Ўзбекистон Республикаси Олий Кенгаши қарор қилади:

1. «Ўзбекистон Республикаси фуқароларидан, ажнабий фуқаролардан ва фуқаролиги бўлмаган шахслардан олинадиган даромад солиғи тўғрисида»ги Ўзбекистон Республикаси Қонуни 1991 йил 1 апрелдан бошлаб кучга киритилсин.

2. Корхоналар, муассасалар ва ташкилотлар 1991 йил 1 апрелгача бажарилган ишлар ва амалга оширилган бошқа фаолият учун Қонун кучга киритилганидан кейин тўлайдиган иш ҳақи ва бошқа тўловларга Қонун қабул қилинишидан олдин амал қилган тартибда ва миқдорларда даромад солиғи солинади.

Фуқароларнинг бошқа даромадларига даромад олинган вақтидан қатъи назар Қонунда белгилаб қўйилган тартибда ва миқдорларда солиқ солиниши керак.

3. Ўзбекистон Республикаси Президенти ҳузуридаги Вазирлар Кабинети:

— 1991 йил 1 апрелгача Ўзбекистон Республикаси Олий Кенгашига Ўзбекистон Республикасининг қонун ҳужжатларини «Ўзбекистон Республикаси фуқароларидан, ажнабий фуқаролардан ва фуқаролиги бўлмаган шахслардан олинадиган даромад солиғи тўғрисида»ги Ўзбекистон Республикаси Қонунига мувофиқлаштириш ҳақидаги таклифларни киритсин;

— 1993 йил 1 январигача фуқаролардан олинадиган даромад солиғини ислоҳ қилишнинг иккинчи босқичини амалга ошириш ҳақидаги таклифларни ишлаб чиқсин ва Ўзбекистон Республикаси Олий Кенгаши муҳокамасига киритсин, бу таклифларда фуқаролар шахсий даромадларига жами йиллик даромад суммасини, болаларни, қарамоқдаги шахсларни боқишга қилинадиган харажатларни ва бошқа ижтимоий жиҳатдан асосли харажатларни тўла ҳисобга олган ҳолда солиқ солишнинг ягона принципларига ўтишни назарда тутсин;

— Ўзбекистон Республикаси Ҳукуматининг қарорларини «Ўзбекистон Республикаси фуқароларидан, ажнабий фуқаролардан ва фуқаролиги бўлмаган шахслардан олинадиган даромад солиғи тўғрисида»ги Ўзбекистон Республикаси Қонунига мувофиқлаштирсин.