Butunjahon pochta konvensiyasi, yozma xat-xabarlar Reglamenti, Oʻzbekiston Respublikasi “Pochta aloqasi toʻgʻrisida”gi Qonuni, Oʻzbekiston Respublikasi Vazirlar Mahkamasining 2004-yil 7-maydagi “Oʻzbekiston aloqa va axborotlashtirish agentligi faoliyatini takomillashtirish chora-tadbirlari toʻgʻrisida”gi 215-son qarori bilan tasdiqlangan “Oʻzbekiston aloqa va axborotlashtirish agentligi toʻgʻrisidagi nizom”ga va 2004-yil 19-iyuldagi “Pochta aloqasi sohasidagi faoliyatni takomillashtirish toʻgʻrisida”gi 339-son qaroriga muvofiq, shuningdek, “Oʻzbekiston Respublikasi pochta toʻlovining davlat belgilari va maxsus xotira tamgʻalari toʻgʻrisidagi nizom”ni amalga kiritish, shuningdek, pochta markalarining mavzuga oid rejalari nominali, adadi, markalangan pochta konvertlari va kartochkalarini jumladan ularni original markalar bilan ishlab chiqarishni, muomalaga kiritish va muomaladan chiqarish, pochta markalariga buyurtma berish, tarqatish va sotish, maxsus xotira tamgʻalarini qoʻllash va muomalaga kiritishni shakllantirishning umumiy prinsiplarini aniqlash maqsadida, buyuraman:

1. “Oʻzbekiston Respublikasi pochta toʻlovining davlat belgilari va maxsus xotira tamgʻalari toʻgʻrisidagi nizom” ilovaga* muvofiq tasdiqlansin.

2. Agentlikning Pochta texnologiyalari va xizmatlari boʻlimi (Bajanova) Agentlikda tasdiqlangan “Oʻzbekiston Respublikasi pochta toʻlovining davlat belgilari va maxsus xotira tamgʻalari toʻgʻrisidagi nizom”ni oʻrnatilgan tartibda Oʻzbekiston Respublikasi Adliya vazirligida davlat roʻyxatidan oʻtkazilishini taʼminlasin.

3. Mazkur Nizom Oʻzbekiston Respublikasi Adliya vazirligida davlat roʻyxatidan oʻtkazilgan vaqtdan oʻn kun oʻtgandan keyin amalga kiritilsin.

4. Mazkur Nizom amalga kiritilishi bilan Oʻzbekiston Respublikasi Aloqa vazirligining 1995-yil 27-dekabrdagi 292-son buyrugʻi bilan tasdiqlangan “Oʻzbekiston Respublikasi pochta toʻlovining davlat belgilari, radiomarkalar va maxsus pochta tamgʻalari toʻgʻrisidagi nizom” oʻz kuchini yoʻqotgan deb hisoblansin (1995-yil 22-dekabr, roʻyxat raqami 202).

5. Ushbu buyruqning ijrosini nazorat qilish Agentlik Bosh direktorining oʻrinbosari A.A. Xodjayev zimmasiga yuklansin.