиқаришни ташкил этиш масаласини ишлаб чиқсинлар.
8. Мазкур қарорнинг бажарилишини назорат қилиш Бош вазирнинг ўринбосари Б. Олимжонов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
1999 йил 22 февраль,
75-сон
Вазирлар Маҳкамасининг 1999 йил 22 февралдаги 75-сон қарорига
ИЛОВА
1999 йилда шоли экин майдонлари ва уни етиштириш ҳажмлари