Ўзбекистон Республикасининг қонуни
«ЎЗБЕКИСТОН ҚАҲРАМОНИ» УНВОНИНИ БЕЛГИЛАШ ВА ОЛИЙ НИШОН — «ОЛТИН ЮЛДУЗ» МЕДАЛИНИ ТАЪСИС ЭТИШ ТЎҒРИСИДА
Ўзбекистон Республикаси Олий Кенгаши қарор қилади:
1. «Ўзбекистон Қаҳрамони» унвони белгилансин ва олий нишон — «Олтин Юлдуз» медали таъсис этилсин.
2. «Ўзбекистон Қаҳрамони» унвони тўғрисидаги Низом тасдиқлансин (илова қилинади).
3. «Олтин Юлдуз» медалининг тавсифи тасдиқлансин (илова қилинади).
Ўзбекистон Республикасининг Президенти И. КАРИМОВ
Тошкент ш.,
1994 йил 5 май,
1038-XII-сон
1994 йил 5 майда қабул қилинган
Ўзбекистон Республикаси Қонуни билан
ТАСДИҚЛАНГАН
«Ўзбекистон Қаҳрамони» унвони тўғрисидаги
НИЗОМ
1. «Ўзбекистон Қаҳрамони» унвони олий даражадаги мукофот бўлиб, Ўзбекистон Республикасининг фуқароларига давлат ва халқ олдидаги қаҳрамонона жасорат кўрсатиш билан боғлиқ хизматлари учун берилади.
«Ўзбекистон Қаҳрамони» унвони айрим ҳолларда Ўзбекистон Республикаси фуқароси бўлмаган шахсларга ҳам берилиши мумкин.
2. «Ўзбекистон Қаҳрамони» унвони Ўзбекистон Республикаси Президенти томонидан берилади. Унвон бериш тўғрисидаги Фармон матбуотда ва бошқа оммавий ахборот воситаларида эълон қилинади.
Ўзбекистон Республикаси Президентига «Ўзбекистон Қаҳрамони» унвони бериш Ўзбекистон Республикаси Олий Мажлиси томонидан амалга оширилади.
Олдинги таҳрирга қаранг.
3. «Ўзбекистон Қаҳрамони» унвонини бериш Ўзбекистон Республикаси Вазирлар Маҳкамаси, Ўзбекистон Республикаси Конституциявий судининг Раиси, Ўзбекистон Республикаси Олий судининг Раиси, Ўзбекистон Республикаси Бош прокурори, Қорақалпоғистон Республикаси Жўқорғи Кенгесининг Раиси, вилоятлар ва Тошкент шаҳар ҳокимлари, вазирликлар ва идоралар раҳбарларининг ҳамда жамоат бирлашмалари республика органларининг тақдимномасига биноан амалга оширилади.
(3-модда Ўзбекистон Республикасининг 2023 йил 28 ноябрдаги ЎРҚ-880-сонли Қонуни таҳририда — Қонунчилик маълумотлари миллий базаси, 29.11.2023 й., 03/23/880/0905-сон)
4. «Ўзбекистон Қаҳрамони» унвони билан тақдирланган шахсга «Олтин Юлдуз» медали ва унвон берилганлиги тўғрисидаги тегишли ҳужжат топширилади.
Олдинги таҳрирга қаранг.
5. «Олтин Юлдуз» медалини тантанали ва кенг ошкоралик вазиятида Ўзбекистон Республикаси Президенти ёки унинг номидан Ўзбекистон Республикаси Олий Мажлисининг Қонунчилик палатаси Спикери, Ўзбекистон Республикаси Олий Мажлисининг Сенати Раиси, Ўзбекистон Республикаси Бош вазири топширади.
(5-модда Ўзбекистон Республикасининг 2004 йил 3 декабрдаги 714-II-сон Қонуни таҳририда — Ўзбекистон Республикаси Қонун ҳужжатлари тўплами, 2004 й., 51-сон, 514-модда)
Олдинги таҳрирга қаранг.
6. «Ўзбекистон Қаҳрамони» унвони билан тақдирланган шахслар ойлик иш ҳақига ёки пенсияга қўшимча равишда базавий ҳисоблаш миқдорида ой сайин тўланадиган устама мукофот оладилар.
(6-модданинг биринчи қисми Ўзбекистон Республикасининг 2019 йил 3 декабрдаги ЎРҚ-586-сонли Қонуни таҳририда — Қонун ҳужжатлари маълумотлари миллий базаси, 04.12.2019 й., 03/19/586/4106-сон)
«Ўзбекистон Қаҳрамони» унвони билан тақдирланган шахслар Ўзбекистон Республикаси ҳудудида давлат пассажир транспортининг барча турларида (таксидан ва бошқа транспорт турларининг буюртма рейсларидан ташқари) текинга юриш ҳуқуқига эгадирлар.
 LexUZ шарҳи
6-модданинг иккинчи қисмининг шаҳар йўловчилар транспортидан бепул фойдаланишга доир қисми Ўзбекистон Республикасининг «Шаҳар йўловчилар транспортидан бепул фойдаланишни тартибга солиш тўғрисида»ги Қонунига асосан ўз кучини йўқотган.
Олдинги таҳрирга қаранг.
«Ўзбекистон Қаҳрамони» унвони билан тақдирланган шахслар қонунчиликда белгилаб қўйиладиган бошқа имтиёзлардан ҳам фойдаланадилар.
(6-моддаси учинчи қисми Ўзбекистон Республикасининг 2021 йил 21 апрелдаги ЎРҚ-683-сонли Қонуни таҳририда — Қонунчилик маълумотлари миллий базаси, 21.04.2021 й., 03/21/683/0375-сон)
7. «Олтин Юлдуз» медали кўкракнинг чап томонига орден ва медаллардан юқорироққа тақилади.
8. «Ўзбекистон Қаҳрамони» унвонини такроран бериш мумкин эмас.
9. «Ўзбекистон Қаҳрамони» унвони вафотидан кейин берилган тақдирда «Олтин Юлдуз» медали ва унвон берилганлиги тўғрисидаги ҳужжат мукофотланганнинг оиласига топширилади.
1994 йил 5 майда қабул қилинган
Ўзбекистон Республикаси Қонуни билан
ТАСДИҚЛАНГАН
«олтин юлдуз» медалининг тавсифи
«Олтин Юлдуз» медали 585 даражали (пробали) олтин қотишмасидан тайёрланади ва олд томонида ҳар бир қиррасининг икки ёнбағридан олтин нурлар таралган саккиз қиррали юлдуз шаклида бўлади. Юлдузнинг қарама-қарши жойлашган учларининг ораси 32 миллиметр. Медаль марказидаги диаметри 8 миллиметрли сатҳга жо бўлган доира ичида Ўзбекистон Республикаси Давлат гербининг рамзига монанд ярим ой ва беш қиррали юлдуз жойлашган. Ярим ой жо бўлган сатҳ айланасининг диаметри 6 миллиметр, беш қиррали юлдуз жо бўлган сатҳ айланасининг диаметри эса 3 миллиметрдир.
Медалнинг орқа томони марказида Ўзбекистон Республикаси Давлат герби жойлашган. Гербнинг пастидаги нурга медалнинг рақами 1 миллиметр катталикдаги ботиқ шрифт билан ёзилган.
Медаль ёнлари ўйиқ тўғри тўртбурчак шаклида ишланган, ўлчами 16х25 миллиметрли кумуш қадағич (колодка)га кумушдан ишланган илмоқча ва ҳалқа ёрдамида уланади. Қадағичнинг қисмлари ва ҳалқа 0,25 микрон қалинликдаги тилла билан қопланган.
Қадағичнинг ички қисми республика Давлат байроғининг рангидаги йўл-йўл зардўзи мато (лента) билан қопланган. Матонинг катталиги 11х20 миллиметр.
Қадағичнинг орқа томонида тақма тўғноғич бор.
Медаль оғирлиги 12,5 грамм

(Ўзбекистон Республикаси Олий Кенгашининг Ахборотномаси, 1994 й., 5-сон, 113-модда; Ўзбекистон Республикаси Олий Мажлиснинг Ахборотномаси, 1996 й., 9-сон, 141-модда; Ўзбекистон Республикаси қонун ҳужжатлари тўплами, 2004 й., 51-сон, 514-модда; 2017 й., 37-сон, 978-модда; Қонун ҳужжатлари маълумотлари миллий базаси, 04.12.2019 й., 03/19/586/4106-сон; Қонунчилик маълумотлари миллий базаси, 21.04.2021 й., 03/21/683/0375-сон; 29.11.2023 й., 03/23/880/0905-сон)