O‘zbekiston Respublikasi Vazirlar Mahkamasining 1994-yil 10-dekabrdagi 594-son qarorining 4-bandi ijrosini davom ettirish maqsadida O‘zbekiston Respublikasi Mehnat va aholini ijtimoiy muhofaza qilish vazirligi va O‘zbekiston Respublikasi Moliya vazirligi qaror qiladi:

1. Uchquduq, Zarafshon, Nurobod shaharlari va shahar tipidagi Zafarobod posyolkasi budjet muassasalari va tashkilotlari xodimlariga muayyan davr ishlaganlik uchun oylik to‘lovlar to‘lash tartibi to‘g‘risidagi Nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilganidan so‘ng o‘n kundan keyin kuchga kiradi.

3. O‘zbekiston Respublikasi Mehnat va Moliya vazirligi tomonidan 1995-yil 7-apreldagi 175/03-1, 21-2/119-son bilan tasdiqlangan “Uchquduq, Zaravshon, Nurobod shaharlari va shahar tipidagi Zafarobod posyolkasi budjet muassasalari va tashkilotlari xodimlariga muayyan davr ishlaganlik uchun maxsus to‘lov tizimini joriy etish to‘g‘risida”gi Nizom o‘z kuchini yo‘qotgan deb topilsin.

Ushbu Nizom O‘zbekiston Respublikasi Vazirlar Mahkamasining 1994-yil 10-dekabrdagi 594-son “Qizilqumnodirmetaloltin” konserni va Olmaliq kon-metallurgiya kombinati korxonalarini yuqori malakali mutaxassislar va ishchilar bilan ta’minlash chora-tadbirlari to‘g‘risida”gi qarorning 4-bandiga asosan ishlab chiqilgan.

Nizom Uchquduq, Zaravshon, Nurobod shaharlari va shahar tipidagi Zafarobod posyolkasi hududida joylashgan budjet muassasalari va tashkilotlari xodimlariga muayyan davr uchun ishlaganlik uchun oylik to‘lovlar to‘lash tartibini belgilaydi.

1. Uchquduq, Zarafshon, Nurobod shaharlari va shahar tipidagi Zafarobod posyolkasi budjet tashkilotlari xodimlariga muayyan davr ishlaganlik uchun oylik to‘lovlar, xodimning yuqorida keltirilgan shaharlardagi budjet tashkilotlarida ishlagan ish stajidan kelib chiqib, quyidagi miqdorlarda belgilanadi:

2. Muayyan davr ishlaganlik uchun belgilangan miqdordagi oylik to‘lovlarning to‘lanish huquqi, xodimlar budjet muassasalari va tashkilotlarida ishlay boshlagan paytidan boshlab kelib chiqadi.

Misol uchun, xodim 2000-yilning 1-iyulidan ishga qabul qilingan va 2000-yilning 1-iyuldan unga muayyan davr uchun stavka (oklad)ning 0,25 foiz miqdorida oylik haq to‘lanadi.

3. Muayyan davr ishlaganlik uchun oylik to‘lovlarni amalga oshirish huquqini beruvchi ish stajiga quyidagilar kiritiladi:

1) Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlarida ishlagan davri;

2) Xodim haqiqatda ishlamagan bo‘lsa ham, lekin amaldagi qonunchilikka asosan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlarida xodimning ish joyi (lavozimi) saqlangan davr.

3¹. Mulkchilik shaklidan qat’i nazar boshqa tashkilotdan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlariga ishga kirganda, ish staji saqlanib qolinadi.

Bunda, mulkchilik shaklidan qat’i nazar boshqa tashkilotdagi (Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlari, shuningdek Vazirlar Mahkamasining 2020-yil 8-yanvardagi 5-F-son farmoyishiga asosan “Navoiy kon-metallurgiya kombinati” davlat korxonasi tizimidan Maktabgacha ta’lim vazirligi tizimiga o‘tkazilgan maktabgacha ta’lim tashkilotlaridan tashqari) ish staji, budjet tashkilotlari xodimlariga muayyan davr ishlaganlik uchun oylik to‘lovlar to‘lanishi huquqini beradigan ish stajiga kiritilmaydi.

4. “Yagona milliy mehnat tizimi” idoralararo dasturiy-apparat kompleksida avtomatik tarzda shakllantiriladigan, QR-kod bilan tasdiqlangan elektron mehnat daftari xodimning mehnat stajini tasdiqlovchi asosiy hujjat hisoblanadi.

Mehnat daftarchasida aks ettirilmagan ish staji, xodim ishlagan muassasa va tashkilot rahbari tomonidan imzolangan ma’lumotnoma bilan tasdiqlanishi mumkin.

5. Muayyan davr ishlaganlik uchun oylik to‘lovlar xodimning oylik tarif stavkasi yoki lavozim okladidan kelib chiqib hisoblanadi.

6. Muayyan davr ishlaganlik uchun oylik to‘lovlar shu oy davomida ishlagan vaqti, mehnat ta’tili va vaqtinchalik mehnatga layoqatsizlik davri uchun ham, shuningdek, amaldagi qonunchilikka asosan xodimning to‘liq yoki qisman oylik ish haqi saqlangan davrlari uchun to‘lanadi.

7. Agar xodim kalendar oyi davomida ish muayyan davr ishlaganlik uchun oylik to‘lov olish huquqi paydo bo‘lsa, ushbu to‘lovni birinchi hisoblash ushbu to‘lovni olish huquqi paydo bo‘lgandan keyin ishlagan vaqt uchun amalga oshiriladi.

8. Muayyan davr ishlaganlik uchun oylik to‘lovlar rayon koeffitsiyentlari va cho‘l, suvsiz, baland tog‘ hududlarida ishlaganlik uchun belgilangan koeffitsiyentlar qo‘llaniladigan mehnat haqiga qo‘shib hisoblanadi.

9. Muayyan davr ishlaganlik uchun oylik to‘lovlar pensiyalar, mehnat ta’tili uchun beriladigan haq, ishdan bo‘shatish nafaqasi, xodimning o‘z mehnat vazifalarini bajarishi vaqtida tan jarohati yoki sog‘lig‘ining boshqacha tarzda shikastlanishi sababli yetkazilgan zararni qoplashda o‘rtacha oylik ish haqini hisoblash, shuningdek, o‘rtacha oylik ish haqini hisoblab chiqarish talab etiladigan holatlarda inobatga olinadi.