Oʻzbekiston Respublikasi Prezidentining
Farmoni
Strategik rejalashtirish va rivojlanish tizimini joriy etish boʻyicha tashkiliy chora-tadbirlar toʻgʻrisida
Respublikada strategik rejalashtirish va rivojlanishning yagona va kompleks tizimini shakllantirish, strategik ahamiyatga ega hujjatlarni ishlab chiqish, amalga oshirish, monitoring qilish va samaradorligini baholashning barqaror va samarali mexanizmlarini joriy etish, ushbu sohada vazirliklar, idoralar, barcha darajadagi mahalliy ijro etuvchi hokimiyat organlari, shuningdek, tahliliy markazlar va ilmiy-tadqiqot muassasalarining kelishilgan holda faoliyatini taʼminlash maqsadida qaror qilaman:
I. Maqsad va vazifalar
1. 2025-yil 1-noyabrdan boshlab “maqsad — harakat — natija” zanjiri asosida strategik ahamiyatga ega hujjatlarni ishlab chiqish, amalga oshirish, monitoring qilish va baholashni oʻz ichiga olgan strategik rejalashtirish va rivojlanish tizimi joriy etilsin.
2. Quyidagilar strategik rejalashtirish va rivojlanish tizimining asosiy vazifalari etib belgilansin:
(a) strategik ahamiyatga ega hujjatlarni ishlab chiqish, amalga oshirish, monitoring qilish va samaradorligini baholashning barqaror va samarali mexanizmini shakllantirish;
(b) strategik rejalashtirish va rivojlanish hujjatlarining yagona iyerarxiyasi va oʻzaro muvofiqligini taʼminlash;
(v) strategik rejalashtirish va rivojlanish sohasida vazirliklar, idoralar va mahalliy ijro etuvchi hokimiyat organlarining oʻzaro hamkorligi tartibi, vakolatlari, funksional vazifalari va javobgarlik chegaralarini belgilash;
(g) chuqur ilmiy tadqiqotlar, tendensiyalar va prognozlarni xolisona tahlil qilish asosida davlat siyosatining strategik ustuvorliklarini shakllantirish va amalga oshirish;
(d) aniq, shaffof va oʻlchanadigan koʻrsatkichlarga asoslangan strategik maqsadlarga erishish samaradorligini monitoring qilish va baholash tizimini joriy etish;
(j) sohalar, tarmoqlar va hududlarni rivojlantirishga yangicha yondashuvlarni joriy etish, zamonaviy formatlar va innovatsion usullar asosida ishlarni tashkil qilish;
(z) strategik tahlil va rejalashtirish sohasida yuqori malakali kadrlar yangi avlodini tayyorlashning integratsiyalashgan tizimini yaratish.
II. Strategik rejalashtirish va rivojlanish tizimini joriy etish
3. Strategik rejalashtirish hujjatlarining iyerarxiyasi quyidagi tartibda belgilansin:
(a) birinchi darajali strategik rejalashtirish hujjatlari mamlakatni, uning hududlarini ijtimoiy-iqtisodiy, ijtimoiy-siyosiy rivojlantirishda davlat siyosatini shakllantirish va amalga oshirish bilan bogʻliq ustuvor yoʻnalishlarni, boshqaruvning konseptual yondashuvlarini belgilovchi konsepsiyalar shaklida qabul qilinadi. Bunda konsepsiya muvofiqlashtirish, resurslar bilan taʼminlash va ularni amalga oshirish samaradorligini baholashning umumiy mexanizmlarini oʻz ichiga olgan muayyan strategiyalarni ishlab chiqish uchun asos boʻlib hisoblanadi;
(b) ikkinchi darajali strategik rejalashtirish hujjatlari oʻrta va uzoq muddatli istiqbolda mamlakat, hudud, tarmoq yoki davlat va jamiyat hayotining boshqa sohasini rivojlantirishning maqsadi, vazifalari, maqsadli koʻrsatkichlariga erishishga qaratilgan hamda ularni amalga oshirishning aniq belgilangan mexanizmlari va resurslarini oʻz ichiga olgan strategiyalar shaklida qabul qilinadi;
(v) uchinchi darajali strategik rejalashtirish hujjatlari strategiyaning maqsad va vazifalariga erishishga qaratilgan oʻzaro bogʻliq batafsil chora-tadbirlar majmuini belgilovchi dasturlar (“yoʻl xaritalari”, chora-tadbirlar rejalari) shaklida qabul qilinadi.
4. Belgilansinki:
(a) birinchi darajali strategik rejalashtirish hujjatlari 7 yildan ortiq muddatga ishlab chiqiladi va qoida tariqasida Oʻzbekiston Respublikasi qonunlari bilan tasdiqlanadi;
(b) ikkinchi darajali strategik rejalashtirish hujjatlari 4 yildan 7 yilgacha boʻlgan muddatga ishlab chiqiladi va Oʻzbekiston Respublikasi Prezidentining hujjatlari bilan tasdiqlanadi. Bunda “Oʻzbekiston — 2030” strategiyasi va boshqa shu kabi keng qamrovli strategik rejalashtirish hujjatlari nisbati boʻyicha muayyan yoki bir necha soha, tarmoq yoki hudud boʻyicha strategik rejalashtirish hujjatlaridan yuqori hisoblanadi;
(v) uchinchi darajali strategik rejalashtirish hujjatlari 1 yildan 3 yilgacha boʻlgan muddatga ishlab chiqiladi va quyidagi tartibda tasdiqlanadi:
(i) “Oʻzbekiston — 2030” strategiyasi va boshqa shu kabi keng qamrovli strategik rejalashtirish hujjatlarini amalga oshirish boʻyicha Oʻzbekiston Respublikasi Prezidentining hujjatlari;
(ii) ikkinchi darajali boshqa strategik rejalashtirish hujjatlarini amalga oshirish boʻyicha Vazirlar Mahkamasining qarorlari qabul qilinadi.
5. Strategik rejalashtirish va rivojlanish tizimini joriy etishga qaratilgan birinchi navbatdagi chora-tadbirlarni amalga oshirish boʻyicha “yoʻl xaritasi” 1-ilovaga muvofiq tasdiqlansin.
III. Strategik rejalashtirish va rivojlanish tizimini muvofiqlashtirish
6. Quyidagilar:
(a) Tahliliy va tadqiqot tuzilmalari faoliyatini tashkil qilish boʻyicha muvofiqlashtiruvchi kengash Oʻzbekiston Respublikasi Prezidenti huzuridagi Strategik rejalashtirish va rivojlanish boʻyicha muvofiqlashtiruvchi kengash (keyingi oʻrinlarda — Muvofiqlashtiruvchi kengash) etib;
(b) Oʻzbekiston Respublikasi Prezidenti huzuridagi Strategik islohotlar agentligi Oʻzbekiston Respublikasi Prezidenti huzuridagi Strategik rivojlanish va islohotlar agentligi (keyingi oʻrinlarda — Agentlik) etib;
(v) Oʻzbekiston Respublikasi Prezidenti huzuridagi Strategik islohotlar agentligini qoʻllab-quvvatlash jamgʻarmasi Oʻzbekiston Respublikasi Prezidenti huzuridagi Strategik rivojlanish va islohotlar agentligini qoʻllab-quvvatlash jamgʻarmasi (keyingi oʻrinlarda — Jamgʻarma) etib qayta tashkil etilsin.
7. Muvofiqlashtiruvchi kengashga quyidagi qoʻshimcha vazifalar yuklatilsin:
(a) ijtimoiy-iqtisodiy, ijtimoiy-siyosiy, texnologik, gumanitar, ekologik va boshqa sohalardagi dolzarb muammolar hamda chaqiriqlarni tahlil qilish, ularni hal etish boʻyicha takliflar ishlab chiqish, shuningdek, mamlakatni strategik rivojlantirish boʻyicha gʻoya va tashabbuslarni shakllantirish;
(b) “Oʻzbekiston — 2030” strategiyasi, konsepsiyalar, strategiyalar va dasturlar (“yoʻl xaritalari”, chora-tadbirlar rejalari) bilan muvofiqligini taʼminlash nuqtai nazaridan strategik tashabbuslarni ishlab chiqish va ekspertizadan oʻtkazishni muvofiqlashtirish;
(v) konsepsiyalar, strategiyalar va dasturlarning (“yoʻl xaritalari”, chora-tadbirlar rejalari) “Oʻzbekiston — 2030” strategiyasi maqsadlari bilan toʻliq bogʻliqligi va uygʻunligini taʼminlash, shuningdek, ularning amalga oshirilishi samaradorligini monitoring qilish va baholash;
(g) jamiyat va davlat hayotining turli sohalari kesimida mamlakat rivojlanishini uzoq muddatli rejalashtirish boʻyicha faoliyatni tashkil etish.
8. Belgilab qoʻyilsinki:
(a) Muvofiqlashtiruvchi kengash vazirlik va idoralar, mahalliy ijro etuvchi hokimiyat organlari, shuningdek, davlat tahliliy markazlari va ilmiy-tadqiqot muassasalarining strategik rejalashtirish va rivojlanish sohasidagi faoliyatini muvofiqlashtirish uchun masʼul boʻlgan idoralararo kollegial organ hisoblanadi;
(b) Muvofiqlashtiruvchi kengash majlislarida mamlakatni ijtimoiy-iqtisodiy rivojlantirish hamda tegishli sohalarda kompleks islohotlarni chuqurlashtirish va liberallashtirish borasidagi strategik masalalar yuzasidan ishlab chiqilgan normativ-huquqiy hujjatlar loyihalarining maqsadga muvofiqligi koʻrib chiqiladi;
(v) Muvofiqlashtiruvchi kengash majlislarida qabul qilingan qarorlar barcha davlat organlari va tashkilotlari tomonidan bajarilishi majburiy boʻlgan bayonnomalar bilan rasmiylashtiriladi;
(g) Muvofiqlashtiruvchi kengash birinchi va ikkinchi darajali strategik rejalashtirish hujjatlari loyihalarini ularni qabul qilishning maqsadga muvofiqligi nuqtai nazaridan koʻrib chiqadi. Bunda maʼqullangan loyihalar koʻrib chiqish uchun Oʻzbekiston Respublikasi Prezidentiga kiritiladi;
(d) Agentlik, shuningdek, mazkur Farmonning 2-ilovasiga muvofiq roʻyxatdagi tahliliy markazlar va ilmiy-tadqiqot muassasalari nizomlari (ustavlari) va yillik ish rejalari, xorijiy tadbirlarda ishtirok etish dasturlari hamda tuzilmalari Muvofiqlashtiruvchi kengash bilan kelishilgan holda tasdiqlanadi;
(j) Muvofiqlashtiruvchi kengash Agentlik, shuningdek, mazkur Farmonning 2-ilovasiga muvofiq roʻyxatdagi tahliliy markazlar va ilmiy-tadqiqot muassasalari tuzilmalariga oʻzgartirishlar kiritish, shu jumladan, Muvofiqlashtiruvchi kengash huzuridagi Tadqiqotlarni qoʻllab-quvvatlash jamgʻarmasi, Strategik rivojlanish va islohotlar agentligini qoʻllab-quvvatlash jamgʻarmasi mablagʻlari, shuningdek, qonunchilik hujjatlarida taqiqlanmagan budjetdan tashqari boshqa manbalar hisobidan moliyalashtiriladigan qoʻshimcha shtat birliklarini kiritish huquqiga ega;
(z) davlat tahliliy markazlari va ilmiy-tadqiqot muassasalariga qonunchilik hujjatlarida hamda ularning yillik ish rejalarida nazarda tutilmagan boshqa vazifalar, funksiyalar va topshiriqlar yuklanishiga yoʻl qoʻyilmaydi.
IV. Strategik rejalashtirish va rivojlanish sohasida boshqaruv tizimini takomillashtirish
9. Belgilansinki, Agentlik:
(a) strategik rejalashtirish va rivojlanish tizimini tashkil etish, uni samarali joriy qilishga qaratilgan aniq mexanizmlarni ishlab chiqish, shuningdek, strategik rejalashtirish hujjatlari loyihalarini tayyorlashni tartibga solish boʻyicha vakolatli davlat organi;
(b) Muvofiqlashtiruvchi kengashning ishchi organi hisoblanadi.
10. Agentlikka 3-ilovaga muvofiq qoʻshimcha vazifalar yuklatilsin.
11. Muvofiqlashtiruvchi kengashga Agentlik huzurida quyidagilarni tashkil etish boʻyicha qarorlar qabul qilish huquqi berilsin:
(a) iqtisodiyotning asosiy tarmoqlari, shuningdek, alohida sohalar va yoʻnalishlarda joriy holatni oʻrganish hamda ularni modernizatsiya qilish, innovatsion va barqaror rivojlantirishga qaratilgan strategiyalar, takliflar va tashabbuslarni ishlab chiqish uchun sohalar va tarmoqlarni rivojlantirish masalalari boʻyicha loyiha ofislari;
(b) hududlarni kompleks rivojlantirish boʻyicha joriy holatni oʻrganish hamda strategiyalar, takliflar va tashabbuslarni ishlab chiqish, shuningdek, ularning hududiy rejalashtirish bilan muvofiqligini taʼminlash uchun hududiy rivojlanish masalalari boʻyicha loyiha ofislari;
(v) Oʻzbekiston Respublikasining tashqi aloqalari va eksport salohiyatini rivojlantirish, investitsiyalarni jalb etish, shuningdek, xalqaro tashkilotlar va moliya institutlari bilan oʻzaro hamkorlik qilish sohasidagi joriy holatni oʻrganish hamda takliflar va tashabbuslarni ishlab chiqish uchun xalqaro hamkorlik masalalari boʻyicha loyiha ofislari.
12. Belgilansinki:
(a) tizimda, sohada yoki tarmoqda mavjud modelni tubdan oʻzgartirish, institutsional, tarkibiy, huquqiy va funksional yangilash orqali kompleks va barqaror rivojlanishni taʼminlashga, boshqaruvning, bozor mexanizmlarining yoki ijtimoiy xizmatlarning sifat jihatidan yangi modelini shakllantirishga qaratilgan, strategik rejalashtirish hujjati hisoblanmaydigan hujjatlar loyihalari mazkur Farmonning 4-ilovasida belgilangan mezonlarga muvofiq strategik islohotlarni nazarda tutuvchi normativ-huquqiy hujjatlar loyihalari hisoblanadi;
(b) strategik islohotlarni nazarda tutuvchi normativ-huquqiy hujjatlar loyihalari vakolatli davlat organlari tomonidan Oʻzbekiston Respublikasi Prezidenti Administratsiyasiga kiritilguniga qadar Agentlik bilan kelishiladi, bunda ushbu tartibga rioya etmagan holda kiritilgan loyihalar koʻrib chiqilmaydi;
(v) huquqiy ekspertiza yakunlari boʻyicha strategik islohotlarni nazarda tutuvchi normativ-huquqiy hujjatlar loyihalarini Agentlik bilan kelishish toʻgʻrisida Adliya vazirligi tomonidan tavsiyalar beriladi;
(g) Agentlik tahliliy markazlar va ilmiy-tadqiqot muassasalari bilan hamkorlikda strategik islohotlarni nazarda tutuvchi normativ-huquqiy hujjatlar loyihalarini koʻrib chiqadi va natijalarga koʻra quyidagilar boʻyicha xulosa beradi:
(i) loyihani qabul qilishning asoslantirilganligi, belgilangan ustuvor yoʻnalishlar va maqsadlarni amalga oshirishga yoʻnaltirilganligi, “Oʻzbekiston — 2030” strategiyasi, shuningdek, boshqa tarmoq va hududiy strategiyalarga muvofiqligi;
(ii) maqsadlarning va ular bilan bogʻliq vazifalar, chora-tadbirlar, amalga oshirish mexanizmlari va vositalari, amaldagi va oʻlchanadigan maqsadli koʻrsatkichlar, shuningdek, muddatlar va ularga erishish uchun masʼullarning belgilanganligi;
(iii) belgilangan vazifalar, koʻrsatkichlar va chora-tadbirlarni amalga oshirishda moliyaviy-iqtisodiy, moddiy-texnik va boshqa resurslarning koʻzda tutilganligi;
(iv) raqamlashtirish, korrupsiyaning oldini olish va byurokratiyani kamaytirish, ochiqlik va jamoatchilik ishtirokini kengaytirish, gender tenglik, xususiy sektorni jalb qilish boʻyicha chora-tadbirlar qamrab olinganligi;
(v) belgilangan vazifalarning amalga oshirilishini monitoring qilish va baholash, hisobdorlik mexanizmlari mavjudligi.
V. Strategik rejalashtirish va rivojlanish tizimini ilmiy-uslubiy jihatdan va kadrlar bilan taʼminlash
13. Oʻzbekiston Respublikasi Prezidenti huzuridagi Qonunchilik va huquqiy siyosat institutiga (keyingi oʻrinlarda — Institut) quyidagi qoʻshimcha vazifalar yuklatilsin:
(a) strategik rejalashtirish va rivojlanishning ilmiy-uslubiy va siyosiy-huquqiy asoslarini ishlab chiqish va takomillashtirish;
(b) tahliliy markazlar va ilmiy-tadqiqot muassasalari tomonidan strategik rejalashtirish va rivojlanishning ilmiy-uslubiy va siyosiy-huquqiy asoslarini takomillashtirish sohasida oʻtkaziladigan ilmiy va tahliliy tadqiqotlarni muvofiqlashtirish;
(v) strategik rejalashtirish va rivojlanishning siyosiy-huquqiy asoslari sohasida yuqori malakali tahlilchi-mutaxassislar tayyorlash.
VI. Tashkiliy chora-tadbirlar
14. Belgilansinki:
(a) Agentlik vazirlik va idoralarning strategik rejalashtirish boʻyicha tarkibiy boʻlinmalari, shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining axborot-tahlil guruhlari faoliyatini muvofiqlashtiradi;
(b) vazirlik va idoralarning strategik rejalashtirish boʻyicha tarkibiy boʻlinmalari, shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining axborot-tahlil guruhlari rahbarlariga tegishli idora rahbari maslahatchisi maqomi beriladi, ularni lavozimga tayinlash va lavozimidan ozod etish Agentlik bilan majburiy tartibda kelishiladi;
(v) vazirlik va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablagʻlari hisobidan strategik rejalashtirish boʻyicha tarkibiy boʻlinmalar, shuningdek, axborot-tahlil guruhlari xodimlari yiliga kamida bir marta Davlat siyosati va boshqaruvi akademiyasida strategik rejalashtirish va rivojlanish, tahlil va natijadorlikni boshqarish boʻyicha maxsus oʻquv kurslarida oʻqitiladi.
15. Shunday tartib oʻrnatilsinki, unga muvofiq 2026-yildan boshlab “Oʻzbekiston — 2030” strategiyasini amalga oshirishga oid qabul qilinadigan har yilgi davlat dasturiga ishlab chiqiladigan strategik islohotlarni nazarda tutuvchi normativ-huquqiy hujjatlar loyihalari roʻyxati kiritiladi. Bunda Agentlik mazkur roʻyxatdagi normativ-huquqiy hujjatlarni ishlab chiqish va kelishish jarayonlarini muvofiqlashtirib boradi.
16. Agentlik Oʻzbekiston Respublikasi Prezidentining strategik rivojlanish boʻyicha maslahatchisi boʻlinmalari bilan birgalikda mahalliy va xorijiy konsultantlarni jalb qilgan holda ikki oy muddatda quyidagilarni nazarda tutuvchi Oʻzbekiston Respublikasi Prezidentining hujjati loyihasini kiritsin:
(a) strategik rejalashtirishni tashkil etish, strategik rejalashtirish hujjatlarini ishlab chiqish, kelishish va amalga oshirilishini monitoring qilish tartibi;
(b) rejalashtirish, maʼlumotlarni toʻplash, asosiy samaradorlik koʻrsatkichlarini (KPI) monitoring qilish, muammolarni aniqlash, prognozli tahlil oʻtkazish va strategik rejalashtirish hujjatlariga tuzatishlar kiritish imkonini beruvchi raqamli platformani (dashboard) ishlab chiqish;
(v) vazirlik va idoralar tomonidan yagona, kompleks va tizimli yondashuv asosida strategik rejalashtirish hujjatlarini ishlab chiqish, hisobotlarni taqdim etish va ularning amalga oshirilishini monitoring qilish, shuningdek, ushbu hujjatlarning bajarilishini baholash tizimini joriy etish boʻyicha tashkiliy chora-tadbirlar dasturi;
(g) yuklatilayotgan qoʻshimcha vazifalarni inobatga olgan holda Agentlik va Jamgʻarma faoliyatini tashkil etish tartibi;
(d) davlat boshqaruvida strategik rejalashtirish va rivojlanish sohasida malakali kadrlar tayyorlash tizimini yoʻlga qoʻyish.
VII. Farmon ijrosini tashkil qilish, taʼminlash va nazorat
17. Oʻzbekiston Respublikasi Prezidentining ayrim hujjatlariga 5-ilovaga muvofiq oʻzgartirish va qoʻshimchalar kiritilsin.
18. Adliya vazirligi uch oy muddatda manfaatdor vazirlik va idoralar bilan birgalikda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida takliflar kiritsin.
19. Mazkur Farmonning ijrosini nazorat qilish Oʻzbekiston Respublikasi Prezidentining strategik rivojlanish boʻyicha maslahatchisi S.U. Umurzakov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 30-oktabr,
PF-201-son
Oʻzbekiston Respublikasi Prezidentining 2025-yil 30-oktabrdagi PF-201-son Farmoniga
1-ILOVA
Strategik rejalashtirish va rivojlanish tizimini joriy etishga qaratilgan birinchi navbatdagi chora-tadbirlarni amalga oshirish boʻyicha
“YOʻL XARITASI”

T/r

Chora-tadbir nomi

Amalga oshirish mexanizmi

Ijro muddati

Masʼullar

1.

Mamlakatda strategik rejalashtirish va rivojlanish tizimini muvofiqlashtirish hamda ushbu tizimning samarador mexanizmlarini taʼminlashga qaratilgan huquqiy asoslarini yaratish.

Strategik rejalashtirish va rivojlanish tizimi joriy etilgani munosabati bilan birinchi navbatdagi vazifalarni amalga oshirish choralari boʻyicha quyidagilarni nazarda tutuvchi Oʻzbekiston Respublikasi Prezidentining qarori loyihasini kiritish:

strategik rejalashtirish tizimini tashkil etish tartibi, strategik rejalashtirish hujjatlarini ishlab chiqish, kelishish va amalga oshirilishini nazorat qilish;

rejalashtirish jarayonini avtomatlashtirish, maʼlumotlarni toʻplash, asosiy samaradorlik koʻrsatkichlariga (KPI) erishishni kuzatish, muammolarni aniqlash, prognozli tahlil va strategik rejalashtirish hujjatlariga tuzatishlar kiritish imkonini beruvchi raqamli platformani (dashboard) ishlab chiqish;

vazirlik va idoralar tomonidan strategik rejalashtirish hujjatlarini yagona, kompleks va tizimli yondashuv asosida ishlab chiqish, hisobotlarni taqdim etish va ularning amalga oshirilishini monitoring qilish, shuningdek, strategik rejalashtirish hujjatining bajarilishini baholash tizimini joriy etish boʻyicha chora-tadbirlar dasturi;

Agentlikka yuklatilgan qoʻshimcha vazifalarni inobatga olgan holda va uning faoliyatini samarali tashkil etishga qaratilgan Agentlikning va uni qoʻllab-quvvatlash jamgʻarmasi faoliyatining huquqiy asoslari, tuzilmasi va lavozimlar roʻyxati;

davlat boshqaruvida strategik rejalashtirish va rivojlanish sohasida malakali kadrlarni tayyorlash tizimini yoʻlga qoʻyish.

2025-yil noyabr

Strategik rivojlanish va islohotlar agentligi

2.

Vazirlik va idoralarning strategik rejalashtirish boʻyicha tarkibiy boʻlinmalari xodimlari faoliyatini muvofiqlashtirish tizimini yaratish.

Strategik rejalashtirish tizimini joriy etish boʻyicha quyidagi choralarni amalga oshirish:

vazirlik va idoralarning strategik rejalashtirish boʻyicha tarkibiy boʻlinmalarining xodimlari boʻyicha maʼlumotlar, shu jumladan xodimlar soni, sohaviy hisobdorligi, malakasi, ish haqi miqdori va vakant joylar toʻgʻrisidagi maʼlumotlar bazasini shakllantirish;

2025-yil dekabr

Strategik rivojlanish va islohotlar agentligi,

Davlat siyosati va boshqaruvi akademiyasi,

vazirlik va idoralar,

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

vazirlik va idoralarning strategik rejalashtirish boʻyicha tarkibiy boʻlinmalari hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Axborot-tahlil guruhlari rahbarlarini lavozimga tayinlash va ozod qilish masalalarini majburiy tartibda Strategik rivojlanish va islohotlar agentligi bilan kelishish tartibini belgilash;

2025-yil dekabr

vazirlik va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablagʻlari hisobidan strategik rejalashtirish boʻyicha tarkibiy boʻlinmalar, axborot-tahlil guruhlari xodimlarining yiliga kamida bir marta Davlat siyosati va boshqaruvi akademiyasida strategik rejalashtirish va rivojlanish, tahlil hamda natijadorlikni boshqarish boʻyicha maxsus oʻquv kurslarida taʼlim olishlarini tashkil etib borish.

Doimiy

3.

Strategik rejalashtirish va rivojlanish sohasida kadrlarning malakasi va kasbiy kompetensiyasini oshirib borish choralarini koʻrish.

Strategik rejalashtirish va rivojlanish sohasidagi mutaxassislarning kompetensiyalarini oshirishga qaratilgan kompleks chora-tadbirlar rejasini tasdiqlash. Bunda quyidagilarni nazarda tutish:

vazirlik va idoralar, mahalliy hokimliklar xodimlarini oʻqitish;

strategik rejalashtirish boʻyicha masofaviy oʻqitish tizimini joriy etish;

strategik rejalashtirish sohasida kadrlar tayyorlash, malakasini oshirish va sertifikatlash tizimini joriy etish.

2026-yil mart

Davlat siyosati va boshqaruvi akademiyasi,

Strategik rivojlanish va islohotlar agentligi,

Boshqaruv samaradorligi agentligi,

Oliy taʼlim, fan va innovatsiyalar vazirligi

4.

Strategik rejalashtirish va rivojlanish sohasida pedagog kadrlarning professional korpusini yaratish.

1. Strategik rejalashtirish va rivojlanishga ixtisoslashgan ilgʻor xorijiy mamlakatlarning ilmiy-tadqiqot muassasalari bilan hamkorlikni yoʻlga qoʻyish.

2. Strategik rejalashtirish boʻyicha oʻquv dasturlarni shakllantirish uchun malakali professor-oʻqituvchilarni va mutaxassislarni jalb etish.

3. Xorijiy ekspertlarni jalb etgan holda strategik rejalashtirish va rivojlanish sohasidagi yuqori malakali pedagoglarni tayyorlash.

2026-yil noyabr

Davlat siyosati va boshqaruvi akademiyasi

5.

Strategik islohotlarni nazarda tutuvchi normativ-huquqiy hujjatlar loyihalarini kelishish jarayonlarini raqamlashtirish.

Normativ-huquqiy hujjatlar loyihasini ishlab chiqish va kelishishning yagona elektron tizimida strategik islohotlarni nazarda tutuvchi masalalar aks etgan qonunchilik hujjatlari loyihalarini Strategik rivojlanish va islohotlar agentligi bilan majburiy kelishishni taʼminlash imkoniyatini yaratish.

2026-yil fevral

Adliya vazirligi

6.

Strategik rejalashtirish va rivojlanish tizimini joriy qilish bilan bogʻliq vazifalarning samarali bajarilishini taʼminlash maqsadida Strategik rivojlanish va islohotlar agentligining moddiy-texnik bazasini mustahkamlash.

Agentlikning yangi yuklatilgan vazifalarini samarali bajarilishini taʼminlash uchun moddiy-texnika jihozlariga boʻlgan ehtiyojini aniqlash va zarur kompyuter texnikasi, server qurilmalari, kanselyariya vositalari, boshqa orgtexnika jihozlari hamda avtotransport vositalarini budjet va budjetdan tashqari mablagʻlar hisobidan xarid qilish (ajratish).

2025-yil dekabr

Strategik rivojlanish va islohotlar agentligi,

Iqtisodiyot va moliya vazirligi

Oʻzbekiston Respublikasi Prezidentining 2025-yil 30-oktabrdagi PF-201-son Farmoniga
2-ILOVA
Oʻzbekiston Respublikasi Prezidenti huzuridagi Strategik rejalashtirish va rivojlanish boʻyicha muvofiqlashtiruvchi kengash tomonidan faoliyati tashkillashtiriladigan tahliliy markazlar va ilmiy-tadqiqot muassasalari
roʻyxati

1.

Oʻzbekiston Respublikasi Prezidenti huzuridagi Strategik va mintaqalararo tadqiqotlar instituti

2.

Oʻzbekiston Respublikasi Prezidenti huzuridagi Qonunchilik va huquqiy siyosat instituti

3.

Oʻzbekiston Respublikasi Prezidenti Administratsiyasi huzuridagi Iqtisodiy tadqiqotlar va islohotlar markazi

4.

Oliy Majlis Qonunchilik palatasi huzuridagi Parlament tadqiqotlari instituti

5.

Oʻzbekiston Respublikasi Vazirlar Mahkamasi huzuridagi Makroiqtisodiy va hududiy tadqiqotlar instituti

6.

Oʻzbekiston xalqaro islomshunoslik akademiyasi

7.

Markaziy Osiyo xalqaro instituti

8.

Oʻzbekiston Respublikasi Tashqi ishlar vazirligi huzuridagi Xalqaro munosabatlar axborot-tahliliy markazi

9.

Oila va gender ilmiy-tadqiqot instituti

10.

Oʻzbekiston Respublikasi Kriminologiya tadqiqot instituti

Oʻzbekiston Respublikasi Prezidentining 2025-yil 30-oktabrdagi PF-201-son Farmoniga
3-ILOVA
Oʻzbekiston Respublikasi Prezidenti huzuridagi Strategik rivojlanish va islohotlar agentligiga yuklatiladigan qoʻshimcha vazifalar
roʻyxati
1. Tarmoqlar va hududlar rivojlanishining joriy holati, Oʻzbekiston Respublikasining boshqa mamlakatlar hamda xalqaro tashkilotlar va institutlar bilan hamkorligi samaradorligi toʻgʻrisida axborot toʻplash va tizimli tahlil qilish, shuningdek, mamlakatning kompleks va proaktiv rivojlanishini taʼminlashga qaratilgan taklif va tashabbuslarni ishlab chiqish.
2. Strategik rejalashtirish hujjatlari loyihalarini ishlab chiqishda vazirliklar va idoralarni uslubiy qoʻllab-quvvatlash, strategik rejalashtirish tizimi boʻyicha tavsiyalar va uslubiy koʻrsatmalar tayyorlash.
3. Ilgʻor xalqaro tajriba va davlat siyosatining ustuvor yoʻnalishlarini hisobga olgan holda strategik rejalashtirish va rivojlanish tizimini takomillashtirish boʻyicha takliflar ishlab chiqish.
4. Vazirlik va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining strategik rejalashtirish va rivojlanish hujjatlarini qonunchilik hujjatlari talablari va iyerarxiyaga muvofiq ishlab chiqish, amalga oshirish va ijrosini monitoring qilish sohasidagi faoliyatini muvofiqlashtirish.
5. Strategik rejalashtirish hujjatlarini amalga oshirish boʻyicha taqdim etilgan hisobotlarni tekshirish yoʻli bilan xulosalar berish va ularning bajarilishini nazorat qilish.
6. Strategik rejalashtirish hujjatlarining maqsadlariga erishilishini monitoring qilish.
Oʻzbekiston Respublikasi Prezidentining 2025-yil 30-oktabrdagi PF-201-son Farmoniga
4-ILOVA
Strategik islohotlarni nazarda tutuvchi normativ-huquqiy hujjatlar loyihalarini farqlash
mezonlari

T/r

Mezon

Strategik islohotlarni nazarda tutuvchi normativ-huquqiy hujjatlar

1.

Tushunchasi

Amaldagi tizim, soha yoki tarmoqdagi modelni tubdan oʻzgartirish, yaʼni institutsional, tarkibiy, huquqiy va funksional yangilanish orqali boshqaruvning, bozor mexanizmlarining yoki ijtimoiy xizmatlarning sifat jihatdan yangi modelini shakllantirishni nazarda tutuvchi, keng qamrovli va barqaror rivojlanishga yoʻnaltirilgan hujjatlar

2.

Mazmuni

Tubdan oʻzgartirish, yaʼni institutsional (tuzilma oʻzgarishi), tarkibiy (yangi organlar yaratish), huquqiy va funksional (yangi modellarni joriy etish) oʻzgarishlar orqali sifat jihatdan yangi tizim yaratish

3.

Maqsadi

Umummilliy strategik maqsadlarga erishishni taʼminlaydigan tub oʻzgarishlarni amalga oshirish

4.

Qamrovi

Tarmoq yoki sohaviy

5.

Hujjat turi

Qonun hamda Oʻzbekiston Respublikasi Prezidentining farmonlari va qarorlari loyihalari

Izoh: Oʻzbekiston Respublikasi Prezidenti huzuridagi Strategik rejalashtirish va rivojlanish boʻyicha muvofiqlashtiruvchi kengashga strategik islohotlarni nazarda tutuvchi normativ-huquqiy hujjatlar loyihalarini farqlash mezonlariga oʻzgartirish va qoʻshimchalar kiritish huquqi beriladi.
Oʻzbekiston Respublikasi Prezidentining 2025-yil 30-oktabrdagi PF-201-son Farmoniga
5-ILOVA
Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2021-yil 19-iyuldagi “Oʻzbekiston Respublikasi Strategik rivojlanish agentligini tashkil etish chora-tadbirlari toʻgʻrisida”gi PF-6264-son Farmonida:
(a) 1-bandda “Strategik rivojlanish agentligi” soʻzlari “Prezidenti huzuridagi Strategik rivojlanish va islohotlar agentligi” soʻzlari bilan almashtirilsin;
(b) 2 — 4-bandlar oʻz kuchini yoʻqotgan deb hisoblansin;
(v) 5-bandning birinchi xatboshisida “Strategik rivojlanish agentligini” soʻzlari “Prezidenti huzuridagi Strategik rivojlanish va islohotlar agentligini” soʻzlari bilan almashtirilsin;
(g) 7 va 9-bandlar oʻz kuchini yoʻqotgan deb hisoblansin;
(d) 12-bandda:
(i) ikkinchi — beshinchi xatboshilar chiqarib tashlansin;
(ii) oltinchi-yettinchi xatboshilar tegishincha ikkinchi-uchinchi xatboshilar deb hisoblansin;
(iii) uchinchi xatboshidagi “bosh” soʻzi chiqarib tashlansin;
(e) 1 — 3-ilovalar oʻz kuchini yoʻqotgan deb hisoblansin.
2. Oʻzbekiston Respublikasi Prezidentining 2022-yil 8-sentabrdagi “Strategik islohotlarni jadallashtirishning qoʻshimcha chora-tadbirlari toʻgʻrisida”gi PF-216-son Farmonida:
(a) 1-banddagi “Strategik islohotlar agentligi” soʻzlari “Strategik rivojlanish va islohotlar agentligi” soʻzlari bilan almashtirilsin;
(b) 2-band quyidagi tahrirda bayon etilsin:
“2. Quyidagilar Agentlikning asosiy vazifalari etib belgilansin:
mamlakatda strategik rejalashtirish tizimini muvofiqlashtirish, strategik rejalashtirish hujjatlari loyihalari ishlab chiqilishini va ularning amalga oshirilishini tartibga solish;
ijtimoiy soha, iqtisodiyot va boshqa ahamiyatga ega boʻlgan yoʻnalishlarda yaqin va uzoq xorij mamlakatlarida amalga oshirilayotgan islohotlar, tarkibiy oʻzgarishlar va ilgari surilayotgan tashabbuslarni (shu jumladan, xorijiy davlatlar rahbarlarining chiqishlari va nutqlarini) oʻrganishni tashkil qilish, mamlakatimizdagi ishlarning joriy holatini tahlil qilgan holda ularni Oʻzbekiston sharoitida implementatsiya qilish boʻyicha takliflarni ishlab chiqish, mazkur masalalar boʻyicha forumlar va boshqa tadbirlarni oʻtkazib borish;
mahalliy va xorijiy ekspertlarni jalb etgan holda alohida soha va tarmoqlarni isloh qilish boʻyicha takliflar ishlab chiqish, ularning amalga oshirilishini tashkil etish;
hududlarda ochiq muloqotlar doirasida aholining, shuningdek, tadbirkorlik subyektlarining bildirgan fikr va mulohazalari asosida ijtimoiy-iqtisodiy rivojlantirish, foydalanilmayotgan imkoniyatlarni ishga solish hamda fuqarolarni qiynayotgan muammolarni hal etish choralari yuzasidan taklif va tashabbuslarni ishlab chiqish;
davlat organlari va tashkilotlari tomonidan tarkibiy islohotlarni amalga oshirish uchun malakali xorijiy konsultant va ekspertlarni, shu jumladan, xalqaro moliya institutlari va xorijiy hukumat moliya tashkilotlarini hamda konsalting kompaniyalarini jalb etish jarayonini muvofiqlashtirish”;
(v) 3, 5 — 8-bandlar oʻz kuchini yoʻqotgan deb hisoblansin;
(g) 9-bandda:
(i) ikkinchi xatboshi quyidagi tahrirda bayon etilsin:
“Agentlik direktori maqomi, moddiy taʼminoti, tibbiy va transport xizmati koʻrsatish shart-sharoitlariga koʻra Oʻzbekiston Respublikasi Prezidentining maslahatchisi oʻrinbosariga tenglashtiriladi”;
(ii) uchinchi xatboshidagi “Prezidentining yordamchisi” soʻzlari “Prezidenti Administratsiyasi rahbari” soʻzlari bilan almashtirilsin;
(iii) toʻrtinchi xatboshidagi “Departament rahbari” soʻzlari “Oʻzbekiston Respublikasi Prezidentining strategik rivojlanish boʻyicha maslahatchisi” soʻzlari bilan almashtirilsin;
(iv) beshinchi xatboshida “Departament” soʻzi “Oʻzbekiston Respublikasi Prezidenti Administratsiyasi” soʻzlari bilan almashtirilsin;
(d) 1-ilova oʻz kuchini yoʻqotgan deb hisoblansin.
3. Oʻzbekiston Respublikasi Prezidentining 2023-yil 8-noyabrdagi “Oʻzbekiston Respublikasi Prezidenti huzuridagi Strategik islohotlar agentligi faoliyatini yanada takomillashtirish chora-tadbirlari toʻgʻrisida”gi PF-190-son Farmonida:
(a) 1 — 3 bandlar oʻz kuchini yoʻqotgan deb hisoblansin;
(b) 4-band quyidagi tahrirda bayon etilsin:
“4. Shunday tartib oʻrnatilsinki, unga muvofiq:
a) respublika ijro etuvchi hokimiyat organlari har oyda jalb qilingan xorijiy ekspertlar, konsultantlar va maslahatchilar tomonidan bajarilgan ishlar toʻgʻrisida batafsil maʼlumotni Strategik rivojlanish va islohotlar agentligiga taqdim qilib boradi;
b) Strategik rivojlanish va islohotlar agentligi jalb qilingan xorijiy ekspertlar, konsultantlar va maslahatchilar bilan joriy masalalarni muhokama qilish va hal qilishning maqbul yoʻllarini aniqlash uchun muntazam ravishda uchrashuvlar tashkil qiladi va tegishli takliflar tayyorlaydi;
v) istiqbolli tashabbuslarni ishlab chiqish maqsadida:
respublika ijro etuvchi hokimiyat organlari jalb qilingan xalqaro tashkilotlar va moliya institutlari, konsalting kompaniyalari, yetakchi xorijiy ilmiy-tadqiqot va ekspert muassasalari hamda mutaxassislarning ular faoliyati masalalariga oid rasmiy xulosa va hisobotlarini Strategik rivojlanish va islohotlar agentligiga taqdim etib boradi;
respublika ijro etuvchi hokimiyat organlari ijtimoiy soha, iqtisodiyot va boshqa ahamiyatga ega boʻlgan yoʻnalishlarni isloh qilish boʻyicha tashkil qilinayotgan xalqaro konferensiyalar, davra suhbatlari va seminarlarning dasturlarini Strategik rivojlanish va islohotlar agentligiga taqdim qilib boradi;
respublikaning xorijdagi diplomatik vakolatxonalari har oyda tegishli davlatlarning ilgʻor tajribasi va amaliyoti toʻgʻrisidagi batafsil maʼlumotni Strategik rivojlanish va islohotlar agentligiga taqdim etib boradi”;
(v) 1-ilova oʻz kuchini yoʻqotgan deb hisoblansin.
4. Oʻzbekiston Respublikasi Prezidentining 2024-yil 31-dekabrdagi “Mamlakatning ijtimoiy, siyosiy va iqtisodiy rivojlanish sohalaridagi strategik tahlil va tadqiqot qilish faoliyatini samarali tashkil etish chora-tadbirlari toʻgʻrisida”gi PF-467-son Farmonida:
(a) 1-bandda “Tahliliy va tadqiqot tuzilmalar faoliyatini tashkil qilish boʻyicha” soʻzlari “Oʻzbekiston Respublikasi Prezidenti huzuridagi Strategik rejalashtirish va rivojlanish boʻyicha” soʻzlari bilan almashtirilsin;
(b) 2-bandda:
(i) quyidagi mazmundagi uchinchi — oltinchi xatboshilar bilan toʻldirilsin:
“ijtimoiy-iqtisodiy, ijtimoiy-siyosiy, texnologik, insonparvarlik, ekologik va boshqa sohalardagi dolzarb muammolar hamda chaqiriqlarni tahlil qilish, ularni hal etish boʻyicha takliflar ishlab chiqish, shuningdek, mamlakatni strategik rivojlantirish boʻyicha gʻoya va tashabbuslar yaratish;
“Oʻzbekiston — 2030” strategiyasi, konsepsiyalar, strategiyalar va dasturlar (“yoʻl xaritalari”, chora-tadbirlar rejalari) bilan muvofiqligini taʼminlash nuqtai nazaridan strategik tashabbuslarni ishlab chiqish va ekspertizadan oʻtkazishni muvofiqlashtirish;
konsepsiyalar, strategiyalar va dasturlarning (“yoʻl xaritalari”, chora-tadbirlar rejalari) “Oʻzbekiston — 2030” strategiyasi maqsadlari bilan toʻliq bogʻliqligi va uygʻunligini taʼminlash, shuningdek, ularning amalga oshirilishi samaradorligini monitoring qilish va baholash;
jamiyat va davlat hayotining turli sohalari kesimida mamlakat rivojlanishini uzoq muddatli rejalashtirish boʻyicha faoliyatni tashkil etish”;
(ii) uchinchi — oʻninchi xatboshilar tegishincha yettinchi — oʻn toʻrtinchi xatboshilar deb hisoblansin;
(v) 3-band quyidagi tahrirda bayon etilsin:
“3. Belgilansinki:
Muvofiqlashtiruvchi kengash vazirlik va idoralar, mahalliy ijro etuvchi hokimiyat organlari, shuningdek, davlat tahliliy markazlari va ilmiy-tadqiqot muassasalarining strategik rejalashtirish va rivojlantirish sohasidagi faoliyatini muvofiqlashtirish uchun masʼul boʻlgan idoralararo-kollegial organ hisoblanadi;
Muvofiqlashtiruvchi kengash faoliyatini toʻgʻri yoʻlga qoʻyish, umumiy muvofiqlashtirish hamda idoralararo hamkorlikni taʼminlash Oʻzbekiston Respublikasi Prezidentining strategik rivojlanish boʻyicha maslahatchisi tomonidan amalga oshiriladi;
Muvofiqlashtiruvchi kengash birinchi va ikkinchi darajali strategik rejalashtirish hujjatlari loyihalarini ularni qabul qilishning maqsadga muvofiqligi nuqtai nazaridan koʻrib chiqadi;
Muvofiqlashtiruvchi kengash tomonidan asosiy vazirlik va idoralar tahliliy boʻlinmalarining (departament, boshqarmalar) faoliyati muvofiqlashtiriladi;
respublikani rivojlantirish boʻyicha strategik tashabbuslar loyihalarini ishlab chiqishga jalb qilingan asosiy vazirlik va idoralar rahbarlarining birinchi oʻrinbosarlari tadqiqot markazlarini axborot-tahliliy materiallar bilan taʼminlash hamda Muvofiqlashtiruvchi kengash bilan hamkorlik qilishga masʼul boʻladi;
Muvofiqlashtiruvchi kengashning yigʻilishlari har chorakda oraliq majlislar shaklida tashkil etiladi”;
(g) 1-ilovaning matni quyidagi tahrirda bayon etilsin:
“Oʻzbekiston Respublikasi Prezidenti huzuridagi Strategik rejalashtirish va rivojlanish boʻyicha muvofiqlashtiruvchi kengash
tarkibi

1.

S.U. Umurzakov

—

Oʻzbekiston Respublikasi Prezidentining strategik rivojlanish boʻyicha maslahatchisi, Kengash raisi

2.

E.T. Aripov

—

Oʻzbekiston Respublikasi Prezidenti huzuridagi Xavfsizlik kengashi kotibining birinchi oʻrinbosari — Strategik va mintaqalararo tadqiqotlar instituti direktori, Kengash raisi oʻrinbosari

3.

M.M. Kamilov

—

Oʻzbekiston Respublikasi Prezidenti maslahatchisi oʻrinbosari — Oʻzbekiston xalqaro islomshunoslik akademiyasi rektori

4.

J.A. Vahobov

—

Oʻzbekiston Respublikasi Prezidenti maslahatchisining oʻrinbosari — Markaziy Osiyo xalqaro instituti direktori

5.

M.X. Raxmankulov

—

Qonunchilik va huquqiy siyosat instituti direktori

6.

Lavozimi boʻyicha

—

Iqtisodiy tadqiqotlar va islohotlar markazi direktori

7.

B.B. Raxmatov

—

Strategik rivojlanish va islohotlar agentligi direktori

8.

K.K. Mardonov

—

Oʻzbekiston Respublikasi Prezidenti Administratsiyasi departamenti boshligʻining birinchi oʻrinbosari

9.

R.R. Mirzayev

—

Oʻzbekiston Respublikasi Prezidenti Administratsiyasi departamenti boshligʻining oʻrinbosari

10.

M.R. Abdullayev

—

Hisob palatasi raisining birinchi oʻrinbosari

11.

Sh.A. Ayupov

—

Fanlar akademiyasi prezidenti

12.

B.O. Saidov

—

tashqi ishlar vaziri

13.

L.Sh. Kudratov

—

investitsiyalar, sanoat va savdo vaziri

14.

A.A. Abduxakimov

—

ekologiya, atrof-muhitni muhofaza qilish va iqlim oʻzgarishi vaziri

15.

I.Yu. Abdurahmonov

—

qishloq xoʻjaligi vaziri

16.

Sh.R. Xamrayev

—

suv xoʻjaligi vaziri

17.

J.T. Mirzamahmudov

—

energetika vaziri

18.

I.R. Maxkamov

—

transport vaziri

19.

K.A. Sharipov

—

oliy taʼlim, fan va innovatsiyalar vaziri

20.

Sh.A. Vafayev

—

Tiklanish va taraqqiyot jamgʻarmasi ijrochi direktori

21.

N.N. Saydullayev

—

Markaziy bank raisining birinchi oʻrinbosari

22.

U.K. Abidxadjayev

—

iqtisodiyot va moliya vaziri oʻrinbosari — Makroiqtisodiy va hududiy tadqiqotlar instituti direktori

23.

S.A. Valiyev

—

Xalqaro munosabatlar axborot-tahliliy markazi direktori

24.

S.S. Safoyev

—

Jahon iqtisodiyoti va diplomatiya universiteti rektori

25.

B.S. Mirzayev

—

“Toshkent irrigatsiya va qishloq xoʻjaligini mexanizatsiyalash muhandislari instituti” milliy tadqiqot universiteti rektori

26.

Sh.A. Nurulloyev

—

Markaziy Osiyo atrof-muhit va iqlim oʻzgarishini oʻrganish universiteti (Green University) rektori

27.

E.S. Tulyakov

—

“Taraqqiyot strategiyasi” markazi ijrochi direktori

28.

B.M. Bekmurodov

—

“Yuksalish” umummilliy harakati raisi

29.

F.F. Kaimbayev

—

Oʻzbekiston Respublikasi Prezidenti Administratsiyasi shoʻba mudiri, Kengash kotibi

Izoh:
1. Kengash aʼzolari boshqa ishga oʻtgan taqdirda, uning tarkibiga ushbu lavozimga yangi tayinlangan yoki tegishli funksiyalarni bajarish zimmasiga yuklangan shaxslar kiritiladi.
2. Kengash raisiga zarur hollarda Kengash ishiga vazirlik, idoralar va tahliliy muassasalarni jalb etish vakolati beriladi”;
(d) 6-ilovaning matni quyidagi tahrirda bayon etilsin:
“Hududlarni strategik rejalashtirish va rivojlantirish boʻyicha tahliliy va tadqiqot tuzilmalari faoliyatini tashkil qilish boʻyicha ishchi guruhi
tarkibi

1.

U.K. Abidxadjayev

—

Makroiqtisodiy va hududiy tadqiqotlar instituti direktori, Ishchi guruh rahbari

2.

I.I. Norqulov

—

iqtisodiyot va moliya vazirining birinchi oʻrinbosari

3.

Lavozimi boʻyicha

—

investitsiyalar, sanoat va savdo vazirining birinchi oʻrinbosari

4.

M.A. Omarov

—

transport vazirining birinchi oʻrinbosari

5.

B.R. Mamatkarimov

—

energetika vazirining birinchi oʻrinbosari

6.

F.R.Xamidova

—

togʻ-kon sanoati va geologiya vazirining birinchi oʻrinbosari

7.

O.A. Pekos

—

raqamli texnologiyalar vazirining birinchi oʻrinbosari

8.

A.M. Qosimov

—

qishloq xoʻjaligi vaziri oʻrinbosari

9.

Lavozimi boʻyicha

—

suv xoʻjaligi vazirining birinchi oʻrinbosari

10.

M.Sh. Istamov

—

adliya vaziri oʻrinbosari

11.

N.D. Xusanov

—

Davlat aktivlarini boshqarish agentligi direktorining birinchi oʻrinbosari

12.

F.J. Pulatov

—

Kadastr agentligi direktori

13.

A.X. Suvankulov

—

“Oʻzsuvtaʼminot” AJ raisi v.b.

14.

D.A. Vaxobov

—

Savdo-sanoat palatasi raisi

15.

Lavozimi boʻyicha

—

Qoraqalpogʻiston Respublikasi Vazirlar Kengashi Raisining hamda viloyatlar va Toshkent shahri hokimlarining birinchi oʻrinbosarlari

Izoh:
1. Ishchi guruh aʼzolari boshqa ishga oʻtgan taqdirda, uning tarkibiga ushbu lavozimga yangi tayinlangan yoki tegishli funksiyalarni bajarish zimmasiga yuklangan shaxslar kiritiladi.
2. Ishchi guruh rahbariga zarur hollarda Ishchi guruh faoliyatiga vazirlik, idoralar va tahliliy muassasalarni jalb etish vakolati beriladi”.
5. Oʻzbekiston Respublikasi Prezidentining 2025-yil 5-maydagi “Istiqbolli kadrlarni maqsadli tayyorlash hamda ularni davlat boshqaruvi va xizmatiga samarali jalb etish tizimini yanada takomillashtirish chora-tadbirlari toʻgʻrisida”gi PF-78-son Farmonining 21-bandi va 22-bandining “a”kichik bandidagi “Tahliliy va tadqiqot tuzilmalari faoliyatini tashkil qilish boʻyicha” soʻzlari “Oʻzbekiston Respublikasi Prezidenti huzuridagi Strategik rejalashtirish va rivojlanish boʻyicha” soʻzlari bilan almashtirilsin.
6. Oʻzbekiston Respublikasi Prezidentining 2025-yil 10-fevraldagi “Tahliliy va tadqiqotchilik faoliyatini tashkil qilish boʻyicha qoʻshimcha chora-tadbirlar toʻgʻrisida”gi PQ-48-son qarorining 1-bandidagi “Tahliliy va tadqiqot tuzilmalari faoliyatini tashkil qilish boʻyicha” soʻzlari “Oʻzbekiston Respublikasi Prezidenti huzuridagi Strategik rejalashtirish va rivojlanish boʻyicha” soʻzlari bilan almashtirilsin.
(Qonunchilik maʼlumotlari milliy bazasi, 01.11.2025-y., 06/25/201/1000-son)