Ixtisoslashtirilgan valyuta almashtirish punktlari ishining natijalari respublikada valyuta bozorini shakllantirishning tanlangan yoʻnalishlari toʻgʻriligini tasdiqlamoqda. Milliy valyutaning ichki erkin muomaladagi valyutaga aylanishiga bosqichma-bosqich oʻtish uchun zarur zamin yaratildi, boshqa mamlakatlarning ijobiy tajribasi hisobga olindi.

Shu bilan birga erkin almashtiriladigan naqd valyutani almashtirish operatsiyalarini oʻtkazish huquqining faqat Oʻzbekiston Respublikasi Markaziy banki va Tashqi iqtisodiy aloqalar milliy bankining ixtisoslashtirilgan punktlariga berilishi valyutani almashtirishning resurs bazasini toraytiradi, bank tizimi imkoniyatlarini cheklaydi.

Bayon etilganlardan kelib chiqib hamda Vazirlar Mahkamasining “Oʻzbekiston Respublikasi milliy valyutasining ichki erkin almashinuvini taʼminlashga oid chora-tadbirlar toʻgʻrisida” 1994-yil 21-iyuldagi 379-son qarorini hisobga olib Vazirlar Mahkamasi qaror qiladi:

1. Vakil qilingan tijorat banklariga 1994-yil 1-sentabrdan boshlab jismoniy shaxslarning naqd “Soʻm” larini belgilangan tartibda oʻzlarida mavjud boʻlgan valyuta resurslari doirasida erkin muomaladagi valyutaga almashtirishni amalga oshirish huquqi berilsin.

2. Oʻzbekiston Respublikasi Markaziy banki vakil qilingan banklarga, ularning tayyorgarliklariga koʻra, naqd “Soʻm” larni EVM ga almashtirish boʻyicha ixtisoslashtirilgan punktlarni ochishga ruxsatnomalar bersin.

3. Vakil qilingan banklarga xorijiy valyutaga boʻlgan talab va taklifni hamda Oʻzbekiston Respublikasi Markaziy banki kursini hisobga olib ixtisoslashtirilgan almashtirish punktlarida almashtirish kursini mustaqil belgilashga ruxsat etilsin.

4. Vakil qilingan banklar ixtisoslashtirilgan almashtirish punktlarining samarali ishlashini tashkil etish uchun mijozlar doirasini kengaytirish va yuridik hamda jismoniy shaxslar schyotlariga erkin muomaladagi valyutani jalb qilish yoʻli bilan valyuta resurslarini koʻpaytirish chora-tadbirlarini koʻrsinlar.

5. Oʻzbekiston Respublikasi Markaziy banki vakil qilingan banklarning valyuta almashtirish operatsiyalarini amalga oshirish tartibi va qoidalari toʻgʻrisidagi normativ hujjatlarga rioya qilishlari, shuningdek, mijozlarga zarur sharoitlar yaratilishi ustidan doimiy nazorat oʻrnatsin.

Vakil qilingan banklar oʻtkazilgan valyuta almashtirish operatsiyalari toʻgʻrisida Oʻzbekiston Respublikasi Markaziy bankiga har oyda hisobot taqdim etsinlar.

Koʻrsatib oʻtilgan shartlarga rioya etilmagan taqdirda Markaziy bank tijorat banklarini EVM ga almashtirish operatsiyalarini oʻtkazish huquqidan mahrum qilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S.Hamidov va Oʻzbekiston Respublikasi Markaziy banki Boshqaruvi raisi F.M.Mullajonov zimmasiga yuklansin.