|
Hujjat kuchini yo‘qotgan " " 19.07.2018
|
Oʻzbekiston Respublikasi Vazirlar Mahkamasining
qarori
OʻZBEKISTON RESPUBLIKASI BOJXONA ORGANLARINING INTIZOMIY USTAVINI TASDIQLASh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2018-yil 18-iyuldagi 553-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish hamda baʼzilarini oʻz kuchini yoʻqotgan deb hisoblash haqida (Oʻzbekiston Respublikasi Prezidentining “Oʻzbekiston Respublikasi Davlat bojxona xizmati organlari faoliyatini tubdan takomillashtirish chora-tadbirlari toʻgʻrisida” 2018-yil 12-apreldagi PF-5414-son Farmoni, Oʻzbekiston Respublikasi Prezidentining “Oʻzbekiston Respublikasi Davlat bojxona xizmati organlarining faoliyatini tashkil etish toʻgʻrisida” 2018-yil 12-apreldagi PQ-3665-son qarori)”gi qaroriga asosan oʻz kuchini yoʻqotgan.
Vazirlar Mahkamasining “Oʻzbekiston Respublikasi Davlat bojxona qoʻmitasi faoliyatini tashkil etish masalalari toʻgʻrisida” 1997-yil 30-iyuldagi 374-son qaroriga muvofiq hamda kadrlarni tanlash va joy-joyiga qoʻyishni yaxshilash va bojxona organlari xodimlarining intizomini mustahkamlash masalalari boʻyicha Oʻzbekiston Respublikasi Hukumati tomonidan qoʻyilgan vazifalarni toʻliq va ogʻishmay bajarish maqsadida Vazirlar Mahkamasi qaror qiladi:
1. Oʻzbekiston Respublikasi bojxona organlarining Intizomiy ustavi tasdiqlansin (ilova qilinadi).
2. Oʻzbekiston Respublikasi Davlat bojxona qoʻmitasiga Oʻzbekiston Respublikasi bojxona organlarining Intizomiy ustavi talablariga rioya etilishini nazorat qilish yuklansin.
Vazirlar Mahkamasining Raisi I. KARIMOV
Toshkent sh.,
1998-yil 27-mart,
135-son
Oʻzbekiston Respublikasi bojxona organlarining
intizomiy ustavi
I. UMUMIY QOIDALAR
1. Bojxona organlari mansabdor shaxslarining intizomi ular tomonidan Oʻzbekiston Respublikasi qonun hujjatlarida, mazkur Ustavda belgilangan normalarga rioya qilishdan, shuningdek qasamyodni, Oʻzbekiston Respublikasi Davlat bojxona qoʻmitasi raisining buyruqlarini bajarishdan iboratdir.
Bojxona organlaridagi intizom har bir mansabdor shaxsning yuksak ongliligiga, qatʼiy eʼtiqodiga va oʻz xizmat burchini chuqur tushunishiga hamda topshirilgan ish uchun shaxsiy javobgarligiga asoslanadi.
Mazkur Intizomiy ustav bojxona organlarining barcha mansabdor shaxslariga tatbiq etiladi.
2. Bojxona organlaridagi intizom har bir mansabdor shaxsga:
Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, respublika Hukumatining qarorlari va farmoyishlariga soʻzsiz rioya qilish, qasamyod, ustavlar talablariga va boshliqlarning buyruqlarini aniq bajarish, qonuniylikka qatʼiy rioya qilish;
Oʻzbekiston Respublikasining iqtisodiy manfaatlarini, iqtisodiy xavfsizligini himoya qilish, shuningdek qonun tomonidan muhofaza qilinadigan huquq va manfaatlarni himoya qilish boʻyicha xizmatni fidokorona oʻtash;
xizmat bilan bogʻliq barcha ogʻirliklar va yetishmovchiliklarga qatʼiyat bilan bardosh berish;
davlat, xizmat va tijorat sirini qattiq saqlash;
oʻziga ishonib topshirilgan tabel qurol-yarogʻ, mol-mulk va texnikani ehtiyot qilish;
sofdil va haqiqatgoʻy boʻlish, oʻz malakasini doimiy ravishda takomillashtirib borish, ish madaniyatini oshirish;
intizomni mustahkamlashda va ustav tartibini taʼminlashda boshliqlarga koʻmaklashish, boshliqlarni, xizmat va unvon boʻyicha kattalarni hurmat qilish, odobli boʻlish harbiy salom berish va belgilangan shakldagi kiyim-bosh kiyish qoidalariga rioya etish;
xizmatdan tashqari vaqtlarda oʻzini munosib tutish va izzatini saqlash, jamoat tartibiga va umuminsoniy axloq normalariga rioya qilishda namuna koʻrsatish, boshqalarni huquq-tartibotni buzishdan toʻxtatish, jamiyat va fuqarolarning qonuniy manfaatlarini fidokorona himoya qilish majburiyatini yuklaydi.
3. Bojxona organlaridagi qatʼiy intizomga:
bojxona organlari shaxsiy tarkibini vatanparvarlik, yuksak maʼnaviy-ruhiy va ishchanlik fazilatlari, insonparvarlik va xizmat burchini bajarishga ongli munosabatda boʻlish ruhida tarbiyalash, qasamyodga rioya qilish;
ustav tartibini saqlash;
qonuniylikka soʻzsiz rioya qilinishini taʼminlash;
boshliqlarning oʻzlariga boʻysunuvchilarga nisbatan kundalik talabchanligi, ular toʻgʻrisida doimiy ravishda gʻamxoʻrlik qilishi, ularning shaxsiy qadr-qimmatini hurmat qilishi, ishontirish va majbur qilish chora-tadbirlarini mohirlik bilan qoʻshib olib borish va toʻgʻri qoʻllash orqali erishiladi.
4. Boshliq oʻziga boʻysunuvchilar oʻrtasida intizomning ahvoli uchun javob beradi. U Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, respublika Hukumatining qarorlari va farmoyishlariga, qasamyod va mazkur Ustav talablariga, axloq normalariga rioya qilishda ularga doimiy ravishda namuna boʻlishi, boʻysunuvchilarda xizmat burchini, shaʼn va qadr-qimmatni anglashni rivojlantirish va qoʻllab-quvvatlash, tashabbusni, xizmatda tirishqoqlik va oʻzini koʻrsatishni ragʻbatlantirishi hamda dangasa va ishyoqmaslarni qattiq jazolashi kerak.
Boshliqlarning asosiy eʼtibori boʻysunuvchilarning individual sifatlarini oʻrganishga, ular oʻrtasidagi Ustavga oid oʻzaro munosabatlarni qoʻllab-quvvatlashga, jamoani jipslashtirishga, boʻysunuvchilarning qilmishlari sabablarini oʻz vaqtida aniqlash va ularning oldini olishga, intizomni buzuvchilarga nisbatan murosasizlik munosabatini yaratishga qaratilishi kerak. Bunda u jamoaning taʼsir kuchidan har tomonlama foydalanishi shart.
5. Boʻysunuvchi tomonidan intizom buzilgan taqdirda boshliq bunday harakatlarga yoʻl qoʻyilmasligi toʻgʻrisida ogohlantirishi, sodir etilgan qilmishning ogʻirligiga va aybdorlik darajasiga koʻra esa aybdorni intizomiy jazoga tortishga yoki xodimning qilmishi toʻgʻrisidagi materiallarni koʻrib chiqish uchun or-nomus oʻrtoqlik sudiga berishga haqlidir.
Bojxona organlarining intizomiy jazoga tortilgan xodimlari, basharti ularning harakatlarida huquqni buzish tarkibiga kiruvchi belgilar mavjud boʻlsa, maʼmuriy va jinoiy javobgarlikka tortishdan ozod qilinmaydi.
6. Ragʻbatlantirishni va intizomiy jazoni faqat toʻgʻridan toʻgʻri boshliqlargina qoʻllashlari mumkin, mazkur Ustavning 25-bandida nazarda tutilgan hollar bundan mustasno.
Bojxona organlari mansabdor shaxslari xizmat boʻyicha boʻysunadigan boshliqlar toʻgʻridan toʻgʻri boshliqlar hisoblanadi.
Boʻysunuvchiga eng yaqin toʻgʻridan toʻgʻri boshliq bevosita boshliq hisoblanadi.
7. Bojxona organlarining xizmat boʻyicha bir-biriga boʻysunmaydigan mansabdor shaxslari katta yoki kichik mansabdor shaxslar boʻlishi mumkin. Katta boshliqlik maxsus unvonlar bilan belgilanadi.
8. Bojxona organlarining bir-biriga boʻysunmaydigan mansabdor shaxslari tomonidan xizmat birgalikda amalga oshirilgan taqdirda, ularning xizmat boʻyicha oʻzaro munosabatlari boshliq tomonidan belgilab qoʻyilmaganda ulardan lavozim boʻyicha yuqori turadigani, lavozimlari teng boʻlganda esa — yuqori unvonlisi boshliq hisoblanadi va egallab turgan lavozimi boʻyicha oʻziga berilgan intizomiy hokimiyatdan foydalanadi.
9. Lavozim vaqtinchalik bajarib turilgan taqdirda, bu haqda buyruqda eʼlon qilinganda boshliq intizomiy hokimiyatdan vaqtinchalik bajarayotgan lavozimi boʻyicha foydalanadi.
10. Boshliqning buyrugʻi soʻzsiz, aniq va muddatida bajarilishi kerak.
11. Bojxona organlarining mansabdor shaxslari uchrashganida (yonidan oʻtib ketishayotganda) bir-birlari bilan, shuningdek Qurolli Kuchlarning, MXX, IIV, Favqulodda vaziyatlar vazirligi organlarining harbiy xizmatchilari bilan Oʻzbekiston Respublikasi Qurolli Kuchlarining safda yurish ustavida belgilangan qoidaga qatʼiy amal qilgan holda salomlashadilar.
II. BOJXONA ORGANLARINING MANSABDOR ShAXSLARIGA NISBATAN QOʻLLANADIGAN RAGʻBATLANTIRIShLAR
12. Bojxona organlarining mansabdor shaxslariga nisbatan quyidagi ragʻbatlantirishlar qoʻllanadi:
a) tashakkur bildirish;
b) qimmatbaho sovgʻa yoki pul bilan mukofotlash;
v) Faxriy yorliq bilan mukofotlash;
g) navbatdagi unvonni muddatidan oldin berish;
d) lavozim boʻyicha nazarda tutilganidan bir pogʻona yuqori unvon berish.
Bojxona organlarining mansabdor shaxslari nomi ragʻbatlantirish tartibida Hurmat taxtasiga, Davlat bojxona qoʻmitasining Solnoma kitobiga yozib qoʻyilishi, shuningdek bojxona organlarining koʻkrak nishoni bilan mukofotlanishi mumkin.
Bojxona organlarining mansabdor shaxslari alohida xizmatlari uchun Davlat bojxona qoʻmitasi raisi tomonidan davlat mukofotlariga taqdim etilishi mumkin.
Ragʻbatlantirish tadbirlari sifatida ushbu Ustav 14-bandining “a”, “b” va “v” kichik bandlarida nazarda tutilgan ilgari berilgan intizomiy jazoni muddatidan oldin olib tashlash ham qoʻllanishi mumkin.
13. Davlat bojxona qoʻmitasi oʻquv yurtlarida, ushbu Ustavning 12-bandida nazarda tutilgan ragʻbatlantirishlardan tashqari, oʻqish kursini aʼlo baholar bilan tugallashgan kursantlar va tinglovchilar nomini Hurmat taxtasiga yozib qoʻyish tarzidagi ragʻbatlantirishlar qoʻllanadi.
III. BOJXONA ORGANLARI MANSABDOR ShAXSLARIGA QOʻLLANADIGAN INTIZOMIY JAZOLAR
14. Bojxona organlarining kichik boshliqlar tarkibiga kiruvchi shaxslarga quyidagi jazolar qoʻllanilishi mumkin:
a) tanbeh;
b) hayfsan;
v) qattiq hayfsan;
g) bojxona organlaridan boʻshatish.
15. Davlat bojxona qoʻmitasi oʻquv yurtlarida mazkur ustavning 14-bandida sanab oʻtilgan jazolardan tashqari bir oy muddatgacha oʻquv yurtidan tashqariga chiqishdan mahrum etish va xizmat boʻyicha navbatdan tashqari naryadga tayinlash sifatida jazolar qoʻllaniladi.
16. Oʻrta va katta boshliqlar tarkibiga kiruvchi shaxslarga quyidagi jazolar qoʻllanilishi mumkin:
a) tanbeh;
b) hayfsan;
v) qattiq hayfsan;
g) xizmatga toʻliq munosib emasligi toʻgʻrisida ogohlantirish;
d) lavozimni pasaytirish;
e) maxsus unvonni bir pogʻonaga pasaytirish;
j) bojxona organlaridan boʻshatish.
17. Oliy boshliqlar tarkibiga kiruvchi shaxslarga quyidagi jazolar qoʻllanilishi mumkin:
a) tanbeh;
b) hayfsan;
v) qattiq hayfsan;
g) xizmatga toʻliq munosib emasligi toʻgʻrisida ogohlantirish;
d) lavozimni pasaytirish;
e) bojxona organlaridan boʻshatish.
18. Bojxona organlarining bojxona organlari koʻkrak nishoni bilan mukofotlangan, nomi Hurmat taxtasiga va Davlat bojxona qoʻmitasining Solnoma kitobiga yozib qoʻyilgan mansabdor shaxslariga koʻkrak nishonidan mahrum qilish, Hurmat taxtasidan olib qoʻyish va Davlat bojxona qoʻmitasining Solnoma kitobidan oʻchirish kabi jazolar qoʻllanilishi mumkin.
IV. BOShLIQLARNING RAGʻBATLANTIRISh VA INTIZOMIY JAZOLAR QOʻLLASh BOʻYIChA HUQUQLARI
19. Boshliqlar tomonidan ragʻbatlantirishlar va intizomiy jazolar ularga berilgan huquqlar doirasida qoʻllaniladi. Ragʻbatlantirishlar va intizomiy jazolarni qoʻllash boʻyicha boshliqlar roʻyxati va ularning huquqlari mazkur Ustavga ilovada belgilangan.
20. Agar bojxona organlari mansabdor shaxsiga mazkur boshliq fikricha, uning huquq doirasidan tashqari ragʻbatlantirish choralarini qoʻllash zarurati tugʻilsa, u bu toʻgʻrida toʻgʻridan toʻgʻri katta boshligʻiga iltimosnoma kiritadi.
21. Agar boshliq boʻysunuvchi tomonidan sodir etilgan qilmishning ogʻirligi munosabati bilan oʻziga berilgan intizomiy huquqlarini yetarli emas deb hisoblasa, u holda u toʻgʻridan toʻgʻri katta boshliq huquq bilan aybdorga jazo qoʻllash toʻgʻrisida taklif kiritadi.
22. Oʻziga berilgan intizomiy huquqlarni oshirib yuborgan yoki mazkur Ustavda nazarda tutilmagan jazoni qoʻllagan boshliq buning uchun javob beradi, berilgan jazo esa bu jazoni bergan boshliq tomonidan yoki toʻgʻridan toʻgʻri katta boshliq tomonidan bekor qilinadi.
23. Katta boshliq jazoning qattiqligi sababli kichik boshliq tomonidan berilgan intizomiy jazoni bekor qilish yoki yengillashtirish huquqiga ega emas, agar jazo bergan boshliq oʻziga berilgan huquqlarni oshirib yubormasa.
Katta boshliq kichik boshliq tomonidan berilgan intizomiy jazo yengilligi sababli sodir etilgan qilmishning ogʻirligiga toʻgʻri kelmaydi deb hisoblasa, uni bekor qilishi va qattiqroq jazo berishi mumkin.
24. Lavozimni pasaytirish yoki bojxona organlaridan boʻshatish sifatidagi intizomiy jazo mansabga tayinlash huquqi, berilgan boshliqlar tomonidan qoʻllaniladi.
V. ALOHIDA HOLLARDA INTIZOMIY JAZOLAR BERISh
25. Bojxona organlari mansabdor shaxsi tomonidan temir yoʻl, havo, suv yoki boshqa aloqa yoʻllarida ketayotganda, shuningdek taʼtilda, xizmat safarida yoki davolanishda boʻlgan paytida intizom buzilgan taqdirda, intizom buzilganligi haqida xabardor boʻlgan mahalliy bojxona organi boshligʻi intizom buzilishini toʻxtatish choralarini koʻradi va bu haqda intizomni buzgan shaxsining xizmat joyiga xabar beradi.
Bojxona organlarining mansabdor shaxsi xizmat joyiga qaytib kelgandan soʻng intizomni buzganligi haqida oʻzining bevosita boshligʻiga axborot berishga majburdir. Axborot bermagan shaxs intizomiy tartibda javob beradi.
VI. RAGʻBATLANTIRIShLAR, INTIZOMIY JAZOLARNI QOʻLLASh VA INTIZOMIY JAZOLARNI IJRO ETISh TARTIBI
26. Ragʻbatlantirishlar buyruqlar bilan eʼlon qilinadi. Tashakkur bildirish va ogʻzaki tanbeh ham buyruqda, ham ogʻzaki eʼlon qilinishi mumkin.
Ragʻbatlantirishlar toʻgʻrisida bojxona organlarining mansabdor shaxsiga shaxsan, saf oldida yoki yigʻilishda eʼlon qilinadi.
Bir marta oʻrnak koʻrsatganlik uchun bojxona organlari mansabdor shaxsiga faqat bitta ragʻbatlantirish eʼlon qilinishi mumkin.
Ragʻbatlantirish turini aniqlashda mansabdor shaxsning xizmatlari xususiyati yoki koʻrsatgan oʻrnagi, shuningdek uning xizmatga munosabati eʼtiborga olinadi.
Bojxona organlarining intizomiy jazosi boʻlgan mansabdor shaxslariga ragʻbatlantirish, odatda, ilgari qoʻllanilgan jazoni olib tashlash sifatida qoʻllanilishi mumkin.
27. Intizomiy jazo sodir etilgan qilmishning ogʻirligiga va aybdorlik darajasiga muvofiq kelishi kerak. Jazo turini va chorasini belgilashda sodir etilgan qilmishning xususiyati, vaziyatlari, uning oqibatlari, aybdorning oldingi xulq-atvori, uning oʻziga yuklangan xizmat vazifalarini bajarishga munosabati eʼtiborga olinadi.
Aybdor bir necha marta qilmish sodir etgan yoki guruh tarkibida intizomni buzgan, qilmishni xizmat vazifalarini bajarish paytida, mast holda sodir etgan yoki qilmish oqibatida tartib jiddiy ravishda buzilgan taqdirda unga qattiqroq jazo chorasi qoʻllanilishi mumkin.
Jazoni qoʻllashdan oldin aybdordan tushuntirish xati olinishi kerak.
Jazoni qoʻllashda boshliq oʻziga boʻysunuvchining shaxsini kamsitmasligi va qoʻpollik qilmasligi kerak.
28. Sodir etilgan qilmish uchun faqat bitta jazo qoʻllaniladi.
Intizom bir necha shaxs bilan birgalikda sodir etilgan taqdirda jazo har bir aybdorga alohida qoʻllaniladi.
29. Lavozimini yoki unvonini pasaytirish sifatidagi jazo chorasi, odatda, aybdorga ilgari qoʻllanilgan jazo choralari zarur darajada taʼsir etmagan taqdirda qoʻllaniladi.
30. Mansabdor shaxslarni bojxona organlaridan boʻshatish eng soʻnggi intizomiy jazo hisoblanadi va intizomni muntazam ravishda buzganlik yoki bojxona organlarida xizmatda boʻlishga toʻgʻri kelmaydigan qilmish uchun qoʻllanilishi mumkin.
31. Intizomiy jazo sodir etilgan qilmish haqida boshliqqa maʼlum boʻlgan kundan boshlab 10 sutka mobaynida, xizmat tekshiruvi oʻtkazilgan yoki jinoiy ish qoʻzgʻatilgan taqdirda — xizmat tekshiruvi tugagan yoki jinoiy ish toʻxtatilgan kundan 10 sutkadan kechiktirmay eʼlon qilinishi kerak, aybdorning kasal boʻlgan yoki taʼtilda boʻlgan vaqti bunga kirmaydi.
Qilmish sodir etilgan kundan bir yildan ortiq vaqt oʻtgan boʻlsa intizomiy jazo qoʻllanilishi mumkin emas.
Bojxona organlarining mansabdor shaxslariga xizmatni oʻtash paytida sodir etilgan qilmishlar uchun intizomiy jazo smenadan soʻng yoki ular boshqa shaxslar bilan almashtirilgandan soʻng qoʻllaniladi.
32. Eng zarur, kechiktirib boʻlmaydigan hollarda qilmish sodir etgan bojxona organlarining mansabdor shaxslari xizmat yuzasidan u boʻysunadigan boshliq tomonidan xizmat vazifalarini bajarishdan chetlashtirib qoʻyilishi mumkin.
33. Mast holda boʻlgan aybdorga intizomiy jazo berish, shuningdek undan har qanday tushuntirishlar olish uning hushyor boʻlguniga qadar qoldiriladi.
34. Intizomiy jazolar: tanbeh, hayfsan, navbatdan tashqari naryadga tayinlash, oʻquv yurti, boʻlinma hududidan tashqariga chiqishdan mahrum etish — ogʻzaki yoki buyruqda eʼlon qilinishi mumkin. Qolgan jazolar buyruqda eʼlon qilinadi.
Intizomiy jazo berilganligi toʻgʻrisida bojxona organlari mansabdor shaxsiga shaxsan, saf oldida yoki yigʻilishda eʼlon qilinadi.
35. Intizomiy jazo darhol, ayrim hollarda — berilgan kundan boshlab bir oydan kechiktirmay ijro etiladi. Bir oy muddat oʻtgandan soʻng jazo ijro etilmaydi, ammo hisobga olinadi.
Berilgan jazolarni ijro etmaslikda aybdor boʻlgan shaxslar intizomiy tartibda javob beradilar.
36. Shikoyat qilingan hollarda berilgan intizomiy jazoning ijro etilishi toʻxtatilmaydi.
37. Bojxona organlari xodimiga buyruq bilan berilgan intizomiy jazo, agar jazo berilgan kundan boshlab yil mobaynida u yangi intizomiy jazoga tortilmasa, olib tashlangan deb hisoblanadi. Taqdirlash tartibida jazo bir yil tugamasdan olib tashlanishi mumkin.
Ogʻzaki berilgan jazo bir oy oʻtgach olib tashlangan deb hisoblanadi.
38. Intizomiy jazoni ragʻbatlantirish tartibida muddatidan oldin olib tashlash uni bergan boshliq tomonidan, unga teng boʻlgan yoki toʻgʻridan toʻgʻri katta boshliq tomonidan amalga oshiriladi.
Katta boshliq tomonidan berilgan intizomiy jazoni olib tashlash uchun bevosita boshliq instansiya boʻyicha iltimosnoma yuboradi.
Ogʻzaki berilgan jazodan boshqa intizomiy jazoni olib tashlash buyruq bilan amalga oshiriladi, u haqda manfaatdor shaxsga shaxsan, saf oldida yoki yigʻilishda eʼlon qilinadi.
39. Lavozimni pasaytirish sifatidagi intizomiy jazo olgan shaxsni xizmatda yuqori lavozimga koʻtarish masalasi har biri alohida holda umumiy asoslarda hal etiladi.
40. Maxsus unvonni pasaytirish sifatida intizomiy jazo qoʻllangan hollarda ilgarigi unvon, agar jazolangan shaxs namunali xizmati va benuqson xulqi bilan oʻzining tuzalayotganligini koʻrsatsa, unvon pasaytirilgandan soʻng kamida bir yildan soʻng tiklanishi mumkin.
41. Barcha ragʻbatlantirishlar va intizomiy jazolar hisobga olib borilishi kerak, ogʻzaki eʼlon qilinganlari bundan mustasno.
Ragʻbatlantirishlar va intizomiy jazolar hisobi Davlat bojxona qoʻmitasi tomonidan belgilangan tartibda olib boriladi.
VII. TAKLIFLAR, ARIZALAR VA ShIKOYATLAR TOʻGʻRISIDA
42. Bojxona organlarining har bir mansabdor shaxsi subordinatsiyaga rioya qilgan holda yuqori turuvchi boshliqqa, shuningdek bevosita boshliqlar tomonidan xizmat boʻyicha belgilangan huquqlarni buzganlik toʻgʻrisida unga nisbatan qilingan noqonuniy xatti-harakat yoki nohaqlik uchun tegishli davlat instansiyalariga yozma holda ariza berish yoki shikoyatnoma yozish huquqiga egadir.
43. Arizalarda yoki shikoyatlarda bayon qilingan masalalarni hal qilish vakolatiga kirmaydigan boshliq ularni kechi bilan besh kun muddatda tegishli organ (muassasa)ga joʻnatadi, bu haqda arizachini xabardor qiladi.
Shikoyatlarning xatti-harakatlari ustidan shikoyat qilinayotgan boshliqlarning koʻrib chiqishlari uchun yuborilishi taqiqlanadi.
44. Oʻziga boʻysunuvchilarga nisbatan ular tomonidan berilgan ariza yoki shikoyat uchun noqonuniy xatti-harakat qilishga yoki nohaqlikka yoʻl qoʻygan boshliq, agar uning xatti-harakati jinoiy javobgarlikka olib bormasa, intizomiy tartibda javobgarlikka tortilishi kerak.
45. Arizalar yoki shikoyatlar bir oygacha boʻlgan muddatda, qoʻshimcha oʻrganib chiqishni va tekshirishni talab qilmaydiganlari esa — asosiy masalani hal qilishi shart boʻlgan organga kelib tushgan kundan boshlab koʻpi bilan 15 kunda hal etiladi.
Arizalarni yoki shikoyatlarni hal etish uchun maxsus tekshirishlar, qoʻshimcha materiallar talab qilish yoxud boshqa chora-tadbirlar koʻrish zarur boʻlgan hollarda arizalar yoki shikoyatlarni hal qilish muddatlari, istisno tariqasida, ariza bergan yoki shikoyat yozgan shaxsga bu haqda xabar bergan holda, koʻpi bilan bir oyga uzaytirilishi mumkin.
46. Qasddan yolgʻon ariza bergan yoki shikoyat yozgan bojxona organlarining mansabdor shaxslari belgilangan tartibda javobgarlikka tortiladilar.
47. Bojxona organlarining mansabdor shaxslari oʻzlarining fuqarolik huquqlari cheklangan va buzilgan, izzat-nafslari va qadr-qimmatlari kamsitilgan hollarda qonunchilik bilan belgilangan tartibda sudga murojaat qilish huquqiga egadirlar.
Bojxona organlarining Intizomiy ustaviga
ILOVA
ILOVA
Ragʻbatlantiradigan va intizomiy jazo beradigan mansabdor shaxslar va ularning huquqlari
ROʻYXATI
|
T/r |
Lavozimlarning nomi |
Boshliqlarning huquqlari | |
|
ragʻbatlantirishlarni qoʻllash boʻyicha |
intizomiy jazolar berish boʻyicha | ||
|
1. |
Bojxona posti, bojxona kompleksi boshligʻi, DBQB (MBK) hududiy organlari va DBQ markaziy apparati boʻlim boshliqlari | Tashakkur bildirish Ular tomonidan ilgari berilgan jazolarni olib tashlash |
Ogʻzaki: Tanbeh berish va hayfsan eʼlon qilish |
|
2. |
DBQB (MKB) boshliqlarining oʻrinbosarlari, DBQ markaziy apparati boshqarmalari boshliqlari va oʻquv boʻlinmalari boshliqlari | Tashakkur bildirish Ular tomonidan ilgari berilgan intizomiy jazolarni olib tashlash |
Ogʻzaki: Tanbeh berish, hayfsan va qattiq hayfsan eʼlon qilish |
|
3. |
DBQB (MKB) boshliqlari | Tashakkur bildirish Qimmatbaho sovgʻalar yoki pul bilan mukofotlash Hurmat taxtasiga qoʻyish Ular tomon�dan ilgari berilgan jazolarni olib tashlash |
Tanbeh berish Hayfsan eʼlon qilish Qattiq hayfsan eʼlon qilish Xizmatga toʻliq munosib emasligi toʻgʻrisida ogohlantirish Kichik boshliqlar tarkibidagi shaxslarni bojxona organlaridan boʻshatish |
|
4. |
Oʻzbekiston Respublikasi Davlat bojxona qoʻmitasi raisining oʻrinbosari | Bojxona organlarining mansabdor shaxslariga nisbatan ragʻbatlantirish huquqidan foydalanadi, oʻrta va katta boshliqlar tarkibiga muddatidan ilgari navbatdagi maxsus unvonlar berish, shuningdek oʻrta va katta boshliqlar tarkibidagi shaxslar maxsus unvonini bir pogʻonaga pasaytirish huquqi bundan mustasno. | |
|
5. |
Oʻzbekiston Respublikasi Davlat bojxona qoʻmitasi raisi | Bojxona organlarining mansabdor shaxslariga nisbatan Intizomiy ustavning toʻla hajmda ragʻbatlantirish va jazolash huquqidan foydalanadi. | |
