«Ўзметкомбинат» акционерлик ишлаб чиқариш бирлашмасида ишлаб чиқариш қувватларини ўз вақтида ишга тушириш ва унинг ишини барқарорлаштириш мақсадида Вазирлар Маҳкамаси қарор қилади:

1. «Ўзметкомбинат» акционерлик ишлаб чиқариш бирлашмаси 1995 — 1997 йилларда реконструкция қилишни, техника билан қайта жиҳозлашни ҳамда қувватларни ишга туширишни иловага мувофиқ тугалласин.

«Ўзистиқболстат» давлат қўмитаси республиканинг 1995 — 1997 йиллардаги инвестиция дастурларида кўрсатиб ўтилган объектлар қурилишини назарда тутсин.

2. Ўзбекистон Республикаси Ташқи иқтисодий фаолият миллий банки «Ўзметкомбинат» акционерлик ишлаб чиқариш бирлашмасига иловада кўрсатилган қурилаётган ва реконструкция қилинаётган объектлар учун технологик асбоб-ускуналар сотиб олишга 3,0 млн АҚШ доллари миқдорида кредит ажратсин.

3. «Ўзметкомбинат» акционерлик ишлаб чиқариш бирлашмасига:

Россия Федерацияси, Украина, Қозоғистон ва Беларусь истеъмолчилари билан контрактлар тузишга, шунингдек Вазирлар Маҳкамасининг 1994 йил 11 апрелдаги 195-сон қарорига мувофиқ маҳсулотнинг қийматини эркин алмаштириладиган валютада кўрсатган ҳолда бартер асосида контрактлар тузишга;

ҳисоб-китобларни юклаб жўнатиш пайтида амалда бўлган курс бўйича кўрсатиб ўтилган мамлакатларнинг миллий валютасида амалга оширишга рухсат берилсин.

4. Металл прокати ишлаб чиқаришни маҳаллий моддий ресурслар билан таъминлаш учун:

«Ўзметкомбинат» акционерлик ишлаб чиқариш бирлашмаси «Махсусқотишма» республика бирлашмаси билан биргаликда 1995 йилда Қўйтош вольфрам кони негизида оҳактош ва кварцит қазиб олиш, қайта ишлаш ва етказиб беришни ташкил этсин;

«Қизилқумнодирметаллолтин» Давлат концерни ферромарганец ишлаб чиқаришни ташкил этиш учун 1995 йилнинг IV чорагида геология-разведка ишлари тугалланишини, техник-иқтисодий асослари тузилишини таъминласин ҳамда уни кўриб чиқиш учун «Ўзистиқболстат» давлат қўмитасига киритсин. «Ўзистиқболстат» давлат қўмитаси «Ўзметкомбинат» акционерлик ишлаб чиқариш бирлашмаси, «Қизилқумнодирметаллолтин» давлат концерни ва бошқа манфаатдор ташкилотлар билан биргаликда 1996 йилнинг биринчи чорагида тақдим этилган техник-иқтисодий асослашларни кўриб чиқсин ҳамда ферромарганец ишлаб чиқаришни ташкил этишга оид таклифларни Вазирлар Маҳкамасига киритсин;

«Ўзистиқболстат» давлат қўмитаси, Давлат геология қўмитаси, «Ўзқурилишматериаллари» давлат концерни, «Кўмир» акционерлик бирлашмаси манфаатдор ташкилотларни жалб этган ҳолда 1995 йил 1 июлгача ўтга чидамли материаллар ишлаб чиқаришни ташкил этиш масалаларини кўриб чиқсинлар ҳамда зарурият бўлса, Вазирлар Маҳкамасига таклиф киритсинлар.

5. «Ўзистиқболстат» давлат қўмитаси «Ўзметкомбинат» акционерлик ишлаб чиқариш бирлашмаси билан биргаликда бир ой муддатда республика ҳудудида темир парчалари ҳосил бўлиши балансини ва баланснинг харажатлар моддалари пасайиши ҳамда кирим моддалари ўсиши бўйича чора-тадбирларни ишлаб чиқсин. Балансни ишлаб чиқишда республика ташқарисидан келтириладиган ёки ана шу мақсадда МДҲ мамлакатлари корхоналари билан биргаликда махсус ташкил этилган корхоналар ишлаб чиқарадиган металлашган хомашёни кирим қисмига жалб этиш имконияти кўриб чиқилсин.

6. Ўзбекистон Республикаси Вазирлар Маҳкамасининг 1993 йил 30 июндаги 326-сон қарори ўз кучини йўқотган деб ҳисоблансин.

7. Мазкур қарорнинг бажарилишини назорат қилиш Бош вазирнинг ўринбосари Ю. Ф. Пайгин зиммасига юклансин.