Oʻzbekiston Respublikasi Prezidentining

Farmoni

Qishloq xoʻjaligi ishlab chiqaruvchilarining yerdan foydalanishdagi mustaqilligini taʼminlashga qaratilgan navbatdagi chora-tadbirlar toʻgʻrisida

Qishloq xoʻjaligiga moʻljallangan yer uchastkalarini ajratishning barcha uchun teng va bozor tamoyillariga asoslangan tartibini keng joriy qilish, ijaraga oluvchilarning ekinlarni joylashtirishdagi mustaqilligini taʼminlash va yuqori qoʻshilgan qiymatga ega ekinlar yetishtirishga qaratilgan islohotlar koʻlamini yanada kengaytirish maqsadida qaror qilaman:

I. Maqsadlar

1. Quyidagilar ushbu Farmonni qabul qilishdan koʻzlangan asosiy maqsadlar etib belgilansin:

(a) Oʻzbekiston Respublikasi Prezidentining 2025-yil 3-fevraldagi PF-18-son Farmoniga muvofiq qishloq xoʻjaligiga moʻljallangan yer uchastkalarini ijaraga berish boʻyicha tajriba-sinov tariqasida boshlangan yangi tizimning (keyingi oʻrinlarda — yangi tizim) ijobiy natijalaridan kelib chiqib, ushbu amaliyotni respublikaning barcha hududlarida tatbiq etish orqali yaxlit tizimni joriy qilish;

(b) yerdan foydalanish ixtisosligi oldindan belgilanib, elektron onlayn auksion savdolariga chiqarilgan va uzoq davrdan beri sotilmay turgan 117,6 ming gektar yer uchastkalarini yangi tizim asosida qaytadan auksion savdolariga chiqarish;

(v) har bir hududda kamida 5 tadan yuqori qoʻshilgan qiymatga ega hamda eksportbop qishloq xoʻjaligi mahsulotlarini yetishtirishga asoslangan sanoat usulidagi plantatsiyalar tashkil etishga qaratilgan loyihalarni qoʻllab-quvvatlash.

II. Qishloq xoʻjaligiga moʻljallangan yer uchastkalarini yangi tizim asosida ijaraga berishni jadallashtirish

2. Shunday tartib oʻrnatilsinki, unga muvofiq:

(a) 2026-yil 1-maydan boshlab respublikaning barcha hududlaridagi qishloq xoʻjaligiga moʻljallangan yer uchastkalari Oʻzbekiston Respublikasi Prezidentining 2025-yil 3-fevraldagi “Qishloq xoʻjaligi ekin maydonlari unumdorligini oshirish, tarmoqqa investitsiyalar jalb qilish uchun qulay shart-sharoit yaratish boʻyicha navbatdagi chora-tadbirlar toʻgʻrisida”gi PF-18-son Farmonida belgilangan tartibda realizatsiya qilinadi, bunda:

(i) Qoraqalpogʻiston Respublikasi Vazirlar Kengashi Raisi va viloyatlar hokimlarining taklifiga asosan 50 gektardan — 500 gektargacha oʻlchamdagi yer uchastkalarini faqat sanoat usulidagi plantatsiyalar tashkil qilish va chorvachilik uchun yer uchastkasidan ruxsat etilgan foydalanish turini belgilagan holda auksion savdolariga chiqarishga yoʻl qoʻyiladi;

(ii) auksion savdolariga chiqariladigan yer uchastkalarining boshlangʻich narxi yer uchastkasi normativ qiymatining 50 foizi miqdorida belgilanadi, har bir takroriy savdoda sotilmagan lot narxi 10 foizdan bosqichma-bosqich boshlangʻich narxning 10 foizi miqdoriga (yer uchastkasini auksion savdolariga chiqarish xarajatlaridan kam boʻlmagan miqdoriga) qadar pasaytiriladi, bundan ushbu bandning “v” kichik bandida belgilangan hollar mustasno;

(iii) birinchi auksion savdosi tegishli yer uchastkasi haqidagi xabarnoma eʼlon qilingan kundan boshlab oʻn besh kun muddatda va takroriy savdolar bir kun muddatda oʻtkaziladi;

(b) yerdan foydalanish ixtisosligi oldindan belgilanib auksion savdolariga chiqarilgan va sotilmay turgan yer uchastkalari ushbu bandning “a” kichik bandida nazarda tutilgan shartlar asosida qaytadan auksion savdolariga chiqariladi;

(v) yaylovlar, pichanzorlar va lalmi yer maydonlari auksion savdolariga chiqarilganda lotning boshlangʻich narxi yer uchastkasi normativ qiymatining 1 foizi hamda yer uchastkasini auksionga chiqarish, yerlarni foydalanishga kiritish boʻyicha yer tuzish loyihasi va texnik-iqtisodiy asosni ishlab chiqish xarajatlari hamda ijara huquqini davlat roʻyxatidan oʻtkazish uchun toʻlov miqdoriga teng summada belgilanadi;

(g) yer uchastkalarini paxtachilik va gʻallachilik ixtisosligi boʻyicha ijaraga olgan subyektlar jami yer uchastkasining 50 foiz qismiga nisbatan ijara huquqidan ixtiyoriy ravishda voz kechganda yer uchastkasining oʻzida qoladigan qismi uchun yangi tizimda belgilangan huquqlar, majburiyatlar va yangidan 49 yilga ijara huquqiga ega boʻladi va bunda subyektlarning:

(i) qishloq xoʻjaligi ekinlarini yetishtirish uchun tijorat banklaridan olingan kredit va soliqlardan qarzdorligi boʻlmasligi;

(ii) yer uchastkalariga boʻlgan ijara huquqlari tijorat banklariga garov taʼminoti sifatida qoʻyilmagan boʻlishi talabi qoʻyiladi;

(d) suv taʼminoti ogʻir va foydalanishdan chiqqan yer uchastkalari ularning suv taʼminoti yaxshilanib, tuman (shahar) hokimliklari va boshqa subyektlar tomonidan yangidan oʻzlashtirilgan va qayta foydalanishga kiritilganidan soʻng yoki yangidan oʻzlashtirish va qayta foydalanishga kiritish sharti bilan auksion savdolariga chiqarish amaliyoti joriy etiladi;

(j) tuman (shahar) hokimliklari tasarrufida boʻsh turgan qishloq xoʻjaligiga moʻljallangan yerlar sifatida hisobga olingan sanadan boshlab tuman (shahar) hokimliklari tomonidan oʻn kun muddatda auksion savdolariga chiqarilmagan taqdirda, ushbu yerlar Qishloq xoʻjaligi vazirligi huzuridagi “Oʻzdaverloyiha” davlat ilmiy loyihalash instituti tomonidan avtomatik tarzda auksion savdolariga chiqariladi, bundan yer fondi toifasini oʻzgartirish, yirik investitsiya loyihasini amalga oshirish uchun eng yaxshi taklifni tanlab olish rejalashtirilganligi sababli yer maydonlari darhol realizatsiya qilinmasligi haqida ushbu yer uchastkasini hisobga olish toʻgʻrisidagi qarorda asoslantirilgan sabablar koʻrsatilgan hollar mustasno.

3. Qoraqalpogʻiston Respublikasi Vazirlar Kengashi va viloyatlar hokimliklari Qishloq xoʻjaligi vazirligi hamda Davlat aktivlarini boshqarish agentligi bilan birgalikda:

(a) olti oy muddatda 1-ilovaga muvofiq tuman (shahar) hokimliklari tasarrufida boʻsh turgan hamda auksion savdosi davom etayotgan va sugʻorish imkoniyati mavjud boʻlgan 100 ming gektar qishloq xoʻjaligiga moʻljallangan yer uchastkalarini qaytadan bosqichma-bosqich yangi tizim asosida auksion savdolariga chiqarsin;

(b) joriy yil 15-mayga qadar Qoraqalpogʻiston Respublikasi Vazirlar Kengashi va viloyatlar hokimliklari huzuridagi “Ijaraga berilgan qishloq xoʻjaligi yerlariga xizmat koʻrsatish direksiyasi” masʼuliyati cheklangan jamiyatlari (keyingi oʻrinlarda — Direksiya) tomonidan yer uchastkalarining suv taʼminotini yaxshilash, yangidan oʻzlashtirish va qayta foydalanishga kiritishga qaratilgan dastur (keyingi oʻrinlarda — Dastur) ishlab chiqilishini taʼminlasin. Bunda:

(i) Dastur Qoraqalpogʻiston Respublikasi Joʻqorgʻi Kengesi va xalq deputatlari viloyatlar kengashlarining qarorlari bilan tasdiqlanadi;

(ii) Dastur doirasida amalga oshiriladigan tadbirlar qishloq xoʻjaligiga moʻljallangan yer uchastkalarini auksion savdolari orqali sotishdan va investorlarga ikkilamchi ijaraga berishdan hamda nobudgarchilik oʻrnini qoplash boʻyicha kompensatsiya toʻlovlaridan mahalliy budjetlarga yoʻnaltiriladigan mablagʻlar hisobidan moliyalashtiriladi;

(iii) tuman (shahar) hokimliklari tasarrufidagi boʻsh turgan holda suv taʼminoti yaxshilangan, yangidan oʻzlashtirilgan va qayta foydalanishga kiritilgan yer uchastkalari yangi tizim asosida auksion savdolariga chiqariladi;

(v) 2026-yil 1-dekabrga qadar qishloq xoʻjaligiga moʻljallangan yer egalariga va foydalanuvchilarining oʻz yer uchastkalariga boʻlgan egalik qilish va foydalanish huquqlarini xalq deputatlari tuman (shahar) kengashlari qarori asosida ijara huquqiga oʻzgartirish boʻyicha ishlarni toʻliq yakunlasin.

4. Iqtisodiyot va moliya vazirligi ikki oy muddatda Oʻzbekiston Respublikasining respublika budjetidan Qoraqalpogʻiston Respublikasi respublika budjeti va viloyatlar mahalliy budjetlariga qishloq xoʻjaligiga moʻljallangan yer uchastkalarini yangidan oʻzlashtirish, qayta foydalanishga kiritish va suv taʼminotini yaxshilash tadbirlarini moliyalashtirish uchun budjet ssudalarini ajratish boʻyicha takliflarni ishlab chiqib, Vazirlar Mahkamasiga kiritsin.

III. Qishloq xoʻjaligi sohasidagi yirik investitsiya loyihalariga yer uchastkalarini ajratish jarayonlarini soddalashtirish

5. Buxoro, Navoiy, Samarqand, Surxondaryo va Xorazm viloyatlari hokimliklari bir hafta muddatda hokimlik huzurida “Ijaraga berilgan qishloq xoʻjaligi yerlariga xizmat koʻrsatish direksiyasi” masʼuliyati cheklangan jamiyatlari faoliyatini yoʻlga qoʻysin.

6. Belgilansinki, qiymati kamida 10 million AQSH dollari ekvivalentida (Qoraqalpogʻiston Respublikasida Oʻzbekiston Respublikasi Prezidentining hujjatlarida belgilangan miqdorda) eng yaxshi taklifni tanlab olish yoʻli bilan aniqlanadigan yirik investitsiya loyihasini amalga oshirish uchun qishloq xoʻjaligiga moʻljallangan yer uchastkalari:

(a) mahalliy investorlarga 49 yil muddatga va Direksiyaga 25 yil muddatga Vazirlar Mahkamasi tomonidan (Qoraqalpogʻiston Respublikasida 2027-yil 31-dekabrga qadar Qoraqalpogʻiston Respublikasi Vazirlar Kengashi tomonidan ham) belgilangan tartibda toʻgʻridan-toʻgʻri ijaraga beriladi;

(b) chet el fuqarolari, yuridik shaxslar, fuqaroligi boʻlmagan shaxslar va chet el investitsiyalari ishtirokidagi korxonalarga (keyingi oʻrinlarda — xorijiy investor) faqat yangidan oʻzlashtirish va qayta foydalanishga kiritish talabi bilan boʻz, lalmi va yaylov yerlari Direksiya orqali quyidagi shartlarda ikkilamchi ijaraga beriladi:

(i) Direksiya eng yaxshi takliflarni tanlab olish yoʻli bilan aniqlanadigan loyihalar uchun zarur boʻlgan yer uchastkalarini xorijiy investorga har yili shartnoma muddatini uzaytirgan holda ikkilamchi ijaraga berib boradi;

(ii) xorijiy investor yer uchastkasi boʻyicha har yilgi yer soligʻi summasining ikki baravaridan kam boʻlmagan miqdordagi ikkilamchi ijara toʻlovlari Direksiyaga hamda ijaraga olish huquqining baholangan qiymatidagi mablagʻlar tuman (shahar)lar mahalliy budjetiga toʻlanishini taʼminlaydi;

(iii) yer uchastkasi boʻyicha har yilgi yer soligʻi summasining ikki baravaridan kam boʻlmagan miqdordagi ikkilamchi ijara toʻlovlari miqdori, uni undirish grafigi, tartibi va ijarachiga yuklanadigan majburiyatlar va ularni bajarish muddatlari Direksiya taklifiga asosan Qoraqalpogʻiston Respublikasi Joʻqorgʻi Kengesi, xalq deputatlari viloyatlar kengashlari tomonidan belgilanadi va ushbu toʻlovlar undirish shartlariga koʻra soliqqa tenglashtiriladi;

(iv) “Oʻzbekkosmos” agentligi tomonidan ikkilamchi ijaraga berilgan yer uchastkalarini yangidan oʻzlashtirish, qayta foydalanishga kiritish va ulardan foydalanish holati yuzasidan yiliga ikki marta har kalendar yil yakuniga qadar kosmik monitoring oʻtkaziladi;

(v) Direksiyaga ijaraga berilgan yer uchastkalari xorijiy va mahalliy investorlarga ikkilamchi ijaraga berilishi yoki berilmasligidan qatʼi nazar, yer uchastkalari boʻyicha hisoblangan yer soligʻi toʻligʻicha Direksiya tomonidan toʻlanadi.

7. Xorijiy investor tomonidan toʻlanadigan mablagʻlar quyidagi maqsadlarga yoʻnaltirilishi belgilab qoʻyilsin:

(a) ikkilamchi ijara toʻlovlari — Direksiyaga ijaraga berilgan yer uchastkalari boʻyicha yer soligʻi (ijara toʻlovi) xarajatlariga, qolgan qismi — Direksiyani saqlash va boshqa xarajatlarga;

(b) xorijiy investor tomonidan yer uchastkasini ijaraga olish huquqining baholangan qiymatidagi tuman (shahar)lar mahalliy budjetiga toʻlanadigan mablagʻlar — faqat mazkur tuman (shahar)lardagi qishloq xoʻjaligi infratuzilmasi va sugʻorish tizimini yaxshilash, yerlarni yangidan oʻzlashtirish, qayta foydalanishga kiritish va kosmik monitoring oʻtkazish tadbirlarini moliyalashtirish xarajatlariga.

8. Qoraqalpogʻiston Respublikasi Vazirlar Kengashi va viloyatlar hokimliklariga:

(a) muassis sifatida hududlardagi ish hajmidan kelib chiqib, Direksiyaning tuzilmasi va shtatlarini mustaqil tasdiqlash va ularga oʻzgartirishlar kiritish vakolati berilsin;

(b) Direksiya xodimlari mehnatiga haq toʻlash uchun mablagʻlar yetishmagan taqdirda, hududlar mahalliy budjetining orttirib bajarilgan qismi hisobidan mablagʻ ajratishga ruxsat etilsin.

IV. Yer uchastkalariga boʻlgan ijara huquqini sotib olish va nobudgarchilik boʻyicha toʻlovlarni undirish

9. Soliq qoʻmitasi Qishloq xoʻjaligi vazirligi, tegishli vazirlik va idoralar bilan birgalikda avvalgi yillarda boʻlib-boʻlib toʻlash asosida dehqon xoʻjaligi yuritish va yuridik shaxs tashkil etish uchun ijaraga berilgan barcha turdagi yer uchastkalariga boʻlgan ijara huquqini sotib olish boʻyicha auksion savdolarida shakllangan qiymat hamda eng yaxshi takliflarni tanlab olish yoʻli bilan aniqlangan loyihalarga toʻgʻridan-toʻgʻri ijaraga berilgan yer uchastkalarining baholangan (qoʻllangan koeffitsiyentlarni inobatga olgan holda) qiymatdagi mablagʻlar tuman (shahar)lar mahalliy budjetiga auksion gʻoliblari va ijarachilardan undirilishini taʼminlasin.

10. 2022-yil 1-yanvardan 2023-yil 15-aprelga qadar ochiq elektron tanlovlar orqali 2-ilovaga muvofiq 1 456 ta yuridik shaxsga ijaraga berilgan 80 816 gektar qishloq xoʻjaligiga moʻljallangan yer uchastkalari boʻyicha ijara muddatiga teng taqsimlanadigan qoʻshimcha toʻlovlar yoki ijaraga olish huquqini boʻlib-boʻlib toʻlash boʻyicha toʻlovlardan muddati oʻtgan qarzdorlik summasi yer uchastkasi normativ qiymatining toʻrt baravaridan ortiq boʻlsa, jami toʻlanadigan toʻlovni biryoʻla 20 foiz chegirma bilan yoki uch yil davomida foizsiz boʻlib toʻlash sharti bilan ushbu summani yer uchastkasi normativ qiymatining toʻrt baravariga teng miqdorda toʻlash imkoniyati berilsin. Bunda:

(a) Qishloq xoʻjaligi vazirligi Davlat aktivlarini boshqarish agentligi va Kadastr agentligi bilan birgalikda bir hafta muddatda mazkur Farmonga 2-ilovada nazarda tutilgan yer uchastkalari ijarachilarining nomma-nom roʻyxati hamda yer uchastkalari tuman (shahar) hokimligi tasarrufiga topshirilganligi holati va ular tomonidan jami toʻlanadigan toʻlovni yer uchastkasi normativ qiymatining toʻrt baravariga teng miqdorda belgilab, Soliq qoʻmitasiga taqdim etsin;

(b) Soliq qoʻmitasi mazkur Farmon qabul qilingunga qadar ochiq elektron tanlov gʻoliblari tomonidan amalga oshirilgan qoʻshimcha toʻlovlar hamda yer uchastkalari tuman (shahar) hokimligi tasarrufiga topshirilganlik holatini tahlil qilgan holda bir martalik toʻlov grafiklarini shakllantirsin va ularni undirish choralarini koʻrsin. Bunda tuman (shahar) hokimligi tasarrufiga topshirilgan yerdan oʻtgan davrda foydalanganlik uchun toʻlovlar ham yer uchastkasi normativ qiymatining toʻrt baravariga teng miqdorda qayta hisoblanib, faqat foydalanilgan davr uchun undirilishi belgilansin.

11. Belgilansinki, qishloq xoʻjaligiga moʻljallangan va oʻrmon fondi yerlarining yer egalari, yerdan foydalanuvchilar va ijarachilar, korxonalar, muassasalar va tashkilotlar faoliyatining taʼsiri oqibatida sifati yomonlashuvi tufayli yuzaga keladigan qishloq xoʻjaligi va oʻrmon xoʻjaligi ishlab chiqarishi nobudgarchiliklarining oʻrnini qoplash boʻyicha kompensatsiya toʻlovlari (keyingi oʻrinlarda — nobudgarchilik toʻlovlari)dan Oʻzbekiston Respublikasining respublika budjetiga tushadigan mablagʻlar tegishincha Qoraqalpogʻiston Respublikasi respublika budjeti, viloyatlar va Toshkent shahar mahalliy budjetlariga yoʻnaltiriladi. Bunda:

(a) Qoraqalpogʻiston Respublikasi respublika budjeti, viloyatlar va Toshkent shahar mahalliy budjetlariga nobudgarchilik toʻlovlarini undirishdan tushadigan mablagʻlar ularning qoʻshimcha manbalari hisoblanadi;

(b) nobudgarchilik toʻlovlarini undirishdan tushadigan mablagʻlar qatʼiy ravishda Direksiya taklifiga asosan Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar kengashlarining qarori bilan tasdiqlanadigan quyidagi tadbirlarni moliyalashtirish uchun yoʻnaltiriladi:

(i) yerlarni yangidan oʻzlashtirish, qayta foydalanishga kiritish va sugʻoriladigan yerlarni kompleks rekonstruksiya qilish;

(ii) kollektor-drenaj tarmoqlarini qurish va qayta qurish, sugʻoriladigan yerlarni kapital rejalashtirish hamda ularning suv bilan taʼminlanish darajasini oshirish;

(v) Qishloq xoʻjaligi vazirligi va Soliq qoʻmitasi yuzaga kelgan nobudgarchilik toʻlovlarini yer egalari, yerdan foydalanuvchilar, ijarachilar, korxonalar, muassasalar va tashkilotlardan undirishga masʼul hisoblanadi. Bunda nobudgarchilik toʻlovlarini hisoblash va undirish boʻyicha yuzaga keladigan nizolarni oʻrganib chiqish, hal etish bevosita Qishloq xoʻjaligi vazirligi va uning hududiy boʻlinmalari tomonidan amalga oshiriladi;

(g) mazkur Farmonning 9, 10 va 11-bandlarida nazarda tutilgan toʻlovlar undirish shartlariga koʻra soliqlarga tenglashtiriladi;

(d) Direksiya har chorak yakunlari boʻyicha nobudgarchilik toʻlovlarining mahalliy budjetga kelib tushishi va maqsadli sarflanishi yuzasidan tegishincha Qoraqalpogʻiston Respublikasi Joʻqorgʻi Kengesi, xalq deputatlari viloyatlar kengashlari oldida hisobot beradi.

V. Sanoatlashgan plantatsiyalar tashkil etishni qoʻllab-quvvatlash

12. Belgilansinki, yangi tizim asosida ijaraga berilgan yer uchastkalarida sanoat usulida tashkil etiladigan intensiv bogʻ, tokzor, anorzor, yengil konstruksiyali issiqxona, rezavor mevalar, gulchilik, koʻchatchilik va sabzavotchilik plantatsiyalari (keyingi oʻrinlarda — sanoatlashgan plantatsiyalar) uchun quyidagi qoʻllab-quvvatlash choralari joriy etiladi:

(a) Direksiya tomonidan tanlanadigan sanoatlashgan plantatsiyalar tashkil etiladigan yer uchastkalari sugʻorish tizimlarini yaxshilash, elektr energiyasi taʼminoti obyektlarini qurish va rekonstruksiya qilish xarajatlarining 50 foizi, biroq 1,5 mlrd soʻmdan oshmagan qismi Direksiya mablagʻlari hamda yer uchastkalarini ijaraga berishdan va nobudgarchilik toʻlovlaridan mahalliy budjetlarga tushadigan mablagʻlar hisobidan moliyalashtiriladi, bunda Direksiya buyurtmachi vazifasini bajarishi mumkin;

(b) tashabbuskorlarga sanoatlashgan plantatsiyalar tashkil etish loyihalarining texnik-iqtisodiy asoslariga muvofiq Agrosanoatni rivojlantirish va qoʻllab-quvvatlash davlat maqsadli jamgʻarmasi mablagʻlari hisobidan tijorat banklari tomonidan 7 yil muddatga 3 yillik imtiyozli davr bilan Markaziy bank asosiy stavkasida kredit mablagʻlari ajratiladi;

(v) kichik va oʻrta biznes subyektlarining barqarorlik reytingi hamda hudud toifasidan qatʼi nazar sanoatlashgan plantatsiyalar tashkil etish loyihasi doirasida muzlatkichli omborxona, shuningdek, “shok” usulida muzlatkichli omborxona asbob-uskunalarini sotib olish va qurish uchun tijorat banklari tomonidan ajratiladigan kreditlarning kredit miqdoridan qatʼi nazar, 5 milliard soʻm ekvivalentidan oshmagan qismi boʻyicha:

(i) Markaziy bank asosiy stavkasining ikki baravaridan ortiq boʻlmagan stavkada milliy valyutada ajratiladigan kreditlar boʻyicha asosiy stavkadan yuqori qismi, biroq 8 foiz punktdan oshmagan miqdorda;

(ii) xorijiy valyutadagi kreditlar foiz stavkasining 8 foizdan yuqori qismi, biroq 4 foiz punktdan oshmagan miqdorda uch yilgacha muddatga kompensatsiya taqdim etiladi. Bunda kompensatsiya “2+1” tamoyili asosida, avval kreditning dastlabki ikki yiliga taqdim etiladi, keyingi bir yil uchun mahsulot (xizmat)larni realizatsiya qilishdan tushgan yillik tushum avvalgi yilga nisbatan 15 foiz va undan ortiq miqdorda oshgan taqdirda, keyingi yil davomida har oyda Kredit foiz xarajatlarini kompensatsiya qilish jamgʻarmasi hisobidan toʻlab beriladi;

(g) barcha turdagi qishloq xoʻjaligi mahsulotlari ishlab chiqaruvchilarga meva-sabzavotlarni zamonaviy qadoqlab shartnoma asosida realizatsiya qilishda qadoqlash xarajatlarining 50 foizgacha qismi Savdoga koʻmaklashish jamgʻarmasi mablagʻlari hisobidan kompensatsiya qilinadi;

(d) Agrar sohada toʻlovlar agentligi tomonidan:

(i) “in-vitro” usulida yetishtirilgan mevalar turi boʻyicha sertifikatlangan koʻchat ekib, sanoatlashgan plantatsiyalar tashkil etilganda ushbu koʻchatlarni sotib olish xarajatlarining 50 foizi qoplab beriladi;

(ii) mevalar turi boʻyicha talab etiladigan shpalerlar uchun tadbirkorlik subyektlariga har bir shpalerga 25 ming soʻmdan 70 ming soʻmgacha subsidiya mablagʻlari ajratiladi;

(j) sugʻoriladigan yer uchastkalarida sanoatlashgan plantatsiyalarni barpo etishda Qishloq xoʻjaligi vazirligining tegishli xulosasini olish talab etilmaydi.

13. Qoraqalpogʻiston Respublikasi Vazirlar Kengashi va viloyatlar hokimliklari Qishloq xoʻjaligi vazirligi bilan birgalikda 2026-yil 1-oktabrga qadar yangi tizim asosida ijaraga berilgan yer uchastkalarida kamida 5 tadan namunaviy sanoatlashgan plantatsiyalar tashkil etish choralarini koʻrsin.

VI. Yer munosabatlarida milliy manfaatlarni himoya qilish

14. Belgilansinki, 2026-yil 1-maydan boshlab:

(a) qishloq xoʻjaligiga moʻljallangan yer uchastkalari chet ellik investorlar, shu jumladan, chet el investitsiyalari ishtirokidagi korxonalar, chet ellik yuridik va jismoniy shaxslarga toʻgʻridan-toʻgʻri ijaraga berilmaydi;

(b) chet el investitsiyalari ishtirokidagi korxonalar, chet ellik yuridik va jismoniy shaxslarning qishloq xoʻjaligiga moʻljallangan yer uchastkalarini ijaraga olish boʻyicha auksion savdolarida ishtirok etishi va qayta ijaraga olishiga yoʻl qoʻyilmaydi;

(v) tasarrufida qishloq xoʻjaligiga moʻljallangan yer uchastkalari mavjud boʻlgan yerdan foydalanuvchilar, ijarachilar va yuridik shaxslarning ulushdorlari tomonidan ustav fondidagi ulushlarni chet ellik yuridik va jismoniy shaxslarga toʻgʻridan-toʻgʻri yoki bilvosita begonalashtirishga ruxsat berilmaydi;

(g) alohida qimmatga ega unumdor sugʻoriladigan yerlarni qishloq xoʻjaligiga moʻljallangan yerlar toifasidan yer fondining boshqa toifasiga oʻtkazish boʻyicha takliflar kiritish qatʼiy man etiladi, bundan davlat ijtimoiy muassasalari, mudofaa ehtiyojlari, Davlat chegarasini jihozlash, aeroport, avtomobil va temir yoʻllar, magistral quvurlar, irrigatsiya va energetika tarmoqlari hamda ularga xizmat koʻrsatuvchi obyektlarni qurish uchun tanlangan yer uchastkalari mustasno.

15. Vazirlar Mahkamasi bir oy muddatda mazkur Farmonda belgilangan tartiblardan kelib chiqib, chet ellik investorlar, shu jumladan, chet el investitsiyalari ishtirokidagi korxonalar, chet ellik yuridik va jismoniy shaxslar, fuqaroligi boʻlmagan shaxslarga yer uchastkalarini ijaraga berish tizimini takomillashtirishni nazarda tutuvchi qonun loyihasini Oʻzbekiston Respublikasi Oliy Majlisiga kiritsin.

VII. Suv resurslaridan foydalanishning iqtisodiy samaradorligini oshirish

16. Quyidagilar:

(a) Qishloq xoʻjaligi vazirligi Suv xoʻjaligi vazirligi, Ekologiya va iqlim oʻzgarishi milliy qoʻmitasi bilan birgalikda 2026-yil 1-oktabrga qadar nufuzli xorijiy va mahalliy ekspertlarni jalb qilgan holda Oʻzbekistonda iqlimga asoslangan qishloq xoʻjaligiga oʻtish konsepsiyasini ishlab chiqib, Vazirlar Mahkamasiga kiritsin;

(b) Ekologiya va iqlim oʻzgarishi milliy qoʻmitasi Suv xoʻjaligi vazirligi bilan birgalikda 2027-yil 1-yanvarga qadar Germaniyaning “Green Central Asia” loyihasi doirasida ishlab chiqilgan “Modsnow” tizimi orqali manbadagi (muzliklar, daryo, soy va boshqa) mavjud suv zaxiralarini real vaqt rejimida kuzatib borishni yoʻlga qoʻysin va ushbu tadbirlarni moliyalashtirish uchun xorijiy grant mablagʻlarini jalb etish va boshqa manbalar hisobidan moliyalashtirish choralarini koʻrsin;

(v) Milliy statistika qoʻmitasi Qishloq xoʻjaligi vazirligi hamda Iqtisodiyot va moliya vazirligi bilan birgalikda 2027-yil 1-martga qadar 1 metr kub suv sarfidan qishloq xoʻjaligida yaratiladigan iqtisodiy qiymatni (Water productivity) hisoblash metodologiyasini ishlab chiqib, amaliyotga joriy qilsin.

17. Belgilansinki:

(a) 2027-yildan boshlab sholi yetishtirishda anʼanaviy (sepma) usuldan toʻliq voz kechib, sholini faqat lazerli tekislangan maydonlarga koʻchat usulida hamda zamonaviy don ekish seyalkalari orqali ekish tartibi joriy etiladi;

(b) yer uchastkalarini yangidan oʻzlashtirish va qayta foydalanishga kiritishga ushbu tadbirlar uchun zarur boʻlgan suv hajmi shu hududdagi mavjud suv resurslari balansiga salbiy taʼsir koʻrsatmasligi toʻgʻrisida Suv xoʻjaligi vazirligining ijobiy xulosasi boʻlgan taqdirda ruxsat beriladi;

(v) quyidagi hollarda suv isteʼmolchilariga suv resurslaridan foydalanganlik uchun soliqni 2 baravar oshirilgan stavkada hisoblash tartibi joriy etiladi:

(i) 2027-yildan boshlab sholi yetishtirishda anʼanaviy (sepma) usulda ekish holatlari aniqlanganda;

(ii) 2027-yildan boshlab sholi yetishtiriladigan va baliqchilik xoʻjaligi tashkil qilingan yer maydonlari hamda 2030-yildan boshlab qolgan barcha yoʻnalishlarda faoliyat koʻrsatuvchi yuridik shaxslarning qishloq xoʻjaligiga moʻljallangan yer maydonlarida sugʻorish suvini hisobga olish tizimi, xususan “aqlli” suv oʻlchash va hisoblash vositalari bilan jihozlanmagan hamda suv tejovchi texnologiyalar joriy etilmagan holatlar aniqlanganda.

VIII. Farmon ijrosini tashkil etish, taʼminlash va nazorat

18. Qishloq xoʻjaligi vazirligi Iqtisodiyot va moliya vazirligi, “Oʻzbekkosmos” agentligi bilan birgalikda 2026-yil 1-oktabrga qadar:

(a) ilgʻor xorijiy davlatlar tajribasidan kelib chiqib, qishloq xoʻjaligi yer uchastkalaridan foydalanish samaradorligini (KPI) baholash tartibini ishlab chiqib, Vazirlar Mahkamasiga kiritsin;

(b) Xitoy, Koreya Respublikasi, Germaniya va Ispaniya tajribasi asosida tajriba-sinov tariqasida Fargʻona va Bulungʻur tumanlaridagi qishloq xoʻjaligi yer maydonlarida har bir kontur boʻyicha tuproq tarkibi, joylashuv relyefi, suv bilan taʼminlanganlik darajasi, soʻnggi oʻn yillikdagi meteorologik va agrotexnik koʻrsatkichlarni tahlil qilib, eng maqbul ekin turlarini joylashtirish boʻyicha raqamli agroxarita ishlab chiqsin. Bunda raqamli agroxaritani ishlab chiqish bilan bogʻliq xarajatlar qishloq xoʻjaligiga moʻljallangan yer uchastkalariga boʻlgan ijara huquqini auksion savdolari orqali sotishdan tuman (shahar) budjetiga tushgan mablagʻlar hisobidan xalq deputatlari tuman (shahar) kengashlari qarorlariga asosan va boshqa manbalar hisobidan moliyalashtiriladi;

(v) yaratilgan raqamli agroxarita asosida mahsulot ishlab chiqarish koʻrsatkichlarini tahlil qilib, respublikaning barcha tuman (shahar)lari agroxaritalarini tayyorlash va uni qishloq xoʻjaligi mahsuloti yetishtiruvchilar orqali realizatsiya qilish hamda qishloq xoʻjaligiga moʻljallangan yerlarning normativ qiymati oʻrniga bozor qiymatini belgilash boʻyicha takliflarni ishlab chiqib, Vazirlar Mahkamasiga kiritsin.

19. Hisob palatasi Bosh prokuratura, Investitsiyalar, sanoat va savdo vazirligi, Qishloq xoʻjaligi vazirligi hamda Soliq qoʻmitasi bilan birgalikda olti oy muddatda 2021 — 2025-yillarda eng yaxshi takliflarni tanlab olish orqali yirik investitsiya loyihalariga toʻgʻridan-toʻgʻri ijaraga berilgan barcha turdagi yer uchastkalaridan foydalanish samaradorligi, ularda amalga oshirilayotgan investitsiya loyihalarining holati va yer uchastkasi ijara huquqining baholangan qiymatini Davlat budjetiga toʻlash holatini oʻrganib chiqib, natijasi yuzasidan Oʻzbekiston Respublikasi Prezidenti Administratsiyasiga axborot kiritsin.

20. Qishloq xoʻjaligi ishlab chiqaruvchilarining yerdan foydalanishdagi mustaqilligini taʼminlashga qaratilgan chora-tadbirlarni amalga oshirish boʻyicha “yoʻl xaritasi” 3-ilovaga muvofiq tasdiqlansin.

21. Oʻzbekiston Respublikasi Prezidentining ayrim hujjatlariga 4-ilovaga muvofiq oʻzgartirish va qoʻshimchalar kiritilsin.

22. Qishloq xoʻjaligi vazirligi tegishli vazirlik va idoralar bilan birgalikda ikki oy muddatda:

(a) qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisidagi takliflarni;

(b) mazkur Farmonning 12-bandida belgilangan qoʻllab-quvvatlash choralarini ajratish tartiblarini belgilash yuzasidan tegishli normativ-huquqiy hujjat loyihasini Vazirlar Mahkamasiga kiritsin.

23. Ushbu Farmonning ijrosini samarali tashkil qilishga masʼul va shaxsan javobgar etib Bosh vazir oʻrinbosarlari J.A. Qoʻchqorov va J.A. Xodjayev, Qoraqalpogʻiston Respublikasi Vazirlar Kengashi Raisi va viloyatlar hokimlari belgilansin.

24. Farmon ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 24-aprel,

PF-68-son

Oʻzbekiston Respublikasi Prezidentining 2026-yil 24-apreldagi PF-68-son Farmoniga
1-ILOVA

Hududlarda 2026-yilda yangi tizim asosida elektron onlayn auksion savdolariga chiqariladigan qishloq xoʻjaligiga moʻljallangan yer uchastkalari

MAYDONI*

T/r	Hududlar nomi	Yer maydoni oʻlchami, (gektar)**
	Jami	100 178,5
1.	Qoraqalpogʻiston Respublikasi	38 486,4
2.	Andijon viloyati	2 748,6
3.	Buxoro viloyati	3 302,0
4.	Jizzax viloyati	6 939,5
5.	Qashqadaryo viloyati	17 578,1
6.	Navoiy viloyati	1 355,8
7.	Namangan viloyati	2 245,9
8.	Samarqand viloyati	4 485,6
9.	Sirdaryo viloyati	3 197,8
10.	Surxondaryo viloyati	7 643,3
11.	Toshkent viloyati	6 353,6
12.	Fargʻona viloyati	2 201,5
13.	Xorazm viloyati	3 640,6

* Yer uchastkalarining tumanlar (shaharlar), hududlar va konturlar kesimidagi maydoni oʻlchami Qoraqalpogʻiston Respublikasi Vazirlar Kengashi va viloyatlar hokimlarining qarorlari bilan tasdiqlanadi.

** Qoraqalpogʻiston Respublikasi va viloyatlar kesimidagi yer uchastkalarining maydoni oʻlchamiga Oʻzbekiston Respublikasi Vazirlar Mahkamasi tomonidan oʻzgartirish va qoʻshimchalar kiritilishi mumkin.

Oʻzbekiston Respublikasi Prezidentining 2026-yil 24-apreldagi PF-68-son Farmoniga
2-ILOVA

2022-yil 1-yanvardan 2023-yil 15-aprelga qadar ochiq elektron tanlovlar orqali yuridik shaxslarga ijaraga berilgan qishloq xoʻjaligiga moʻljallangan yer uchastkalarining ijara huquqini sotib olish uchun noreal mablagʻ koʻrsatilgan holatlar

T/r	Hududlar nomi	Elektron tanlov gʻolibi tomonidan yer uchastkasining normativ (boshlangʻich) qiymatining 4 barobaridan yuqori (noreal) mablagʻ koʻrsatilgan holatlar*
T/r	Hududlar nomi	Lotlar soni	Yer maydoni oʻlchami, (gektar)
	Jami	1 456	80 815,5
1.	Qoraqalpogʻiston Respublikasi	141	9 981,1
2.	Andijon viloyati	31	2 711,6
3.	Buxoro viloyati	95	11 800,5
4.	Jizzax viloyati	180	10 006,7
5.	Qashqadaryo viloyati	48	1 629,8
6.	Navoiy viloyati	19	2 339,7
7.	Namangan viloyati	122	3 795,0
8.	Samarqand viloyati	146	5 801,2
9.	Sirdaryo viloyati	106	3 952,7
10.	Surxondaryo viloyati	212	10 278,4
11.	Toshkent viloyati	183	14 051,5
12.	Fargʻona viloyati	80	1 947,2
13.	Xorazm viloyati	93	2 520,0

* Mazkur yer uchastkalari ijaraga berilgan jismoniy va yuridik shaxslarning nomma-nom roʻyxati Qishloq xoʻjaligi vazirligi, Davlat aktivlarini boshqarish agentligi va Kadastr agentligi tomonidan Soliq qoʻmitasiga taqdim etiladi.

Oʻzbekiston Respublikasi Prezidentining 2026-yil 24-apreldagi PF-68-son Farmoniga
3-ILOVA

Qishloq xoʻjaligi ishlab chiqaruvchilarining yerdan foydalanishdagi mustaqilligini taʼminlashga qaratilgan chora-tadbirlarni amalga oshirish boʻyicha

“YOʻL XARITASI”

T/r	Chora-tadbirlar nomi	Amalga oshirish mexanizmi	Amalga oshirish shakli	Ijro muddati	Masʼul ijrochilar
I. Qishloq xoʻjaligiga moʻljallangan yer uchastkalarini yangi tizim asosida ijaraga berish
1.	Tuman (shahar) hokimliklari tasarrufida boʻsh turgan hamda auksion savdosi davom etayotgan va sugʻorish imkoniyati mavjud boʻlgan dastlab 100 ming gektar, keyingi yildan boshlab barcha turdagi qishloq xoʻjaligiga moʻljallangan yer uchastkalarini yangi tizim asosida auksion savdolariga chiqarish.	1. Qoraqalpogʻiston Respublikasi Vazirlar Kengashi va viloyatlar hokimlarining qarorlariga asosan yangi tizim asosida auksion savdolariga chiqariladigan yer uchastkalarining tuman (shahar)lar va konturlar kesimida manzilli roʻyxatini tasdiqlash.	Amaliy chora-tadbirlar	2026-yil 10-may, keyingi yildan boshlab doimiy	Qoraqalpogʻiston Respublikasi Vazirlar Kengashi va viloyatlar hokimliklari, Qishloq xoʻjaligi vazirligi, Davlat aktivlarini boshqarish agentligi
		2. Tasdiqlangan roʻyxat asosida tuman (shahar) hokimliklari tasarrufida boʻsh turgan yer uchastkalarini yangi tizim asosida auksion savdolariga chiqarish.	Amaliy chora-tadbirlar	2026-yil 1-oktabr, doimiy
		3. Qishloq xoʻjaligida yerdan foydalanish ixtisosligi belgilangan holda auksion savdolariga chiqarilib, sotilmay turgan yer uchastkalarini yangi tizim asosida qayta auksion savdolariga chiqarish.	Amaliy chora-tadbirlar	2026-yil 1-iyun
		4. Auksion tartiblarida quyidagilarni nazarda tutish: (a) lotlarni shakllantirishda yer uchastkalari konturlar yaxlitligi va sugʻorish tizimini buzmagan holda 3 gektardan 50 gektargacha boʻlgan oʻlchamlarda belgilash; (b) mahalliy ijro hokimiyati organlarining taklifi asosida sanoatlashgan plantatsiyalar tashkil qilish va yirik chorvachilik loyihalari uchun 50 gektardan 500 gektargacha oʻlchamdagi yer uchastkalarini auksion savdolariga chiqarish; (v) har bir lot hujjatida, keyinchalik esa yer uchastkasining ijara shartnomasida quyidagilarni majburiy ravishda koʻrsatish: yer uchastkasining normativ qiymati va tuproq bonitet bali; tuproq tarkibi va sifati tahlili natijalari, oʻrganilgan vaqti; almashlab ekish tavsiya etiladigan asosiy va takroriy ekin turlari; suv bilan taʼminlash usullari; dala chetida (muhofaza zonasidan tashqari) 20 sotixdan koʻp boʻlmagan, lekin ijaraga berilgan kontur maydonining bir foizidan oshmagan qismida qishloq xoʻjaligiga xizmat koʻrsatuvchi obyektlar joylashtirishni nazarda tutgan holda ishlab chiqilgan yer tuzish loyihasi.	Amaliy chora-tadbirlar	Doimiy
2.	Yer uchastkalarini yangidan oʻzlashtirish, qayta foydalanishga kiritish va suv taʼminotini yaxshilash chora-tadbirlarini amalga oshirish.	1. Qoraqalpogʻiston Respublikasi Vazirlar Kengashi va viloyatlar hokimliklari huzuridagi “Ijaraga berilgan qishloq xoʻjaligi yerlariga xizmat koʻrsatish direksiyasi” MCHJlar (keyingi oʻrinlarda — Direksiya) tomonidan yer uchastkalarining suv taʼminotini yaxshilash, yangidan oʻzlashtirish, qayta foydalanishga kiritishga qaratilgan dastur (keyingi oʻrinlarda — Dastur) ishlab chiqish.	Amaliy chora-tadbirlar	2026-yil 15-may	Qoraqalpogʻiston Respublikasi Vazirlar Kengashi va viloyatlar hokimliklari, Qishloq xoʻjaligi vazirligi, Iqtisodiyot va moliya vazirligi, Suv xoʻjaligi vazirligi
		2. Dasturni shakllantirishda yerlarning suv taʼminotini yaxshilash, yangidan oʻzlashtirish va qayta foydalanishga kiritish tadbirlari uchun zarur boʻlgan suv hajmi shu hududdagi mavjud suv resurslari balansiga salbiy taʼsir koʻrsatmasligi toʻgʻrisida Suv xoʻjaligi vazirligining tegishli xulosasini olish.	Amaliy chora-tadbirlar	2026-yil 1-iyun
		3. Dastur doirasida amalga oshiriladigan tadbirlarning manzilli roʻyxati va ularni moliyalashtirish boʻyicha takliflarini koʻrib chiqish va tasdiqlash uchun Qoraqalpogʻiston Respublikasi Joʻqorgʻi Kengesi va xalq deputatlari viloyatlar kengashlariga kiritish.	Amaliy chora-tadbirlar	2026-yil 10-iyun
		4. Tuman (shahar) hokimliklari tasarrufidagi boʻsh turgan holda yangidan oʻzlashtirilgan, qayta foydalanishga kiritilgan va suv taʼminoti yaxshilangan yer uchastkalarini yangi tizim asosida auksion savdolariga chiqarish.	Amaliy chora-tadbirlar	2026-yil 1-oktabr
3.	Yer uchastkalarini yangidan oʻzlashtirish, qayta foydalanishga kiritish va suv taʼminotini yaxshilash tadbirlarini moliyalashtirish manbalarini kengaytirish.	Yer uchastkalarini yangidan oʻzlashtirish, qayta foydalanishga kiritish va suv taʼminotini yaxshilash tadbirlarini moliyalashtirish uchun Oʻzbekiston Respublikasining respublika budjetidan Qoraqalpogʻiston Respublikasi respublika budjeti va viloyatlar mahalliy budjetlariga budjet ssudalarini ajratish boʻyicha takliflarni tayyorlab, Vazirlar Mahkamasiga taqdim etish.	Amaliy chora-tadbirlar	Ikki oy muddatda	Iqtisodiyot va moliya vazirligi
II. Qishloq xoʻjaligi sohasidagi yirik investitsiya loyihalariga yer uchastkalarini ajratish jarayonlarini soddalashtirish va infratuzilma loyihalarini amalga oshirish
4.	Yirik investitsiya loyihalarini amalga oshirish uchun yer uchastkalarini ajratish.	Qiymati kamida 10 million AQSH dollari ekvivalentida boʻlgan, eng yaxshi taklifni tanlab olish yoʻli bilan aniqlanadigan yirik investitsiya loyihalariga Direksiyalar orqali ikkilamchi ijaraga berish tizimini joriy qilish boʻyicha amaldagi qonunchilik hujjatlariga oʻzgartirish va qoʻshimchalar kiritish, bunda quyidagilarni nazarda tutish: (a) eng yaxshi takliflarni tanlab olish yoʻli bilan aniqlanadigan loyihalar uchun zarur boʻlgan yangidan oʻzlashtirish va qayta foydalanishga kiritish sharti bilan boʻz, lalmi va yaylov yerlarini Direksiya tomonidan xorijiy investorga har yili shartnoma muddatini uzaytirgan holda ikkilamchi ijaraga berish; (b) yer uchastkasi boʻyicha har yilgi yer soligʻi summasining ikki baravaridan kam boʻlmagan miqdordagi ikkilamchi ijara toʻlovlarini Direksiyaga hamda ijaraga olish huquqining baholangan qiymatidagi mablagʻlarni tuman (shahar) mahalliy budjetlariga toʻlash; (v) ikkilamchi ijaraga berilgan yer uchastkalarini yangidan oʻzlashtirish, qayta foydalanishga kiritish va ulardan foydalanish holati yuzasidan yiliga ikki marta har kalendar yil yakuniga qadar kosmik monitoring oʻtkazish va boshqalar.	Normativ-huquqiy hujjat loyihasi	Ikki oy muddatda	Investitsiyalar, sanoat va savdo vazirligi, Iqtisodiyot va moliya vazirligi, Qishloq xoʻjaligi vazirligi, Adliya vazirligi
5.	Ijaraga berilgan qishloq xoʻjaligi yerlariga xizmat koʻrsatish Direksiyalari faoliyatini takomillashtirish.	1. Buxoro, Navoiy, Samarqand, Surxondaryo va Xorazm viloyatlari hokimliklari huzurida “Ijaraga berilgan qishloq xoʻjaligi yerlariga xizmat koʻrsatish direksiyasi” masʼuliyati cheklangan jamiyatlarini tashkil etish.	Amaliy chora-tadbirlar	Bir hafta muddatda	Qoraqalpogʻiston Respublikasi Vazirlar Kengashi va viloyatlar hokimliklari, Iqtisodiyot va moliya vazirligi
		2. Yangi tashkil etiladigan Direksiyalarga belgilangan tartibda malakali mutaxassislarni jalb qilish va doimiy ravishda ularning malakasini oshirib borish.	Amaliy chora-tadbirlar	Doimiy
		3. Yangi tizim asosida ijaraga berilgan yer maydonlarining sugʻorish tizimlarini yaxshilash, elektr energiyasi taʼminoti obyektlarini qurish va rekonstruksiya qilish, texnikalar harakati uchun ichki xoʻjalik yoʻllarining holatini yaxshilash boʻyicha infratuzilma loyihalarini amalga oshirishning manzilli dasturini shakllantirish.	Amaliy chora-tadbirlar	Doimiy
		4. Qishloq xoʻjaligiga moʻljallangan yer uchastkalarini ijaraga oluvchilarga yerdan foydalanish boʻyicha koʻmaklashish va ularning faoliyatini doimiy tahlil qilib borish hamda samaradorligini oshirish yuzasidan takliflar ishlab chiqish.	Amaliy chora-tadbirlar	Doimiy
		5. Direksiyalarning moddiy-texnika bazasini mustahkamlash maqsadida ularni Oʻzbekistonda ishlab chiqarilgan xizmat avtomashinalari bilan taʼminlash.	Amaliy chora-tadbirlar	2026-yil iyun
6.	Direksiyalar tomonidan yangi tizim asosida ijaraga berilgan 3,1 ming gektar yer maydonlarining suv taʼminotini yaxshilash choralarini koʻrish.	1. Suv taʼminoti yaxshilanadigan yer uchastkalarining roʻyxatini shakllantirish.	Amaliy chora-tadbirlar	2026-yil may	Qoraqalpogʻiston Respublikasi Vazirlar Kengashi va viloyatlar hokimliklari, Iqtisodiyot va moliya vazirligi
		2. Loyiha-smeta hujjatlarini ishlab chiqish. 3. Qurilish-pudrat tashkilotini aniqlash.	Amaliy chora-tadbirlar	2026-yil iyul
		4. Direksiya mablagʻlari hisobidan sugʻorish taʼminotini yaxshilash tadbirlariga zarur mablagʻlarni ajratish.	Amaliy chora-tadbirlar	2026-yil iyul — oktabr
		5. Qurilish-pudrat ishlarini yakuniga yetkazish.	Amaliy chora-tadbirlar	2026-yil dekabr
7.	Toshkent viloyati Toshkent tumanida 504 gektar va Zangiota tumanida 834 gektar yuridik shaxslarga qarashli yer uchastkalari hamda 2 ming nafardan ortiq aholi tomorqa yerlarining suv taʼminotini yaxshilash.	1. Toshkent tumanida joylashgan “Ramadon” nasos stansiyasining 2 ta nasos agregatlarini yangilash.	Amaliy chora-tadbirlar	2026-yil may	Toshkent viloyati hokimligi, Iqtisodiyot va moliya vazirligi
		2. “Ramadon” nasos stansiyasidan Toʻlabek hududiga suv olib boruvchi “M-1” kanalining 5,7 km qismini tozalash, kanalning 0,8 km qismini betonlashtirish.	Amaliy chora-tadbirlar	2026-yil sentabr
		3. Ushbu tadbirlarni Direksiya mablagʻlari hisobidan moliyalashtirish.	Amaliy chora-tadbirlar	2026-yil may-iyun
8.	Namangan viloyati Pop tumani Qoʻshminor mahallasi hududida yangi tizim asosida ijaraga berilgan 467 gektar yer maydonlarining suv taʼminotini yaxshilash hamda sanoatlashgan intensiv bogʻ plantatsiyalarini tashkil etish.	1. Yer maydonlariga yerosti suvlarini chiqarish maqsadida yerosti suv zaxiralarining mavjudligi toʻgʻrisida tegishli tashkilotlarning xulosasini olish.	Amaliy chora-tadbirlar	2026-yil may	Namangan viloyati hokimligi, Iqtisodiyot va moliya vazirligi
		2. Tik quduq qazish loyiha-smeta hujjatlarini ishlab chiqish va pudratchi tashkilotlarni aniqlash.	Amaliy chora-tadbirlar	2026-yil may
		3. Tik quduq qazish ishlarini amalga oshirish.	Amaliy chora-tadbirlar	2026-yil iyun
		4. Dala maydonlariga olib boradigan yoʻllarni taʼmirlash.	Amaliy chora-tadbirlar	2026-yil oktabr
		5. Sanoatlashgan intensiv bogʻ plantatsiyalarini barpo qilish.	Amaliy chora-tadbirlar	2026-yil oktabr
III. Yer uchastkalariga boʻlgan ijara huquqini sotib olish va nobudgarchilik boʻyicha toʻlovlarni undirish
9.	Yer uchastkalariga boʻlgan ijara huquqini sotib olish hamda qishloq va oʻrmon xoʻjaligi ishlab chiqarishi nobudgarchiligi boʻyicha hisoblangan toʻlovlar undirilishini tashkil etish.	Yer uchastkalarining ijara huquqini sotib olish boʻyicha hisoblangan va nobudgarchilik toʻlovlarini undirish reja-grafigini ishlab chiqish. Bunda: (a) qarzdorlar roʻyxatini shakllantirish, bunda Soliq qoʻmitasi tomonidan Qishloq xoʻjaligi vazirligi, Davlat aktivlarini boshqarish agentligi bilan birgalikda oʻz maʼlumotlar bazalarini integratsiya qilish orqali toʻlovlar boʻyicha yer egalari, yerdan foydalanuvchilar va ijarachilar, korxonalar, muassasalar va tashkilotlar uchun shaxsiy kartochka hamda toʻlovlarning aniq hisobini yuritish; (b) qarzdorlardan qarzdorlikni amalga oshirish shartlariga muvofiq toʻlovlarni undirish choralarini koʻrish; (v) undirilgan mablagʻlarni mahalliy budjetlarga va qonunchilikda belgilangan manbalarga yoʻnaltirish; (g) toʻlovlarni undirishga nisbatan soliq toʻgʻrisidagi qonunchilikda belgilangan soliq qarzini undirish qoidalarini qoʻllash.	Amaliy chora-tadbirlar	Doimiy	Soliq qoʻmitasi, Qishloq xoʻjaligi vazirligi, Davlat aktivlarini boshqarish agentligi
IV. Sanoatlashgan plantatsiyalar tashkil etishni qoʻllab-quvvatlash
10.	Yangi tizim asosida ijaraga berilgan yer uchastkalarida sanoatlashgan plantatsiyalarni tashkil etish.	1. Qoraqalpogʻiston Respublikasi va viloyatlarda kamida 5 tadan sanoatlashgan plantatsiyalar tashkil etiladigan hududlarni aniqlash. 2. Barpo etiladigan intensiv bogʻ, tokzor, anorzor, yengil konstruksiyali issiqxona, rezavor, gulchilik, koʻchatchilik va sabzavotchilik plantatsiyalarini mazkur Farmonda nazarda tutilgan instrumentlar orqali qoʻllab-quvvatlash. 3. Suv tejovchi texnologiyalarni joriy etish va muqobil energiya manbalaridan foydalanishni yoʻlga qoʻyish. 4. Mahsulotni saqlash va sotish zanjirini yoʻlga qoʻyish.	Amaliy chora-tadbirlar	2026-yil oktabr	Qoraqalpogʻiston Respublikasi Vazirlar Kengashi va viloyatlar hokimliklari, Qishloq xoʻjaligi vazirligi, Iqtisodiyot va moliya vazirligi
11.	Sanoatlashgan plantatsiyalar barpo etiladigan yer maydonlarining infratuzilma tarmoqlarini yaxshilashga koʻmaklashish.	1. Direksiyalar tomonidan tanlanadigan sanoatlashgan plantatsiyalar tashkil etiladigan yer uchastkalari sugʻorish tizimlarini yaxshilash, elektr energiyasi taʼminoti obyektlarini qurish va rekonstruksiya qilish xarajatlarining 50 foizi, biroq 1,5 mlrd soʻmdan oshmagan qismini Direksiya mablagʻlari hamda yer uchastkalarini ijaraga berishdan va nobudgarchilik toʻlovlaridan mahalliy budjetlarga tushadigan mablagʻlar hisobidan moliyalashtirish. 2. Sanoat plantatsiyalarida yuqori daromadli eksportbop mahsulotlar ishlab chiqarishni yoʻlga qoʻyish.	Amaliy chora-tadbirlar	Doimiy	Qoraqalpogʻiston Respublikasi Vazirlar Kengashi va viloyatlar hokimliklari, Iqtisodiyot va moliya vazirligi
V. Yer munosabatlarida milliy manfaatlarni himoya qilish
12.	Chet ellik investorlar, shu jumladan, chet el investitsiyalari ishtirokidagi korxonalar, chet ellik yuridik va jismoniy shaxslar, fuqaroligi boʻlmagan shaxslarga yer uchastkalarini ijaraga berish tizimini takomillashtirish.	Chet ellik investorlar, shu jumladan, chet el investitsiyalari ishtirokidagi korxonalar, chet ellik yuridik va jismoniy shaxslar, fuqaroligi boʻlmagan shaxslarga yer uchastkalarini ijaraga berish tizimini takomillashtirishni nazarda tutuvchi qonun loyihasini Oʻzbekiston Respublikasi Oliy Majlisiga kiritish. Bunda quyidagilarni nazarda tutish: (a) yer munosabatlaridagi ustuvorlik — milliy xavfsizlik masalalaridan kelib chiqib, chet elliklarga yer ajratishda qatʼiy qoidalar oʻrnatish; (b) qishloq xoʻjaligiga moʻljallangan yerlarni faqat ikkilamchi ijara asosida ajratish; (v) qishloq xoʻjaligiga moʻljallanmagan yerlarni auksion orqali ham ijaraga berish va ijara muddatini 49 yil etib belgilash; (g) chet elliklarga mudofaaga moʻljallangan, chegara, tarixiy-madaniy yerlar va oʻrmon fondi yerlarini ijara berishni taqiqlash; (d) chet elliklarga ijaraga berilgan qishloq xoʻjaligiga moʻljallanmagan yerlarni qayta ijaraga berish tartibini belgilash va boshqalar.	Normativ-huquqiy hujjat loyihasi	Bir oy muddatda	Vazirlar Mahkamasi, Adliya vazirligi
VI. Suv resurslaridan foydalanishning iqtisodiy samaradorligini oshirish
13.	Oʻzbekistonda iqlimga asoslangan qishloq xoʻjaligiga oʻtish konsepsiyasini ishlab chiqish.	1. Ilgʻor xorijiy va mahalliy ekspertlarni jalb qilgan holda Oʻzbekistonda iqlimga asoslangan qishloq xoʻjaligiga oʻtish konsepsiyasini ishlab chiqib, Vazirlar Mahkamasiga kiritish. 2. Loyihada quyidagilarni nazarda tutish: (a) hududlarning iqlim oʻzgarishi taʼsiri (qurgʻoqchilik, suv tanqisligi, harorat oʻzgarishi)ni tahlil qilish; (b) qishloq xoʻjaligi tarmoqlarining iqlim xavflariga sezgirligini baholash; (v) iqlimga moslashuvchan agrotexnologiyalar (suv tejovchi, qurgʻoqchilikka chidamli ekin navlari, agroekologik usullar)ni joriy etish; (g) suv resurslarini yuqori darajada isteʼmol qiluvchi va past daromadli ekin turlarini bosqichma-bosqich qisqartirish, ular oʻrniga kam suv talab qiluvchi va ilmiy asoslangan yuqori daromadli muqobil ekinlarni joriy etish boʻyicha tavsiyalarni ishlab chiqish.	Normativ-huquqiy hujjat loyihasi	2026-yil 1-oktabrga qadar	Qishloq xoʻjaligi vazirligi, Suv xoʻjaligi vazirligi, Ekologiya va iqlim oʻzgarishi milliy qoʻmitasi
14.	Mavjud suv zaxiralarini real vaqt rejimida kuzatib borish tizimini joriy qilish.	Germaniyaning “Green Central Asia” loyihasi doirasida ishlab chiqilgan “Modsnow” tizimi orqali manbadagi (muzliklar, daryo, soy va boshqa) mavjud suv zaxiralarini real vaqt rejimida kuzatib borishni yoʻlga qoʻyish. Bunda: (a) sunʼiy yoʻldosh (sputnik) maʼlumotlari, sunʼiy intellekt hamda matematik modellashtirish usullari yordamida butun Markaziy Osiyo hududini 500 metrlik katakchalar (GRID)larga boʻlgan holda har bir 500 metrlik hududda shakllanayotgan va mavjud suv zaxiralarini aniqlash; (b) olingan maʼlumotlarni tahlil qilish va suv resurslaridan samarali foydalanish yuzasidan takliflarni shakllantirish; (v) tizimdan foydalanish boʻyicha mutaxassislarni tayyorlash va ularning malakasini oshirib borish; (g) tizimni ishga tushirish bilan bogʻliq tadbirlarni moliyalashtirish uchun xorijiy grant mablagʻlarini jalb etish va boshqa manbalar hisobidan moliyalashtirish.	Amaliy chora-tadbirlar	2027-yil 1-yanvarga qadar	Ekologiya va iqlim oʻzgarishi milliy qoʻmitasi, Suv xoʻjaligi vazirligi
15.	Qishloq xoʻjaligida yaratiladigan iqtisodiy qiymatni aniqlashni yoʻlga qoʻyish.	Qishloq xoʻjaligida yaratiladigan iqtisodiy qiymatni (Water productivity) hisoblash metodologiyasini ishlab chiqish va tasdiqlash. Bunda: (a) yer ijarachilari va foydalanuvchilari tomonidan ishlab chiqarilayotgan mahsulotlar va ular uchun sarf etilayotgan suv resurslari hajmini tahlil qilish; (b) tahlil natijalaridan kelib chiqib, yer ijarachilari tomonidan 1 metr kub suv sarfidan yaratilayotgan qoʻshilgan qiymatni hisoblash va boshqalar.	Amaliy chora-tadbirlar	2027-yil 1-mart	Milliy statistika qoʻmitasi, Qishloq xoʻjaligi vazirligi, Iqtisodiyot va moliya vazirligi
VII. Qishloq xoʻjaligi yerlaridan foydalanish samaradorligini baholash
16.	Qishloq xoʻjaligi yer uchastkalaridan foydalanish samaradorligini (KPI) baholash tartibini ishlab chiqish.	Xorijiy davlatlar tajribasidan kelib chiqib, qishloq xoʻjaligi yer uchastkalaridan foydalanish samaradorligini (KPI) baholash tartibini ishlab chiqib, Vazirlar Mahkamasiga kiritish. Bunda: (a) “Yerdan foydalanish samaradorligini baholash” axborot tizimini ishlab chiqish; (b) axborot tizimini vazirlik va idoralarning tegishli axborot tizimlariga integratsiya qilish; (v) yer ijarachilari va foydalanuvchilari tomonidan qishloq xoʻjaligi ekinlarini ekish, mahsulot yetishtirish holatini tahlil qilish; (g) chorvachilik, parrandachilik va boshqa xoʻjaliklarga ozuqa ekinlari yetishtirish uchun ajratilgan yer uchastkalariga xoʻjaliklarda saqlanayotgan chorva mollari bosh sonining tavsiyaviy normalarga mos kelishini tahlil qilish; (d) ijarachilar tomonidan yetishtirilayotgan mahsulotlarni statistik, soliq va xoʻjalik hisobotlarida aks ettirish holatlarini tahlil qilish.	Normativ-huquqiy hujjat loyihasi	2026-yil 1-oktabrga qadar	Qishloq xoʻjaligi vazirligi, Iqtisodiyot va moliya vazirligi, Raqamli texnologiyalar vazirligi, “Oʻzbekkosmos” agentligi
17.	Qishloq xoʻjaligiga moʻljallangan yer maydonlariga eng maqbul ekin turlarini joylashtirish boʻyicha raqamli agroxarita ishlab chiqish.	1. Raqamli agroxarita ishlab chiqish boʻyicha Xitoy, Koreya Respublikasi, Germaniya va Ispaniya davlatlariga ularning tajribasini oʻrganish.	Amaliy chora-tadbirlar	2026-yil 1-iyulga qadar	Qishloq xoʻjaligi vazirligi, Iqtisodiyot va moliya vazirligi, Samarqand va Fargʻona viloyatlari hokimliklari
17.		2. Xorijiy tajriba asosida tajriba-sinov tariqasida Fargʻona va Bulungʻur tumanlaridagi qishloq xoʻjaligi yer maydonlarida har bir kontur boʻyicha tuproq tarkibi, joylashuv relyefi, suv bilan taʼminlanganlik darajasi, soʻnggi oʻn yillikdagi meteorologik va agrotexnik koʻrsatkichlarni tahlil qilib, eng maqbul ekin turlarini joylashtirish boʻyicha raqamli agroxarita ishlab chiqish. 3. Raqamli agroxaritani ishlab chiqishda sunʼiy intellekt texnologiyalaridan keng foydalanish. 4. Yaratilgan raqamli agroxarita asosida mahsulot ishlab chiqarish koʻrsatkichlarini tahlil qilib, uning ijobiy natijalari asosida respublikaning barcha tuman (shahar)larining agroxaritalarini tayyorlash.	Amaliy chora-tadbirlar	2026-yil 1-oktabrga qadar
VIII. Farmon mazmun-mohiyatini yoritish boʻyicha targʻibot tadbirlarini tashkil etish
18.	Farmonda belgilangan maqsad va vazifalar hamda asosiy yoʻnalishlarning mazmun-mohiyatini tushuntirishga qaratilgan matbuot anjumanini tashkil etish.	1. Farmonning mazmun-mohiyatini tushuntirishga qaratilgan matbuot anjumanini tashkil etish maqsadida manfaatdor vazirlik va idoralar bilan hamkorlikni yoʻlga qoʻyish. 2. Tadbir davomida Farmonda nazarda tutilgan asosiy masalalar, yaratilayotgan qulayliklar, yangi tartiblar haqida batafsil tushuntirish berish. 3. Matbuot anjumanida OAV vakillari, jurnalist va blogerlar ishtirokini keng taʼminlash. 4. Matbuot anjumanini oʻtkazish, markaziy telekanallar orqali efirga uzatish va keng yoritish.	Matbuot anjumani	2026-yil may	Qishloq xoʻjaligi vazirligi, Iqtisodiyot va moliya vazirligi, Suv xoʻjaligi vazirligi, Oʻzbekiston Milliy teleradiokompaniyasi
19.	Farmonda belgilangan muhim vazifalar mazmun-mohiyatini yoritish.	1. Farmonda belgilangan eng muhim vazifalarni tushuntirishga qaratilgan maʼlumotlarni tayyorlash. 2. Soha mutaxassislari, taniqli tadbirkorlik subyektlari va fermerlar ishtirokida tushuntirish ishlarini tashkil qilish. 3. Efirlarni mulohazalar shaklidagi koʻrsatuvlar, debatlar va erkin mustaqil fikrlar shaklida tashkil etish. 4. Farmon mazmun-mohiyatini va afzalliklarini yoritishga qaratilgan dasturlarni praym-taym vaqtlarida efirga uzatish.	Amaliy chora-tadbirlar	2026-yil davomida muntazam	Oʻzbekiston Milliy teleradiokompaniyasi, Oʻzbekiston Milliy axborot agentligi, Qishloq xoʻjaligi vazirligi, Adliya vazirligi
20.	Qishloq xoʻjaligi ishlab chiqaruvchilarining yerdan foydalanishdagi mustaqilligini taʼminlashga qaratilgan islohotlarni tushuntirish boʻyicha huquqiy targʻibot materiallari toʻplamini tayyorlash va tarqatish.	1. Farmon mazmun-mohiyatini sodda tilda tushuntirishga qaratilgan (infografika, tezis, slayd kabi) targʻibot materiallarini tayyorlash. 2. Tayyorlangan materiallarni manfaatdor davlat organlari va tashkilotlariga hamda hududlarga yetkazish. 3. Farmonning aholi va ijrochilar uchun muhim qismlarini xalqchil tilda yorituvchi qisqa axborot-kontentlarni tayyorlash va ijtimoiy tarmoqlardagi rasmiy sahifalar va OAV orqali keng ommalashtirish.	Amaliy chora-tadbirlar	2026-yil davomida muntazam	Adliya vazirligi, Qishloq xoʻjaligi vazirligi, Suv xoʻjaligi vazirligi, Oʻzbekiston Milliy teleradiokompaniyasi
21.	Qishloq xoʻjaligiga moʻljallangan yer uchastkalarini yangi tizim asosida ijaraga berish masalasini tushuntirishga qaratilgan intervyular tashkil etish hamda markaziy va mahalliy OAVlar orqali namoyish etish.	1. Qishloq xoʻjaligiga moʻljallangan yer uchastkalarini yangi tizim asosida ijaraga berish tartibi mavzusida qishloq xoʻjaligi vazirining oʻrinbosari bilan intervyu tashkil etish. 2. Intervyuni “Oʻzbekiston 24” telekanali orqali jonli efirga uzatish ishlarini amalga oshirish. 3. Intervyu davomida yangi tizimning afzalliklari, fermerlar va tadbirkorlar uchun yaratilayotgan imkoniyatlar hamda yer ajratishda ochiqlik va shaffoflikni taʼminlash mexanizmlarini atroflicha yoritish.	Amaliy chora-tadbirlar	2026-yil davomida muntazam	Oʻzbekiston Milliy teleradiokompaniyasi, Oʻzbekiston Milliy axborot agentligi, Qishloq xoʻjaligi vazirligi
22.	Farmonda nazarda tutilgan yangi tartiblarni va imtiyozlarni xalqchil tilda yoritib beruvchi videomateriallar tayyorlash va keng ommalashtirish.	1. Yangi tartib va imtiyozlarni tushuntirishga qaratilgan targʻibot videomateriallarini tayyorlash. 2. Videomateriallarni tayyorlashda mutasaddi tashkilotlar, iqtisodiy kompleks vakillari, fermerlar va boshqa mutaxassislarni jalb etish. 3. Tayyorlangan turli shakllardagi videomateriallarni ommabop ijtimoiy tarmoqlardagi kanallarda keng tarqatish hamda muntazam ravishda OAV orqali yoritib borish.	Videomaterial	2026-yil davomida muntazam	Qishloq xoʻjaligi vazirligi, Suv xoʻjaligi vazirligi, Oʻzbekiston Milliy teleradiokompaniyasi
23.	Farmonning mazmun-mohiyatini aholi, tadbirkorlik subyektlari, shuningdek, fermerlar oʻrtasida manzilli tushuntirish tadbirlarini tashkil qilish.	1. Hududlarda oʻtkaziladigan huquqiy targʻibot tadbirlarida Farmon boʻyicha tushuntirish ishlarini olib borish. 2. Korxona va tashkilotlarda hamda mahallalarda “mahalla yettiligi” aʼzolari uchun manzilli seminar va tushuntirish ishlarini tashkil qilish. 3. Farmonni tushuntirishga qaratilgan infografika va bukletlarni tarqatish.	Amaliy chora-tadbirlar	2026-yil davomida muntazam	Adliya vazirligi, Qishloq xoʻjaligi vazirligi, Suv xoʻjaligi vazirligi
24.	Qishloq xoʻjaligiga moʻljallangan yer uchastkalarini qaytadan bosqichma-bosqich yangi tizim asosida auksion savdolariga chiqarish masalasini tadbirkorlarga va fuqarolarga tushuntirish boʻyicha joylarda seminarlar tashkil qilish.	1. Qishloq xoʻjaligiga moʻljallangan yer uchastkalarini qaytadan bosqichma-bosqich yangi tizim asosida auksion savdolariga chiqarish yuzasidan seminar tadbirlarini tashkil qilish. 2. Tadbirlarni qishloq xoʻjaligi sohasi faollari, iqtisodiy kompleks mutaxassislari, bank va moliya organlari vakillari ishtirokida oʻtkazish. 3. Oʻtkazilgan seminar va davra suhbatlari jarayonlarini OAV orqali yoritib borish.	Seminar	2026-yil davomida muntazam	Qishloq xoʻjaligi vazirligi, Davlat aktivlarini boshqarish agentligi, Kadastr agentligi, Qoraqalpogʻiston Respublikasi Vazirlar Kengashi va viloyatlar hokimliklari
25.	Hududlarda qishloq xoʻjaligi sohasidagi yirik investitsiya loyihalariga yer uchastkalarini ajratish jarayonlarini soddalashtirishga oid tushuntirish ishlarini tashkil etish boʻyicha davra suhbatlari oʻtkazish.	1. Qishloq xoʻjaligi sohasidagi yirik investitsiya loyihalariga yer uchastkalarini ajratish jarayonlarini soddalashtirishga oid ishlarning mazmun-mohiyatini tushuntirish masalasida hududlarda davra suhbatlarini tashkil qilish. 2. Davra suhbatlarida manfaatdor tashkilotlar bilan hamkorlikda fuqarolar, fermerlar va yirik tadbirkorlik subyektlari ishtirokini taʼminlash. 3. Tadbir davomida tegishli tartibotlarni tushuntirish, islohotlar mohiyatini ochib berishga alohida eʼtibor qaratish. 4. Oʻtkazilgan davra suhbati tafsilotlarini ijtimoiy tarmoqlar va mahalliy OAVlar orqali yoritish.	Amaliy chora-tadbirlar	2026-yil davomida muntazam	Qishloq xoʻjaligi vazirligi, Davlat aktivlarini boshqarish agentligi, Kadastr agentligi, Adliya vazirligi, Qoraqalpogʻiston Respublikasi Vazirlar Kengashi va viloyatlar hokimliklari, Oʻzbekiston Milliy axborot agentligi
26.	Yer uchastkalariga boʻlgan ijara huquqini sotib olish va nobudgarchilik boʻyicha toʻlovlarni undirish hamda sanoatlashgan plantatsiyalar tashkil etishni qoʻllab-quvvatlash yoʻnalishidagi islohotlarni aholiga xalqchil tilda yetkazish.	1. Yer uchastkalariga boʻlgan ijara huquqini sotib olish va nobudgarchilik boʻyicha toʻlovlarni undirish boʻyicha soha mutaxassislarini jalb qilish. 2. Mutaxassislar tomonidan aholiga xalqchil tilda tushuntirish boʻyicha radiokontentlar tayyorlash. 3. Masalani yoritib berish yuzasidan radioeshittirish tashkil etish.	Radioeshittirish	2026-yil davomida muntazam	Oʻzbekiston Milliy teleradiokompaniyasi, Qishloq xoʻjaligi vazirligi, Soliq qoʻmitasi, Oʻzbekiston Milliy axborot agentligi
27.	Suv resurslaridan foydalanishda iqtisodiy samaradorlikni oshirishning oʻziga xos xususiyatlarini tushuntirishga qaratilgan targʻibot tadbirlarini tashkil qilish.	1. Suv resurslaridan foydalanishda iqtisodiy samaradorlikni oshirishning oʻziga xos xususiyatlarini tushuntirishga qaratilgan targʻibot tadbirlarini tashkil etish boʻyicha reja-jadval ishlab chiqish. 2. Reja-jadval asosida targʻibot-tashviqot ishlarini tashkil etish. 3. Tashkil qilingan targʻibot-tushuntirish tadbirlarini OAV va ijtimoiy tarmoqlar orqali keng yoritish.	Reja-jadval	2026-yil may	Suv xoʻjaligi vazirligi, Qishloq xoʻjaligi vazirligi, manfaatdor vazirlik va idoralar
28.	Qishloq xoʻjaligiga moʻljallangan yer uchastkalarini yangi tizim asosida ijaraga berish masalalari yuzasidan qishloq xoʻjaligi sohasidagi olimlar tomonidan tahliliy maqolalar tayyorlanishi va ommaviy axborot vositalarida eʼlon qilinishini tashkil etish.	1. Qishloq xoʻjaligiga moʻljallangan yer uchastkalarini yangi tizim asosida ijaraga berishning huquqiy, iqtisodiy va amaliy jihatlarini oʻrganish boʻyicha yetakchi olimlar va mutaxassislar roʻyxatini shakllantirish. 2. Olimlar tomonidan ilmiy-amaliy, tahliliy va tushuntirish xususiyatiga ega maqolalar tayyorlanishini tashkil etish. 3. Tayyorlangan maqolalarni bosma va elektron ommaviy axborot vositalarida chop etish.	Tahliliy maqolalar	2026-yil davomida muntazam	Qishloq xoʻjaligi vazirligi, Oʻzbekiston Milliy axborot agentligi
29.	Farmonda belgilangan tadbirlarning ijrosini monitoring qilish.	Mazkur Farmonda belgilangan tadbirlarni monitoring qilish rejasini ishlab chiqish va tasdiqlash.	Monitoring rejasi	2026-yil may	Adliya vazirligi, Iqtisodiyot va moliya vazirligi

Oʻzbekiston Respublikasi Prezidentining 2026-yil 24-apreldagi PF-68-son Farmoniga
4-ILOVA

Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2019-yil 17-iyundagi “Qishloq xoʻjaligida yer va suv resurslaridan samarali foydalanish chora-tadbirlari toʻgʻrisida”gi PF-5742-son Farmonining 5-bandida:

(a) uchinchi xatboshi “qishloq xoʻjaligidan” soʻzlaridan keyin “, shuningdek, oʻrmon xoʻjaligidan” soʻzlari bilan toʻldirilsin;

(b) toʻrtinchi xatboshi “Bunda” soʻzidan keyin “qishloq xoʻjaligiga moʻljallangan” soʻzlari bilan toʻldirilsin.

2. Oʻzbekiston Respublikasi Prezidentining 2021-yil 8-iyundagi “Yer munosabatlarida tenglik va shaffoflikni taʼminlash, yerga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida”gi PF-6243-son Farmoni 4-bandining uchinchi xatboshisidan “, bekor qilish” soʻzlari chiqarib tashlansin.

3. Oʻzbekiston Respublikasi Prezidentining 2025-yil 3-fevraldagi “Qishloq xoʻjaligi ekin maydonlari unumdorligini oshirish, tarmoqqa investitsiyalar jalb qilish uchun qulay shart-sharoit yaratish boʻyicha navbatdagi chora-tadbirlar toʻgʻrisida”gi PF-18-son Farmonining 1-bandida:

(a) “v” kichik banddan “, shu jumladan, chet el investitsiyalari ishtirokidagi korxonalar” soʻzlari chiqarib tashlansin;

(b) “g” kichik band quyidagi tahrirda bayon etilsin:

“g) elektron onlayn auksion savdolari orqali aniqlanadigan yer uchastkasiga ijara huquqini olish uchun toʻlovlar 15 ish kuni ichida toʻliq toʻlanishi shart”.

4. Oʻzbekiston Respublikasi Prezidentining 2025-yil 4-martdagi “Maxsus iqtisodiy va sanoat zonalari faoliyatining samaradorligini oshirish boʻyicha qoʻshimcha chora-tadbirlar toʻgʻrisida”gi PF-41-son Farmoni 8-bandining “v” kichik bandi oʻz kuchini yoʻqotgan deb hisoblansin.

5. Oʻzbekiston Respublikasi Prezidentining 2022-yil 12-apreldagi “Muhandislik-kommunikatsiya tarmoqlari uchun yer uchastkalarini ajratish tartibini takomillashtirish chora-tadbirlari toʻgʻrisida”gi PQ-204-son qarorining 3-bandi quyidagi tahrirda bayon etilsin:

(a) “3. Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasi (keyingi oʻrinlarda — Hukumat komissiyasi) 2-ilovaga muvofiq tarkibda tashkil etilsin.

Belgilansinki:

Oʻzbekiston Respublikasi Prezidenti maslahatchisi Hukumat komissiyasi raisi, Qishloq xoʻjaligi vazirligi Hukumat komissiyasining ishchi organi hisoblanadi;

Hukumat komissiyasi koʻrib chiqishi uchun masalalar Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari tomonidan ishchi organga Vazirlar Mahkamasi tomonidan belgilanadigan yagona talablar asosida kiritiladi;

Hukumat komissiyasi yigʻilishi, qoida tariqasida, har oyda bir marotaba uning raisi yoki ishchi organi tashabbusi bilan oʻtkaziladi;

Hukumat komissiyasining qarori bayon shaklida rasmiylashtiriladi, bayonga Yer kodeksining 9 va 44¹-moddalariga muvofiq Oʻzbekiston Respublikasi Prezidentining va (yoki) Vazirlar Mahkamasining farmoyishi loyihasi ilova qilinadi, bayon va farmoyish loyihasi uni yoqlab ovoz berganlar tomonidan imzolanadi;

ishchi organ Suv xoʻjaligi vazirligi, Qurilish va uy-joy kommunal xoʻjaligi vazirligi hamda Kadastr agentligi tizimi xodimlari bilan birga joyiga chiqqan holda har bir taklif Yer kodeksining 44¹ va 45-moddalarida hamda boshqa qonunchilik hujjatlarida belgilangan talablarga muvofiqligini oʻrganadi, oʻrganish yakunlari boʻyicha oʻz xulosasini Hukumat komissiyasiga taqdim etadi;

Hukumat komissiyasi har bir taklif va u yuzasidan Qishloq xoʻjaligi vazirligining, Suv xoʻjaligi vazirligining hamda Kadastr agentligining xulosalarini koʻrib chiqadi hamda qaror qabul qiladi.

Bunda qishloq xoʻjaligiga moʻljallangan sugʻoriladigan yerlar boʻyicha takliflar va xulosalar Hukumat komissiyasi tomonidan umumlashtiriladi hamda koʻrib chiqish uchun har yili birinchi yarim yil yakuni boʻyicha 10-iyulga, ikkinchi yarim yil yakuni boʻyicha 10-yanvarga qadar Oʻzbekiston Respublikasi Prezidentining farmoyishi loyihasi bilan birga Vazirlar Mahkamasi tomonidan Oʻzbekiston Respublikasi Prezidenti Administratsiyasiga kiritiladi;

Hukumat komissiyasi aʼzolari tomonidan kelishilgan (viza qoʻyilgan) Oʻzbekiston Respublikasi Prezidentining va (yoki) Vazirlar Mahkamasining farmoyishi loyihasi ishchi organ tomonidan Adliya vazirligiga huquqiy ekspertizadan oʻtkazish uchun belgilangan tartibda kiritiladi, bunda mazkur loyihalarni boshqa idoralar bilan kelishish talab etilmaydi, loyihalarga yer uchastkalarining yer fondi toifasini oʻzgartirishdan boshqa masalalarni kiritishga yoʻl qoʻyilmaydi”;

(b) 2-ilovaning matni quyidagi tahrirda bayon etilsin:

“Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasi

TARKIBI

1.	Sh.M. Gʻaniyev	—	Oʻzbekiston Respublikasi Prezidenti maslahatchisi, Hukumat komissiyasi raisi
2.	I.Yu. Abdurahmonov	—	qishloq xoʻjaligi vaziri, Hukumat komissiyasi raisi oʻrinbosari
3.	Sh.R. Xamrayev	—	suv xoʻjaligi vaziri
4.	Lavozimiga koʻra	—	Kadastr agentligi direktori
5.	Sh.J. Toʻxtaboyev	—	Bosh prokuror oʻrinbosari
6.	N.M. Rustambekov	—	Urbanizatsiya va uy-joy bozorini barqaror rivojlantirish milliy qoʻmitasi raisi oʻrinbosari
7.	M.Sh. Istamov	—	adliya vazirining birinchi oʻrinbosari
8.	I.I. Norqulov	—	iqtisodiyot va moliya vazirining birinchi oʻrinbosari
9.	Lavozimiga koʻra	—	investitsiyalar, sanoat va savdo vazirining birinchi oʻrinbosari
10.	O.A. Pekos	—	raqamli texnologiyalar vazirining birinchi oʻrinbosari
11.	J.S. Arashov	—	qurilish va uy-joy kommunal xoʻjaligi vazirining birinchi oʻrinbosari
12.	R.P. Yusupov	—	togʻ-kon sanoati va geologiya vaziri oʻrinbosari
13.	S.A. Nishanbayev	—	ichki ishlar vaziri oʻrinbosari
14.	E.M. Muxitdinov	—	Oʻrmon va yashil hududlarni koʻpaytirish, choʻllanishga qarshi kurashish agentligi direktori
15.	T.Yu. Rapikov	—	Vazirlar Mahkamasi kotibiyati mudiri
16.	Lavozimiga koʻra	—	Qoraqalpogʻiston Respublikasi Vazirlar Kengashi Raisining, viloyatlar hokimlarining qishloq va suv xoʻjaligi masalalari boʻyicha oʻrinbosarlari
17.	Lavozimiga koʻra	—	Vazirlar Mahkamasi kotibiyati masʼul xodimi, Hukumat komissiyasi kotibi

Izoh: Hukumat komissiyasi aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi”.

6. Oʻzbekiston Respublikasi Prezidentining 2025-yil 28-martdagi “Qishloq xoʻjaligida yerdan foydalanish samaradorligini oshirish va mahsulot yetishtirish hajmini koʻpaytirish boʻyicha qoʻshimcha chora-tadbirlar toʻgʻrisida”gi PQ-131-son qarorida:

(a) 2-bandning “v” kichik bandidagi “20” raqami “10” raqami bilan almashtirilsin;

(b) 6-bandning “b” kichik bandi quyidagi tahrirda bayon etilsin:

“(b) ijara huquqini baholash talab etilmaydi, davlat ijrochisi Oʻzbekiston Respublikasining “Sud hujjatlari va boshqa organlar hujjatlarini ijro etish toʻgʻrisida”gi Qonuniga muvofiq qarzdorning mol-mulkini xatlash va realizatsiya qilish navbatiga rioya qilgan holda vakolatli tashkilotlardan yer uchastkasining normativ qiymatini aniqlab, unga teng boʻlgan boshlangʻich narx miqdorini mulkiy huquqni xatlash dalolatnomasida koʻrsatadi. Mulkiy huquqni xatlash dalolatnomasi davlat ijrochisi va qarzdor oʻrtasida yozma ravishda xolislar ishtirokida tuziladi va ushbu dalolatnoma elektron onlayn auksion savdolarini oʻtkazish uchun buyurtmaga ilova qilinadi”;

(v) 13-bandning “v” kichik bandi oʻz kuchini yoʻqotgan deb hisoblansin.

7. Oʻzbekiston Respublikasi Prezidentining 2025-yil 31-oktabrdagi “Aholini oziq-ovqat mahsulotlari bilan barqaror taʼminlashga doir qoʻshimcha chora-tadbirlar toʻgʻrisida”gi PQ-322-son qarorining 11-bandi oʻz kuchini yoʻqotgan deb hisoblansin.

(Qonunchilik maʼlumotlari milliy bazasi, 01.05.2026-y., 06/26/68/0435-son)