Agrosanoat majmuida gʻalla yetishtiruvchilarning moddiy manfaatdorligini oshirish hamda isteʼmolchilarni sifatli don mahsulotlari bilan taʼminlash, gʻalla bozorida davlat ishtirokini yanada kamaytirgan holda ichki bozorni sifatli don mahsulotlari bilan taʼminlash, shuningdek, ushbu sohada davlat nazoratini kuchaytirish va yanada takomillashtirish maqsadida:

1. Vazirlar Mahkamasi hamda Iqtisodiyot va moliya vazirligining Agrosanoat majmui ustidan nazorat qilish inspeksiyasining boʻysunuvini Qishloq xoʻjaligi vazirligidan uning faoliyatini moliyalashtirishning amaldagi tartibini saqlab qolgan holda Vazirlar Mahkamasiga oʻtkazish toʻgʻrisidagi taklifiga rozilik berilsin.

2. Vazirlar Mahkamasi huzuridagi Agrosanoat majmui ustidan nazorat qilish inspeksiyasiga (keyingi oʻrinlarda — Oʻzagroinspeksiya) quyidagi qoʻshimcha vazifalar yuklansin:

bugʻdoyni qabul qilish, saqlash va xaridorlarga yuklab joʻnatish jarayonida yuzaga keladigan tabiiy kamayish miqdorini hisobdan chiqarishni nazorat qilish;

Qishloq xoʻjaligini davlat tomonidan qoʻllab-quvvatlash jamgʻarmasining tijorat vakili tomonidan bugʻdoy yetishtiruvchilardan xarid qilinadigan bugʻdoyni qabul qilish va sotish jarayonlarida standart talablariga koʻra sifat koʻrsatkichlari boʻyicha (muvofiqlik sertifikati) hamda bugʻdoy sinflari (sifat sertifikati) boʻyicha sertifikatlashni nazorat qilish;

import qilinayotgan qishloq xoʻjaligi ekinlarining urugʻlik va koʻchat materiallarida geni modifikatsiyalangan organizmlarning (GMO) mavjudligini aniqlash;

idoraviy boʻysunuvi va tashkiliy-huquqiy shaklidan qatʼi nazar barcha korxonalar, muassasalar hamda tashkilotlarda qishloq xoʻjaligi, melioratsiya va yoʻl-qurilish texnikalarining texnik holati, ularning ekspluatatsiya qilinishi samaradorligi, shuningdek, servis va taʼmirlash xizmatlarining sifati, qishloq xoʻjaligi texnikasi va texnologiyalarini majburiy va davriy sinovdan oʻtkazish ustidan nazoratni amalga oshirish;

sohada davlat nazoratini amalga oshirish va hisobotlarni yuritish jarayonlarini toʻliq raqamlashtirish.

3. Quyidagilar:

Vazirlar Mahkamasi huzuridagi Agrosanoat majmui ustidan nazorat qilish inspeksiyasining asosiy vazifalari 1-ilovaga muvofiq;

Vazirlar Mahkamasi huzuridagi Agrosanoat majmui ustidan nazorat qilish inspeksiyasining tashkiliy tuzilmasi 2-ilovaga muvofiq tasdiqlansin.

4. Belgilansinki:

Oʻzagroinspeksiya agrosanoat majmuida davlat nazorati va tekshiruvni amalga oshiruvchi mustaqil respublika ijro etuvchi hokimiyat organi hisoblanadi;

Oʻzagroinspeksiya Vazirlar Mahkamasiga bevosita hisobdordir;

Oʻzagroinspeksiya boshligʻi Oʻzbekiston Respublikasi Prezidenti tomonidan, uning oʻrinbosari Vazirlar Mahkamasi tomonidan lavozimga tayinlanadi hamda lavozimidan ozod qilinadi.

5. Iqtisodiyot va moliya vazirligi Oʻzagroinspeksiya bilan birgalikda uch oy muddatda davlat zaxirasidagi bugʻdoyni tadbirkorlik subyektlarining don korxonalarida saqlash tartibini ishlab chiqsin va tasdiqlasin.

Bunda davlat zaxirasidagi donni yangilash, saqlash jarayonida don sifatining yuqori darajada boʻlishini taʼminlash, miqdoriy yoʻqotishlarga yoʻl qoʻymaslik hamda tabiiy yoʻqotishning eng past darajada boʻlishini taʼminlash choralari nazarda tutilsin.

6. Qishloq xoʻjaligi vazirligi Oʻzagroinspeksiya bilan birgalikda ikki oy muddatda yer uchastkalari egalari, foydalanuvchilari, ijarachilari va mulkdorlariga yetkazilgan zararlar, shuningdek, qishloq xoʻjaligi va oʻrmon xoʻjaligi ishlab chiqarishi nobudgarchiliklari hamda yerlarning qishloq xoʻjaligi muomalasidan chiqishiga sabab boʻlgan hollarda yetkazilgan zarar oʻrnini qoplash tartibini ishlab chiqsin hamda Vazirlar Mahkamasiga kiritsin.

7. Oʻzbekiston Respublikasi Prezidentining ayrim hujjatlariga 3-ilovaga muvofiq oʻzgartirish va qoʻshimchalar kiritilsin.

8. Oʻzagroinspeksiya manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

9. Mazkur Farmon ijrosini samarali tashkil qilishga masʼul va shaxsiy javobgar etib Bosh vazirning oʻrinbosarlari J.A. Xodjayev va J.A. Qoʻchqorov belgilansin.

Farmon ijrosini nazorat qilish, masʼul vazirlik va idoralar faoliyatini muvofiqlashtirish Oʻzbekiston Respublikasi Bosh vaziri A.N. Aripov zimmasiga yuklansin.

1. Qishloq xoʻjaligi sohasidagi qonunchilik hujjatlari talablariga rioya etilishi ustidan davlat nazoratini amalga oshirish, jumladan:

qishloq xoʻjaligi ekinlarining Oʻzbekiston Respublikasi hududlarining tuproq-iqlim sharoitidan kelib chiqqan holda joylashtirilishi ustidan nazoratni amalga oshirish;

qishloq xoʻjaligi ekinlarini ekish va ekish bilan bogʻliq hamda oʻsish (vegetatsiya) davrida bajariladigan agrotexnik tadbirlarning oʻz vaqtida va sifatli amalga oshirilishini nazorat qilish;

paxta, boshoqli don va boshqa qishloq xoʻjaligi ekinlari urugʻlariga davlat tomonidan buyurtma berish, urugʻ tayyorlash va uni qayta ishlash hamda saqlash boʻyicha talablarga rioya qilinishini nazorat qilish;

qishloq xoʻjaligi va oziq-ovqat mahsulotlari zaxiralarini shakllantirish boʻyicha talablar bajarilishi ustidan nazoratni amalga oshirish;

paxta, boshoqli don va boshqa qishloq xoʻjaligi ekinlari hosili hamda ularning urugʻlari, shuningdek, ulardan qayta ishlangan mahsulotlarning sifati, ulardan oqilona hamda maqsadli foydalanilishi, ularning sifatli saqlanishi hamda nobudgarchiligi kamaytirilishi ustidan nazoratni amalga oshirish;

qishloq xoʻjaligi ekinlari navlarining genetik sofligi va urugʻlari sifati sohasidagi davlat siyosatining ijro qilinishi, akkreditatsiya sohasiga muvofiq urugʻlarni, mevali daraxt va tok koʻchatlarini sertifikatlash, urugʻ hamda koʻchat materiallarining sifatini aniqlash va nazorat qilish boʻyicha ishlarni amalga oshirish;

korxonalar tomonidan paxta texnik chigitining toʻliq texnologik siklda maqsadli qayta ishlaganligi hamda ularning mahsulot sifatini tasdiqlovchi gigiyenik xulosa va muvofiqlik sertifikatlariga egaligini tahlil qilish;

don saqlanayotgan korxonalarda uning sifati va miqdori boʻyicha toʻgʻri saqlanishini nazorat qilish;

qishloq xoʻjaligiga moʻljallangan yerlardan maqsadli foydalanish, qishloq xoʻjaligi ekinlarini joylashtirish, ekish va parvarishlash, ekinlar navlarini sinash boʻyicha amalga oshirilgan ishlar yuzasidan nazorat va monitoringni amalga oshirish;

idoraviy boʻysunuvi va tashkiliy-huquqiy shaklidan qatʼi nazar barcha korxonalar, muassasalar hamda tashkilotlarda qishloq xoʻjaligi, melioratsiya va yoʻl-qurilish texnikalarining texnik holati, ularning ekspluatatsiya qilinishi samaradorligi, shuningdek, servis va taʼmirlash xizmatlarining sifati, qishloq xoʻjaligi texnikasi va texnologiyalarini majburiy va davriy sinovdan oʻtkazish ustidan nazoratni amalga oshirish;

qishloq xoʻjaligiga moʻljallangan yerlarni muhofaza qilish va ulardan maqsadli foydalanilishi ustidan nazoratni amalga oshirish.

2. Agrosanoat majmui sohasida qonunchilik hujjatlari ijrosini tahlil qilib borish, tahlil natijalari boʻyicha sohadagi qonunchilik hujjatlarini va normativ hujjatlarni takomillashtirish yuzasidan takliflar ishlab chiqish.

3. Eksport-import va respublika ichidagi tashishlarda paxta, boshoqli don va boshqa qishloq xoʻjaligi ekinlari hosili, ularning urugʻlari hamda ulardan qayta ishlangan mahsulotlar sifatini majburiy davlat tekshiruvidan oʻtkazish.

4. Huquqbuzarliklarni aniqlash, ularning kelib chiqish sabablari va shart-sharoitlarini bartaraf etish choralarini koʻrish borasida kompleks chora-tadbirlarni amalga oshirish.

5. Qonunchilik hujjatlarida belgilangan tartibda maʼmuriy huquqbuzarliklar toʻgʻrisidagi ishlarni yuritish, vakolati doirasida toʻgʻridan-toʻgʻri maʼmuriy huquqbuzarliklar toʻgʻrisida bayonnomalar rasmiylashtirish va aybdor shaxslarni jarimaga tortish.

1. Oʻzbekiston Respublikasi Prezidentining 2018-yil 27-iyuldagi PF-5490-son Farmoni bilan tasdiqlangan Tekshiruvlarni elektron roʻyxatga olish yagona tizimida roʻyxatdan oʻtkazish orqali vakolatli organni xabardor etish tartibida oʻtkaziladigan tekshiruvlar roʻyxatida:

a) 5-pozitsiyada:

“Tekshiruvlar (nazorat funksiyalari)” ustunidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin;

“Nazorat qiluvchi organ” ustunidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin;

b) izohning oltinchi xatboshisidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

2. Oʻzbekiston Respublikasi Prezidentining 2018-yil 28-avgustdagi PF-5527-son Farmoni bilan tasdiqlangan Oʻzbekiston Respublikasi Prezidenti hujjatlari va Oʻzbekiston Respublikasi Hukumati qarorlari bilan tuzilgan va tugatilayotgan idoralararo kollegial organlar roʻyxatining 16-pozitsiyasi “Tugatilayotgan organning funksiyalarini bajaruvchi (vakolatlariga aloqador qismida) subyektlar” ustunidagi “Qishloq xoʻjaligi vazirligi huzuridagi” soʻzlari “Vazirlar Mahkamasi huzuridagi” soʻzlari bilan almashtirilsin.

3. Oʻzbekiston Respublikasi Prezidentining 2019-yil 17-iyundagi “Qishloq xoʻjaligida yer va suv resurslaridan samarali foydalanish chora-tadbirlari toʻgʻrisida”gi PF-5742-son Farmonining 5-bandi beshinchi xatboshisidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

4. Oʻzbekiston Respublikasi Prezidentining 2022-yil 21-dekabrdagi PF-269-son Farmoni bilan tasdiqlangan 2023-yil 1-yanvardan boshlab tashkiliy boʻysunuvi oʻzgarayotgan respublika davlat boshqaruvi organlari roʻyxatining 23-pozitsiyasi chiqarib tashlansin.

5. Oʻzbekiston Respublikasi Prezidentining 2023-yil 10-iyundagi “Maʼmuriy islohotlar doirasida qishloq xoʻjaligi va oziq-ovqat sohasida davlat boshqaruvini samarali tashkil qilish chora-tadbirlari toʻgʻrisida”gi PF-90-son Farmonida:

a) 1-bandning sakkizinchi xatboshisi chiqarib tashlansin;

b) 2-ilovadagi “Agrosanoat majmui ustidan nazorat qilish inspeksiyasi” bloki chiqarib tashlansin;

v) 7-ilova oʻz kuchini yoʻqotgan deb hisoblansin.

6. Oʻzbekiston Respublikasi Prezidentining 2017-yil 27-fevraldagi PQ-2800-son qarori bilan tasdiqlangan Formali kiyim kiyilishi nazarda tutilayotgan vazirliklar, idoralar va tashkilotlar roʻyxatining “Idoraviy formali kiyim” boʻlimi 10-pozitsiyasidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

7. Oʻzbekiston Respublikasi Prezidentining 2017-yil 28-noyabrdagi “Paxtachilik tarmogʻini boshqarish tizimini tubdan takomillashtirish chora-tadbirlari toʻgʻrisida”gi PQ-3408-son qarorining 14-bandidagi “Moliya vazirligi Bosh prokuratura huzuridagi Iqtisodiy jinoyatlarga qarshi kurashish departamenti, Davlat soliq qoʻmitasi, Oʻzbekiston Respublikasi Bosh prokuraturasi huzuridagi Agrosanoat majmui va oziq-ovqat xavfsizligi taʼminlanishi ustidan nazorat qilish inspeksiyasi” soʻzlari “Iqtisodiyot va moliya vazirligi Bosh prokuratura huzuridagi Iqtisodiy jinoyatlarga qarshi kurashish departamenti, Vazirlar Mahkamasi huzuridagi Soliq qoʻmitasi va Agrosanoat majmui ustidan nazorat qilish inspeksiyasi” soʻzlari bilan almashtirilsin.

8. Oʻzbekiston Respublikasi Prezidentining 2018-yil 17-yanvardagi “Mamlakat iqtisodiyotining tarmoqlarini talab yuqori boʻlgan mahsulot va xom ashyo turlari bilan barqaror taʼminlash chora-tadbirlari toʻgʻrisida”gi PQ-3479-son qarorining 2-bandi “a” kichik bandining toʻrtinchi xatboshisidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

9. Oʻzbekiston Respublikasi Prezidentining 2018-yil 20-noyabrdagi PQ-4020-son qarori bilan tasdiqlangan Hududlarda zamonaviy issiqxona komplekslarini tashkil etishga koʻmaklashish boʻyicha ishchi guruhlar namunaviy tarkibining 4-bandidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

10. Oʻzbekiston Respublikasi Prezidentining 2019-yil 15-martdagi “Oʻzbekiston Respublikasi Qishloq xoʻjaligi vazirligi huzuridagi Agrosanoat majmui ustidan nazorat qilish inspeksiyasi faoliyatini tashkil etish chora-tadbirlari toʻgʻrisida”gi PQ-4241-son qarorida:

a) nomi va muqaddimasidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin;

b) 2-band quyidagi tahrirda bayon etilsin:

“2. Quyidagilar:

Oʻzbekiston Respublikasi Qishloq xoʻjaligi vazirligi huzuridagi Agrosanoat majmui ustidan nazorat qilish inspeksiyasini rivojlantirish jamgʻarmasi Vazirlar Mahkamasi huzuridagi Agrosanoat majmui ustidan nazorat qilish inspeksiyasini rivojlantirish jamgʻarmasi;

Oʻzbekiston Respublikasi Qishloq xoʻjaligi vazirligi huzuridagi Agrosanoat majmui ustidan nazorat qilish inspeksiyasi huzuridagi “Qishloq xoʻjaligi mahsulotlari sifatini baholash markazi” davlat muassasasi Vazirlar Mahkamasi huzuridagi Agrosanoat majmui ustidan nazorat qilish inspeksiyasi huzuridagi “Qishloq xoʻjaligi mahsulotlari sifatini baholash markazi” davlat muassasasi deb qayta nomlansin”;

v) 3-banddagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin;

g) 4¹-banddagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin;

d) 5-bandning uchinchi xatboshisidagi “Qishloq xoʻjaligi vazirligiga” soʻzlari “Vazirlar Mahkamasiga” soʻzlari bilan almashtirilsin;

e) 6-bandning oltinchi xatboshisidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

11. Oʻzbekiston Respublikasi Prezidentining 2020-yil 6-martdagi “Gʻalla yetishtirish, xarid qilish va sotishga bozor tamoyillarini keng joriy etish chora-tadbirlari toʻgʻrisida”gi PQ-4634-son qarorining 9-bandidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

12. Oʻzbekiston Respublikasi Prezidentining 2020-yil 27-iyundagi “Qishloq xoʻjaligi va melioratsiya texnikalarini sinash va sertifikatlash tizimini takomillashtirish chora-tadbirlari toʻgʻrisida”gi PQ-4760-son qarorining 10-bandidagi “Oʻzstandart” agentligi, Qishloq xoʻjaligi vazirligi huzuridagi” soʻzlari “Vazirlar Mahkamasi huzuridagi Oʻzbekiston texnik jihatdan tartibga solish agentligi hamda” soʻzlari bilan almashtirilsin.

13. Oʻzbekiston Respublikasi Prezidentining 2021-yil 22-iyuldagi PQ-5189-son qarori bilan tasdiqlangan Vazirliklar, davlat qoʻmitalari, davlat boshqaruvining boshqa organlari va xoʻjalik birlashmalari rahbarlari oʻrinbosarlarining faoliyati koʻrsatkichlarini ishlab chiqish, monitoring qilish va samaradorligini baholash tartibi toʻgʻrisidagi nizomga 2-ilovaning VII boʻlimi 2-bandidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

14. Oʻzbekiston Respublikasi Prezidentining 2021-yil 18-noyabrdagi “Toshkent shahrida sugʻoriladigan yerlardan samarali foydalanishni tashkil etish, qishloq xoʻjaligi va oziq-ovqat mahsulotlarini yetishtirishda boshqaruv tizimini joriy etish chora-tadbirlari toʻgʻrisida”gi PQ-17-son qarorining 7-bandi ikkinchi xatboshisidagi “Qishloq xoʻjaligi vazirligi huzuridagi” soʻzlari “Vazirlar Mahkamasi huzuridagi” soʻzlari bilan almashtirilsin.

15. Oʻzbekiston Respublikasi Prezidentining 2021-yil 23-noyabrdagi PQ-20-son qarori bilan tasdiqlangan “E-IJARA” axborot tizimiga va “E-auksion” elektron savdo platformasiga integratsiya qilish orqali idoralararo elektron maʼlumotlar almashinuvi yoʻlga qoʻyiladigan vazirliklar va idoralar roʻyxatining 15-bandidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

16. Oʻzbekiston Respublikasi Prezidentining 2022-yil 28-maydagi “Gʻallani yetishtirish va sotishda bozor tamoyilini joriy etishning qoʻshimcha chora-tadbirlari toʻgʻrisida”gi PQ-262-son qarori 2-bandi “v” kichik bandining toʻrtinchi xatboshisidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

17. Oʻzbekiston Respublikasi Prezidentining 2022-yil 13-sentabrdagi “Tadbirkorlik subyektlari faoliyatida tekshiruvlar oʻtkazishni muvofiqlashtirish tartibini takomillashtirish chora-tadbirlari toʻgʻrisida”gi PQ-374-son qarorining 2-bandi toʻrtinchi xatboshisidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.

18. Oʻzbekiston Respublikasi Prezidentining 2023-yil 24-martdagi PQ-101-son qarori bilan tasdiqlangan “Davlat mulki” axborot tizimiga integratsiya qilinadigan vazirlik va idoralarning axborot tizimlari roʻyxatining 9-pozitsiyasi “Vazirlik va idoralar nomi” ustunidagi “Qishloq xoʻjaligi vazirligi” soʻzlari “Vazirlar Mahkamasi” soʻzlari bilan almashtirilsin.