Oʻzbekiston Respublikasi Prezidentining “Davlat boshqaruvi respublika organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmonini bajarish yuzasidan va “Bankrotlik toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Quyidagilar Oʻzbekiston Respublikasi Iqtisodiyot vazirligi huzuridagi Iqtisodiy nochor korxonalar ishlari qoʻmitasining asosiy vazifalari etib belgilansin:

ustav fondida davlat ulushi boʻlgan korxonalarning moliyaviy ahvoli monitoringini olib borish, toʻlovga qodir boʻlmagan, zarar koʻrib ishlayotgan va iqtisodiy nochor korxonalarni aniqlash;

bankrotlik sohasida davlat tomonidan tartibga solishni amalga oshirish;

korxonalarning iqtisodiy nochorligi toʻgʻrisidagi masalalarni hal etishda davlat manfaatlarini ifodalash;

ijro etuvchi hokimiyat respublika va mahalliy organlari bilan birgalikda korxonalar bankrotligining oldini olishga yoʻnaltirilgan chora-tadbirlar koʻrilishi tashkil etilishini taʼminlash;

ustav fondida davlat ulushi boʻlgan zarar koʻrib ishlayotgan, past rentabelli va iqtisodiy nochor korxonalarni hamda qishloq xoʻjaligi korxonalarini tarkibiy oʻzgartirish va moliyaviy sogʻlomlashtirish chora-tadbirlari ishlab chiqilishi va amalga oshirilishiga koʻmaklashish;

sud boshqaruvchilarini attestatsiyadan oʻtkazish va ularning yagona reyestrini yuritish;

sud boshqaruvchilari faoliyatini nazorat qilish.

2. Quyidagilar:

Oʻzbekiston Respublikasi Iqtisodiyot vazirligi huzuridagi Iqtisodiy nochor korxonalar ishlari qoʻmitasi toʻgʻrisidagi nizom 1-ilovaga muvofiq;

Qoʻmitaning tashkiliy tuzilmasi, markaziy apparati tuzilmasi va hududiy boshqarmasining namunaviy tuzilmasi 2—4-ilovalarga* muvofiq tasdiqlansin.

3. Oʻzbekiston Respublikasi Iqtisodiyot vazirligi huzuridagi Iqtisodiy nochor korxonalar ishlari qoʻmitasi markaziy apparati xodimlarining cheklangan umumiy soni 32 nafar, shu jumladan boshqaruv xodimlari soni 25 nafar etib belgilansin.

Qoʻmita raisiga markaziy apparat tuzilmasiga xodimlarning belgilangan soni va ularning taʼminotiga ajratiladigan mablagʻlar doirasida oʻzgartirishlar kiritish huquqi berilsin.

4. Oʻzbekiston Respublikasi Hukumatining 5-ilovaga muvofiq ayrim qarorlari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Oʻzbekiston Respublikasi Iqtisodiyot vazirligi huzuridagi Iqtisodiy nochor korxonalar ishlari qoʻmitasi (keyingi oʻrinlarda Qoʻmita deb yuritiladi) korxonalarning iqtisodiy nochorligi sohasidagi vazifalarni hal etishga vakolatli boʻlgan davlat boshqaruvi organi hisoblanadi.

Qoʻmita Oʻzbekiston Respublikasi Iqtisodiyot vazirligining mustaqil tarkibiy boʻlinmasi hisoblanadi va oʻz faoliyatida Oʻzbekiston Respublikasi Vazirlar Mahkamasiga hisobot beradi. Qoʻmita Korxonalar bankrotligi va sanatsiyasi masalalari boʻyicha Hukumat komissiyasining (keyingi oʻrinlarda Komissiya deb yuritiladi) ishchi organi hisoblanadi.

2. Qoʻmita oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda mazkur Nizomga amal qiladi.

3. Qoʻmita tizimiga Qoraqalpogʻiston Respublikasi, viloyatlar va Toshkent shahar iqtisodiy nochor korxonalar ishlari hududiy boshqarmalari (keyingi oʻrinlarda hududiy boshqarmalar deb yuritiladi) kiradi.

4. Qoʻmita oʻz faoliyatini davlat boshqaruvining boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.

5. Qoʻmitaning va uning hududiy boshqarmalarining moddiy-texnika taʼminoti, shuningdek Qoʻmita tizimi xodimlari mehnatiga haq toʻlash Qoʻmitaga ajratiladigan mablagʻlar doirasida davlat budjeti mablagʻlari, Korxonalar sanatsiyasi jamgʻarmasi mablagʻlarining bir qismi va qonun hujjatlariga zid boʻlmagan boshqa manbalar hisobiga amalga oshiriladi.

6. Qoʻmita va uning hududiy boshqarmalari yuridik shaxs hisoblanadi. Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

7. Quyidagilar Qoʻmitaning asosiy vazifalari hisoblanadi:

ustav fondida davlat ulushi boʻlgan korxonalarning moliyaviy ahvoli monitoringini olib borish, toʻlovga qodir boʻlmagan, zarar koʻrib ishlayotgan va iqtisodiy nochor korxonalarni aniqlash;

bankrotlik sohasida davlat tomonidan tartibga solishni amalga oshirish;

iqtisodiy nochor korxonalar toʻgʻrisidagi masalalarni hal etishda davlat manfaatlarini ifodalash;

ijro etuvchi hokimiyat respublika va mahalliy organlari bilan birgalikda korxonalar bankrotligining oldini olishga yoʻnaltirilgan chora-tadbirlar koʻrilishi tashkil etilishini taʼminlash;

ustav fondida davlat ulushi boʻlgan zarar koʻrib ishlayotgan, past rentabelli va iqtisodiy nochor korxonalarni va qishloq xoʻjaligi korxonalarini tarkibiy oʻzgartirish va moliyaviy sogʻlomlashtirish chora-tadbirlari ishlab chiqilishi va amalga oshirilishiga koʻmaklashish;

sud boshqaruvchilarini attestatsiyadan oʻtkazish va ularning yagona reyestrini yuritish;

sud boshqaruvchilari faoliyatini nazorat qilish.

8. Qoʻmita oʻziga yuklangan vazifalarni bajarish uchun quyidagi funksiyalarni amalga oshiradi:

a) toʻlovga qodir boʻlmagan, zarar koʻrib ishlayotgan va iqtisodiy nochor korxonalarni aniqlash maqsadida maʼlumotlar bazasi barpo etish asosida ustav fondida davlat ulushi boʻlgan korxonalarning moliyaviy ahvoli monitoringini olib boradi;

b) ijro etuvchi hokimiyat respublika va mahalliy organlari bilan birgalikda korxonalar bankrotligining oldini olishga qaratilgan chora-tadbirlar koʻrilishi tashkil etilishini taʼminlaydi;

v) bankrotlik toʻgʻrisidagi qonun hujjatlari qoʻllanilishidan kelib chiquvchi jarayonlarni amalga oshirish maqsadida normativ va metodik bazani barpo etish ishlarini tashkil etadi;

g) bankrotlik toʻgʻrisidagi qonun hujjatlari qoʻllanilishi sohasidagi Hukumat qarorlari va farmoyishlari, Komissiya qarorlari va normativ hujjatlar loyihalarini ishlab chiqadi va belgilangan tartibda Komissiyaga, Oʻzbekiston Respublikasi Vazirlar Mahkamasiga kiritadi;

d) Korxonalar sanatsiyasi jamgʻarmasi mablagʻlaridan maqsadli foydalanilishi va oʻz vaqtida qaytarilishi ustidan nazoratni taʼminlaydi;

a) ustav fondida davlat ulushi boʻlgan zarar koʻrib ishlayotgan, past rentabelli va iqtisodiy nochor korxonalarni hamda qishloq xoʻjaligi korxonalarini tarkibiy oʻzgartirish va moliyaviy sogʻlomlashtirish kompleks chora-tadbirlari ishlab chiqilishiga va amalga oshirilishiga koʻmaklashadi;

b) ustav fondida davlat ulushi boʻlgan korxonalarda sudgacha sanatsiyalash va bankrotlik tartib-qoidalari bajarilishi ustidan nazoratni tashkil etadi;

v) ustav fondida davlat ulushi boʻlgan korxonalarni sudgacha sanatsiyalash, sud sanatsiyasi va tashqi boshqaruv rejalarini kelishadi;

g) Oʻzbekiston Respublikasi Davlat mulki qoʻmitasi va uning hududiy boʻlinmalari bilan birgalikda ustav fondida davlat ulushi boʻlgan, bankrotlik belgilariga ega boʻlgan, toʻlovga qodir boʻlmagan korxonalarni davlat tasarrufidan chiqarish va xususiylashtirishda ishtirok etadi;

d) ustav fondida davlat ulushi boʻlgan, bankrotlik belgilariga ega boʻlgan korxonalarning iqtisodiy va moliyaviy ahvolini manfaatdor vazirliklar va idoralar, tijorat banklari bilan birgalikda oʻrganib chiqadi;

e) davlat mulkini boshqarishga vakil qilingan organlarning yoki davlat va xoʻjalik boshqaruvi organlarining takliflari asosida Komissiyaga bankrotlik tartib-qoidalari tashabbusi koʻrsatish toʻgʻrisida taklif kiritadi;

j) Korxonalar sanatsiyasi jamgʻarmasini belgilangan tartibda shakllantirishda qatnashadi va Komissiyaning qaroriga koʻra sudgacha sanatsiyalash va bankrotlik tartib-qoidalarini amalga oshirish uchun jamgʻarma mablagʻlarini tasarruf etadi;

z) ustav fondida davlat ulushi boʻlgan korxonalarga nisbatan bankrotlik tartib-qoidalarini qoʻllash va sudgacha sanatsiyalash bilan bogʻliq masalalar yuzasidan manfaatdor shaxslarning murojaatlari va takliflarini koʻrib chiqadi;

i) toʻlovga qodir boʻlmagan, zarar koʻrib ishlayotgan va iqtisodiy nochor qishloq xoʻjaligi kooperativlari (shirkat xoʻjaliklari) va jamoa xoʻjaliklarini fermer xoʻjaliklariga aylantirish toʻgʻrisidagi takliflarni ishlab chiqishda qatnashadi;

k) ustav fondida davlat ulushi boʻlgan, toʻlovga qodir boʻlmagan, zarar koʻrib ishlayotgan va iqtisodiy nochor korxonalarni sudgacha sanatsiyalash, ularga nisbatan bankrotlik tartib-qoidalarini qoʻllash yuzasidan Komissiyaga taklif kiritadi;

l) qishloq xoʻjaligi korxonalari bankrotligining oldini olish chora-tadbirlarini koʻrish toʻgʻrisida Komissiyaga taklif kiritadi;

m) ijtimoiy infratuzilma obyektlarini belgilangan tartibda mahalliy boshqaruv organlari balansiga berish va umumiy foydalaniladigan ishlab chiqarish infratuzilmasi obyektlarini xoʻjalik birlashmalarining funksional vazifasiga koʻra tegishli xoʻjalik birlashmalari korxonalari balansiga berish toʻgʻrisida Komissiyaga taklif kiritadi;

n) tarkibiy oʻzgartirilishi kerak boʻlgan iqtisodiy nochor, zarar koʻrib ishlayotgan va past rentabelli korxonalarning, shuningdek ularga nisbatan bankrotlik tartib-qoidalari qoʻllanilgan korxonalarning qurilishi tugallanmagan obyektlarini va asosiy fondlarini konservatsiya qilish toʻgʻrisida Komissiyaga taklif kiritadi;

a) sud boshqaruvchilarini tayyorlash tizimini tashkil etadi;

b) sud boshqaruvchilarini attestatsiyadan oʻtkazadi va sud boshqaruvchilarining yagona reyestrini yuritadi;

v) xoʻjalik sudi soʻroviga binoan sud boshqaruvchisi nomzodini taqdim etadi.

9. Qoʻmita oʻziga yuklangan vazifalar va funksiyalarni bevosita, shuningdek oʻz hududiy boshqarmalari orqali hal qiladi.

10. Qoʻmita oʻziga yuklangan vazifalar va funksiyalarni bajarish uchun quyidagi huquqlarga ega:

zarar koʻrib ishlayotgan va iqtisodiy nochor korxonalarni tarkibiy oʻzgartirish va moliyaviy sogʻlomlashtirish dasturlarini shakllantirishda qatnashish;

qonun hujjatlarida nazarda tutilgan tartibda davlat soliq xizmati organlaridan va davlat statistika organlaridan korxonalarning iqtisodiy qodirligi toʻgʻrisidagi maʼlumotlarni olish;

qonun hujjatlarida nazarda tutilgan tartibda moliyaviy ahvoli monitoringi olib borilayotgan korxonalar rahbarlaridan korxonalarning iqtisodiy nochorligi toʻgʻrisidagi maʼlumotlarni olish;

xoʻjalik yurituvchi subyektlar (kichik va xususiy korxonalardan tashqari) rahbarlariga yoki boshqa mansabdor shaxsga belgilangan tartibda korxonaning moliya-xoʻjalik faoliyati toʻgʻrisidagi materiallarni taqdim etmaganligi yoxud oʻz vaqtida taqdim etmaganligi uchun belgilangan tartibda jarimalar solish;

korxonalar tomonidan sudgacha sanatsiya boʻyicha chora-tadbirlarning amalga oshirilishi va ushbu maqsadlarga yoʻnaltiriladigan mablagʻlardan maqsadli foydalanilishi ustidan nazoratni amalga oshirish;

bankrotlik sohasida oʻz faoliyatini amalga oshiruvchi xorijiy mamlakatlar organlari bilan hamkorlik qilish toʻgʻrisida bitimlar tuzishda qatnashish;

ustav fondida davlat ulushi boʻlgan va (yoki) Oʻzbekiston Respublikasi oldida pul majburiyatlari boʻyicha qarzi boʻlgan korxonalarni bankrot qilish toʻgʻrisida ish qoʻzgʻatish yuzasidan xoʻjalik sudiga ariza bilan murojaat qilish;

bankrotlik toʻgʻrisidagi ishlarni koʻrib chiqish davomida tashqi boshqaruvni joriy qilish, tashqi boshqaruv muddatini uzaytirish yoki qisqartirish, shuningdek tashqi boshqaruvchini oʻz vakolatlarini ijro etishdan ozod qilish toʻgʻrisida xoʻjalik sudiga taqdimnoma kiritish;

ustav fondida davlat ulushi boʻlgan korxonalarning ishlamayotgan obyektlarini konservatsiya qilish masalasi boʻyicha xoʻjalik sudiga belgilangan tartibda murojaat qilish;

qonun hujjatlariga muvofiq sud boshqaruvchilari faoliyati ustidan nazoratni amalga oshirish, sud boshqaruvchisi faoliyatida qonun hujjatlarining muntazam ravishda yoki bir marta qoʻpol ravishda buzilishi aniqlangan taqdirda sud boshqaruvchisini vazifalarini bajarishdan ozod qilish toʻgʻrisida xoʻjalik sudiga ariza bilan murojaat qilish;

sud boshqaruvchilariga berilgan attestatlar amal qilishini belgilangan tartibda toʻxtatib turish va toʻxtatish.

Qoʻmita Oʻzbekiston Respublikasi qonun hujjatlariga muvofiq boshqa huquqlarga ham ega boʻlishi mumkin.

11. Qoʻmita oʻz vakolatlari doirasida vazirliklar, davlat qoʻmitalari, idoralar, joylardagi davlat hokimiyat organlari, korxonalar, muassasalar, tashkilotlar, mansabdor shaxslar va fuqarolar uchun bajarish majburiy boʻlgan normativ-huquqiy hujjatlarni qabul qilishga haqlidir.

Qoʻmita zarur hollarda boshqa vazirliklar, davlat qoʻmitalari va idoralar bilan birgalikda qoʻshma qarorlar va boshqa hujjatlar chiqarishga haqlidir.

12. Qoʻmita oʻziga yuklangan vazifalarning samarali bajarilishi uchun javob beradi.

13. Qoʻmitaga qonun hujjatlarida belgilangan tartibda lavozimga tayinlanadigan va lavozimdan ozod qilinadigan rais rahbarlik qiladi.

Raisning ikki nafar oʻrinbosari boʻladi.

Qoʻmita raisi lavozimiga koʻra Oʻzbekiston Respublikasi Iqtisodiyot vazirining oʻrinbosari hisoblanadi va maqomiga koʻra vazirning birinchi oʻrinbosariga, rais oʻrinbosarlari esa — vazir oʻrinbosarlariga tenglashtiriladi.

14. Qoʻmita raisi:

Qoʻmita faoliyatiga umumiy rahbarlikni amalga oshiradi hamda Qoʻmitaga yuklangan vazifalar va funksiyalarning bajarilishi uchun shaxsan javob beradi;

Qoʻmitaning tarkibiy va hududiy boshqarmalari toʻgʻrisidagi nizomlarni belgilangan tartibda tasdiqlaydi.

Qoʻmita markaziy apparati xodimlarini, Qoʻmitaning hududiy boshqarmalari rahbarlarini belgilangan tartibda lavozimga tayinlaydi va lavozimdan ozod qiladi.

Rais qonun hujjatlariga muvofiq boshqa vakolatlarni amalga oshiradi.

15. Qoʻmita xodimlariga Oʻzbekiston Respublikasi Iqtisodiyot vazirligi xodimlari uchun belgilangan mehnatga haq toʻlash hamda moddiy-maishiy va tibbiy xizmat koʻrsatish shart-sharoitlari tatbiq etiladi.

16. Qoʻmita Qoʻmitaning moddiy-texnika bazasini rivojlantirishga va Qoʻmita tizimi xodimlari mehnatini ragʻbatlantirishga Korxonalar sanatsiyasi jamgʻarmasiga tushadigan mablagʻlarning koʻpi bilan 15 foizidan foydalanish huquqiga ega.

17. Hududiy boshqarmalar oʻz faoliyatini Qoʻmita tomonidan tasdiqlanadigan nizomga muvofiq amalga oshiradilar.

18. Qoʻmitani qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “Oʻzbekiston Respublikasi Davlat mulki qoʻmitasi huzuridagi Iqtisodiy nochor korxonalar ishlari qoʻmitasi faoliyatini tashkil etish masalalari toʻgʻrisida” 1996-yil 28-dekabrdagi 465-son qarorining 1 va 3-bandlari hamda qarorga 2—4-ilovalar.

2. Vazirlar Mahkamasining “Korxonalarning bankrotligi toʻgʻrisidagi qonunchilikni amalga oshirishga doir qoʻshimcha chora-tadbirlar haqida” 1999-yil 26-iyuldagi 362-son qarori (Oʻzbekiston Respublikasi QT, 1999-y., 7-son, 42-modda) 7-bandining ikkinchi xatboshi va qarorga 1-ilova.

3. Vazirlar Mahkamasining “Amalga oshirilayotgan iqtisodiy nochor korxonalarni tarkibiy oʻzgartirish va moliyaviy sogʻlomlashtirish samaradorligini oshirish chora-tadbirlari toʻgʻrisida” 2003-yil 18-apreldagi 188-son qaroriga (Oʻzbekiston Respublikasi QT, 2003-y., 4-son, 31-modda) 2-ilova 1-bandining ikkinchi xatboshi.

4. Vazirlar Mahkamasining “Korxonalar bankrotligi va sanatsiyasi masalalari boʻyicha Hukumat komissiyasi toʻgʻrisidagi nizomni tasdiqlash haqida” 2003-yil 30-iyundagi 294-son qaroriga (Oʻzbekiston Respublikasi QT, 2003-y., 6-son, 52-modda) 2-ilovaning 2-bandi.

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” 2004-yil 19-yanvardagi 31-son qaroriga ilova 1-bandining “d” kichik bandi.