Ўзбекистон Республикаси Сув хўжалиги вазирлигининг сув хўжалиги ташкилотлари истеъмол қиладиган электр энергия учун тўловларнинг асосланганлиги, тўлиқлиги ва ўз вақтида тўланиши устидан назоратни кучайтириш мақсадида:

1. 2008 йилнинг 1 январидан қуйидаги тартиб ўрнатилсин, унга мувофиқ:

давлат бюджетининг Ўзбекистон Республикаси Сув хўжалиги вазирлиги учун назарда тутиладиган харажатларида сув хўжалиги ташкилотлари истеъмол қиладиган электр энергия тўловлари учун алоҳида сатр билан маблағ ажратилади;

Ўзбекистон Республикаси Молия вазирлиги Ғазначилигида ва унинг ҳудудий бўлинмаларида Ўзбекистон Республикаси Сув хўжалиги вазирлигининг ҳудудий сув хўжалиги ташкилотлари учун шахсий ҳисобварақлар очилади;

ҳудудий сув хўжалиги ташкилотларининг харажатлар сметаси Ўзбекистон Республикаси Сув хўжалиги вазирлиги томонидан тасдиқланганидан ҳамда Молия вазирлигида белгиланган тартибда рўйхатга олинганидан сўнг, Молия вазирлиги Ғазначилиги ва унинг ҳудудий бўлинмаларининг ягона маълумотлар базасида қайд этилади;

сув хўжалиги ташкилоти билан энергия таъминоти ташкилоти ўртасида рўйхатга олинган харажатлар сметаси доирасида тузилган шартномалар Ўзбекистон Республикаси Молия вазирлиги Ғазначилигининг ҳудудий бўлинмаларида рўйхатдан ўтказилиши шарт;

Ўзбекистон Республикаси Сув хўжалиги вазирлигининг сув хўжалиги ташкилотлари истеъмол қиладиган электр энергия учун тўловлар уларнинг шахсий ҳисобварақларидан Молия вазирлиги Ғазначилиги ва унинг ҳудудий бўлинмалари орқали «Ҳудудий электр тармоқлари» АЖнинг махсус банк ҳисобварағига ўтказилади;

Ғазначиликнинг ҳудудий бўлинмалари ҳисоблагич асбоблар кўрсаткичлари билан тасдиқланган электр энергиясини истеъмол қилишнинг физик ҳажмлари тўғрисидаги маълумотлар билан сув хўжалиги ташкилоти ва энергия таъминоти ташкилоти ўртасида рўйхатга олинган шартномалар, ҳисобварақ-фактуралар, шунингдек ўзаро ҳисоб-китобларни қиёслаб текшириш ҳужжатлари асосида истеъмол қилинган электр энергия тўловларини амалга ошириш учун электрон тўлов ҳужжатларини шакллантиради.

Бунда қиёслаб текшириш ҳужжатлари Қорақалпоғистон Республикаси ва вилоятлардаги ҳудудий сув хўжалиги тузилмалари ҳамда Молия вазирлиги Ғазначилиги бошқармаларининг биринчи раҳбарлари томонидан биргаликда тасдиқланади.

2. Белгилансинки, қуйидагилар:

сув хўжалиги ташкилотлари томонидан даврлар бўйича электр энергиясини истеъмол қилишнинг физик ҳажмлари тўғри аниқланиши ва улардан мақсадли, аниқ фойдаланилиши устидан — сув хўжалиги ташкилотлари идоравий мансуб бўлган тегишли минтақавий тузилмалар томонидан;

истеъмол қилинган электр энергия учун тўланадиган сумманинг асослилиги устидан — Қорақалпоғистон Республикаси ва вилоятлардаги Молия вазирлиги Ғазначилиги бошқармалари томонидан тизимли назорат амалга оширилади.

3. Ўзбекистон Республикаси Молия вазирлиги, Қишлоқ ва сув хўжалиги вазирлиги «Ўзбекэнерго» ДАК билан биргаликда икки ҳафта муддатда Ўзбекистон Республикаси Қишлоқ ва сув хўжалиги вазирлигининг сув хўжалиги ташкилотлари истеъмол қиладиган электр энергия учун тўловларни амалга ошириш тартиби тўғрисидаги низомни илова қилинган схема асосида белгиланган тартибда ишлаб чиқсин ва тасдиқласин.

4. Ўзбекистон Республикаси Молия вазирлигининг Назорат-тафтиш бош бошқармаси зиммасига Қишлоқ ва сув хўжалиги вазирлигининг сув хўжалиги ташкилотлари истеъмол қиладиган электр энергия учун тўланган суммаларнинг асослилигини мунтазам равишда ёппасига ва танлаб текширишларни ўтказиш вазифаси юклансин.

5. Мазкур қарорнинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.

1) Молия вазирлиги томонидан белгиланган тартибда рўйхатга олинган харажатлар сметасини Молия вазирлиги Ғазначилиги бўлинмаларига тақдим этиш;

2) тасдиқланган харажатлар сметаси доирасида сув хўжалиги ташкилотлари ва «Ҳудудий электр тармоқлари» АЖ бўлинмалари ўртасида электр энергиясини етказиб бериш бўйича шартномалар тузиш;

3) сув хўжалиги ташкилотлари томонидан шартномаларни тегишли ғазначилик бўлинмаларига рўйхатдан ўтказиш учун тақдим этиш;

4) «Ҳудудий электр тармоқлари» АЖ бўлинмалари томонидан сув хўжалиги ташкилотларига етказиб бериладиган электр энергияси ҳажми ва тўланиши лозим бўлган суммалар бўйича счет-фактураларни тақдим этиш;

5) сув хўжалиги ташкилотлари томонидан ғазначиликнинг тегишли ҳудудий бўлинмаларига счет-фактуралар тақдим этиш;

6) ҳудудий ғазначилик бўлинмалари томонидан счет-фактураларни текшириш ва электр энергияси учун тўловларни амалга ошириш мақсадида улар маълумотларини Молия вазирлиги Ғазначилигининг ягона маълумотлар базасига киритиш;

7) Молия вазирлиги Ғазначилиги томонидан «Ҳудудий электр тармоқлари» АЖ бўлинмаларининг махсус банк ҳисобварақларига электр энергияси учун тўловни амалга ошириш;

8) ҳудудий ғазначилик бўлинмалари томонидан сув хўжалиги ташкилотларига истеъмол қилинган электр энергияси учун ҳақ тўлаш бўйича тўлов топшириқномаларидан кўчирма ва нусхаларни тақдим этиш.